Səhnə, arxiv şəkli

Vəziyyət acınacaqlıdır: Pərdə qalxanda faciələrə güləcəyik?

1280
(Yenilənib 22:33 11.09.2020)
Sputnik Azərbaycan ölkəmizdəki fəaliyyət göstərən müxtəlif teatrlardakı aktyor və rejissorların fikirlərini öyrənib

Şahpəri Abbasova, Sputnik Azərbaycan

BAKI, 11 sentyabr — Sputnik. Teatrların açılmasına icazə verilərsə, səhnədə göstərilənlərdən zövq alacağımız böyük sual altındadır. Dindirdiyimiz sənət adamlarının əksəriyyəti pandemiya dövründən, karantindən yorulduğunu, ruhən əzildiyini dilə gətirir. Amma aralarında təəccüblü də olsa, nikbinləri də var.

Sputnik Azərbaycan ölkəmizdə fəaliyyət göstərən müxtəlif teatrlardakı aktyor və rejissorların fikirlərini öyrənib.

Azərbaycan Dövlət Akademik Musiqili Teatrının, eyni zamanda Abdulla Şaiq adına Azərbaycan Dövlət Kukla Teatrının aktrisası, daha çox tamaşaçıların "Keyxanım" obrazı ilə tanıdığı Ülviyyə Əliyeva üçün karantin dövrü həm şəxsi, həm də sənət həyatına çox pis təsir edib: "Mənə çox pis təsir etdi. Həm sənət baxımından, həm də şəxsi həyatımda problemlər yaşadım. Belə ki, artıq 9 aydır ki, mən həyat yoldaşımdan ayrı düşmüşəm. Yoldaşım Rusiya vətəndaşıdır. Ona görə də o, gələ bilmədi. Mən həm Akademik Musiqili Teatrın, həm də Kukla Teatrının aktrisasıyam. Musiqili Teatra gedə bilmədim, amma Kukla Teatrına gedib orada pandemiya qaydalarına riayət edərək kuklalarla məşq elədim. Əks təqdirdə, ürəyim partlayardı. Bir növ onlarla təskinlik tapdım. Gərgin iş rejiminə öyrənən adamam, indi səhnəsiz, sənətsiz qalmaq mənə pis təsir edib. Bir o var ki, səsim yerinə gəlib".

Azərbaycan Teatr Xadimləri İttifaqının yaradıcılıq üzrə sədr müavini, Akademik Milli Dram Teatrının aktyoru, Xalq artisti Hacı İsmayılov bildirir ki, karantin dövründə Teatr Xadimləri İttifaqının bir çox layihəsi təxirə düşüb: "Bütün dünya bu bəladan əziyyət çəkir. Bu, sənət adamlarına ikiqat təsir edib. Təsəvvür edin, 10 Mart Azərbaycanda Milli Teatr Günü kimi hər il xüsusi qeyd olunardı. Bu il onu da keçirə bilmədik. Qax rayonunda fəaliyyət göstərən Gürcü teatrının tamaşası olacaqdı, o da yarımçıq qaldı. Azərbaycan Teatr Xadimləri İttifaqının bir çox layihələrini icra edə bilmədik. Aktyor, sənət adamı boş qalmamalıdır. İşləməlidir ki, cilalansın. Şükürlər olsun ki, məni yeni filmə dəvət etdilər. "Mozalan" studiyası "Olimpiya" adlı melodramanın çəkilişlərinə başlayıb. Filmsevərlər bu dəfə ötən əsrin 80-90-cı illərində çəkilən filmlərin ruhuna, ovqatına uyğun yeni bir əsərlə tanış olacaqlar. Mən də orada yenidən Mustafa obrazını canlandırıram. Hazırda Zaqataladayıq, burada pandemiyanı qətiyyən hiss etmirik. Həm təbiət, həm də çəkiliş meydançası mənə pandemiyanı unutdurub".

