Dollar, arxiv şəkli

Rayonlarda kredit faizləri niyə yüksəkdir problemin həlli nədir?

785
(Yenilənib 22:13 25.04.2021)
"Hansı ölkənin reytinqi yüksəkdirsə, o, beynəlxalq maliyyə institutlarından və digər iri xarici banklardan daha ucuz kredit götürə bilir. Bizdə də belədir. Belə ki, Bakıda kredit reytinqi daha yüksəkdir, regionlarda isə kredit reytinqi aşağıdır".

Xalid Məmmədov, Sputnik Azərbaycan

BAKI, 25 aprel — Sputnik. "Bankların regionlarda kreditləri yüksək faizlə təklif etməsi gözləniləndir. Kredit faizi riskə bağlı olan məsələdir. Bankın riski, xərci nə qədər çoxdursa, faiz dərəcəsi də bir o qədər çox olur". Bunu bank və maliyyə məsələləri üzrə ekspert Əkrəm Həsənov regionlarda yüksək faizlə kredit verilməsindən danışarkən Sputnik Azərbaycan-a deyib.

Baş Prokurorluq kənd təsərrüfatı kreditlərinin təyinatında nöqsanları araşdırır>>

Ekspert bildirib ki, regionlarda bankların riskləri daha çoxdur: "Çünki birincisi, bizdə regionlarda gəlir daha azdır. İkincisi, regionda götürülən girov əmlakı satmaq bank üçün çox çətindir. Üçüncüsü, krediti daim monitorinq etmək, problem yaranan zaman gedib-gəlmək əlavə xərcdir. Yəni regionda verilən kredit Bakıda verilən kreditdən daha xərcli və daha riskli prosesdir. Bu, iqtisadi, bankçılıq baxımdan normal haldır, lakin sosial baxımdan problemdir".

"Regionların inkişafına daha çox diqqət ayrılmalıdır ki, əhalinin gəlirləri artsın, risklər daha az olsun. Eyni zamanda regionlara güzəştli kreditlər çox verilə bilər, yaxud regionlarda verilən kreditlərin faiz dərəcəsinin bir hissəsini dövlət kompensasiya edə bilər. Regionlarda verilən kreditin faiz dərəcəsini Bakı və Bakıətrafı regionlarda verilən kreditin faiz dərəcəsinə yaxınlaşdırmaq üçün bu addımları atmaq olar", - deyə o qeyd edib.

O bildirib ki, vaxtaşırı beynəlxalq reytinq agentlikləri hər bir ölkənin kredit reytinqlərini açıqlayır: "Hansı ölkənin reytinqi yüksəkdirsə, o, beynəlxalq maliyyə institutlarından və digər iri xarici banklardan daha ucuz kredit götürə bilir. Hansı ölkənin reytinqi aşağıdırsa, o ölkəyə daha yüksək faizlə kredit verirlər. Eyni məsələ burada da belədir. Belə ki, Bakıda kredit reytinqi daha yüksəkdir, regionlarda isə kredit reytinqi aşağıdır".

Ekspert diqqətə çatdırıb ki, regionlarda maliyyə xidmətlərinə əlçatanlıq zəifdir: "Azərbaycanda 26 bank və xeyli sayda bank olmayan kredit təşkilatları var. Qanunvericiliklə bank olmayan kredit təşkilatlarının fəaliyyəti çox məhdudlaşdırılıb. Onlar heç nağd pul əməliyyatlarını apara bilmirlər. Qanunvericiliyə dəyişiklik edilməli və bank olmayan kredit təşkilatlarının səlahiyyətləri genişləndirilməlidir.

Digər bir məsələ "Azərpoçt" ilə bağlıdır. Qanuna görə, "Azərpoçt" da bank xidmətləri göstərə bilər, amma ona bu barədə lisenziya vermək lazımdır. Bu gün Azərbaycanın ucqar kəndlərində bank xidmətləri yoxdur. Çünki orada heç bir bankın filialı yoxdur. Lakin hər bir kəndimizdə "Azərpoçt"un bölməsi var. Deməli, bunu inkişaf etdirmək lazımdır və bununla bağlı xarici təcrübə də var. Ona görə "Azərpoçt"un səlahiyyətlərini genişləndirmək lazımdır ki, həm də kredit fəaliyyəti ilə məşğul ola bilsin".

Millət vəkili Vüqar Bayramov da bildirib ki, rayonlara daha az vəsait ayıran banklar regionlarda kreditləri də yüksək faizlə təklif edirlər:

"Mərkəzi Bankın məlumatına görə, bankların ən yüksək kredit faizləri Yuxarı Qarabağ iqtisadi rayonundadır. Yəni, Füzuli, Ağdam və Tərtər rayonlarında yaşayan vətəndaşlarımız və iş adamları daha yüksək faizli kredit götürmək məcburiyyətindədirlər. Bu iqtisadi rayon üzrə orta kredit faizi 24.25 faizdir.

