Ümumdünya Ticarət Təşkilatı

ABŞ-ın tərk etmək istədiyi təşkilata Azərbaycan niyə daxil olmalıdır?

11426
(Yenilənib 13:55 05.09.2018)
"Əgər Azərbaycan Ümumdünya Ticarət Təşkilatının prinsiplərinin ardınca getsə, qısa müddətdə ölkə ucuz özgə malı ilə dolacaq, yerli istehsal isə öləcək"

Aleksandra Zuyeva, Sputnik Azərbaycan

BAKI, 5 sentyabr — Sputnik. Əgər Azərbaycan Ümumdünya Ticarət Təşkilatının (ÜTT) prinsiplərinin ardınca getsə, qısa müddətdə ölkə ucuz özgə malı ilə dolacaq, yerli istehsal isə öləcək. Bunu Sputnik Azərbaycan-a iqtisadçı-ekspert Fuad Əlizadə deyib.

Əgər yaxşılığa doğru dəyişməsə, ABŞ Ümumdünya Ticarət Təşkilatından (ÜTT) çıxacaq. Hadisələrin bu şəkildə inkişafından ötən həftə Amerika prezidenti Donald Tramp danışıb.

Bakı niyə ÜTT-yə tələsmir

Əlizadənin sözlərinə görə, ÜTT zamanında o məqsədlə yaradılmışdı ki, ona üzv olan bütün ölkələrin hüquqları bərabər olsun. Misal üçün, Latviya kimi kiçik ölkənin Fransa ilə bu və ya digər məhsulla bağlı fikir ayrılığı yaransa, təşkilat bu mübahisənin qarşısında dura bilsin.

Yaxud da, misal üçün, bu yaxınlarda Türkiyə Vaşinqtonun türk polad və alüminiumunun idxal rüsumlarını artırması ilə bağlı qərarından ÜTT-yə şikayət etmək niyyətini açıqlamışdı.

"Yəni təşkilatın özü, üzv ölkələrə öz biznesini qurmaq üçün ümumi şərtlərin yaradılmasını təmin edir" — ekspert deyib.

Azərbaycanın indiyə qədər niyə ÜTT-yə üzv olmadığına aydınlıq gətirən iqtisadçı xatırladıb ki, bizim öz qanunvericiliyimizi bu təşkilatın tələblərinə uyğunlaşdıraraq ora üzv olmağımız üçün ölkəmizə ABŞ Beynəlxalq İnkişaf Agentliyinin (USAID) xətti ilə dəfələrlə qrantlar ayrılıb.

"Bəli, Azərbaycan 1997-ci ilə qədər fəal şəkildə bu prosesə qoşulmuşdu. Lakin sonra bu proses səngidi. Bununla əlaqədar olaraq ölkədə hesab etdilər ki, əgər biz ÜTT-nin prinsiplərinə riayət edərək onun izi ilə getsək, tezliklə ölkəmiz digər ölkələrin ucuz məhsulları ilə dolacaq. Bununla yanaşı, yerli istehsal tamamilə öləcək" — Əlizadə deyib.

Azərbaycan yerli istehsalı dəstəkləyir

Onun sözlərinə görə, Azərbaycan hazırda dotasiyalar üzrə fəal siyasət həyata keçirir: "Fermerlərə yanacaq və sürtkü yağları üçün dotasiyalar ayrılır, habelə bu və ya digər fəaliyyət növünə subsidiyalar verilir. Bu, ona görə edilir ki, yerli istehsal möhkəmlənsin".

"Azərbaycan ÜTT-yə daxil olmaqdan imtina etmir. Biz müxtəlif ölkələrlə qatılacağımız şərtlərlə bağlı danışıqlar aparırıq" — deyən ekspertin sözlərinə görə, danışıqlarda bu məqama da xüsusi diqqət yetirmək lazımdır ki, Azərbaycan inkişaf etməkdə olan ölkə olduğundan, növbəti 10-15 il ərzində də, məsələn, aqrar sektorda subsidiyalar verilsin.

