Fındıq satışı, arxiv şəkli

Fındıq bazarında müəmma - şəkərburanın dadını unutmağa hazırsınız?

9186
"Fındığı saxladıqca qiyməti də qalxır. Bəzən kəndlidən aşağı qiymətə fındığı alırlar, bu da kəndliyə sərf etmir. Bu zaman fındığı ləğv edib, yerinə gilas əkir"

Xalid Məmmədov, Sputnik Azərbaycan

BAKI, 13 sentyabr — Sputnik. Gələn Novruz bayramının fındıq tədarükünü, deyəsən, indidən görməyə başlayacağıq. Çünki fındıq bazarındakı son xəbərlər heç də ürəkaçan deyil. Bir tərəfdən qiymət qalxırsa, digər tərəfdən, ümumiyyətlə fındıqçılığın bir sahə kimi yox olma təhlükəsi var.

"Hazırda daxili bazarda fındığın satış qiyməti xarici bazarla müqayisədə təxminən 20% yüksəkdir. Bu da Azərbaycandan fındıq ixracının dayanmasına səbəb ola bilər".

Bunu Fındıq İstehsalçıları və İxracatçıları Assosiasiyasının sədri İsmayıl Orucov bildirib. "Koronavirus pandemiyası ilə əlaqədar fındıq emalı müəssisələrinin çoxu bağlı olsa da, bu, fındıq alışına elə də təsir etməyib. Bir çox möhtəkirlər kütləvi şəkildə fındıq almaqla məşğuldurlar. Bu da daxili bazarda həmin məhsulu bahalaşdırır və onun xarici bazara çıxarılmasına mane olur", - İ.Orucov deyib.

Məsələ ilə bağlı iqtisadçı, Azərbaycan Dövlət İqtisad Universitetinin İnnovativ Biznes-İnkubatorunun direktoru Mircavid Həsənov Sputnik Azərbaycan-a deyib ki, Fındıq İstehsalçıları və İxracatçıları Assosiasiyasının öz tədarük məntəqələri var: "Xaçmazda, Zaqatalada, Balakəndə fındıq tədarük məntəqələri var və demək olar ki, hamısında eyni qiymət olur. Amma ola bilər, bu bazara yeni rəqib daxil olub və baha qiymətə fındığı kəndlilərdən alır. Yəqin, burada qiymət məsələsi var, rəqabət gedir. Lakin dünyada fındıq nə qədər istehsal edilirsə-edilsin, yenə də tələbatı ödəmək olmur".

O bildirib ki, fındığın qiyməti üzü qışa doğru qalxır: "Məsələn, keçən il fındığın qiyməti 3 manat 50 qəpik - 4 manat 20 qəpik idi. Qışda isə fındığın kilosu 5-6 manata gəlib çatmışdı. Fındığı saxladıqca qiyməti də qalxır. Bəzən kəndlidən aşağı qiymətə fındığı alırlar, bu da kəndliyə sərf etmir. Bu zaman fındığı ləğv edib, yerinə gilas əkir. Məsələn, kəndli 1 hektar fındıq bağından 10 min manat pul qazanırsa, gilas bağından daha çox qazanır".

İqtisadçı deyib ki, fındıq istehsalı üzrə Türkiyə İtaliyadan sonra ikinci yerdədir: "Türkiyə keçən il fındığın satış məsələsini nəzarətə götürüb. Belə ki, İtaliyanın "Ferrero" şirkəti Türkiyədən kifayət qədər çox fındıq alır.

"Ferrero" şirkətinin Türkiyədə tədarük məntəqələri var idi və kəndlilərdən ucuz qiymətə fındığı almağa çalışırdı. Kəndlilər də şikayət edirdilər ki, İtaliya şirkəti aşağı qiymətə bizdən fındığı alır və onlara satmaq sərf etmir. Bundan sonra isə Türkiyədə regional mərkəzlər yaradıldı və dövlət özü kəndliyə sərf edən qiymətə fındığı almağa başladı. İndi dövlət "Ferrero" şirkətinə fındığı özü satır.

