Elməddin Cəfərov

Türk aktyorlar məni saya salmırdılar - Komediya aktyorundan acı etiraflar

3648
(Yenilənib 23:43 09.07.2021)
Ölkəmizdə 2000-ci illərin əvvəllərindən bəri yayımlanan əksər komediya filmləri və serialları onun adı ilə bağlıdır. Söhbət əksər insanların sevimlisi olan aktyor Elməddin Cəfərovdan gedir.

BAKI, 9 iyul — Sputnik. Azərbaycanda son dönəmlər komediya aktyoru deyəndə ilk onun adı yada düşür. 2000-ci illərin əvvəllərindən bəri ölkəmizdə yayımlanan əksər komediya filmləri və serialları onun adı ilə bağlıdır. Söhbət əksər insanların sevimlisi olan aktyor Elməddin Cəfərovdan gedir. Onu yaxından tanımaq üçün həmsöhbət olduq. Aktyor yaradıcılığından, ölkəmizdəki komediya filmləri və seriallarının vəziyyətindən Sputnik Azərbaycan-a danışıb:

"Hamı qınayır ki, komediya filmlərində nə vaxta qədər eyni simaları görəcəyik. Haqlıdırlar, amma bir problem var. Kinostudiyanın çəkdiyi filmlərə bizi ümumiyyətlə çəkmirlər. Həmin filmlərə sonra baxılmır, satılmır, sonra da biz müqəssir oluruq. Deyirlər kütlə onlara baxır. Yaxşısı budur, siz bizi çağırın o filmlərə, biz sizə təkan olaq, siz də bizə təkan olun".

© Sputnik / Murad Orujov
Aktyor Elməddin Cəfərov müsahibə zamanı

Aktyor əlavə edir ki, o professional filmə çəkilmək istəyir. Şikayətlərini isə belə dilə gətirir:

- Siz məni çəkmirsiniz, çəkməyi də planlaşdırmırsınız. Eqo savaşına çıxırsınız, bütün karyeranızı məhv edirsiniz. Sonra da başlayırlar ki, nə qədər eyni sifətləri görək olar? Bizim çəkdiklərimizi başqa ölkələrdə də ediblər. "Mall"larda yayıma gedən, pul yatırılan filmlər nümayiş olunurdu. Heç kəs onlara heç nə demirdi. Amma biz "Xoxan", "Naxox" və s. filmlər çəkdik. O vaxt "Rəcəb İvedik"in filmlərinə 70 min bilet satılırdı, amma bizim filmlərimizə min-iki min bilet satılırdı.

"Xoxan" filmi 124 min bilet satdı, ondan sonra "Rəcəb İvedik"in satışı düşdü ölkədə. Hamı yerli filmə getdi. Bu vaxt təşəkkür etmədilər ki, axır ki, xarici filmlərin ayağını kəsdiniz, camaat öz yerli filmimizə baxır, bunu demədilər. Başladılar ki, nə vaxta qədər eyni sifətləri görəcəyik? Nə əcəb "Rəcəb İvedik"ə, Hollivuddan gələn komediya filmlərinə etiraz etmədiniz? Hollivuddan gələn hər film sənət əsəri deyil. Orada da aşağı səviyyəli filmlər var, amma onlar bəh-bəhlə qarşılanır, yayımlanır. Gücünüz Elməddinə çatır?

İmkan verməyin bizimkilər burada pul qazansınlar, qoyun "Rəcəb İvedik"lər gəlib pul qazansınlar. Yerli adam olmasın. Bax bu psixologiyanı məhv edə bilsək, irəliləyə bilərik. Amma sən Elməddini çəksən, rejissor kimi özün də qabağa gedərsən. Çünki, Elməddin nə qədər xarici ölkəyə də getsə, azərbaycanlılarla işləmək istəyəcək. Biz bir-birimizi niyə içimizdən məhv edirik? Mən də başa sala bilmrəm ki, dövlət sifarişli, bədii filmlərə çəkilməməyim mənim şanssızlığımdır. Qurumun nümayəndələri məni çəkmək istəmir, deyirlər niyə Elməddini çəkək? Amma məni çəksələr, qazandıqları pulun 15 mislini qazana bilərlər. Çəkmirlər, tənqid hədəfi də mən oluram. Çünki, onlara nisbətən zəifəm axı. Mən Rəcəb İvedik deyiləm axı deyim "ağıllı olun, nə istəsəm çəkərəm". Mən Elməddinəm, Elməddini susdurmaq rahatdır. 