Əlizadə onu da qeyd edib ki, ÜTT-də belə bir şərt var: bankların fəaliyyəti hər yerdə eyni olmalıdır. Misal üçün, bankların bu və ya digər ölkədə birbaşa öz filiallarını açmaq hüququ var. Lakin məsələ ondadır ki, ölkədə birbaşa Fransadan idarə olunan bir bank peyda olanda, o, Azərbaycanda da qeydiyyatdan keçməlidir. Belə olan təqdirdə bu bank hüquqi şəxsə çevrilir və eyni zamanda Azərbaycan tərəfinin də tələblərini yerinə yetirir.

"Əlbəttə, bizə ikincisi lazımdır. Bu addımlar ona görə atılır ki, bizim öz bank sistemimiz inkişaf etsin" — Sputnik Azərbaycan-ın həmsöhbəti deyib.

F.Əlizadə hesab edir ki, Azərbaycan ÜTT-yə günü sabah daxil ola bilər: "Lakin biz hər bir hərfə görə danışıq aparırıq ki, proses və nəticə bizim maraqlarımıza zidd olmasın. Elə buna görə də, danışıqlar əsrin demək olar, dörddə biri ərzində aparılır".

ÜTT üçün nokdaun

ABŞ-ın ÜTT-dən çıxma ehtimalına gəlincə, ekspert deyib ki, bu, təşkilata ölümcül zərbə olmasa da, nokdaun olacaq. O xatırladıb ki, həmişə üç dünya sisteminin varlığından danışılıb. Bunlar Dünya Bankı, Beynəlxalq Valyuta Fondu və Ümumdünya Ticarət Təşkilatıdır. Hər üç təşkilatda da öz zamanında aparıcı rolu ABŞ oynayıb.

ABŞ dolları və türk lirəsi
© REUTERS / Murad Sezer/Illustration

"Hazırda ABŞ-ın ÜTT-dəki fəaliyyəti ona gətirib çıxarıb ki, real istehsal Amerikadan qaçmağa başlayıb. Bunun səbəbi sərt ekoloji tələblər və əməyin özünüqiymətləndirməsidir" — iqtisadçı deyib.

Ekspertin fikrincə, bu mənada amerikalılar və prezident Tramp istehsalı Amerikaya qaytarmaq üçün vaxtilə özlərinin yazdıqları ÜTT qanunlarının üstündən xətt çəkməyə çalışırlar: "ABŞ indi elə ticarət maneələri yaradır ki, sanki ÜTT-nin inkişaf yolunu məhv etmək öhdəliyini üzərinə götürüb".

Trampa inanmaq lazımdır

Öz növbəsində politoloq, Moskva Dövlət Beynəlxalq Münasibətlər İnstitutunun Avropa hüququ kafedrasının dosenti Nikolay Topornin Sputnik Azərbaycan-a şərhində təəssüflə qeyd edib ki, Trampın bəyanatı nə qədər radikal və təxribat xarakterli olursa olsun, ciddi qəbul edilməlidir.

Ekspert xatırladıb ki, bir vaxtlar Tramp İranla nüvə anlaşmasından çıxacağına da söz vermişdi: "Bir sıra konqresmenlərin, eləcə də avropalı tərəfdaşlarının onu fikrindən daşındırmağa etdikləri cəhdlərə baxmayaraq, o, həmin anlaşmadan çıxdı. Bundan sonra İran ətrafında gərgin vəziyyət yarandı".

"Bundan başqa, biz ABŞ-ın özünün Avropa İttifaqındakı tərəfdaşları və Çin əleyhinə gömrük rüsumlarını artırdığını da müşahidə etdik" — politoloq deyib.

