Evdə açar

Əmlak bazarında son vəziyyət - qiyməti saxlamaq naminə söküntü başlayacaq

3313
(Yenilənib 19:13 06.07.2020)
E.Fərzəliyev qeyd edib ki, köhnə binalardakı mənzillərin qiymətinin saxlanıla bilməsi üçün yaxın zamanlarda söküntülər başlayacaq. Köhnələr söküləcək və yerində yeni binalar tikiləcək.

İradə Cəlilova, Sputnik Azərbaycan

BAKI, 7 iyul — Sputnik. Ölkədə tətbiq edilən xüsusi karantin rejimi bütün sahələrə təsir göstərdiyi kimi, daşınmaz əmlak bazarından da yan keçməyib. Mütəxəssislərin fikrincə, hazırda bazarda durğunluq müşahidə edilir. Vətəndaşların evdən xüsusi icazələrlə çıxması, bölgələrə gediş-gəlişin dayandırılması həyət və bağ evlərinə tələbatı artırıb. Bu da öz növbəsində qiymətlərə təsir edib.

Əmlak məsələləri üzrə ekspert Elnur Fərzəliyev Sputnik Azərbaycan-a bildirib ki, pandemiya daşınmaz əmlak bazarında ciddi durğunluq yaradıb.

Onun sözlərinə görə, əmlak alanların çoxu xarici ölkələrdə yaşayan azərbaycanlılar və yaxud rayonlarda fermer təsərrüfatı ilə məşğul olan şəxslərdir. Yollar bağlı olduğu üçün bu şəxslər paytaxtda əmlak yatırımı edə bilmirlər: "Eyni zamanda bəzi rayon qeydiyyatında olan vətəndaşlar var ki, onların Bakıda mənzilləri var, lakin çıxarışı olmadığı üçün qeydiyyatda deyillər. Bu şəxslər də bayram ərəfəsində rayonlara getdikləri üçün Bakıya buraxılmadılar. Bu da vətəndaşlarda tərəddüd yaratdı və daha əmlak almaq niyyəti olan da almaq istəmir".

Ekspert vurğulayır ki, əmlak bazarını idarə edən "makler"lərin fəaliyyətinə bu gün də Operativ Qərargahın müvafiq qərarı ilə icazə verilmir. Bu da bazara böyük təsir edir.

"Daşınmaz əmlakı idarə edənlər bu maklerlərdir. Fəaliyyətinə icazə olmadığı üçün bazar dayanıb. Ancaq bu durğunluq satış qiymətlərinə təsir etməyib, əksinə, həyət evi və torpaqların satış qiyməti artıb. Həyət və bağ evlərinin kirayə qiymətləri də artıb. Yeni tikilən kreditlə, ipoteka ilə satılan mənzil bazarında satış dayanmayıb. İpoteka ilə satılan mənzillərə bu gün də təlabat var", - deyən E.Fərzəliyev qeyd edib ki, əmlak bazarında durğunluğa digər səbəb isə koronavirus təhlükəsi ilə əmlak sahiblərinin alıcıları evlərinə buraxmamasıdır.

Ekspertin fikrincə, xaricdən alınan tikinti materiallarınn gətirilməsində yaranan çətinliklər qiymət artımına səbəb olur. Eyni zamanda bu tikinti materiallarının gətirildiyi ölkələrdə də pandemiya ilə əlaqədar qiymət artımı müşahidə edilir. Bu isə o deməkdir ki, tikinti materiallarının, torpaq sahələrinin qiyməti artdıqca tikiləcək mənzillərin də satış qiyməti artacaq. Bu sahədə qiymətlərdə enmə müşahidə edilmir.

E.Fərzəliyev qeyd edib ki, köhnə binalardakı mənzillərin qiymətinin saxlanıla bilməsi üçün yaxın zamanlarda söküntülər başlayacaq. Köhnələr söküləcək və yerində yeni binalar tikiləcək.

Ümumi vəziyyət isə belədir: Həyət və bağ evlərinin kirayə qiyməti artıb, amma şəhərdə olan bina evlərinə tələbat olmadığı üçün qiymətlər düşüb. Yeni tikilən binalarda bahalı mənzillərə də tələbat yoxdur. Çünki bu binalarda xarici tələbələr qalırdılar. Hazırda həmin tələbələr öz ölkələrinə qayıtdıqları üçün kirayə qiymətlərində enmələr var.

