“Azərbaycan İstilik Elektrik Stansiyası” MMC-nin cərəyan transformatorunda baş vermiş qəza

Azərbaycanı qaranlığa qərq edən Mingəçevir qəzasının qaranlıq tərəfləri aydınlaşdı

1265
(Yenilənib 12:41 05.07.2018)
Mütəxəssis Mingəçevirdə baş verən qəzanın səbəblərinə aydınlıq gətirdi

Fuad Əlizadə, Sputnik Azərbaycan

BAKI, 5 iyul — Sputnik. Hazırda Azərbaycanın elektrik enerjisi müəssisələrinin bütün gücünün üçdə ikisi Xəzərin sahilindədir, lakin turbinlərin konstruksiyasının düzgün seçilməməsi ucbatından Bakını stabil olaraq elektriklə təmin etmək mümkün olmayıb. Buraxılan səhvlər və blekautun mümkün səbəbləri barədə Sputnik Azərbaycan-a müsahibəsində Mühəndislər və Energetiklər Cəmiyyətinin rəhbəri Rəsul Süleymanov danışıb.

Süleymanovun sözlərinə görə, yeddi il əvvəl Azərbaycanın böyük maliyyə vəsaitləri var idi və ölkənin enerji sistemini təcili bərpa etmək qərara alındı: "Sovet İttifaqı dövründən qalan köhnə avadanlıqlar yeni buxar-qaz stansiyaları ilə əvəz edildi. Nəticədə 780 meqavatt gücündə olan "Cənub" Elektrik Stansiyası, Sumqayıtda 525 meqavatt gücü olan elektrik stansiyası, 400 meqavatt gücü olan "Şimal" elektrik stansiyası, 405 meqavatt gücü olan başqa bir stansiya və buxar-qaz stansiyaları tikildi".

"Lakin avadanlığın alınması və quraşdırılması zamanı bir vacib məqam diqqətdən qaçıb. Hərarət 25 dərəcədən yüksək olanda hər bir artan dərəcə ilə stansiyanın faydalı iş əmsalı (FİƏ) bir faiz düşür. Ümumilikdə, 40 dərəcəlik istidə stansiya gücünün yarıdan çoxunu itirir. Ona görə də "Şimal", "Sumqayıt" və "Cənub" stansiyaları Bakını sabit elektrik enerjisi ilə təmin edə bilmədi" — Süleymanov vurğulayıb.

Mütəxəssisin sözlərinə görə, bütün bunlarla yanaşı, təkcə Bakı və Bakı ətrafında pik saatlarda kondisionerlərin işləməsi üçün 1500 meqavatt elektrik enerjisi lazımdır: "Yəni, Mingəçevirdəki Azərbaycan İES-də qəza zamanı zəif stansiyalar güclərini artırmayaraq domino daşları kimi dağılıb. Qışda onların göstəriciləri yaxşıdır, çünki qaz-buxar stansiyalarının səmərəliliyi 62%-ə çatır. Lakin indi, istidə onlar sadəcə 25% güc yığa bilir".

Cəmiyyət rəhbəri bildirib ki, turbin kondensatını soyutmaq üçün su lazımdır: "Çox yəqin ki, bu barədə məlumat verilməsə də, o, qızıb və stansiyaların gücləri kəskin şəkildə düşüb. Bununla yanaşı, Sumqayıtdan buxar-qaz sistemini soyutmaq üçün vurulan dəniz suyu çirkli ola bilər. Dənizdə yaranan lil filtrləri tutur. Bu filtrlər vasitəsilə isə güclü nasoslar buxarı soyutmaq üçün suyu çəkirlər".

"Əgər kondensat soyutmursa, daxildə təzyiq artır və stansiya avtomatik olaraq işini dayandırır. Beləliklə, 2000 meqavatt güc əvəzinə Azərbaycanın şərq hissəsində 800-1000 meqavatt güc olub" — deyə ekspert bildirib.

