Yanacaqdoldurma məntəqəsi

Azərbaycanda maye qaz bahalaşa bilər - İdxaldan asılılıq yaranıb

1221
(Yenilənib 16:39 20.08.2019)
SOCAR böyük şirkət olduğundan, istehsalı genişləndirməklə maye qazı həm emala yönəltməyə, həmçinin də yerli bazarı maye qazla təmin etməyə imkanı çatar

Zülfiyyə Quluyeva, Sputnik Azərbaycan

BAKI, 20 avqust — Sputnik. Paytaxtda yaranmış maye qaz (LPG) qıtlığı bahalaşmaya səbəb ola bilər. Bu barədə Sputnik Azərbaycan-a açıqlamasında iqtisadçı Vüqar Bayramov bildirib. O, qeyd edib ki, Azərbaycan Dövlət Neft Şirkətinin (SOCAR) yerli bazara maye qaz satışını tam dayandırması doğru hal deyil: "SOCAR çalışmalıdır ki, sürücülərin maye qaza olan tələbatını həyata keçirsin. Şirkət əvvəlki dövrlərdə olduğu kimi maye qaz satışını davam etdirməlidir ki, vətəndaşlar maye qaz qıtlığı ilə üzləşməsinlər. Nəzərə almaq lazımdır ki, Azərbaycan enerji ölkəsidir".

İqtisadçı deyir ki, əgər yerli bazarda maye qaza tələbat idxal hesabına ödəniləcəksə, qiymətlər artacaq:

"Ona görə də SOCAR istehsalı genişləndirməlidir ki, maye qaza olan idxaldan asılılıq aradan qalxsın. Maye qaza olan tələbat yerli istehsal hesabına ödənilməzsə, qiymətlərdə bahalaşma qaçılmaz olacaq. Yerli istehsal hesabına tələbatın ödənilməsi qiymətlərin sabit saxlanılmasına da gətirib çıxaracaq. Amma maye qaz idxalı baş verəcəksə, qiymət artımının olması gözləniləndir".

V. Bayramov deyir ki, SOCAR böyük şirkət olduğundan, istehsalı genişləndirməklə maye qazı həm emala yönəltməyə, həmçinin də yerli bazarı maye qazla təmin etməyə imkanı çatar: "Nəzərə almaq lazımdır ki, ölkədə LPG-yı tələbat var".

İqtisadçı SOCAR-ın maye qaza olan tələbatı sıxlaşdırılmış qaz (CNG) satışı ilə əvəz etməsini müsbət hal hesab edir: "Şirkətin sıxlaşdırılmış qaz satışını genişləndirməsi müsbət haldır. Sıxlaşdırılmış qazla bağlı maye qaza tələbat ödəniləcəksə, bu, əslində çox yaxşı olar. Çünki CNG maye qazla müqayisədə daha təhlükəsizdir. 

Amma nəzərə almaq lazımdır ki, bəzi avtomobillərdə sıxlaşdırılmış qazdan istifadə imkanı məhduddur. Ona görə də SOCAR-ın bazarda maye qazla bağlı müəyyən payının qorunub saxlanılması mütləqdir. Nəzərə almaq lazımdır ki, maye qazla işləyən avtomobillərin hamısının sıxlaşdırılmış qazda istifadəsi bu gün tam mümkün deyil. Bunun üçün həmin avtomobillərdə texniki baxımdan dəyişikliklər aparmağa müəyyən müddət vaxt lazımdır. Üstəlik, bəzi avtomobillərin ehtiyat hissələri köhnəldiyindən, bu dəyişiklik mümkün deyil".

Qeyd edək ki, yerli bazarda maye qaz qıtlığının yaranması, sərnişindaşımada da müəyyən problemlərə yol açıb. Xüsusilə rayonlar və şəhərlərarası sərnişin daşıyan mikroavtobusların əksəriyyəti maye qazla işlədiyindən, onların fəaliyyətində müəyyən ləngimələr müşahidə olunur. Həmçinin rayonlara və şəhərlərə sərnişin daşıyan mikroavtobus sürücüləri maye qaz satışı bərpa olunmazsa, gediş haqqında qiymət artımının da qaçılmaz olduğunu söyləyirlər. Onların sözlərinə görə, mikroavtobusların çoxunda sıxlaşdırılmış qazla işləmək üçün müvafiq avadanlıq yoxdur. Bu halda onlar məcburdurlar ki, yanacaq kimi benzindən, yaxud da dizeldən istifadə etsinlər.

