Şahin Mirzəyev

Şahin Mirzəyevin "pozulan dini hüquqları"

2013
(Yenilənib 16:10 15.02.2017)
Talış xalqının şəhid oğullarının cəsədlərini, ruhlarını çeynəyib, "etnik və dini hüquqlar" adı altında Ermənistana sığınmağın bircə adı var: xəyanət

BAKI, 14 fev — Sputnik. Azərbaycan haqqında çox şey demək, ona çox şeyi yapışdırmaq olar. Azərbaycanda etnik və dini azlıqların hüquqlarının tapdalandığını da iddia etmək olar, amma bu, yapışmaz. Azərbaycanlılar sonuncu tikələrini öz doğma qardaşları ilə bəlkə də bölüşməzlər, amma başqa millətdən və dindən olanlarla böyük məmnuniyyətlə bölüşürlər. Biz əsrlərdir bu coğrafiyada türk, talış, rus, gürcü, erməni, ləzgi, yəhudi və s. olaraq birlikdə yaşadıq. Burada dünyanın 3 səmavi dininin (İslam, xristianlıq, iudaizm), onların ən müxtəlif qollarının təmsilçiləri dinc və yanaşı yaşayırlar. Müsəlmanı məscidə, xristianı kilsəyə, yəhudisi sinaqoqa gedər, bir-birilərinin dini bayramlarına hörmətlə yanaşarlar, bayramlarda bişən şirniyyatlardan bir-birilərinə pay verərlər. Kədərli günlərdə də eynilə. Kilsə günlərində müsəlmanlar xristianlardan qabaq kilsələrə axışarlar. Aşura günü xristianlar islam şəhidlərinin xatirəsinə ehtiram göstərər, şənliklərini təxirə salarlar. Bu qaydalar heç yerə yazılmayıb, bu coğrafiyanın insanları əsrlərdən bu yana belə yaşamağa vərdiş ediblər. Bu qaydaları bu məmləkətin yaşlıları müəyyən ediblər, sonra gələnlər də davam etdirirlər.

İndi azərbaycanlılar üçün eşitmək çox ağırdır ki, burada hansısa etnik, ya da dini azlığa qarşı diskriminasiya var. Son 27 ildə Ermənistanda və onun işğal etdiyi Azərbaycan ərazilərində bir nəfər də olsun azərbaycanlı qalmadığı halda, müharibənin ən qanlı dövrləri də daxil olmaqla təkcə Bakıda 30 mindən artıq erməni yaşamaqdadır. Bu gün dünyanın hər yerində yaşayan ermənilər Bakıya turist səfərləri edirlər. Təkcə sosial şəbəkələrdəki hesablara baxmaq kifayətdir ki, ermənilərin bugünkü Bakıda çəkdirdikləri fotoşəkilləri görəsən. Amma Dilqəm Əsgərov və Şahbaz Quliyev öz doğmalarının qəbirlərini ziyarət etmək üçün getdikləri işğal altındakı Kəlbəcərdə ermənilər tərəfindən saxlanılıblar və 2 ildir işgəncələr altında çətin günlərini yaşamaqdadırlar. Onların tək günahı azərbaycanlı olmalarıdır. İndi eşitmək ağırdır ki, Ermənistan ən üst səviyyədə Azərbaycanı milli azlıqlara qarşı qeyri-insani davranışlarda günahlandırır. Və bu bəhanəni onların əlinə Azərbaycanı tərk edərək Ermənistana keçən Şahin Mirzəyev (Mirzəli) adlı şəxs verib.

Şahin Mirzəyev kimdir? Onu yaxından tanıyanlardan biri, Respublika Talış Mədəniyyət Mərkəzinin sədri Rafiq Cəlilovun dediyinə görə, Şahin Mirzəli 2015-ci ildə "Toloşon Sədo" qəzetinin "Qaya" şirkətindəki abunəçiliyindən imtina etdiyi günə qədər qəzetin ictimai əsaslarla əməkdaşı olub. Yəni sadəcə qəzetdaşıyan olub. Həmin tarixdən isə onun qəzetlə bütün əlaqələri dayandırılıb. Hazırda qəzetin Şahin Mirzəli adlı əməkdaşı yoxdur.

