Manat

Valyuta bazarında tələb artmaqdadır: Qızıl alışına keçməsək, payızda zərər görə bilərik

436
(Yenilənib 19:55 24.07.2020)
Ekspert: "İnflyasiya ilə mübarizədə pul kütləsinin kəskin sıxılması primitiv yanaşmadır və uzun müddətli effekt verə bilməz"

Xalid Məmmədov, Sputnik Azərbaycan

BAKI, 24 iyul — Sputnik. "Birinci rübdə strateji ehtiyatlarımız bir qədər azalsa da, ikinci rübdən bərpa prosesi sürətləndi. Hazırda bizim strateji valyuta ehtiyatlarımız demək olar ki, ilin əvvəlinə olan səviyyədədir".

Sputnik Azərbaycan xəbər verir ki, bunu iyulun 15-də Nazirlər Kabinetinin iclasında Mərkəzi Bankın sədri Elman Rüstəmov deyib. O bildirib ki, ilin ilk 5 ayında 2,9 faizlik inflyasiya səviyyəsi var: "Aparılan sorğular göstərir ki, həm əhalinin, həm də biznesin inflyasiya göstəriciləri sabitləşib, aşağı düşüb. 2020-ci ilin sonunda bizim inflyasiya proqnozumuz 3-3,5 faiz səviyyəsindədir ki, bu da bizim və hökumətin proqnozlarından aşağıdır".

Azərbaycan Dövlət İqtisad Universitetinin professoru Elşad Məmmədov Sputnik Azərbaycan-a açıqlamasında strateji valyuta ehtiyatları, inflyasiya ilə mübarizə məsələlərindən danışıb.

Ekspert deyib ki, bu ilin birinci rübündə ölkəmizin strateji valyuta ehtiyatlarının azalması iki istiqamətdə gedirdi: "Birincisi, tələbatın artmasına görə mart ayında kəskin şəkildə dollar satışı artdı, Neft Fondu tərəfindən büdcəyə transfertlər artdı. İkinci istiqamət isə birinci rübün sonuna yaxın dünya səhm bazarında formalaşan proseslər fonunda səhmlərin qiymətdən düşməsi Azərbaycanın ehtiyatlarına da mənfi təsir göstərmişdi. Strateji valyuta ehtiyatlarımızın xeyli hissəsi səhmlərdədir. Bu ilin ikinci rübündə isə dünya səhm bazarında bir qədər tarazlıq var, yəni səhmlərin qiymətində artım müşahidə edilir".

"Digər tərəfdən, işgüzar fəallığın, daxili istehlakın azalması, ölkədən çıxışın kəskin şəkildə məhdudlaşdırılması, eyni zamanda valyuta alışına qoyulan məhdudiyyətlər valyutaya olan daxili tələbatı azaltdı. Amma son günlər iqtisadiyyatda açılım baş verdikcə valyutaya tələb artmaqdadır. Ona görə də son valyuta ehtiyatlarının artımı müvəqqəti bir amil kimi dəyərləndirilməlidir", – deyə o qeyd edib.

Onun sözlərinə görə, digər tərəfdən, səhm qiymətlərinin artımı spekulyativ artımdır: "Payıza yaxın səhm bazarında kəskin qiymət enməsi gözlənilir. Ona görə də təklif edirəm, Azərbaycan strateji valyuta ehtiyatlarını mümkün dərəcədə qızılda saxlasın. Çünki səhmlərin qiymətləri ilə bağlı gözləntilər ürəkaçan deyil".

İnflyasiya ilə mübarizədən danışan ekspert deyib ki, Mərkəzi Bankın siyasətinin daha da şaxələndirilmiş olmasının tərəfdarıdır: "Pul kütləsinin sıxılması ilə inflyasiya ilə mübarizə aparmaq bu gün adekvat yanaşma kimi qəbul edilə bilməz. Mütləq şəkildə inflyasiya ilə mübarizə eyni zamanda istehsalın artımı ilə, pul kütləsinin artımı ilə müşahidə olunmalıdır. 

Pul kütləsinin azalması ilə inflyasiya aşağı düşəndə sonra ölkə iqtisadiyyatında problemlər yaranır. Çünki investisiyalar azalır, işgüzar fəallıq azalır. Yəni inflyasiya ilə mübarizədə pul kütləsinin kəskin sıxılması primitiv yanaşmadır və uzun müddətli effekt verə bilməz".

Qeyd edək ki, Azərbaycanın valyuta ehtiyatları bu il iyulun 1-nə 49 659,6 milyon ABŞ dolları təşkil edib. Bunun 87%-i və yaxud 43 223,3 milyon ABŞ dolları Azərbaycan Dövlət Neft Fondunun (ARDNF), 13%-i və yaxud 6 436,3 milyon ABŞ dolları isə Azərbaycan Mərkəzi Bankının (AMB) payına düşüb.

Bu ilin II rübündə ölkənin valyuta ehtiyatları 1 916,3 milyon ABŞ dolları və yaxud 4% artıb. Belə ki, ARDNF-in valyuta ehtiyatlarında 1 873,8 milyon ABŞ dolları və yaxud 4,5%, AMB-nin valyuta ehtiyatlarında isə 42,5 milyon ABŞ dolları və yaxud 0,7% artım olub. Son 1 ildə isə ölkənin valyuta ehtiyatları 1 256,5 milyon ABŞ dolları və yaxud 2,6% artıb.

