Bank işçiləri, arxiv şəkli

"Heç kəs onlara deyə bilməz ki, müştəriyə güzəşt et" - Problemli kreditlərlə edək?

139
(Yenilənib 11:19 19.04.2021)
"Bəzi sahələr üzrə kreditlərə yenidən baxılmasına ehtiyac var. Məsələn, turizm sahəsində verilən kreditlərə yenidən baxıla bilər. Beynəlxalq ekspertlərin fikrincə, pandemiya ən çox turizm sahəsinə təsir edib".

Xalid Məmmədov, Sputnik Azərbaycan

BAKI, 19 aprel — Sputnik. Pandemiya ilə əlaqədar ümumilikdə 2020-ci il ərzində Azərbaycandakı banklar tərəfindən 1,2 mlrd. manat məbləğində 52 minə yaxın kredit restrukturizasiya olunub və bu proses hazırda da davam edir. Restrukturizasiya olunmuş kreditlərin məbləğ üzrə 87%-i biznes, 9%-i istehlak, 4%-i ipoteka kreditlərinin payına düşüb. 2020-ci ildə bank sektorunun maliyyə vasitəçiliyinin genişləndirilməsi və kredit əlçatanlığının artırılması istiqamətində də tədbirlər davam etdirilib. Bu barədə Mərkəzi Bankın hesabatında deyilib.

Bank və maliyyə məsələləri üzrə ekspert Əkrəm Həsənov Sputnik Azərbaycan-a deyib ki, ötən ilin aprelində Mərkəzi Bank pandemiya ilə bağlı banklara tövsiyə xarakterli məktub göndərib: "Banklara tövsiyə edilib ki, kreditlər üzrə gecikməni gecikmə kimi saymayın və cərimə hesablamayın. Bu, tövsiyə oktyabrın 1-dək verilmişdi və sonra ilin sonunadək uzadıldı. Lakin bu il tövsiyənin müddəti uzadılmadı. Bu il artıq banklar müştərilərə cərimə hesablayır, kredit üzrə gecikməni gecikmə kimi sayır, onları məhkəməyə verirlər. Düzdür, keçən il də banklar əksər hallarda bu tövsiyəni nəzərə almırdılar, yəni müştərilərdən borcun ödənilməsini tələb edirdilər, məhkəməyə də verirdilər. Mərkəzi Bank buna qarşı heç bir tədbir görə bilmirdi və qanuna görə tədbir görə də bilməz".

O bildirib ki, banklar özəl qurumlardır və heç kəs onlara deyə bilməz ki, müştəriyə güzəşt et: "Yalnız dövlət banklara bunu kompensasiya edə bilər. Necə ki, 2019-cu ilin fevral ayında dollar kreditləri ilə bağlı dövlət bunu kompensasiya etdi. Mərkəzi Bank kreditlər ilə bağlı banklara tövsiyə edə bilər. Bankların da bu tövsiyəyə əməl edib-etməyəcəyi öz işləridir. Ötən il göstərdi ki, banklar bu tövsiyəyə bir çox hallarda riayət etmirlər".

"Hazırda banklar problemli borclar üzrə tədbirlər görürlər. Son dövrdə sərt karantin rejimi yoxdur, iş yerləri bağlanmayıb, iqtisadi fəaliyyət aktivləşib və bankların da fəallığı artıb. Azərbaycanda problemli kreditlər artıb, sadəcə gözlənildiyindən az artıb. Bu, təkcə bizdə deyil, pandemiya dövründə bütün dünyada problemli kreditlərdə artım müşahidə edilir", - deyə ekspert əlavə edib.