Bakı Bələdiyyə Teatrının aktrisası Zülfiyyə Qurbanovaya da karantin dövrü təsirsiz ötüşməyib: "Hər kəsə təsir etdiyi kimi mənə də təsir edib. "Ata ocağı" serialında hekayəm bitdiyinə görə serialla yollarımızı ayırdıq. Teatrların da fəaliyyət göstərməməsi məni sanki korşaldıb. Çalışıram ki, bu boşluğu doldurum. Kitab oxumaqla, dünyaca məşhur mükafatları qazanan filmləri izləməklə. Bundan başqa, Xəyalə Rəis və Şahin Sərdarovun "Qadına şiddətə son" adlı fotolayihəsində çəkildim. Bu, məni bir az sakitləşdirdi".

Pantomima Teatrının aktyoru, həmçinin rejissorluqla da məşğul olan Cavad Nuriyev deyir ki, bu dövr onun içində mənəvi boşluq yaradıb: "Mən düşünmürəm ki, teatrla, yaradıcılıqla məşğul olan bir insana ondan uzaq düşmək təsirsiz ötüşsün. Nə qədər başımızı qatmağa çalışsaq da içimdə bir boşluq yaranıb. Mən demirəm ki, teatrsız mümkün deyil. Amma bu sənətlə məşğul olan insan hər zaman səhnədə olmaq istəyir. Onu narahat edən hər hansı problemi səhnədə canlandırmaq istəyir. Pandemiyanın yaratdığı uzaqlıq pantomim aktyoru olaraq plastikamızın geriləməsinə təsir edir. Qısacası, tez bir zamanda səhnəyə qayıtmaq lazımdır. Digər teatrlarda olduğu kimi bizim də teatr öz tamaşalarını onlayn nümayiş etdirdi. Amma teatr canlı sənət olduğu üçün düşünürəm, bu, o effekti vermədi. Tamaşaçı qarşısına çıxmaq başqa bir hiss yaradır insanda".

Azərbaycan Dövlət Gənc Tamaşaçılar Teatrının aktyor və rejissoru, Əməkdar artist Nicat Kazımov pandemiya dövründə mənəvi böhran keçirib:

"Həddindən artıq pis təsir edib mənə. Depressiyanın bir addımlığındayam. Biz sənət adamları həmişə insanlar içində, səhnədə olmağa öyrəşmişik. İndi isə evdə qalmağa məcburuq. Teatr kino deyil ki, onu çəkib göstərəsən. Televiziya tamaşaları çəkilir, tarixdə qalmaq üçün, teatra gələ bilməyənlərin baxması üçün. Amma bu, canlı tamaşanın yerini vermir. Tezliklə teatrlar açılmalıdır. 150 nəfərlə də olsa, açılmalıdır. Moskva, Gürcüstan artıq teatrları açıb. Məşqlər başlanılıb. Bizdə isə hələ də karantindir. Sənət yoldaşlarımla telefonla danışıram, onların da vəziyyətləri olduqca acınacaqlıdır".

Sənət yoldaşlarından fərqli olaraq, Azərbaycanın Xalq artisti, məşhur kino və teatr aktyoru İlham Namiq Kamal karantin dövründə insanları səbirli olmağa çağırıb: "Bilirsiniz ki, cəmiyyətdə daha çox "III Dünya müharibəsi" adlandırılan koronavirus xəstəliyinin qarşısını almaq üçün ilk günlərdən etibarən dövlətimiz zəruri tədbirləri həyata keçirir. Prezident İlham Əliyevin tapşırıqlarına uyğun olaraq çevik və qətiyyətli addımlar atıldı və bu siyasət davam etdirilir. Təbii ki, xəstəliklə mübarizədə zamana ehtiyac var və bu zamanın nə qədər çəkəcəyini heç kəs bilmir. Vaksin tapılana kimi, biz həm özümüzü, həm də sevdiyimiz insanları, cəmiyyətimizi qorumalıyıq. Koronavirusla mübarizə istiqamətində Operativ Qərargahın qaydalarına riayət etməklə bu çətin dövrü adlaya bilərik. Hər bir insanın özünü qoruması dövlətini, cəmiyyətini qoruması deməkdir. Dövlətin tətbiq etdiyi qaydalar, karantin rejiminin şərtləri bizim sağlamlığımıza yönəlib.