"Mən, Respublika Talış Mədəniyyət Mərkəzinin sədri olaraq bildirirəm ki, Şahin Mirzəli 2016-ci il 1 may tarixli konfransda RTMM-nin İdarə Heyətinə seçilib, hazırda da RTMM İH-nin üzvüdür. Onun hansısa xarici dövlətdən sığınacaq almasının nə RTMM-nə, nə də qəzetimizə aidiyyəti yoxdur. Bu, sırf onun ailəsi ilə bağlı olan məsələdir ki, həyat yoldaşı həkimlərin yarıtmaz fəaliyyəti nəticəsində çox ağır duruma salınmış və vaxtında lazımi tibbi yardım ilə təmin edilməmişdir ki, bu səbəbdən də o ailəsi ilə Gürcüstandan sığınacaq istəmişdi. Bu olayı həm RTMM ilə, həm də qəzetimizlə əlaqələndirib tirajlamaq, bilərəkdən və ya bilməyərəkdən bizim fəaliyyətimizi Azərbaycan əleyhinə aparılan fəaliyyət kimi göstərmək düzgün deyil" — deyə Rafiq Cəlilov bildirib.

Görünür Şahin Mirzəyev Gürcüstandan sığınacaq ala bilmədiyi üçün, Ermənistana keçməyi qərara alıb. Hər halda, Rafiq Cəlilovun dediyinə görə, talışların heç bir xarici dövlətin, ələlxüsus da ermənilərin dəstəyinə ehtiyacı yoxdur. O qeyd edib ki, Şahin Mirzəlinin RTMM-dəki statusuna növbəti iclasda baxılacaq.

Bir jurnalist olaraq illərdir talışlarla çiyin-çiyinə işlədik və işləyirik. Talış jurnalistlər arasında çoxlu dostlarımız var. Bizim aramızda etnik söhbətlər ancaq lətifələr şəklində olar. Biz bir-birimizin məişətində, gündəlik həyatında baş verən şeyləri ancaq gülmək üçün yada salarıq. Bəzən zarafatla türk jurnalistlər talışlara "qədim türklər", talışlar isə türklərə "əski talışlar" deyə xitab edərlər. Talışlar öz məişətləri, mədəniyyətləri, qəlbləri ilə hər zaman Azərbaycan xalqının ayrılmaz bir hissəsi oldular. Onlar elə ötən əsrin sonlarında, SSRİ-nin yıxılması ilə başlayan etnik separatizm ruzigarlarına qoşulub bu ölkəni bölmək çağırışlarından imtina etdilər. Əksinə, onlar hamı kimi əllərinə silah alıb Azərbaycanın bütövlüyü, torpaqlarının işğaldan azad olunması uğrunda vuruşdular. Bu yolda yüzlərlə şəhid verdilər.

Onların bu torpağa, bu vətənə bağlılıqlarını ən gözəl şəkildə ölkəmizin tanınmış jurnalisti, talış xalqının nümayəndəsi olan Xaqani Səfəroğlu ifadə edib: "Talış xalqının Azərbaycan kimi qədim, misilsiz, içində xalqların qardaş kimi çiyin-çiyinə yaşadığı dövləti var. Min illərdir bir yerdə yadelliyə qarşı vuruşublar, sevinclərinə seviniblər, vayına ağlayıblar. "Talış Ermənistandan sığınacaq istədi" yazıları adamı ağrıdır, bu torpaq uğrunda canını vermiş 1000-lərlə talış şəhidinin ruhunu sızladır. Satanın, qaçanın, kökünə xor baxanın milləti olmaz. Talışın başqa dövləti yoxdur. Talışın dövləti Azərbaycandır. Ya bir yerdə bu ölkə ilə birgə böyüyəcəyik, ya da kül olacağıq. Xalqımın əzabları üzərində siyasət qurmaq istəyənləri isə lənətləyirəm. Ermənistana qaçan bir Azərbaycan vətəndaşıdır. Bu ölkənin çörəyinə, suyuna tüpürüb, arxa çevirib. Burda qalanlar isə milyonlardır. Bizi bölmək utopiyadır, bizi düşmən etmək xülyadır. Burada qalacağıq, bir yerdə olacağıq! Dövlətimizi heç kimə vermək niyyətimiz yoxdur! Əzizlərim, bir-birinizdən möhkəm yapışın!"