Onun sözlərinə görə, "Şimal" və "Sumqayıt" İES-lərin borularının uzadılması üçün maliyyə ayrılmalıdır ki, dənizin dərinliklərindən təmiz və daha sərin su götürülə bilsin: "Tənzimləmə sisteminə gəldikdə isə, güc çatmayanda sadəcə obyektlər bir-bir söndürülür. Amma onlar bu dəfə bunu etməyiblər. Mingəçevirdəki İES-də qəza baş verəndə Dispetçer Xidmətində metro və bəzi başqa strateji vacib obyektlərin işini təmin etmək üçün bəzi rayonların elektrikini kəsməli idilər. Sonra isə nasazlıqlar aradan qaldırıldığında növbə ilə elektriki verməli, sistemin 90% sönməsinə imkan verməməli idilər".

"Belə səhvlərə görə Stalinin vaxtında güllələyirdilər, Brejnevin vaxtında isə işdən çıxarırdılar. Azərbaycan prezidentinin baş verənlərlə bağlı nə qərar qəbul edəcəyini zaman göstərəcək" — Süleymanov bəyan edib.

Qeyd edək ki, iyulun 2-dən 3-nə keçən gecə havaşəraitinin kəskin dərəcədə dəyişməsi, temperaturun yüksək həddə çatması nəticəsində əhalinin elektrik enerjisindən həddən artıq istifadə etməsi ilə əlaqədar Mingəçevirdəki "Azərbaycan İstilik Elektrik Stansiyası" MMC-nin yarımstansiyasında cərəyan transformatoru sıradan çıxıb. Bunun nəticəsində ölkənin əksər hissəsində iki gün ərzində elektrik enerjisinin verilməsi ilə bağlı problemlər yaşanıb, problemlər metropolitenə və su təchizatına da keçib.

Qəza yerində dərhal təmir işlərinə başlanıb. Növbəti gün yenidən qəza baş verib və ölkənin əksər hissəsinə elektrik enerjisinin verilişi dayandırılıb.

Dünən dövlət başçısı məsələ ilə bağlı müşavirə keçirib və lazımi tapşırıqlarını verib. Hazırda iş üzrə yaradılmış Dövlət Komissiyası araşdırma aparır. Proses prezident İlham Əliyevin şəxsən nəzarətindədir.

1265
Teqlər:
qəza, Mingəçevir, Rəsul Süleymanov, Mühəndislər və Energetiklər Cəmiyyəti, elektrik enerjisi, Azərbaycan
Əlaqədar
Elektrik böhranı qiymət artımına da səbəb oldu
Azərbaycana bu ölkədən elektrik enerjisi ötürülür
Elektrik kəsilməsi bəzi insanların halına pis təsir etdi - VİDEO
Elektrik kəsilməsi bu sahədə də problemlər yaratdı
Elektrik problemi ilə bağlı rəsmi qurum əhaliyə müraciət etdi
Rayonlarda və paytaxtın bir hissəsində elektrik böhranı davam edir
OC-135B təyyarəsi

Qanuna məhəl qoymadı - ABŞ-ın Rusiya üzərində kəşfiyyat uçuşları kimə lazımdır

13
(Yenilənib 20:12 24.11.2020)
Ağ Evin bu məsələdə Moskvaya qarşı əsas iradlarından biri Cənubi Osetiya, Abxaziya, Çeçenistan və Kalininqrad kimi bəzi bölgələr üzərində nəzarət uçuşlarının məhdudlaşdırılmasıdır.

BAKI, 24 noyabr — Sputnik, Sofya Melniçuk. ABŞ-ın Açıq Səma Müqaviləsindən çıxmaq barədə xəbərdarlığından sonrakı altı aylıq müddət bitdi. Vaşinqton artıq "Rusiyanın illərdir kobud şəkildə pozduğu" bu razılaşmada iştirak etmir. Tramp administrasiyası ölkəni "milli təhlükəsizlik bahasına düşmənlərə üstünlük qazandıran" köhnəlmiş müqavilələrdən çıxardığına inanır. İndi Moskva müqavilədə qalanların öz öhdəliklərini yerinə yetirəcəklərinə dair təminat axtarmaq niyyətindədir. Bəs Baydenin komandasının yenidən bu müqaviləyə qayıtması mümkündürmü? RİA Novosti bu sualın cavabını araşdırıb.