- Bəzən rollarınız təkrarlanır. Bunun səbəbi nədir?

- Mən etalonammı? Xeyr, mənim də bacarmadığım rollar var. Mən bəzən təkrarlayıram özümü. Niyə? Çünki, rejissor məndən bunu istəyir. Rejissor məndən tələb etdi, mən kapriz etdim? Yaxşı ssenari gətirdilər, milyardlarla pul istədim? Yaxşı film təklif etdilər, çəkilmədim? Yox abi, günəş çıxmadı. Qaranlığın səbəkarı mən ola bilmərəm axı. Yaxşı iş olanda onlarlıqdır, bunun sənə heç aidiyyatı yoxdur. Uğursuz iş olanda Elməddinlikdir. Ona görə də artıq tənqidləri boş verirəm".

© Sputnik / Murad Orujov
Aktyor Elməddin Cəfərov professional filmə çəkilmək istəyir

- Sizi həmişə komediya janrında görmüşük, dram janrında özünüzü sınamaq istiyərdinizmi?

- Əslində özümü yoxlamaq kimi bir iddiam yoxdur. Özümü kimə sübut edəcəm ki? Hələ komediyada etmək istədiyimin 1 faizini etməmişəm. Hələ elə bir şansım, elə bir ortam olmayıb. Mən istədiyimi tam bacara bilmirəm. Çünki, çatışmazlıqlar var. Yeni rejissorlarla işləməliyəm. Bir az dram janrına yaxın "Qaragöz" filminə çəkilmişəm. O da tragikomediya idi. Tamaşaçılar bəyənmişdi, amma nə qədər güclü oynamışam, bunu deyə bilmərəm. Mən dünən çəkildiyim filmə bu gün baxıram, deyirəm yox, bunu daha da yaxşı edə bilərdim.

- Türkiyədə "Çat kapı aşk" filmində çəkilmisiniz. Etiraf edək ki, Türkiyənin kino sektoru bizdən qat -qat öndədir. Onların təcrübəsindən yararlana bilirsinizmi?

- Türkiyədə "Çat kapı aşk" filminin çəkilişləri vaxtı türk aktyorları ümumiyyətlə məni saya salmırdılar. Məni aktyor kimi yanaşmırdılar. Özlərindən aşağı görürdülər. Birinci çəkilişdən sonra hər kəs başıma fırlanmağa başladı. Filmdə bəzi çətin səhnələr var idi, məndən gözlətiləri yox idi. Düşünürdülər ki, bacarmaram. O rolun öhtəsindən gələndən sonra başıma fırlanırdılar. Orada operator rejissor qədər hörmətlidir. Quruluşçu operator rejissora dedi ki, "abi, təsadüfən alındı, ola bilməz". Elə bilirdi türk dilini anlamıram. Sonra 2-ci, 3-cü səhnə çəkildi. Gördülər ki, təsadüf deyil. Sonra tort kəsdilər, başıma fırlandılar. Dedilər "Azərbaycanda belə yetenek var". Dedim "abi, mən Azərbaycanın ən yeteneksiz adamıyam, orada ele yeteneklər var ki".

Məsələn, orada bir italyan aktyoru var idi, başına fırlanırdılar. Adamın bacarığına baxmayıblar. Sadəcə adı üstündə idi – italyan aktyorudur. Azərbaycan aktyoru deyəndə bir pillə aşağı baxırdılar. Sevirdilər, insan kimi, qardaş ölkə kimi hörmət edirdilər. Amma istedadına inanmırdılar. Avropalı, amerikalı olanda sorğu-sualsız onlara bütün qapılar açıq olurdu. Amma azərbaycanlısansa, gərək öz istedadını sübut edəsən.

- Artıq sizin nəyə qadir olduğunuzu bilirlər, istedadınıza bələddirlər. Həmin filmdən sonra təkliflər gəldimi?

- Sonralar təkliflər gəldi, amma orada darıxırdım. Ailəm burada idi. Onları da aparsam övladlarımın təhsilinin sıfırlanacaqdı. Üstəlik, orada yaşaya bilməzdim. Buranın gözəl tərəfini demirəm, hətta tozunu çox sevirəm. Cənubi Azərbaycanda filmə çəkiləndə 2 gündən artıq qala bilmədim. Amma çox şey öyrəndim. Öyrəndiklərimi burada tətbiq edirəm. Onlar mənə səhvlərimi öyrətmədilər, onlar mənə nəyin səhv olduğunu öyrətdilər. Onlar mənə düzün nə olduğunu da öyrtəmirdilər. Çünki, özləri də düzünü bilmirlər, düzünü bilsələr "Oscar" alardılar. Amma səhvləri bilirlər, ən vacibi də budur.

- Yeni başlayanda "stand up"la başladınız. 2000-ci illərin əvvəllərində sizinlə eyni vaxtda başlayan Fərda Amin bunu davam etdi. Amma nədənsə sizdə görmədik. Nə vaxtsa "stand up" etməyi düşünürsünüz?

- 2002-ci ildə başlayanda sözün əsl mənasında Azərbaycanda böyük rezonans doğurdu. 3 il "stand up"la məşğul oldum. Açığı, "stand up"la başlasam da, o işi sevmirəm. Halbuki o dönəmlərdə "ən yaxşı aktyor" adını almışdım. İstəmədim tək mən danışım, insanlar dinləsin. İnsanlar sevirdi, amma mən onu səhnələşdirməyi sevirdim. Ümumiyyətlə, mən hərəkəti sevən adamam. Söz yox, daha çox hərəkət, jest və mimikanı sevirəm.

- O dönəmlərdə Azərbaycanda demək olar ki, serial çəkilmirdi. Bu baxımdan da "ilk"lərə imza atdınız. Amma sizi tənqid edirdilər...

© Sputnik / Murad Orujov
Elməddin bildirir ki, camaat elə düşünür ki, pandemiyadan əvvəl sənət adamaları milyonlar qazanıb

- Həmin dönəmdə təkcə bizdə yox, bütün dünyada serial dönəmi başladı. Biz də seriallar çəkməyə başladıq – "Ailəm", Bacanaqlar" və s. Düzdü uğursuz oldu, çox böyük səhvlər etdik, bizdən qaynaqlanan və bizdən aşlı olmayan səhvləri etdik. Bəzən insanlar məni texniki problemlərə görə qınayırdılar. Amma mən texniki problemlərə cavabdeh deyildim. Bu bilirsiniz nəyə bənzəyir? Mən avtobusda gedirəm, avtobusda baş verən problemə görə məni danlayırlar. Avtobusda getməyim avtobusun sahibi olduğum anlamına gəlməz. Amma öyrənirdik. Yaxşı ki, zamanında o səhvləri etdik. Serialda istədiyim uğura sahib olmamışam.

- "Bacanaqlar" Azərbaycanda ən uzun müddət davam edən serial idi. Serialın dayandırlmasının səbəbi nə idi?

- "Bacanaqlar" ölkənin ən uzun serialı oldu – 10 il davam etdi. Serialı bağlamaq qərarına gələndə serialın qədrini bildim. Çünki, Qazaxıstandan və Türkiyədən olan tamaşaçılar dedilər ki, "Bacanaqlar"ı bağlama. Bunu o insanlar deyirdilər ki, onlar yerli qazaxlar və türklər idi. Bağlayandan sonra gördüm ki, sən demə, insanlar bu serialı sevirmişlər.

 - Artıq Türkiyədə də tanınırsız, amma bundan narahat olduğunuzu demisiz...

- Orada olanda bilməzdim ki, yerli əhali məni tanıyır. Açığı, bu məni diskomfort edirdi. Məsələn, mən dönər yemək istəyirdim. İstəyirdim gedim Taksimdə dönər yeyim. Amma tanınmış olmağım mənə mane olur. Deyirdilər "Azeri ünlü", bir "Azəri" sözünə görə, ikinci də "ünlü" sözünə görə özünü bəy kimi aparmaq məcburiyyətində idim. Onda da özün olmursan, rol oynayırsan. Ailəmlə orada gəzirdim, orada "Bigmag" adlı yer var idi, dedim girək ora. Yoldaşım dedi "sən tanınmışsan". Dedim mən ondan yemək istəyirəm. Girdim, yedim. Çəkdilər, amma vecimə də deyildi, çünki istəyirdim. Yəni, dediyim odur ki, şöhrəti sevmirəm. Açığını deyim, bu sənətə gələndə şan-şöhrət, tanınmaq barədə düşünməmişdim".

© Sputnik / Murad Orujov
Elməddin Cəfərov

""Bacanaqlar", "Qardaşlar", "Qız atası", "Kişi sözü" seriallarda faəliyyət göstərirdim. Türkiyədə olanda deyirdilər "abi, 4 dizinin yapımcısısan. Hərəsindən ayda 100 min dollar qazanırsan". Öz-özümə dedim heç 4 serialdan 100 min qazanmıram. Amma onların yanında özümü bəy kimi aparırdım. "Bəli, hər şey əladır" deyirdim. Hamı məni varlı bilirdi. Öz-özümə deyirdim ki, "yox e abi, yanlış anlamısınız, nə olsun ki, 4 serialım var. Amma sizin qazandığınızın yarısını mən qazana bilmirəm". Düzdü buna görə heç vaxt ağlamamışam ki, mən bu qədər əziyyət çəkirəm, amma qazana bilmirəm. Mən şikayətlənirəmsə, onda daş karxanasında gününə 10 manata çalışan insanlar nə etsin? Mən həmişə şükürlü insan olmuşam. İnsanlar mənə sayqıyla yanaşır, məni görəndə təbəssümlə salam verir. Bunun özü Allahın lütfdür.

 - Aktyor kimi sizə populyarlıq qazandıran "Tək səbir" verilişi ilə bağlı hansı xatirələriniz var?

- "Tək səbir" verilişi saat 7-də başlayırdı. İlk dəfə verilişə baxmaq üçün bir kafeyə getdim, üzümə baxan yox idi. Veriliş saat 8-də qutaranda kafedəkilərin hər biri mənimlə o dövrün telefonları ilə şəkil çəkdirdi. Küçəyə çıxa bilmirdim. 1 saatın içində nə baş verdiyini anlaya bilmirdim. Bilirsiniz niyə anlaya bilmirdim? Çünki, mənim cibimdə yenə də pul yox idi. Amma məşhur idim. Məşhur olmağımın mənə heç bir xeyiri yox idi. Məndə heç nə dəyişmədi. Məşhurlaşan insanlar məşhurluğun eyforiyasına qatılıb, narkotikə, içkiyə qurşandılar. Mən həm dini təhsilimə, həm də maddi baxımdan çətinliyim olduğuna görə, populyarlıq mənə zövq vermirdi. Hə nə olsun ki, məşhursan, şəhərə çıxmağa pulun yoxdur.

© Sputnik / Murad Orujov
Elməddin Cəfərov

Mənimlə birlikdə başlayan Müşfiqin, Fərdanın, rəhmətlik Ramizin, Anarın da maddi vəziyyəti mənimki kimi idi. Bir paltarı 3-4 dəfə efirə geyinəndə deyirlər "niyə eyni geyimdə gəlirsiniz?" Paltar bir dənədir, kefimizdən belə geyinmirik, nə edək? Deyirdilər "Fərda, nə vaxta qədər qırmızı kofta ilə çıxacaqsan? Elməddin nə vaxta qədər qara kofta ilə çıxacaqsan?". Bir-birimizin paltarı ilə efirə çıxırdıq. İnsanlar düşünürdülər ki, televiziyaya çıxıram, yəqin ki, pulum var.

- Sizi pozitiv insan kimi tanıyırıq, istər efirdə, istərsə də adi həyatda görəndə istər-istəməz insanların üzündə təbəssüm yaranır. Bəs Elməddin Cəfərov evdə necədir?

- Yoldaşım müəllimədir. Bir az ciddidir. Amma oğlanlarımla danışıb-gülürük, filmlərə baxırıq. Oğlanlarımla dost olmağa çalışıram. Çünki, istəyirəm bir problemləri olanda mənə desinlər. Qəddar ata olmaq istəmirəm. Ümumiyyətlə, qəddar ailə başçısı da olmaq istəmirəm. Bütünlükdə yaxşı insan olmağa çalışıram. Həm yaxşı ata, həm yaxşı həyat yoldaşı, həm yaxşı övlad və ən əsası cəmiyyətdə yaxşı insan kimi yadda qalmaq istəyirəm.

© Sputnik / Murad Orujov
Aktyor Elməddin Cəfərov Türkiyədə də tanınır

- Camaat elə düşünür ki, pandemiyadan əvvəl sənət adamları milyonlar qazanırdı. Bu doğrudur?

- Bizim sənətçilərin yeganə gəlir mənbəyi toy idi. Pandemiya vaxtı ondan da məhrum oldular. Bu təsəvvürü də şou-biznes nümayəndələrinin özləri yaradıblar. Şan-şöhrət, 1 manatlıq əşyanı 10 manat kimi göstərirdilər, kreditlə aldıqları maşını nəğd almış kimi göstərirdilər. Beləliklə, kütləvi bir fikir formalaşmışdı ki, şou-biznes nümayəndələri çox varlıdırlar. Halbuki əksəriyyəti kirayə qalırdı, ipoteka ilə maşın alırdı. Sözsüz ki, onların içində varlıları da var. Digər sahələrin varlı insanları olduğu kimi bu sahədə də varlı insanlar var. Ola bilsin ki, bu sahədə varlı daha çoxdur. Sadəcə insanlar maksimuma baxır, hamı haqqında o cür düşünür.

Necə ki, hər futbol oynayan Ronaldo kimi milyarda sahib deyil, eləcə də hər şou-biznes nümayəndəsi də varlı deyil. Bu, özünü xüsusilə pandemiya dövründə göstərdi. Pandemiya dövründə ipotekalarını, kreditlərini ödəyə bilmədilər və hər şey ortalığa çıxdı. Varlı adam 2-4 aya kasıblaşa bilməz. Bilmirəm nədəndir, amma kütlənin tanınmış insanlara qarşı çox böyük qıcığı var. Tanınmış bir insanla bağlı paylaşım görəndə deyirlər girim bir ağır şərh yazım.

- Bəz siz pandemiya dövrünü necə keçirirsiz?

- Hazırda "Ailəm" serialında çalışıram. Biz başlayandan 1 ay sonra pandemiya başladı. Çəkilişlərimiz dayandı. Başlayanda elə də uğurlu başlamamışdı. Yalnışlıqlarımız oldu. Sentyabrın 20-i ilk efirimiz oldu, 27-i müharibəyə görə dayandı. Yanvar ayında yenidən başladıq. Sonra yenə pandemiyayla əlaqədar qapanmalar oldu. Bunda günahkar təkcə pandemiya deyildi, bizdə də problemlər oldu. İnşallah bu sezonun sonuna uğurlu olmasına çalışırıq. Pandemiya, müharibənin təsiri ilə serialın büdcəsini tamamilə məhv oldu. Yayımın zəif olması sponsorların uzaqlaşmasına səbəb oldu. Bunları ağlamaq üçün demirəm, sadəcə reallığı deyirəm.

3648
Arxeoloji qazıntılar

Xəzər xaqanlığı xalqlarının oturaq həyat tərzini sübut edən faktlar aşkar olunub

1131
(Yenilənib 12:22 26.07.2021)
Əldə olunmuş tapıntılar köçəri hesab edilən insanların həyətyanı heyvandarlıqla məşğul olduğunu, dənli bitkilər yetişdirdiklərini sübut edir.

BAKI, 26 iyul — Sputnik. Belqorod Dövlət Milli Tədqiqat Universitetinin (BelDU MTU) arxeoloqları Xəzər xaqanlığı tayfalarının VIII – X əsrlərə aid yaşayış məskənlərində qazma işləri apararkən saxsı qabların, gil örtüyünün qırıntılarını və müxtəlif heyvan sümüklərini aşkar ediblər.

Sputnik Azərbaycan Rusiya mediasına istinadən xəbər verir ki, əldə olunmuş tapıntılar köçəri hesab edilən insanların əkinçilik və həyətyanı heyvandarlıqla məşğul olduğunu, at, iri və xırdabuynuzlu mal-qara, donuz saxladıqlarını, dənli bitkilər yetişdirdiklərini sübut edir.

"Arxeoloqlarımızın əldə etdikləri nəticələr müasir Belqorod vilayəti ərazisində olmuş Saltov-Mayatsk mədəniyyəti nümayəndələrinin oturaq həyat tərzi keçirməsi ilə bağlı mülahizələri təsdiq edir", – deyə BelDU MTU pedaqoji institutunun tarix-filologiya fakültəsinin dekanı Andrey Papkov bildirib.

VII əsrdən X əsrə qədər xəzərlər Şərqi Avropa çöllərində əhəmiyyətli qüvvəyə çevrilir. Onlar özündə çoxsaylı bolqar, alan, hun tayfalarını özündə birləşdirirdi.

VIII əsrdə xəzərlər "Xəzər xaqanlığı" adlı geniş bir dövlət yaradırlar ki, onun da hakimiyyəti Şərqi Avropa xalqlarının böyük hissəsini əhatə edirdi. IX əsrdə xəzərlərin başçıları iudaizmi qəbul edir. Bu, daxili müharibələrə və xəzərlərin zəifləməsinə gətirir.

Xəzər xaqanlığının süqutu X əsrə, Kiyev knyazı Svayotoslavın yürüşü və onların əsas qalalarının məhv edildiyi dövrə təsadüf edir.

Xəzər xaqanlığına dair arxeoloji tapıntılar xəzəryanı bölgələrdə etnik cəhətdən yekcins olmayan əhali tərəfindən yaradılmış Saltov-Mayatsk mədəniyyətinə aiddir.

Bir qayda olaraq Saltov-Mayatsk mədəniyyətinə Podonye çölü, Azovyanı, Taman, Şərqi Krım, Aşağı Volqaboyu və Xəzəryanı Dağıstan əraziləri şamil olunur. Bununla yanaşı, çöl tayfalarının əksəriyyəti köçəri həyat tərzi keçirməkdə davam edirdi.

2021-ci ildə arxeoloqlar Belqorod vilayəti ərazisində iki abidəni tədqiq ediblər. Bunlar Veydelev rayonu ərazisində, Urayeva çayı dərəsində yerləşən "Şpenqarevo kəndi-1" və Alekseyevsk şəhər dairəsində, Qara Kalitva çayının yuxarı axarı boyunca yerləşən "Oturaq kənd-1" yaşayış məskənləridir.

Bir neçə gün ərzində tədqiqatçılar "Şpenqarevo kəndi-1" ərazisində tabaşir qatını yumağa və mədəni qata çıxmağa nail olublar. Burada onlar saxsı qabların, gil örtüyünün qırıntılarını və müxtəlif heyvan sümüklərini aşkar ediblər. Bundan əlavə taxıl və ağac kömür qalıqlarının aşkar edilməsi üçün ərazidən qrunt nümunələri götürülüb.

"Oturaq kənd-1" yaşayış məskənində isə qalınlığı 1,5 m olan mədəni qat aşkar olunub. Burada tapılmış ən qiymətli tapıntılar arasında dəmir biz və metal bıçaq fraqmenti var. Bundan sonra tədqiqatçılar aşkar edilmiş tapıntıları tədqiq etməlidirlər.

