BAKI, 2 iyun - Sputnik, Kəmalə Əliyeva. Pop musiqisinin kralı Maykl Ceksonun bacısı müğənni Canet Cekson azərbaycanlı həmkarı Emin Eminzadənin ABŞ-da irqçiliyə qarşı etirazını dəstəkləyib.
Sputnik Azərbaycan-ın məlumatına görə, Eminzadə mayın 25-də ABŞ-da başlamış, yalnız nümayişlərlə deyil, həm də mağazaların, kafelərin, apteklərin və digər müəssisələrin talanları, yandırılması ilə müşayiət olunan kütləvi etiraz aksiyaları ilə bağlı fikirlərini bildirib.
Xatırladaq ki, iğtişaşlar Minnesota ştatının ən iri şəhəri olan Minneapolisdə 46 yaşlı qaradərili şəhər sakini Corc Floydun saxlanılarkən polis tərəfindən qətlə yetirilməsindən sonra başlayıb. Hadisə şahidlər tərəfindən telefonla çəkilərək internetə qoyulub və video sosial şəbəkələrdə virus kimi yayılıb.
Eminzadə də bu məsələyə münasibətdə dünya şöhrətli ifaçılardan kənarda qalmamağı qərara alıb və irqçiliyin əleyhinə çıxıb.
“Biz hamımız bərabərik. Dağılmış mağazaları və ya küçələri yenidən təmir etmək mümkündür, lakin insan həyatını geri qaytarmaq mümkün deyil. Əgər kimsə başqa cür düşünürsə və ağ dərililərin üstün olduğuna inanırsa, mən sadəcə bu insanlarla dostluq münasibətləri saxlaya bilmərəm”, - deyə "Instagram" sosial şəbəkəsindəki səhifəsində yazıb.
Emin Eminzadənin statusu Canet Ceksonun ürəyincə olub və o, azərbaycanlı həmkarının statusuna yazdığı şərhdə onun fikirlərini dəstəkləyib.
Canet Cekson amerikalı müğənni, mahnılar müəllifi, prodüser, rəqqasə, kino və televiziya aktrisası, dünya şöhrətli pop ulduzu Maykl Ceksonun bacısıdır. O, Ceksonlar ailəsinin ən kiçik övladıdır. İlk dəfə səhnəyə yeddi yaşı olanda, 1976-cı ildə "The Jacksons" serialına çəkilərkən çıxıb. "Billboard" jurnalının məlumatına görə, Canet müasir pop musiqisi tarixində albomları ən çox satılan sənətçilər siyahısındadır. Onun indiyədək bütün dünya üzrə 100 milyon nüsxədən çox albomu satılıb.
Emin Eminzadə Qazaxıstanda keçirilən "Qızıl mikrofon" müsabiqəsinin qalibidir. İtaliyada keçirilən Elia Catalano və 2012-ci İspaniyada təşkil olunan Opus müsabiqələrində iştirak edib.
O, Bakıda məşhur İtaliya müğənnisi Robertino Loretti ilə eyni səhnəni bölüşərək onunla "Jamayka" və "O Sole Mio" kompozisiyasını duet oxuyub. Dünya şöhrətli ulduz bu ifadan sonra Eminzadəni "Azərbaycanın Robertinosu" adlandırıb.
O, hətta ABŞ-da tələbə mübadiləsi proqramı üzrə təhsil almaq üçün təqaüd qazanmağa müvəffəq olub və Texasda təhsil alıb. Emin Eminzadə daha sonra Amerika Musiqi və Dram Akademiyasına daxil olub və oranı bitirib. Hazırda gənc müğənni Azərbaycanda, Türkiyə və ABŞ-da karyerasını davam etdirir. Müğənninin adı "Azərbaycanın gənc ifaçılarının qızıl kitabı"na düşüb.
