Siqaretlər, arxiv şəkli

Vergi üç dəfə artırılıb: Siqaretlər yenə bahalaşacaq

1337
Ekspert: "Siqaretin qiymətinin artımı nəticəsində alıcılıq imkanları hələ də zəif olan ölkə əhalisi daha aşağı keyfiyyətli siqaret istehlakçısına çevriləcək"

Xalid Məmmədov, Sputnik Azərbaycan

BAKI, 18 iyun — Sputnik. Azərbaycanda tütündən hazırlanan siqaretlərə tətbiq edilən vergi dərəcəsi artırılıb. Sputnik Azərbaycan-ın məlumatına görə, bununla bağlı Vergi Məcəlləsinin 190-cı (aksizli malların siyahısı və vergi dərəcələri) maddəsinə dəyişikliklər edilib.

Dəyişikliyə əsasən, tütündən hazırlanan siqaretlər və onun əvəzedicilərinin 1000 ədədinə 12 manat vergi tutulacaq. Hazırda isə bu məbləğ 4 manat təşkil edir.

Digər bir dəyişikliklə Azərbaycanda istehsal olunan siqarlar, ucları kəsilən siqarlar və siqarillaların (nazik siqarlar) 1000 ədədinə görə 20 manat vergi tutulacaq. İndiyədək isə bu, 10 manat idi.

Qeyd edək ki, dəyişikliklər Azərbaycanda istehsal olunan tütün məmulatlarına tətbiq olunan aksiz dərəcələrinin artırılması məqsədilə hazırlanıb. Və Milli Məclisin mayın 12-də keçirilən növbədənkənar plenar iclasında səsə qoyularaq qəbul edilib.


Vergi dərəcəsinin artırılması ilə bağlı Azərbaycan Dövlət İqtisad Universitetinin (UNEC) dosenti Elşən Bağırzadə Sputnik Azərbaycan-a açıqlama verib. O deyib ki, ötən ilki vəziyyətə baxsaq, Vergilər Nazirliyinin dövlət büdcəsi qarşısında götürdüyü öhdəlikləri tam yerinə yetirə bilmədiyini görərik.

E.Bağırzadə qeyd edib ki, vergi sistemində iki istiqamətdə işlər görülməlidir:

"Birincisi, qeyri-rəsmi sektor kifayət qədər məhdudlaşdırılmalıdır ki, oradan vergi gəlirləri artsın. Yəni vergi bazasının genişləndirilməsi hesabına. İkincisi, yeni vergi mənbələri axtarılıb tapılmalıdır. Onlardan da biri dünya təcrübəsinə uyğun daha çox lüks istehlaka qoyulan vergilərdir".

"Siqaret kifayət qədər lüks istehlakdır. Dünyanın hər yerində dövlətlər yeni vergi qoyulması ilə bağlı vergi mənbələri axtaranda ilk növbədə spirtli içkilərin, siqaretlərin və s. üzərinə düşürlər. Eyni zamanda bunlar da kifayət qədər zərərli məhsullardır. Bu baxımdan düşünürəm ki, bu da həmin siyasətin davamıdır ki, vergi gəlirlərini artırsın" — deyə ekspert bildirib.

O, bu addımın siqaretin qiymətinə təsir edəcəyini də qeyd edib.

Yanacaqdoldurma məntəqəsi, arxiv şəkli
© Sputnik / Максим Богодвид

İqtisadçı-ekspert Rəşad Həsənov isə Sputnik Azərbaycan-a açıqlamasında deyib ki, hökumət hazırda müxtəlif istiqamətlərdən büdcə daxilolmalarını artırmağa çalışır: "Əksər hallarda bu istiqamətlərdə vergi dərəcələrinin artması hər hansı bir sosial qıcıq formalaşdırmır. Hökumət çalışır ki, hazırda alternativ istiqamətlərdən gəlirləri daha da artırsın. Məqsəd budur".

R.Həsənovun fikrincə, 3 dəfə verginin artırılması son nəticədə bazarda qiymətlərə öz təsirini göstərəcək: "Xüsusilə də Azərbaycanda tütün bazarında həm idxalda, həm də daxili istehsalda inhisarçılıq var. Bu isə imkan yaradır ki, qiymətləri hansısa formada artırmaq mümkün olsun".

