Sualtı qayıq

ABŞ niyə sualtı qayıqlarını Rusiya sahillərinə göndərir

32
Pentaqon Rusiyanın şimal sərhədlərinə gizli "USS Seawolf" atom sualtı qayığını göndərib. Hərbi ekspertlər əmindirlər ki, bu, Moskvaya siqnaldır. Moskva da kənarda qalmır və okeanın o tayındakı həmkarlarına öz siqnallarını göndərir.

BAKI, 2 sentyabr — Sputnik, Nikolay Protopopov. Pentaqon Rusiyanın şimal sərhədlərinə gizli "USS Seawolf" atom sualtı qayığını göndərib. Məqsəd Rusiyanın atom sualtı qayıqlarının marşrutlarını izləməkdir. Hərbi ekspertlər əmindirlər ki, bu, Moskvaya siqnaldır. Bəs Moskva buna nə cavab verəcək? Ətraflı RİA Novosti-nin materialında.

"Dəniz canavarı"nın yürüşü

Amerikalılar "USS Seawolf" atom sualtı qayığının Norveçə gəlişini açıq şəkildə bəyan ediblər. Pentaqonun ən gizli sualtı qayıqlarından birinin fotoşəkilləri qurumun sosial şəbəkələrdəki səhifələrində dərc olunub. ABŞ-ın sualtı qüvvələrinin komandanı vitse-admiral Deril Kodl isə qürurla vurğulayıb ki, sualtı qayığın yerdəyişməsi amerikalı sualtı dənizçilərin hərəkətlərinin qlobal xarakterini və dünya okeanının istənilən yerində vəzifələrin yerinə yetirilməsinin mümkünlüyünü nümayiş etdirir.

Sualtı gəmilər qrupunun komandanı kontr-admiral Entoni Karullonun sözlərinə görə, "USS Seawolf" atom sualtı qayığının Norveç sahillərində baza salması ABŞ-ın onsuz da geniş olan sualtı müharibə imkanlarını artırır və Vaşinqtonun şimalda dəniz təhlükəsizliyini təmin etməklə bağlı dəyişməz qətiyyətini təsdiq edir.

ABŞ-ın hərbi dəni̇z qüvvələrinin hazırda "Seawolf" sinfinə aid üç sualtı qayığı var. Onlar 1980-ci illərdə rəqib tərəfindən tamamilə nəzarət edilən ərazilərdə fəaliyyət üçün yaradılıb və tikilib. Bu, yüksək gizliliyi ilə fərqlənən son dərəcə sakit bir sualtı qayıqdır. Bu sualtı qayıq torpedaları, minaları, "Harpun" və ya "Tomahavk" raketlərini daşıyır.

Yüz metrlik sualtı qayığın mühərrikləri onu saatda 65 kilometrə qədər sürətləndirir. ABŞ Hərbi Dəniz Qüvvələrinin 30-a yaxın belə sualtı qayıq alması planlaşdırılırdı. Lakin amerikalılar üçü ilə kifayətləniblər: soyuq müharibə qurtardıqdan sonra onlarla belə mürəkkəb və bahalı gəmi Amerika donanmasına sadəcə lazım deyildi.

Pentaqon bildirir ki, "Seawolf" Banqor hərbi dəniz bazasından (Vaşinqton ştatı) ABŞ-ın İkinci donanmasının (Şimali Atlantikada) məsuliyyət zonasına gəlib. Bu sualtı qayıq hələ ki Norveçin Tromsö sahillərində gözləyəcək – düz Rusiyanın sualtı raket daşıyıcılarının marşrutları yaxınlığında.

Xatırladaq ki, ABŞ-ın İkinci donanması yalnız bir neçə il əvvəl bərpa olunub. Soyuq müharibə illərində bu donanma Amerika hərbi dəniz qüvvələrinin ən böyük donanması idi. Donanma Atlantik okeanın akvatoriyasının, Sakit və Şimal Buzlu okeanların akvatoriyalarının hissələrinə cavabdeh idi. Gəmilər və sualtı qayıqlar bir neçə böyük əməliyyatlarda, məsələn, 1960-cı illərin əvvəllərində Kubanın blokadasında iştirak edib. Donanma büdcəyə qənaət etmək üçün 2011-ci ildə ləğv edilib, lakin yeddi il sonra "şimalda Rusiya donanmasının qarşısının alınması üçün" bərpa olunub.

