Azərbaycan manatı, arxiv şəkli

Karantinə görə yenidən işsiz qalanlar 190 manat üçün qeydiyyata düşə bilmirlər

196
(Yenilənib 18:02 24.12.2020)
"Apreldən bu tərəfə 190 manat birdəfəlik ödəmə üçün müraciət dayandırıldığından həmin şəxslərlə bağlı bir qərar verilməlidir".

Zülfiyyə Quluyeva, Sputnik Azərbaycan

BAKI, 24 dekabr — Sputnik. Nazirlər Kabinetinin qərarı ilə sərtləşdirilmiş xüsusi karantin rejimi dövründə bir sıra sahələrdə xidmət yenidən məhdudlaşdırılıb. Həmin sahələrdə çalışanlar hazırda faktiki işsiz olsalar da, onlar 190 manat birdəfəlik ödəmələri almaqdan məhrumdurlar. Çünki xüsusi karantin rejiminin sərtləşdirilməsi ilə əlaqədar 190 manat məbləğində birdəfəlik ödəmə cari ilin ötən dövründə bu ödəməni almış şəxslərə təsdiq edilmiş qaydalara uyğun olaraq təkrar yoxlama keçirildikdən sonra ödənəcək.

Əmək və Əhalinin Sosial Müdafiəsi Nazirliyindən bildirilib ki, ödəməni almaq üçün həmin vətəndaşların təkrar müraciətinə ehtiyac yoxdur. Ödəmə birdəfəlik şəkildə həyata keçiriləcək və banklar tərəfindən verilmiş bank kartlarına köçürüləcək. Vəsait köçürüldükdən sonra bu barədə vətəndaşlara sms vasitəsilə rəsmi bildiriş göndəriləcək. Növbəti birdəfəlik ödəmə proqramının 600 minə yaxın şəxsi əhatə edəcəyi proqnozlaşdırılır.

Müharibə iştirakçıılarına və onların ailələrinə özünüməşğulluq proqramı çərçivəsində xidmət, arxiv şəkli
© AR Ministry of Labour and Social Protection of the Population

Bəs sərtləşdirilmiş xüsusi karantin rejimi dövründə xidməti dayandırılan sahələrdə çalışanlar 190 manat birdəfəlik ödəmə almaq üçün haraya müraciət etməlidirlər?

Sputnik Azərbaycan sosial platformalarda verilən bu suala aydınlıq gətirməyə çalışıb.

Elə həmsöhbətimiz Nəzakət Muradova da 190 manat birdəfəlik ödəmə almaq hüququndan məhrum olan vətəndaşlardan biridir. O bildirir ki, Nazirlər Kabinetinin son qərarı ilə kafe və restoranlarda yerində xidmət dayandırıldığından işi də dayanıb: "Mən Dərnəgüldə kafedə qabyuyan işləyirdim. Həmin kafe ancaq müştəri qəbul etməklə fəaliyyət göstərirdi. İndi kafe onlayn sifariş qəbul etsə də, mənim işimə ehtiyac yoxdur. Çünki aşpaz az sayda sifariş olduğundan həm yeməkləri hazırlayır, həm də bulaşıq qab az olduğundan özü yuyur. Mən isə nə işləyirəm, nə də 190 manat alıram. Deyirlər, 190 manat ancaq əvvəldən qeydiyyatdan keçənlərə verilir".

İqtisadçı Natiq Cəfərli Sputnik Azərbaycan-a bildirib ki, işsizliklə bağlı müavinətlərin verilməsinə əvvəlcədən say məhdudiyyətinin qoyulması absurddur: "Əvvəl 200 min insana, daha sonra isə 600 min insana 190 manat birdəfəlik ödəmənin veriləcəyi barədə qərar açıqlandı. Halbuki, mart-aprel ayından elan olunmalıydı ki, kimin 190 manat birdəfəlik ödəmə almaq üçün haqqı çatırsa, müraciət etsin. Ondan sonra da kimin bu ödəməni almağa hüququ yaranırdısa, ona da verilməli idi. Aprel ayının sonundan 190 manat birdəfəlik ödəmə üçün müraciət dayandırılıb. O vaxtdan 8 aya yaxın vaxt keçib. Ondan sonra sərt qapanma, sms-icazə olub. Amma apreldən sonra işsiz qalanlarla bağlı heç bir qərar yoxdur.

