Bakı-Sumqayıt yolunda yanacaqdoldurma məntəqəsi, arxiv şəkli

Benzin şoku, Azərbaycanın gözəl yolları büdcə qanunu: həftənin iqtisadi yekunu

76
(Yenilənib 22:07 06.06.2021)
Benzinin qiymətinin bahalaşması, OPEC-ə üzv və qeyri-üzv ölkələrin nazirlərinin 17-ci iclasında verilən qərarlar, 2020-ci il dövlət büdcəsinin icrası haqqında qanun layihəsinin müzakirəsi - Sputnik Azərbaycan ötən həftənin ən mühüm iqtisadi hadisələrindən bəhs edir.

BAKI, 6 iyun — Sputnik. Bu həftə Azərbaycanda baş verən iqtisadi hadisələr içərisində Aİ-95 və Aİ-98 markalı avtomobil benzinin bahalaşması gündəmdə olub.

Benzinin qiyməti qalxıb

Ölkəyə idxal olunan Aİ-95 benzininin qiyməti 1,25 manatdan 1,40 manata, Aİ-98 benzininin qiyməti isə 1,40 manatdan 1,55 manata qalxıb.

SOCAR-ın ictimaiyyətlə əlaqələr və tədbirlərin təşkili idarəsinin rəis müavini İbrahim Əhmədov deyib ki, ölkə daxilində bu benzin növlərinin qiymətinin artımı birbaşa olaraq dünya bazarında neftin və neft məhsullarının bahalaşması ilə əlaqədardır:

"Hər iki benzin növü ölkəyə idxal olunur. Bu benzin növləri ölkə daxilində istehsal olunmur və idxal olunduğuna görə həmin benzin növlərinin qiyməti də idxal edilən ölkələrin, yəni beynəlxalq bazarda olan qiymətlərdən asılıdır. Beləliklə, dünyada neftin və neft məhsullarının qiyməti artdıqca, bu benzin növlərinin də Azərbaycanda qiyməti artır, azaldıqca azalır".

"Gələcəkdə Heydər Əliyev adına Neft Emalı Zavodunda aparılan modernizasiya nəticəsində 2022-ci ildən sonra zavodda Aİ-95 benzinin də istehsalı mümkün ola bilər. Belə olduğu halda, biz bu benzinin idxalından asılılığımızı azalda bilərik və yaxud ümumiyyətlə aradan qaldıra bilərik. Yəni özümüz ölkə daxili istehsal edəcəyik və qiymət də artıq xarici amillərdən asılı olmayacaq. Belə olduğu halda, dövlət öz siyasətinə uyğun olaraq onları tənzimləyə biləcək", - deyə İ.Əhmədov qeyd edib.

Azərbaycanda yanacağın qiymətinə sonuncu dəfə bu ilin yanvarında dəyişiklik edilib. Yanvarın 4-də Tarif (qiymət) Şurasının iclasında Aİ-92 markalı avtomobil benzininin pərakəndə satış qiyməti 1 litr üçün 1 manat, dizel yanacağının pərakəndə satış qiyməti isə 1 litr üçün 80 qəpik müəyyən edilib. Dizel yanacağından istifadənin ekoloji zərərini nəzərə alaraq, daha çox benzin istehlakına keçilməsi məqsədilə qiymət fərqi azaldılıb.

OPEC-ə üzv və qeyri-üzv ölkələrin nazirlərinin 17-ci iclası

Bu həftənin ən yaddaqalan hadisələrindən biri OPEC-ə üzv və qeyri-üzv ölkələrin nazirlərinin 17-ci iclası olub. İclasda iyul ayı üçün hasilatın artırılması qərarının qüvvədə qalmasına dair razılıq əldə edilib. Azərbaycanın energetika naziri Pərviz Şahbazovun iştirakı ilə keçirilən iclasda Azərbaycan da "Əməkdaşlıq Bəyannaməsi" iştirakçıları üzrə hasilatın azaldılması öhdəliyinin iyulda gündəlik 5,76 mln. barel həcmində saxlanılmasına dair planın qüvvədə qalmasına razılıq verib.

Qəbul edilmiş "Əməkdaşlıq Bəyannaməsi" çərçivəsində Azərbaycanın hasilatın azaldılması barədə öhdəliyi iyulda gündəlik 98 min barel olaraq qalacaq. Bu isə o deməkdir ki, xam neft hasilatı 10 min barel artırılacaq. Beləliklə, iyul ayında ölkədə xam neft hasilatı gündəlik 620 min barel həcmində saxlanılacaq.

