BAKI, 31 oktyabr — Sputnik. Parlamentin plenar iclasında "Sahibkarlıq sahəsində aparılan yoxlamaların dayandırılması haqqında" qanuna dəyişikliklərə baxılıb. Sputnik Azərbaycan xəbər verir ki, həmin qanunun 1-ci maddəsində "2 (iki) il müddətinə" sözləri "2021-ci il yanvarın 1-dək" sözləri ilə əvəz edilib.
2.1-ci maddənin birinci cümləsinə "yoxlamaları," sözündən sonra "müvafiq icra hakimiyyəti orqanı tərəfindən dərman vasitələrinin keyfiyyəti, təhlükəsizliyi qaydalarına riayət edilməsi və qida məhsullarının təhlükəsizliyinə nəzarətin həyata keçirilməsi ilə bağlı yoxlamalar, habelə" sözləri əlavə olunub.
Beləliklə, "Sahibkarlıq sahəsində aparılan yoxlamaların dayandırılması haqqında" qanunda dəyişikliklər edilərək yoxlamaların dayandırılması 2021-ci il yanvarın 1-dək uzadılır. Dəyişikliyə əsasən, dərman vasitələrinin keyfiyyəti, təhlükəsizliyi qaydalarına riayət edilməsi və qida məhsullarının təhlükəsizliyinə nəzarətlə bağlı yoxlamaların həyata keçirilməsinə icazə verilir.
Qeyd edək ki, "Sahibkarlıq sahəsində aparılan yoxlamaların dayandırılması haqqında" qanuna əsasən sahibkarlıq sahəsində yoxlamaların dayandırılması müddəti bu ilin noyabrın 1-də bitir.
Qanun layihəsi səsə qoyularaq qəbul edilib.