Uyğun olaraq Dağlıq Şirvan və Aran iqtisadi rayonları da yüksək kredit faizlərinə görə fərqlənir. Ümumiyyətlə, rayonlarda kredit faizləri Bakı ilə müqayisədə orta hesabla 2 dəfədən çox artıqdır. Mərkəzi Bankın rayonlarda fəaliyyət göstərən sahibkarlara daha ucuz kreditlərin verilməsini təşviq etməsi çox vacibdir. Bu zaman xərclərin bir hissəsinin subsidiya edilməsi, rayonlara aşağı faizli kredit ayıran banklara əlavə güzəşlərin verilməsi mexanizmdən istifadə oluna bilər".

785
Teqlər:
faiz, rayonlar, bank, kredit
Maliyyə Nazirliyinin binası, arxiv şəkli

Maliyyə Nazirliyi müraciət yayıb

6
(Yenilənib 12:28 09.05.2021)
Azərbaycan Respublikası Maliyyə Nazirliyi kommersiya təşkilatlarına və publik hüquqi şəxslərə müraciət ünvanlatıb.

BAKI, 9 may — Sputnik. Maliyyə Nazirliyi ictimai əhəmiyyətli qurumların, birləşdirilmiş (konsolidə edilmiş) maliyyə hesabatlarını hazırlayan, habelə dövlət zəmanəti ilə kredit alan və yaxud dövlət borcunun xərclənməsinə dair layihələrdə iştirak edən, eləcə də büdcədən subsidiya, subvensiya, qrant və yaxud müəyyən səlahiyyətlərin yerinə yetirilməsi ilə bağlı büdcə vəsaiti ayrılan kommersiya təşkilatlarına və publik hüquqi şəxslərə müraciət edib.

Sputnik Azərbaycan-ın məlumatına görə, müraciətdə deyilir:

"Dövlət zəmanəti ilə kredit alan və yaxud dövlət borcunun xərclənməsinə dair layihələrdə iştirak edən, həmçinin büdcədən subsidiya, subvensiya, qrant və yaxud müəyyən səlahiyyətlərin yerinə yetirilməsi ilə bağlı büdcə vəsaiti ayrılan kommersiya təşkilatları və publik hüquqi şəxslər "Mühasibat uçotu haqqında" qanunun müvafiq olaraq 12.2-ci və 12-1.8-ci maddələrinə əsasən illik maliyyə hesabatlarını və birləşdirilmiş (konsolidə edilmiş) maliyyə hesabatlarını auditor rəyi ilə birlikdə Maliyyə Nazirliyinə təqdim edirlər.

Qanunun 12.3-cü maddəsinin tələblərinə uyğun olaraq, ictimai əhəmiyyətli qurumlardan və birləşdirilmiş (konsolidə edilmiş) maliyyə hesabatlarını hazırlayan kommersiya təşkilatlarından (mikro və kiçik sahibkarlıq subyektləri istisna olmaqla), habelə dövlət zəmanəti ilə kredit alan və yaxud dövlət borcunun xərclənməsi ilə bağlı layihələrdə iştirak edən, həmçinin büdcədən subsidiya, subvensiya, qrant və yaxud müəyyən səlahiyyətlərin yerinə yetirilməsi ilə bağlı büdcə vəsaiti ayrılan kommersiya təşkilatlarından qurumun internet səhifəsi olduqda, həmin məlumatlardan sərbəst istifadə edilməsini təmin etmək şərtilə, illik maliyyə hesabatının və birləşdirilmiş (konsolidə edilmiş) maliyyə hesabatlarının auditor rəyi ilə birlikdə, həmin internet səhifəsində və yaxud mətbu orqanda dərc olunması tələb olunur.