"Azərbaycanın 2020-ci il dövlət büdcəsinin icrası haqqında" qanun layihəsi qəbul edilib

Bu həftə "Azərbaycan Respublikasının 2020-ci il dövlət büdcəsinin icrası haqqında" qanun layihəsi ikinci oxunuşda Milli Məclisdə müzakirəyə çıxarılıb.

İqtisadi siyasət, sənaye və sahibkarlıq komitəsinin rəyini parlamentə təqdim edən komitə sədri Tahir Mirkişili bildirib ki, müharibə xərcləri, şəhid ailələrinə, əsgər və zabitlərə qayğının artırılması, sosial dəstək proqramlarının icrası, səhiyyə sisteminin gücləndirilməsi, işğaldan azad edilən ərazilərin bərpası, pandemiyadan əziyyət çəkən sahibkarların dəstəklənməsi 2020-ci il dövlət büdcəsinin icrası qarşısında dayanan mühüm hədəflərdən olub.

Komitə sədri nəzərə çatdırıb ki, 2020-ci ildə dövlət büdcəsinin gəlirləri 24 milyard 124 milyon manat proqnoza qarşı 24 milyard 681,7 milyon manat, yəni proqnozla müqayisədə 2,3 faiz çox icra olunub. Dövlət büdcəsinin xərcləri isə 27 milyard 492,2 milyon manat proqnoza qarşı 26 milyard 416,3 milyon manat icra edilib ki, bu da proqnozla müqayisədə 3,9 faiz az deməkdir. O bildirib ki, dövlət büdcəsində yaranan kəsir proqnoza nisbətdə 2 dəfə az olub. Ötən il xarici və daxili dövlət borclanmaları üzrə icra vəziyyəti müəyyənləşdirilmiş limiti keçməyib.

"Azərbaycan Respublikasının 2020-ci il dövlət büdcəsinin icrası haqqında" qanun layihəsi ikinci oxunuşda qəbul edilib.

Sankt-Peterburq Beynəlxalq İqtisadi Forumu-2021

İyunun 2-si, çərşənbə günü Sankt-Peterburqda XXIV Sankt-Peterburq Beynəlxalq İqtisadi Forumu öz fəaliyyətinə başlayıb. Tədbirdə Azərbaycanı Baş nazirin müavini Şahin Mustafayevin rəhbərlik etdiyi nümayəndə heyəti təmsil edib.

İyunun 2-dən 6-na kimi davam edəcək forumda iştirakçılar dünya və Rusiya iqtisadiyyatının aktual problemləri, sosial və texnoloji inkişaf məsələlərini müzakirə ediblər. Forumun gündəliyində xarici ticarət əlaqələri, Şanxay Əməkdaşlıq Təşkilatı çərçivəsində iqtisadi əməkdaşlıq, Avrasiya İqtisadi Birliyində elektron ticarət, dəyişmiş qlobal mühitdə BRICS iqtisadi tərəfdaşlıq məsələləri də yer alır.

"Azərbaycanda yollar möhtəşəm səviyyədədir"

Azərbaycan tərəfi “Şimal-Cənub” beynəlxalq nəqliyyat dəhlizinin ərsəyə gəlməsi üçün çox iş görüb.

Bu barədə Rusiya Baş nazirinin müavini, Rusiya-Azərbaycan hökumətlərarası komissiyasının həmsədri Aleksey Overçuk Sankt-Peterburq İqtisadiyyat Forumu çərçivəsində keçirilən “Postcovıd dövründə Avrasiya regional əməkdaşlığı” adlı paneldə aparılan müzakirə zamanı deyib. 

"Azərbaycan daxilində yollar, dəmir yolları möhtəşəm səviyyədədir. Bir sözlə, nəqliyyat yollarını Azərbaycan inkişaf etdirib. Bunu Azərbaycanda olan hər kəs bilir. Təkcə dəmir və avtomobil yolları deyil, Azərbaycan Xəzər dənizində olan limanını da inkişaf etdirib. Bütün bunlar “Şimal-Cənub” dəhlizinin tərkib hissəsidir”, - deyə Rusiya Baş nazirinin müavini vurğulayıb.

Şahin Mustafayev isə öz növbəsində qeyd edib ki, koronavirus pandemiyasına rəğmən, Azərbaycan bölgənin əsas nəqliyyat dəhlizlərinin inkişaf etdirilməsində Rusiya ilə uğurlu əməkdaşlıq edir.