Xalq artisti karantin dövrünü necə keçirdiyindən də danışıb: "Mən hazırda Şamaxıda bağdayam və görürəm ki, burada yoluxma çox azdır. Demək olar ki, yoxdur. Şamaxı İcra Hakimiyyəti də bu məsələlərə nəzarət edir. Burada kafelər, restoranlar çalışır və insanlar məsafə saxlayırlar, maskadan istifadə edirlər, marketlərdə spirt yerləşdirilib və hər kəsdən maska tələb edilir. Yəni burada qaydalara riayət olunur və insanlar da gəlib istirahət etmək istəyirlər. Qaydalara riayət etdikdən sonra, məncə, heç bir qorxusu yoxdur. Azərbaycanın dilbər guşələri çoxdur. Səfalı təbiəti, gözəl havası olan ərazilərimiz kifayət qədərdir. Orada sağlam insanlar istirahət etsələr, məncə, yoluxmaların sayı elə də çoxalmaz".

Sevimli aktyorumuz öz sənət yoldaşlarına bu dövrdən yararlanmağı məsləhət gördü: "Hər bir aktyorun evdən çölə çıxmaq imkanı yoxdursa, evində də məşq edə bilər. Təkcə məşqlə də iş bitmir. Aktyorun mütaliəsi də olmalıdır. Əgər əllərinin altında lazımi kitablar yoxdursa, onlara lazım olan materialları internetdən də tapıb oxumaq imkanına sahibdirlər. Aktyor savadlı və ağıllı olmalıdır. Nə qədər ağıllı olacaqsa, özünü səhnədə bir o qədər rahat və sərbəst idarə edəcək. İstər-istəməz, oynadığı obrazları görəndə, aktyorun geyimindən, qrimindən daha çox, plastikasına və təfəkkürünə qiymət verirlər. Əgər sənət adamı cilddən-cildə girə, başqalaşa bilirsə, bu, etdiyi mütaliə, eyni zamanda səhnədəki təcrübələrinin hesabına başa gəlir. Cildə girmək təkcə qrim etməklə kifayətlənmir. Gərək içindən dəyişəsən. İçindən də dəyişmək üçün gərək təfəkkürün, savadın yüksək səviyyədə olsun. Tamaşaçını ancaq ağlınla təəccübləndirə bilərsən. Səhnəyə çıxmaq üçün insan içindən dəyişməlidir".

1280
Əlaqədar
Xınalıqlı qıza görə "Ən yaxşı aktrisa" diplomuna layiq görüldü
Tanınmış azərbaycanlı model kişiləri təhqir edib
Tanınmış aktrisa: "Müəllimimə qulaq asmadım, indi isə peşmanam"
“Miss Azərbaycan” model biznesindən əl çəkib məşhurluq üçün Türkiyəni seçdi
Zülfiyyə Qurbanova: "Bu yerdən sonra ayrıla bilmərəm, xatirələrimiz var birlikdə"
Azərbaycanın Əməkdar artisti bəstəkar-müğənni Elza Seyidcahan

Elza Seyidcahan "Taclı eybəcər"lə gündəmi alt-üst etdi

23
(Yenilənib 19:37 23.09.2020)
Ekstravaqant geyimləri və şeirləri ilə məşhur olan Əməkdar artist Elza Seyidcahan bu dəfə də gündəmi alt-üst edib.

Şahpəri Abbasova, Sputnik Azərbaycan

BAKI, 23 sentyabr — Sputnik. Ekstravaqant geyimləri və zaman-zaman geniş müzakirələrə səbəb olan şeirləri ilə məşhur olan Əməkdar artist Elza Seyidcahan bu dəfə də gündəmi alt-üst edib.

Sputnik Azərbaycan-ın məlumatına görə, bəstəkar-müğənni bu dəfə dünyanı cənginə alan koronavirusa şeir yazıb. Müğənni şeiri ATV kanalında yayımlanan "Bağ mövsümü" verilişində səsləndirib.