"Amerikalıların etdiklərini "bayraq nümayişi" adlandırmaq olar. Tromsö heç vaxt atom sualtı qayıqları üçün daimi baza yeri kimi istifadə edilməyib. Burada təmir aparıla bilər, ekipaj isə istirahət edir. Sonra "Seawolf" təbii ki Rusiyanın Şimal donanmasının məsuliyyət zonasına — Barents dənizinə yollanacaq. Yəqin ki, qayıq buzun altına keçəcək: avqust bunun üçün münasib vaxtdır", – Sankt-Peterburq Sualtı Dənizçilər Klubunun sədri, I dərəcəli kapitan İqor Kurdin RİA Novosti ilə söhbətində bildirib.

Laxlamış nüfuz

Rusiyanın Şimal donanmasının sabiq komandanı Vyaçeslav Popov bu "bayraq nümayişi"nin hərbi-siyasi aspektinə diqqət çəkir.

"ABŞ Arktik zonaya yalnız Rusiya Hərbi Dəniz Qüvvələrinin nəzarət etmədiyini göstərmək istəyir. Vaşinqton regionda hərbi mövcudluğunu göstərmək niyyətindədir. Amerikalılar burada kəşfiyyat missiyaları aparıblar, aparırlar və aparacaqlar. Amma Rusiya dənizçiləri, əlbəttə ki, onların bütün hərəkətlərini izləyəcək", – admiral qeyd edib.

Maraqlıdır ki, "dəniz canavarı"nın gəlib çatmasından dərhal sonra, nüvə silahı daşımağa qadir olan altı B-52 "Stratofortress" strateji bombardmançısı Norveç Hərbi Hava Qüvvələrinin qırıcıları ilə keçirilən təlimlərdə iştirak edib.

Bombardmançılar eskadrilyası Avropa və Şimali Amerikada yerləşən 30 NATO ölkəsinin hava məkanından keçib. ABŞ-ın Avropa Komandanlığının bəyanatında deyilir ki, bu cür uçuş bombardmançı əməliyyat qrupunun müntəzəm missiyaları çərçivəsində unikal olub. "Müttəfiq Səması" adlı missiya NATO çərçivəsində həmrəyliyin nümayişinə, döyüş hazırlığının artırılmasına və birgə əməliyyat əməkdaşlığının gücləndirilməsinə yönəlib.

Təyyarələr iki komandaya bölünüb. Dörd ədəd bombardmançıdan ibarət birinci qrupun marşrutu Avropa üzərindən keçib. Qalanlar isə eyni anda ABŞ və Kanada üzərində uçublar. Üstəlik, bombardmançılar onları müşayiət edən NATO-nun müxtəlif ölkələrinin qırıcıları ilə qarşılıqlı əlaqədə olub və səmada yanacaqla təchiz edilib. Ekspertlərin fikrincə, aviasiyanın bu cür irimiqyaslı və nümunəvi təlimlərini də Rusiyaya yönəlmiş siqnal kimi nəzərdən keçirmək olar.

Cavab reaksiyası

Bununla yanaşı, Moskva da kənarda qalmır və okeanın o tayındakı həmkarlarına öz siqnallarını göndərir. Belə ki, ötən həftə Qərb mediasında Rusiyanın atom sualtı qayığının Alyaska yaxınlığında neytral sularda peyda olması ilə bağlı həyəcan yaranıb. Amerikalılar qəza baş verdiyini düşünüblər və dərhal yardım təklif ediblər.

