Valyutadəyişmə məntəqəsinin əməkdaşı Türkiyə lirələrini sayır, arxiv şəkli

Azərbaycanda türk malları ucuzlaşacaq - Lirə düşür

274
(Yenilənib 17:43 07.11.2020)
"Çox güman ki, lirənin ucuzlaşmasının sürətləndiyi bir dövrdə və bu ilin sonunadək Türkiyədən Azərbaycana gətirilən məhsulların həm çeşidində, həm də həcmində ciddi artım müşahidə olunacaq. Azərbaycan bazarında türk məhsullarının qiymətində də ucuzlaşma olmalıdır"

Xalid Məmmədov, Sputnik Azərbaycan

BAKI, 7 noyabr — Sputnik. "Türkiyədə lirənin ucuzlaşmasının siyasi və iqtisadi səbəbləri var. Son zamanlar Türkiyənin Avropa İttifaqı ilə münasibətlərində gərginliyin olması, Aralıq Dənizində baş verən proseslər, Yunanıstan ilə problemlərin artması və digər siyasi faktorlar lirəyə təzyiq göstərir".

Bunu iqtisadçı, "Respublikaçı Alternativ" Partiyasının icra katibi Natiq Cəfərli Sputnik Azərbaycan-a lirənin ucuzlaşmasından danışarkən deyib.

Ekspert bildirib ki, Türkiyə iqtisadiyyatı kifayət qədər liberal iqtisadiyyatdır: "Bu cür hadisələr baş verəndə əsasən də xarici sərmayəçilər öz vəsaitini ya valyutada saxlayır, ya da ölkədən çıxarmağa çalışırlar. Bundan başqa, Mərkəzi Bankdan faizi artıracağı ilə bağlı gözləntilər var idi, yəni bu addım lirənin ucuzlaşmasının qarşısını alan faktora çevriləcəkdi. Lakin Mərkəzi Bank bu addımı atmadı. Çünki pandemiyadan sonra müxtəlif istiqamətlərdən 500 milyard lirə Türkiyə iqtisadiyyatına dəstək kimi verildi. Bu da kreditləri ucuzlaşdırdı. 3 ay bundan öncə mənzil kreditləri çox ucuzlaşdı və nəticədə mənzil satışları 10 dəfəyə yaxın artdı. Bu da lirənin dövriyyəsini artırdı, yəni lirə daha çox çap edildi və bazara daxil oldu. Bu addım həm dolların alışına yönəldi, həm də inflyasiyanın yüksəlməsinə səbəb oldu".

"İlin əvvəlindən bəri lirə dollar qarşısında 30 faiz ucuzlaşıb. Kifayət qədər ciddi dəyərdən düşmə baş verib. Bundan öncə isə 2018-ci ildə lirə dollar qarşısında 20 faizdən çox dəyərdən düşmüşdü. İndi isə 30 faizdir. Çox təəssüf ki, pandemiyaya görə Türkiyə iqtisadiyyatının yenidən qapanması gündəmə gəlib, bəzi məhdudlaşdırıcı tədbirlər (xidmət sahəsinin saat 22-yə kimi işləməsi və s.) də görülüb. Bu da lirəyə mənfi təsir göstərən prosesdir. Hələ ki, lirənin davamlı olaraq ucuzlaşmasının şahidi olacağıq", - deyə o qeyd edib.

N.Cəfərlinin sözlərinə görə, Türkiyədə bəzi sektorlar, əsasən ixracatyönümlü sektorlar lirənin ucuzlaşmasından qazanırlar:

"Məsələn, lirə ucuzlaşan zaman maşınqayırma, avtomobil sənayesi, kənd təsərrüfatı sahələri ixracdan qazanc əldə edir. Amma problem ondan ibarətdir ki, Türkiyə də idxaldan çox asılı ölkədir. Enerji daşıyıcılarının 98 faizi və s. ölkəyə idxal olunur. Bunlar valyuta ilə alınır. Lirənin dəyərdən düşməsi daxili inflyasiyanı da sürətləndirir və ilin sonunadək Türkiyədə ikirəqəmli inflyasiyanın olacağı gözlənilir".

Lirənin ucuzlaşmasının Azərbaycana təsirlərinə gəlincə ekspert deyib ki, lirə ucuzlaşdıqca Türkiyədən Azərbaycana idxal daha sərfəli hala gələcək: "Çox güman ki, lirənin ucuzlaşmasının sürətləndiyi bir dövrdə və bu ilin sonunadək Türkiyədən Azərbaycana gətirilən məhsulların həm çeşidində, həm də həcmində ciddi artım müşahidə olunacaq. Azərbaycan bazarında türk məhsullarının qiymətində də ucuzlaşma olmalıdır. Çünki manat dollar qarşısında sabitdir. Bu da Türkiyədən gətirilən məhsulların daha cəlbedici hala gəlməsinə səbəb olur. Manatın sabit olması ixraca mane olan əsas amillərdən biridir".