Onun sözlərinə görə, əvvəlki dövrlərdə qiymətlərin artmasını əngəlləyən müəyyən faktorlardan biri də qaçaqmalçılıq yolu ilə ölkəyə idxal olunan siqaret və digər tütün məhsulları idi. Hazırda qaçaqmalçılıqla mübarizə səyləri daha da artırılıb və bunun qarşısı alınır.

İqtisadçı düşünür ki, siqaretin qiyməti yaxın gələcəkdə bahalaşacaq:

"Nəticədə büdcənin bu istiqamətdə gəlirlərində müəyyən qədər artım olacaq. İkincisi, qiymətlər bahalaşacaq. Üçüncüsü, alıcılıq imkanları hələ də zəif olan ölkə əhalisi daha aşağı keyfiyyətli siqaret istehlakçısına çevriləcək".

Ekspert bildirib ki, ilk növbədə yerli istehsal olunan məhsulların qiymətində dəyişiklik baş verəcək. Amma Azərbaycan bazarının xüsusiyyətlərini nəzərə alsaq, çox qısa müddətdə idxal olunan məhsulların da qiymətlərində uyğunlaşma aparılacaq. Tələblər arasında müəyyən uzlaşma da var. Yəni bu, idxal olunan məhsulların da bahalaşmasını şərtləndirəcək.

Qeyd edək ki, parlamentin İqtisadi siyasət, sənaye və sahibkarlıq Komitəsinin üzvü Rüfət Quliyev deyib ki, dəyişikliklər nəticəsində Azərbaycanda istehsal olunan siqarlar, ucları kəsilən siqarlar və siqarillalara (nazik siqarlar) tətbiq edilən vergi dərəcəsinin artırılması istehlakçılara ciddi təsir göstərməyəcək. Çünki sözügedən məhsullar ümumilikdə tütün məhsulları bazarının 0,1-0,3%-ni təşkil edir.


Deputatın sözlərinə görə, siqarlar, ucları kəsilən siqarlar və siqarillalar zərif məhsullardır və onsuz da klassik siqaretlərdən bahadır: "Qanunvericiliyə edilən dəyişikliyin tütün bazarında ajiotaja səbəb olacağını düşünmürəm. Onsuz da siqar, ucları kəsilən siqar və siqarillalar kütləvi istifadə olunan məhsullar deyil. Onlardan yalnız müəyyən bəlli kontingent istifadə edir".

Quliyev bildirib ki, son 2-3 ildə dövlət güclü proteksionizm siyasəti həyata keçirir, lakin söhbət praqmatik proteksionizmdən gedir:

"Amma bu, o demək deyil ki, hər şeyin qiymətini qaldırmaq, yaxud da bunun qarşısını almaq lazımdır. Düzünü deyim ki, mən hələ bilmirəm, kim siqar və siqarillaları istehsal edəcək, ancaq bəzi planlar ola bilər. Hər halda Azərbaycan dünya iqtisadiyyatının inkişaf yolundadır".

"Avropa və Asiyanın qabaqcıl ölkələrində gedən proseslər təbii olaraq, bir il tez, yaxud gec bizdə də baş verəcək. Bundan əlavə, qəlyan tütününün istehsalı çox maraqlı ola bilər. Bu gün Azərbaycanda bazar var və tələbat da ildən-ilə minimum 10% səviyyəsində artır. O, bütün dünyada inkişaf edir, Azərbaycanda da" — deyə millət vəkili bildirib.

1337
Teqlər:
siqarilla, Azərbaycan Dövlət İqtisad Universiteti, UNEC, Vergilər Nazirliyi, siqaret, vergi, Azərbaycan
Əlaqədar
Aksiz markası olmayan siqaret və içkilər aşkarlanıb
Külli miqdarda siqaret müsadirə olunub
Siqaret qadağası ilə bağlı daha bir xəbərdarlıq
Deputat siqaretin bahalaşacağı gözlənitisinə aydınlıq gətirdi: "Ajiotaja səbəb olmayacaq"
Siqaretin yeni qiyməti açıqlandı
Pakistan bayrağı, arxiv şəkli

Xarici ölkələrdə Azərbaycan ticarət evlərinin sayı artırılacaq

9
(Yenilənib 16:03 28.01.2021)
"Azərbaycan Ticarət Evi" layihəsinə dair ticarət evlərinin yeni fəaliyyət konsepsiyası hazırlanıb. Daha iki ölkədə bu cür nöqtələr açıla bilər

BAKI, 28 yanvar — Sputnik. "Azərbaycan Ticarət Evi" layihəsinə dair ticarət evlərinin yeni fəaliyyət konsepsiyası hazırlanıb.

