Yanacaqdoldurma məntəqəsi, arxiv şəkli

Yanacağın qiymətinin artması ekoloji təmiz avtomobillərdən istifadəni artırmayacaq

71
(Yenilənib 21:36 05.01.2021)
Hibrid və elektrik mühərrikli avtomobillərə gəldikdə isə, ekspert bildirib ki, bir neçə ildir ki, bu mövzu aktual olsa da, hələ də irəliləyiş yoxdur.

İradə Cəlilova, Sputnik Azərbaycan

BAKI, 5 yanvar — Sputnik. Ötən gün ənənəvi olaraq gecə saatlarında Tarif Şurası bir neçə arqument gətirərək, yanacağın qiymətini artırıb.

Göstərilən arqumentlərdən biri də ekoloji təmiz avtomobillərin istifadəsinin stimullaşdırılmasıdır.

Yüksək gömrük rüsumları, aksiz vergisi, mühərrik gücünə görə tətbiq edilən vergi və s. fonunda ekoloji təmiz avtomobillərin istismarının stimullaşdırılması mümkündürmü?

Sputnik Azərbaycan bu məsələni araşdırıb.

Nəqliyyat məsələləri üzrə ekspert Eldəniz Cəfər Sputnik Azərbaycan-a açıqlamasında bildirib ki, ölkədə ekoloji təmiz avtomobillərin tətbiq edilməsini stimullaşdırmaq üçün yüksək olan gömrük rüsumlarını və mühərrik həcminə görə tətbiq edilən aksiz vergisini azaltmaq lazımdır. Bununla yanaşı, ekoloji təmiz avtomobillərə verilən avtokreditlərin sadələşdirilməsi də nəzərə alınmalıdır.

Ekspert yanacağın qiymətinin artırılmasının ekoloji təmiz avtomobillərdən istifadəni artıracağını hesab etmir. Onun fikrincə, ekoloji təmiz avtomobillərin gətirilməsi və istifadəsini stimullaşdırmaq üçün konkret addımlar atılmalıdır.

"Elektromobillərin gömrük rüsumu 2019-cu ildə azaldılaraq 15 faiz etdi. Ancaq düşünürəm ki, bu rəqəm 5-6 faiz olmalıdır. Əgər siz elektromobili öz istifadəniz üçün gətirirsinizsə, bu zaman 15 faiz ödəyirsiniz. Ancaq sahibkarlar elektromobilləri satmaq üçün gətirirsə, bu zaman məbləğə ƏDV əlavə edilir. Bu da kifayət qədər böyük rəqəmdir", - deyə ekspert bildirib.

Onun sözlərinə görə, Azərbaycanda ekoloji təmiz avtomobillərin istismarının stimullaşdırlması ilə bağlı dövlət proqramı qəbul edilsə belə, proqramın mühüm müddəaları yerinə yetirilmir. Cavabdeh qurumlar bununla bağlı heç bir addım atmır: "Yalnız Ekologiya Nazirliyi ekoloji təmiz avtomobillərin istismarının stimullaşdırılması istiqamətində bir neçə tədbir keçirib. Ancaq proqramda nəzərdə tutulmuş dövlət qurumları bu məsələyə qarışmadı və məsələ yarımçıq olaraq qalır.

Ötən ilin yanvar-may aylarında ölkəyə 1852 elektriklə işləyən nəqliyyat vasitəsi gətirilib.

Dövlət Gömrük Komitəsinin məlumatına görə, bu nəqliyyat vasitələrindən 1771-i daxili yanma mühərriki ilə yanaşı, elektrik mühərriki ilə də hərəkətə gətirilən, 81-i isə yalnız elektrik mühərriki ilə işləyən nəqliyyat vasitəsidir.

İqtisadçı Günay Hüseynova Sputnik Azərbaycan-a açıqlamasında bildirib ki, yeni qiymətlərə əsasən Aİ-92 benzini 1 manat, dizel yanacağının qiyməti 0,80 AZN olub. Belə ki, yeni tarifə əsasən Aİ-92 markalı neftin qiyməti 11,1%, dizel yanacağında 33,3% artım müşahidə edilib: "Yanacağın qiyməti ilə yanaşı Tarif Şurasının qərarına əsasən digər sahələrdə: dərman preparatları, Əmlakın Dövlət Reyesterinə Daxil edilməsi və Əmlak məsələləri ilə bağlı digər xidmətlər üzrə tarif dərəcələri yüksəldilib".

İqtisadçının sözlərinə görə, yanacağın qiymətinin artması birbaşa nəqliyat daşımalarının qiymət artımına səbəb olacaq.

