Zərgərlik mağazası qarşısında kişi, arxiv şəkli

Qızıl açar hər qapını açar - Bu atalar sözünün qədər real olması əməldə yoxlanılacaq

891
(Yenilənib 20:06 19.02.2020)
Ekspert zərgərlik fəaliyyəti ilə məşğul olan sahibkarlara aşağı faizlə güzəştli kreditlərin verilməsini təklif edir.

Xalid Məmmədov, Sputnik Azərbaycan

BAKI, 19 fevral — Sputnik. Əgər zərgərlik məhsullarının istehsalı ilə məşğul olan sahibkarların ucuz maliyyə resurslarına çıxış imkanları artarsa, biz zərgərlik sektorunun potensialından daha geniş şəkildə istifadə edə bilərik.

Bu sözləri Sputnik Azərbaycan-a İqtisadiyyat naziri Mikayıl Cabbarovun "Azərbaycanda zərgərlik bazarının inkişaf perspektivləri: problemlər və imkanlar" mövzusunda sahibkarlarla keçirilən görüşdə Azərbaycanın qızıl istehsalı potensialına dair səsləndirdiyi fikirləri şərh edərkən iqtisadçı-ekspert Vüqar Bayramov deyib.

Oğru, arxiv şəkli
© Depositphotos / Photographee.eu

Qeyd edək ki, bu günlərdə "Azərbaycanda zərgərlik bazarının perspektivləri: problemlər və imkanlar" mövzusunda sahibkarlarla görüş keçirilib. Görüşdə çıxış edən İqtisadiyyat naziri Mikayıl Cabbarov ölkəmizdə qeyri-neft sektorunun davamlı və sürətli inkişafının dövlət başçısı tərəfindən qarşıya qoyulan əsas vəzifələrdən olduğunu vurğulayıb. Dağ-mədən sənayesinin inkişafının ölkə iqtisadiyyatının şaxələndirilməsinin mühüm istiqamətlərindən olduğunu qeyd edib, bu sahədə dəyər zəncirinin yaradılması perspektivlərini diqqətə çatdırıb.

Nazir həmçinin zərgərlik sənayesində islahatların aparılmasının və əlverişli coğrafi mövqeyə, müasir nəqliyyat-logistika infrastrukturuna malik ölkəmizin bu sahədə regional mərkəzə çevrilməsinin əsas hədəflərdən biri olduğunu bildirib. O, beynəlxalq təcrübədən geniş istifadənin, stimullaşdırıcı tədbirlərin, şəffaf tənzimləmə siyasətinin həyata keçirilməsinin zərgərlik sənayesinin inkişafında, kölgə iqtisadiyyatının daha da azalmasında əhəmiyyətli olacağını vurğulayıb.

Vüqar Bayramov isə ölkəmizdə zərgərlik sektorunun potensialının olduğunu vurğulayaraq deyib ki, hətta sovet dövründə Azərbaycanda zərgərliklə bağlı xüsusi müəssisələr fəaliyyət göstərib. Sonrakı dövrdə isə bu müəssisələr özəlləşdirilib və SSRİ dağıldıqdan sonra ölkədə zərgərlik sektorunun potensialından istifadə olunmayıb.

"Zərgərlik yerli istehsalın genişləndirilməsi baxımından vacib sektordur. Azərbaycan qızıl hasil edən ölkələrdən biridir. 2019-cu ildə Azərbaycanda qızıl pomidordan sonra ən çox ixrac etdiyimiz qeyri-neft məhsulu olub. Ölkəmiz təxminən 140 milyon dollar dəyərində qızıl ixrac edib. Bu isə zərgərliyin həm də ixrac imkanlarına malik olduğunu göstərir. Qızıl daha çox külçə formasında ölkəyə idxal edilir, ona vergi və rüsumlar tətbiq olunur. Bu, daxili bazarın qorunması baxımdan da vacib faktorlardan biridir", - deyə ekspert bildirib.

Həbs edilmiş şəxs, arxiv şəkli
© Sputnik / Anar Mustafayev

Azərbaycanda zərgərlik məhsullarına tələbin yüksək olduğunu deyən Bayramov qeyd edib ki, ölkəmizin adambaşına düşən zərgərlik məhsullarının istehlakına görə regionun öndə gedənlərindən biridir. Ona görə də, bu sektorda islahatların davam etdirilməsi və xüsusən də, zərgərlik məhsullarının istehsalı ilə məşğul olan sahibkarların təşviq edilməsinə ehtiyac var.