Sputnik Azərbaycan xəbər verir ki, bu barədə Azərbaycanda İxracın və İnvestisiyaların Təşviqi Fondunun (AZPROMO) rəhbəri vəzifələrini icra edən Yusif Abdullayev keçirdiyi mətbuat konfransında deyib.

Y.Abdullayev qeyd edib ki, Pakistan və Yaponiyada Azərbaycan Ticarət evlərinin açılması ilə bağlı müraciətlər var. Hazırda bu ölkələrin bazarları araşdırılır.

Qeyd edək ki, ilk "Azərbaycan Ticarət Evi" 2017-ci ilin mayında Minsk şəhərində açılıb.

9
Teqlər:
Pakistan, Yaponiya, Azərbaycan, ticarət, iqtisadiyyat
Pomidor satışı, arxiv şəkli

Azərbaycan pomidorları üçün başqa bazarlar tapıldı

30
(Yenilənib 14:40 28.01.2021)
Azərbaycan Avropa və Körfəz ölkələrinə pomidor ixrac etmək istəyir. Ancaq bu bazarlara məhsulun ixracı ilə bağlı xüsusi sertifikatlar əldə etmək lazımdır.

BAKI, 28 yanvar — Sputnik. "Pomidor istehsalçılarımız üçün yeni ixrac bazarlarının qurulması istiqamətində işlər aparılır".

Sputnik Azərbaycan xəbər verir ki, bu barədə Azərbaycanda İxracın və İnvestisiyaların Təşviqi Fondunun (AZPROMO) rəhbəri vəzifələrini icra edən Yusif Abdullayev deyib.

O bildirib ki, bu il pomidor məhsullarının ixracı ilə bağlı diversifikasiya məsələsi ciddi şəkildə nəzərdə tutulur: "Pomidor ixracı ilə bağlı Avropa və Körfəz ölkələri nəzərdən keçirilir. Bu bazarlara məhsulun ixracı ilə bağlı xüsusi sertifikatlar əldə etmək lazımdır. Bu istiqamətdə artıq işlərə başlanılıb. Məsələn, “Globalgap” sertifikatı olmasa, məhsul Avropaya ixrac edilə bilməz. Körfəz ölkələrində də bu sertifikat istənilir, lakin mütləq deyil. Ancaq bu sertifikatı olan məhsul daha yaxşı qəbul olunur".

30
Teqlər:
Körfəz, Avropa, Azərbaycan, bazar, ixrac, pomidor
Türkiyə Prezidenti Rəcəb Tayyib Ərdoğan koronavirusdan peyvənd vurdurur, arxiv şəkli

Ərdoğandan müjdə: Türkiyə üçüncü yerdədir

0
(Yenilənib 20:03 28.01.2021)
Türkiyə prezidenti: "Dünyanın koronavirusla mübarizə apardığı dövrdə elm adamlarımızın əldə etdiyi nailiyyətləri də izləyirik. 436 alim peyvənd və dərman hazırlamaqla bağlı 17 layihə həyata keçirir".

BAKI, 28 yanvar — Sputnik. Koronavirusla mübarizə üçün Türkiyənin yerli istehsalı olan üç yeni növ peyvəndin sınağına başlanılır. Sputnik Azərbaycan "Milliyet"-ə istinadən xəbər verir ki, bunu Türkiyənin Prezidenti Rəcəb Tayyib Ərdoğan bildirib.

"Dünyanın koronavirusla mübarizə apardığı dövrdə elm adamlarımızın əldə etdiyi nailiyyətləri də izləyirik. 436 alim peyvənd və dərman hazırlamaqla bağlı 17 layihə həyata keçirir. Alimlərimizin iş və təcrübələri dünyaya örnək olaraq göstərilir. Üç yeni növ peyvəndin sınağına başlanılır. Yeni növ peyvəndin yerli və milli istehsalı məsələsində özəl sektoru da səfərbər etdik. Ümumdünya Səhiyyə Təşkilatının məlumatına görə, ABŞ və Çindən sonra ən çox peyvənd layihəsini həyata keçirən ölkəyik".

Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 100,8 milyonu keçib, 2,17 milyondan çox adam isə virus səbəbilə ölüb.

Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.

0
Teqlər:
Türkiyə Prezidenti Rəcəb Tayyib Ərdoğan, Rəcəb Tayyib Ərdoğan, Ərdoğan, Koronavirus, epidemiya, COVID-19