Minik avtomobili ilə ot daşıyan şəxs

Bazarın dəbə düşən bəlası: otun qiyməti qalxdısa, ətdən əlini üz - FOTO

727
(Yenilənib 16:56 09.09.2019)
"Bir az da artım olsa, məcburuq bütün mal-qaranı dəyər-dəyməzinə sataq"

İlham Mustafa, Sputnik Azərbaycan

BAKI, 9 sentyabr — Sputnik. Qərb bölgəsində mal-qaranın əsas qidasını təşkil edən quru ot bahalaşıb. Sputnik Azərbaycan-ın bölgə müxbirinin məlumatına görə, ötən illərlə müqayisədə ot bağlamasının qiymətində 1 manat artım müşahidə edilir. Belə ki, ən qidalı ot hesab edilən yonca bağlamasının qiyməti 4-6, təbii ot 3-4, ən zəif tərkib hesab edilən saman bağlaması isə 1,5-2 manat aralığında dəyişir. Təsərrüfat sahibləri bahalaşmanın davam etməsindən narahatdırlar.

Otun qiymətləri ilə yerində tanış olmaq üçün Sputnik Azərbaycan-ın bölgə müxbiri Tovuz rayonunda yerləşən ot bazarında olub. Qiymətlər və bahalaşmanın səbəbləri ilə maraqlanıb. Müxbirimizin suallarını cavablandıran bazar əhli bir qayda olaraq qiymət artımını yaz-yay mövsümlərində yaşanan quraqlıqla əlaqələndiriblər.

Tovuz rayonunda yerləşən ot bazarı
© Sputnik / Ilham Mustafa
Tovuz rayonunda yerləşən ot bazarı

Ot satışı ilə məşğul olan Tovuz rayon sakini Füzuli Sadıqov ötən illərlə müqayisədə ot və yonca bağlamalarında 1 manatlıq artımın olduğunu deyib.

"Ötən illə müqayisədə bu il bahalaşma var. Keçən il yonca bağını 3-5 manata satırdıq, indi 4-6 manata satırıq. Təbii ot 3-4 manat arasıdır. Səbəb odur ki, bu il yağış yağmadı. Nəticədə bir biçim ot gecikdi. Keçən il bu vaxt 4-cü çalım çalınırdı, amma indi 3-cü, elə yerlər var, hələ 2-ci biçin edilir. Artıq soyuqlar da düşür, uzağı, bir biçim ot biçilər", - deyə F.Sadıqov məlumat verib.

Tovuz rayon sakini Füzuli Sadıqov
© Sputnik / Ilham Mustafa
Tovuz rayon sakini Füzuli Sadıqov

Digər satıcı Taleh Məmmədov satdıqlarının içərisində ən ucuzunun saman bağlaması olduğunu deyib: "Sahələrdən baha alırıq. Ot qıtlıq oldu deyə yer sahibləri qiyməti qaldırıblar. 1 yonca bağlaması fermerə 1,5 manata başa gəlir. Hektarını 25 manata traktor biçir, 15 manata dırmıqlanır. Aqreqat isə birini 25-30 qəpiyə bağlayır. Bir hektardan 150-250 bağlama çıxır. Biz də alanda 30 qəpik fəhləyə doldurub-boşaltmaq haqqı veririk. Yanacaq yandırırıq. Məsafəsindən asılı olaraq aparıb 50 qəpik, 1 manat bahasına satırıq".

T.Məmmədovun sözlərinə görə, otun 1, yaxud 10 manat olmasından asılı olmayaraq satıcılara oradan 50 qəpik qalır ki, onun 30-u fəhlənin, 20-si isə özlərinin olur.

 Satıcı Taleh Məmmədov
© Sputnik / Ilham Mustafa
Satıcı Taleh Məmmədov

Bərdədən gələn satıcı Ramin Quliyev isə alıcı qıtlığından gileylənib: "İki gündür 500 təbii ot bağlaması gətirmişəm. Amma alıcı yoxdur. Gələnlər üstünlüyü qida dəyəri daha artıq olan yoncaya verir. Düzdür, qiymət ucuz olsa da, təbii ot yaxşı alınmır".

