Bank işçiləri, arxiv şəkli

Xarici vətəndaşların Azərbaycan banklarındakı əmanətləri niyə azalıb?

1395
(Yenilənib 12:36 03.04.2021)
Ekspert əcnəbilərin Azərbaycan banklarındakı əmanətlərinin azalmasının səbəblərindən danışıb: "Ölkəmizdə bir neçə ildən sonra xarici vətəndaşların əmanətləri yenidən arta bilər. Lakin bu il xarici vətəndaşların əmanətlərinin artmasını gözləmirəm".

Xalid Məmmədov, Sputnik Azərbaycan

BAKI, 3 aprel — Sputnik. Mərkəzi Bankın məlumatlarına görə, 2021-ci ilin martın 1-nə Azərbaycanda fiziki şəxs olan qeyri-rezidentlərin banklardakı əmanətlərinin həcmi 281,9 mln. manat təşkil edib. Bu da illik müqayisədə 2,2 dəfə azdır. Martın 1-nə Azərbaycanda fiziki şəxslərin banklardakı əmanətlərinin həcmi 8 milyard 379,9 mln. manat təşkil edib ki, bu da illik müqayisədə 3,6% azlıq təşkil edir. 

Bank və maliyyə məsələləri üzrə ekspert Əkrəm Həsənov əcnəbilərin Azərbaycan banklarındakı əmanətlərinin azalmasının səbəbləri ilə bağlı Sputnik Azərbaycan-a danışıb.

İqtisadçı bildirib ki, xarici vətəndaşların Azərbaycan banklarındakı əmanətlərinin həcmində azalma var: "Azalmanın ilk səbəbi pandemiyadır. Sərhədlər bağlıdır, nəinki xarici, hətta yerli vətəndaşlar da əksər ölkələrdəki banklardan pullarını çıxardır ki, vəsaiti gözünün qabağında olsun. Digər tərəfdən, insanların gəliri azaldığı üçün yığdıqları pullardan istifadə edirlər. Pandemiya vəziyyətində xarici vətəndaşlar başqa ölkədə pul saxlamağa çəkinirlər".

"Azalmanın ikinci səbəbi ötən il Azərbaycanda qəflətən 4 bankın bağlanması olub. Məsələn, 2019-cu ilin son aylarından insanlar "Atabank"dan pulunu çıxarda bilmirdilər və 6-7 ay, bəlkə də 1 ilə yaxın heç bir tədbir görülmədi. Sonra bank bağlandı və pullar insanlara geri qaytarıldı. Bu da bank sisteminin imicinə mənfi təsir etdi. Yəni hansı bank vaxtında əmanəti qaytarmırsa, dərhal bankı bağlamaq lazımdır. Dərhal bank bağlanmadı və bu da digər sağlam banklara çox mənfi təsir etdi. Belə ki, yerli və xüsusən xarici vətəndaşlar sağlam banklardan da pullarını çıxarmağa başladılar", - deyə o qeyd edib.

Ekspertin sözlərinə görə, digər səbəb budur ki, ötən il Azərbaycanda əmanətlərin sığortalanması sisteminin necə olacağı qeyri-müyyən idi: "Ötən il martın 4-də "Əmanətlərin tam sığortalanması haqqında" qanunun qüvvəsi bitib. Aprel ayında bu qanunun qüvvədə olma müddətini daha 9 ay (2020-ci ilin dekabrın 4-dək) uzatdılar. Qeyri-müəyyənlik onda oldu ki, bu qanunun qüvvədə olma müddəti vaxtında uzadılmadı və bu da təşviş yaratdı. Yalnız keçən ilin sonunda bəyan edildi ki, 2021-ci ilin aprelin 5-dək əmanətlərin tam sığortalanması olacaq.

Aprelin 5-də "Əmanətlərin tam sığortalanması haqqında" qanunun müddəti bitəndən sonra isə kompensasiyanın məbləği əvvəlki 30 min manatdan 100 min manatadək artırılır. Yəni bu istiqamətdə müəyyənlik ancaq ilin sonunda yarandı. Pul əminliyi və müəyyənliyi sevir. Bu cür məsələlərə vaxtında baxmaq lazımdır. Bu məsələlər xarici vətəndaşların banklardakı əmanətlərinin azalmasına gətirib çıxardı".

"Amma son bir ayda Azərbaycanda əmanətlər artmağa başlayıb. Çünki bu istiqamətdə əminlik hissi qayıdıb. Hamı indi bilir ki, banka 100 min manat qoyursa, bu vəsait qorunandır. Bu, çox vacib məsələdir. Yerli vətəndaşlar əminlik hissi olan kimi banka əmanət qoyurlar. Ölkəmizdə bir neçə ildən sonra xarici vətəndaşların əmanətləri yenidən arta bilər. Lakin bu il xarici vətəndaşların əmanətlərinin artmasını gözləmirəm", - deyə ekspert əlavə edib.     