Onu da bildirək ki, E.Rüstəmov iclasda qeyd edib ki, xarici şok şəraitində bizim valyuta bazarımız əhəmiyyətli spekulyativ hücuma məruz qaldı: "Lakin vaxtında görülən tədbirlər nəticəsində valyuta bazarı tarazlaşıb. Bu gün bunun hər iki seqmenti – həm nağd, həm də qeyri-nağd hissəsi tam sabit və tarazlı səviyyədə fəaliyyət göstərir".

436
Minaatandan atəş, arxiv şəkli

Ermənistan ordusunun hərbi texnikası darmadağın edilib

166
(Yenilənib 12:50 28.09.2020)
Düşmən itkiləri arasında aşkar edilən bəzi cəsədlərin Suriyadan olan muzdlulara aid olması müəyyənləşib.

BAKI, 28 sentyabr — Sputnik. Kəşfiyyat məlumatlarına əsasən, düşmənin 24 ədəd tankı və digər texnikası, 15 ədəd OSA-sı, 18 ədəd PUA-sı məhv edilib.

Sputnik Azərbaycan-ın məlumatına görə, bunu Müdafiə Nazirliyinin keçirdiyi brifinqdə Müdafiə Nazirliyinin Mətbuat Xidmətinin mətbuat katibi, polkovnik-leytenant Anar Eyvazov deyib.

"Raket atışları ilə düşmən müqavimətinin qırılmasına məcbur edilir", – polkovnik-leytenant Anar Eyvazov deyib.

O bildirib ki, Ermənistan tərəfinin Azərbaycan Ordusunun itkiləri ilə bağlı yaydığı məlumatların heç bir əsası yoxdur.

"Bu, Ermənistan əhalisinin içində olan təşvişi azaltmağa xidmət edir. Kəşfiyyat məlumatlarına əsasən, düşmənin 24 ədəd tank və digər texnika, 15 ədəd OSA, 18 ədəd PUA-sı məhv edilib. Düşmən itkiləri arasında aşkar edilən bəzi cəsədlərin Suriyadan olan muzdlular olması müəyyənləşib. Ermənistan tərəfi bu məlumatı həm yerli, həm beynəlxalq ictimaiyyətdən gizlədir", – polkovnik-leytenant Anar Eyvazov əlavə edib.

166
G-20

“Böyük iyirmiliyin” toplaşacağı vaxt bəlli oldu

46
(Yenilənib 03:18 28.09.2020)
G20 - çox inkişaf etmiş və inkişafda olan ölkələrin hökumətləri və mərkəzi banklarının rəhbərlərinin klubudur.

BAKI, 28 sentyabr - Sputnik. “Böyük iyirmilik” ölkələri növbəti sammitin bu il onlayn formatda keçiriləcəyini bəyan ediblər.

Sputnik Azərbaycan bildirir ki, bu barədə G-20-nin saytında məlumat yer alıb.

Tədbir noyabrda keçiriləcək. Orada sədr Səudiyyə Ərəbistanı olacaq.

“G20 liderlərinin sammiti noyabrın 21-22-də onlayn formatda, Əlahəzrət kral Salman ben Əbdül Əziz əl Səudun sədrliyi ilə keçiriləcək”, - məlumatda deyilir.

G20 - çox inkişaf etmiş və inkişafda olan ölkələrin hökumətləri və mərkəzi banklarının rəhbərlərinin klubudur. Ümumilikdə G20 dünyanın ümumi milli məhsulunun 85%-ni, dünya ticarətinin 75%-ni (Aİ daxilində ticarət də daxil olmaqla) və dünya əhalisinin üçdə ikisini ehtiva edir. Kluba 20 milli iqtisadiyyat - ABŞ, Almaniya, Argentina, Avstraliya, Braziliya, Böyük Britaniya, İndoneziya, İtaliya, Hindistan, Kanada, Çin, Meksika, Rusiya, Səudiyyə Ərəbistanı, Türkiyə, Fransa, Cənubi Koreya, CAR, Yaponiya və Avropa Birliyi daxildir.

46
Azərbaycan hərbi təyyarələri Türkiyə səmasında

Azərbaycana məxsus təyyarənin vurulması barədə yayılan məlumat dezinformasiyadır

0
(Yenilənib 00:17 29.09.2020)
Ermənistan tərəfinin axşam saatlarında Azərbaycan Hərbi Hava Qüvvələrinə məxsus təyyarənin vurulması barədə yayılan məlumat yalan və dezinformasiyadır.

BAKI, 29 sentyabr — Sputnik. Ermənistan tərəfinin axşam saatlarında Azərbaycan Hərbi Hava Qüvvələrinə məxsus təyyarənin vurulması barədə yayılan məlumat yalan və dezinformasiyadır.

Sputnik Azərbaycan xəbər verir ki, bu barədə Müdafiə Nazirliyinin Mətbuat Xidmətinin rəisi polkovnik Vaqif Dərgahlı bildirib.

V.Dərgahlı qeyd edib ki, Azərbaycan Ordusunun bütün aviasiya vasitələri yerindədir və işləkdir.

Qeyd edək ki, Ermənistan Müdafiə Nazirliyinin mətbuat katibi Şuşan Stepanyan qondarma Dağlıq Qarabağ ordusunun Martuni üzərində Azərbaycana aid bir An-2 təyyarəsini vurduğunu iddia edib. 

0