Xaqaninin atası rəhmətlik Səfər müəllim biz jurnalistlərin sevimlisi idi. O, ilk gündən Xalq Cəbhəsinin sıralarında Azərbaycanın müstəqilliyi uğrunda mübarizə aparmışdı. Ömrünün son gününə qədər də bu yola zərrə qədər də olsun xəyanət etmədi. Bizim üçün nümunə Səfər müəllimdir, Xaqanidir, onlar kimi olan on minlərlə talış xalqının övladlarıdır. Şahin Mirzəyev kimi istisnalar barədə bizdə belə bir deyim var: "Yel qayadan nə aparar ki?!"

Bəlkə dövlətə, hakimiyyətə, tibb işçilərinə həddindən çox qəzəblənib, bu ölkədən küsüb, üz çevirib. Amma bütün bunlar ona içində talış xalqının oğullarının da olduğu şəhidlərin cəsədlərini, ruhlarını çeynəyib onları qətlə yetirən Ermənistan rejiminə qucaq açmasına əsas vermir. Baxmayaraq ki, biz Şahin Mirzəyevin bu hərəkətində hansısa sosial etiraz notları axtarmaqdan çox uzağıq. Çünki o, özünün Ermənistana verdiyi arayışda Müsavat Partiyasının fəalı olduğunu bildirib. Mediada onun mitinqdə Müsavat Partiyasının bayrağına sarılmış şəkli də yer alıb. Əgər o, həqiqətən də talış xalqının "pozulmuş haqları" uğrunda mübarizə aparırdısa, onu Müsavat Partiyasının türkçülüyün rəmzi ifadəsi olan ay-ulduzlu mavi bayrağına sarılaraq şəkil çəkdirməsi nəyi ehtiva edirdi?! Bundan başqa, Müsavat Partiyası Mərkəzi İcra Aparatının rəhbəri Gülağa Aslanlının Sputnik Azərbaycan-a bildirdiyinə görə, Şahin Mirzəyev 2014-cü ilə qədər Müsavat Partiyasının üzvü olub və həmin ildə Nizamnamə tələblərini pozduğuna görə, partiya sıralarından xaric edilib.

Biz Azərbaycanda yaşayırıq və son illərdə Avropa ölkələrində sığınacaq almaq üçün çoxlarının istifadə etdiyi metodları yaxşı bilirik: bir gün müxalifətin mitinqinə qatılmaq, hakimiyyət əleyhinə radikal şüarlar səsləndirmək, əgər imkan varsa həbs olunub adını "siyasi məhbus" siyahısına yazdırmaq, imkan yoxdursa mitinqdə şəkil çəkdirmək və bununla da "hakimiyyətin təqib etdiyi zülümkeş müxalifətçi" obrazını tamamlamaq. Şahin Mirzəyev də güman ki, bu yolla getmək istəmişdi — Gürcüstana, oradan da Avropaya keçmək üçün "Azərbaycanda etnik və dini hüquqlarım pozulur" deyə bərkdən qışqırmaq, beynəlxalq təşkilatların diqqətini cəlb etmək və mühacirətə getmək. Ş.M-da bu ssenari istədiyi kimi alınmadığından o, son addım kimi Ermənistana sığınmaq yolunu seçib. Artıq Ermənistanın müdafiə naziri Vigen Sarkisyanın da dediyi kimi, qalır "beynəlxalq təşkilatlarla birlikdə Mirzəyevin pozulmuş hüquqlarını bərpa etmək və onu daimi yaşayış yeri ilə təmin etmək".

