Avtomobillərin idxalı, arxiv şəkli

Dörd təkər ilə şad xəbər gəlir - deməli, pullanmışıq...

483
(Yenilənib 15:04 01.09.2019)
"Hansısa bölgədə iqtisadi vəziyyət yaxşılaşırsa, yerli infrastrukturda xidmət göstərən nəqliyyat sektoruna bu öz təsirini göstərir və nəticədə nəqliyyata olan ehtiyac da artır"

Xalid Məmmədov, Sputnik Azərbaycan

BAKI, 1 senytabr — Sputnik. 2019-cu ilin yanvar-iyul aylarında Azərbaycana cəmi 22 min 974 ədəd müxtəlif təyinatlı nəqliyyat vasitəsi idxal olunub.

Sputnik Azərbaycan Dövlət Gömrük Komitəsinin aylıq hesabatına istinadən xəbər verir ki, bu, ötən ilin eyni dövrü ilə müqayisədə 11 min 274 ədəd və ya 1,96 dəfə çoxdur. 2019-cu ilin yanvar-iyul aylarında ölkəmizə 20 min 800 ədəd minik avtomobili, 139 ədəd avtobus, 1943 ədəd yük avtomobili və 92 ədəd xüsusi təyinatlı nəqliyyat vasitəsi idxal olunub.

Avtomobil idxalının artımı ilə bağlı nəqliyyat məsələləri üzrə ekspert Azər Allahverənov Sputnik Azərbaycan-a deyib ki, idxalda artımın müxtəlif səbəbləri ola bilər: "Amma ən böyük səbəb ölkəmizdə maliyyə bazarında sabitliyin təmin olunmasıdır. 2015-ci ildə baş verən devalvasiyaya qədər ölkəyə il ərzində təxminən 100 minədək avtomobil idxal olunurdu. Azərbaycanda baş verən devalvasiyalardan sonra banklar avtomobil kreditlərinin verilməsini dayandırdı. Bundan başqa, götürülən avtomobil kreditləri ilə bağlı borclar yarandı və bu da bankları çətin vəziyyətə salırdı. Nəticədə avtomobil satışı müxtəlif distribütorlar, avtosalonlar vasitəsilə həyata keçirilməyə başladı. İstehlakçılar ilə banklar arasında birbaşa əlaqə müəyyən müddətə dayandı".

"Amma maliyyə bazarında sabitlik təmin olunduqdan sonra banklar avtomobil kreditləri verməyə, istehlakçılar yenidən avtomobil kreditləri götürməyə başladılar. İdxalda artımın başlıca səbəbi istehlakçıların maliyyə imkanlarının genişlənməsi, əhalinin maddi rifahının yaxşılaşması ilə bağlıdır", - deyə ekspert bildirib.

Onun sözlərinə görə, avtomobil idxalının artımında digər dolayı amillər də rol oynaya bilər:

"Məsələn, yolların düzəldilməsi, turizmin inkişafı və s. Hansısa bölgədə iqtisadi vəziyyət yaxşılaşırsa, yerli infrastrukturda xidmət göstərən nəqliyyat sektoruna bu öz təsirini göstərir və nəticədə nəqliyyata olan ehtiyac da artır. Bunlar bir-biriləri ilə bağlı olan məsələlərdir, amma ikinci dərəcəli səbəblərdir. Bütün bunlar insanların yenidən avtomobil almağa başlamasına imkan verdi".

O bildirib ki, yerli avtomobil istehsalı kifayət qədər önəmlidir: "Amma burada vacib məsələ rəqabətə dözümlü avtomobilin istehsal edilməsidir. İnsanlar daha çox Yaponiya, Almaniya və Cənubi Koreya istehsalı olan avtomobillərə üstünlük verirlər.

 Bu da onu göstərir ki, hələlik bizim avtomobil bazarında sözügedən ölkələrin istehsalı olan avtomobillər hakim mövqeyini qoruyub saxlayır. Bizim yerli avtomobil istehsalı dözümlülük, təhlükəsizlik tələblərinə, uzun müddətli istismar olunma meyarlarına cavab versə, rəqabətə daha dözümlü olacaq. Nəticədə insanlar yerli istehsal olan avtomobillərə üstünlük verə bilərlər".