Müğənni bildirib ki, sözügedən şeiri sərt karantin rejiminin tətbiq olunduğu vaxtlarda yazıb. Barəsində danışılan şeir "Taclı eybəcər" adlanır. Şeir sosial şəbəkə izləyiciləri tərəfindən sərt qarşılanıb. Onlar Əməkdar artisti buna görə qınayıblar.

https://www.youtube.com/watch?time_continue=43&v=LsPXCk7v3JY&feature=emb_logo

23
Əlaqədar
Seyidcahanın anası dələduzun hədəfinə tuş gəlib
Günel Atkinson Nəsibova

Azərbaycana səyahət etmək istəyən əcnəbilər “Ağsaqqal”ı görsünlər VİDEO FOTO

1562
(Yenilənib 10:00 23.09.2020)
Fransada yaşayan Günel Atkinson Nəsibova qeyri-adi masaüstü oyun hazırlayıb. O, Azərbaycan xalqının mədəniyyətini, tarixini və ənənələrini populyarlaşdırmağa imkan verir.

Kəmalə Əliyeva, Sputnik Azərbaycan

BAKI, 23 sentyabr — Sputnik. Fransada yaşayan azərbaycanlı Günel Atkinson Nəsibova qeyri-adi masaüstü oyun yaradıb. “Ağsaqqal” adlanan oyun sosial şəbəkələrdə müzakirə mövzusu olub. Oyunun məqsədi Azərbaycanın dəyərləri, ənənələri, tarixi, mədəniyyəti və incəsənəti barədə biliklərin ötürülərək artırılmasına xidmət etməkdir. Öz ixtirası barədə Nəsibova Sputnik Azərbaycan-a müsahibəsində geniş məlumat verib.

- Günel, Bakıdan Fransaya köçməyiniz necə alındı?

- Bakıda riyaziyyat müəllimlərinin ailəsində doğulub-böyümüşəm. Uşaq vaxtı dama oynamağı sevirdim, hətta 13 yaşım olanda Azərbaycan çempionu adı da qazandım. 15 yaşımda daha bir sürpriz gözləyirdi məni - Freedom Support Act (FSA) proqramının qaliblərindən biri oldum. Bu proqram hər il 50 nəfər yuxarı sinif şagirdinin 1 il müddətində ABŞ-da dəyişmə proqramı vasitəsilə təhsil almasına sponsorluq edirdi.

Bakıya qayıdandan sonra Amerika Universitetinə qəbul olundum və dörd il sonra “İşgüzar idarəetmə” ixtisası üzrə bakalavr diplomu aldım. Maliyyə və mühasibat sahəsində müxtəlif beynəlxalq şirkətlərdə on il işlədikdən sonra qərara aldım ki, təhsilimi davam etdirim.

2010-cu ildə Böyük Brtaniyaya getdim. Əvvəl MBA proqramı üzrə oxuyurdum, sonra diplomlarımın sırasında CIMA diplomunu da qata bildim.  

2014-cü ildə həyat yoldaşımın işinə görə Bakıya qayıtdım və ailəm burada dörd möhtəşəm il keçirdi. Ancaq 2018-ci ildə ərimin müqaviləsi bitdiyindən yenidən Böyük Britaniyaya döndük.

© Photo : Gunel Atkinson Nasibova
Günel Atkinson Nəsibova

Təzə gəlmişdik ki, Parisə köçəcəyimiz barədə xəbər aldıq. Kefimiz pozula da bilməzdi – Paris nağıl kimi şəhərdir.

Burada artıq üçüncü ildir, yaşayırıq və hər gələn il hiss edirəm ki, Paris daha da doğmalaşır, onu daha çox sevirəm. Amma bunlara baxmayaraq, dünyanın heç bir şəhəri sevimli Bakımın yerini verə bilməz. Gözəl ailəm: həyat yoldaşım Klayv, iki gözəl övladım, oğlum Elvin və qızım Leyli var, buna görə taleyimə minnətdaram.

