Bank kartları, arxiv şəkli

Problemli kreditlərin həllinə dair qaranlıq məqamlar aradan qalxır - Yeni şərh

3750
(Yenilənib 17:28 09.04.2019)
Vətəndaşa ödəniləcək kompensasiyanın məbləği 500 manatadəkdirsə, bu, ona nağd şəklində veriləcək

Xalid Məmmədov, Sputnik Azərbaycan

BAKI, 14 aprel — Sputnik. Maliyyə Bazarlarına Nəzarət Palatası aprelin 2-də "Fiziki şəxslərin xarici valyutada olan kreditlərinin əsas məbləğinin devalvasiya nəticəsində manatla artmış hissəsinin ödənilməsi mexanizminin və həmin məbləğə hesablanmış faiz və dəbbə pulu (cərimə, penya) üzrə tətbiq ediləcək güzəştlərin müəyyən edilməsi Qaydası"nı açıqlayıb.

Bank və maliyyə məsələləri üzrə ekspert Əkrəm Həsənov problemli kreditlərin həlli ilə bağlı qaydanı Sputnik Azərbaycan-a şərh edib. Ekspert bildirib ki, bu qayda "Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında" Azərbaycan Prezidentinin 2019-cu il 28 fevral tarixli fərmanının icrası məqsədilə hazırlanıb: "Xarici valyutada kredit götürmüş şəxslərə kompensasiya vətəndaşın kredit aldığı banka köçürüləcək. Əgər bank olmayan kredit təşkilatından kredit götürülübsə, həmin şəxslərə kompensasiya "Azərpoçt" MMC-yə köçürüləcək".

"Vətəndaş məzənnə fərqini ödəyibsə, vəsait ona geri qaytarılacaq. Yox, əgər vətəndaş məzənnə fərqini tam ödəməyibsə, həmin kompensasiya bank və yaxud bank olmayan kredit təşkilatına çatacaq. Vətəndaş məzənnə fərqinin bir qismini ödəyibsə, vətəndaşın ödədiyini ona geri qaytaracaqlar, ödəmədiyi hissəsi isə banka və yaxud bank olmayan kredit təşkilatına çatacaq", - deyə ekspert bildirib.

Onun sözlərinə görə, vətəndaşa ödəniləcək kompensasiyanın məbləği 500 manatadəkdirsə, bu, ona nağd şəklində veriləcək: "500 manatdan çoxdursa, vətəndaşa kart veriləcək. Əgər şəxs krediti bankdan alıbsa, ona kartı bank verəcək. Vətəndaş krediti bank olmayan kredit təşkilatından götürübsə, kartı ona "Azərpoçt" MMC verəcək. Kartın müddəti 1 illik olacaq. Karta görə vətəndaş heç bir ödəniş etməyəcək və istənilən bankomatdan öz pulunu götürəcək".

Faiz və cərimələrə gəldikdə isə, ekspert bildirib ki, vətəndaş ilə yeni müqavilə bağlanacaq: "Əsas borc nə qədərdirsə, vətəndaş 5 il ərzində illik 1 faiz dərəcəsi ilə onu ödəyəcək və burada güzəşt də olacaq. Söhbət 10 min dollaradək və yaxud 17 min manatadək olan kreditlərdən gedir. İndiyədək hesablanmış faiz borcu, dəbbə borcu da silinəcək. Yəni əsas borc nədirsə, onu vətəndaş 5 il ərzində 1 faiz dərəcəsi ilə ödəməlidir. Ödənişlər birdəfəlik olacaq. Mexanizm bütövlükdə belədir".

Qeyd edək ki, qaydaya görə, fiziki şəxslərin kompensasiya ödəniləcək kreditləri aşağıdakı şərtlərdən ən azı birinə cavab verməlidir: 2015-ci il fevralın 21-nə bütün kredit təşkilatlarının və (və ya) ləğvetmə prosesində olan kredit təşkilatlarının balans və balansdankənar hesablarında xarici valyutada olan əsas kredit borcunun qalıq məbləğinin cəmi 10000 ABŞ dollarından və ya həmin tarixə Mərkəzi Bankın (MB) elan etdiyi məzənnəyə uyğun olaraq 10000 ABŞ dolları ekvivalentindən çox olmamalıdır; 2015-ci il dekabrın 21-nə bütün kredit təşkilatlarının və (və ya) ləğvetmə prosesində olan kredit təşkilatlarının balans və balansdankənar hesablarında xarici valyutada olan əsas kredit borcunun qalıq məbləğinin cəmi 10000 ABŞ dollarından və ya həmin tarixə MB-nin elan etdiyi məzənnəyə uyğun olaraq 10000 ABŞ dolları ekvivalentindən çox olmamalıdır.

3750
Əlaqədar
"Diqlas"da malları yanmış sahibkarlara güzəştli kredit veriləcək
Problemli kreditlərlə bağlı qaydalar qüvvəyə mindi
Şəhid ailələrinin bank krediti ilə bağlı mühüm qərar verildi
Vətəndaşın problemli kreditlər məsələsi həll edilir, bəs sahibkarın?
Problemli kreditlərlə bağlı yeni təkliflər var
Elektrik xətləri, arxiv şəkli

Suqovuşanda "ağıllı şəbəkə" tətbiq olunur

9
(Yenilənib 12:53 22.04.2021)
Ağıllı Şəbəkə Konsepsiyası işğaldan azad olunan digər ərazilərdə olduğu kimi Suqovuşan ərazisində də tətbiq edilir. 35 kV-luq iki dövrəli xətt izoliyasiyalı kabellə çəkilir.