Onu da xatırladaq ki, Vigen Sarkisyan Ş.M-nın "Talış Azadlıq Hərəkatı"nın üzvü olduğunu iddia edir, amma Xaqani Səfəroğlu belə bir hərəkatın ümumiyyətlə mövcud olmadığını bildirir.

Milli hüquqlarını bildik, bəs Mirzəyevin hansı dini hüququ pozulurmuş? Axı talışlar da Azərbaycanda çoxluğun dini kimi qəbul edilmiş İslamın (özü də əksəriyyəti təmsil edən şiə cərəyanının) daşıyıcılarıdırlar. Mirzəyevin qulluq etdiyi hansı dindir ki, o, Azərbaycanda təqib olunur?! Axı bu gün bütün dünya Azərbaycandakı dini tolerantlıqdan danışır və bir sıra Avropa ölkələri buradakı dini tolerantlıq və multikulturalizm modelini müsbət nümunə kimi öz dərsliklərinə daxil ediblər!?

Bəlkə Şahin də indi bir çox dövlətlərin baş ağrısına çevrilmiş "İslam dövləti" sempatizanı imiş və həbs olunacağını bilərək, aradan çıxıb? Amma bunu dini hüquqların pozulması adlandırmaq olmaz ki.

Son olaraq onu əlavə edə bilərik ki, Şahin Mirzəyev əgər həqiqətən də öz etnik və dini hüquqlarının qayğısına qalıbsa, onda Ermənistanı seçməklə böyük xətaya yox verib. Ermənistanın etnik və dini təmizləməni hər zaman öz siyasətinin prioriteti elan etdiyini bu dünyada bir nəfər "bilməyə" bilərdi. O da göründüyü kimi, Şahin Mirzəyev olub. Onun halına həqiqətən də acımamaq olmaz.

P.S. Bəlkə bir gün mən də ölkəmdən, xalqımdan, hakimiyyətimdən inciyərəm, küsərəm, başımı götürüb gedərəm. Amma əminəm ki, bu ölkəmdəki milli və dini mühitlə bağlı olmayacaq. Və getdiyim ölkə də Ermənistan olmayacaq. Mən ölkəmi, millətimi, dəyərlərimi bu qədər ucuza satmağı ağlımın ucundan belə keçirmirəm…

2013
Teqlər:
etnik, Şahin Mirzəyev, talış, dini, milli, Ermənistan, Azərbaycan, hüquq
Əlaqədar
Mən talış olduğum qədər türkəm
Talış dağı barədə ermənilərin yaydığı məlumat yalandır
MN: Talış kəndi yüksəklikləri və Seysulan məntəqəsi düşmən qüvvələrindən tam təmizlənib
Xaker, arxiv şəkli

Olimpiada Navalnı skandalı

13
(Yenilənib 20:26 21.10.2020)
Yaponiya hökuməti "müvafiq məlumatları" toplamaq üçün vaxt qazanmaq məqsədilə məsələni şərh etməkdən imtina edib, Cənubi Koreya hakimiyyəti də susmağa üstünlük verib.

BAKI, 21 oktyabr — Sputnik, İrina Alksnis. ABŞ və Böyük Britaniyanın Cənubi Koreya və Yaponiyada keçirilən Olimpiya oyunlarına Rusiya tərəfindən kiberhücumun təşkil olunması ilə bağlı iddiaları bu ölkədə təəccüblə qarşılanıb.

Təəccübün səbəbi sadədir: Moskvanın guya sülhə və idmana qarşı həyata keçirdiyi növbəti absurd cinayətlə bağlı əsassız həqarət həm Rusiya əleyhinə təbliğat aparmaq, həm də Moskvanı "cəzalandırmaq" üçün tədbirlər görmək baxımından gülüncdür.