- Bəs  “Ağsaqqal” oyununu yaratmaq ideyası necə  yarandı? Adı da çox qəribədir.

- İdeyanı uşaqların sayəsində firikləşdim. Anlayırdım ki, Bakıda yaşamayaraq, öz Vətənin haqda yetəri həcmdə məlumat almayaraq, daimi olaraq həmvətənlərinlə ünsiyyət saxlamayaraq öz köklərindən daha da uzaq düşürsən. Bu, kefimi pozurdu. Elə vəziyyəti dəyişmək istəyi də masaüstü oyun yaratmaq ideyasını doğurdu.

Ailəmiz oyunları sevir. Ona görə əmin idim ki, bu formatda mütləq qoyduğum məqsədə çatacam.

- Niyə məhz “Ağsaqqal”?

- “Ağsaqqal” sözünü çox sevirəm. Onunla çox yaxşı assosiasiyalarım var. Ağsaqqal müdriklik və hörməti ehtiva edir, yəni bir sözdə bu qədər dərinlik var. Bu ad ağlıma gələndə dərhal anladım ki, başqa variant axtarmaq heç lazım da deyil.

- Bu, yaratdığınız ilk oyundur?

- Bəli, “Ağsaqqal” ilk oyunumdur. Planımda onu bir az da genişləndirmək var. Yəni davamı olaraq “Ağbirçək” də yarada bilərəm.

- Bu oyunun qaydaları nədir?

- “Ağsaqqal”ın məqsədi Azərbaycanın dəyərləri, ənənələri, tarixi, mədəniyyəti və incəsənəti barədə məlumatları ötürmək və çoxaltmaqdır. Oyunçular bizim ölkənin xəritəsini əks etdirən masaüstü lövhənin üzəriylə “səyahət” edərək ölkə haqda öyrənirlər. Qazanaraq “ağsaqqal” olmaq üçün oyunçu yolda Azərbaycan haqda suallar olan vərəqləri yığaraq səyahəti birinci tamamlamalıdır. Suallar da öz növbəsində bir neçə kateqoriyaya bölünür, həm öyrədici, həm də əyləncəlidir.

Oyun konsepsiyasına görə çətin deyil, amma məzmununa görə xüsusidir, gözəlliyi də elə bundadır.

© Photo : Gunel Atkinson Nasibova
Günel Atkinson Nəsibova

Oyunun çətinliyinə görə iki mərhələsi var, yəni onu Azərbaycanda yaşayanlar və xaricdə olanlar oynaya bilərlər. Hətta ən xırda detallar da Vətənimizə qarşı diqqət və məhəbbətlə düşünülüb. Məsələn, hərəkət etdirilən fişkalar da sevdiyimiz atributları – paxlava, çarıq, Qarabağ atı – ifadə edir.

- “Ağsaqqal” nə qədər vaxtınızı aldı? Oyunu yaradarkən hansı çətinlikləriniz oldu?

- Rəqəmsal dizayn, test mərhələsi və ilkin protototipinin əldə edilməsi də daxil “Ağsaqqal”ın yaradılmasına bir il sərf etdim. Yeri gəlmişkən, nə qədər narahat olub kədərlənsəm də COVID-19 və onun səbəbindən karantin bir qədər mənə kömək oldu ki, sevimli məşğuliyyətimə daha çox vaxt ayırıım.  

Əlbəttə, çətinliksiz də olmur. Məsələn, əvvəl heç vaxt rəqəmsal dizaynla məşğul olmamışam, müxtəlif proqramlar yükləyib hər şeyi öyrənməyə məcbur oldum. Oyun çapa hazır olan kimi ilk növbədə Bakıdakı naşirlərimizə müraciət etdim, amma belə bir istehsalçı tapa bilmədim. Xarici şirkətlərə müraciət etməli oldum.

Gələcəkdə öz yerli resurslarımızdan, azərbaycanlı istehsalçıların xidmətlərindən istifadə etmək istərdim. İndi bu layihənin maliyyələşməsi ilə bağlı çətinlik var, amma düşünürəm ki, yaxın gələcəkdə məsələ həllini tapacaq.