BAKI, 22 aprel — Sputnik. İşğaldan azad olunan Suqovuşan qəsəbəsinə 110/35/6 kv-luq Tərtər yarımstansiyasından 35 kV-luq elektrik veriliş xəttinin çəkilməsi işləri davam etdirilir. “Azərişıq” Açıq Səhmdar Cəmiyyətindən Sputnik Azərbaycan-a verilən məlumata görə, işğaldan azad olunan əraziləri elektrik enerjisi ilə təchiz etmək üçün kompleks tədbirlər davam etdirilir, “Azərişıq Qarabağda” layihəsi çərçivəsində Suqovuşan ərazisində işləri sürətləndirilib.

Suqovuşanda son vəziyyət
© Sputnik / Aleksey Kudenko

Ağıllı Şəbəkə Konsepsiyası işğaldan azad olunan digər ərazilərdə olduğu kimi Suqovuşan ərazisində də tətbiq edilir. 35 kV-luq iki dövrəli xətt izoliyasiyalı kabellə çəkilir. Belə xətlərdə itkilər minimuma enir, əlverişsiz hava şəraitinə daha dözümlüdür, buzlaşmaya qarşı daha dayanıqlıdır, həmçinin belə xətlərin keçdiyi ərazilərdə mühafizə zolağı daha az olur, xətlərə texniki xidmət xərci minimuma enir.

Suqovuşan qəsəbəsinin daxili şəbəkəsində isə 0.4 kv hava xətləri bərpa edilib, yeni SİP kabellər çəkilib. Qısa müddət ərzində qəsəbəyə elektrik enerjisinin verilişi bərpa ediləcək. Bunun üçün lazım olan bütün mal-material əraziyə göndərilib.

9
Teqlər:
elektrik, işıq, Suqovuşan
Suraxanı neft yatağı, arxiv şəkli

Azərbaycan nefti bahalaşıb

4
(Yenilənib 12:47 22.04.2021)
"Azeri Light" nefti keçən il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

BAKI, 22 aprel — Sputnik. Azərbaycan neftinin qiyməti bahalaşıb.

Sputnik Azərbaycan xəbər verir ki, "Azeri Light" markalı neftin bir barelinin qiyməti 0,16 dollar artaraq 65,37 dollar təşkil edib.

"Brent" markalı neftin qiyməti 0,26 dollar ucuzlaşaraq 65,06 dollar, "Light" markalı neftin qiyməti isə 0,27 dollar geriləyərək 61,08 dollar olub.

Qeyd edək ki, "Azeri Light" nefti keçən il aprelin 21-də minimuma enərək 15,81 dollar, 2008-ci ilin iyulunda isə maksimuma yüksələrək 149,66 dollar olub.

4
Teqlər:
Azərbaycan, qiymət, neft
Mövzu:
Neft qiymətləri ətrafındakı ajiotaj
Hindistanda epidemioloji vəziyyət

Bu ölkə gündəlik COVID-19-a yoluxma sayına görə rekord vurdu

0
(Yenilənib 15:42 22.04.2021)
Halbuki bu ölkə peyvənd tətbiqinə görə bütün dünyada üçüncü yeri tutur və indiyə kimi 132 milyondan çox insan vaksinasiya olunub.

BAKI, 22 aprel — Sputnik. Hindistan Səhiyyə Nazirliyindən verilən məlumata görə, bu ölkədə son 24 saatda koronavirusa 314 min 835 yeni yoluxma halı qeydə alınıb. Beləliklə, Hindistan bu ilin yanvar ayında ABŞ-da qeydə alınan göstəricini keçərək dünyada antirekord vurub. Bu barədə Sputnik Azərbaycan Anadolu Agentliyinə istinadla məlumat yayıb. Son sutka ərzində Hindistanda COVID-19-dan ölənlərin sayı isə 2 min 104 nəfər olub. Nəticədə ümumilikdə bu ölkədə koronavirus qurbanlarının sayı 184 min 657-yə çatıb.

Türkiyədə epidemioloji vəziyyət
© AFP 2021 / ADEM ALTAN

Xəstəlikdən sağalanların sayı isə 13 milyon 454 min 880 nəfər olub. Hazırda 2 milyon 291 min 413 nəfərin müalicəsi davam edir.

Mütəxəssislərin sözlərinə görə, artıq xəstəxanalarda virusa yeni yoluxanları qəbul etməyə yer yoxdur və tezliklə ölkənin səhiyyə sistemi çökəcək.

Əhalisinin sayı 1,4 milyard nəfər olan ölkədə hazırda koronavirusa qarşı vaksinasiya prosesi davam edir. Səhiyyə Nazirliyi indiyə kimi 132 milyon 330 min 644 doza peyvənd tətbiq olunduğunu bildirib.

Peyvənd məlumatlarının əks olunduğu "Ourworldindata.org" internet saytınında yer alan məlumata görə, Hindistan ABŞ və Çindən sonra dünyada ən çox peyvənd tətbiq olunan 3-cü ölkədir.

 

0
Mövzu:
Yeni tip koronavirus pandemiyası