Bir yandan Qərb mediasının Rusiya əleyhinə gündəm yaratmaq üçün mövzusu tükənməyib. Onlar hələ Aleksey Navalnı ilə bağlı insident haqqında yazmaqdan yorulmayıblar. Bu məqamda, ələlxüsus söhbət xarici işlər və xüsusi xidmət orqanları kimi yüksək səviyyəli qurumlardan gedirsə, ortaya Rusiya ilə bağlı yeni mövzu atmağın yeri deyil. Digər tərəfdən, rus blogerlə bağlı hadisə də daxil olmaqla, əvvəlki təcrübə göstərir ki, hər bir halda Moskvaya qarşı həqiqətən ciddi və ağrılı tədbirlər görməyə arxalanmaq olmaz.

Bununla yanaşı, Vaşinqton və Londonun eyni vaxtda verdiyi bəyanatlar hər iki ölkənin ortaq hədəflərinin mövcudluğundan xəbər verir.

Bəs söhbət nədən gedir?

Bu suala cavabı, yəqin ki, irəli sürülən ittihamlara Tokio və Seulun reaksiyasında axtarmaq lazımdır. Yaponiya hökuməti "müvafiq məlumatları" toplamaq üçün vaxt qazanmaq məqsədilə məsələni şərh etməkdən imtina edib, Cənubi Koreya hakimiyyəti də susmağa üstünlük verib.

Böyük ehtimalla, hər iki ölkənin rəsmi şəxsləri və xüsusi xidmət orqanları, bir sözlə, Qərbin regiondakı əsas müttəfiqləri amerikan-ingilis əməliyyatı barədə əvvəlcədən məlumatlandırılmayıb və buna görə də mümkün olduğu qədər ehtiyatlı davranmağa çalışır. Məsələn, Yaponiyanın Olimpiya Komitəsi bəyan edib ki, qurum öz fəaliyyətində kiberhücumların təsirini hiss etməyib.

Odur ki, böyük ehtimalla, Rusiya əleyhinə növbəti kampaniyanın hədəfi heç də Rusiya deyil, bütün dünya, ilk növbədə isə Qərbin özüdür. Rusofob gündəm isə burada sadəcə bir vasitə kimi çıxış edir.

Aleksey Navalnı, arxiv şəkli
© AP Photo / Alexander Zemlianichenko, File

İnformasiya-təbliğat sahəsində dominant mövqeyə sahib olmaq ABŞ hegemoniyasının mühüm hissəsini təşkil edir. Böyük Britaniya isə ənənəvi olaraq ABŞ-a bu məsələdə havadarlıq nümayiş etdirir. Bu iki ölkənin siyasi və xüsusi xidmət sahələrindəki əməkdaşlığı isə artıq hamıya çoxdan məlumdur.

ABŞ-ın supergücünün tədricən deqradasiyaya uğraması və Birləşmiş Krallığın beynəlxalq aləmə pərdəarxası təsirinin açıq şəkildə zəifləməsi son illərdə adi hala çevrilib. Lakin bu proseslər əsasən iqtisadi, bürokratik və bəzi siyasi mexanizmlərə təsir göstərir.

Eyni zamanda, iki gücün üstünlüyünün bu günə qədər də danılmaz olduğu sahələr var. Amerika ordusunun NATO-dakı üstünlüyünə şübhə etmək mümkün olmadığı kimi, aydın məsələdir ki, Avropa qitəsindəki heç bir media orqanı İngiltərənin "Times" və ya ABŞ-ın CNN-i ilə rəqabət aparmaq iqtidarında deyil. "Twitter" və "Facebook" kimi ictimai fikri manipulyasiya etməyə imkan verən güclü sosial şəbəkələrə nəzarət mərkəzinin məhz okeanın o biri tayında yerləşdiyi də ayrı məsələdir.