"Biz "Şimal-Cənub" dəhlizinin təşviqi üçün Rusiya və İranla uğurla əməkdaşlıq edirik. Deməliyəm ki, son ildə yaranan vəziyyətə rəğmən, ölkələrimiz ərazisindən keçən tranzit daşımalarını bir gün də olsun dayandırmamışıq. İrandan Azərbaycan ərazisi ilə Rusiyaya və əksinə yüklər göndərilib, üstəlik, ötən kovidli ildə ondan öncəki illə müqayisədə tranzit daşımalarının həcmi 19% artıb", - Mustafayev deyib.

Nazir müavini Azərbaycanın tikdiyi dəmiryolu sayəsində Rusiyanı Aralıq dənizinə qovuşduran, bir sıra ölkələrlə birləşdirən "Şimal-Qərb" dəhlizinin də vacibliyini vurğulayıb.

Onun sözlərinə görə, Rusiya və İranla iqtisadi əməkdaşlığın inkişafı planlarına yeni beynəlxalq energetik dəhlizin tikilməsi də daxildir.

Soydaşımızın rəhbərlik etdiyi əcnəbi şirkəti "Dostluq" yatağının işlənməsinə qatılacaq

Rusiyanın "Lukoyl" şirkəti Azərbaycan və Türkmənistanın birgə yatağı olan "Dostluq" yatağının işlənməsində iştirak edəcək. Bu barədə Türkmənistanın "TurkmenPortal" nəşri məlumat yayıb.

Nəşr yazır ki, müvafiq razılaşma Türkmənistan Prezidenti Qurbanqulu Berdiməhəmmədov və "Lukoyl" şirkətinin rəhbəri Vahid Ələkbərovun görüşü zamanı əldə olunub.

"Biz "Lukoyl"un "Dostluq" yatağının işlənməsində iştirak etmək niyyətini alqışlayırıq və bu layihənin işlənməsi üçün konkret investisiya layihələrini nəzərdən keçirməyə hazırıq", - deyə Berdiməhəmmədov bildirib.

Qeyd edək ki, Azərbaycan və Türkmənistan "Dostluq" yatağının karbohidrogen resurslarının birgə kəşfiyyatı, işlənməsi və mənimsənilməsi məqsədilə həmin yatağın coğrafi koordinatlarını müəyyən edəcək.

Yeni həftəyə baxış

Gələn həftə Milli Məclisin növbədənkənar sessiyasında ilk plenar iclası keçiriləcək.

İclasda "Azərbaycan Respublikasının 2020-ci il dövlət büdcəsinin icrası haqqında" qanun layihəsi üçüncü oxunuşda müzakirəyə çıxarılacaq, bir sıra qanunlarda dəyişikliklərə baxılacaq.

Gələn həftə Sputnik Azərbaycanın Multimedia Mətbuat Mərkəzində ölkəmizin kənd təsərrüfatı məhsullarının ixrac potensialı, imkanları ilə bağlı tədbir təşkil ediləcək. Tədbirdə Kənd Təsərrüfatı Nazirliyinin nümayəndələrinin iştirak edəcəyi gözlənilir.

Eləcə də oxuyun:

  • Professor: “Neft qiymətlərinin bir qədər də artımı üçün potensial var”

  • "Bu il qlobal ÜDM-də qeyri-adi dərəcədə artım gözlənilir" - Rusiya prezidenti

  • Azərbaycanda taxtanın qiymətləri qalxdı: Rusiya ilə bağlı səbəb var

  • "Samur" postunda 1500-dən çox yük maşını Rusiyaya keçmək üçün gözləyir

76
Teqlər:
həftənin icmalı, iqtisadiyyat, Azərbaycan

Ekspert Rusiyanın niyə dollardan imtina edə bilməyəcəyini izah edib

7
(Yenilənib 11:26 19.06.2021)
Mütəxəssisin fikrincə, dollardan tam imtina edə bilmək üçün ixracda neft əsas rollardan birini oynamamalıdır.

BAKI, 19 iyun - Sputnik. Rusiya tam olaraq ticari sövdələşmələrdə və qızıl-valyuta ehtiyatlarında dollardan imtina edə bilməz, çünki ixrac məhsullarından biri olan neft məhz bu valyutada kotirovka olunur. Bunu RİA Novosti ilə söhbətində Rusiyanın Analitik kredit reytinq agentliyinin rəhbəri Mixail Suxov deyib.

"ABŞ dollarının payının azalması qızıl-valyuta ehtiyatlarının ümumlikdə rezidentlərin öz ticari tərəfdaşları ilə hesablaşmalarla bağlı valyuta əməliyyatlarını əks etdirməsi baxımından düzgndür. ABŞ-ın Rusiya ilə ticarətdə ticari tərəfdaş kimi payı böyük deyil - 2018-ci ildə bütün ixracdan 3,2%", - Suxov qeyd edib.