Ona görə də, ekspert hesab edir ki, Trampın bəyanatlarını həmişə ciddi qəbul etmək lazımdır: "Əgər amerikalı lider deyirsə ki, ÜTT Birləşmiş Ştatlara münasibətdə öz siyasətini dəyişməsə, oradan çıxacaq, bu, o deməkdir ki, ABŞ-ın ÜTT-nin xətti ilə iştirak etdiyi tarif sazişləri və çoxtərəfli ticarət müqavilələri Amerika iqtisadiyyatı və biznesi üçün ədalətli deyil".

Politoloqun fikrincə, Trampın düşüncəsinə görə, Amerika qazandığından daha çox itirir, ÜTT-nin digər üzvləri isə bundan istifadə edərək qazanır: "Onun mövqeyi belədir. Əlbəttə o, amerikalıların hansı sahələrdə itirdiyini konkret deməsə də, aydındır ki, ABŞ-la Çin, ABŞ-la Aİ arasındakı ticarət münasibətlərinə baxsaq, qarşılıqlı ticarətdəki çoxmilyardlı kəsir dərhal aydın görünür".

"Buna görə də Tramp hesab edir ki, ABŞ-a münasibətdə ticarət və iqtisadiyyat əlaqələri ədalətli deyil: "Yəni Amerikadan başqa hamı qazanır, o isə zərər çəkir. Və onun fikrincə, bu ədalətsiz vəziyyətə təcrübi olaraq son qoyulmalıdır" — Sputnik Azərbaycan-ın həmsöhbəti bildirib.

Topornin, həmçinin qeyd edib ki, ÜTT-nin rəhbəri Robertu Azevedu artıq Trampın sözlərinə reaksiya verib. Deyib ki, onlar artıq Amerika liderinin dediklərini eşidiblər. Azavedunun sözlərinə görə, Tramp müxtəlif vəziyyətlərdə və müxtəlif predmetlər üzrə bu məsələni qaldırıb. Onun sonuncu bəyanatı da təşkilat üçün yeni deyil.

"Bununla yanaşı, ÜTT rəhbərini bütün bunlar həyəcanlandırmaya bilməz. Çünki əgər amerikalılar həqiqətən də təşkilatdan çıxsalar, bu, konkret və kifayət qədər sərt şəkildə bütün dünya ticarətinə təsir göstərəcək" — ekspert bildirib.

Müsahibimiz diqqətə çatdırıb ki, Amerika dünyanın ən inkişaf etmiş iqtisadiyyatına malikdir: "Onun ÜDM-i ümumdünya ÜDM-nun dörddə birindən azacıq azdır. Və təbii olaraq dünyanın bütün ölkələri onunla əməkdaşlıq etmək istəyir".

Proteksionizm siyasəti

Toporninin fikrincə, özlüyündə ÜTT-dən çıxandan sonra amerikalılar proteksionizmlə məşğul olacaqlar: "Proteksionizm Trampın artıq çoxdan izlədiyi siyasətdir. Əgər onlar özünəməxsus rüsum əngəlləri ilə öz iqtisadiyyatlarının qapısını başqalarına bağlasalar, ABŞ-ın biznes tərəfdaşı olan digər ölkələr çox böyük zərər çəkəcək. Təbii olaraq bu, dünya ticarət dövriyyəsində iştirak edən bütün ölkələrə zərbə olacaq".

Politoloq hesab edir ki, əlbəttə, bütün bunlar həyəcanvericidir: "Əgər Tramp öz hədəsini reallığa çevirsə, beynəlxalq ticarət sahəsində böyük dəyişikliklər baş verəcək. Bir sıra ölkələr, xüsusilə də inkişaf etməkdə olanlar ciddi iqtisadi itkilərlə üzləşək. Nəticədə onlar sistemli bir böhranla qarşılaşacaq. Bir çox dövlətlər öz xarici ticarətində ABŞ-la birbaşa bağlıdır".