"Burada vergi yükü yüksək deyil. Son illər Vergi Məcəlləsinə edilən dəyişikliklərdən sonra ölkədə vergi yükünün kəskin azalması müşahidə olunur. Digər tərəfdən, qeyri-leqal sektorun leqallaşdırılması da zərgərlik sektorunun inkişafına stimul yaradıb. Çünki əvvəlki dövrlərdə ölkəyə idxal edilən zərgərlik məhsullarının bir qismi qeydiyyatdan keçmirdi və 2018-ci ilədək bunu müşahidə etmişik. Nəticədə bu, daxili bazarda rəqabətin pozulmasına gətirib çıxarırdı. Artıq bu halların qarşısı ciddi şəkildə alınıb. Qeyri-leqal sektorun və eləcə də qeyri-leqal idxalın leqallaşması prosesi gedib. Bu da sektorun inkişafını stimullaşdıran faktorlardan biridir", - ekspert deyib.

İqtisadçı zərgərlik fəaliyyəti ilə məşğul olan sahibkarlara aşağı faizli, güzəştli kreditlərin verilməsini təklif edib:

"Zərgərlik maliyyə tutumlu sektordur. Xammalın bir qismi idxal olunur və bu da vəsait tələb edir. Bu sahədə çalışan sahibkarların təşviq edilməsi üçün onlara aşağı faizli kreditlərin təklif edilməsi daha məqsədəuyğun olar. Mövcud vergi islahatları fonunda daha məqsədəuyğun olardı ki, bu sahədə çalışan sahibkarlar məhz güzəştli kreditlərdən daha çox istifadə etmək imkanları qazansınlar, bu yolla təşviq edilsinlər. Əgər onların ucuz maliyyə resurslarına çıxış imkanları artarsa, biz zərgərlik sektorunun potensialından daha geniş şəkildə istifadə edə bilərik".

Onu da qeyd edək ki, İqtisadiyyat naziri Mikayıl Cabbarov "Azərbaycanda zərgərlik bazarının inkişaf perspektivləri: problemlər və imkanlar" mövzusunda sahibkarlarla keçirilən görüşdə sahibkarların işinin asanlaşdırılması istiqamətində assosiasiyanın yaradılmasının xüsusi əhəmiyyətindən də danışıb. Qeyd edib ki, zərgərlik sahəsində çətinlikləri müəyyən etmək üçün qısa müddət ərzində ixtisaslaşmış assosiasiyanın yaradılması təqdirəlayiqdir. Bununla yanaşı, zərgərlik sahəsində fəaliyyət göstərən sahibkarlardan və hökumət nümayəndələrindən ibarət İşçi Qrupunun yaradılması təklif edilir.

"Son illər ölkəmiz qızıl hasilatı sahəsində mühüm nailiyyətlər əldə edib. Regionlarda qızıl istehsalı ilə yanaşı, digər qiymətli metalların da istehsal potensialı böyükdür. Zərgərlik sənayesinin daha da inkişaf etdirilməsi üçün bu sahənin ciddi dəstəyə ehtiyacı var. Düşünürəm ki, stimullaşdırıcı amillərin artırılması zərgərlik sənayesinin inkişafında əhəmiyyətli ola bilər", - deyə nazir əlavə edib.

891
Neft buruqları, arxiv şəkli

Azərbaycan nefti kəskin bahalaşdı

32
(Yenilənib 11:00 28.10.2020)
"Brent" markalı neftin qiyməti isə 0,61 dollar geriləyərək 40,59 dollar, "Light" markalı neftin qiyməti 0,77 dollar ucuzlaşaraq 38,80 dollar olub

BAKI, 28 oktyabr — Sputnik. Azərbaycan neftinin qiyməti kəskin bahalaşıb.

Sputnik Azərbaycan xəbər verir ki, "Azeri Light" markalı neftin bir barelinin qiyməti 1,05 dollar artaraq 41,52 dollar təşkil edib.

"Brent" markalı neftin qiyməti 0,61 dollar geriləyərək 40,59 dollar, "Light" markalı neftin qiyməti isə 0,77 dollar ucuzlaşaraq 38,80 dollar olub.

Qeyd edək ki, Azərbaycan neftinin bir barelinin qiyməti bu il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

32
Kompüter arxasında iş, arxiv şəkli

Sən "fəhlə" ol, səni tapacaq: Müharibə hansı sahələrdə kadrlara tələbat yaradıb?