274
Teqlər:
Azərbaycan, dollar, avro, türk lirəsi, ucuzlaşma, qeyri-ərzaq malları, istehlak malları, ərzaq malları, Türkiyə
Neft konteynerləri, arxiv şəkli

Azərbaycan neftinin qiyməti qalxdı

18
(Yenilənib 14:00 25.11.2020)
Azərbaycan neftinin 1 barelinin qiyməti 1,79 ABŞ dolları və ya 3,87% artaraq 48,07 dollar təşkil edib.

BAKI, 25 noyabr - Sputnik. Dünya bazarında "Azeri Light" (CIF) markalı neftin qiyməti artıb.

Sputnik Azərbaycan-ın məlumatına görə, Azərbaycan neftinin 1 barelinin qiyməti 1,79 ABŞ dolları və ya 3,87% artaraq 48,07 dollar təşkil edib.

Qeyd edək ki, Azərbaycan neftinin bir barelinin qiyməti bu il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

18
Teqlər:
barel, neft
Kuryer, arxiv şəkli

Bunu heç kim etməzdi, amma siz etdiniz... - Bakıda yeni qadağaya etiraz

109
(Yenilənib 22:03 24.11.2020)
Həftəsonu ictimai iaşə sektoruna çatdırma və “takeaway” xidmətlərinin göstərilməsinə icazə verilmir, niyəsi də sual doğurur

BAKI, 24 noyabr — Sputnik. Bu gün Hotellər və Restoranlar Assosiasiyası ictimai iaşə sektorundan daxil olan çox saylı müraciətəri nəzərə alaraq Azərbaycan Respublikasının Nazirlər Kabinetinə müraciət ünvanlayıb. Sputik Azərbaycan-ın məlumatına görə, müraciətdə deyilir:

“Azərbaycan Respublikasının ərazisində xüsusi karantin rejiminin müddətinin uzadılması ilə bağlı əlavə tədbirlər barədə” Azərbaycan Respublikası Nazirlər Kabinetinin 19 Noyabr, 2020-ci il tarixli, 450 saylı Qərarında göstərildiyi kimi, “Xüsusi karantin rejimi ilə bağlı əlavə tədbirlər barədə” Azərbaycan Respublikası Nazirlər Kabinetinin 2020-ci il 12 sentyabr tarixli 336 nömrəli Qərarında bir sıra dəyişikliklər edilib.

Dəyişikliklərdən biri, Qərarın 2.4. bəndində qeyd edilmiş “2020-ci il 21 noyabr saat 00:00-dan 23 noyabr saat 06:00-dək, 28 noyabr saat 00:00-dan 30 noyabr saat 06:00-dək, 5 dekabr saat 00:00-dan 7 dekabr saat 06:00-dək, 12 dekabr saat 00:00-dan 14 dekabr saat 06:00-dək, 19 dekabr saat 00:00-dan 21 dekabr saat 06:00-dək, 26 dekabr saat 00:00-dan 28 dekabr saat 06:00-dək bu Qərarın 1 nömrəli əlavəsində nəzərdə tutulan sahələr istisna olmaqla, digər sahələrdə və istiqamətlərdə fəaliyyətin dayandırılmasıdır”.

Həmin Qərarın “Fəaliyyətinə icazə verilən sahələr” adlanan 1 nömrəli Əlavəsinin 5-ci bəndində “fasiləsiz fəaliyyət göstərən müəssisələrin, həmçinin qida məhsullarının istehsalı, tədarükü, təchizatı, saxlanması və topdan satışı müəssisələrinin fəaliyyəti” qeyd edilmişdir.

Bildiyimiz kimi, ictimai iaşə müəsissələri qeyd edilən sahələrə aiddirlər, bilavasitə qida məhsullarının istehsalı, tədarükü və təchizatı ilə məşqul olurlar.

Onu da qeyd etməliyik ki, ictimai iaşə müəsissələri pandemiya dövründə uzun müddət boşdayanmaya məruz qalmış və bir çoxu fəaliyyətlərini tam dayandırmamaq məqsədilə çatdırma və “takeaway” xidmətlərinə keçmiş, yəni yerində xidmət göstərməklə yanaşı, əhaliyə qida məhsullarının tədarükü və təchizatı ilə bilavasitə məşğuldurlar.

Yalnız son iki gün ərzində bir sıra ictimai iaşə müəsissələrindən daxil olan müraciətlər onu göstərir ki, istirahət günləri onlara yerində xidmətin dayandırılması ilə yanaşı, onlayn sifarişlər əsasında çatdırılma və “takeaway” xidmətlərinin göstərilməsinə də qadağa qoyulmuşdur.