"Vəziyyətin necə inkişaf edəcəyindən danışası olsaq, bir neçə variant üzərində dayana bilərik. Birincisi, ÜTT, Trampın fikrincə, təşkilat daxilindəki ədalətsiz ticarət razılaşmaları təcrübəsini yenidən nəzərdən keçirə bilər. Bir sözlə, ÜTT illər ərzində əldə olunmuş nailiyyətlərindən imtina etməlidir" — deyə ekspert vurğulayıb.

Onun sözlərinə görə, dünya iqtisadiyyatı bu minvalla bir neçə onillik geriyə yuvarlanacaq: "Əgər Amerika ÜTT-dən çıxsa və üçüncü ölkənin məhsullarına qarşı proteksionist rüsumlar tətbiq etsə, başqaları da buna cavab olaraq, öz sahibkarları üçün şərtləri əlverişli etmək məqsədilə analoji tədbirləri görməyə məcbur olacaq".

"Belə olan təqdirdə bütün dünya yenidən qarşılıqlı olaraq rüsumları qaldıracaq, qarşılıqlı məhdudlaşdırıcı tarifləri tətbiq edəcək. Bu da sözsüz ki, dünyanın aparıcı ölkələrinin iqtisadiyyatlarının inkişafına təsir göstərəcək. Lakin inkişaf etməkdə olan ölkələr çətin dövrlərini yaşamağa məhkum olacaq" — deyə Topornin fikirlərini yekunlaşdırıb.

11426
Teqlər:
Fuad Əlizadə, Sputnik Azərbaycan, ÜTT, Ümumdünya Ticarət Təşkilatı, ekspert, iqtisadçı, Azərbaycan, ABŞ, iqtisadiyyat
Əlaqədar
Nazir müavini Azərbaycanın ticarət evlərinin fəalliyətindən danışır
Merkel: "Regionda Azərbaycanın simasında ən vacib ticarət tərəfdaşımız var"
Türkiyə-ABŞ ticarət müharibəsi: Qalib bəllidir
Vəziyyət daha da pisləşdi: Türkiyə ABŞ-la ticarət müharibəsinə başladı
Elektron ticarətdən istifadə edənlərin hesabına bonus yüklənsin - Təklif
Çin ticarət müharibəsində ABŞ-a yeni zərbə vurdu
ABŞ-Çin ticarət müharibəsi dünya iqtisadiyyatını çökdürə bilər - Ekspert şərhi
BVF

BVF dünyanı xilas etməyin yolunu tapıb: Rusiyanı yoxsulluqla təhdid edir

44
(Yenilənib 23:48 19.10.2020)
Beynəlxalq Valyuta Fondunun (BVF) rəhbərliyinin bəyanatlarından belə məlum olur ki, bu nəhəng beynəlxalq maliyyə təşkilatı 1944-cü ilə qayıtmaq niyyətindədir, ya da ən azı COVID-19 pandemiyasını bəhanə gətirərək 1944-cü ili təkrarlamaq istəyir

BAKI, 19 oktyabr — Sputnik. İvan Danilov. Beynəlxalq Valyuta Fondunun (BVF) rəhbərliyinin bəyanatlarından belə məlum olur ki, bu nəhəng beynəlxalq maliyyə təşkilatı 1944-cü ilə qayıtmaq niyyətindədir, ya da ən azı COVID-19 pandemiyasını bəhanə gətirərək 1944-cü ili təkrarlamaq istəyir. BVF rəhbərlərinin sözlərindən belə çıxır ki, təşkilat epidemiyanın iqtisadi və humanitar sahədəki nəticələrinin aradan qaldırılması üçün dünyaya yardım etməyə çalışır. Əslində isə onların bu sözlərinin arxasında tamamilə başqa məqsədlər dayanır. İnkişaf etməkdə olan ölkələrdə nüfuzu xeyli aşağı düşmüş bu iri maliyyə təşkilatının liderləri öz insanpərvər niyyətlərinə yalnız dünyadan xəbərsiz sadəlövh adamları inandıra bilərlər. Çünki bu Vaşinqton mərkəzli quruma borclu olan dövlətlərdə sosial proqramların dayandırıldığı və "iqtisadi dirçəlişdə BVF-nin tələblərini yerinə yetirmək" adı altında dövlət təşkilatlarının qəpik-quruşa satışa çıxarıldığı artıq çoxlarına sirr deyil.