Rusiyanın valyuta siyasətindəki dəyişikliklər

Rusiya Bankı 2020-ci ildə ölkənin beynəlxalq ehtiyatlarında avronun (29,2%), dolların (21,2%) və funt sterlinqin (6,3%) payını qızılın (23,3%), yuanın (12,8%) və digər valyutaların xeyrinə azaldıb. Dollardan kənarlaşma yalnız ehtiyatlarda deyil, ticarətdə də baş verir: dolların payı Rusiya ixracına görə hesablaşmalarda ötən ilin nəticələrinə əsasən tarixi minimuma düşüb - 55,8%, dördüncü rübün nəticələrində isə daha aşağıdır – 48,3%.

7

Fuad Sadıqov: “Bizdən bu tipli hadisələrlə bağlı təminat istəyirlər”

4
(Yenilənib 17:27 18.06.2021)
Aqrar Sığorta Fondunun İdarə Heyətinin sədri Fuad Sadıqov deyir ki, ilkin olaraq təbiət hadisələrinin siyahısının genişləndirilməsi gözlənilir
Fuad Sadıqov: “Bu fermerlərə də sığorta xidmətləri göstərilə biləcək”

“Ölkəmizə idxal və ixrac olunan bütün bütün bitkilərin sığortalanması həyata keçiriləcək”. Sputnik Azərbaycan xəbər verir ki, bunu Atv-yə açıqlamasında Aqrar Sığorta Fondunun İdarə Heyətinin sədri Fuad Sadıqov deyib.

O bildirib ki, artıq ətlik iri buynuzlu heyvanlar, həmçinin xırda buynuzlu heyvanların və arıçılıqla məşğul olan fermərlərə sığorta xidmətləri göstərilə biləcək: “İlkin olaraq təbiət hadisələrinin siyahısının genişləndirilməsi gözlənilir. Misal olaraq deyim ki, biz hər zaman fermerlərimizin quraqlıqdan əziyyət çəkdiyini eşidirik. Lakin elə təsrrüfatlar var ki, izafi yağıntılardan əziyyət çəkir. Bizdən bu tipli hadisələrlə bağlı təminat istəyirlər. Artıq bununla bağlı təminatları da layihəyə daxil etmişik”.

Fuad Sadıqovun fikirlərinə audiofaylda qulaq asa bilərsiniz

4

Bu dünyanı dəyişməliyik

0
(Yenilənib 15:07 18.06.2021)
Krasnodarlı rəssam Vladimir Kandr tullantılardan beşmetrlik "Dalğa" adlı qurğu düzəltdi - Ətraflı videomuzda.

 

Rəssam Vladimir Kandr ətraf mühitin çirklənməsi problemindən o qədər narahat olub ki, bu məsələnin həll yolu onun yuxusuna girib. Belə ki, tullantılardan "Dalğa" adlı qurğu düzəltmək ideyası ona yuxuda gəlib.

Vladimir müsahibəsində bildirib ki, üç tondan çox zibil toplayıb, onları yenidən emal edərək yığılıb-sökülən qurğu düzəldib.

"Bu doqquz hissəyə bölünən dalğadır, nəqliyyatla da daşına bilir. Müasir sivilizasiyamızla ətraf mühiti necə məhv etdiyimizi anlamaq üçün qurğunun ortasında bir oyuq da düzəltdim," – deyə rəssam fikirlərini bölüşür.

Kandrın sözlərinə görə, o, dostları ilə həmişə təbiət qoynunda dincəlməyə gedəndə həm də digər turistlərin zibillədiyi əraziləri təmizləməklə məşğul olublar. Belə gəzintilər zamanı metal çəlləklərdən tutmuş konyak şüşələrinə qədər maraqlı və qeyri-adi əşyalara da rast gəlinir.

"Tullantılar yer dəyişdirir, başqa ölkələrdən bizə qədər gəlib çıxır. Hərdən qeyri-adi tapıntılar da olur. Bəzən bir kvadratmetr ərazidə beş alışqan, çox sayda taykeş ayaqqabılara rast gəlmək olar. Onları geyinmək də mümkündür, amma hər tayı fərqli olacaq", – ekoaktivist zarafatla deyir.

Vladimir Kandr onu da bildirib ki, hazırda "Dalğa"dan da böyük yeni layihə üzərində işləyir. Yeni qurğu da eyni tərzdə, ancaq başqa süjet əsasında hazırlanacaq.

0