Vaşinqtonun RT və ya Çin şirkəti "TikTok"a qarşı sərt siyasəti, ABŞ-ın bu cür strukturların əhəmiyyətini yaxşı başa düşdüyünü bir daha təsdiqləyir.

Bununla belə, geopolitik rəqiblərin özlərinin mediaya təsir resurslarına sahib olduğunu nəzərə alsaq, ABŞ bu vəziyyətə öyrəşib və sözügedən şirkətlərin öz ərazisindəki fəaliyyətini məhdudlaşdırmaqda çətinliklə qarşılaşmayacaq. Amerikan-ingilis xüsusi xidmət və təbliğat tandemi üçün Qərbin öz daxilində rəqiblərinin meydana gəlməsi isə daha həssas məsələdir. Və indi məhz bu baş verir – Navalnı məsələsi hər iki ölkə üçün son dərəcə xoşagəlməz və arzuolunmaz proseslərin getdiyini göstərir. Rusiyadan baxanda bəlkə də belə görünə bilər ki, blogerlə bağlı yaranan səs-küy artıq hamını boğaza yığıb, əslinə isə bu çox unikal hadisədir, çünki bütünlüklə Berlinin əməlidir.

Bəli, Almaniya standart rusofobiya gündəmindən yararlanır, amma onu öz "böyük tərəfdaş"larından mənimsəyərək oyuna müstəqil şəkildə qoşulur.

Navalnıya nəzarət almanların əlindədir və o, hər şeyi –  "Şimal axını 2" layihəsini müdafiə etməkdən tutmuş onu dəstəkləməyən amerikalıların ünvanına söylədiklərinə qədər –  Berlinin diktəsi ilə edir. Nəticədə alman mediası bir neçə gün ərzində dünya üçün əsas xəbər mənbəyinə çevrilib və ingilis dilli media almanlardan sitat gətirmək, onların yazdıqlarını tirajlamaq məcburiyyətində qalıb. Bu kontekstdə Olimpiya oyunlarına kiberhücum təşkil edən Rusiyanın Baş Kəşfiyyat İdarəsinin hakerləri ilə bağlı məsələ tamamilə başqa məna kəsb edir. Əslində, amerikalılar və ingilislər bu mövzunu ortaya atmaqla Navalnı məsələsini xəbər gündəmindən tamamilə kənarlaşdırmağa çalışırlar. Çünki onların fikrincə, bu rəqiblərinin layihəsidir. Bundan başqa, Vaşinqton və London üçün bir müddətlik almanların nəzarəti altına keçən qlobal media-siyasi məkan üzərindəki nəzarəti yenidən ələ almaq çox vacibdir. Bunun ən yaxşı yolu isə mediada Rusiya əleyhinə bir mövzunu başqa bir mövzu ilə əvəz etməkdir. Hərçənd, hər iki tərəf Rusiyaya qarşı dostyana ritorikadan istifadə etmir, ancaq onların arasındakı fikir ayrılığı mahiyyət etibarilə, Rusiyanın (və bir çox digər ölkələrin) xeyrinədir. Çünki bütün bunlar Qərbin daxilindəki münaqişə vəziyyətini gücləndirir və onun tənəzzülünü stimullaşdırır.

Almaniyanın qısa müddətlik də olsa, dünyadakı siyasi-informativ məkana nəzarəti ilk dəfə ələ keçirməsi faktını nadir istisna hallarından biri kimi qəbul etmək lazımdır. ABŞ və Böyük Britaniya isə artıq mediadakı dominant mövqeyi əldən verməyə hazır olsalar, yaxşıdır. Çünki indi bu sahədə onlara nəinki geopolitik rəqibləri, yaxın müttəfiqləri belə meydan oxumağa başlayıblar.