Azərbaycan Dövlət İqtisad Universitetinin dosenti Emin Qəribli isə Sputnik Azərbaycan-a deyib ki, bu il ölkəmizdə bankların aktivləri 2 faiz, əhalinin depozitləri isə 4 faizdən çox artıb:

 "Bu il göstəricilər müsbətdir. Hətta "Moody International" beynəlxalq reytinq agentliyi bu il üçün Azərbaycanda problemli kreditlərin həcminin 10,3 faizdən 10 faizədək düşəcəyini proqnozlaşdırıb. Ümumilikdə bank sektorunda artım var. Mərkəzi Bankın tövsiyəsinə bankların əməl etməsi sosial baxımdan əhali üçün, digər tərəfdən investisiya mühitinin yaxşılaşdırılması üçün yaxşı idi. Bu tövsiyə bankların özü üçün də xeyirli olub. Lakin bəzi sahələr üzrə kreditlərə yenidən baxılmasına ehtiyac var. Məsələn, turizm sahəsində verilən kreditlərə yenidən baxıla bilər. Beynəlxalq ekspertlərin fikrincə, pandemiya ən çox turizm sahəsinə təsir edib".

Onu da qeyd edək ki, Mərkəzi Bank pandemiya ilə əlaqədar banklara edilən güzəştlərin müddətini uzadıb. Bunun üçün Mərkəzi Bank yeni növ koronavirus (COVID-19) pandemiyası şəraitində kredit təşkilatlarının fəaliyyətinin müvəqqəti tənzimlənməsi qaydasına dəyişiklər edib. Bu qayda 2020-ci ilin aprelin 24-də qəbul edilib.

139
Teqlər:
tövsiyə, banklar, problem, kredit
Neft, arxiv şəkli

Azərbaycan nefti 70 dollara yaxınlaşır

9
(Yenilənib 15:09 06.05.2021)
"Azeri Light" nefti keçən il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

BAKI, 6 may — Sputnik. Azərbaycan neftinin qiyməti bahalaşıb.

Sputnik Azərbaycan xəbər verir ki, "Azeri Light" markalı neftin bir barelinin qiyməti 1,03 dollar artaraq 69,59 dollar təşkil edib.

"Brent" markalı neftin bir barelinin qiyməti 0,23 dollar artaraq 69,19 dollar, "Light" markalı neftin bir barelinin qiyməti isə 0,14 dollar bahalaşaraq 65,77 dollar olub.

Qeyd edək ki, "Azeri Light" nefti keçən il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

9

Professor: “Transsərhəd kapital hərəkətinə nəzarət edilməsi mühümdür”

11
(Yenilənib 01:37 06.05.2021)
Azərbaycan Dövlət İqtisad Universitetinin (UNEC) professoru Elşad Məmmədov deyir ki, Türkiyə ilə dövriyyənin artmasının strukturuna nəzər salmaq lazımdır.
Elşad Məmmədov: “Azərbaycan Türkiyə üçün önəmli investordur”

2021-ci ilin martında Türkiyə ilə Azərbaycanın ticarət dövriyyəsi 258,31 milyon dollar təşkil edib ki, bu da ötən ilin martı ilə müqayisədə 90,473 milyon dollar çoxdur. Bu barədə Türkiyə Ticarət Nazirliyindən bildiriblər.

Azərbaycan Dövlət İqtisad Universitetinin (UNEC) professoru Elşad Məmmədov Sputnik Azərbaycan-a deyir ki, Azərbaycan-Türkiyə ticarət dövriyyəsindəki artımı normal qarşılamaq lazımdır: “Son dövrlər iki ölkə arasında bütün sahələr üzrə əlaqələr gücləndirilib. Bu baxımdan həmin güclənmənin iqtisadi göstəricilərdə təsdiq olunması məntiqəuyğundur. Eyni zamanda dövriyyənin artmasının strukturuna nəzər salmaq lazımdır. Yalnız bundan sonra ümumi ticarət dövriyyəsindəki artımın dəqiq səbəblərini müəyyən etmək mümkün olar. Bundan sonra da dövriyyənin artacağını ehtimal edirəm. Həmçinin iki ölkə kapital hərəkəti ilə bağlı da qarşılıqlı əlaqələrini davam etdirir. Azərbaycan Türkiyə üçün önəmli investordur. Burada mühüm məqamlardan biri transsərhəd kapital hərəkətinə nzəarət edilməsidir”.