Qeyd edək ki, aprelin 5-də "Əmanətlərin tam sığortalanması haqqında" qanun müddəti bitəndən sonra kompensasiyanın məbləği əvvəlki 30 min manatdan 100 min manatadək artırılır. Həmçinin 20 min manatdan çox olmamaq şərti ilə fiziki şəxslərin sahibkarlıq fəaliyyəti üçün olan bank hesabları da qorunan olacaq.

Xatırladaq ki, "Əmanətlərin tam sığortalanması haqqında" qanun qlobal iqtisadiyyatda baş verən böhran prosesləri fonunda ölkədə maliyyə sabitliyini qorumaq, bank sisteminin dayanıqlılığını təmin etmək və əmanətçilərin bank sisteminə etibarını artırmaq məqsədilə Azərbaycanda 2016-cı ilin martın 4-də qüvvəyə minmişdi.  

1395
Yeni bankotlar

Mərkəzi Bank terminalların yenilənmiş pulları niyə qəbul etmədiyinə aydınlıq gətirdi

13
(Yenilənib 14:27 12.04.2021)
Bank olmayan ödəniş xidməti təchizatçılarının ödəniş terminallarının yenilənmiş 1, 5 və 50 manatlıq pul nişanlarına adaptasiyasının sürətləndirilməsi ilə əlaqədar Mərkəzi Bankda görüş keçirilib

BAKI, 12 aprel — Sputnik. Son günlər ölkə mətbuatında bank olmayan ödəniş xidməti təchizatçılarının ödəniş terminalları tərəfindən yenilənmiş 1, 5 və 50 manatlıq pul nişanlarının qəbulunda müəyyən çətinliklərin yaranması ilə bağlı məlumatlar yayılıb.

Mərkəzi Bankdan Sputnik Azərbaycan-a bildirilib ki, ölkə ərazisində istismar olunan nağd pul sistemlərinin (bankomatlar, ödəniş terminalları, pul sayan və emal edən sistemlər və s.) yenilənmiş pul nişanlarına uyğunlaşdırılması (adaptasiyası) məqsədilə hələ 20 oktyabr 2020-ci il tarixində bütün kommersiya bankları və bank olmayan ödəniş xidməti təchizatçıları məlumatlandırılıb və müvafiq pul nişanları ilə təmin edilib.

Mərkəzi Bank tərəfindən aparılmış monitorinqlərdən məlum olur ki, kommersiya banklarının və bank olmayan ödəniş xidməti təchizatçılarının nağd pul sistemlərinin yenilənmiş pul nişanlarına uyğunlaşdırılması əsasən təmin edilib.

Bununla belə bir sıra bank olmayan ödəniş xidməti təchizatçılarının ödəniş terminallarının yenilənmiş 1, 5 və 50 manatlıq pul nişanlarına adaptasiyası ilə bağlı çətinliklərin araşdırılması, müvafiq problemlərin təxirəsalınmadan aradan qaldırılması və adaptasiya proseslərinin qısa müddətdə yekunlaşdırılması məqsədilə Mərkəzi Bankda bank olmayan ödəniş xidməti təchizatçılarının nümayəndələri ilə görüş keçirilib və bu təşkilatlara müvafiq tədbirlərin görülməsi ilə bağlı tövsiyə və tapşırıqlar verilib.

13

Bu işlərin görülməsi Azərbaycanda işsizliyi azaldacaq ekspert açıqlayır

21
(Yenilənib 18:38 11.04.2021)
İqtisadçı ekspert Fuad İbrahimov deyir ki, işğaldan azad edilmiş ərazilərdə qruculuq işlərinin aktiv şəkildə davam etdirilməsi çox sayda iş yerlərinin açılmasına səbəb olacaqdır
Fuad İbrahimov: “Vaksinasiyanın sürətlənməsi iqtisadi fəallığı artıracaq”

Beynəlxalq Valyuta Fondunun (BVF) yenilənmiş proqnozuna əsasən, bu il Azərbaycanda işsizlik səviyyəsi 5,8% təşkil edəcək. Gələn il isə bu göstəricinin cüzi azalaraq 5,7%-ə bərabər olacağı gözlənilir.

