Teatr səhnəsi, arxiv şəkli

Mədəni karantin: İndi pulun əhəmiyyəti qalmadı, əsas odur, vaxt getsin

577
(Yenilənib 17:40 29.03.2020)
Ölkədə bir sıra teatrlar fəaliyyətlərini onlayn rejimdə davam etdirməyə qərar veriblər. İndi sosial şəbəkə vasitəsilə onlardan bəzilərinin tamaşalarını izləmək mümkündür. Bəzi aktyorlar da məşqi dayandırmayıblar.

Kamal Almuradlı, Sputnik Azərbaycan

BAKI, 30 mart — Sputnik. Paytaxt Bakıda fəaliyyət göstərən ölkənin aparıcı teatrlarının bir qismi tamaşalarını onlayn şəkildə teatrsevərlərə təqdim etmək barədə qərar verib. İlk bu təşəbbüsə Azərbaycan Dövlət Akademik Milli Dram Teatrı qoşulub. Sputnik Azərbaycan onlayn yayımla bağlı məlumat əldə etmək üçün teatrın mətbuat katibi Cavid Zeynallı ilə əlaqə saxlayıb.

O bildirib ki, hazırkı vəziyyətdə çətinlik yoxdur: "Artıq üç tamaşa nümayiş etdirmişik. Yayım teatrımızın "Facebook" səhifəsi üzərindən edilir. Göstərilən səhnə əsərlərindən ikisi böyüklər üçündür. İlk olaraq 2002-ci ildə hazırlanan "Hamlet" tamaşasını yayımladıq.

Onlayn şəkildə vaxtilə repertuarda olan tamaşalarla yanaşı, yeni tamaşalar da nümayiş olunur. Yeni tamaşaları "Youtube" kanalımıza yerləşdirməmişik. Buna səbəb repertuarda olmalarıdır. İnanıram ki, teatrımızın tamaşaçıları üçün bu yayımlar maraqlı olacaq. Həm də müəyyən səbəbdən baxa bilmədikləri səhnə əsərlərini sosial şəbəkə vasitəsi ilə izləyəcəklər".

Azərbaycan Dövlət Akademik Musiqili Teatrının yaradıcı heyəti də ölkəmizdə koronavirus infeksiyasının qarşısının alınması istiqamətində qoyulan bütün tələb və qaydalara ciddi şəkildə əməl edir. Bu haqda Sputnik Azərbaycan-a teatrın direktoru, Azərbaycan Respublikasının Əməkdar incəsənət xadimi Əliqismət Lalayev söyləyib. Teatr dünyanı cənginə alan koronavirus pandemiyasının ölkə ərazisində yayılmasının qarşısının alınması, vətəndaşların sağlamlığının qorunması məqsədilə Azərbaycan Respublikası Prezidenti İlham Əliyevin sosial həmrəylik nümayiş etdirilməsi barədə tövsiyələrinə uyğun olaraq irəli sürdüyü təşəbbüsə qoşulub: 

"Teatr rəhbərliyi aylıq əmək haqqından könüllülük prinsipi əsasında ayırdığı vəsaiti ölkə başçısının "Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında" 2020-ci il 19 mart tarixli Fərmanına əsasən yaradılmış Koronavirusla Mübarizəyə Dəstək Fonduna köçürüb.

Azərbaycan Respublikası Mədəniyyət naziri Əbülfəs Qarayevin mədəniyyət işçilərinə müraciətindən sonra teatrın kollektivi daha da aktiv fəaliyyətə keçib. Teatrımızın bütün kollektivi, xüsusilə də istedadlı gəncləri "Evdə qal" kampaniyasına qoşularaq çağırışlar edirlər.

Teatrımızın əməkdaşları, Əməkdar artistlər - Ələkbər Əliyev, Emin Əliyev ölkədə koronavirusla mübarizəni təbliğ edən müxtəlif reklam materiallarında təmənnasız olaraq çəkiliblər və koronavirusla mübarizədə öz dəstəklərini nümayiş etdiriblər. Bu gün də bütün televiziya kanallarında həmin reklam materialları yayımlanır. Nazirliyin Facebook səhifəsində tamaşalarımıza baxışlar keçirilir. Teatr rəhbərliyi tərəfindən imkansız, yaşı 65-dən yuxarı olanlarla telefonla tez-tez əlaqə saxlanılır və onların ehtiyacları ödənilir".