Etibar yoxdursa, müqavilə də yoxdur

Ağ Evin bu məsələdə Moskvaya qarşı əsas iradlarından biri Cənubi Osetiya, Abxaziya, Çeçenistan və Kalininqrad kimi bəzi bölgələr üzərində nəzarət uçuşlarının məhdudlaşdırılmasıdır. Buna cavab olaraq, amerikalılar da Alyaska və Sakit Okeandakı adaların səmasını uçuşlara bağlı elan etdi.

Qeyd edək ki, müqaviləyə əsasən, 2002-ci ildən bu yana 35 iştirakçı ölkə bir-birinin əraziləri üzərində kəşfiyyat uçuşları həyata keçirə bilər. Əldə edilən məlumatlar hər kəs üçün açıqdır. Eyni zamanda, təyyarələrdə silah olmamalı, videoavadanlıq əvvəlcədən yoxlanılmalı və ərazisi üzərində nəzarət uçuşu keçirilən ölkənin nümayəndəsi də göyərtədə olmalıdır.

2019-cu ildə Açıq Səma Müqaviləsi çərçivəsində 1,5 min belə uçuş keçirilib. Lakin ölkələr arasında nəzarət və etibarın möhkəmləndirilməsi – vahid məqsəd deyil. Burada mühüm siyasi xəbərdarlıqlar da var. Məsələn, Donbasda münaqişənin başlanmasından sonra ABŞ Kiyevi dəstəkləmək məqsədilə Ukraynanın şərq səmasında uçuşlar həyata keçirmişdi.

Çirkin oyunlar

Kremldə sözügedən müqaviləni silahlanma üzərində qarşılıqlı nəzarətdə çox mühüm amil hesab edirlər. ABŞ-ın müqavilədən çıxması sənədin qüvvədən düşməsinə bərabərdir, – deyə Rusiya prezidentinin mətbuat katibi Dmitri Peskov bildirib. Bununla belə, Rusiya Xarici İşlər Nazirliyindən bildiriblər ki, Moskva sənədin müddəalarına əməl etməyə davam edəcək, ancaq bir neçə şərtlə. Birincisi, Avropa ölkələri uçuş məlumatlarını ABŞ-a ötürməyəcəklərinə zəmanət verməlidirlər. İkincisi, Rusiya təyyarələri Amerikanın Avropadakı obyektlərinə nəzarət edə biləcəklər. İndiyə qədər heç bir zəmanət verilməyib və bu, Moskvanı qətiyyən qane etmir.

"Heç kimə sirr deyil ki, ABŞ öz müttəfiqlərindən Vaşinqtonun müqavilədən ayrılmasından sonra Rusiya üzərində aparacaqları müşahidə uçuşları nəticəsində əldə etdikləri məlumatları Amerika tərəfinə ötürmələri ilə bağlı sənəd imzalamalarını tələb edib", – deyə hərbi təhlükəsizlik və silahlara nəzarət üzrə Vyana danışıqlarında Rusiya nümayəndə heyətinin rəhbəri Konstantin Qavrilov bildirib. Onun sözlərinə görə, bu, yalnız Açıq Səma Müqaviləsinin pozulması deyil, həm də Vaşinqtonun apardığı çirkin oyundur.

"Bu, ağılsızlıqdır"

Vaşinqtonun müqavilədən çıxması ilk növbədə ABŞ-ın Avropadakı müttəfiqlərini vuracaq. Amerika təyyarələrinin topladığı məlumatların onlar üçün əhəmiyyəti böyükdür. Odur ki, bir sıra Avropa ölkələrinin nümayəndələri Vaşinqtonun bu qərarından məyus olduqlarını bildiriblər.

"Biz bilirik ki, Rusiya tərəfinin müddəalara əməl etməsi ilə bağlı bəzi çətinliklər var idi, ancaq bu, müqavilədən çıxmaq üçün səbəb deyildi", – deyə Almaniya XİN-in rəhbəri Hayko Maas bildirib.