Müşahidələrimiz onu göstərir ki, “catering” üsulu ilə iaşə xidmətləri göstərən, şirniyyat, qəlyanaltı, yarımfabrikat, təndir yeməkləri və digər ərzaq və qida məhsullarının istehsalı və satışı ilə məşğul olan müəsissələr həftə sonu günlərində heç bir məhdudiyyətsiz çalışırlar.

Bunları nəzərə alaraq sual çıxır ki, çatdırma və “takeaway” xidmətləri göstərən ictimai iaşə müəsissələrinə (restoran və kafelər) hansı məntiqlə həftə sonu günlərində fəaliyyət göstərməyə icazə verilmir. Onu da nəzərə alsaq ki, restoran biznesı pandemiya dövründə ən çox zərər çəkmiş sahələr sırasında olmuş, uzun müddət məcburi boşdayanma yaşamış, sonradan yalnız çatdırma xidmətilə fəaliyyət göstərmişdirlər və hazırda çətinliklə biznesı yaşadırlar, onların vəziyyətinin nə qədər ağır olduğu məlum olar.

Bunu da qeyd etmək istərdik ki, ictimai iaşə sahəsində, xüsusilə bu sahənin kiçik və orta biznes seqmentində, təkçə Bakı şəhərində on minlərlə insan çalışır, məvacib alırlar və ailə dolandırırlar. Həftə sonu fəaliyyətlərinin dayandırılması çox saylı ixtisarlara gətirib çıxara bilər və bunun qarşısının alınması xüsusilə önəmli hesab edilir.

Digər tərəfdən restoran və kafelərin fəaliyyətinin həftə sonu tam dayandırılması tədarük olunmuş ərzaq və qida məhsullarının xarab olması, ay ərzində 7-8 gün boşdayanma, bununla yanaşı icarə, kommunal və digər xərclərin ödənilməsində yeni problemlərin yaranması ilə nəticələnə bilər. Bu isə biznesın itkilərə getməsi, bir çox hallarda kiçik və orta biznesın müflüsləşməsi kimi fəsadlara gətirib çıxarır.

Məlum olduğu kimi pandemiya dövründə içtimai iaşə müəsissələrinin işini tənzimləyən bir sıra metodik göstərişlər və xüsusi nəzarət mexanizmları tətbiq ediliblər. Əminliklə demək olar ki, restoranlar, kafelər və digər ictimai iaşə obyektləri, o cümlədən onların müştəriləri metodik göstərişlərin qaydalarına ciddi şəkildə əməl edirlər və bu məsələyə hamı məsuliyyətlə yanaşır.

Qeyd olunanları nəzərə alaraq xahiş edirik, ictimai iaşə müəsissələrinin həftə sonu çatdırma və “takeaway” xidmətlərinin göstərilməsinə icazə verilməsi mümkünlüyünə bir daha baxılsın. Müsbət qərarın verilməsi restoran biznesının hazırkı vəziyyətində fəaliyyətinə yardımçı olar, onların çətin günlərdə ayağ üstə qalmalarına, iş yerlərinin saxlanmasına və daimi məvaciblərin verilməsinə, icarə, kommunal və digər cari xərclərin ödənilməsinə böyük köməklik göstərmiş olar".

109
Teqlər:
Nazirlər Kabineti, müraciət, takeaway, çatdırılma xidməti, kafe, restoran, mehmanxana, otel
Xəritə, arxiv şəkli

Tsakurinin Hünərli, Quşçubabanın isə Baharlı adlandırılması təsdiqlənib

0
(Yenilənib 19:06 25.11.2020)
Prezident "Azərbaycan Respublikasının Xocavənd rayonunun Tsakuri kəndinin Hünərli kəndi adlandırılması haqqında" qanunu təsdiq edib.

BAKI, 25 noyabr — Sputnik. Prezident İlham Əliyev "Azərbaycan Respublikasının Xocalı rayonunun Quşçubaba kəndinin Baharlı kəndi adlandırılması haqqında" qanunu təsdiq edib.

Sputnik Azərbaycan-ın məlumatına görə, qanuna əsasən, Azərbaycan Respublikasının Xocalı rayonunun Qarabulaq kənd inzibati ərazi dairəsi tərkibindəki Quşçubaba kəndi Baharlı kəndi adlandırılıb.

Prezident İlham Əliyev həmçinin "Azərbaycan Respublikasının Xocavənd rayonunun Tsakuri kəndinin Hünərli kəndi adlandırılması haqqında" qanunu təsdiq edib.

Qanuna əsasən, Azərbaycan Respublikasının Xocavənd rayonunun Çiraquz kənd inzibati ərazi dairəsi tərkibindəki Tsakuri kəndi Hünərli kəndi adlandırılıb.

0
Teqlər:
təsdiq, qanun, Xocavənd, Xocalı