Quyu quruyur. Dünya nəhəngi ümidləri puç etdi>>

Xatırladaq ki, artıq bir həftəyə yaxındır ki, ölkədə maye qaz satışında qıtlıq müşahidə olunur. Azərbaycan Dövlət Neft Şirkətinin (SOCAR) ictimaiyyətlə əlaqələr şöbəsinin rəhbəri İbrahim Əhmədov Sputnik Azərbaycan-a açıqlamasında bildirib ki, maye qaz satışında yaranan problem bu maddənin daha çox emala yönləndirilməsi ilə bağlıdır. SOCAR rəsmisinin sözlərinə görə, SOCAR xammalın böyük hissəsini Sumqayıtda yeni açılmış müəssisələrə ötürür ki, emal olunsun. İ. Əhmədov qeyd edib ki, LPG-nin bazara çıxarılması üçün SOCAR yeganə mənbə deyil. Təchizatçılar bu yanacaq növünü xaricdən idxal edə bilərlər. Lakin LPG kimi tanınan maye qazı idxal etməkdən çəkinirlər. Buna da səbəb Azərbaycanda LPG və digər kütləvi istifadə olunan yanacaq növlərinin qiymətinin dövlət tərəfindən tənzimləndiyinə görə ucuz olması, tariflərin dəyişməz qalmasıdır. İ.Əhmədov bildirib ki, hazırda ən effektli alternativ variant digər qaz yanacaq növü olan CNG-nin bazara təqdim olunmasıdır.

1221
Teqlər:
qiymət, istehsal, SOCAR, maye qaz, qaz
Əlaqədar
Maye qaz yoxa çıxıb: Avtomobillərinizə yeni avadanlıq quraşdırın

Prezident İqtisadi Əməkdaşlıq Təşkilatının Zirvə toplantısında çıxış edib

4
(Yenilənib 20:15 04.03.2021)
İlham Əliyev: "Azərbaycan, Türkiyə və İran bölgədə nəqliyyat layihələrinin icrası ilə bağlı vahid mövqe sərgiləyir. Ermənistan da özünü normal apararsa, bu prosesdən faydalana bilər".

BAKI, 4 mart — Sputnik. Martın 4-də İqtisadi Əməkdaşlıq Təşkilatının XIV onlayn Zirvə toplantısı keçirilib.

Zirvə toplantısına sədrlik edən Pakistanın Baş naziri İmran Xan əvvəlcə sammit iştirakçılarını salamlayıb və Azərbaycanın Qələbəsi münasibətilə təbriklərini çatdıraraq deyib:

- Mən Azərbaycanın işğal olunmuş ərazilərinin müvəffəqiyyətlə azad edilməsi münasibətilə Prezident İlham Əliyevi xüsusilə təbrik etmək istəyirəm.

Pakistanın Baş naziri belə çətin bir zamanda Zirvə toplantısının təşkilinin birgə səylər sayəsində mümkün olduğunu qeyd edib. Təşkilata sədrliyin Türkiyəyə keçdiyini deyən Pakistan hökumətinin başçısı çıxışında təşkilata üzv ölkələr arasında ticarət əlaqələrinin inkişafının vacibliyini vurğulayıb.

Türkiyə Prezidenti Rəcəb Tayyib Ərdoğan sədrliyin Türkiyəyə keçməsindən məmnun olduğunu dedi. O, bir çox sahələrdə tənəzzülə səbəb olan pandemiyaya yalnız həmrəylik, regional əməkdaşlıq sayəsində qalib gəlməyin mümkün olduğunu qeyd etdi. Prezident Rəcəb Tayyib Ərdoğan Azərbaycanın işğal altında qalan torpaqlarını uğurla azad etdiyini bildirərək deyib:

- Qardaşımız Azərbaycan erməni işğalı altındakı torpaqlarını şanlı bir Zəfərlə azad etmiş, bölgədə yeni bir dövrün qapılarını açmışdır. Bundan sonra hədəfimiz Qarabağda təhlükəsizlik və sabitliyin formalaşmasına yardım etmək, 30 illik işğalın fəsadlarını birlikdə aradan qaldırmaqdır. Bu prosesdə də təşkilat olaraq Azərbaycan ilə tam həmrəylik içində olacağımıza inanıram. Ermənistanın da atacağı sülhsevər addımlarla regional sabitliyin bir hissəsi olacağına ümid edirik. Xalqın iradəsini heçə sayan antidemokratik müdaxilələri əsla qəbul etmədiyimizi və etməyəcəyimizi burada təkrarlamaq istəyirəm.