Burada çıxış yolu yenidən həmin şəxslərin işsizliklə bağlı rəsmi müraciət etməsi, işsiz kimi qeydiyyata düşməsidir. Bunun məhkəmə yolu ilə həlli yoxdur ki, vətəndaşlar məhkəməyə müraciət etsinlər. Düşünürəm ki, hökumətin bu yanaşması kökündən yanlışdır. Çünki illər boyu Azərbaycanda qara əmək bazarı olub. Müqavilələr rəsmiləşdirilməyib, vətəndaşların işsiz kimi qeydiyyata düşməsi çox çətin idi. O vaxt bunun üçün çox ağır qaydalar qoyulmuşdu. Ona görə də vətəndaşların çoxu işsiz olsalar da, işsiz kimi qeydiyyata düşə bilmirdilər. Bütün bunlar pandemiya dövründə nəzərə alınmalıdır".

N.Cəfərli deyir ki, hazırda Azərbaycanda 5,8 milyona yaxın əmək qabiliyyətli əhali var: "Bunun 1,6 milyonu rəsmi çalışanlardır. Hansı ki, onlar əmək müqaviləsi ilə, sosial sığorta ilə çalışırlar. 4,2 milyon vətəndaşdan isə kimin torpağı varsa, onlar aqrar sahədə çalışan kimi qeydiyyata götürülürlər. Bu gün 1 milyon 600 min vətəndaşımız aqrar sahədə çalışan kimi göstərilir. Yerdə qalanlardan 600-700 min insan VÖEN-lə çalışanlardır. 

Amma hər VÖEN-i olanı çalışan kimi təqdim etmək düzgün olmaz. Bu gün 1 milyon 800 minə yaxın vətəndaşın harada çalışdığı bilinmir. Onların hamısının işsiz olduğunu da demək olmaz. Çünki əksəriyyəti günəmuzd işləyirdi. Elə bu gün ən böyük problem də günəmuzd işləyənlərdir. Onların çoxu pandemiya dövründə işsizdir. Apreldən bu tərəfə 190 manat birdəfəlik ödəmə üçün müraciət dayandırıldığından, həmin şəxslərlə bağlı bir qərar verilməlidir".

N.Cəfərli 190 manat birdəfəlik ödəmənin, pandemiya davam edərsə, artırılmasının da vacibliyini vurğulayır. O deyir ki, yaşayış minimumunun gələn ildən 6 manat artırılması 190 manat birdəfəlik ödəmənin 200 manata çatdırılmasına inam yaradır.

Əmək və Əhalinin Sosial Müdafiəsi Nazirliyinin mətbuat katibi Fazil Talıbov Sputnik Azərbaycan-a bildirib ki, 190 manatın verilməsi ilə bağlı Nazirlər Kabinetinin qərarı var: "Dünən Nazirlər Kabineti "Azərbaycan Respublikasının ərazisində koronavirus (COVID-19) pandemiyası dövründə xüsusi karantin rejiminin tətbiq olunması ilə əlaqədar 190 manat məbləğində birdəfəlik ödəmənin verilməsi haqqında Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq,  qərar verib.

Həmin qərarda bildirilir ki, Azərbaycan Respublikası Nazirlər Kabinetinin 2020-ci il 7 aprel tarixli 127 nömrəli Qərarı ilə təsdiq edilmiş "Koronavirus (COVID-19) pandemiyası dövründə xüsusi karantin rejiminin tətbiq olunması ilə əlaqədar işsiz kimi qeydiyyatda olan şəxslərə birdəfəlik ödəmənin verilməsi şərtləri və qaydası"na əsasən, 190 manat məbləğində birdəfəlik ödəməni almış şəxslərə müvafiq qaydalara uyğun olaraq təkrar yoxlama keçirildikdən sonra 190 manat məbləğində ödəmənin verilməsi birdəfəlik şəkildə həyata keçirilsin. Əmək və Əhalinin Sosial Müdafiəsi Nazirliyinə və Azərbaycan Respublikasının Maliyyə Nazirliyinə isə bu Qərardan irəli gələn məsələləri həll etmək tapşırılıb. Biz həmin qərara uyğun üzərimizə düşən işi yerinə yetiririk".

Xatırladaq ki, bu ilin aprel-may aylarında işsiz və xüsusi karantin rejiminə görə gəlirini itirən qeyri-formal işləyən, aztəminatlı 600 min şəxsə sonralar sərtləşdirilmiş karantin rejimi tətbiq olunan rayonlar üzrə 3-cü, 4-cü və 5-ci dəfə birdəfəlik ödəmələr verilib. Ümumilikdə cari ildə 190 manat birdəfəlik ödəmələrin verilməsi üçün 350 milyon manatdan artıq vəsait sərf olunub.