Fransa Xarici İşlər Nazirliyində isə bu fikirdədirlər ki, ABŞ Moskva ilə müqaviləni pozduğuna görə lazımi dəlillər göstərməyib. İspaniya, Belçika, Finlandiya, İtaliya, Lüksemburq, Hollandiya, Çex Respublikası və İsveçrənin birgə bəyanatında Açıq Səma Müqaviləsinin "işlək və faydalı" olduğu vurğulanıb.

Birləşmiş Ştatların özündə belə bu məsələyə münasibətdə vahid fikir mövcud deyil.

Məsələn, Senatın Xarici Əlaqələr Komitəsinin üzvü Robert Menendes Ağ Evin hərəkətlərini belə qiymətləndirir: "Prezident Tramp açıq şəkildə qanuna məhəl qoymadı və prezident seçkisində məğlub olduqdan sonra belə, müqavilədən birtərəfli qaydada siyasi motivli imtinaya getdi".

ABŞ Hərbi Hava Qüvvələrinin generalı və Milli Təhlükəsizlik Agentliyinin keçmiş direktoru Maykl Hayden isə Vaşinqtonun bu addımını "ağılsızlıq" kimi qiymətləndirib.

Müqavilənin sonu

Donald Trampın dörd illik prezidentliyi dövründə bütün dünya əmin oldu: o, silahlanma üzərində nəzarətdə maraqlı deyil. 2018-ci ildə Amerika lideri Tehranın əməl etməməsi bəhanəsi ilə Birgə Hərtərəfli Fəaliyyət Planından çıxdığını bəyan etdi. Bir il sonra vaxtilə Ronald Reyqan və Mixail Qorbaçov tərəfindən imzalanan Orta və Qısa Mənzilli Raketlər Müqaviləsi də eyni aqibəti yaşadı.

2020-ci ildə prezident administrasiyasından bildirildi ki, Ağ Ev nüvə sınaqlarının müzakirəsinə hələ 1992-ci ildə başlayıb. Bu isə ABŞ, Rusiya, Çin, İngiltərə və Fransaya tətbiq olunan moratoriumun pozulması deməkdir.

Hər bir halda, Açıq Səma Müqaviləsi, yəqin ki, Donald Tramp administrasiyasının son qurbanı olacaq. Rəsmi qələbə münasibətilə Co Baydeni təbrik etmək hələ tez olsa da, onun Ağ Evin yeni sahibi olacağına inam hər gün artır.

Yenidən qayıtmaq mümkündürmü?

Bəzi ekspertlər bu fikirdədirlər ki, Bayden ABŞ-ın Açıq Səma Müqaviləsinə qayıtması barədə düşünməlidir. Lakin Ali İqtisadiyyat Məktəbinin Avropa və Beynəlxalq Kompleks Tədqiqatlar Mərkəzinin direktor müavini Dmitri Suslovun fikrincə, bu, çətin ki, baş versin.

"Bir neçə onillik ərzində ABŞ dəqiq mövqe formalaşdırıb: əgər onlar silahlandırma üzərində nəzarət razılaşmasından çıxırsa, bir də oraya qayıtmırlar", – deyə o, RİA Novosti-yə müsahibəsində bildirib. Onun sözlərinə görə, "Ağ Ev, Pentaqon və kəşfiyyat dairələri arasında Moskvanın sözügedən sənədin müddəalarına tam əməl etmədiyi və onu pozduğu ilə bağlı fikir birliyi var".

Bundan əlavə, ekspert qeyd edir ki, müqaviləyə qayıtmaq üçün qərarın Konqresin yuxarı palatası tərəfindən ratifikasiya olunmasına ehtiyac var. Yuxarı palatanın yenidən respublikaçıların nəzarətində ola biləcəyi ehtimalını nəzərə alsaq, bu, yeni problemlər vəd edir.