İqtisadi Əməkdaşlıq Təşkilatının Baş katibi Hadi Suleymanpur qarşıda duran vəzifələrdən danışaraq təşkilat çərçivəsində iqtisadi-ticari əlaqələrin inkişafının prioritet olduğunu vurğuladı. Baş katib investisiyaların stimullaşdırılması zərurətindən danışdı, pandemiya ilə mübarizədə kollektiv səylərin əhəmiyyətini vurğuladı. Hadi Suleymanpur Azərbaycanı parlaq Qələbəsi münasibətilə təbrik edərək deyib:

- Mən mərhum Prezident, zati-aliləri Heydər Əliyevin təşəbbüsü olan Bakıda İqtisadi Əməkdaşlıq Təşkilatının Tədqiqat Mərkəzinin yaradılmasına görə Azərbaycan Respublikasının hörmətli Prezidenti cənab İlham Əliyevi təbrik edirəm. Bu, təşkilatı çoxşaxəli etmək məqsədilə İƏT ailəsi üçün böyük bir nailiyyətdir. Gəlin Azərbaycan Respublikasının ərazi bütövlüyünün müdafiəsi uğrunda həyatlarını qurban vermiş azərbaycanlı şəhidlərin xatirəsini də yad edək.

Sonra Əfqanıstan Prezidenti Məhəmməd Əşrəf Qani çıxış edərək deyib:

- Mən tarixi nailiyyət münasibətilə qardaşım Prezident Əliyevi təbrik etməkdən məmnunluq hissi duyuram. Azərbaycan xalqı kimi atanız da Sizinlə fəxr edərdi.

İqtisadi Əməkdaşlıq Təşkilatının üzv ölkələrin baxışlarının həyata keçirilməsi üçün mühüm platforma olduğunu deyən Məhəmməd Əşrəf Qani pandemiyanın mənfi təzahürlərinin minimuma endirilməsi üçün regional əməkdaşlığın böyük əhəmiyyət kəsb etdiyini deyib.

Prezident Rəcəb Tayyib Ərdoğan: Əlbəttə ki, Azərbaycan Respublikasının Prezidenti, mənim qardaşım İlham Əliyevə söz vermədən öncə deyim ki, həqiqətən də 30 illik işğal baş vermişdir və orada olan milyonlarla azərbaycanlı qardaşımız, bildiyiniz kimi, öz torpaqlarından qovulmuşdur. Onlar təxminən 30 il idi ki, öz doğma torpaqlarından uzaqda yaşayırdılar. Əfsuslar olsun ki, Minsk qrupu heç bir nəticə əldə edə bilməmişdir və buna görə İlham Əliyevin rəhbərliyi ilə bizim azərbaycanlı qardaşlarımız bu torpaqları işğaldan azad etmişdir. İndi infrastruktur üzrə hazırlıq işləri davam edir və tezliklə bu torpaqların həqiqi sahibləri öz ərazilərində yaşayacaqlar. İndi isə sözü, mənim əziz qardaşım, Azərbaycan Prezidenti hörmətli İlham Əliyevə verirəm. Söz sizindir.

Azərbaycan Respublikasının Prezidenti İlham Əliyev də toplantıda videoformatda çıxış edib.

- Əziz qardaşım, əziz Prezident,

Mənə söz verdiyiniz zaman səsləndirdiyiniz fikirlərə görə Sizə təşəkkür edirəm.

Bütün həmkarlarımızın diqqətinə çatdırmaq istərdim ki, Prezident Ərdoğanın yalnız müharibə vaxtı deyil, ümumiyyətlə Türkiyənin Prezidenti və lideri olduğu müddətdə Azərbaycana olan davamlı dəstəyi Azərbaycan torpaqlarının işğaldan azad edilməsində mühüm rol oynamışdır.

