Dağ-mədən və metallurgiya sənayesi

"AzerGold"a ölkənin qara metal filizi yataqlarının işlənilməsi həvalə olundu

31
(Yenilənib 20:20 01.09.2020)
“AzerGold” QSC əlvan metal filizi yataqları ilə bərabər, qara metal filizi yataqlarının öyrənilməsini, tədqiqini, kəşfiyyatını, işlənilməsini və idarə olunmasını da yerinə yetirəcək

BAKI, 1 sentyabr — Sputnik. “AzerGold” Qapalı Səhmdar Cəmiyyəti (QSC) ölkə ərazisində dəmir filizi yataqlarının öyrənilməsini, tədqiqini, kəşfiyyatını, işlənilməsini və idarə olunmasını, bu sahədə yeni texnologiyaların tətbiqini, maddi-texniki bazanın müasirləşdirilməsini və ondan səmərəli istifadəni, habelə bu sahənin inkişafı ilə bağlı digər işlərin yerinə yetirilməsini təmin etməlidir.

Sputnik Azərbaycan-ın məlumatına görə, bu, Prezident İlham Əliyevin bu gün imzaladığı Dağ-mədən və metallurgiya sənayesində iqtisadi islahatların davam etdirilməsi ilə bağlı əlavə tədbirlər və Azərbaycan Respublikası Prezidentinin “AzerGold” Qapalı Səhmdar Cəmiyyətinin yaradılması haqqında” 2015-ci il 11 fevral tarixli 1047 nömrəli, “Azərbaycan Respublikasının metallurgiya kompleksində sağlamlaşdırma və restrukturizasiya tədbirlərinin həyata keçirilməsi haqqında” 2016-cı il 13 iyul tarixli 2198 nömrəli sərəncamlarında dəyişiklik edilməsi barədə” sərəncamında əksini tapıb.

Müvafiq olaraq “AzerGold” Qapalı Səhmdar Cəmiyyətinin yaradılması haqqında” Azərbaycan Respublikası Prezidentinin 2015-ci il 11 fevral tarixli 1047 nömrəli Sərəncamında dəyişiklik edilib.

Beləliklə, “AzerGold” QSC əlvan metal filizi yataqları ilə bərabər, qara metal filizi yataqlarının öyrənilməsini, tədqiqini, kəşfiyyatını, işlənilməsini və idarə olunmasını, bu sahədə yeni texnologiyaların tətbiqini, maddi-texniki bazanın müasirləşdirilməsini və ondan səmərəli istifadəni, habelə bu sahənin inkişafı ilə bağlı digər işləri də yerinə yetirəcək.

31
Bakıda geyim dükanların birində

Bakının gecə həyatı: Virusa yoluxmağa əsl fürsət var - REPORTAJ

42
(Yenilənib 12:42 28.01.2021)
Geyim mağazalarının "qırxının çıxmasını" Bakı əhli cani-dildən "qeyd edib". Gün ərzində işdə-gücdə olanlar axşam saatlarında mağazalara axışıblar. Gözünün qurdu ilə cibinin pulunu öldürənlərin yadına virus düşməyib

Zülfiyyə Quluyeva, Sputnik Azərbaycan

BAKI, 28 yanvar — Sputnik. Nazirlər Kabinetinin müvafiq qərarına əsasən, yanvarın 25-dən ölkə ərazisində ticarət obyektlərinin fəaliyyətinə (iri ticarət mərkəzlərinin, "Mall"ların fəaliyyəti istisna olmaqla) icazə verilib. Qərar açıqlanarkən bildirilmişdi ki, ticarət obyektləri fəaliyyətə başladıqdan sonra müştərilər arasında sosial məsafə qorunmalı, gigiyena qaydalarına əməl edilməlidir.

© Sputnik / Zulfiyya Guluyeva
Bakıda geyim dükanların birində

Sputnik Azərbaycan 40 gün bağlı qaldıqdan sonra açılan ticarət obyektlərində bu tövsiyəyə necə əməl edildiyini öyrənmək üçün axşam saatlarında paytaxtın geyim mağazalarından reportaj hazırlayıb. Bakı sakinlərinin ən çox alış-veriş etdiyi mağazalar Nizami küçəsində yerləşdiyindən axşam saat 18:00-dan sonra burada insan sıxlığı müşahidə olunurdu. Bir aydan çoxdur ki, geyim mağazalarının açılmasını gözləyən paytaxt sakinləri brend firmaların məhsullarının satıldığı ticarət obyektlərində sözün əsl mənasında sıxlıq yaratmışdı. "Zara" geyim mağazasında qapıdan içəri daxil olan müştərilərin temperaturu yoxlanıldıqdan, əlləri dezinfeksiya edildikdən sonra içəri buraxılırdılar. Amma mağazada müştəri sıxlığı olduğundan sosial məsafə qorunmurdu. Hətta dəyişmə otaqlarının qarşısında belə növbə yaranmışdı. Kassanın qarşısında isə demək olar ki, tıxac idi. Müştərilər bəyəndikləri geyimi almaq üçün növbəyə düzülmüşdülər.

© Sputnik / Zulfiyya Guluyeva
Bakının mərkəzi

Nizami küçəsində yerləşən ticarət obyektlərinin çoxunda eyni vəziyyət müşahidə olunurdu. Brend geyimlərin satıldığı butiklərdə müştəri sıxlığı vardı.

© Sputnik / Zulfiyya Guluyeva
Bakıda geyim dükanların birində

Eyni vəziyyət aksesuarların satıldığı kiçik mağazalarda da müşahidə olunurdu. Sahəsi o qədər də böyük olmayan aksesuar, alt paltarı butiklərində, demək olar ki, pandemiya ilə bağlı heç bir tövsiyəyə əməl edilmirdi. Hətta kassada belə sosial məsafə tələbinə əməl olunmurdu. Vəziyyətdən görünürdü ki, ticarət obyektlərini öz qazanclarından başqa heç nə maraqlandırmır.

