Türk lirəsi ucuzlaşdı, növbədə manatdır? – Ekspertlərin proqnozu
(Yenilənib 15:31 22.03.2021)
İqtisadçı Türkiyədə valyuta böhranını Rusiya da daxil olmaqla bütün inkişaf etməkdə olan bazarlara mənfi təsir edəcək hadisə adlandırıb.BAKI, 22 mart – Sputnik, Aleksandra Zuyeva. Türkiyə lirəsi bazar ertəsi dollara nisbətdə 17% ucuzlaşıb. Rusiyanın “Qazprombank”ının mütəxəssisləri hesab edirlər ki, Mərkəzi Bankın rəhbərliyinin dəyişməsindən və yüksək faiz stavkalarından imtina qardaş ölkədə yeni valyuta böhranına səbəb ola bilər. Əslində nə gözləməliyik və bunun Azərbaycan manatına təsiri olacaqmı? – Sputnik Azərbaycan məsələ ilə bağlı iqtisadçıların rəyini öyrənib.
“Alpari” informasiya-analitik mərkəzinin rəhbəri Aleksandr Razuvayev Türkiyədə valyuta böhranını Rusiya da daxil olmaqla bütün inkişaf etməkdə olan bazarlara mənfi təsir edəcək hadisə adlandırıb. Onun fikrincə, bu, risklərdən qorunmaq məqsədilə bazarlardan çəkilmələrə, valyuta və aksiyaların çökməsinə səbəb ola bilər. Xüsusilə, əgər ABŞ Türkiyəyə qarşı simvolik də olsa, sanksiya tətbiq edərsə.
İnkişaf etmiş bazarlar sırasında Türkiyənin zəif bənd olması haqda hələ ötən ilin sonundan yazırlar. İqtisadiyyatı turizmlə sıx bağlı olan ölkələrə COVID-19 pandemiyası güclü zərbə vurdu.
“Rusiya Prezidenti Vladimir Putin isə ölkəsinin vətəndaşlarına Türkiyəyə getməyə icazə verməklə onun iqtisadiyyatına dəstək verdi”, - söyləyən həmsöhbətimiz hesab edir ki, buna rəğmən vəziyyət əvvəlki kimi qalıb.
Razuvayev deyir ki, Türkiyə lirəsinin bugünkü çöküşünə səbəb Prezident Rəcəb Tayyib Ərdoğanın əsas stavkanı artırdıqdan iki gün sonra Mərkəzi Bankın rəhbərini işdən çıxarması olub.
“Cümə günü lirənin məzənnəsi 7.22 dollardan 8.3415 dollara qalxdı, az qala, ötən ilin noyabrındakı tarixi minimumu təkrarlayacaqdı”, - o qeyd edib.
Ərdoğan son iki il ərzində MB-nin artıq üçüncü rəhbərini işdən çıxarır. Sonuncu – Naci Ağbal bu vəzifədə cəmi beş ay işlədi. Əsas stavkanı illik 15%-dən 17%-ə qaldırdıqdan sonra isə işindən oldu.
Ekspert deyir ki, hazırda Türkiyədə milli bankın 5%-lik hədəfinə baxmayaraq, inflyasiya ikirəqəmli həddədir.
MB-nin yeni rəhbəri Şahap Kavcıoğlu Mərmərə Universitetinin professorudur. Razuvayev deyir ki, yeni sədr aşağı stavka tərəfdarı olduğundan sələfinin əməllərini aktiv tənqid edirdi.
“Lirəyə olan etimad MB-nin stavkaları müəyyən müddət yuxarı həddə saxlaması ümidilə qalırdı, amma Ağbal gedəndən sonra o da qırıldı”, - Razuvayev hesab edir.
Kavcıoğlu nəhəng Türkiyə banklarını stavkanı təcili surətdə endirməyəcəyinə əmin etsə də, bazarın etimadını doğrultmaq onun üçün çətin olacaq. Ekspert deyir ki, bütün ümidlər valyuta intervensiyasına qalıb.
Azərbaycan manatına gəlincə, Sputnik Azərbaycan-ın müsahibi deyir ki, çətin ki, onu devalvasiya gözləsin: Bakının ciddi maliyyə ehtiyatı var, üstəlik, neftin qiyməti də özünü pis aparmır.
Azərbaycanda da oxşar qənaətdədirlər. İqtisadçı Fuad Əlizadə əmindir ki, Türkiyə lirəsinin çökməsinin milli valyutamıza təsiri olmayacaq: “Manatın məzənnəsi dollara nisbətdə sabit qalacaq”.