Amma Rusiya Müdafiə Nazirliyi hamını sakitləşdirib: "Omsk" atom kreyseri "Okean Sipəri 2020" irimiqyaslı təlimlər çərçivəsində suyun altından üzə çıxıb. Məlum olub ki, Sakit okean donanmasının gəmiləri Berinq dənizinin akvatoriyasında raket atışları yerinə yetirib. Məsələn, bu yaxınlarda modernləşmədən keçmiş "Omsk" atom sualtı qayığı şərti hədəfləri "Qranit" kompleksi ilə vurub. "Varyaq" kreyseri isə 450 kilometr məsafədə "Vulkan" raketi ilə hədəfi məhv edib.

"Okean Sipəri 2020" təlimləri Baltik dənizindən Sakit okeana qədər akvatoriyada keçirilir. Təlimlərə onlarla döyüş gəmisi, sualtı qayıqlar, dəniz aviasiyası və sahil qoşunları cəlb olunub.

32
Neft platforması, arxiv şəkli

Niyə məhz indi? Bakı Aşqabadın razılaşması nədən xəbər verir

193
(Yenilənib 13:54 22.01.2021)
"Ola bilər ki, Dağlıq Qarabağ münaqişəsinin indiyə qədər həll olunmaması Türkmənistan tərəfində təhlükəsizliklə bağlı müəyyən narahatlıqlar yaradırdı"

Eldar Tanrıverdiyev, Sputnik Azərbaycan

BAKI, 22 yanvar — Sputnik. Mütəxəssislər Azərbaycan və Türkmənistan arasında ötən gün əldə olunan Xəzər dənizində "Dostluq" yatağının karbohidrogen resurslarının birgə kəşfiyyatı, işlənilməsi və mənimsənilməsi haqqında Anlaşma Memorandumunu tarixi hadisə adlandırırlar. Belə ki, bu anlaşma Xəzər dənizində uzun illərdir Kəpəz/Sərdar yatağı üzrə mübahisələrə son qoymaqla yanaşı, iki ölkə - Azərbaycan və Türkmənistan arasında olan əlaqələri daha üst mərhələyə çıxarmağa imkan verəcək.

Təsadüfi deyil ki, Azərbaycan Prezident İlham Əliyev Anlaşma Memorandumunu tarixi sənəd adlandırıb və qeyd edib ki, bu yataq, həmçinin yataqdakı iş ölkələrimiz və xalqlarımızı daha da yaxınlaşdıracaq, həm Türkmənistan, həm də Azərbaycan xalqlarına xeyir gətirəcək.

Sputnik Azərbaycan Anlaşma Memorandumu, onun əhəmiyyəti və bu memorandumun niyə məhz indi imzalanması ilə bağlı "Cənubi Qafqaz" siyasi klubunun rəhbəri, politoloq İlqar Vəlizadə ilə həmsöhbət olub.

Politoloq qeyd edib ki, bu memorandumun indi imzalanması ondan xəbər verir ki, Azərbaycan və Türkmənistan bununla bağlı artıq bir neçə ildir danışıqlar aparıblar. Onun sözlərinə görə, birdən-birə belə bir razılaşma ərsəyə gələ bilməz: "Niyə məhz indi? Yəqin ki, bununla bağlı bir sıra nüanslar var. Ehtimal edirəm ki, onlardan biri də təhlükəsizliklə bağlı məsələlər idi. Ola bilər ki, Dağlıq Qarabağ münaqişəsinin indiyə qədər həll olunmaması Türkmənistan tərəfində təhlükəsizliklə bağlı müəyyən narahatlıqlar yaradırdı. Çünki bu, Kəpəz/Sərdar – indiki adı ilə "Dostluq" yatağının işlənməsi və hasil ediləcək resursların ixracı üçün müəyyən risklər yaradırdı.

Aydındır ki, ixrac üçün ən optimal istiqamət Qərb – Avropadır. Həmçinin bu istiqamət üzrə Azərbaycan və digər ölkələr də daxil olmaqla hazır infrastruktur layihələri var. Yəni yeni bir infrastruktur layihəsinin qurulmasına ehtiyac yoxdur. Ona görə də hazır xammalın xarici bazarlara daşınması üçün yaxşı imkan var. Bu memorandumun Dağlıq Qarabağ münaqişəsinin nizamlanmasından qısa müddət sonra imzalanması artıq Türkmənistan rəhbərliyinin təhlükəsizliklə bağlı narahatlığının sona çatması kimi də dəyərləndirilə bilər".