Tamaşalara gəlincə isə teatr direktoru bildirdi ki, 9 tamaşa üzərində hazırlıq işləri onlayn şəkildə aparılır: "Tamaşalarda məşğul olan aktyorlara tapşırıqlar verilir, onlar da öz növbəsində məşqlərin videosunu çəkərək bizə göndərirlər".

Rəqs, arxiv şəkli
© REUTERS / Lisi Niesner

Qeyd edək ki, Mədəniyyət Nazirliyinin Facebook səhifəsində digər teatrlarımızın, eləcə də bölgələrdə yerləşənlərin tamaşaları da yayımlanır. Həmçinin burada mədəniyyət və incəsənətlə bağlı ustad dərsləri, açıq dərslər verilir, muzeylər, kitabxanalar barədə məlumatlar paylaşılır, film nümayişləri keçirilir. 

Ölkənin ilk inklüziv ƏSA Teatrı da onlayn fəaliyyətə başlayaraq, #evdəbax kampaniyasına qoşulub.

Teatrın baş meneceri Nicat Qulamovun Sputnik Azərbaycan-a verdiyi məlumata görə, ƏSA Teatrı repertuarındakı bütün tamaşalarını onlayn nümayiş etdirəcək. Tamaşaçılar ƏSA Teatrının tamaşa nümayişlərinin təqvim planı ilə teatrın rəsmi Facebook səhifəsində tanış ola bilərlər. Tamaşaların nümayişi canlı yayım vasitəsilə olunduğundan, əvvəlcədən təyin olunmuş saatda baş tutacaq.

577
Əlaqədar
Azərbaycanın məşhur aktrisasına doğum günü üçün möhtəşəm sürpriz
İtalyanlar və koronavirus – mədəniyyət və ciddiyyət...
“Mən də hamı kimi...” – Fiziki məhdudiyyətli və adi aktyorlar səhnəni necə paylaşır
Muzey və kitabxanalara giriş məhdudlaşdırıldı
Netflix

"Netflix" İstanbulda ofis açır

24
"Netflix" platformasının qurucusu Reed Hastings Türkiyənin zəngin mədəni irsi və köklü hekayə anlatma qabiliyyəti baxımından çox dəyərli bir ölkə olduğunu bildirib

BAKI, 3 dekabr — Sputnik. Dünya üzrə təxminən 195 milyon üzvü olan "Netflix" platformasının İstanbulda ofisi açılacaq. Bu addım Türkiyədə istehsal olunan uğurlu ekran əsərlərinin dünya tamaşaçısına tanıdılmasında da əhəmiyyətli rol oynayacaq.

Sputnik Azərbaycan Türkiyə mətbuatına istinadən xəbər verir ki, bununla bağlı "Netflix" platformasından bildirilib.

Türkiyədəki sərmayələrini artıran şirkətin yeni ofisinin 2021-ci ilin ikinci yarısında istifadəyə verilməsi planlaşdırılır.

Bununla bağlı açıqlama verən Türkiyənin mədəniyyət və turizm naziri Mehmet Nuri Ersoy xüsusilə son on beş il ərzində əhəmiyyətli inkişaf yolu keçən ölkəsinin kino və teleserial sektorunun iqtisadi artımla yanaşı, həm də mədəni diplomatiya sahəsinə böyük töhfələr verdiyini bildirib: ""Netflix" kimi qlobal bir şirkətin ölkəmizdə ofis açması qərarını məmnuniyyətlə qarşıladıq. Türkiyə istehsalı olan film və serialların 190 ölkədə izlənə bilməsi bu sektorun daha geniş beynəlxalq cəmiyyətə tanıdılması və film turizminin inkişafına böyük töhfələr verəcəyini düşünürük".