Məlumat üçün bildirək ki, 2020-ci il 14 dekabr saat 00:00-dan 2021-ci il 18 yanvar saat 00:00-dək ölkənin bütün ərazisində NK-nın Qərarında müəyyən edilmiş iş və xidmət sahələri istisna olmaqla digər iş və xidmət sahələrinin fəaliyyəti dayandırılıb.

196
Teqlər:
Natiq Cəfərli, Fazil Talıbov, ƏƏSMN, 190 manat, ödəmə, işsizlik, işsizlər, Karantin rejimi, Azərbaycan
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar (433)
Pul qabı, arxiv şəkli

Beş yüz manatlıq əsginasın sirri çözüldü

23
(Yenilənib 18:36 22.01.2021)
Milli pul nişanlarının dizaynının hazırlanması və tədavülə buraxılması yalnız Azərbaycan Respublikasının Mərkəzi Bankı tərəfindən həyata keçirilir

BAKI, 22 yanvar — Sputnik. Sosial şəbəkələrdə üzərində Xarı Bülbül, Şuşa qalası, at və s. əks olunan 500 manatlıq "kağız pul nişanı"nın təsvirləri yayılıb.

Mərkəzi Bankdan Sputnik Azərbaycan-a məlumat verilib ki, Azərbaycan Respublikasının Konstitusiyasının və "Mərkəzi Bank Haqqında" Qanunun tələblərinə uyğun olaraq milli pul nişanlarının dizaynının hazırlanması və tədavülə buraxılması yalnız Azərbaycan Respublikasının Mərkəzi Bankı tərəfindən həyata keçirilir.

Bildiririk ki, Azərbaycan Respublikasının Mərkəzi Bankı tərəfindən 500 manatlıq pul nişanı tədavülə buraxılmamış və sosial şəbəkələrdə yayılan məlumatlar həqiqətə uyğun deyil.

Vətəndaşlarımızı bu məsələlərdə ehtiyatlı olmağa və milli pul nişanlarımıza dair məlumatları Azərbaycan Respublikasının Mərkəzi Bankından və onun rəsmi internet səhifəsindən əldə etməyə çağırırıq.

23
Pomidor məhsulunun yüklənməsi

Xaric qadağa qoyur, sahibkarlar isə dövlət qurumundan narazılıq edirlər

60
(Yenilənib 16:09 22.01.2021)
Sahibkarlar uzun illərdir istixanada məhsul becərsələr də, builki kimi çətinliklə üzləşmədiklərini deyirlər.

İlham Mustafayev, Sputnik Azərbaycan

BAKI, 22 yanvar — Sputnik. Ötən ilin sonlarında Rusiya ölkəmizdən pomidor idxalına qadağa qoydu. Hazırda qadağanın bir hissəsi götürülsə də, məhsulun ixracı ilə məşğul olan sahibkarlar maliyyə itkisi ilə üzləşdilər. Bu günlərdə isə Qazaxıstan Azərbaycandan pomidor idxalını dayandırdığını bildirdi. Sputnik Azərbaycan-ın bölgə müxbiri pomidorun əsas istehsalçısı sayılan qərb bölgəsinin sahibkarları ilə görüşərək qadağaların onlara təsiri barədə söhbətləşib.

Söhbət zamanı məlum olub ki, nəinki Qazaxıstanın qadağası, Rusiya Azərbaycan pomidoruna yaşıl işıq yandırandan sonra belə, Şəmkirdən Rusiyaya tərəvəz vurulmayıb. Bu haqda danışan Tovuz rayon Düz Qırıqlı kəndindən olan sahibkar Rasim Hümbətov dekabrın 5-də yola saldıqları məhsulun geri qaytarılmasından sonra Rusiya bazarlarına tərəvəz aparılmadığını söyləyib.

© Sputnik / Ilham Mustafa
Şəmkirdə yeşikdə pomidor məhsulu

“10 ildir istixanada məhsul becəririk, builki qədər ziyanımız olmamışdı. Dekabrın 5-dən bu günə xaricə malımız çıxmayıb. Məhsulumuzda da heç bir xəstəlik, problem yoxdur. 60 ton mal üstümüzə qaytarıldı. Yerli bazarlarda da tələbat olmadığından xarab oldu”, - deyə məlumat verib.