"Ferrero" şirkəti isə baha qiymətə olsa da fındığı almağa məcburdur, çünki iri istehsalçı şirkətdir. Bu zaman həm dövlət qazanır, həm də kəndlinin maraqları qorunur. İndi Türkiyə təcrübəsini bizdə də tətbiq etmək olar. Bu addım fındıqçılığın inkişafına təsir edər".

O bildirib ki, Türkiyənin Qara dəniz sahillərində fındıq çox əkilir: "Orada kəndli fındıqdan başqa heç nə əkə bilmir, çünki o ərazilərdə başqa meyvələr becərmək mümkün deyil, dağlıq ərazilərdir. Fındıq harada gəldi bitir, yararsız, əlverişsiz torpaqlarda da əkmək olur. Ona görə də münbit torpaqlarda fındıq əkmək düzgün deyil. Münbit torpaqlarda digər meyvələrin əkilməsi daha məqsədəuyğundur".

Kənd Təsərrüfatı Nazirliyinin Aqrar Tədqiqatlar Mərkəzinin Analitika departamentinin direktor müavini Səadət Hacıyeva isə Sputnik Azərbaycan-a deyib ki, 2019-cu ildə Azərbaycanda fındıq bağlarının sahəsi 79.5 min hektar olub: "Ümumi fındıq bağlarının 43.4 min hektarı və ya 54.6%-i barverən yaşdadır. 2019-cu ildə yeni salınmış fındıq bağlarının sahəsi isə 4.6 min hektar olub. 2019-cu ildə Azərbaycanda fındıq istehsalı 53.8 min ton olub. 2000-2019-cu illər ərzində fındıq istehsalı 4 dəfə, 2015-2019-cu illərdə 65.1% artıb. 2018-ci illə müqayisədə isə 3.3% artıb".

"2019-cu ildə Azərbaycanın fındıq ixracı 22.6 min ton və ya 125.6 milyon ABŞ dolları olub. İxrac 2018-ci illə müqayisədə 22.4 faiz artıb", - deyə S.Hacıyeva diqqətə çatdırıb.

Onu da bildirək ki, "Azərbaycan Fındıq İstehsalçıları və İxracatçıları Assosiasiyası" İctimai Birliyi 2016-cı ildə qeydiyyata alınıb. Birliyin əsas məqsədi fındıqçılığın inkişafına yardım etməkdən ibarətdir. Bu məqsədlə Assosiasiya fındıqçılıq təsərrüfatında istehsal mədəniyyətinin və səmərəliliyin artırılmasına, fındıq istehsalı və emalı sahəsində yeni texnologiyaların tətbiqinə, təbii resursların səmərəli istifadəsinə dəstək verir, fındıqçılıqla bağlı maarifləndirmə işi aparır. Hal-hazırda Assosiasiyanın 52 üzvü var.

9186
Teqlər:
qiymət, möhtəkir, xarici ticarət, fermer, rəqib, Balakən, Zaqatala, Xaçmaz, bazar, fındıqçılıq, fındıq
Əlaqədar
Fermerlərə muştuluq: Vəhşi heyvanlar mal-qaranızı parçalasa da, ziyana düşməyəcəksiniz
Daha bir bölgəmiz özünün brend məhsulunu yetişdirməyə başlayıb - FOTOLAR
Qara gözlü badam: Adına mahnılar qoşulan nemətimiz niyə unudulur?
Həmişə bəla gəlmir! Çindən gələn balaca qurdlar özləri ilə karlı pul da gətirirlər
Dama-dama qızıl olar: Yevlaxlı fermerlər yeni üsula keçiblər
Quş ferması, arxiv şəkli

Estoniyadan Azərbaycana quşçuluq məhsulları gətirilməsi dayandırıldı

4
Nəzarət tədbirlərinin gücləndirilməsi məqsədilə Estoniya Respublikasından gələn, yaxud tranzitlə keçən nəqliyyat vasitələri ilə bağlı müvafiq tədbirlərin görülməsi üçün Dövlət Gömrük Komitəsinə müraciət olunub.