© Sputnik / Zulfiyya Guluyeva
Bakının mərkəzi

Apardığımız müşahidələr göstərdi ki, geyim mağazalarında yaşanan qələbəlik restoranlar açıldıqdan sonra iaşə obyektlərində də davam edəcək. Çünki McDonald`s restoranlar şəbəkəsinin qarşısında insanlar yemək almaq üçün yığılmışdılar. Açıq havada maska tələbinə əməl edilsə də, sosial məsafəni qoruyan yox idi. Bəzi restoranlar "Tarqovı" adlanan bu küçədə əhalinin sıx olduğunu nəzərə alıb içkilərin küçə satışını həyata keçirirdilər.

  • Bakının mərkəzi
    © Sputnik / Zulfiyya Guluyeva
  • Bakının mərkəzi
    © Sputnik / Zulfiyya Guluyeva
  • Bakıda geyim dükanların birində
    © Sputnik / Zulfiyya Guluyeva
  • Bakıda geyim dükanların birində
    © Sputnik / Zulfiyya Guluyeva
1 / 4
© Sputnik / Zulfiyya Guluyeva
Bakının mərkəzi

Tibb Universitetinin Tədris Cərrahiyyə Klinikasının dosenti Ədalət Rüstəm Sputnik Azərbaycan-a açıqlamasında bildirib ki, ticarət obyektlərində sosial məsafənin qorunmaması virusa yoluxma sayını artıra bilər: "Koronavirusa yoluxmamaq üçün üç qızıl qayda var ki, ona hər birimiz pandemiya bitənədək əməl etməliyik. Bunlardan biri sosial məsafənin qorunmasıdır. Əgər bu gün geyim mağazalarında və digər ticarət obyektlərində buna əməl edilməsə, bu, növbəti qapanmaya səbəb ola bilər. Biz istəyiriksə ki, ticarət obyektləri işləsin, restoranlar açılsın, həyat öz axarına qayıtsın, qoyulan tələblərə əməl edilməlidir".

42
Teqlər:
COVID-19, virus, mağaza, restoran, kafe, geyim, alış-veriş mərkəzi, alış-veriş, ticarət mərkəzi, Bakı
Yemək yeyən insanlar, arxiv şəkli

Restoranlar şənbə bazar günləri işləyəcək?

20
(Yenilənib 11:05 28.01.2021)
Kafe-restoranların fəaliyyətinə 2021-ci il 1 fevral saat 00:00-dan etibarən icazə veriləcək. Amma nəqliyyat məsələləri onların şənbə-bazar günləri də işləməsinə təsir edə bilər

BAKI, 28 yanvar — Sputnik. "Fevralın 1-dən sonra şənbə və bazar günləri də ictimai iaşə müəssisələri yerində xidmət göstərə biləcək".

Sputnik Azərbaycan-ın məlumatına görə, bunu Nazirlər Kabinetinin mətbuat xidmətinin rəhbəri İbrahim Məmmədov deyib. O bildirib ki, həftəsonları ictimai nəqliyyatın fəaliyyəti ilə bağlı isə əlavə məlumat veriləcək. Qeyd edək ki, Nazirlər Kabinetinin 16 yanvar 2021-ci tarixli qərarına əsasən, 2021-ci il 1 fevral saat 00:00-dan etibarən ölkə ərazisində ictimai iaşə obyektləri, eləcə də restoran, kafe və çay evləri və bu kimi digər məkanlarda müştərilərə saat 06:00-dan 00:00-dək yerində xidmətlər bərpa olunur.

20
Teqlər:
fəaliyyət, bazar, şənbə, nəqliyyat, restoran, kafe
Təhsil Nazirliyi

Nazirlik vətəndaş qəbuluna qadağanın müddətini uzatdı

0
(Yenilənib 13:06 28.01.2021)
Təhsil Nazirliyinin Vətəndaşların Qəbulu Mərkəzi vətəndaşların qəbuluna qoyulan qadağanın müddətini bir qədər də uzadıb. Şikayəti isə telefon və ya poçtla bildirmək olar

BAKI, 28 yanvar — Sputnik. Ölkə ərazisində xüsusi karantin rejiminin müddətinin uzadılması barədə Nazirlər Kabinetinin müvafiq qərarına əsasən, Təhsil Nazirliyinin Vətəndaşların Qəbulu Mərkəzi 1 aprel 2021-ci il tarixinədək fəaliyyətini dayandırır.

Nazirlikdən Sputnik Azərbaycan-a verilən məlumata görə, bu müddətədək vətəndaşlar Təhsil Nazirliyinin Telefon Məlumat Mərkəzinin 146-1 nömrəli telefonuna zəng etməklə və ya nazirliyin rəsmi saytı (https://edu.gov.az/az/contacts/appeal) vasitəsilə müraciət edə bilər, yaxud nazirliyin elektron resurslarında (https://edu.gov.az, https://ict.edu.az) təqdim edilən müxtəlif xidmətlərdən yararlana bilərlər.

Təhsil Nazirliyinin rəsmi məlumatlarını nazirliyin rəsmi saytı, həmçinin sosial şəbəkələrdəki səhifələrindən (https://www.facebook.com/tehsil.gov.az, https://twitter.com/tehsilgovaz, https://www.instagram.com/edugovaz/, https://www.youtube.com/user/tehsilgovaz, @edugovaz) izləmək tövsiyə edilir.

0
Teqlər:
qadağa, qəbul, Təhsil Nazirliyi, valideyn, şikayət