Hər bir halda, Bayden sələfinin qərarını ləğv etmək qərarına gəlsə belə, bunun üçün vaxt tələb olunur. "Üstəlik, Tramp da indi buna əlavə maneələr yaradır", – deyə Qabaqcıl İdarəetmə Həlləri Mərkəzinin baş mütəxəssisi Oleq Şakirov RİA Novosti-yə müsahibəsində bildirib. Onun sözlərinə görə, Ağ Evin ölkənin Hərbi Hava Qüvvələrini müşahidə uçuşlarında istifadə edilən təyyarələrdən qurtulmağa məcbur etmək niyyəti var.

"Konqres uzun müddət respublikaçıların hərəkətləri nəticəsində təyyarələrin modernləşdirilməsinə vəsait ayırmayıb. Bu isə sözügedən müqaviləni zəiflətmək məqsədi daşıyırdı", – deyə o bildirib. Mütəxəssisin fikrincə, müşahidə təyyarələri olmadan müqaviləyə qayıtmaq daha çətin olacaq.

Bundan əlavə, Şakirov bildirir ki, Baydenin kabinetində kimin hansı vəzifəni tutacağından da çox şey asılıdır. "Məsələn, keçmiş xarici siyasət müşaviri olan Maykl Karpenter qətiyyətlə ABŞ-ın Açıq Səma Müqaviləsində iştirakına qarşı çıxmışdı. O, bu fikirdə idi ki, guya Rusiya zərərli məqsədlərlə bu müqavilədən istifadə edərək Amerika infrastrukturu haqqında məlumat toplayır".

Daha geniş mənada götürəndə isə Baydenin əsas ideyası Avropa ilə münasibətlərdəki etibarı bərpa etməkdir. Bunun üçün də sözügedən müqavilənin vacib olduğunu vurğulayan Şakirov belə hesab edir ki, bəlkə də ABŞ müttəfiqlərinin xətrinə nə vaxtsa bu müqaviləyə qayıtdı.

13
Teqlər:
kəşfiyyat, uçuş, müqavilə, Rusiya, ABŞ
Səudiyyə Ərəbistanında Salva iqamətgahında G20 ölkələrinin liderlərinin proyeksiyası

Koronavirus G20 sammitini vurdu, ancaq Qərb hələ rus peyvəndinə qarşı dirənir

17
(Yenilənib 16:31 23.11.2020)
Dünyada COVID-19 pandemiyasından tutmuş qlobal iqtisadi böhrana kimi ümumi problemlər kifayət qədər olsa da, onların ümumi həlli yoxdur və olmayacaq da

BAKI, 23 noyabr — Sputnik, İvan Danilov. G20 virtual sammiti iştirakçılarının vicdanlı səylərinə baxmayaraq, qloballaşmanın məhvini və COVID-19 sonrası dünyada mövcud olmayacağını bir daha təsdiqlədi. Özü də burada söhbət "Amerika təkqütblü dünyasına" (Pax Americana şəklində) qarşı hər hansı bir sui-qəsd və ya 20-ci əsrin ikinci yarısının "blok qarşıdurması" modelini yaratmaq cəhdindən getmir.

Vaşinqtonun və ya Brüsselin "beyin mərkəz"lərinin bu barədə nə düşündüyündən asılı olmayaraq – deqloballaşma və çoxqütblülük artıq reallığa çevrilib. Problem ondadır ki, dünyada vahid siyasi gündəm və onun müzakirəsi üçün vahid siyasi dil yoxdur. Dünya ictimaiyyətinin istinad edə biləcəyi hər hansı bir "geosiyasi kamerton" (və ya kamertonlar) da mövcud deyil. Koronavirusdan tutmuş qlobal iqtisadi böhrana kimi ümumi problemlər kifayət qədər olsa da, onların ümumi həlli yoxdur və olmayacaq da. Sadəcə ona görə ki, qlobal səviyyədə ölkələr arasındakı qarşılıqlı əlaqə sxemi "sıfırın cəminə bərabər oyun rejimi"nə keçib. Başqa sözlə, hər hansı bir ölkənin uğuru onun rəqiblərinin məğlubiyyəti kimi qəbul olunur, eyni zamanda, geosiyasi rəqiblərdən birinin nüfuz, siyasi və ya iqtisadi qələbə qazanmaması naminə bəzi ortaq maraqların (humanitar mülahizələrdən söhbət belə gedə bilməz) qurban verilməsinə tam hazır olunduğu nümayiş etdirilir.