"İqtisadiyyatda bütün sahələr bir-biri ilə əlaqədardır. İqtisadiyyatın hər hansı bir sahəsində baş verən dəyişiklik birbaşa və dolayı yolla onun bütün sahələrinə təsir edir. Bu da onu deməyə əsas verir ki, yanacağın qiymətinin artması bütün sahələrdə qiymət artımına gətirib çıxaracaq", - deyən G.Hüseynovanın sözlərinə görə, Azərbaycanda 1 milyon 881,3 min dizel yanacağı, 1 milyon 66,33 min benzin istehsal olunub. İstehsal olunmuş dizel yanacağının 1/4 hissəsi kənd təsərrüfatında istehlak olunub.

İqtisadçı bildirir ki, Tarif Şurası qiymət artımı ilə bağlı bir neçə arqumenti əsaslandırıb. Belə ki, ilkin səbəb kimi avtomobil idxalının artması göstərilir.

Ancaq ekspert Tarif Şurasının ilkin səbəbini əsassız hesab edir: "Yanacağın qiymətinin artması bütün sahələrdə qiymət artımı deməkdir. Əgər avtomobillərin idxalına görə idisə, o zaman birbaşa həmin sahəyə müdaxilə olunmalı idi. Yəni Dövlət Gömrük Komitəsi tərəfindən avtomobillərin idxal gömrük rüsumu artırıla bilərdi və ya ölkəmizdə istehsal olunan avtomobillərə kredit, güzəşt və s. tətbiq edilə bilərdi. Həmçinın bu yerli istehsalın artımına da şərait yaradardı".

Hibrid və elektrik mühərrikli avtomobillərə gəldikdə isə, ekspert bildirib ki, bir neçə ildir ki, bu mövzu aktual olsa da, hələ də irəliləyiş yoxdur:

"Ölkə elektrik mühərrikli avtomobillə tam təchiz olunduğu halda yanacağın qiymətinin yüksəlməsi normal olardı. Bu zaman yanacağın qiymətinin 50% yüksəlməsi belə, problem olmazdı".

Qeyd edək ki, Gürcüstandan Azərbaycana ikinci əl, mühərrik gücü 2000-ə qədər olan, dəyəri 10 min dollar olan avtomobil gətirmək üçün 594 manat aksiz vergisi, 4039,2 manat mühərrikin işçi həcminə görə gömrük rüsumu, 120 manat əməliyyat haqqı, 30 manat vəsiqə haqqı, 3920.98 manat ƏDV, 30 manat elektron gömrük xidmətinin göstərilməsinə görə, 5,4 manat elektron gömrük xidmətinin göstərilməsinə görə ƏDV olmaqla cəmi 8739.58 AZN ödənilir. Yəni dəyəri 17 min manat olan avtomobil azərbaycanlı sahibinə 25739 manata başa gəlir.

71
Mövzu:
Tarif Şurasının sürprizləri (6)
Bankada dollarlar, arxiv şəkli

Financial Times: "Dolları taxtdan salacaqlar"

12
(Yenilənib 22:13 16.01.2021)
"Trampın hakimiyyət illəri bizim zəif yerlərimizi üzə çıxardı və hətta o gedəndən sonra da biz bu zəiflikləri aradan qaldırmalıyıq" - Avrokomissiyadakı mənbə

BAKI, 16 yanvar - Sputnik. Avropa Şurası dünya bazarında "dolların ağalığının" həddi aşdığını bəyan edəcək. 

Sputnik Azərbaycan bildirir ki, bu barədə Financial Times Avropa Komissiyasındakı mənbələrinə istinadən yazıb. 

Qəzetin məlumatına görə, AŞ bu məsələni ABŞ-ın yeni prezidenti Co Baydenin yanvarın 20-də planlaşdırılan inauqurasiyasından əvvəl qaldırmaq istəyir. Avropa Komissiyasının layihəsinin yanvarın 19-da qəbul ediləcəyi gözlənilir, həmçinin ona əlavələrin ediləcəyi də istisna olunmur. 

FT əlavə edir ki, layihədə ABŞ Prezidenti Donald Trampın İrana qarşı tətbiq etdiyi məhdudlaşdırma tədbirlərindən sonra Avropa ölkələrinin müəyyən çətinlik çəkdiyi qeyd olunur. Sənəddə bazarların "qeyri-qanuni eksterritorial tətbiqin nəticələrindən" qorunmasının vacibliyi vurğulanır. 