Professorun geniş şərhinə audiofaylda qulaq asa bilərsiniz

11
Teqlər:
nəzarət, transsərhəd, kapital, Azərbaycan, Türkiyə

Qəbul imtahanlarında pulsuz iştirak edəcək vətəndaşların siyahısı genişləndirilib

0
Yeni Sərəncamla ali və orta ixtisas təhsili müəssisələrinə qəbul imtahanlarında iştirakı dövlət büdcəsinin vəsaiti hesabına həyata keçirilən kateqoriyaya aid vətəndaşların siyahısı daha da genişləndirilib.

BAKI, 7 may - Sputnik. Ali və orta ixtisas təhsili müəssisələrinə tələbə qəbulunu stimullaşdırmaq və əhalinin sosial müdafiəsini daha da gücləndirmək məqsədi ilə “Azərbaycan Respublikasında ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər haqqında” Azərbaycan Respublikası Prezidentinin 2017-ci il 24 fevral tarixli Sərəncamında dəyişiklik edilib.

Bu barədə Dövlət İmtahan Mərkəzindən (DİM) məlumat verilib.

Dəyişikliyə əsasən “Azərbaycan Respublikasında ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər haqqında” Azərbaycan Respublikası Prezidentinin 2017-ci il 24 fevral tarixli 2694 nömrəli Sərəncamının (Azərbaycan Respublikasının Qanunvericilik Toplusu, 2017, № 2, maddə 271) 1.2-ci bəndinin sonunda nöqtə işarəsi nöqtəli vergül işarəsi ilə əvəz olunub və aşağıdakı məzmunda 1.3 – 1.7-ci bəndlər əlavə edilib:

“1.3. Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin uşaqları;

1.4. şəhid ailəsinin üzvləri;

1.5. valideynlərini itirmiş və valideyn himayəsindən məhrum olmuş uşaqlar;

1.6. məcburi köçkün statusu olan şəxslər;

1.7. I və II dərəcə əlilliyi müəyyən edilmiş şəxslər, o cümlədən sağlamlıq imkanları məhdud 18 yaşınadək uşaqlar.”.

Beləliklə, yeni Sərəncamla ali və orta ixtisas təhsili müəssisələrinə qəbul imtahanlarında iştirakı dövlət büdcəsinin vəsaiti hesabına həyata keçirilən kateqoriyaya aid vətəndaşların siyahısı daha da genişləndirilib.

Xatırladaq ki, “Azərbaycan Respublikasında ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər haqqında” Azərbaycan Respublikası Prezidentinin 2017-ci il 24 fevral tarixli Sərəncamına əsasən orta ixtisas təhsili müəssisələrinə və ali təhsil müəssisələrində ali təhsilin bakalavriat (tibb təhsili üzrə əsas təhsil) səviyyəsinə tələbə qəbulu ilə bağlı DİM-in keçirdiyi imtahanlarda iştirak etmək üçün Tarif (qiymət) Şurasının müəyyən etdiyi qiymətlərə uyğun olaraq, ümumi təhsil müəssisələrini bitirən aşağıdakı kateqoriyadan da olan Azərbaycan Respublikası vətəndaşlarının imtahanlarda iştirakı üçün tələb edilən məbləğin ödənilməsi dövlət büdcəsinin vəsaiti hesabına həyata keçirilir:

1.1. ilk dəfə orta ixtisas təhsili müəssisələrinə tələbə qəbulu ilə bağlı imtahanda iştirak üçün müraciət etmiş abituriyentlər;

1.2. ilk dəfə ali təhsilin bakalavriat (tibb təhsili üzrə əsas təhsil) səviyyəsinə tələbə qəbulu ilə bağlı imtahanda iştirak üçün müraciət etmiş abituriyentlər.

0