Türkiyə bizim qardaşımızdır. Türkiyə bizim böyük müttəfiqimizdir. Azərbaycan xalqı Türkiyə kimi müttəfiqi olmasından çox məmnundur.

Azərbaycan və Türkiyə xalqları və əminəm ki, dünyada bir çoxları Prezident Ərdoğanın Türkiyənin yalnız dünyada ən önəmli güc mərkəzlərindən birinə çevrilməsində deyil, eləcə də regionda təhlükəsizliyin təmin edilməsindəki tarixi rolundan açıq şəkildə xəbərdardırlar.

Türkiyə geniş regionda təhlükəsizlik və sabitliyin təmin olunmasında çox önəmli rol oynayır.

Əvvəllər də çox demişəm, indi də bir daha bildirmək istərdim ki, Türkiyənin güclü olması Azərbaycan və bütün digər müttəfiqlərin də güclü olması deməkdir.

Hörmətli cənab sədr, əziz qardaşım Rəcəb Tayyib Ərdoğan,

Hörmətli dövlət və hökumət başçıları,

Hörmətli cənab baş katib,

İlk öncə mən bir daha əziz qardaşlarıma, Prezident Ərdoğana, Prezident Əşrəf Qaniyə, Baş nazir İmran Xana Azərbaycanın qələbəsi və ərazi bütövlüyünü bərpa etməsi münasibətilə səsləndirdikləri xoş təbriklərə görə təşəkkürümü bildirmək istərdim.

Qardaş Türkiyəni İqtisadi Əməkdaşlıq Təşkilatında uğurlu sədrliyi münasibətilə təbrik etmək istərdim. Yeni sədr ölkə kimi qardaş Türkmənistana uğurlar arzulayıram.

Azərbaycan İqtisadi Əməkdaşlıq Təşkilatına üzv dövlətlərlə münasibətlərinə böyük əhəmiyyət verir. Bu gün burada İqtisadi Əməkdaşlıq Təşkilatının Tədqiqat Mərkəzinin nizamnaməsini imzalayacağıq. Biz Azərbaycanın mərhum Prezidenti Heydər Əliyevin təşəbbüsünü dəstəklədiklərinə görə üzv dövlətlərə minnətdarıq və Azərbaycanda yerləşəcək Mərkəzin səmərəli fəaliyyəti üçün əlimizdən gələni edəcəyik.

2020-ci ildə Azərbaycan öz torpaqlarının Ermənistan tərəfindən 30 ilə yaxın davam edən işğalına hərbi-siyasi yollarla son qoydu. Ermənistan üzərində döyüş meydanında əldə edilmiş hərbi zəfər siyasi yollarla tam təmin edildi.

BMT Təhlükəsizlik Şurasının 1993-cü ildə qəbul edilmiş və Ermənistan qoşunlarının Azərbaycanın işğal olunmuş ərazilərindən dərhal, tam və qeyd-şərtsiz çıxarılmasını tələb edən qətnamələri 27 il kağız üzərində qalmışdı. Azərbaycan özü həmin qətnamələrin icrasını təmin edərək ərazi bütövlüyünü bərpa etdi. İşğalçılar qədim Azərbaycan torpağı olan Qarabağdan qovuldu. 44 gün ərzində Ermənistan ordusu tam darmadağın edildi. 10 noyabr 2020-ci il tarixində Azərbaycan Ermənistanı kapitulyasiya aktı imzalamağa məcbur etdi.

Müharibə başlayan kimi bizi dəstəkləyən ilk ölkə qardaş Türkiyə oldu. Əziz qardaşım, Türkiyə Prezidenti Rəcəb Tayyip Ərdoğanın açıqlamalarını və onun siyasi və mənəvi dəstəyini yüksək qiymətləndiririk.

27 və 28 sentyabr tarixlərində qardaş Pakistan və Əfqanıstan Ermənistanı işğala son qoymağa, BMT Təhlükəsizlik Şurasının müvafiq qətnamələrini icra etməyə çağırmış və Azərbaycanın ərazi bütövlüyünə öz dəstəklərini ifadə etmişlər.

Mən bizi dəstəklədiklərinə görə onlara dərin təşəkkürümü bildirirəm.

Eyni zamanda müharibə dövründə bizi dəstəkləyən ölkələrin dövlət və hökumət başçılarına da təşəkkür edirəm.