Şəmkirdən ot almağa gələn Eldəniz Nəsibov isə qiymətlərin daha da artacağından narahatdır.

Otla dolu yük avtomobili
© Sputnik / Ilham Mustafa
Otla dolu yük avtomobili

"Zəyəm Cırdaxan kəndindən gəlmişəm. Torpağımız yoxdur əkib-biçməyə. Ona görə otu yalnız pulla alırıq. Bir bağ otun ağırlığı təxminən 25-30 kiloqram olur. Günə 1 bağlama yedirəndə inəyi qışdan çıxarmaq üçün 250 bağlama ot almalıyam ki, o da 1000-1200 manat edir. Bir az da artım olsa, məcburuq bütün mal-qaranı dəyər-dəyməzinə sataq", - deyə alıcı vəziyyət haqda danışıb.

Son günlər ətin qiymətində də 1 manat bahalaşmanın olduğunu bildirən müsahiblər bu gedişlə yeni bahalaşmanın olacağını istisna etmirlər.

727
Teqlər:
bazar, bahalaşma, ət, heyvandarlıq, mal-qara, ot
Əlaqədar
İqlim dəyişikliyi Azərbaycanı da "vurdu": insanlar üzərində də stres amili güclənib
Pul bizim, toxum onların, torpaq bizim, məhsul onların – Sonra da “bahadır” deyirik
Qiymətlər ucuz, alıcı yox, səbəblər isə fərqli
Ölkənin altı milyon əhalisi təhlükə ilə üz-üzədir
Şəkidə fermerlər üçün unikal imkan: toxum emalını onlayn rejimdə izləyəcəklər
Neft buruqları, arxiv şəkli

Azərbaycan nefti kəskin bahalaşdı

32
(Yenilənib 11:00 28.10.2020)
"Brent" markalı neftin qiyməti isə 0,61 dollar geriləyərək 40,59 dollar, "Light" markalı neftin qiyməti 0,77 dollar ucuzlaşaraq 38,80 dollar olub

BAKI, 28 oktyabr — Sputnik. Azərbaycan neftinin qiyməti kəskin bahalaşıb.

Sputnik Azərbaycan xəbər verir ki, "Azeri Light" markalı neftin bir barelinin qiyməti 1,05 dollar artaraq 41,52 dollar təşkil edib.

"Brent" markalı neftin qiyməti 0,61 dollar geriləyərək 40,59 dollar, "Light" markalı neftin qiyməti isə 0,77 dollar ucuzlaşaraq 38,80 dollar olub.

Qeyd edək ki, Azərbaycan neftinin bir barelinin qiyməti bu il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

32
Kompüter arxasında iş, arxiv şəkli

Sən "fəhlə" ol, səni tapacaq: Müharibə hansı sahələrdə kadrlara tələbat yaradıb?

189
(Yenilənib 00:17 28.10.2020)
"Ölkəmizdə hərbi vəziyyətlə bağlı nə Təhsil Nazirliyinə, nə də ki Peşə Təhsili üzrə Dövlət Agentliyinə kadr hazırlığı ilə bağlı istək daxil olub"

Zülfiyyə Quluyeva, Sputnik Azərbaycan

BAKI, 28 oktyabr — Sputnik. Ölkəmizdə müharibə vəziyyəti bəzi sahələr üzrə ixtisaslı kadrların hazırlanması məsələsini gündəmə gətirib. "Facebook" sosial şəbəkəsində son günlər orduda müəyyən ixtisaslar üzrə hazırlıqlı kadrların işə qəbulu ilə bağlı məlumatlar paylaşılır. Sputnik Azərbaycan hərbi vəziyyətdə hansı peşələr üzrə ixtisaslı kadrlara daha çox tələbat olduğunu araşdırıb.

Azərbaycan İnternet Forumunun prezidenti Osman Gündüz bildirib ki, Azərbaycanda "İnsansız Hava Vasitələri (IHV) mühəndisi" ixtisası üzrə kadrların hazırlanması vacibdir: "Hərbi dronların, yəni pilotsuz uçan aparatların müxtəlif növləri var. Kəşfiyyat-müşahidə dronu, silahdaşıyan dron, kamikadze dron və s. Dronların hamısı ya yerdən, ya da təyyarədən, dronla əlaqəli idarəetmə mərkəzindən idarə olunur.