Teqlər:
Bu işlərin görülməsi Azərbaycanda işsizliyi azaldacaq – ekspert açıqlayır
(Yenilənib 18:38 11.04.2021)
İqtisadçı ekspert Fuad İbrahimov deyir ki, işğaldan azad edilmiş ərazilərdə qruculuq işlərinin aktiv şəkildə davam etdirilməsi çox sayda iş yerlərinin açılmasına səbəb olacaqdırFuad İbrahimov: “Vaksinasiyanın sürətlənməsi iqtisadi fəallığı artıracaq”
Beynəlxalq Valyuta Fondunun (BVF) yenilənmiş proqnozuna əsasən, bu il Azərbaycanda işsizlik səviyyəsi 5,8% təşkil edəcək. Gələn il isə bu göstəricinin cüzi azalaraq 5,7%-ə bərabər olacağı gözlənilir.
İqtisadçı ekspert Fuad İbrahimov Sputnik Azərbaycan-a deyir ki, pandemiyanın dünya iqtisadiyyatına ziyan vurması işsizlik ordusunun yaranmasına səbəb olub: “Dünya iqtisadiyyatında bu problemin aradan qaldırılması üçün böyük zaman lazımdır. Azərbaycan haqqında danışdıqda onu deyə bilərəm ki, vaksinasiya prosesinin getdikcə sürətlənməsini görürük. Bu da özlüyündə iqtisadi fəallığın artması ilə nəticələnəcək. Eyni zamanda mövsümi işlərlə bağlı sahələrin yenidən bərpa olunması da işsizlik statistikasının azalmasına təsir edəcək. Xüsusən də işğaldan azad edilmiş ərazilərdə quruculuq işlərinin aktiv şəkildə davam etdirilməsi çox sayda iş yerlərinin açılmasına səbəb olacaqdır”.
Fuad İbrahimovun geniş şərhinə audiofaylda qulaq asa bilərsiniz
Dövlət əmlakı hərraca çıxarılır: Nazirlik vaxt təyin elədi
(Yenilənib 16:28 10.04.2021)
Hərrac günü prosesə marağı olanlar həm Əmlak Xidmətləri Məkanına gəlməklə, həm də Əmlak Məsələləri Dövlət Xidmətinin Elektron Xidmətlər Portalından (e-emlak.gov.az) “Elektron hərrac” bölməsini seçərək hərracları qeydiyyatsız formada izləyə bilərlər.BAKI, 10 aprel - Sputnik. İqtisadiyyat Nazirliyi yanında Əmlak Məsələləri Dövlət Xidməti tərəfindən növbəti hərrac 4 may tarixində təşkil ediləcək.
Nazirlikdən Sputnik Azərbaycan-a verilən məlumata görə, hərraca 62 dövlət əmlakı çıxarılacaq. Bunlardan 40-ı səhmdar cəmiyyəti, 22-si kiçik dövlət müəssisəsi və istifadəsiz qeyri-yaşayış binasıdır. Özəlləşdirməyə çıxarılan dövlət əmlakının tam siyahısı ilə burada tanış ola bilərsiniz: (https://bit.ly/3fIBdz1, https://bit.ly/31Kztgj, https://bit.ly/3unbPmn)
Özəlləşdirmə hərraclarında iştirak etmək istəyən şəxslər Xidmətin rəsmi saytına (emlak.gov.az) və ya Özəlləşdirmə portalına (privatization.az) daxil ola, seçim etməklə qeydiyyatdan keçə, dövlət əmlakının ilkin hərrac qiymətinin 10%-i məbləğində behi ödəyib sifarişçi statusu ala bilərlər. Sifarişçilərin hərraclara onlayn qoşulmaq imkanı da var.
Hərrac günü prosesə marağı olanlar həm Əmlak Xidmətləri Məkanına gəlməklə, həm də Əmlak Məsələləri Dövlət Xidmətinin Elektron Xidmətlər Portalından (e-emlak.gov.az) “Elektron hərrac” bölməsini seçərək hərracları qeydiyyatsız formada izləyə bilərlər.
Teqlər:
Neft yenə ucuzlaşdı
BAKI, 12 aprel — Sputnik. Dünya birjalarında neft qiymətləri ucuzlaşıb.
Sputnik Azərbaycan xəbər verir ki, Londonun "ICE" birjasında "Brent" markalı neftin bir barelinin qiyməti 0,37 dollar geriləyərək 62,58 dollar, Nyu-Yorkun "NYMEX" birjasında "Light" markalı neftin bir barelinin qiyməti isə 0,34 dollar ucuzlaşaraq 58,98 dollar olub.
Qeyd edək ki, ötən həftə "Azeri Light" markalı neftin 1 barelinin orta qiyməti 62,49 dollar olub. Bu da ondan əvvəlki həftənin orta qiyməti ilə müqayisədə 1,15 dollar və ya 1,8% azdır.