İşğal zamanı Ermənistan işğal etdiyi ərazilərdə Azərbaycanın kənd və şəhərlərini, bütün mədəni və dini abidələrini qəsdən dağıtmışdır. Bizim məscidlər donuz və inək saxlanılan yerlərə çevrilmişdir. Bütün bunların foto və videoları internetdə var. Bu bütün İslam dünyasına qarşı olan düşmənçilikdir. Azərbaycan xalqının mədəni və dini irsinin qəsdən dağıdılması və təhqir edilməsi faktları beynəlxalq media nümayəndələri tərəfindən əks etdirilmişdir.

Bütün müsəlmanların hisslərini təhqir edən Ermənistanın müsəlman ölkələri ilə əlaqələrini genişləndirmək cəhdləri riyakarlıqdan başqa bir şey deyil.

Azərbaycan müsəlman ölkələri arasında həmrəyliyə dəyərli töhfələr vermişdir. Biz müxtəlif beynəlxalq kürsülərdən islam ölkələrini birliyə çağırmışıq.

Azərbaycan islam dininin zorakılıq və terrorla əlaqələndirilməsini kəskin şəkildə pisləyir. Biz İslamofobiyaya qarşı mübarizə aparmalı və İslamın həqiqi dəyərlərini-sülh, tolerantlıq və ədaləti-təşviq etməliyik. Bu mənada, qardaş Pakistanın təşəbbüsü ilə İslam Əməkdaşlığı Təşkilatının 15 mart tarixinin Beynəlxalq İslamofobiya ilə Mübarizə Günü elan olunması qərarını alqışlayırıq.

Hazırda qarşımızda azad olunmuş ərazilərin yenidən qurulması kimi nəhəng vəzifə dayanır. Biz azad olunmuş ərazilərdə şəhər və kəndlərimizi yenidən quracağıq, mədəni və dini abidələrimizi bərpa edəcəyik.

Azərbaycan COVID-19 pandemiyası ilə mübarizədə qlobal səyləri səfərbər edən ilk ölkələrdən olmuşdur. Azərbaycan ötən il hazırda sədrlik etdiyi iki beynəlxalq təşkilatın-Türk Şurası və Qoşulmama Hərəkatının Zirvə toplantıları, eləcə də BMT Baş Assambleyasının dövlət və hökumət başçıları səviyyəsində Xüsusi Sessiyasının keçirilməsinin təşəbbüskarı olmuşdur. Bu təşəbbüslər bizim beynəlxalq həmrəyliyə və əməkdaşlığa sadiqliyimizi bir daha nümayiş etdirmişdir.

Pandemiyanın ilk günlərindən biz Ümumdünya Səhiyyə Təşkilatı ilə sıx əməkdaşlıq edirik. Biz Ümumdünya Səhiyyə Təşkilatına 10 milyon dollar həcmində könüllü maliyyə yardımı etmişik. Azərbaycan koronavirusla əlaqədar dünyanın 30-dan artıq ölkəsinə humanitar və maliyyə yardımı edib.

Azərbaycan yanvar ayının 18-dən peyvəndləmə prosesinə başlayıb. Biz regionda peyvəndləməyə start vermiş ilk ölkələrdən biriyik.

Biz vaksinlərin inkişaf etmiş və inkişaf etməkdə olan dövlətlər arasında qeyri-bərabər və ədalətsiz şəkildə bölünməsini pisləyirik. Bəzi ölkələr özlərinin ehtiyacları ilə müqayisədə bir neçə dəfə çox həcmdə vaksin alır. Aydındır ki, belə olduğu təqdirdə, bəzi ölkələrə peyvənd çatmayacaq.

Azərbaycan bu məsələ ilə bağlı BMT-nin İnsan Hüquqları Şurasında Qoşulmama Hərəkatı adından qətnamə layihəsi ilə çıxış etməyi planlaşdırır və mən İqtisadi Əməkdaşlıq Təşkilatının üzv dövlətlərini həmin təşəbbüsü dəstəkləməyə dəvət edirəm.