13
Şimali Dakotada qitələrarası ballistik raketlərin idarəetmə obyekti, arxiv şəkli

Co Bayden gəlsə, Strateji Hücum Silahları Haqqında Müqaviləni uzadacaqlar

126
(Yenilənib 23:19 20.10.2020)
Kremldən ABŞ-ın SHS-3 müqaviləsi ilə əlaqədar bəyanatını şərh edərkən bildiriblər ki, Moskva Vaşinqtonla strateji sabitliklə bağlı təmaslarını davam etdirir. Amerikaşünas Konstantin Bloxin Sputnik radiosunun efirindən bu məsələ barədə öz fikirlərini səsləndirib.

BAKI, 20 oktyabr — Sputnik. Rusiya Prezidentinin mətbuat katibi Dmitri Peskov bəyan edib ki, Vaşinqton Vladimir Putinin SHS-3-ün (Strateji Hücum Silahları Haqqında Müqavilənin) daha bir il uzadılması təklifindən imtina etsə də, Moskva hər bir halda Amerika tərəfi ilə təmasların davam edəcəyinə ümid bağlayır.

Qeyd edək ki, bir qədər bundan əvvəl Ağ Ev Putinin mövcud müqavilənin yeni şərt irəli sürülmədən daha bir il uzadılması təklifini rədd edib.

"Biz ümid edirik ki, istənilən halda Amerika tərəfi ilə təmaslar davam edəcək. Ümumilikdə, əlbəttə ki, Prezidentin də qeyd etdiyi kimi, müqavilənin uzadılması bizə vaxt qazandıra bilərdi. Qazanacağımız bu əlavə 12 ay ərzində silahlanmaya nəzarət məsələsi ilə bağlı substantiv və ciddi danışıqlar aparmaq mümkün idi", – deyə Peskov bildirib.

O, bütün dünyanı qlobal sabitlik və təhlükəsizliyin bu "məhək daşı"ndan məhrum etməyin çox fəlakətli nəticələrə gətirib çıxaracağını da vurğulayıb.

"Buna görə də biz hər bir halda Amerika tərəfinin bu sənədin müddətini uzatmağa hazır olduğunu eşitmək istərdik ", – deyə Prezidentin mətbuat katibi qeyd edib.

Onun sözlərinə görə, hələlik bu sahədə gözlənilən inkişaf müşahidə olunmur, ancaq bu heç də o demək deyil ki, "təmasları tamamilə dayandırmaq lazımdır".

Rusiya Elmlər Akademiyası Təhlükəsizlik Araşdırmaları Mərkəzinin aparıcı tədqiqatçısı, amerikaşünas, politoloq Konstantin Bloxin Sputnik radiosu-nun efirində bildirib ki, müqavilənin taleyi daha çox ABŞ-da bu yaxınlarda keçiriləcək prezident seçkisində kimin qalib gələcəyindən asılıdır.

"Əvvəla, Respublikaçılar Partiyasının namizədi Donald Tramp Çinə nifrət edir və SHS-3-ü birbaşa Çinlə əlaqələndirir. İkincisi, ənənəvi olaraq Respublikaçılar Partiyası silahlanma üzərində nəzarəti dağıtmaq istəyir. Xatırladıram ki, Corc Buş (oğul) administrasiyası dövründə amerikalılar Anti-Ballistik Raket Sistemi (ABM) Müqaviləsindən, Tramp özü isə Orta və Qısa Mənzilli Raketlər və Açıq Səma müqavilələrindən imtina edib. Odur ki, Tramp seçkilərdə qalib gəlsə, ABŞ-ın SHS-3-dən çəkilmə ehtimalı olduqca yüksəkdir", – deyə Konstantin Bloxin bildirib.

Əgər Demokrat Partiyasının namizədi Cozef Bayden qalib gələrsə, o halda ekspertin fikrincə, müqavilənin uzadılması ehtimalı var.

"Ənənəvi olaraq, Demokrat Partiyası ruslarla strateji sabitlik mövzusunda danışıqlar aparmağın tərəfdarıdır. Xatırladım ki, mövcud müqavilənin müddətini Medvedev administrasiyası ilə Obama administrasiyası uzatmışdı. Ancaq kim qalib gəlirsə-gəlsin, bir neçə ayda yeni bir müqavilə bağlamaq, demək olar ki, mümkün deyil. Buna görə də mövcud müqavilənin müddətini ən azı bir il uzatmaq lazımdır ki, həmin dövrdə yenisi qəbul olunsun", – deyə ekspert bildirib.