Qeyd edək ki, 2019-cu ilin yanvar-iyun aylarında Azərbaycanda 1112 minik avtomobili istehsal edilib. Dövlət Statistika Komitəsinin məlumatına görə, 6 ayda maşın və avadanlıqların, sair nəqliyyat vasitələrinin, avtomobil, qoşqu və yarımqoşquların istehsalı sahələrində 129,1 milyon manatlıq məhsul istehsal edilib. Ötən ilin müvafiq dövrü ilə müqayisədə avtomobil, qoşqu və yarımqoşquların istehsalı 83,6 faiz, maşın və avadanlıqların istehsalı 10 faiz, sair nəqliyyat vasitələrinin istehsalı isə 1,8 faiz artıb. Hesabat dövründə, həmçinin 747 traktor istehsal olunub.

483
Teqlər:
nəqliyyat vasitələri, avtonəqliyyat, gəlir, idxal, avtomobil
Əlaqədar
Vergilər Nazirliyindən maaşlarla bağlı maraqlı açıqlama - kim çox qazanır?
Azərbaycanda avtomobillərin qiymətləri süni olaraq qaldırılır
Əmək Müfəttişliyi məvaciblə bağlı işəgötürənlərə xəbərdarlıq etdi
Minimum əmək haqqının artması üçün stimul var - Nazir
Avtomobillərin artması problem yarada bilərmi - ekspert şərh edir
Pomidor satışı, arxiv şəkli

Artıq 126 müəssisədən Rusiyaya pomidor ixracına icazə verilib

140
(Yenilənib 13:20 14.05.2021)
AQTA mütəxəssisləri və "Rosselxoznadzor" əməkdaşlarının iştirakı ilə respublika üzrə fəaliyyət göstərən pomidor istehsalı müəssisələrində birgə videomonitorinqlər davam edir.

BAKI, 14 may - Sputnik. Azərbaycan Respublikasından Rusiya Federasiyasına ixrac olunan pomidor və alma məhsullarına tətbiq edilən məhdudiyyətlərin aradan qaldırılması istiqamətində Azərbaycan Respublikasının Qida Təhlükəsizliyi Agentliyi (AQTA) və aidiyyəti qurumların birgə tədbirləri davam etdirilir.

AQTA-dan verilən məlumata görə, həyata keçirilən birgə tədbirlər çərçivəsində Agentliyin mütəxəssisləri və Rusiya Dövlət Baytarlıq və Fitosanitar Nəzarət üzrə Federal Xidmətinin ("Rosselxoznadzor") əməkdaşlarının iştirakı ilə respublika ərazisi üzrə fəaliyyət göstərən pomidor istehsalı müəssisələrində birgə videomonitorinqlər davam etdirilir. Bununla yanaşı müəssisələrdə həyata keçirilən sağlamlaşdırıcı tədbirlər və aparılan araşdırmaların nəticələri ilə bağlı məlumatlar mütəmadi qaydada Rusiya tərəfinə təqdim olunur. Görülən işlərin məntiqi nəticəsi olaraq “Rosselxoznadzor" tərəfindən 14 may 2021-ci il tarixindən daha 30 pomidor istehsalı müəssisəsindən də bu ölkəyə pomidor ixracına icazə verilib.

Beləliklə, bu günə qədər ümumilikdə Rusiya Federasiyasının müvafiq qurumu tərəfindən 126 pomidor istehsalı müəssisəsindən Rusiyaya məhsul ixracına icazə verilib. Hazırda Rusiyaya pomidor ixracına icazə verilmiş müəssisələrin ixrac potensialı 288414 ton təşkil edir ki, bu da 2020-ci il ərzində Rusiyaya ixrac olunan pomidor məhsulunun 160,2 %-ni təşkil edir.

Həmçinin oxuyun:

Azərbaycanlı fermerlərə yol göründü: Rusiya ticarətə icazə verdi

Azərbaycanın daha 7 sahibkarına Rusiyaya pomidor ixracına icazə verildi

140
Vyanada OPEC-in mənzil-qərargahı, arxiv şəkli

ABŞ-dan OPEC-ə qarşı sərt addım - Neft bazarını gözləyir?

791
(Yenilənib 00:54 14.05.2021)
ABŞ Konqresinin Nümayəndələr Palatasının Hüquq komitəsi OPEC üzvü olan ölkələrə qarşı antiinhisarla bağlı məhkəmə iddialarına icazə verən qanunu təsdiqləyib. İqtisadçılar bunun neft bazarına təsirlərini şərh ediblər.