Azərbaycan Avrasiyada enerji təhlükəsizliyini təmin edən mühüm tərəfdaş ölkədir. Cənub Qaz Dəhlizi 2020-ci il dekabrın 31-də istismara verildi. 7 ölkəni birləşdirən 3500 kilometr uzunluğunda olan Cənub Qaz Dəhlizi dünyanın ən böyük enerji infrastrukturu layihələrindən biridir.

Azərbaycan Şərq-Qərb, Şimal-Cənub və Şimal-Qərb nəqliyyat dəhlizləri kimi regional bağlantı layihələrində fəal iştirak edir və ölkəmiz Avrasiyanın əsas və etibarlı nəqliyyat və logistika mərkəzlərindən birinə çevrilib. Biz öz tərəfdaşlarımızla birgə Azərbaycanın nəqliyyat infrastrukturunu Lapis Lazuli nəqliyyat dəhlizi ilə birləşdirdik və nəqliyyat sahəsində çoxtərəfli əməkdaşlıq üçün geniş imkanlar yaratdıq.

Artıq qeyd etdiyim kimi, Azərbaycanın Ermənistan üzərində şanlı qələbəsindən sonra Dağlıq Qarabağ münaqişəsinə son qoyuldu. Dağlıq Qarabağ münaqişəsi tarixdə qaldı.

Biz indi gələcək haqqında düşünürük. Biz bölgədə sülh və sabitliyi təmin etmək üçün bir çox ölkələri birləşdirən nəqliyyat layihələrini müzakirə etməyə başlamışıq. Azərbaycan, Türkiyə və İran bölgədə nəqliyyat layihələrinin icrası ilə bağlı vahid mövqe sərgiləyir. Ermənistan da özünü normal apararsa, bu prosesdən faydalana bilər.

Bu xüsusda qeyd etmək istərdim ki, Azərbaycanın tarixi ərazisi olan Zəngəzurdan keçəcək və Azərbaycanın əsas hissəsi ilə ölkəmizin ayrılmaz hissəsi Naxçıvan Muxtar Respublikasını və Türkiyəni birləşdirəcək yeni bağlantı dəhlizi regionda nəqliyyat sektorunda yeni imkanlar yaradacaq. Biz İqtisadi Əməkdaşlıq Təşkilatının üzv dövlətlərini Zəngəzur dəhlizindən faydalanmağa dəvət edirik.

Diqqətinizə görə sağ olun.

4
Astara gömrük-keçid məntəqəsi

Ötən il gömrük orqanlarından dövlət büdcəsinə 3 milyarddan artıq vəsait köçürülüb

7
(Yenilənib 19:22 04.03.2021)
Səfər Mehdiyevin bildirib ki, idxal rüsumu üzrə azadolmaların ümumi idxalda çəkisi 59 faiz, ƏDV üzrə azadolmaların ümumi idxalda çəkisi 26 faiz təşkil edib.

BAKI, 4 mart — Sputnik. "Ötən il gömrük orqanları 3 milyard 830 milyon manat proqnoza qarşı 3 milyard 938 milyon 242 min manat gömrük ödənişlərinin toplanaraq dövlət büdcəsinə köçürülməsini təmin edib. 2020-ci il ümumi idxalın 41 faizi rüsuma cəlb olunub".

Sputnik Azərbaycan-ın xəbərinə görə, bunu Dövlət Gömrük Komitəsinin sədri, gömrük xidməti general-polkovniki Səfər Mehdiyevin iştirakı ilə “2020-ci ilin yekunları, qarşıda duran vəzifələr” mövzusunda keçirilən mətbuat konfransında deyib. 

O bildirib ki, idxal rüsumu üzrə azadolmaların ümumi idxalda çəkisi 59 faiz, ƏDV üzrə azadolmaların ümumi idxalda çəkisi 26 faiz təşkil edib. Komitə sədri son dövrlərdə bəzi ekspertlər tərəfindən xarici ticarət dövriyyəsinin statistik göstəriciləri əsasında yanlış üsullarla hesablamaların aparıldığını və nəticədə ortaya çıxan rəqəmlərin cəmiyyətdə gömrük orqanlarının fəaliyyəti haqqında həqiqətə uyğun olmayan rəyin formalaşmasına yol açdığını diqqətə çatdırıb. 