Son zamanlar kommersiya dronları da ciddi olaraq gündəmə gəlib. Yəni müxtəlif yükləri hansısa ünvana çatdıran, xidmət göstərən dronlara böyük investisiyalar yatırılır. Dronları idarə etmək üçün peyk və kosmik texnologiyalara, İKT-yə əsaslanan mərkəz qurulur. Monitor arxasında oturan operatorlar idarəetmə mərkəzindən 150-300 km məsafədə uçan dronu idarə edərək qarşıya qoyulan vəzifəni yerinə yetirməlidirlər. Əgər kamikadze dron deyilsə, onu geri, bazaya da qaytarmalıdır.

Artıq dron əleyhinə texnologiyalar yaranmağa başladığından dronu qorumaq da ciddi bir problemə çevrilib. Həm də hərbi dronlardan sürü halında istifadə etdikdə daha böyük effekt verir. Türkiyə tərəfindən sürü halında istifadə olunan dronlar Suriya və Liviya müharibəsində hədsiz böyük uğur qazanıb. Xarici ekspertlər artıq indidən yazırlar ki, Azərbaycanın apardığı Vətən Müharibəsi də mahiyyətcə "dron müharibəsidir". Azərbaycan tərəfindən istifadə olunan dronların düşmənin yüzlərlə hərbi texnikasını, tanklarını və zenit qurğularını, hətta ballistik raketlərini məhv etməsi xarici mətbuatın diqqət mərkəzində olan mövzudur. Düşünürəm ki, ən yaxın zamanlarda bizdə dronlarla əlaqəli çox sayda mütəxəssislərə ciddi ehtiyac yaranacaq".

O.Gündüz bildirir ki, hazırda ölkəmizdə, Müdafiə Sənayesi sistemində və AMEA Yüksək Texnologiyalar parkında hərbi və ya kommersiya yönümlü müxtəlif dronlar istehsal olunur: "Dronların hazırlanması və idarə olunması üzrə mütəxəssisləri necə hazırlaya bilərik? Bu sahədə həm elektron mühəndislərə və həm də dronları idarə edən "Dron operatoru" və ya "Dron pilotu"na ehtiyac yaranacaq. Beynəlxalq təcrübəyə nəzər salanda görmək olar ki, dünyanın bir çox universitetləri artıq bu istiqamətdə kadrlar hazırlayır. Fikrimcə, Azərbaycan Texniki Universiteti və Milli Aviasiya Akademiyası bu sahənin inkişafına ciddi töhfələr verə bilər. Bildiyim qədər, artıq AzTU-da bu istiqamətdə ciddi işlər aparılır. AzTU-da bir neçə ildir ki, müxtəlif hərbi ixtisaslar üzrə ayrıca bölmə var. Müdafiə Sənayesi üzrə dövlət qurumu ilə birgə fəaliyyət göstərirlər və hərbi sahə üzrə mütəxəssislər hazırlayırlar. AzTU nəzdində iki kollec də var. Rabitə və Texniki yönümlü bu kolleclərdə növbəti ildən dron sahəsi üzrə operatorların hazırlanması istiqamətində işlərə başlandığı bildirilir. Düşünürəm ki, ciddi resurslara malik Milli Aviasiya Akademiyası da bu sahədə mütəxəssislərin yetişdirilməsinə və ümumiyyətlə bu sahənin inkişafına böyük töhfələr verə bilər".

Peşə Təhsili üzrə Dövlət Agentliyinin Hüquq, insan resursları və informasiya şöbəsinin müdiri vəzifəsini icra edən Ceyran Məmmədli Sputnik Azərbaycan-a açıqlamasında bildirib ki, yeni ixtisaslara tələbin qarşılanması müvafiq müraciət əsasında həyata keçirilir:

"Peşə Təhsili üzrə Dövlət Agentliyi yeni ixtisası öz-özünə açmır. Bunun üçün işəgötürənlər tərəfindən müvafiq məlumat təqdim edilməlidir. Çünki növbəti mərhələdə o kadrların işlə təmin olunması məsələsi gəlir. Digər yeni ixtisaslara gəlincə, bu, həm özəl, həmçinin də dövlətin marağı və təklifi əsasında formalaşan ixtisaslar ola bilər. Amma ölkəmizdə hərbi vəziyyətlə bağlı nə Təhsil Nazirliyinə, nə də Peşə Təhsili üzrə Dövlət Agentliyinə kadr hazırlığı ilə bağlı istək daxil olub".