Buna bir neçə bariz nümunə göstərmək olar. Çin Xalq Respublikasının lideri G20 zirvəsində dünya iqtisadiyyatına, beynəlxalq ticarətə və turizmin bərpasına böyük dəstək verə biləcək (bu, yoxsul ölkələr də daxil olmaqla bir çox dövlətlər üçün çox vacibdir) ölkələrarası hərəkəti ləğv edən rəqəmsal mexanizmin yaradılmasını təklif etdi. Çin bu fikirdədir ki, test nəticələrinə əsaslanan "QR sağlamlıq kodu"nun qarşılıqlı tanınması üçün beynəlxalq mexanizm yaradılmalıdır. "Ümid edirəm ki, dünyanın mümkün qədər çox ölkəsi və bölgəsi buna qoşulacaq", – deyə Si Cinpin bildirdi.

Bu ümumilikdə yaxşı ideya olsa da, sözügedən mexanizmin yaxın vaxtlarda qlobal səviyyədə reallaşma şansı çox azdır. Ən azından ona görə ki, həmin təkliflə Çin Kommunist Partiyasının Mərkəzi Komitəsinin sədri Si Cinpin çıxış edib. Axı rəsmi Pekinin təklifi ilə razılaşmaq Qərb liderlərinin imicinə zərbə vura bilər.

Daha bir misal koronavirus peyvəndinə əli çatmayan yoxsul ölkələrlə bağlıdır. Həmin ölkələrdə əhalinin peyvənd olunmaması planetin ayrı-ayrı bölgələrində "koronavirus ocaqları"ının qalması deməkdir ki, bu da ağır nəticələrə gətirib çıxara bilər.

Vladimir Putin öz çıxışında vaksinasiyaya qlobal əlçatanlığın vacibliyini vurğuladı: "Rusiya effektiv və təhlükəsiz peyvəndin hamı üçün əlçatan olmasını hədəfləyən sammitin əsas qərar layihəsini dəstəkləyir. Heç şübhəsiz, immunlaşdırma preparatları hamı üçün əlçatan olmalıdır. Və bizim dövlətimiz alimlərimiz tərəfindən işlənib-hazırlanmış peyvəndləri ehtiyacı olan ölkələrə verməyə hazırdır. Rusiyanın bütün dünyada koronavirus əleyhinə qeydə alınmış ilk peyvənd olan "Sputnik V" və Novosibirsk Elmi Mərkəzinin hazırladığı "EpivakKorona" peyvəndləri artıq istifadəyə hazır vəziyyətdədir. Üçüncü peyvəndimiz üzərində də iş gedir. Pandemiyanın miqyası bizi bütün mövcud mənbələrdən və imkanlardan istifadəyə məcbur edir. Ortaq məqsədimiz peyvənd preparatları yaratmaq və planetin bütün əhalisini etibarlı qoruyucu vasitələrlə təmin etməkdir. Əziz həmkarlar, bu o deməkdir ki, hər kəs üçün görülməli kifayət qədər iş var. Bəlkə də bu məqamda rəqabət qaçılmazdır, ancaq biz ilk növbədə humanitar mülahizələrdən çıxış etməli və məhz bunu ön plana çıxarmalıyıq".