Sahibkarlar məhsullarında heç bir xəstəliyin olmadığını bildiriblər. Ədalət Zeynalovun sözlərinə görə, Tuta qurdu deyilən xəstəlik qış mövsümündə Şəmkir istixanalarının heç birində olmur. İndiyədək yerli bazarlara verilən mallarda da bu qurda rast gəlinməyib. Lakin yerli bazarlarda qiymətin maya dəyərindən 2-3 dəfə ucuz olması onları müflisləşməklə üz-üzə qoyub:

“Rusiya qadağanı götürdü ki, xəstəlik olmayan pomidor getsin. Buna görə AQTA (Azərbaycan Respublikasının Qida Təhlükəsizliyi Agentliyi) istixanalarda monitorinq aparıb rəy verməlidir ki, malımız bazara çıxsın. Yanvarın 6-dan AQTA tərəfindən istixanada baxış keçirilərək nümunələr götürülüb. Lakin aradan yarım aydan çox vaxt keçməsinə baxmayaraq heç bir cavab verilməyib. Proses ləng getdiyindən məhsul yetişib xarab olur”.

Fermerlərin sözlərinə görə, yetişmiş məhsul 10 gün ərzində xarab olur. Bu səbəbdən pomidorlar soyuduculara vurularaq saxlanılır ki, bunun özü də əlavə xərc tələb edir. Onlar bildirirlər ki, hər kiloqram üçün pomidorun maya dəyəri 1 manat civarında hesablanır. Yerli bazarlara isə pomidorun cüzi bir hissəsi çıxarılaraq 20-30 qəpiyə satılır.

  • Şəmkirdə yeşiklərdə pomidorlar
    © Sputnik / Ilham Mustafa
  • Sahibkar Ədalət Zeynalov
    © Sputnik / Ilham Mustafa
  • Sahibkar Rasim Hümbətov
    © Sputnik / Ilham Mustafa
  • Sahibkar Sadəddin Rzayev
    © Sputnik / Ilham Mustafa
  • Şəmkirdə sahibkarlar dövlət qurumundan narazılıq edir
    © Sputnik / Ilham Mustafa
  • Şəmkirdə pomidor əkin sahəsində şitil
    © Sputnik / Ilham Mustafa
  • Şəmkirdə pomidor əkin sahəsi
    © Sputnik / Ilham Mustafa
1 / 7
© Sputnik / Ilham Mustafa
Şəmkirdə yeşiklərdə pomidorlar

12 ildir təsərrüfatla məşğul olan Səlahəddin Rzayev isə bir başqa məqama toxunub. Onun fikrincə, Qida Təhlükəsizliyi Agentliyi yalnız iri sahibkarların məhsularına rəy verərək ayrı-seçkiliyə yol verir. Fermer 3 hektardan aşağı torpaq sahəsi olan sahibkarlara agentliyin sertifikat vermək istəmədiyini söyləyib: “Təəssüf ki, tovuzlu və şəmkirli fermerlərin heç birinə icazə verilmir. Yalnız Samux və Abşeron yarımadasında olan böyük istixanalar icazə ala bilirlər. Belə başa düşürük ki, onlar daha böyük sahibkarlardır. AQTA bəyan edir ki, 3 hektardan aşağı torpaq sahəsi olan təsərrüfat sahibləri xaricə mal ixrac edə bilməzlər. Bu hansı məntiqə uyğundur - biz dərk edə bilmirik”.

Şəmkirli sahibkarlar üzləşdikləri problemlərlə əlaqədar aidiyyəti qurumlardan kömək istəyirlər.

60
Teqlər:
Şəmkir, Tovuz, sahibkar, qadağa, ixrac, pomidor

Yanvarın 25-nə qədər ölkədə ictimai nəqliyyat işləməyəcək

0
(Yenilənib 00:11 23.01.2021)
Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

BAKI, 23 yanvar - Sputnik. Bu gündən yanvarın 25-i saat 06:00-dək bütün ölkə ərazisində ictimai nəqliyyatın fəaliyyəti dayandırılıb.

Sputnik Azərbaycan-ın məlumatına görə, Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

Bununla əlaqədar 23 yanvar saat 00:00-dan 25 yanvar saat 06:00-dək ölkə ərazisində ictimai nəqliyyat fəaliyyət göstərməyəcək.

Qeyd edək ki, Bakı metropolitenində də sərnişindaşıma dayandırılıb.

0