Qeyd edək ki, müharibə dövründə ordumuz Ermənistan Silahlı Qüvvələrinin xeyli sayda hərbi texnikasını qənimət kimi əldə edib. İstər həmin texnikaların, istər də ordmuzun istifadə etdiyi hərbi texnikaların saz vəziyyətdə saxlanılması bu sahə üzrə ixtisaslı ustalara tələbatı artırır.

C.Məmmədli bildirir ki, hazırda aşpaz peşəsindən sonra avtomobil təmiri və çilingər sahəsi üzrə kadr hazırlığı ən çox maraq olan ixtisaslardır. O, hazırda bu ixtisaslar üzrə kadr hazırlığı aparıldığını söyləyir.

Vətəndaşların Əmək Hüquqlarının Müdafiəsi Liqasının sədri Sahib Məmmədov isə Sputnik Azərbaycan-a bildirib ki, Azərbaycanın Ali Baş Komandanının zəkası və peşəkarlığı sayəsində bu gün hərbi sahədə arxa cəbhədə belə mütəxəssis qıtlığı müşahidə olunmur: "Azərbaycan 27 ildir ki, müharibə vəziyyətində olan ölkədir. Bizim ölkəmizdə uzun illərdir ki, arxa cəbhədə texnikaların təmiri, eləcə də müvafiq hərbi texnikaların idarəolunması üzrə kadrlar hazırlanıb. Odur ki, hazırda bu sahələrdə kadr problemi yaşanmır. Əgər hansısa yeni ixtisasların hazırlanmasına ehtiyac olarsa, Azərbaycanda müxtəlif profilli ali və peşə təhsili müəssisələri var. Həmin müəssisələr ehtiyac olan sahələr üzrə kadr hazırlamaq gücündədir".

189
Teqlər:
Ermənistan-Azərbaycan, Dağlıq Qarabağ münaqişəsi, hərbi, operator, dron, peşə, müharibə
Əlaqədar
Ermənistanın "vurduğu" Azərbaycan PUA-sı "kukuruznik" çıxdı
Müdafiə Sənayesi Nazirliyi "İti qovan" PUA-larının istehsalını davam etdirir
Ekspert: ““Ali təhsil haqqında” qanun keyfiyyətin artmasına xidmət edəcək”
Azərbaycanın endirdiyi PUA-nı Ermənistan ordusuna PKK verib?
Casus sizə düşündüyünüzdən daha yaxın, ondan qurtulmağın yolu isə çox asandır
Körpə

Hərbi əməliyyatlar gedən müddətdə doğulan oğlanlara qoyulan adlar açıqlandı

0
(Yenilənib 18:55 28.10.2020)
Bir ay ərzində 41 oğlana Yusif, 41 oğlana Əli, 36 oğlana Uğur adı verilib, qız adlarında isə ilk yerlərdə Zəhra, Aylin, Məryəm yer alıb.

BAKI, 28 oktyabr — Sputnik. Son bir ayda, yəni Ermənistan-Azərbaycan arasında Dağlıq Qarabağ münaqişəsinin daha da gərginləşdiyi bir dövrdə dünyaya gələn körpələrə qoyulan adlar açıqlanıb. Ədliyyə Nazirliyindən Sputnik Azərbqaycan-a bildirilib ki, 27 sentyabrdan 27 oktyabradək Azərbaycanda 2353 uşaq dünyaya gəlib ki, onlardan 1282 nəfəri oğlan, 1071 nəfəri qız olub. Bu müddət ərzində doğulan əkiz uşaqların sayı 28 olub.

Nazirliyin məlumatına görə, bir ay ərzində 41 oğlana Yusif, 41 oğlana Əli, 36 oğlana Uğur adı verilib.

Qız adlarında isə ilk yerlərdə Zəhra, Aylin, Məryəm adları yer alıb.

0