Yəqin ki, deklarativ səviyyədə hər şey qaydasında olacaq, amma çox güman, "İyirmilik" ən sərfəli və təsirli peyvəndlərdən istifadə edərək yoxsul ölkələrin əhalisinin vaksinlə təmin olunması üçün ümumi fondun yaradılmasını nəzərdə tutan konkret addımlar atmağa razılıq verməyəcək. Çünki bu addımlar əlçatan və effektli rus peyvəndi "Sputnik V"nin istifadəsindən ibarət olmalıdır. Amerikada və Avropada hazırlanmış analoqlarından fərqli olaraq, bu peyvənd daha ucuzdur, üstəlik Pfizer vaksini kimi mənfi 70 dərəcə temperaturda saxlanılmasına da ehtiyac yoxdur. "Sputnik V"nin yeganə problemi isə (Vaşinqton və Brüsselə görə) onun Rusiyada istehsal olunmasıdır.

Vladimir Putin G20 ölkələrini "qaçılmaz rəqabəti" bir tərəfə buraxaraq humanizm nümayiş etdirməyə çağırsa da, Qərb mediasının Rusiya və Çin peyvəndinə qarşı əks-təşviqat apardıqları bir vaxtda onun bu çağırışına səs veriləcəyinə inam azdır.

G20 sammitində heç bir əsaslı dialoqa nail olunmayan (əvəzində dünya liderlərinin monoloqlarının bol olduğu) mövzuların siyahısını davam etdirmək mümkündür. Dünya Səhiyyə Təşkilatının islahatları, inkişaf etməkdə olan ölkələrin valyuta borcu problemləri və proteksionizmə yönəlmiş qlobal tendensiyalar da bura aiddir. Qərb liderlərinin tutduğu mövqe isə aydındır – çox danışırlar, heç kimə qulaq asmırlar və bütün təklifləri sadə bir düstura əsaslanır: "Hamı bizim dediyimiz kimi hərəkət etməlidir, onda hər şey yaxşı olacaq". Bu mənada prezidenti dəyişsə belə, ABŞ-ın mövqeyinin dəyişmə ehtimalı çox azdır.

G20 sammitində substantivliyin olmaması onu göstərdi ki, biz heç də "geopolitik blokların rəqabət apardığı" dünyaya doğru deyil, daha çox hər hansı bir məsələ ilə bağlı yalnız konkret ölkələr arasında ikitərəfli danışıqlar səviyyəsində razılığın əldə olunduğu dünyaya doğru gedirik. Nəzəri cəhətdən G20 hələ formal şəkildə mövcud olsa da, praktikada tanınmış amerikalı siyasətçi Yan Bremerin adlandırdığı "G-sıfır" dünyasına, yəni, hərənin özü üçün yaşadığı dövrə yaxınlaşırıq. Və bu da yəqin ki, koronovirusdan dünyaya qalan ən böyük tarixi miras olacaq.

17
Teqlər:
Çin, vaksin, Rusiya, G20 sammiti, epidemiya, Koronavirus, COVID-19
Azərbaycan hərbçiləri, arxiv şəkli

Müzəffər Ordumuz artıq Kəlbəcərdə!

71
(Yenilənib 01:14 25.11.2020)
Bölmələrimizin bu istiqamətdə hərəkətini təmin etmək məqsədilə mühəndis işləri başa çatdırılıb, qoşunların hərəkət marşrutu üzrə çətin keçilən dağ yolları minalardan təmizlənir və istifadəyə hazır vəziyyətə gətirilir.

BAKI, 25 noyabr - Sputnik. Azərbaycan Respublikası, Rusiya Federasiyası Prezidentləri və Ermənistan Respublikası baş nazirinin imzaladığı üçtərəfli Bəyanata əsasən, Azərbaycan Ordusunun bölmələri noyabrın 25-də Kəlbəcər rayonuna daxil olub.

Sputnik Azərbaycan bildirir ki, məlumatı Azərbaycan Müdafiə Nazirliyi yayıb. Bölmələrimizin bu istiqamətdə hərəkətini təmin etmək məqsədilə mühəndis işləri başa çatdırılıb, qoşunların hərəkət marşrutu üzrə çətin keçilən dağ yolları minalardan təmizlənir və istifadəyə hazır vəziyyətə gətirilir.
Gün ərzində Kəlbəcərdən foto və video materiallar təqdim olunacaq.

71
Teqlər:
Azərbaycan ordusu, Qarabağ, Kəlbəcər rayonu