- Fransada oyununuzu necə dəyərləndirdilər?

- Fransada bizim diasporun nümayəndələrinə “Ağsaqqal” barədə məlumat verdim və onlardan, eləcə də hörmətli səfirimiz Rəhman Mustafayevdən dəstək və xoş arzular aldım. Əlbəttə ki, bu məni çox sevindirdi və qürurlandım.

Oyunum barədə ilk bölüşdüyüm insanlardan biri də həmyerlimiz, gözəl rəssam Əsmər Nərimanbəyova oldu. Parisdə yaşayan Əsmər xanım bizim dahi rəssamımız Toğrul Nərimanbəyovla Azərbaycanın xalq heykəltaraşı Elmira Hüseynovanın qızıdır, gözəl qəlbli bir insandır. O, “Ağsaqqal” oyununun faydasını dərhal qiymətləndirdi və bu istiqamətdə işimi təriflədi.

“Ağsaqqal” hələ satışa çıxmayıb, amma ümid edirəm ki, yaxın gələcəkdə onu almaq istəyənləri sevindirə biləcəyəm.

© Photo : Gunel Atkinson Nasibova
Günel Atkinson Nəsibova

- Belə bir fikir var ki, demək olar ki, bütün kompüter oyunları ünsiyyəti öldürür, masaüstü oyunlarda isə hər şey tərsinədir – tanışlıq, canlı ünsiyyət, elə coşğu da boldur. Necə bilirsiniz, kompüter oyunları masaüstü oyunları tamamilə sıxışdırıb çıxara bilər?

- Bəli, tamamilə haqlısınız. Masaüstü oyunların gözəlliyi  elə ondadır ki, onlar dost-tanışları, doğmaları bir yerə toplayır, vaxtımızı birlikdə maraqlı keçirməyə imkan yaradır. Məhz bu fakta görə, hesab edirəm ki, kompüter oyunları heç vaxt masaüstü oyunları sıxışdıra bilməz. Ən azından hələ robotlar bəşəriyyəti zəbt eləməyincə (gülür).

- Sizin oyunu Azərbaycanda almaq mümkün olacaq?  

- Əlbəttə, mütləq. Arzum odur ki, “Ağsaqqal” hər bir azərbaycanlının evində olsun.

1562
Teqlər:
oyunçu, sual, ənənə, tarix, incəsənət, mədəniyyət, Azərbaycan, Böyük Britaniya, Fransa, azərbaycanlı, oyun
BakuBus avtobusu

"BakuBus" avtobusu qəzaya uğradı - VİDEO

0
(Yenilənib 11:52 24.09.2020)
Qəza Neftçilər prospekti, "Park bulvar"ın qarşısında baş verib. “BakuBus” şirkətinə məxsus 18 metrlik sərnişin avtobusu yol kənarındakı maneəyə çırpılıb

BAKI, 24 sentyabr — Sputnik. “BakuBus” avtobusu qəzaya uğrayıb.

Sputnik Azərbaycan bildirir ki, bu barədə baku.ws məlumat yayıb.

Посмотреть эту публикацию в Instagram

Публикация от BAKU.WS News Agency © (@baku.ws_official)

Bildirilir ki, qəza Neftçilər prospekti, "Park bulvar"ın qarşısında baş verib. “BakuBus” şirkətinə məxsus 18 metrlik sərnişin avtobusu yol kənarındakı maneəyə çırpılıb. 

Bakı Nəqliyyat Agentliyinin mətbuat katibi Mais Ağayev Sputnik Azərbaycan-a açıqlamasında bildirib ki, bu gün səhər 125 nömrəli müntəzəm marşrut xətti üzrə hərəkət edən avtobusun iştirakı ilə yol nəqliyyat hadisəsi baş verib. Hadisə nəticəsində heç kim xəsarət almayıb.

0
Teqlər:
BakuBus, avtobus, qəza