İqtisadçı ekspert Fuad İbrahimov Sputnik Azərbaycan-a deyir ki, pandemiyanın dünya iqtisadiyyatına ziyan vurması işsizlik ordusunun yaranmasına səbəb olub: “Dünya iqtisadiyyatında bu problemin aradan qaldırılması üçün böyük zaman lazımdır. Azərbaycan haqqında danışdıqda onu deyə bilərəm ki, vaksinasiya prosesinin getdikcə sürətlənməsini görürük. Bu da özlüyündə iqtisadi fəallığın artması ilə nəticələnəcək. Eyni zamanda mövsümi işlərlə bağlı sahələrin yenidən bərpa olunması da işsizlik statistikasının azalmasına təsir edəcək. Xüsusən də işğaldan azad edilmiş ərazilərdə quruculuq işlərinin aktiv şəkildə davam etdirilməsi çox sayda iş yerlərinin açılmasına səbəb olacaqdır”.

Fuad İbrahimovun geniş şərhinə audiofaylda qulaq asa bilərsiniz

21
Prezident İlham Əliyev, arxiv şəkli

"Ermənistan Azərbaycanla aqressiv davranmağa cəhd etmək durumunda deyil" - İlham Əliyev

0
"Bəli, mən prezidentəm və öz öhdəliklərimi yerinə yetirməliyəm. Lakin biz hamımız insanıq, hisslərimiz var. Biz onları gizlədə, onları idarə edə bilərik. Bəzən bu çox çətindir".

Eldar Tanrıverdiyev, Sputnik Azərbaycan

BAKI, 13 aprel — Sputnik. Təbii ki, azərbaycanlıların və ermənilərin gələcəkdə necə qarşılıqlı əlaqədə olacağını təxmin etmək çətindir. Düşünürəm ki, bu, böyük ölçüdə siyasətçilərin iradəsindən və siyasi müdrikliyindən asılı olacaq. Düşünürəm ki, burada, həm də Yerevanda körpülər qurmaq üçün daha aktiv olmalıyıq. Təbii ki, əgər bunu Ermənistan istəyirsə. Biz onların niyyətlərini bilmirik. Onlar bunu heç vaxt açıqlamayıblar. Sputnik Azərbaycan xəbər verir ki, bunu Azərbaycan Prezidenti İlham Əliyev bu gün ADA Universitetində keçirilən "Cənubi Qafqaza yeni baxış: Münaqişədən sonra inkişaf və əməkdaşlıq" adlı konfransda çıxışında deyib.

"Mən artıq bir neçə dəfə demişəm ki, biz müharibə səhifəsinin bağlandığını düşünürük. Mən artıq bir neçə dəfə demişəm ki, biz artıq Ermənistanla mümkün sülh razılaşması ilə bağlı da danışa bilərik. Bu bizim planlarımızdır. Lakin biz Ermənistan tərəfindən belə bir mesajlar görmürük.

Ermənistan Baş naziri susub. Ermənistan xarici işlər naziri isə aqressivdir. Ermənistan Azərbaycanla aqressiv davranmağa cəhd etmək durumunda deyil. Müharibə zamanı baş verənləri xatırlamalıdırlar. Erməni müxalifəti əslində isteriyadadır. Hazırda Azərbaycanafobiya və türkofobiya yeganə amilə çevrilib. Bu onlarda həmişə ən önəmli faktorlardan biri olub. Onların seçki kampaniyalarını Azərbaycanafobiya və türkofobiya, revanşizm hissi üzərində quracaqlarına əminəm.

Buna görə bu qarşılıqlı əlaqəni birtərəfli qura bilmərik. Mövqeyimiz aydındır. Biz buna hazırıq. Bu asan olmayacaq. Ağdama və digər işğaldan azad olunan ərazilərə qayıdacaq sabiq məcburi köçkünlər ermənilərin onların torpaqlarına, onların yaxınların məzarlarına, dini abidələrə nə etdiklərini görəcəklər. Onlar nə hiss edəcəklər? Mən bunu təxmin edə bilərəm. Bilirsiniz, mən müharibə zamanı təmas xəttini keçəndə və ya Ağdama binokl vasitəsi ilə baxanda və işğaldan azad olunan ərazilərə səfər edəndə eyni şeyi hiss etdim. Bəli, mən prezidentəm və öz öhdəliklərimi yerinə yetirməliyəm. Lakin biz hamımız insanıq, hisslərimiz var. Biz onları gizlədə, onları idarə edə bilərik. Lakin bəzən bu çox çətindir. Mən Azərbaycanlı qaçqınların hansı hissləri keçirəcəyini proqnozlaşdıra bilmərəm. Lakin gələcəyə baxan bir insan kimi, əgər Ermənistan tərəfi müsbət siqnallar verərsə, biz bu əlaqələri qurmaq üçün hər şeyi edəcəyik", -  Azərbaycan Prezidenti əlavə edib.

0