 

Xalid Məmmədov, Sputnik Azərbaycan

BAKI, 14 may — Sputnik. ABŞ Konqresinin Nümayəndələr Palatasının Hüquq komitəsi OPEC üzvü olan ölkələrə qarşı antiinhisarla bağlı məhkəmə iddialarına icazə verən qanun layihəsini təsdiqləyib. Bundan sonra layihəyə Nümayəndələr Palatası tərəfindən baxılmalıdır. Qanun layihəsi ABŞ Ədliyyə Nazirliyinə OPEC üzvü ölkələrinə qarşı antiinhisar iddialarını başlatmaq imkanı yaradır və ABŞ məhkəmələrinə bu kimi işlərə baxmaq səlahiyyətini verir. Layihə müəllifləri iddia edirlər ki, OPEC üzvləri qiymətlərə nəzarət məqsədilə xam neft istehsalını məhdudlaşdırmaq üçün qəsdən sövdələşir və xam neft qiymətlərini şişirdirlər.

Bəs ABŞ-da bu qanun layihəsi qüvvəyə minsə, bunun neft bazarına təsirləri necə olacaq?

Neft ucuzlaşa bilər

İqtisadçı Natiq Cəfərli Sputnik Azərbaycan-a deyib ki, onsuz da OPEC kartel sövdələşməsini gizlətmir: "Yəni kartel sövdələşməsi vasitəsilə qiymətlərə təsir mexanizmlərinin yaradılmasını OPEC özü də elan edir. İlk dəfə 2000-ci illərin əvvəllərində ABŞ-da məhkəmə qaydasında OPEC ilə bağlı qərar verilməsi cəhdi olmuşdu. Amma bununla bağlı qanun olmadığı üçün iddia ləğv edilmişdi. Bu qanun qəbul edilsə, iddiaların qaldırılması mümkün olsa, OPEC-in gələcək taleyi sual altına, şübhə altına düşəcək. Çünki digər sahələrdə kartel sövdələşmələri vasitəsilə qiymətlərin qaldırılması qadağandır. Dərhal antiinhisar qanunvericiliyi işə düşür, böyük cərimələr tətbiq edilir və ölkələr həmin şirkətləri çox ciddi cəzalandırırlar. Neft ilə bağlı OPEC təşkilatına bir az tolerant yanaşılırdı. Amma görünür, indi bununla bağlı yeni qanun layihələrinin qəbul edilməsi ehtimalı artır".

Onun fikrincə, burada əsas məsələ həm də bir presedent yaratmaqdır:

"Çünki digər sahələrin istehsalçıları da oxşar təşkilatlar yaratmağa cəhd göstərirdilər. Məsələn, bir müddət öncə qaz üzrə OPEC yaratmaq və yaxud əlvan metallar üzrə təşkilat yaratmaq cəhdləri olmuşdu. Düşünürəm ki, bu, gələcəkdə kartel sövdələşmələri vasitəsilə dünya bazarlarında qiymətlərə təsirinin olmaması üçün zəmin yaratmaq ideyasıdır".

"Bu qanun qəbul edilsə, neft qiymətlərinə təsiri necə olacaq?" sualına iqtisadçı belə cavab verib: "Bu addım atılarsa, neft qiymətləri daha çox tələb-təklif əsasında tənzimlənəcək. Amma OPEC hasilatı süni şəkildə azaltmasaydı, neftin qiyməti indiki 65 dollar səviyyəsində olmazdı. Yəni hasilatın həcmi süni şəkildə azaldıldı və qiymət qalxdı. Əgər indi OPEC belə qərarlar qəbul edə bilməsə, neft qiymətlərini əvvəllər olduğu kimi, tələb və təklif müəyyən edəcək. Bu da qiymətlərin ilkin mərhələdə ucuzlaşmasına səbəb ola bilər".

Avropa və Asiya bazarları uğrunda savaş

Azərbaycan Dövlət İqtisad Universitetinin dosenti Emin Qəribli isə Sputnik Azərbaycan-a deyib ki, son dövrlər ABŞ tərəfindən reallığa uyğun olmayan addımlar atılır: "Bu gün OPEC+ ölkələri neft bazarını tənzimləyir və bu, normaldır. Hazırda ABŞ neft məhsullarının ixracına görə ilk üçlüyə daxil olub. Əvvəllər ABŞ ancaq neft idxal edirdi, indi isə ən böyük neft ixracatçılarından birinə çevrilib. Ona görə ABŞ yeni bazarlar əldə etmək istəyir və belə yollara əl atır. ABŞ-ın addımı neft bazarına təsir edə və qiymətlər ucuzlaşa bilər. Lakin ABŞ-ın bu addımı normal deyil. Əksinə, ABŞ-ın özü süni yolla müdaxilə edib bazarı əldə etmək istəyir. Bu gün Avropa və Asiya bazarları uğrunda savaş gedir. ABŞ istəyir ki, OPEC hasilatı artırmasın və o, öz məhsullarını bazara çıxarsın. Yəni ABŞ bu təzyiq alətlərindən istifadə edərək OPEC+ ölkələrinə təsir etmək istəyir".