"Trampın hakimiyyət illəri bizim zəif yerlərimizi üzə çıxardı və hətta o gedəndən sonra da biz bu zəiflikləri aradan qaldırmalıyıq. Söhbət AŞ-nın dünyadakı yerindən, ölçülərimizə müvafiq olan iqtisadi və maliyyə dövlətinin imkanlarından gedir", - mənbələrdən biri deyib.

12
Teqlər:
"The Financial Times", Avropa Komissiyası, Avropa Şurası, dollar
Manat, arxiv şəkli

Yardım dayandırılmayıb - Şahmar Mövsümov

12
(Yenilənib 20:07 16.01.2021)
"Bunun üçün vəsaitlər ayrılıb, proses gedir. Məsələ ilə İqtisadiyyat Nazirliyi məşğul olur" - Prezidentin köməkçisi

BAKI, 16 yanvar — Sputnik. Sahibkarlara dəymiş ziyanın ödənilməsi ilə bağlı tədbirlər planı üzrə proseslər davamlı olaraq həyata keçirilir. Sputnik Azərbaycan-ın məlumatına görə, bunu jurnalistlərə açıqlamasında Prezidentin köməkçisi, Prezident Administrasiyasının İqtisadi Məsələlər və innovativ inkişaf siyasəti şöbəsinin müdiri Şahmar Mövsümov bildirib.

Ş.Mövsümov deyib ki, müxtəlif sahələr və istiqamətlərdə sahibkarlara yardım nəzərdə tutulub:

"Bunun üçün vəsaitlər ayrılıb, proses gedir. Məsələ ilə İqtisadiyyat Nazirliyi məşğul olur. Ümumilikdə zərərçəkmiş sahələrdə çalışanlara yardım heç vaxt dayandırılmayıb".

12
Rəssamın rəngləri və fırçaları, arxiv şəkli

Adi karandaşla canlı kimi görünən qəhrəmanlarımız: bunlar 14 yaşlı uşağın əl işidir - FOTO

17
(Yenilənib 23:32 16.01.2021)
Yardımlıdan olan yeniyetmə Vətən müharibəsi şəhidlərinin portretlərini sadə karandaşla yaradır. O inanır ki, gələcəkdə məşhur fırça ustası olacaq

BAKI, 16 yanvar - Sputnik, Kəmalə Əliyeva. Akademik təhsilinin olmamasına rəğmən, on dörd yaşlı Səməd İskəndərli karandaşla unikal əsərlər yaradır. O, daha çox Qarabağ müharibəsinin qəhrəmanlarının portretlərini çəkir. Sputnik Azərbaycan bildirir ki, gənc rəssam üçün hazırda ən böyük çətinlik işləmək üçün şəraitin olmaması və rassam ləvazimatlarının yoxluğudur. 

Посмотреть эту публикацию в Instagram

Публикация от İskəndərli Səməd 🇦🇿 (@drawing.smd)

Səməd Yardımlı rayonunun Sırıq kəndində yaşayır. O, rəsmlə uşaqlıqdan maraqlanır. Maliyyə problemlərinə görə ailəsi ona inkişaf etməkdə yardım edə bilmir. Müəllimlə çalışmaq imkanı olmayan Səməd internetdə müxtəlif videoçarxlara baxaraq öyrənir. 

Посмотреть эту публикацию в Instagram

Публикация от İskəndərli Səməd 🇦🇿 (@drawing.smd)

"Təəssüf ki, valideynlərim mənə rəssamlıq üçün lazım olanları ala bilmirlər, çünki bu ləvazimatlar çox bahadır. Əvvəl ancaq sadə karandaşla çəkməyə başladım. Sonra mənim xaricdə yaşayan dostum tanışları vasitəsilə mənə rəngli karandaşlar göndərdi, indi də onlardan istifadə edirəm. Onun sayəsində öz üzərimdə daha çox işləmək arzusu yarandı", - Səməd deyir.

© Photo : Courtesy of Samed Iskenderli
Səməd İskəndərli

Gənc istedad qohumlarını, tanışlarını, müxtəlif filmlərin qəhrəmanlarını çəkir. Son işləri isə Vətən müharibəsinin qəhrəmanlarına həsr olunub. Onun sözlərinə görə, hər dəfə şəhidlərin portretlərini yaradanda böyük məsuliyyət hiss edir və çalışır ki, hər yeni işi öncəkindən daha yaxşı alınsın. 

Səməd əmindir ki, gələcəkdə məşhur rəssam olacaq və onun əsərlərini hər kəs tanıyacaq. 

17
Teqlər:
Yardımlı, yeniyetmə, rəssam, Qarabağ
Mövzu:
Sözlə deyə bilmədiklərimizin izharı - sənət