Amerikalı rəqiblərimizin haqqını yeməməliyik: G7-nin elit-neomüstəmləkə klubu xaricindəki ölkələrin BVF-də nəzarəti ələ keçirmək cəhdləri qərar qəbuletmə prosesində Çinin (və ya hətta Rusiyanın) təsirinin artırılması istiqamətində müəyyən irəliləyiş olmasına baxmayaraq, hələlik uğurla nəticələnməyib.

Ümulikdə isə inkişaf etməkdə olan ölkələrin baş kreditoru (əslində isə "Planetin baş Şeyloku") hələ də qətiyyən ədalətli olmayan "qloballaşma" versiyasının təbliğinə yönəlib.

Əgər COVID-19 pandemiyası başladığı vaxt Qərb mediası və mütəxəssisləri qloballaşmanın bu versiyasının gələcək taleyi üçün narahat olurdularsa, indi "qlobal Şeylok" daha bir Bretton Vuds konfransına (BVF – məhz 1944-cü ildə keçirilən bu konfransda təsis edilib) ehtiyac olduğunu bildirir. Başqa sözlə, mövcud qloballaşma sxemi epidemiyanın əsas qurbanına çevrilib və necə deyərlər, hələ onun meyiti soyumamış iri maliyyə qurumları başqa bır qloballaşma metoduna ehtiyac olduğunu dünyaya car çəkir.

Beynəlxalq Valyuta Fondunun idarəedici direktoru Kristalina Georgiyeva Andorranın Fonda üzv olması ilə üst-üstə düşən rəsmi müraciətində tarixi anın gəlib çatdığını bildirir:

"Andorranı 190-cı üzvümüz kimi qarşılayacağımız anı səbirsizliklə gözlədiyimiz vaxt BVF-nin gördüyü iş bəşəriyyətin qardaşlıq və bərabərlik prinsipləri üzərində qurulan əməkdaşlıq və həmrəylik dəyərlərinin bir sübutudur. Bu gün biz yeni bir "Bretton Vuds anı" ilə qarşı-qarşıya qalmışıq. Pandemiya artıq bir milyondan çox insanın həyatına son qoyub. Bu il dünya iqtisadiyyatının 4,4 faiz geriləməsinə səbəb olan iqtisadi fəlakət gələn il bütün dünyada istehsalın 11 trilyon dollar azalması ilə nəticələnəcək. Və yenə bizim qarşımızda iki böyük məsələ dayanır: bu günün böhranı ilə mübarizə apararaq daha yaxşı gələcək qurmaq".

Baxın görün indi BVF nə təklif edir:

"Biz daha çox borc şəffaflığına və kreditorların koordinasiyasının yaxşılaşdırılmasına nail olmalıyıq. G20 ölkələrinin "Suveren Borcların Həlli üçün Ümumi Çərçivə" mövzusundakı müzakirələri və özəl sektor da daxil olmaqla suveren borc idarəçiliyi üçün daha yaxşı quruluş çağırışları bizi ruhlandırır. Üzv ölkələrimizlə birlikdə biz onların siyasətini dəstəkləyirik".

Buradakı "borc şəffaflığı" ifadəsinin əslində Çinə aid olduğunu başa düşmək çətin deyil. Bu ilin fevral ayında Yaponiyanın "Quarts" iqtisadiyyat jurnalı BVF-nin və Dünya Bankının (DB) Çinin inkişaf etmiş ölkələrə təsirinin artmasından narahat olduqlarını yazmışdı.