BAKI, 26 fevral — Sputnik. Azərbaycan Respublikasının Qida Təhlükəsizliyi Agentliyi (AQTA) tərəfindən başqa ölkələrdən respublikamızın ərazisinə keçə biləcək yoluxucu heyvan xəstəliklərindən qorunmaq məqsədilə Ümumdünya Heyvan Sağlamlığı Təşkilatından (OIE) daxil olan məlumatlar əsasında dünyadakı epizootik vəziyyətə uyğun olaraq müvafiq tədbirlər həyata keçirilir.

Agentlikdən verilən məlumata görə, Ümumdünya Heyvan Sağlamlığı Təşkilatının (OIE) məlumatına əsasən, Estoniya Respublikasının Lyaene-Virumaa (Laane-Viru) inzibati ərazi vahidində yüksək patogen "quş qripi" xəstəliyi qeydə alınıb.

Respublika ərazisinin başqa ölkələrdən keçə biləcək yoluxucu heyvan xəstəliklərindən qorunması məqsədilə OIE-nin “Quruda yaşayan heyvanların sağlamlıq Məcəlləsi”nə əsasən zonalaşma prinsipi nəzərə alınmaqla, Estoniya Respublikasının Lyaene-Virumaa inzibati ərazi vahidindən bütün növ diri quş və quşçuluq məhsullarının idxalına müvəqqəti məhdudiyyət tətbiq olunub.

Eyni zamanda nəzarət tədbirlərinin gücləndirilməsi məqsədilə Estoniya Respublikasından gələn, yaxud tranzitlə keçən nəqliyyat vasitələri ilə bağlı müvafiq tədbirlərin görülməsi üçün Dövlət Gömrük Komitəsinə müraciət olunub.

4
Neft buruğu, arxiv şəkli

Azərbaycan nefti bahalaşır

9
(Yenilənib 14:13 26.02.2021)
"Azeri Light" nefti keçən il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

BAKI, 26 fevral — Sputnik. Azərbaycan neftinin qiyməti bahalaşır.

Sputnik Azərbaycan xəbər verir ki, "Azeri Light" markalı neftin bir barelinin qiyməti 0,21 dollar artaraq 66,98 dollar təşkil edib. Bu, ötən ilin yanvarından bəri maksimum göstəricidir.

"Brent" markalı neftin qiyməti 0,59 dollar geriləyərək 66,29 dollar, "Light" markalı neftin qiyməti isə 0,64 dollar ucuzlaşaraq 62,89 dollar olub.

Qeyd edək ki, "Azeri Light" nefti keçən il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

9
Kompüter arxasında iş, arxiv şəkli

Xəbər başlığı qədər sadə olsa, bir o qədər yaxşıdır - SputnikPro layihəsi

0
(Yenilənib 19:42 26.02.2021)
SputnikPro maarifləndirmə layihəsi çərçivəsində keçirilən onlayn-sessiyada spiker həmkarlarına məqalələrə cəlbedici başlığın necə qoyulması barədə danışıb.

BAKI, 26 fevral — Sputnik. Xəbər başlığı həm cəlbedici, həm də sadə və anlaşılan olmalıdır. Nə qədər sadə olsa, bir o qədər yaxşıdır. SputnikPro maarifləndirmə layihəsi çərçivəsində keçirilən növbəti vebinarda bu barədə danışılıb.

Fevralın 26-da, cümə günü baş tutan onlayn sessiya "Başlıq – düşmən deyil, dostdur: tez və effektli cəlbedici başlıq necə qoyulmalı?" mövzusuna həsr olunub. Vebinarın spikeri "Rossiya Seqodnya" media qrupunun Sənədlərlə Təminat İdarəsinin məsləhətçisi, köşə yazarı Oleq Dmitriyevdir.