"Netflix" platformasının qurucusu Reed Hastings Türkiyənin zəngin mədəni irsi və köklü hekayə anlatma qabiliyyəti baxımından çox dəyərli bir ölkə olduğunu bildirib.

24
Teqlər:
ofis, Türkiyә, Netflix şirkəti
İlqar Muradov, arxiv şəkli

İlqar Muradov: "Düşünürəm ki, zahirən Dronqoya oxşarlığım var"

2285
(Yenilənib 18:06 03.12.2020)
"Mənim əksər mahnılarım mənə aiddir. Amma mən nə oxuyuramsa o elə mənim qəlbimin musiqisidir. Onları sevərək, seçərək oxumuşam. Bütün mahnılarım mənə doğmadır"

Şahpəri Abbasova, Sputnik Azərbaycan

BAKI, 3 dekabr — Sputnik. Onun həzin, məlahətli səsini dinlədikcə ötən günlərə qayıdırsan. Kiminin uşaqlığı, kiminin gəcliyi, kiminin ilk məhəbbəti düşür yada… Bir sözlə, onu dinlədikcə xatirələr düşür yada.. "Bir ömrün nəğməsi", "Mənim 17 yaşım var", "Mənimlə qal", "İstərsənmi", "Bu dünyanı nağıl bilək", "Peşiman olarsan" mahnıları insanın ruhunu oxşayır. Söhbət alicənablığı, sakit, ciddi, ağır təbiəti, qalmaqallardan uzaq olması ilə seçilən Xalq artisti İlqar Muradovdan gedir. Sənətkar özü və sənəti ilə bağlı Sputnik Azərbaycan-a danışıb:

"Mən əslində, 5 yaşında pianoda çalıb-oxuyurdum. Məndən böyük bacım, qardaşım musiqi məktəbinə gedirdilər. Valideynlərimin dediyinə görə, mən onların ikisindən də istedadlı olmuşam. Sonra mən Naxçıvanda 7 illik Orta İxtisas Musiqi Məktəbinin piano şöbəsini bitirdim. Demək olar ki, ömrüm boyu musiqi ilə məşğul olmuşam. 1981-ci ildə bizim dahi sənətkarımız, mərhum Rafiq Babayev məni Bakıya dəvət etdi. Həmin vaxtdan bu günə qədər də oxuyuram".

"İlqar Muradovun ruhunu ifadə edən mahnı hansıdır?" sualına Xalq artistinin cavabı belə oldu: "Mənim əksər mahnılarım mənə aiddir. Amma mən nə oxuyuramsa o elə mənim qəlbimin musiqisidir. Onları sevərək, seçərək oxumuşam. Bütün mahnılarım mənə doğmadır. Mənim üçün fərqi yoxdur. Onlar mənim daxili aləmimdən xəbər verir. Onlar mənim övladlarımdır. Necə ki, övladlarımızın arasında fərq qoymuruq. Oxuduğum mahnılarım da mənim övladlarımdır. Onlar mənə yaxın olmasaydılar, mən onları ifa etməzdim".

Dünyanı cənginə alan COVİD-19 pandemiyası həmsöhbətimizin də yaradıcılığına təsirsiz ötüşməyib: "Karantindən qabaq 3 konsert nəzərdə tutulmuşdu. Onun 2-ni edə bildik, 1 konsert qaldı. Həmin konsertin tarixi dəyişilə-dəyişilə dekabrın 20-ə salınıb. Həmin vaxta bitsə, konsert baş tutacaq, ancaq çətin ki, o vaxta bitər. Ümidimiz 2021-ci ilədir".

Pandemiyadan söz düşmüşkən, müğənni insanlarımızı diqqətli olmağa, özlərini qorumağa çağırdı: "İnsanlar son dərcə diqqətli olsunlar. Qarabağ uğrunda döyüşlərdə qələbə qazandıq. Qripə də qalib gələsi olsaq çox yaxşı olar. Bu, özümüzün əlindədir".