Həmçinin oxuyun:

* Beşbarmaq dağının sirri – Pir, inanc yeri və qədim istehkam

Şəkidəki məsciddə xanın qəbri aşkarlandı

Şəkidə alban döyüşçülərin qəbirləri aşkarlanıb

1131

Xalq artisti Səməd Səmədov vəfat səbəbi bilindi

90
(Yenilənib 22:10 24.07.2021)
"Toylar kralı" adını qazanan S.Səmədov 1946-cı il sentyabrın 17-də Aşqabadda anadan olmuş, 1948-ci ildə zəlzələ nəticəsində ailəsi ilə birlikdə Bakıya, İçərişəhər məhəlləsinə köçmüşdü.

BAKI, 24 iyul - Sputnik. "74 yaşlı xəstə Səməd Səmədov ötən gün gecə saatlarında "Yeni Klinika"nın reanimasiya şöbəsinə çox ağır - tənəffüs çatışmazlığı, ciddi dirəncli potenziya vəziyyətində daxil olub".

Sputnik Azərbaycan bildirir ki, bunu "Report"a açıqlamasında klinikanın reanimatoloqu Emil Qasımov deyib.

Onun sözlərinə görə, xəstənin saturasiyası 60-70 arasında idi: "Təzyiqi qaldırmaq üçün maksimal dozada təzyiq qaldıran dərmanlar istifadə olundu. Xəstəyə lazımi dəstək müalicəsi olunsa da, aparılan müayinələr nəticəsində prokansin dəyərinin çox yüksək olması bakterial infeksiyanın əlavə olunmasına sübut idi. İnfeksiya və iltihabı markerlər çox yüksək idi. Xəstədə kəskin böyrək çatışmazlığı təsbit edildi. Kreatin dəyərləri 2,5 dəfə yüksəlmişdi və xəstənin sidik çıxışları, demək olar ki, yox idi. Xəstə heç 24 saat reanimasiya şöbəsində qalmadı. 15-16 saat müddətində xəstəni saxlaya bildik. Bütün bu fonda müdaxilələrə baxmayaraq xəstədə ürək dayanması baş verdi. Ölüm səbəbi sepsis və septik şok diaqnozu idi".

TƏBİB-in ictimaiyyətlə əlaqələr şöbəsinin əməkdaşı Elnarə Baxış Sputnik Azərbaycan-a bildirib ki, xalq artisti Səməd Səmədov 23 iyul 2021-ci il tarixində 60-70 saturasiya ilə Yeni klinika tibb müəssisəsinə daxil olub: "Döş qəfəsinin kompüter tomoqrafiyasının nəticələrinə əsasən, onda koronavirus ağırlaşması, ikitərəfli poliseqmentar multifokal pnevmoniya təsdiqlənib. Bütün səylərə baxmayaraq, COVID ağırlaşmalarından biri olan sepsis və septik şok inkişaf edib, böyrək çatışmazlığı yaranıb, təəssüf ki, xalq artistinin həyatını xilas etmək mümkün olmayıb".

----------

18:52

Azərbaycanın xalq artisti Səməd Səmədov vəfat edib.

Sputnik Azərbaycan APA-ya istinadən bildirir ki, bu barədə müğənni Tural Qismət məlumat verib.

Qeyd edək ki, S. Səmədov bu gün koronavirusdan dünyasını dəyişib.

"Toylar kralı" adını qazanan S.Səmədov 1946-cı il sentyabrın 17-də Aşqabadda anadan olmuş, 1948-ci ildə zəlzələ nəticəsində ailəsi ilə birlikdə Bakıya, İçərişəhər məhəlləsinə köçmüşdü.

Bülbül adına musiqi məktəbinin skripka sinfini bitirdikdən sonra A.Zeynallı adına Musiqi Məktəbinin nəzəriyyə sinfində oxuyub.

1988-ci ildən toylarda çıxış edib. 2000-ci ildə əhali arasında aparılan sorğunun nəticələrinə görə, Səməd Səmədov rəsmi olaraq "Toylar Kralı" adını qazanıb. O, Müstəqil 'Qrant' Milli İctimai Mükafatının ikiqat sahibi, 150 müxtəlif mahnının, 5 albomun, 20 klipin ifaçısı idi. 12 sentyabr 2011-ci ildə Xalq artisti fəxri adına layiq görülmüşdü.

90
Teqlər:
xalq artisti, ölüm, Səməd Səmədov

Londonun su batmış küçələri