© Sputnik
"Rossiya Seqodnya" media qrupunun Sənədlərlə Təminat İdarəsinin məsləhətçis Oleq Dmitriyev

O, "Ali İqtisadiyyat Məktəbi" ETİ-nin kommunikasiya, media və dizayn fakültəsinin professoru, filologiya elmləri doktorudur. 2001-ci ildən 2007-ci ilədək Rusiya və MDB ölkələrinin regional telekanalları arasında videomübadilə sistemi - "Əyalət" layihəsinin rəhbəri və prodüseri olub. 2007-2013-cü illərdə "TV-Xəbərlər" (RT, "Rusiya-əl-Yəum", RT Espanol telekanalları) tədris proqramlarının rəhbəri olub. Xarici dil bilən və jurnalistikaya yeni başlayanlar üçün baza tədris kurslarının müəllifidir. O, RT telekanalının müxbir məntəqələrində məsləhətlər aparıb. "Voice of Russia" radiostansiyasının ingiliscə xəbərlər xidmətinin rəhbəri işləyib. 2014-cü ilin aprelindən dekabrınadək "Rossiya Seqodnya" media qrupunun Beynəlxalq İngiliscə Yayım Bölməsinin rəhbəri vəzifəsini icra edib.

Vebinarda Oleq Dmitriyev media mətnlərinə başlıqların qoyulması ilə bağlı müxtəlif yanaşmaları nəzərdən keçirib, onların mənfi və müsbət cəhətlərini göstərib. Məsələn, müxtəlif MDB ölkələrinin KİV-lərindən götürülmüş məqalə nümunələri əsasında jurnalistlərin öz yazılarına qoyduqları uğurlu başlıqlar barədə danışıb, eləcə də, bu sahədəki problemlərə toxunub.

"Başlıq fikirləşəndə assosiasiyalardan, sitatlardan, hətta memlərdən istifadə etmək olar", – deyən O.Dmitriyev onu da qeyd edib ki, bütün bunlar oxucu tərəfindən asanlıqla qavranılmalıdır.

Başlıqlar tamamilə müxtəlif ola bilər – məqalənin əsas ideyası ilə üst-üstə düşə, bir növ təlimat xarakteri daşıya, yaxud simvolik ifadələrin "top line"la birləşməsindən ibarət ola bilər. Əsas odur ki, oxucunu cəlb etsin və onda materialı oxumaq həvəsi yaratsın", – deyə spiker vurğulayıb.

Məqalələrin ikinci başlığına da toxunan Dmitriyev bildirib ki, yazının bu hissəsində yalnız material buna imkan verdiyi təqdirdə intriqa yaratmaq olar.

"Məqalənin girişini gəlincə, onun əsas məqsədi oxucunu mətni sona qədər oxumağa məcbur etməkdir. Ancaq bu hissənin uzunluğu üç-dörd cümlədən çox olmamalıdr", – deyə spiker vurğulayıb.

SputnikPro – Sputnik Beynəlxalq Xəbər Agentliyi və radiosunun jurnalistlər, universitetlərin müvafiq ixtisas üzrə təhsil alan tələbələri, mətbuat xidmətlərinin əməkdaşları və digər media mütəxəssisləri üçün xarici həmkarlarla təcrübə mübadiləsinə imkan verən, media kommunikasiyaları və peşəkar əlaqələrin inkişafına yönəlmiş layihəsidir.

Müxtəlif formatlarda fəaliyyət göstərən layihədə indiyə kimi 80-dən çox ölkənin nümayəndəsi iştirak edib. SputnikPro-nun Azərbaycan, Belarus, Yunanıstan, Gürcüstan, Hindistan, Qırğızıstan, Türkiyə və Estoniyada üz-üzə formatda ustad dərsləri keçirilib.

SputnikPro layihəsi ilə bağlı, spikerlərin vebinar və ustad dərslərində nə barədə danışdıqları haqda daha geniş məlumatı aşağıdakı linkə daxil olmaqla əldə etmək mümkündür:

https://www.facebook.com/SputnikProject/

0