BAKI, 18 iyun — Sputnik. Ötən həftə "CinemaPlus" kinoteatrlar şəbəkəsi kinosevərlər üçün yeni layihə ərsəyə gətirib. "Cinema Plus"un PR meneceri Nərmin Həsənovanın Sputnik Azərbaycan-a verdiyi məlumata görə, Şamaxı şəhərində yerləşən "Abqora" restoranında "Meysəri" şərabları və "CinemaPlus"un birgə layihəsi olan "Open Air Cinema"da hər həftəsonu açıq havada, təbiətin qoynunda qonaqlar yeni filmləri izləyə biləcəklər:
"Bu layihə keçən il də Şamaxıda baş tutmuşdu. Layihə regionda həyata keçirilsə də, paytaxt sakinləri tərəfindən də böyük maraqla qarşılanıb. Hələ ki, Bakıda başlamamışıq. Bakıda da belə layihələr nəzərdə tutulub. Məlum məsələləri nəzərə alaraq hələlik paytaxtda gözləmə mövqeyindəyik".
Nərmin xanım "AvtoCinema" adlı layihədən də danışıb:
""Open Air Cinema" layihəsi Bakıda gerçəkləşdikdən sonra digər layihəni - "AvtoCinema"nı təqdim edəcəyik. "AvtoCinema" layihəsi açıq havada kinoteatr giriş və çıxışı olan böyük avtopark sahəsini xatırladır. İnsanlar şəxsi avtomobillərində əyləşərək böyük ekranda filmləri izləyəcəklər. Çalışdıq ki, "Open Air Cinema" bir pilot layihə kimi regionda sınaqdan keçirilsin və daha sonra maraq və istəkləri nəzərə alaraq bu təcrübəni paytaxta köçürə bilək. Bu layihə pandemiya şəraiti ilə əlaqəli deyil, adi vaxtlarda da davam etdirilə bilər. İnanıram ki, kinosevərlərimiz yeni layihə vasitəsilə filmlər izləmək imkanı qazanacaqlar".
Qeyd edək ki, "Open Air Cinema"da filmlər və seanslar haqqında məlumatı "CinemaPlus"un sosial şəbəkə hesablarından əldə etmək mümkündür.
Xatırladaq ki, Azərbaycan Nazirlər Kabineti yanında Operativ Qərargah Koronavirus pandemiyası ilə bağlı (COVID-19) ötən ilin martın 14-dən etibarən ölkə daxilində tətbiq olunan sosial təcrid tədbirlərini həyata keçirib. Bu tədbirlərə toy, yas mərasimləri və digər kütləvi toplantıların qadağan edilməsi, mədəniyyət obyektlərinin, teatrların, muzeylərin, kinoteatrların, əyləncə mərkəzlərinin, idman mərkəzlərinin və digər əlaqəli obyektlərin bağlanması da daxil olub.`