Co Bayden, arxiv şəkli
© REUTERS / Kevin Lamarque / File Photo

"BVF və DB Çinin təsir gücünün artmasından narahatdır. Çin böyük kreditor olmasa da, zəif iqtisadi parametrlərinə görə seçim imkanı məhdud olan Afrika ölkələrində son dərəcə təsirli kapital mənbəyinə çevrilib. Çin qitə daxilində çox ehtiyac duyulan infrastruktur layihələri üçün dövlət müəssisələri vasitəsi ilə əlverişli maliyyə paketi təqdim edir. Dünya Bankının Prezidenti Devid Malpassanın sözlərinə görə, bu zaman ortaya çıxan əsas problemlərdən biri şəffaflığın olmamasıdır: "Onlar (Çin – müəllifin qeydi.) kreditin həcmini artırıblar və bu yaxşı halıdır. Biz inkişaf etməkdə olan ölkələrə daha çox kredit verməyin tərəfdarıyıq. Ancaq çox vaxt onların müqaviləsində xüsusi maddə olur ki, bu da Dünya Bankına və ya özəl sektora kredit sazişinin şərtlərini görməyi qadağan edir".

Böyük ehtimalla BVF Çinin kimə nə qədər kredit verməsinə bu ölkənin özünün deyil, Qərb dövlətlərinin və fondun nümayəndələrinin iştirakı ilə keçirilən çoxtərəfli format çərçivəsində qərar verilməsini istəyir. Bu isə yeni bir qlobal maliyyə qardaşlığı qurmaq cəhdi kimi deyil, inkişaf etməkdə olan ölkələr üçün mövcud və əslində neomüstəmləkə kreditləşmə sxemini nəyin bahasına olursa olsun qorumaq istəyi kimi görünür ki, Pekin də buna mane olur.

BVF-nin parlaq qlobal gələcək qurmaq üçün əsaslandığı digər təməl prinsip də Rusiyanın iqtisadi təhlükəsizliyi və büdcəsi üçün birbaşa təhdiddir:

"Pandemiya artıq sağlamlıq tədbirlərinə laqeyd qalmayacağımızı göstərdiyi kimi, iqlim dəyişikliyini də görməzlikdən gələ bilmərik - bu bizim üçüncü imperativimizdir. Makro iqtisadi səviyyədə mühüm əhəmiyyət kəsb etdiyindən, inkişaf və rifah üçün böyük təhdidlər yaratdığından iqlim dəyişikliyinə də xüsusi diqqət yetiririk. Bu insanlar və planet üçün çox vacibdir. Araşdırmalarımız göstərir ki, aparılan düzgün maliyyə siyasəti və karbon qiymətlərinin bahalaşması nəticəsində 2050-ci ilədək atmosferə atılan tullantıları sıfıra endirmək və milyonlarla yeni iş yerinin açılmasına kömək etmək mümkündür. Yaşıl bir dünya qurmaq, eyni zamanda insanların rifah halını yaxşılaşdırmaq üçün tarixi fürsətimiz var – aşağı faiz dərəcələri ilə bu günün doğru investisiyaları sabah bizə dörd qat divident qazandıra bilər: gələcək itkilərin qarşısını almaq, iqtisadi qazancları stimullaşdırmaq, həyatları xilas etmək və hamı üçün sosial və ekoloji fayda əldə etmək".

Əslində bütün bunlar aşağıdakı mənaya gəlir: "150 ildir karbohidrogenlərin kütləvi istifadəsi ilə ən yüksək texniki tərəqqinin nəticələrindən zövq alan Qərb ölkələri yenə firavan həyat sürməyə davam edəcəklər, dünyanın qalan hissəsi isə "iqlim mühafizəsi" adı altında əbədi yoxsulluğun alçaldıcı məhrumiyyətlərinə məruz qalacaq.

Yaşıl enerjinin yaratdığı iş yerləri isə eko-aktivistlər, Avropa və Amerikada yaşıl enerji şirkətlərinin səhmdarları üçün iş yerlərindən başqa bir şey olmayacaq.