189
(Yenilənib 00:17 28.10.2020)
"Ölkəmizdə hərbi vəziyyətlə bağlı nə Təhsil Nazirliyinə, nə də ki Peşə Təhsili üzrə Dövlət Agentliyinə kadr hazırlığı ilə bağlı istək daxil olub"

Zülfiyyə Quluyeva, Sputnik Azərbaycan

BAKI, 28 oktyabr — Sputnik. Ölkəmizdə müharibə vəziyyəti bəzi sahələr üzrə ixtisaslı kadrların hazırlanması məsələsini gündəmə gətirib. "Facebook" sosial şəbəkəsində son günlər orduda müəyyən ixtisaslar üzrə hazırlıqlı kadrların işə qəbulu ilə bağlı məlumatlar paylaşılır. Sputnik Azərbaycan hərbi vəziyyətdə hansı peşələr üzrə ixtisaslı kadrlara daha çox tələbat olduğunu araşdırıb.

Azərbaycan İnternet Forumunun prezidenti Osman Gündüz bildirib ki, Azərbaycanda "İnsansız Hava Vasitələri (IHV) mühəndisi" ixtisası üzrə kadrların hazırlanması vacibdir: "Hərbi dronların, yəni pilotsuz uçan aparatların müxtəlif növləri var. Kəşfiyyat-müşahidə dronu, silahdaşıyan dron, kamikadze dron və s. Dronların hamısı ya yerdən, ya da təyyarədən, dronla əlaqəli idarəetmə mərkəzindən idarə olunur.

Son zamanlar kommersiya dronları da ciddi olaraq gündəmə gəlib. Yəni müxtəlif yükləri hansısa ünvana çatdıran, xidmət göstərən dronlara böyük investisiyalar yatırılır. Dronları idarə etmək üçün peyk və kosmik texnologiyalara, İKT-yə əsaslanan mərkəz qurulur. Monitor arxasında oturan operatorlar idarəetmə mərkəzindən 150-300 km məsafədə uçan dronu idarə edərək qarşıya qoyulan vəzifəni yerinə yetirməlidirlər. Əgər kamikadze dron deyilsə, onu geri, bazaya da qaytarmalıdır.

Artıq dron əleyhinə texnologiyalar yaranmağa başladığından dronu qorumaq da ciddi bir problemə çevrilib. Həm də hərbi dronlardan sürü halında istifadə etdikdə daha böyük effekt verir. Türkiyə tərəfindən sürü halında istifadə olunan dronlar Suriya və Liviya müharibəsində hədsiz böyük uğur qazanıb. Xarici ekspertlər artıq indidən yazırlar ki, Azərbaycanın apardığı Vətən Müharibəsi də mahiyyətcə "dron müharibəsidir". Azərbaycan tərəfindən istifadə olunan dronların düşmənin yüzlərlə hərbi texnikasını, tanklarını və zenit qurğularını, hətta ballistik raketlərini məhv etməsi xarici mətbuatın diqqət mərkəzində olan mövzudur. Düşünürəm ki, ən yaxın zamanlarda bizdə dronlarla əlaqəli çox sayda mütəxəssislərə ciddi ehtiyac yaranacaq".

O.Gündüz bildirir ki, hazırda ölkəmizdə, Müdafiə Sənayesi sistemində və AMEA Yüksək Texnologiyalar parkında hərbi və ya kommersiya yönümlü müxtəlif dronlar istehsal olunur: "Dronların hazırlanması və idarə olunması üzrə mütəxəssisləri necə hazırlaya bilərik? Bu sahədə həm elektron mühəndislərə və həm də dronları idarə edən "Dron operatoru" və ya "Dron pilotu"na ehtiyac yaranacaq. Beynəlxalq təcrübəyə nəzər salanda görmək olar ki, dünyanın bir çox universitetləri artıq bu istiqamətdə kadrlar hazırlayır. Fikrimcə, Azərbaycan Texniki Universiteti və Milli Aviasiya Akademiyası bu sahənin inkişafına ciddi töhfələr verə bilər. Bildiyim qədər, artıq AzTU-da bu istiqamətdə ciddi işlər aparılır. AzTU-da bir neçə ildir ki, müxtəlif hərbi ixtisaslar üzrə ayrıca bölmə var. Müdafiə Sənayesi üzrə dövlət qurumu ilə birgə fəaliyyət göstərirlər və hərbi sahə üzrə mütəxəssislər hazırlayırlar. AzTU nəzdində iki kollec də var. Rabitə və Texniki yönümlü bu kolleclərdə növbəti ildən dron sahəsi üzrə operatorların hazırlanması istiqamətində işlərə başlandığı bildirilir. Düşünürəm ki, ciddi resurslara malik Milli Aviasiya Akademiyası da bu sahədə mütəxəssislərin yetişdirilməsinə və ümumiyyətlə bu sahənin inkişafına böyük töhfələr verə bilər".

