Bakı bulvarında cütlük, arxiv şəkli

Valid Ofeliya Sənanilərin ibrətamiz sevgi hekayəsi

9645
(Yenilənib 14:09 30.06.2021)
Valid Sənani və Ofeliya Sənani - onları hər kəs "Leyli və Məcnun" adlandırırdı. Məşhurların ibrətamiz sevgi hekayəsi haqqında milli radiomuzun və televiziyamızın əvəzolunmaz diktoru, Xalq artisti Ofeliya Sənani Sputnik Azərbaycan-a danışıb.

BAKI, 30 iyun — Sputnik. Azərbaycanlıların öz Sevgililər Günü var. 20 Yanvar şəhidi İlham Abdullayevlə xanımı Fərizənin toy tarixini sevənlər özləri üçün and günü seçiblər. 

Belə bir gündə hər kəsin vaxtilə "Leyli və Məcnun" adlandırdıqları Valid Sənani və Ofeliya Sənaninin ibrətamiz sevgi hekayəsini oxucularımızla bölüşmək qərarına gəldik. Milli radiomuzun və televiziyamızın əvəzolunmaz diktoru, Xalq artisti Ofeliya Sənaninin Sputnik Azərbaycan-a danışdıqlarından:

"Validin əməyini itirmək günah olar. O, mənim həm həyat yoldaşım, həm də bu sənətdə arxa-dayağım olub. Bəlkə də Validlə qarşılaşmasaydım, uğur qazanmazdım. Qadın şəxsi həyatında xoşbəxt olmasa, sənətində də uğur qazanması çətin olur. Uğur qazansa belə, xoşbəxt ola bilmir. Bu baxımdan mən xoşbəxt qadın olmuşam".

Ofeliya xanım ömür-gün yoldaşı ilə ilk tanışlığından danışıb: "Mən diktorluğa yeni başlayanda 18 yaşım var idi. Amma Valid öz sözünü demiş, peşəkar bir insan idi. Mən hələ radioda işləyəndə o, gəlib dayanırdı başımın üstündə, deyirdi, "Ofa, sən bunu necə oxudun? Təkrar oxu". Təkrar oxuyurdum onun üçün. O da mənə məsləhətlərini verirdi. Beləliklə, mənə redaktəni də öyrətdi. Sən demə, mənə könlü var imiş. Mənim üçün həmişə narahat olurdu, qorxurdu ki, nəyisə səhv edərəm, məni işdən çıxararlar. Ona görə də həmişə mənim mətnlərimi yoxlayıb sonra məni efirə buraxırdı. Başqa işçilərə və mənə olan münasibətindəki fərqi hiss edirdim. Ağıllı adam idi. Digər oğlanlar kimi tez yanaşıb, evlənmək istəyirəm, demədi. Zamanla mənim sevgimi qazandı – diqqəti ilə, qayğısı ilə. Hiss etdirdi ki, ürəyi mənim yanımdadır. Mən də bunu hiss edirdim".

© Photo : Khazar TV
Ofeliya Sənani

Gözəlliyi ilə çoxlarının qəlbini fəth edən Ofeliya xanıma gələn elçilərin ardı-arası kəsilmirmiş. Amma 18 yaşlı qız Valid Sənaniyə könül verib: "Qonşudan mənə elçi gəlmişdilər. Anamın stolunun üstünə bir boğça qızıl-brilyant gətirib tökdülər ki, biz Ofeliyanı istəyirik. Amma şərt kəsdilər ki, Ofeliyanın bu sahədə çalışmağına icazə verilməyəcək. Dedim, "ana, o qızıl-brilyantı qaytar özlərinə, mənə nə brilyant, nə də qızıl lazımdır. Mənim sənətim özü qızıldır. Nəyimə lazım qır-qızıl? Orada ki sevgi yoxdur, nəyimə lazım o ləl-cavahirat? Üstəlik, mən də artıq Validi sevməyə başlamışdım".

Olduqca kasıb bir ailəyə gəlin köçən Sənani gəlinlik belə, geyinməyib: "Mən Validə ərə gələndə heç nəyimiz yox idi. Heç mən gəlinlik paltarında getməmişəm. Çəhrayi rəngli paltarda gəlin köçmüşəm. Onu da özümüz tikdirmişdik. Çünki imkanı yox idi. Validin anası və atası ayrılmışdılar. Valid də anası ilə birlikdə İçərişəhərdə bapbalaca bir evdə yaşayırdı. Bir dəfə nişanlı vaxtı məni evlərinə çağırmışdılar. Çay qoydular, nə qənd, nə də konfet var idi. Baxdım ki, həddən artıq kasıbdırlar. Çünki təkcə Valid işləyirdi, onun da maaşı az idi. Anam dedi, "ay Ofa, sən bu cür ev-eşikdən çıxıb, belə daxmaya gedirsən? Yəni, sən Valid üçün bu qədər ölürsən? Deyirdim, "ana, mən istəyirəm ki, o, xoşbəxt olsun. Uşaq ikən də o heç gün görməyib. Qonşu nə verib, onu yeyib. Deyirdim, mən onu xoşbəxt edəcəyəm".

"Ev o qədər balaca idi ki, uşağın arabasını qoymağa belə, yer yox idi. Əl-üz yuyanda həm əllərimizi yuyurduq, həm də qabları. Hamam da yox idi, ləyən qoyub çimirdik. Dedim, “Valid, belə olmaz. Antisanitariyadır, gedək İçərişəhərdən ev alaq. Baksovetin sədrinə deyəndə ki, evimiz yoxdur, adam təəccübləndi. Dedi, "Valid müəllim, doğrudan, eviniz yoxdur? İkimiz tanınmış insanlar idik. Valid də dedi, "gəlin gedək, göstərim. Əlimizdə 2 çantayla çıxmaq mümkün deyil". Gəldilər, baxdılar. Dedilər, siz burada yeddi il necə yaşamısınız? Dedim, mən burada yeddi il yaşamışam. Valid yazıq burada anadan olub", - Ofeliya Sənani qeyd edib.

"Övladlarıma həmişə demişəm ki, babanız Mövsüm Sənaniyə, atanız Valid Sənaniyə və mənə görə həmişə atdığınız addımlarınıza fikir verin. Çalışın, cəmiyyət adamı olun", - deyə Ofeliya xanım övladlarına tövsiyəsindən bəhs edib.

"Övladlarınızı da elə tərbiyə edin ki, sonradan utanc hissi keçirməyəsiniz. Oğul nəvəm kino aktyoru olmaq istəyir. Amma valideynləri istəyirlər ki, onu iqtisadiyyat sahəsinə yönləndirsinlər. Deyirəm, mane olmayın, qoyun getsin, öz sahəsində çalışsın. Düzdür, bizdə kino sahəsi zəifdir. Amma getsin Türkiyədə bu sahə üzrə çalışsın. İki saatlıq yoldur. Getsin, oxusun. Təklif elədim ki, gəlin mənim evimə köçün, öz evinizi satın, övladınız üçün Türkiyədən ev alın. Yetər ki, öz istədiyi sahədə çalışsın. Türklərin bir sözü var: "İşini, eşini, bir də evini insan özü seçməli". Evsiz də olar. Mən Validlə sarayda yaşamamışam. Çox kasıb yaşamışıq. Amma sevgi vardı – həm bir-birimizə, həm də sənətimizə", - o bildirib.

Televiziyada, radioda və dublyaj sahəsində çalışan Ofeliya xanım həm də çox işgüzar ev xanımı olub. Dediyinə görə, Valid Sənani onun yeməklərini sevdiyinə görə gecələr yatmayıb yeməklər hazırlayıb: "Qızım burada Xarici Dillər Universitetini bitirib. İngilis dilində mükəmməl danışırdı. Oğlum isə Moskvada oxuyub. Ona burada gecə yatmayıb yemək bişirib göndərirdim. Bütün gecəni yatmırdım. Yeməklər bişirirdim. Bir də baxırdım ki, saat 7-dir. Valid də ev yeməklərini sevirdi. Həm də xoşlayırdı ki, mən hazırlayım. 3-4 günlük yeməkləri hazırlayıb qoyurdum soyuducuya. Yorulmaq bilməzdim".

"Bir dəfə rəhmətlik Rafiq Hüseynovla baş redaktor Fuad gecə restorandan çıxıb bizə gəlmişdilər. Mənim də həmişə qış tədarüklərim olurdu. Bundan əlavə, soyuducuda yeməklərim də həmişə olurdu. Oturub yedilər, içdilər. Rafiq Hüseynov məətəl qalmışdı ki, bu qədər işin arasında mən bunları necə çatdırıram? Validin də həmişə bahalı arağı, konyakı olurdu. Gecə saat 3-də gəlmişdilər, səhər 7-də getdilər", - deyə O.Sənani əlavə etdi.

Sevilən diktor Valid Sənaninin ona olan qayğıkeşliyindən söz açıb: "Mən deyingən idim, Valid isə çox təmkinli, sakit insan idi. Mən nəyəsə əsəbləşəndə deyirdi, "ay Ofa, nə olub, özünə gəl". Deyirdim, paltarları ütüləməmişəm. Deyirdi, narahat olma, paltarını ütüləmişəm, ona uyğun ayaqqabı da seçmişəm. Yemək də qoymuşam ki, ac qalmayasan. Buterbrod da hazırlayırdı, yanında salfet də qoyurdu ki, fasilədə yeyim. Mən cavanlıqda hipertoniyadan əziyyət çəkirdim. Doğuşdan sonra mənim böyrəyim zəifləmişdi. Mənim böyrək çayımı da həmişə ayırıb qoyurdu. Deyirdi, yüksək təzyiqlə efirə girmə. Məni maşınına mindirirdi, aparırdı studiyaya, düşürürdü. Veriliş üçün də gərək şən əhval-ruhiyyədə olasan. Xüsusən də bayram proqramlarında. Mənə deyirdi: “Bu mimikayla bayram verilişi aparmaq olar? Gülümsə”. Hər səhər gimnastikasız buraxmırdı məni. Deyirdi, mən süfrəni hazırlayacağam, xalçanı sərmişəm, get gimnastikanı elə. Sən gimnastikanı edənəcən mən çayı dəmləyəcəyəm. Həmişə qaməti şux idi. Bu, ölənəcən elə oldu. Mən bir az belimi əyən kimi, deyirdi, bu nədir, şux gəz, mənim yanımda şux gəz. İndi heç nəyə fikir vermirəm. Belim bükülülüb, fəqərə sütunum əyilib. Çox mükəmməl insan idi".

Sənani bildirir ki, o, evli ola-ola ona eşq elan edənlər də olub: "Məni Validdən ayırmaq istəyənlər də olub. "Dərdindən dəliyəm", "Sizin üçün hər şeyimdən keçərəm” deyirdilər. Deyirdim, binamusluq etməyin, ayıbdır. Get öz evində televizora bax, öz aləmində dəli ol. Mənə sənin dəliliyin lazım deyil. Sən görmürsən ki, mənim ərim, övladlarım var? Amma elə o vaxt da, bu gün də xoş sözə, var-dövlətə aludə olub ailələrinə xəyanət edənlər var".

"Valid dünyasını dəyişəndən mən heç yerə getmirəm" deyir həmsöhbətimiz: "Heç nədən ləzzət ala bilmirəm. O, çox diqqətli insan idi. Maşının güzgüsündən baxıb bilirdi ki, mənim vəziyyətim necədir. Güzgüdən baxırdı, rəngimdən-ruhumdan anlayırdı, saxlayırdı maşını, təzyiqimi ölçürdü, dərmanımı verirdi, sonra yola davam edirdik. İndi qorxuram yola çıxmağa. Birdən yola çıxsam, vəziyyətim dəyişsə, kimdir mənim qeydimə qalan? Mən onun kimi qayğıkeş ər, ata görməmişəm. Baxmayaraq ki, gecə-gündüz işləyirdi, bir ayağı Rusiyada idi, amma buna baxmayaraq, bizə də qayğı göstərirdi. Yuxuda çox görürəm. Onun üçün hər gün ağlayıram. Heç yerə çıxmıram. Toya çağırırlar, gedib pulumu salıb qayıdıram. Çünki yanımda Validi görmək istəyirəm, yoxdur".

"Evdə də qonaq otağında oturmuram. Çünki Valid həmişə qonaq otağında divanda otururdu. Həm televizora baxırdı, həm də cızma-qara edirdi. O otaqda oturmuram. Evimdə 4 televizor var. Jurnalistlər İttifaqının üzvüyəm. Ona görə də daim televiziyadakı jurnalistlərin diksiyasındakı nöqsanları yazmalıyam. Digər otaqlara keçirəm, qonaq otağından başqa. Çünki orada Validi gömək istəyirəm, görmürəm. O otaqda otururduq. Valid öz verilişini yazırdı, mən də öz verilişimi yazırdım. Bizim çox şən günlərimiz olub. Bizim qəmgin, küskün günlərimiz olmayıb. Validin son günləri idi. Mənə deyirdi: "Səndən nigaran qalacağam, Ofa. Tək necə yaşayacaqsan?" Deyirdim: “Tək olmayacağam, nigaran qalma. Sənin ruhun olacaq burada, onunla yaşayacağam?"

Eləcə də oxuyun:

  • Bütün sevgililərə əbədi örnək - Azərbaycanda Sevgililər Günü

  • Ofeliya Sənani: "Plastik əməliyyat etdirən aparıcının efirdə nə işi var?"

9645
Teqlər:
Sevgililər Günü, məşhurlar, diktor

Xalq artisti Səməd Səmədov vəfat səbəbi bilindi

84
(Yenilənib 22:10 24.07.2021)
"Toylar kralı" adını qazanan S.Səmədov 1946-cı il sentyabrın 17-də Aşqabadda anadan olmuş, 1948-ci ildə zəlzələ nəticəsində ailəsi ilə birlikdə Bakıya, İçərişəhər məhəlləsinə köçmüşdü.

BAKI, 24 iyul - Sputnik. "74 yaşlı xəstə Səməd Səmədov ötən gün gecə saatlarında "Yeni Klinika"nın reanimasiya şöbəsinə çox ağır - tənəffüs çatışmazlığı, ciddi dirəncli potenziya vəziyyətində daxil olub".

Sputnik Azərbaycan bildirir ki, bunu "Report"a açıqlamasında klinikanın reanimatoloqu Emil Qasımov deyib.

Onun sözlərinə görə, xəstənin saturasiyası 60-70 arasında idi: "Təzyiqi qaldırmaq üçün maksimal dozada təzyiq qaldıran dərmanlar istifadə olundu. Xəstəyə lazımi dəstək müalicəsi olunsa da, aparılan müayinələr nəticəsində prokansin dəyərinin çox yüksək olması bakterial infeksiyanın əlavə olunmasına sübut idi. İnfeksiya və iltihabı markerlər çox yüksək idi. Xəstədə kəskin böyrək çatışmazlığı təsbit edildi. Kreatin dəyərləri 2,5 dəfə yüksəlmişdi və xəstənin sidik çıxışları, demək olar ki, yox idi. Xəstə heç 24 saat reanimasiya şöbəsində qalmadı. 15-16 saat müddətində xəstəni saxlaya bildik. Bütün bu fonda müdaxilələrə baxmayaraq xəstədə ürək dayanması baş verdi. Ölüm səbəbi sepsis və septik şok diaqnozu idi".

TƏBİB-in ictimaiyyətlə əlaqələr şöbəsinin əməkdaşı Elnarə Baxış Sputnik Azərbaycan-a bildirib ki, xalq artisti Səməd Səmədov 23 iyul 2021-ci il tarixində 60-70 saturasiya ilə Yeni klinika tibb müəssisəsinə daxil olub: "Döş qəfəsinin kompüter tomoqrafiyasının nəticələrinə əsasən, onda koronavirus ağırlaşması, ikitərəfli poliseqmentar multifokal pnevmoniya təsdiqlənib. Bütün səylərə baxmayaraq, COVID ağırlaşmalarından biri olan sepsis və septik şok inkişaf edib, böyrək çatışmazlığı yaranıb, təəssüf ki, xalq artistinin həyatını xilas etmək mümkün olmayıb".

----------

18:52

Azərbaycanın xalq artisti Səməd Səmədov vəfat edib.

Sputnik Azərbaycan APA-ya istinadən bildirir ki, bu barədə müğənni Tural Qismət məlumat verib.

Qeyd edək ki, S. Səmədov bu gün koronavirusdan dünyasını dəyişib.

"Toylar kralı" adını qazanan S.Səmədov 1946-cı il sentyabrın 17-də Aşqabadda anadan olmuş, 1948-ci ildə zəlzələ nəticəsində ailəsi ilə birlikdə Bakıya, İçərişəhər məhəlləsinə köçmüşdü.

Bülbül adına musiqi məktəbinin skripka sinfini bitirdikdən sonra A.Zeynallı adına Musiqi Məktəbinin nəzəriyyə sinfində oxuyub.

1988-ci ildən toylarda çıxış edib. 2000-ci ildə əhali arasında aparılan sorğunun nəticələrinə görə, Səməd Səmədov rəsmi olaraq "Toylar Kralı" adını qazanıb. O, Müstəqil 'Qrant' Milli İctimai Mükafatının ikiqat sahibi, 150 müxtəlif mahnının, 5 albomun, 20 klipin ifaçısı idi. 12 sentyabr 2011-ci ildə Xalq artisti fəxri adına layiq görülmüşdü.