Qeyd edək ki, SHS-3 silahlanmanın məhdudlaşdırılması ilə bağlı Rusiya və ABŞ arasında qüvvədə olan yeganə müqavilədir. 5 fevral 2011-ci ildə qüvvəyə minmiş müqavilənin müddəti 5 fevral 2021-ci il tarixində başa çatacaq. Əgər müqavilə yenilənməsə, artıq dünyada bu iki böyük nüvə gücünün silah arsenallarını məhdudlaşdıran heç bir sənəd mövcud olmayacaq.

126
Kompüter arxasında qız, arxiv şəkli

Azərbaycanda Kommunal Xidmətlər üzrə Vahid İnformasiya Sisteminin sınaqlarına başlanacaq

0
(Yenilənib 23:08 21.10.2020)
Bu, istehlakçıların bütün kommunal xidmətlər üzrə onlara aid məlumatları vahid şəxsi kabinet üzərindən idarə etmələrinə imkan yaradır

BAKI, 21 oktyabr — Sputnik. Kommunal Xidmətlər üzrə Vahid İnformasiya Sistemi və Vahid Çağrı Mərkəzinin yaradılması nəzərdə tutulur.

Sputnik Azərbaycan xəbər verir ki, bunu Energetika naziri Pərviz Şahbazov deyib.

O qeyd edib ki, "Açıq hökumətin təşviqinə dair 2020-2022-ci illər üçün Milli Fəaliyyət Planı"na əsasən, Kommunal Xidmətlər üzrə Vahid İnformasiya Sistemi və Vahid Çağrı Mərkəzinin yaradılması nəzərdə tutulur: “"Dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi Qaydaları"nın təsdiq edilməsi və elektron hökumətlə bağlı bəzi tədbirlər haqqında Azərbaycan Respublikası Prezidentinin Fərmanı ilə Kommunal Xidmətlər Vahid İnformasiya Sisteminin operatoru funksiyaları Energetika Nazirliyinə həvalə edilib.

Cari ilin sonuna kimi "ASAN xidmət" tərəfindən sistemin test fazasına başlanması planlaşdırılır. Bu, istehlakçıların bütün kommunal xidmətlər üzrə onlara aid məlumatları vahid şəxsi kabinet üzərindən idarə etmələrinə imkan yaradır. Kommunal xidmətlər üzrə vahid informasiya bazasının yaradılması bu sahədə həyata keçirilən siyasətin mərkəzləşdirilməsi və sistemləşdirilməsi, müvafiq xidmətlər üzrə müraciətlərin vahid platformadan ünvanlanması, bu xidmətlərin hər kəs üçün daha əlçatanlığı və fasiləsizliyi, yaranan çətinliklərin operativ həlli baxımından faydalıdır”.

“Vətəndaş müraciətlərinin obyektiv araşdırılaraq cavablandırılması, xidmətlərin icrası zamanı sui-istifadə hallarının qarşısının alınması, xidmətlərin icra vəziyyətinə dair mərkəzləşdirilmiş təhlil və hesabatların aparılması, istifadəçilər tərəfindən xidmətin keyfiyyətinə dair təklif və iradların toplanması, həmçinin vətəndaş məmnunluğunun artırılması məqsədilə yaradılacaq Vahid Çağrı Mərkəzinin formalaşdırılması ilə bağlı Konsepsiya layihəsi də Nazirlər Kabinetinə təqdim edilib. Bütün bu tədbirlər açıqlıq, şəffaflıq və hesabatlılıq prinsiplərini əsas tutaraq dövlət xidmətlərinin təkmilləşdirilməsinə, ictimai nəzarətin gücləndirilməsinə xidmət edəcək”, - deyə nazir bildirib.

0