Eləcə də oxuyun:

ABŞ-da benzinin qiyməti 7 ilin rekordunu təzələdi

Qonşularımızdan neft məhsullarının ixracına qadağa - Azərbaycana təsiri necə olacaq?

Ehtiyatlar tükənib: Neftin gələcəyi ilə bağlı real proqnozlar

 

791
Teqlər:
ABŞ Konqresi, məhkəmə, qanun, ABŞ, OPEC, neft
Kosmos, arxiv şəkli

Alimlər Kainatın genişlənməsi haqqında yeni məlumatlar əldə ediblər

0
Alimlər hələ ki Kainatın genişlənmə sürətinin dəyişməsinə nəyin səbəb olduğunu bilmirlər. Ola bilsin ki, bunu izah etmək üçün kosmik miqyasda işləyən yeni fizika və ya onun modifikasiya olunmuş versiyanı yaratmaq lazım gələcək.

BAKI, 14 may - Sputnik. Astronomlar ifrat yeni ulduzların alışmasına dair kataloqdakı informasiyanı analiz ediblər və belə nəticəyə gəliblər ki, müşahidələrin məlumatları Kainatın dəyişən sürətlə genişlənməsi modelinə daha çox uyğundur. Tədqiqatın nəticələri ilə bağlı məqalə “Astrophysical Journal” nəşrində dərc edilməsi üçün hazırlanıb və “arXiv.org” preprint serverində yerləşdirilib.

Kainatın genişlənməsi sürəti kosmologiyanın vacib parametrlərindən biridir. Astrofiziklər adətən Habbl sabitindən çıxış edirlər. Lakin alimlər Kainatın genişlənməsi sürətini onun tarixinin müxtəlif dövrlərində müqayisə etməyə başlayanda müşahidələr nəzəri modellərlə tez-tez ziddiyyət təşkil edir.

AZƏRTAC bildirir ki, bu problemi həll etmək üçün Yaponiya Milli Astronomiya Rəsədxanasından və SOKENDAI perspektiv tədqiqatlar universitetindən Maria Ciovanna Dainottinin rəhbərliyi ilə Yaponiya və İtaliya alimləri Kainat tarixinin müxtəlif vaxtlarında partlamış 1048 yeni ulduzun kataloqunu analiz ediblər. Tədqiqatçılar bu məlumatlar əsasında rəqəmsal model qurublar. Onu düzgün təsvir etmək üçün müəlliflər zamandan asılı yeni dəyişən təqdim etməli olublar ki, Habbl sabiti zamanla dəyişəcəyi təqdirdə, onun qarşısını almaq mümkün olsun.

Müşahidələrdə sistematik səhv ehtimalını istisna etmək üçün tədqiqatçılar nəticələrini Havayda Mauna-Kea rəsədxanasında Yaponiya Milli Astronomiya Rəsədxanasının “Subaru” teleskopunda quraşdırılmış “Hyper Suprime-Cam” alətinin köməyilə ayrıca yoxlayıblar.

İfrat geniş görmə sahəsi olan bu 900-meqapiksel kamera ən böyük sahədə zəif yeni ulduzların müşahidəsi üçün nəzərdə tutulur. Tədqiqatçılar onun köməyilə erkən Kainatda müşahidə edilən ifrat yeni ulduzlar seçimini böyütməyə və məlumatlarda qeyri-müəyyənliyi azaltmağa nail olublar.

Alimlər hələ ki Kainatın genişlənmə sürətinin dəyişməsinə nəyin səbəb olduğunu bilmirlər. Ola bilsin ki, bunu izah etmək üçün kosmik miqyasda işləyən yeni fizika və ya onun modifikasiya olunmuş versiyanı yaratmaq lazım gələcək.

Tədqiqatçılar nəticələrini “Subaru” teleskopundan və digər rəsədxanalardan əldə olunmuş əlavə və ya daha keyfiyyətli məlumatların köməyilə təsdiq etmək məqsədilə müşahidələrini davam etdirməyi planlaşdırırlar.

0