BVF direktorunun haqqında söz açdığı "karbon qiymətlərinin bahalaşması" Avropa Şurasının Rusiyaya qarşı tətbiq etmək istədiyi "karbon tarifləri"nin "müjdəçi"si sayıla bilər. Avropa Şurası davamlı şəkildə Rusiyanı ucuz neft və qaza görə bu tariflərlə təhdid edir.

Rusiyaya qarşı karbon tariflərinin tətbiqi vəziyyətində ixracatçılarımız (və sosial proqramlar ilə birlikdə Rusiya büdcəsi) ildə on milyard dollar itirəcək, əvəzində Qreta Tunberqin pərəstişkarları və yaşıl iqtisadiyyat tərəfdarları xoşbəxt olacaqlar. BVF-nin canlandırdığı parlaq gələcək Oruel qələminə layiq Ezop dili ilə yazılmış antiutopiyadan başqa bir şey deyil: ekologiya – yoxsulluq, şəffaflıq – Vaşinqtona və BVF-yə boyun əymək kimi başa düşülməlidir.

Doğrudan da biz tarixi anla qarşı-qarşıya qalmışıq. Ancaq bu, ikinci Bretton Vuds hadisəsinin yaşanması üçün deyil, 1944-cü ildə ABŞ-da ortaya çıxan qloballaşma bədheybətinin axırına çıxmaq üçün həlledici məqamdır.

44
Azərbaycan manatı, arxiv şəkli

Hansı sahələrdə maaş daha yüksək olub?

36
2020-ci ilin yanvar-avqust aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 20,5 faiz artıb.

BAKI, 19 oktyabr — Sputnik. 2020-ci il sentyabrın 1-i vəziyyətinə ölkə iqtisadiyyatında muzdla çalışan işçilərin sayı ötən ilin eyni dövrü ilə müqayisədə 59,8 min nəfər və ya 3,7 faiz artaraq 1670,9 min nəfər olub.

Sputnik Azərbaycan Dövlət Statistika Komitəsinə istinadla xəbər verir ki, muzdla çalışanların 902,3 min nəfəri iqtisadiyyatın dövlət sektorunda, 768,6 min nəfəri isə qeyri-dövlət sektorunda fəaliyyət göstərib.

Muzdla işləyənlərin 19,4 faizi təhsil, 18,3 faizi ticarət, nəqliyyat vasitələrinin təmiri, 13,2 faizi sənaye, 8,3 faizi tikinti, 8,2 faizi əhaliyə səhiyyə və sosial xidmətlərin göstərilməsi, 6,6 faizi dövlət idarəetməsi və müdafiə, sosial təminat, 4,5 faizi nəqliyyat və anbar təsərrüfatı, 3,4 faizi kənd təsərrüfatı, meşə təsərrüfatı və balıqçılıq, 3,4 faizi peşə, elmi və texniki fəaliyyət, 1,7 faizi maliyyə və sığorta fəaliyyəti, 13 faizi isə iqtisadiyyatın digər sahələrində məşğul olublar.

2020-ci ilin yanvar-avqust aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 20,5 faiz artaraq 710,2 manat olub.

İqtisadiyyatın mədənçıxarma sənayesi, maliyyə və sığorta fəaliyyəti, peşə, elmi və texniki fəaliyyət, informasiya və rabitə, eləcə də nəqliyyat və anbar təsərrüfatı sahələrində orta aylıq nominal əməkhaqqı daha yüksək olub.

36
Azərbaycan Respublikası Müdafiə Nazirliyinin binası

MN: Qubadlı-Zəngilan istiqamətində döyüşlər davam edir

40
(Yenilənib 08:04 20.10.2020)
Fizuli rayonu istiqamətində əks-hücuma keçən düşmən bölmələrindən birinin 30 nəfər şəxsi heyəti Azərbaycan Ordusunun atəşi nəticəsində darmadağın edilib.