Peşə Təhsili üzrə Dövlət Agentliyinin Hüquq, insan resursları və informasiya şöbəsinin müdiri vəzifəsini icra edən Ceyran Məmmədli Sputnik Azərbaycan-a açıqlamasında bildirib ki, yeni ixtisaslara tələbin qarşılanması müvafiq müraciət əsasında həyata keçirilir:

"Peşə Təhsili üzrə Dövlət Agentliyi yeni ixtisası öz-özünə açmır. Bunun üçün işəgötürənlər tərəfindən müvafiq məlumat təqdim edilməlidir. Çünki növbəti mərhələdə o kadrların işlə təmin olunması məsələsi gəlir. Digər yeni ixtisaslara gəlincə, bu, həm özəl, həmçinin də dövlətin marağı və təklifi əsasında formalaşan ixtisaslar ola bilər. Amma ölkəmizdə hərbi vəziyyətlə bağlı nə Təhsil Nazirliyinə, nə də Peşə Təhsili üzrə Dövlət Agentliyinə kadr hazırlığı ilə bağlı istək daxil olub".

Qeyd edək ki, müharibə dövründə ordumuz Ermənistan Silahlı Qüvvələrinin xeyli sayda hərbi texnikasını qənimət kimi əldə edib. İstər həmin texnikaların, istər də ordmuzun istifadə etdiyi hərbi texnikaların saz vəziyyətdə saxlanılması bu sahə üzrə ixtisaslı ustalara tələbatı artırır.

C.Məmmədli bildirir ki, hazırda aşpaz peşəsindən sonra avtomobil təmiri və çilingər sahəsi üzrə kadr hazırlığı ən çox maraq olan ixtisaslardır. O, hazırda bu ixtisaslar üzrə kadr hazırlığı aparıldığını söyləyir.

Vətəndaşların Əmək Hüquqlarının Müdafiəsi Liqasının sədri Sahib Məmmədov isə Sputnik Azərbaycan-a bildirib ki, Azərbaycanın Ali Baş Komandanının zəkası və peşəkarlığı sayəsində bu gün hərbi sahədə arxa cəbhədə belə mütəxəssis qıtlığı müşahidə olunmur: "Azərbaycan 27 ildir ki, müharibə vəziyyətində olan ölkədir. Bizim ölkəmizdə uzun illərdir ki, arxa cəbhədə texnikaların təmiri, eləcə də müvafiq hərbi texnikaların idarəolunması üzrə kadrlar hazırlanıb. Odur ki, hazırda bu sahələrdə kadr problemi yaşanmır. Əgər hansısa yeni ixtisasların hazırlanmasına ehtiyac olarsa, Azərbaycanda müxtəlif profilli ali və peşə təhsili müəssisələri var. Həmin müəssisələr ehtiyac olan sahələr üzrə kadr hazırlamaq gücündədir".

189
Teqlər:
Ermənistan-Azərbaycan, Dağlıq Qarabağ münaqişəsi, hərbi, operator, dron, peşə, müharibə
Əlaqədar
Ermənistanın "vurduğu" Azərbaycan PUA-sı "kukuruznik" çıxdı
Müdafiə Sənayesi Nazirliyi "İti qovan" PUA-larının istehsalını davam etdirir
Ekspert: ““Ali təhsil haqqında” qanun keyfiyyətin artmasına xidmət edəcək”
Azərbaycanın endirdiyi PUA-nı Ermənistan ordusuna PKK verib?
Casus sizə düşündüyünüzdən daha yaxın, ondan qurtulmağın yolu isə çox asandır
Körpə

Hərbi əməliyyatlar gedən müddətdə doğulan oğlanlara qoyulan adlar açıqlandı

0
(Yenilənib 18:55 28.10.2020)
Bir ay ərzində 41 oğlana Yusif, 41 oğlana Əli, 36 oğlana Uğur adı verilib, qız adlarında isə ilk yerlərdə Zəhra, Aylin, Məryəm yer alıb.

BAKI, 28 oktyabr — Sputnik. Son bir ayda, yəni Ermənistan-Azərbaycan arasında Dağlıq Qarabağ münaqişəsinin daha da gərginləşdiyi bir dövrdə dünyaya gələn körpələrə qoyulan adlar açıqlanıb. Ədliyyə Nazirliyindən Sputnik Azərbqaycan-a bildirilib ki, 27 sentyabrdan 27 oktyabradək Azərbaycanda 2353 uşaq dünyaya gəlib ki, onlardan 1282 nəfəri oğlan, 1071 nəfəri qız olub. Bu müddət ərzində doğulan əkiz uşaqların sayı 28 olub.

Nazirliyin məlumatına görə, bir ay ərzində 41 oğlana Yusif, 41 oğlana Əli, 36 oğlana Uğur adı verilib.

Qız adlarında isə ilk yerlərdə Zəhra, Aylin, Məryəm adları yer alıb.

0