Komitə sədri 2019-cu ildən etibarən tətbiqinə başlanan “Yaşıl dəhliz” buraxılış sistemindən idxalda 430, ixracda isə 235 xarici ticarət iştirakçısına istifadə hüququnun verildiyini, ümumi idxalın 40 faizinin, ümumi ixracın isə 32.8 faizinin “Yaşıl dəhliz” istifadəçilərinin payına düşdüyünü bildirib.

   

7
Fəzail Ağamalı, millət vəkili

Partiya sədrləri YAP-ın qurultayı barədə: taktiki strateji qərarlar qəbul edilə bilər

0
(Yenilənib 20:15 04.03.2021)
Fəzail Ağamalı: "Milli dövlətçilik maraqlarını hər şeydən üstün tutan partiyalarla YAP-ın əməkdaşlığı hər zaman yüksək səviyyədə olub".

Elvin Səlimov, Sputnik Azərbaycan

BAKI, 4 mart — Sputnik. Martın 5-də hakim Yeni Azərbaycan Partiyasının qurultayının keçirələcəyi ilə bağlı xəbərlər yayılıb. Yayılan informasiyalarda o da qeyd olunub ki, bu dəfəki qurultayda partiyanın bir neçə nüfuzlu siması, keçmiş vəzifəli şəxslər partiya sıralarından uzaqlaşdırılacaq.

Cəmiyyətdə hakim partiyanın qurultayına olan maraq diqqəti digər parlament partiyalarına yönəldir. Bəs görəsən bu partiyaların YAP-ın hazırki fəaliyyətinə münasibətləri necədir? Onlar bu qurultaydan sonra YAP-ın fəaliyyətində hansı dəyişiklikləri görmək istəyirlər? Sputnik Azərbaycan mövzu ilə bağlı bir neçə parlament partiyasının rəsmi şəxsləri ilə danışıb.

Ana Vətən Partiyasının sədri Fəzail Ağamalı deyir ki, YAP ölkədə ən çox üzvü olan və eyni zamanda hakim partiya olduğu üçün burada gedən proseslər cəmiyyətdə həssaslıqla izlənilir.

Partiya sədri bildirib ki, YAP-ın bu dəfəki qurultayında zamanın tələblərinə uyğun olaraq yeniliklərin tətbiq ediləcəyini istisna etmir: "Gözlənilən dəyişikliklər Azərbaycanda gedən ictimai-siyasi proseslərə müsbət mənada təsir göstərəcək. Bu dəyişikliklərin iqtidar partiyasına və ümumilikdə idarəçilik sisteminə töhfə verəcəyini düşünürəm. YAP hakim partiya olaraq hər zaman cəmiyyətə açıq olub. YAP müxalifətdə olan partiyalarla siyasi dialoqa və əməkdaşlığa üstünlük verib. Milli dövlətçilik maraqlarını hər şeydən üstün tutan partiyalarla YAP-ın əməkdaşlığı hər zaman yüksək səviyyədə olub. Bu səpkidə hakim partiyanın təşəbbüsü ilə mühim işlər görülüb. Əminəm ki, bu ənənə və tendensiya bundan sonra da davam edəcəkdir".

Böyük Quruluş Partiyasının sədri Fazil Mustafa isə bildirib ki, YAP onlar üçün rəqib partiyadır və qurultayın hansı məqsədlə keçirilməsi haqqında məlumata malik deyil. O qeyd edib ki, qurultay başa çatandan sonra onun nəticələrindən danışmaq doğru olar:

"Hesab edirəm ki, hakim partiya yeni dövrün tələblərinə uyğun taktiki və strateji qərarlarını qəbul edəcək. YAP-ın keyfiyyətcə müəyyən gücdə olması Azərbaycan cəmiyyətində siyasi islahatların aparılmasına ciddi təsir göstərə bilər. Hakim partiya öz daxilində gedən prosesləri daha yaxşı bilir. Yeniləşmələr müsbət istiqamətdə cərəyan edərsə, bu, ümumi vəziyyətə də təsir göstərəcək. Amma qeyd etmək istərdim ki, hər yeniləşmə müsbət effekt vermir. Yeni çağın tələblərinə uyğun dünyagörüşü yetkin olan insanların partiyada aparıcı mövqeləri tutması ölkə siyasətinə də təsir göstərəcək".

Xatırladaq ki, YAP-ın sonuncu qurultayı 2018- ci ilin fevralın 8-də keçirilib.

0