Bölgələrdə, turistik zonalarda evlərin qiymətində artımlar müşahidə edilir. Çünki şəhərdən çıxa bilən vətəndaşlar bölgələrə üz tuturlar və bu da tələbatı artırır.

Obyektlərin kirayə qiymətlərində də enmə var.

Ekspert deyir ki, bir çox fəaliyyət sahələrinə məhdudiyyət qoyulduğu üçün obyektlər bağlı qalır. Bəzi sahibkarlar obyektləri bağlayır, fəaliyyəti dayandırırlar. Bəziləri isə ümidlə pandemiyanın bitməsini gözləyirlər. Fəaliyyət göstərən obyektlər əsasən aptek və marketlərdir. Onlayn fəaliyyət göstərən bəzi mağazaların isə demək olar ki, daha obyektə ehtiyacı yoxdur.

Obyektlərə tələbat azaldıqca qiymətlər düşür. Bu, həmin obyektlərin satış qiymətinə də təsir edəcək.

Ekspertin fikrincə, postpandemiya dövründə belə hələ bir müddət əmlak bazarında durğunluq müşahidə ediləcək. Çünki əhalinin yenidən fəaliyyətə başlayıb, iqtisadi vəziyyəti formalaşdırması uzun zaman alacaq.

3313
Əlaqədar
Bunu da gördük: Paytaxtda kəskin ucuzlaşma
Müxtəlif ölkələrdə mənzil kirayələmək neçəyə başa gəlir
Avropa ölkəsi evləri bir avrodan satmağa başladı
Azərbaycanlılar niyə xaricdə mənzil almağa üstünlük verirlər
iPhone

Gömrük Komitəsi vətəndaşlara güzəştə getdi: Məcburi bəyanetmə dayandırıldı

59
(Yenilənib 16:26 30.09.2020)
"Smart Customs" tətbiqi ilə bəyan edilməyən mallar gömrük qanunvericiliyinin pozulmadığı təqdirdə daşıyıcı şirkətlər və poçt şöbələri vasitəsilə sahiblərinə çatdırılacaq.

BAKI, 30 sentyabr — Sputnik. Xaricdən sifariş edilən məhsulların ölkəyə gətirilməsi zamanı "Smart Customs" mobil tətbiqi vasitəsilə məcburi bəyanetmə müvəqqəti olaraq dayandırılıb.

Dövlət Gömrük Komitəsinin Mətbuat və ictimaiyyətlə əlaqələr idarəsindən Sputnik Azərbaycan-a bildirilib ki, mövcud vəziyyətlə əlaqədar internetdə yaranan məhdudiyyətlər beynəlxalq poçt göndərişləri və daşıyıcı şirkətlər vasitəsilə xaricdən edilən sifarişlərin "Smart customs" mobil tətbiqi ilə məcburi bəyan olunmasında müvəqqəti çətinliklər yaradıb.

Yaranmış vəziyyət nəzərə alınaraq, vətəndaşların bağlamalarını əldə etməsində problemlərin yaranmaması üçün xaricdən sifariş edilən məhsulların ölkəyə gətirilməsi zamanı "Smart Customs" mobil tətbiqi vasitəsilə məcburi bəyanetmə müvəqqəti olaraq dayandırılıb. "Smart Customs" tətbiqi ilə bəyan edilməyən mallar gömrük qanunvericiliyinin pozulmadığı təqdirdə daşıyıcı şirkətlər və poçt şöbələri vasitəsilə sahiblərinə çatdırılacaq.

59
Şimal axını-2 layihəsinin tikintisi

Amerika qazı Rusiya qazını əvəz edə biləcəkmi

63
(Yenilənib 20:53 29.09.2020)
ABŞ Avropaya öz maye qazını sataraq ilk növbədə cari deyil, perspektivli tədarüklər haqqında düşünür. Söhbət yeni mayeləşdirmə zavodlarından və onların zəmanətli müqavilələrlə təmin olunmasından gedir

BAKI, 29 sentyabr — Sputnik, Aleksandr Sobko. Son zamanlar "Şimal Axını 2" layihəsinin tikintisinin tamamlanması ilə bağlı problemlərin fonunda kütləvi informasiya vasitələrində tez-tez belə bir fikir səslənir: "Rusiyadan tədarük olmasa, Avropa Amerikanın bahalı maye qazı üçün həddindən çox pul ödəyəcək". Bu tezisin tənqidçiləri gülərək iddia edirlər: “Baxın, Amerikanın həmin maye qazı Avropanın qaz birjasında digər ölkələrin qazı ilə eyni qiymətdə (indi isə, ümumiyyətlə, çox aşağı qiymətlərlə) satılır”.