Qanunun 12-1.9-cu maddəsinin tələblərinə əsasən, birləşdirilmiş (konsolidə edilmiş) maliyyə hesabatlarını tərtib edən publik hüquqi şəxslərdən, nizamnaməsində maliyyə hesabatlarının dərc edilməsi nəzərdə tutulan, ölkə prezidentinin yaratdığı publik hüquqi şəxslərdən, habelə dövlət zəmanəti ilə kredit alan və yaxud dövlət borcunun xərclənməsi ilə bağlı layihələrdə iştirak edən, həmçinin dövlət büdcəsindən subsidiya, subvensiya, qrant və yaxud müəyyən səlahiyyətlərin yerinə yetirilməsi ilə bağlı vəsait ayrılan publik hüquqi şəxslərdən (dövlət və bələdiyyə tərəfindən yaradılan tibb müəssisəsi, uşaq evləri sosial xidmət müəssisəsi, açıq və qapalı tipli xüsusi təlim-tərbiyə müəssisəsi, məktəbəqədər təhsil müəssisəsi, ümumtəhsil məktəbi, peşə təhsili müəssisəsi, orta ixtisas təhsili müəssisəsi, ali təhsil müəssisəsi, xüsusi təhsil müəssisəsi və ailə tipli kiçik qrup evi istisna olmaqla) illik maliyyə hesabatını və birləşdirilmiş (konsolidə edilmiş) maliyyə hesabatlarını auditor rəyi ilə birlikdə özlərinin rəsmi internet səhifələrində və yaxud mətbu orqanda dərc etdirməsi tələb olunur.

Nazirlər Kabinetinin 27 may 2010-cu il tarixli qərarı ilə təsdiq edilmiş "Kommersiya təşkilatlarının illik maliyyə hesabatlarının və birləşdirilmiş (konsolidə edilmiş) maliyyə hesabatlarının təqdim edilməsi və dərc edilməsi Qaydaları"nın 3.4-cü bəndinə əsasən kommersiya təşkilatının illik maliyyə hesabatlarının və birləşdirilmiş (konsolidə edilmiş) maliyyə hesabatlarının təqdim edilməsi barədə məlumatlar onların tabe olduqları yuxarı təşkilat və yaxud təsisçi (təsisçilər) tərəfindən bu hesabatların sonuncu təqdimetmə günündən sonra 10 gün ərzində Maliyyə Nazirliyinə verilir".

6
Taxıl biçini, arxiv şəkli

Taxıl biçini başlayacaq - Kombaynlara GPS qoşulur

13
(Yenilənib 23:29 08.05.2021)
May ayının sonundan etibarən Azərbaycanda taxıl biçininə başlanılacaq. Hazırda biçinə cəlb ediləcək kombaynlar üzərində sazlama işləri aparılır.

BAKI, 8 may — Sputnik. May ayının sonundan etibarən Azərbaycanda taxıl biçininə başlanılacaq. Bununla əlaqədar "Aqroservis" ASC tərəfindən biçinə hazırlıq işlərinin əsas mərhələsinə start verilib.

Sputnik Azərbaycan xəbər verir ki, hazırda biçinə cəlb ediləcək kombaynlar üzərində sazlama işləri aparılır. Bütün rayonlar üzrə mövcud kombaynlara texniki baxış keçirilir, nasaz vəziyyətdə olan texnikalarda təmir işləri həyata keçirilir.

Həmçinin, biçin zamanı düzgün dislokasiya planının qurulması üçün kombaynlar GPS nəzarət sistemi ilə təchiz edilir. Bu innovativ nəzarət sistemi biçin zamanı düzgün dislokasiya yaradılması, operativliyin təmin edilməsi, prosesə nəzarət edilməsi və şəffaf idarəetmə mexanizminin qurulmasına imkan yaradır.

Qeyd edək ki, taxıl biçininə hazırlıqların ilkin mərhələsində cari ildə taxıl biçininin itkisiz və mütəşəkkil həyata keçirilməsi məqsədilə kombaynları idarə edəcək mexanizatorlara ödənişsiz təlimlər keçirilib. Müxtəlif markalı kombaynlar üzrə ümumlikdə 263 mexanizator təlimlərdə iştirak edib. Təlimlərdə yüksək nəticə əldə edən mexanizatorlar sertifikat ilə təmin ediliblər.

13

Bu gün 25 mindən çox insan vaksin vurdurub

0
Birinci mərhələ üzrə peyvənd olunanların ümumi sayı 1 005 678, ikinci mərhələ üzrə vaksinasiya edilənlərin sayı 681 719 nəfər təşkil edir.

BAKI, 9 may - Sputnik. Azərbaycanda bu gün 25 625 nəfər vaksinasiya olunub.

Sputnik Azərbaycan xəbər verir ki, bu barədə Nazirlər Kabineti yanında Operativ Qərargah məlumat yayıb.

Qeyd olunub ki, gün ərzində birinci mərhələ üzrə vaksinasiya olunanların sayı 3 710, ikinci mərhələ üzrə vaksinasiya olunanların sayı 21 915 nəfər təşkil edib.

Azərbaycanda bu günə qədər vurulan vaksinlərin ümumi sayı 1 687 397, birinci mərhələ üzrə peyvənd olunanların ümumi sayı 1 005 678, ikinci mərhələ üzrə vaksinasiya edilənlərin sayı 681 719 nəfər təşkil edir.

0