"Cənubi Qafqaz" siyasi klubunun rəhbəri qeyd edib ki, rəsmi Bakı hələ on il əvvəl Aşqabada "Dostluq" yatağının birgə işlənməsini təklif edib: "Bu təklifdə yatağın bərabərhüquqlu şəkildə istismarı, hasilatın bərabər bölünməsi yer alır. Üç il bundan əvvəl – 2018-ci ilin martında İran Prezidenti Həsən Ruhaninin Azərbaycana səfəri zamanı bu memoranduma bənzər razılaşma - həmsərhəd zonada yerləşən yataqların birgə istismarına dair razılaşma İran tərəfi ilə də imzalanmışdı. Lakin İranla bağlı beynəlxalq proseslərə (ABŞ-ın nüvə razılaşmasından çıxması, İrana qarşı sanksiyaların tətbiqi – red.) görə yataqların işlənməsi istiqamətində heç bir praktiki addımlar atılmayıb. Amma "Dostluq" yatağının istismarı üçün belə maneələr yoxdur".

İlqar Vəlizadə vurğulayıb ki, Azərbaycan və Tükmənistanın əldə etdiyi razılaşmanın başqa bir əhəmiyyəti isə bundan ibarətdir ki, bu yataq Trans-Xəzər qaz layihəsinin həyata keçirilməsi üçün təkan verə bilər: ""Dostluq" yatağında 50-100 milyon ton neft, 30 milyard kub metr qaz ehtiyatları var. Bu, təbii sərvətlərlə kifayət qədər zəngin yataqdır. Bu yataqdan çıxarılan qazın Cənubi Qaz Dəhlizi layihəsi ilə Qərbə - Avropaya tədarükü də realdır. Bu isə Cənub Qaz Dəhlizi layihəsinin, ümumilikdə Avropanın enerji təhlükəsizliyi baxımından Qafqaz regionunun əhəmiyyətini artırır. Bundan əlavə, Azərbaycanı artıq neft-qaz ixracatçısından əlavə, bir enerji habına, tranzit ölkəsinə çevirəcək".

193
Teqlər:
təhlükəsizlik, ekspert, qaz, neft, yataq, qərar, Türkmənistan, Azərbaycan
Manat, arxiv şəkli

Siyasi partiyalar dövlət vəsaitini hara sərf edir? partiya rəsmiləri açıqlayır

32
(Yenilənib 00:33 22.01.2021)
“Siyasi Partiyalar haqqında” qanuna uyğun olaraq dövlət büdcəsindən vəsaitin ayrılması yolu ilə siyasi partiyalara maliyyə yardımı göstərilir.

Elvin Səlimov, Sputnik Azərbaycan

BAKI, 22 yanvar — Sputnik. Yeni Azərbaycan Partiyası (YAP) 2020-ci ilə dair gəlirləri və xərclərini açıqlayıb. Ötən il YAP-ın gəlirləri 12 288 708 manat olub. Qeyd edək ki, “Siyasi Partiyalar haqqında” qanuna uyğun olaraq dövlət büdcəsindən vəsaitin ayrılması yolu ilə siyasi partiyalara maliyyə yardımı göstərilir.

Bəs dövlət büdcəsindən maliyyələşən partiyalar hesabatlılığa nə qədər önəm verir və vəsaitlər nəyə xərclənir? Sputnik Azərbaycan mövzu ilə bağlı bir neçə partiya rəsmisinin fikirlərini öyrənib.

Yeni Azərbaycan Partiyası İcra Katibliyinin Siyasi təhlil və proqnozlaşdırma şöbəsinin müdiri, millət vəkili Aydın Mirzəzadə deyib ki, təmsil olunduğu partiya “Siyasi Partiyalar haqqında” qanunun tələblərinə uyğun olaraq hər ilin yekununda maliyyə hesabatını açıqlayır.