Kim haqlıdır? Həyat, həmişə olduğu kimi sadə sxemlərdən ibarət deyil. Gəlin hər şeyi aydınlaşdıraq.

Əvvəla xatırladaq ki, "Şimal Axını 2" ümumiyyətlə Ukrayna tranzitinin çox hissəsini əvəz etmək üçün tikilir və gələcəkdə Rusiya qazının ixracında əhəmiyyətli artım gözləmək lazım deyil. Ukraynadan tranzit üçün dörd il müddətinə (ildə 40 milyard kubmetr) ödəniş edilib. "Şimal Axını 2" isə 55 milyard kubmetr gücə malik olacaq. Yəni, bu mərhələdə "Şimal Axını 2"nin tikintisinin həmişəlik və ya qeyri-müəyyən müddətə dayandırılması yalnız "Qazprom"un maliyyə itkilərinə gətirib çıxaracaq.

ABŞ tərəfinin "Şimal Axını 2" üçün çətinliklər yaradaraq öz maye qazına yeni bazar əldə etməyi planlaşdırdığına dair tezis o deməkdir ki, bloklanmış "Şimal Axını 2"nin ardınca Ukrayna tranzitinin özü də dayanmalıdır.

Mülahizə aparmağa davam edək. Bu, Amerikanın maye qazına kömək edəcəkmi?

Birincisi, istənilən halda qaz (və maye qaz) bahalaşacaq – bazardan çıxarılacaq 50 milyard kubmetr qaz dünya ticarəti üçün kifayət qədər əhəmiyyətli həcmdir. Daha yüksək birja qiymətləri isə qaçılmaz olaraq Amerika maye qazının satışında rentabelliyin artmasına gətirib çıxaracaq.

İkincisi və ən əsası. Burada xatırlatmaq lazımdır ki, ABŞ cari maye qaz ixracı çərçivəsində istənilən halda mayeləşdirmə üçün zəmanət haqqını alır. Treyderlər aşağı qlobal kotirovkalardan əziyyət çəkir. Yəni, Birləşmiş Ştatların artıq tikilmiş zavodlardan maye qazın satışını hansısa şəkildə stimullaşdırmağa ehtiyacı yoxdur.

Daha vacibi isə yeni layihələrdən gələn maye qaz üzrə müqavilə bağlamaqdır. İdxalçıların Amerikadan maye qazı almadıqları, lakin mayeləşdirmə üçün məcburi rüsum ödədikləri bir vəziyyətdə kimisə müqavilə bağlamağa razı salmaq çətin olacaq. Reallaşmayan layihələr isə hələ çoxdur. Avropa bazarı burada faydalı olardı.

Əslində haqqında danışdığımız ziddiyyət elə bundan yaranır. Bəli, hazırda Amerika maye qazı istənilən digər ölkələrdən göndərilən qaz həcmləri kimi Avropada həqiqətən də aşağı qiymətlərlə satılır. Bazarda böhran var, məhsulları isə haradasa satmaq lazımdır, zavodlar artıq tikilib və treyderlər "mayeləşdir, ya da ödə" şərti ilə satınalma müqavilələri bağlayıblar.

Digər tərəfdən də Avropa başa düşməlidir ki, ucuz Amerika qazı artıqdır və başqa bir şəraitdə bu qaz adətən daha gəlirli olan Asiya bazarlarına gedəcək. Zəmanətli qaz tədarükü istəyirsiniz? Onda uzunmüddətli müqavilə bağlayın və daha çox ödəyin.

Digər tədarüklə müqayisədə Amerika maye qazı nə qədər baha olacaq?

Burada qeyd etmək lazımdır ki, hazırda qaz qiymətinin üç əsas formalaşma variantı mövcuddur: (1) spot qiyməti, (2) neftə bağlı qiymət və (3) Amerika maye qazı üçün ABŞ daxilində qazın qiymətinə əsaslanan və mayeləşmə haqqı əlavə olunmaqla təyin olunan qiymət.