BAKI, 20 oktyabr - Sputnik. Oktyabrın 19-u gün ərzində və 20-ə keçən gecə cəbhənin Ağdərə-Ağdam, Füzuli-Hadrut-Cəbrayıl və Qubadlı-Zəngilan istiqamətlərində müqavimət göstərməyə cəhd edən düşmənə qarşı döyüş əməliyyatları müxtəlif intensivliklə davam edib. Düşmən müdafiə mövqelərimizi atıcı silahlar, minaatanlar və toplardan atəşə tutub. Bu barədə Sputnik Azərbaycan Müdafiə Nazirliyinə istinadən məlumat verir.

Azərbaycan Ordusu tərəfindən həyata keçirilən fəaliyyətlər nəticəsində cəbhənin müxtəlif istiqamətlərində düşmənin canlı qüvvəsi, 2 ədəd T-72 tankı, 4 ədəd BM-21 “Qrad” YARS, 1 ədəd D-30 haubitsa topu və 5 ədəd avtomobil texnikası məhv edilib və sıradan çıxarılıb.

Qoşunlarımız bütün cəbhə boyu əməliyyat şəraitinə nəzarət edir.

Eyni zamanda məlum olub ki, Azərbaycan Ordusunun endirdiyi artilleriya zərbələri nəticəsində Ermənistan silahlı qüvvələrinin 1-ci motoatıcı alayının müdafiə sahəsində düşmən bölmələrinin şəxsi heyəti arasında çoxlu sayda ölən və yaralanan olub. Alayın 1-ci motoatıcı taborunun şəxsi heyəti və döyüş texnikası tamamilə sıradan çıxarılıb. Alay komandirinin müavini Hovik Melkumyan, digər vəzifəli şəxs Qor Mirzoyan, həmçinin alayın müdafiə zolağında mövqe tutan xüsusi təyinatlı bölmənin komandiri kapitan Vahab Asetryan da zərərsizləşdirilib.

Azərbaycan Ordusunun həyata keçirdiyi tədbirlər nəticəsində 2-ci motoatıcı alayın müdafiə sahəsində düşmənin bir bölməsi döyüş mövqelərini tərk edərək geri çəkilib.

5-ci motoatıcı alayın müdafiə sahəsində düşmən bölmələrinin şəxsi heyəti arasında çoxlu sayda ölən və yaralanan var. Yaralılar arasında bölük komandiri Norik Ağakelyanın da olduğu bildirilir.

Prezident İlham Əliyev, arxiv şəkli
© Official website of President of Azerbaijan Republic

18-ci motoatıcı diviziyasının müdafiə zolağında yerləşdirilən muzdlulardan ibarət “Legion” dəstəsi və ehtiyatdan çağırılmış hərbi vəzifəlilər döyüşlərdə iştirak etməkdən imtina edib. Məlum olub ki, ağır itkilərə məruz qalan bu dəstələr onlara tapşırılmış müdafiə sahələrində tab gətirməyərək kütləvi şəkildə fərarilik edir.

Bundan əlavə, 10-cu dağatıcı diviziyanın müdafiə zolağına gətirilmiş kəşfiyyat bölüyü də canlı qüvvə baxımından itkilərə məruz qalıb. Şəxsi heyətin üçdə ikisini itirən bölmə mövqeləri ataraq geri çəkilməyə məcbur edilib.

Fizuli rayonu istiqamətində əks-hücuma keçən düşmən bölmələrindən birinin 30 nəfər şəxsi heyəti Azərbaycan Ordusunun atəşi nəticəsində darmadağın edilib.

246-ci alayın müdafiə sahəsində alay komandiri polkovnik Tatul Ğazaryan, alay komandirinin müavini Armen Ohanyan və 3-cü taborun komandiri də xüsusi tədbirlər nəticəsində zərərsizləşdirlib.

40
Teqlər:
Müdafiə Nazirliyi, Zəngilan, Qubadlı, erməni təxribatı
Mövzu:
Azərbaycan və Ermənistan arasında müharibə