O bildirib ki, YAP-ın fəaliyyəti tamamilə şəffafdır:

“Yığılan üzvlük haqları və qəbul edilən vəsaitlər partiyanın saxlanmasına, müxtəlif tədbirlərin keçirilməsinə, eyni zamanda vaxtaşırı təşkil edilən humanitar fəaliyyətlərə sərf olunur. Partiyamızın rəhbəri ölkə başçısıdır və onun fəaliyyətindəki şəffaflıq rəhbərlik etdiyi partiyanın fəaliyyətində də özünü göstərir. YAP ölkəmiz üçün aktual olan bütün məsələlərlə bağlı prinsipial mövqeyini ortaya qoyur. Dövlət quruculuğu, seçkilər və cəmiyyətin maarifləndirilməsində öz üzərinə düşən vəzifələri yerinə yetirir”.

Hazırkı parlamentdə YAP-dan sonra ən çox millət vəkili ilə təmsil olunan Vətəndaş Həmrəyliyi Partiyasının sədri, millət vəkili Sabir Rüstəmxanlı isə deyib ki, rəhbərlik etdiyi partiya əsasən dövlət büdcəsi hesabına maliyyələşir və əlavə gəlir mənbəyi yoxdur. O bildirib ki, ayrılan vəsait partiyanın icra aparatının saxlanmasına sərf edilir. Sədr qeyd edib ki, partiya yarananda üzvlük haqqı toplamaq ənənəsi olmayıb və indi də yoxdur: “Partiyamızın böyük gəlirləri yoxdur. Bununla belə büdcədən ayrılan vəsaitin hesabına müəyyən humanitar aksiyalarda iştirak edirik. Ehtiyac olsa, partiyamız gəlirlər və xərclərlə bağlı hesabatı açıqlaya bilər”.

Böyük Quruluş Partiyasının sədri, millət vəkili Fazil Mustafa bildirib ki, sədrlik etdiyi partiyanın hesabatı yaxın müddətdə hazırlanıb, təqdim ediləcək: “Partiyaların hesabatlı olmasına müsbət yanaşırıq. Bizim partiyamız ilkin hesabat təqdim edən partiyalardandır və bununla bağlı hər hansı problem yoxdur”. Vəsaitin yetərliliyi haqqında sualımıza cavabında partiya sədri bildirib ki, dövlət tərəfindən ayrılan vəsait yetərincədir və onu da partiyanın inkişafı üçün sərf edirlər.

“Eyni zamanda partiyamızda üzvlük haqları toplanır ki, bu da partiyamız üçün kifayət edir”, – deyə partiya sədri qeyd edib.

32
Штаб-квартира Министерства обороны США, фото из архива

Tarixdə ilk dəfə qaradərili general Pentaqonun rəhbəri təyin edilib

0
(Yenilənib 20:58 22.01.2021)
İraq, Əfqanıstan kimi qaynar bölgələrdə xidmət etmiş Ostin 2013-ci ildə ABŞ Mərkəzi Komandanlığının rəhbəri təyin olunub.

BAKI, 22 yanvar - Sputnik. ABŞ Senatı bu gün istefada olan dörd ulduzlu general Lloyd Ostinin ölkənin müdafiə naziri vəzifəsinə namizədliyini təsdiq edib.

Sputnik Azərbaycan xarici mediaya istinadla xəbər verir ki, Pentaqon rəhbərləri arasında ilk afroamerikalı olan Ostin tezliklə müvafiq and içəcək.

İraq, Əfqanıstan kimi qaynar bölgələrdə xidmət etmiş Ostin 2013-ci ildə ABŞ Mərkəzi Komandanlığının rəhbəri təyin olunub.

O, 2016-cı ildə ordudan istefa verərək sonradan Nümayəndələr Palatası və Senatın üzvü olub.

0
Teqlər:
Pentaqon, ABŞ