84
Teqlər:
xalq artisti, ölüm, Səməd Səmədov
Baş Prokurorluq

Azərbaycanda nazirlikdə saxtalaşdırma ilə bağlı Baş Prokurorluq cinayət işi açdı

2266
(Yenilənib 13:19 23.07.2021)
Baş prokuror yanında Korrupsiyaya qarşı Mübarizə Baş İdarəsində Azərbaycan Respublikası Cinayət Məcəlləsinin 179.4 və 308.2-ci maddələri ilə cinayət işi başlanmaqla istintaqı aparılır.

BAKI, 22 iyul — Sputnik. Hesablama Palatasından turizmin inkişafı məqsədilə dövlət büdcəsindən ayrılan vəsaitin icrası zamanı yol verilmiş qanun pozuntuları haqqında Baş Prokurorluğa daxil olmuş material üzrə araşdırma aparılıb.

Baş Prokurorluqdan Sputnik Azərbaycan-a verilən məlumata görə, müəyyən edilib ki, hazırda ləğv edilmiş Mədəniyyət və Turizm Nazirliyi ilə "Rəqəmli Dövr" MMC arasında bağlanmış müqavilə üzrə Nazirliyin əsasında yaradılmış Dövlət Turizm Agentliyi tərəfindən faktiki olaraq satın alınmadığı halda, müxtəlif kitabçaların və xəritələrin satın alınması üzrə qeyd edilən Cəmiyyətə 14 noyabr 2018-ci il tarixdə külli miqdarda ödəniş edilib.

Habelə ölkədə keçirilmiş ticarət festivalları ("Şoppinq festival") üzrə icraçı müəssisə olan "Azərbaycan Konqreslər Bürosu" MMC tərəfindən 2017-2018-ci illərdə təşkil edilmiş ümumilikdə üç belə festival üzrə ayrı-ayrı telekanallarda reklamların ödənişsiz əsaslarla yerləşdirildiyi halda, reklam xidmətlərinə görə Nazirlik tərəfindən qeyd edilən Cəmiyyətə xüsusilə külli miqdarda büdcə vəsaiti ödənilib. Bundan əlavə, araşdırmalarla nazirlik tərəfindən müxtəlif xidmətlərin göstərilməsinə dair müqavilələrin icrası zamanı heç bir təsdiqedici sənədlər olmadan büdcə vəsaitinin silinməsinə yol verildiyi, həmçinin tədbirlərin keçirilməsi ilə bağlı icarə xərcləri üzrə artıq büdcə vəsaitinin ödənildiyi də müəyyən edilib.

Qeyd edilən faktlarla bağlı Baş prokuror yanında Korrupsiyaya qarşı Mübarizə Baş İdarəsində Azərbaycan Respublikası Cinayət Məcəlləsinin 179.4 (xüsusilə külli miqdarda mənimsəmə və ya israf etmə) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələri ilə cinayət işi başlanmaqla istintaqı aparılır.

İstintaqın gedişatı və nəticəsi barədə ictimaiyyətə əlavə məlumat veriləcək.

Qeyd edək ki, sözügedən hadisələr Əbülfəs Qarayev mədəniyyət və turizm naziri olarkən baş verib.

Məlumat üçün bildirək ki, bu ilin may ayının 21-də prezident İlham Əliyevin sərəncamı ilə Əbülfəs Mürsəl oğlu Qarayev Azərbaycan Respublikasının Mədəniyyət naziri vəzifəsindən azad edilib. Bu sərəncamdan bir müddət əvvəl isə DTX Mədəniyyət Nazirliyində əməliyyat keçirərək nazir müavini Rafiq Bayramov və Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanovu saxlayıb. Aparılan cinayət işi üzrə Rafiq Bayramov vəzifə səlahiyyətlərindən sui-istifadə etmə, mənimsəmə, vəzifə saxtakarlığı, Zakir Sultanov vəzifə səlahiyyətlərindən sui-istifadə etmə və mənimsəmə faktlarına görə Cinayət Məcəlləsinin müvafiq maddələri ilə təqsirləndirilən şəxs qismində cəlb edilərək barələrində məhkəmənin qərarı ilə həbs qətimkan tədbiri seçilib. Xatırladaq ki, Ə. Qarayev 1994-cü ildən nazir işləyirdi.

2266
Bakıda klinikaların birində koronavirus testi

Azərbaycanda son sutkada 386 nəfər COVID-19-a yoluxub