Hesab edilir ki, bazar normaya qayıtsa, qazın birja qiyməti min kubmetrə təxminən 200 dollar təşkil edəcək. Neftin bir barelinin 50 dollar olacağı halda neftə bağlı qaz qiyməti də təxminən belə olacaq.

Bəs Amerika maye qazı hansı qiymətə göndəriləcək?

Onun qiyməti ABŞ daxilində qazın (dəyişkən) qiymətindən, mayeləşmə xərclərindən və Avropaya çatdırılma qiymətindən asılıdır.

Əgər 2013-cü ilin əvvəlində Amerika maye qazı digər ölkələrin qaz tədarükdən daha ucuz görünürdüsə, indiki şəraitdə indi o baha başa gəlir (o vaxt neft və spot bazarında maye qaz daha bahalı idi).

Daha bir sual. Avropa niyə məhz Amerikanın maye qazını almalıdır? Niyə Qətərdən və ya Rusiyadan yox? Üstəlik yaxın zamanlarda Qətər qazının bir hissəsi birja qiymətləri ilə satıla bilər. Ümumiyyətlə, Avropa mümkün defisiti istənilən qazla əvəz edə bilər.

Yekunlaşdıraq.

Birincisi. Rusiya qazının Amerika maye qazı ilə əvəzlənməsi yalnız iki şərtin eyni vaxtda yerinə yetirilməsi halında mümkündür: "Şimal Axını 2" layihəsinin bağlanması və Ukrayna tranzitinin dayandırılması. Bu halda Rusiya ixracının məhdudlaşdırılması bütün qaz bazarında qiymətləri artıracaq.

İkincisi. İstənilən halda, Amerika maye qazı bazarda digər qazlardan 10-30 faiz baha və hətta bəlkə də eyni qiymətə olacaq — hər şey Amerikanın daxili qaz qiymətlərindən asılıdır. Lakin ABŞ-dan maye qaz tədarükü üzrə uzunmüddətli müqavilələr bağlamaqla Avropa ABŞ-ın daxili qaz qiymətləri ilə bağlı bütün riskləri öz üzərinə götürür.

Öz növbəsində indi Avropada gördüyümüz ucuz Amerika (və digər ölkələrin) maye qazı bazarda qazın artıqlığının nəticəsidir: treyderlər onu sataraq Amerikadan maye qaz satınalmaları üzrə müqavilələrdən dəyən zərəri ən azı qismən kompensasiya etməyə çalışırlar.

Və sonuncusu. Avropaya öz maye qazını sataraq, ABŞ ilk növbədə cari deyil, perspektivli tədarüklər haqqında düşünür. Söhbət yeni mayeləşdirmə zavodlarından və onların zəmanətli müqavilələrlə təmin olunmasından gedir. Zavodların tikintisi təxminən dörd il çəkir və Ukrayna ilə qüvvədə olan tranzit müqaviləsi məhz bu vaxt bitəcək.

63
Vladimir Putin və Emmanuel Makron

Makron Putinə zəng edib: Qarabağda gedən hərbi əməliyyatlar pislənib

0
(Yenilənib 01:57 01.10.2020)
Rusiya və Fransa prezidentləri Dağlıq Qarabağ münaqişə bölgəsində vəziyyətin kəskin hal almasını pisləyiblər.

BAKI, 1 oktyabr — Sputnik. Rusiya Prezidenti Vladimir Putinlə Fransa Prezidenti Emmanuel Makron arasında telefon danışığı olub.

Sputnik Azərbaycan Kremlin mətbuat xidmətinə istinadla xəbər verir ki, söhbət zamanı dövlət başçıları Dağlıq Qarabağda, həmçinin Belarus Respublikasında yaranan son vəziyyəti müzakirə ediblər.

Telefon danışığı Fransa tərəfinin təşəbbüsü ilə baş tutub. Hər iki prezident Dağlıq Qarabağ münaqişə bölgəsində vəziyyətin kəskin hal almasını pisləyiblər. Onlar davam edən hərbi əməliyyatlardan narahatlıq keçirdiklərini ifadə ediblər.

0
Teqlər:
hərbi əməliyyatlar, Dağlıq Qarabağ bölgəsi, Dağlıq Qarabağ problemi, Dağlıq Qarabağ, Rusiya prezidenti Vladimir Putin, Fransa prezidenti Emmanuel Makron