"Pandemiya dövrü hər kəsə təsir etdiyi kim mənə də təsir etdi. Xüsusən maddi tərəfdən. Mən də öz doğmalarımı qorumaq üçün məcburiyyətdən evdə qaldım. Əslində mənə mənəvi olaraq elə də böyük təsir etmədi. Həmin dönəmlərdə yaradıcılığımın üzərində işlədir. Həmin dövrü səmərəli keçirdim".

Müsahibimizin fərqli imici, üzünün fakturası rejissor Yavər Rzayevin diqqətiini çəkib. Rejissor İlqar Muradovu quruluş verdiyi "Xeyirlə şərin rəqsi" filminə dəvət edib: "Filmin süjet xətti dünyaca məşhur xəfiyyə Dronqonun Azərbaycanın dağlıq rayonundakı bir qəsəbədə baş verən müəmmalı hadisəni araşdırması üzərində qurulub. Quruluşçu rejissor Yavər Rzayev məni baş rola - Dronqo obrazına dəvət etdi. Film Çingiz Abdullayevin "Quba kapriççiosu" əsəri əsasında lentə alınıb. Filmə ona görə çəkildim ki, o obraza simpatiyam var idi. Ümumiyyətlə, Çingiz müəllimin özünə də çox böyük hörmətim var. Yenə bu tipli obraza dəvət etsələr gedəcəyəm, amma başqa filmə yox".

"Əvvəlcə çəkilişə razılıq vermədim, çünki mən aktyor deyildim. Amma əsərlə tanış olduqdan sonra obrazda xarakterimə uyğun nələrisə tapdım. Düşünürəm ki, zahirən də Dronqoya oxşarlığım var. Çingiz Abdullayev mənim obrazımdan çox razı qalıb. Hətta premyerada da qeyd etdi ki, bu günə qədər çox film olub, lakin onların arasında ən uğurlu alınan və ən çox bəyəndiyi məhz bu filmdir. Bundan başqa, peşəkar kino mütəxəssisləri də film haqqında müsbət rəylər bildirirlər. Ümid edirəm ki, bunun ardı və yaxud başqa obrazlar olacaq".

Xalq artisti ölkəmizi xarici ölkələrdə də layiqincə təmsil edib: "Bir neçə layihələrdə də iştirak etmişəm. Misal kimi Norveç xoru ilə olan layihəni göstərə bilərəm. 1995-ci ildə mərhum səyyah Tur Heyerdal Azərbaycana gəldi. Onun ideyası ilə layihə yazıldı. Bu proyekt ən yaxşı proyektlər sırasına düşdü. Orda həm bəstəkar, həm də xalq mahnılarından istifadə etdik. Mərhum bəstəkar-pianoçu Rafiq müəllimin davamçısı olaraq dostum Siyavuş Kərimi ilə əl-ələ verib başqa-başqa ölkələrdə Azərbaycan musiqisini təbliğ etmişik. Qismət olarsa, yenə də edəcəyik".

2285

Göyçaylı xəstəni polis küçədə tutdu

0
Məmmədov evdə özünü təcrid etməli olduğu halda karantin qaydalarını pozaraq ictimaiyyət arasına çıxıb. Polis əməkdaşları tərəfindən onun olduğu yer müəyyən olunub və yaşadığı ünvana göndərilib

 

BAKI, 5 dekabr — Sputnik. Göyçay şəhər sakini Xasi Məmmədov COVID-19 virusunun daşıyıcısı olduğu üçün ev şəraitində müalicəyə cəlb olunub.

Sputnik Azərbaycan DİN-in Mətbuat Xidmətinin Şəki regional qrupundan verilən məlumata istinadla xəbər verir ki, ancaq o, evdə özünü təcrid etməli olduğu halda karantin qaydalarını pozaraq ictimaiyyət arasına çıxıb. Polis əməkdaşları tərəfindən onun olduğu yer müəyyən olunub və yaşadığı ünvana göndərilib.

X.Məmmədov barəsində Göyçay RPŞ-nin İstintaq bölməsində araşdırma aparılır.

0
Teqlər:
polis, karantin, qayda pozuntusu, xəstə, Koronavirus, Göyçay
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar