Planşetdən istifadə edən uşaqlar, arxiv şəkli

Gələcəyimizin varisi olan uşaqlar nəyə baxırlar?

72
(Yenilənib 15:08 16.08.2021)
Animator bildiri ki, əksər xarici cizgi filmləri kommersiyaya xidmət edir, bu isə uşaqları məhvə aparır.

BAKI, 15 avqust — Sputnik. Cizgi filmləri hər bir uşağın formalaşmasında əhəmiyyətli rol oynayır. Bu gün Azərbaycanda ən böyük problemlərdən biri də milli cizgi filmlərinin qıtlığıdır. Bununla bağlı Azərbaycan Animasiya filmləri studiyasının ("Azan" film studiyası) animatoru Sultan Abbasbəyli ilə Milli cizgi filmlərinin istehsalından, cizgi filmlərinin uşaqlara təsirindən Sputnik Azərbaycan-a danışıb: "Ölkədə milli cizgi filmlərinin sayı mütləq artmalıdır. İl ərzində 1-2 cizgi filmi istehsal olunur. Amma bu, çox azdır. Mütləq cizgi serialları, silsilə cizgi filmləri olmaldır. Hazırda "Oğurlanmış bahar" filmi, "Tıq-tıq xanım möcüzələr axtarışında" serialının 2-ci bölümü tamamlanmaq üzrədir. Bu cizgi fimləri həm də uşaqlar üçün faydalıdır. Belə ki, o hər dəfə bir bölgəyə səfər edir. Orada olan möcüzələrlə balaca tamaşaçıları tanış edir. Birinci bölümdə Dəmirağaca, ikinci bölümdə Qobustana, üçüncü bölümdə Qarabağa gedəcək. Orada Azıx mağarası, Xudafərin körpüsü haqqında məlumat veriləcək. Bununla da uşaqlar həm də Azərbaycanı tanımış olacaqlar".

Həmsöhbətimiz deyir ki, balaca tamaşaçılarımızın xarici cizgi filmləri ilə böyüməsinin böyük fəsadları ola bilər: "Mənim qohumumun uşağı bir dəfə atama "əlinizdən öpürəm" demişdi. Bizdə bu adət yoxdur. Bu, Osmanlı türklərinə məxsus adətdir. Bu o deməkdir ki artıq uşaqlarımız bizim ənənələrdən bixəbərdirlər. Mən demirəm baxmasınlar, elə xarici cizgi filmləri var ki, hətta onları tövsiyə edirəm. Amma paralel olaraq öz cizgi filmlərimizə də baxsınlar. Xüsusən tələffüzlərdə problem yaranıb. Xüsusən "c", "ç" samitlərinin tələffüzündə problem yaranıb. Uşaqlar öz dilimizdə deyil, başqa dillərdə dil açır".

Animatorun sözlərinə görə, bəzi xarici cizgi filmləri sırf kommersiya xarakterlidir: "Əksər xarici cizgi filmləri kommersiyaya xidmət edir. Bu da uşaqları məhvə aparır. Yaxşı olar ki, valideynlər bu məsələlərə diqqət eləsinlər. Əks halda bu, uşaqlarımızda çox ciddi fəsadlar buraxa bilər. Uşaqlar həmin kommersiya xarakterli cizgi filmlərinə baxır, orada gördüklərini tətbiq etməyə çalışır. Uşaqlarda aqressivlik formalaşır. Bu da təəssüf ki, bəzən uşaq intiharı ilə nəticələnir ".

"Azan" film studiyasında rejissor və animator kimi fəaliyyət göstərən müsahibimiz bildirir ki, cizgi filminin istehsalında psixoloqla məsləhətləşmək lazımdır: "Biz cizgi filminin ssenarisinindən tutmuş hər kadrına qədər psixoloqla məsləhətləşirik. Ola bilər bizim üçün adi bir söz, adi bir kadr olsun, amma bu uşaq psixologiyasına pis təsir edə bilər. Bizim cizgi filmlərimizdə heç bir aqressiya yoxdur. Həm əyləncəlidir, həm də maarifləndiricidir. Tıq-tıq xanım bizim köhnə cizgi qəhrəmanımızdır. Amma ora yeni personajlar əlavə etmişik. Bizim uşaqlığımızın Tıq-Tıq xanımı vəfasızdır, gedir özünə başqa dost axtarır. Bu da uşaqlara çox pis mesajdır. Amma bizim müasir Tıq-Tıq xanımımız daha qayğıkeşdir, dostları var. O hər səyahətdə yeni dostlar tapır və Azərbaycanın dilbər guşələrini gəzir, balaca tamaşaçılarımızı həmin yerlərlə tanış edir".

"Balaca tamaşaçılarımıza vətənpərvərlik hisslərinin aşılanması üçün cizgi filmlərinin böyük rolu var" deyir həmsöhbətimiz: "Mən özüm vətənpərvərlik mövzusunda cizgi filmimi hazırlamışam. Gənclər və İdman nazirliyi virtual formatda müsabiqə elan edib. Müsabiqə müharibə və pandemiya mövzusundadır. Mən həm o müsabiqə üçün, həm də öz vətəndaş borcumu yerinə yetirmək üçün çəkmişəm. Bizim qəhrəmanlarımızdan biri Camal Qəmbərov Cəbrayıl rayonunun işğaldan azad olunmasında fəal iştirak etdi. Xatırlayırsınızsa, gedib öz həyətini tapmışdı. Orada işğaldan öncə əkdikləri nar ağacından nar dərib foto çəkdirmişdi. Bu, hər birimizi duyğulandırmışdı. Mən həmin mövzuda animasiya hazırlamışam".

Qəhrəmanımız heç bir ali təhsil almayıb. Təəssüflə qeyd edir ki, bizdə animasiya üzrə təhsil yoxdur: "Mən Mədəniyyət və İncəsənət Universitetinə qəbul olundum, amma ödənişli olduğuna görə imtina etdim. 17 yaşımdan kinostudiyada çalışıram. O vaxt qarşıma məqsəd qoymuşdum ki, animasiya sənətini inkişaf etdirəcəyəm. O hədəfə doğru durmadan irəliləmişəm, daha da irəliləyəcəyəm. Özüm internetdən öyrənirdim, Azərbaycanın tanınmış animasiya rejissoru Elçin Hami Axundov da mənə bu yolda çox kömək edib. Mənim tələbələrim olub bu sahədə. Ümid edirəm animasiya kursları açılar, universitetdə fakültələr açılar bu sahədə, biz də gedib tədris edərik".

"Rəşid Ağamalıyevin yaratdığı "Animafilm" festivalı animasiyanın inkişafına təkan verəcək. Bu müsabiqə yeni animatorların tanınmasına çox kömək edəcək. Bizim 6 ay işlədiyimiz cizgi filminə uşaq əlini yuyub gəlib oturub baxmağa hazırlaşanda cizgi filmi bitir. O da bir dəfə efirə gedir. Ona görə də davamlı olaraq çəkilməldir ki, uşaqlar baxsınlar. Bu sahə çox bahalı sahədir. Ona görə də mütləq dövlət və özəl qurumlar yardım etməlidir. Mən özüm reklam roliklərindən gəlir əldə edirəm. Halbuki mənim faydam daha çox cizgi filminə dəyə bilər. Cizgi filmindən gəlir əldə etsəm parçalanmaram, ancaq bir istiqamətə - cizgi filmlərinə yönəldərəm fikrimi" - deyə S.Abbasbəyli fikrini tamamlayır.

Həmçinin oxuyun:

İyirmi yeddi il sonra doğma evinə qayıdan zabitimiz haqqında cizgi filmi çəkilib - VİDEO

Uşaq Koroğlunu cizgi filmində görmürsə, sevimlisi də Turbomen olacaq

72

Cəbiş müəllim Süleyman Ələsgərov haqqında - "Qarabağ inciləri" silsiləsindən

743
Cəbiş müəllim Şuşanın Azərbaycan mədəniyyətinə bəxş etdiyi təkrarolunmaz bəstəkar, Xalq artisti, Dövlət mükafatı laureatı, Azərbaycan Bəstəkarlar İttifaqının Qarabağ filialının rəhbəri olmuş Süleyman Ələsgərov haqqında danışır.

Görkəmli bəstəkar və ictimai xadim Süleyman Ələsgərov 22 fevral 1924-cü ildə Şuşada anadan olub.

Azərbaycan musiqi tarixində və inkişafında istedadlı dirijor, tanınmış pedaqoq və ictimai xadim, professor Süleyman Ələsgərov özünəməxsus fəxri yer tutan bəstəkarlardan biridir. Onun yaradıcılığı Azərbaycan peşəkar musiqi tarixinin parlaq səhifəsini təşkil edir.

Musiqişünasların fikrincə, Süleyman Ələsgərov musiqisi üçün şən, sevindirici əhval-ruhiyyə, emosionallıq, fikrin səmimiyyəti xasdır. Xalq yaradıcılığına xas olan intonasiyalardan, ritmlərdən geniş istifadə edən bəstəkar folklor sənətinin təkraredilməzliyini, orijinallığını öz əsərlərində səmimi şəkildə ifadə edə bilmişdi.

Bəstəkar 2 operanın, 12 musiqili komediyanın, 2 simfoniyanın müəllifi olmaqla yanaşı, tar ilə Azərbaycan xalq çalğı alətləri orkestri üçün 3 konsertin, 200-ə qədər mahnı və romansların müəllifidir.

Azərbaycan Dövlət Konservatoriyasında məşhur pedaqoq, professor Boris Zeydmanın bəstəkarlıq sinfində təhsil alarkən o, Sovet Ittifaqı Qəhrəmanı, general Həzi Aslanova həsr olunmuş simfonik poema, “Məhəbbət gülü” musiqili komediyasını, simli kvartet, skripka, violonçel və fortepiano üçün trio, “Xatirə” əsərlərini yazır.

Süleyman Ələsgərovun violonçel, fortepiano və simfonik orkestr üçün yazdığı ikili konsert onun yaradıcılığında müstəsna yer tutur. Bu əsər milli konsert janrının təşəkkülündə və inkişafında müəyyən mərhələ rolunu oynayıb.

Bəstəkarın yaradıcılığında mahnılarla yanaşı, romanslar da xüsusi yer tutur. Onun romanslarının çoxu Azərbaycan klassiklərinin şeir və qəzəllərinə yazılmışdır.

Süleyman Ələsgərovun 12 musiqili komediyası Azərbaycan Dövlət Musiqili Komediya Teatrında tamaşaya qoyulmuş və bəstəkara şöhrət gətirmişdir. Bu səhnə əsərlərində o, dahi Üzeyir Hacıbəyovun musiqili komediya ənənələrini öz yaradıcılığında davam etdirmişdir.

Sonralar bir-birinin ardınca gələn “Ulduz”, “Özümüz bilərik”, “Milyonçunun dilənçi oğlu”, “Hərənin öz ulduzu” və sairə musiqili komediyaları bəstəkarın bu sahədə böyük yaradıcılıq imkanlarının göstəricisidir.

Onun musiqili komediyaları arasında “Ulduz” daha çox məşhurdur. “Ulduz” ilk dəfə 1948-ci ildə tamaşaya qoyulub. 1965-ci ildə “Ulduz” Moskvanın Kreml Teatrında göstərilib. Bu musiqili komediya 11 dilə tərcümə edilib. 1964-cü ildə isə bu əsər Azərbaycan Kinostudiyasında ekranlaşdırılıb.

Bəstəkarın yaradıcılığının mühüm hissəsini Azərbaycan xalq çalğı alətləri orkestri üçün əsərlər təşkil edir. Ümumiyyətlə, Azərbaycan xalq çalğı alətləri orkestri üçün yazılmış əsərlər arasında xüsusi yeri məhz Süleyman Ələsgərovun əsərləri tutur.

Bir müddət Azərbaycan xalq çalğı alətləri orkestrinin dirijoru vəzifəsində işləməsi bəstəkara xalq çalğ alətlərinin spesifik xüsusiyyətlərini əsaslı surətdə öyrənməyə kömək etmiş, onun müxtəlif janr və formalarda olan orkestr əsərləri, tar, kamança, balaban, qanun, saz üçün əsərlər yaratmasına təkan vermişdir.

Süleyman Ələsgərov 1957-ci ildən Üzeyir Hacıbəyov adına Azərbaycan Dövlət Konservatoriyasında dərs demiş, 20 ildən artıq bir dövrdə “Xalq musiqisi”, sonra isə “Xalq çalğı alətləri” kafedrasının müdiri olmuşdur. Ömrünün son illərində Süleyman Ələsgərov Bakı Musiqi Akademiyasının “Dirijorluq” kafedrasının professoru, Akademiyanın Şuşa filialının direktoru vəzifəsində çalışmışdır.

Süleyman Ələsgərov 21 yanvar 2000-ci ildə dünyasını dəyişib.

743
Teqlər:
Cəbiş müəllim, infoqrafika, videoinfoqrafika, mədəniyyət, bəstəkar, Şuşa
İnsanlar kinoteatrda, arxiv şəkli

Anar Kərimov: kinoteatrlar müəyyən şərtlərlə açılacaq

10
(Yenilənib 16:14 25.09.2021)
Pandemiya qaydalarına riayət edilməli, zalların 50 faizdən çox doldurulmaması, COVİD pasportu ilə giriş və zalların dezinfeksiyası tələbi yerinə yetirilməlidir.

 

BAKI, 25 sentyabr — Sputnik. Operativ qərargahla apardığımız konstruktiv danışıqlar nəticəsində oktyabrın 1-dən teatr, kinoteatr və konsert zalları açıq elan ediləcək. Amma burada müəyyən şərtlər var. Sputnik Azərbaycan-ın məlumatına görə, bunu mədəniyyət naziri Anar Kərimov deyib.

Nazir bildirib ki, pandemiya qaydalarına riayət edilməli, zalların 50 faizdən çox doldurulmaması, COVİD pasportu ilə giriş və zalların dezinfeksiyası tələbi yerinə yetirilməlidir.

“Mədəniyyət Nazirliyi fəaliyyət başladıqdan sonra ciddi nəzarət edəcək ki, bu qaydalara riayət olunsun, nəticə etibarilə insanların virusa yoluxmasına səbəb yaranmasın”, - deyə nazir vurğulayıb.

Qeyd edək ki, Nazirlər Kabinetinin dünən açıqladığı qərarına əsasən bir sıra xidmət sahələrinin fəaliyyətinə icazə verilib. Onların arasında teatr, kinoteatr və konsert zalları da var.

Həmçinin oxuyun:

Teatr və kinoteatrların fəaliyyəti bərpa edilir - Operativ Qərargah qərar verdi

Azərbaycanda COVID-19 pasportu olmadan bu sahələrdə hərəkət edə bilməyəcəksiz

10
Teqlər:
kinoteatr
Toyuq əti, arxiv şəkli

Yenidən quşçuluq məhsullarının Azərbaycana idxalına məhdudiyyət qoyulub