Göz dağına çevrilən məkan – Qəbələ muzeyinin bəxti nə vaxt açılacaq
(Yenilənib 12:24 21.03.2020)
İki il bundan qabaq təmirə saxlanılan bu muzey görənləri heyrətə salır. Muzeyin təmiri hələ də başa çatmayıb, nə pəncərəsi var, nə də illərdir gələn insanlara xidmət edən zəngin eksponatlarİlham Əhmədov Sputnik Azərbaycan
BAKI, 21 mart — Sputnik. Azərbaycanda qədim tarixi abidələri, eləcədə qoruq və kurqanlarının zənginliyi ilə tanınan rayonlardan biri də Qəbələ rayonudur. Rayonun tarixini özündə əks etdirən tarixi muzey və məkanlar həm rayona gələn xarici turistlərin, həm də yerli qonaqların diqqət mərkəzindədir.
Qəbələyə səfər edən turistlər turizm məkanlarını ziyarət etməklə yanaşı, rayonun tarixi ilə də yaxından tanış olmaq və Qədim Qəbələ haqqında yaranan suallara cavab tapmaq istəyirlər. Bunun üçün də qonaqlar əsası 1980-cı ildə qoyulan Qəbələ Tarix Diyarşünaslıq Muzeyinə üz tuturdular.
©
Sputnik / Ilham Ahmadov
Qəbələ Tarix Diyarşünaslıq Muzeyinin həyəti
Qeyd edək ki, muzey eksponatlarının zənginliyi ilə seçilirdi. Bu da öz növbəsində rayona səfər edən qonaqların sayına da çox ciddi təsir göstərirdi. Muzey həm də çox maraqlı və zəngin tarixə malik bilik ocağı kimi tanınmaqda idi.
Lakin son zamanlar isə muzeylə bağlı acınacaqlı durum yaranıb. Mədəniyyət Nazirliyi 2018-ci ilin yay aylarında muzeyin yenidən təmir və bərpası edilməsi ilə bağlı təqdirəlayiq qərar verib. Bunun üçün də muzeyin fəaliyyəti dayandırılıb. Amma...
İki il bundan qabaq təmirə saxlanılan bu muzey görənləri heyrətə salır. Muzeyin təmiri hələ də başa çatmayıb, nə pəncərəsi var, nə də illərdir gələn insanlara xidmət edən zəngin eksponatları. Təmir işləri yekunlaşmaq bilməyən bu məkan yerli sakinlərin göz dağına, rayona gələn qonaqlar və turistlərin köks ötürdüyü yerə çevrilib.
©
Sputnik / Ilham Ahmadov
Qəbələ Tarix Diyarşünaslıq Muzeyi
Qəbələ Tarix Diyarşünaslıq Muzeyində 2500 illik tarixi əks etdirən 14000-dən çox eksponat nümayiş etdirilirdi. Muzeyin 900 kv.m-lik binası,13 ekspozisiya zalı, fondu, Heydər Əliyev xatirə otağı, şəkil qalereyası, zəngin elmi kitabxanası, açıq səma altında təşkil olunmuş qədim daş abidələrdən ibarət sərgi meydançası da vardı. Lakin bütün bu sadaladıqlarımızdan ancaq açıq səma altında təşkil olunmuş qədim daş abidələrdən ibarət sərgi meydançası qalır.
Rayon sakinləri də ürək ağrısı ilə təmir və yenidənqurma prosesinin hansısa səbəbdən uzandığını, bundan hamının zərər çəkdiyini bildirirlər. Sosial mediada bir neçə dəfə rayon sakinlərinin, eləcə də qonaqların muzeyin fəaliyyət göstərməməsi, bu prosesin uzanmasından gileyləri əksini tapıb.
Sputnik Azərbaycan yaranmış vəziyyətlə bağlı İsmayıllı Regional Mədəniyyət idarəsinin direktor müavini Azər Abbasovla əlaqə saxlayıb və ondan problemin nə zaman aradan qaldırılacağına aydınlıq gətirməsini xahiş edib.
©
Sputnik / Ilham Ahmadov
Qəbələ Tarix Diyarşünaslıq Muzeyi
Azər Abbasov da hələ də qapı-pəncərəsi olmayan muzeydə işlərin yekunlaşmaq üzrə olduğunu iddia etdi: “Muzeydə artıq təmir işləri başa çatıb. Demək olar ki, son tamamlama işləri aparılır. Artıq ekspozisiyanın da yenidən qurulması az vaxta təmin olunacaq”.
Təmirin olduqca bahalı bir proses olduğundan xeyli zaman aparmasını da təbii hal sayan direktor müavini onu da bildirdi ki, yaxın zamanlarda – yay aylarında muzeyin yenidən açılaraq istifadəyə verilməsi nəzərdə tutulub.
Biz də ümid edirik ki, deyilənlər həqiqət olar, bir rayonun tarixi və tarixi abidəsinə olan bu biganəlik yaxın zaman çərçivəsində aradan qaldırılar.
Mehriban Əliyeva Bəhram Bağırzadə ilə telefonla danışıb
BAKI, 12 iyul — Sputnik. Azərbaycan Respublikasının Birinci vitse-prezidenti Mehriban Əliyeva COVID-19 xəstəliyindən müalicəsi davam edən Əməkdar artist Bəhram Bağırzadə ilə telefonla danışıb.
Sputnik Azərbaycan APA-ya istinadən bildirir ki, Əməkdar artistə tezliklə sağalmağı arzulayan Mehriban Əliyeva ölkəmizdə COVID-19-la mübarizədə, xəstələrin müalicəsində Azərbaycan həkimlərinin, tibb işçilərinin fədakar əməyini xüsusilə qeyd edib.
Bəhram Bağırzadə onun müalicəsi üçün göstərilən dəstək və səylərə görə Birinci vitse-prezident Mehriban Əliyevaya təşəkkürünü bildirib. Tezliklə sağalacağına inandığını deyən Bəhram Bağırzadə hər zaman Prezident İlham Əliyevin və Birinci vitse-prezident Mehriban Əliyevanın dəstəyini hiss etdiyini qeyd edib.
Xatırladaq ki, koronavirusa yoluxan və xüsusi rejimli xəstəxanaya yerləşdirilən Bəhram Bağırzadənin vəziyyəti bir müddət ağırlaşmışdı. Aparılan intensiv müalicə nəticəsində Əməkdar artistin səhhətində artıq müsbət dinamika və stabilləşmə qeydə alınıb.
Səhnəmizin Leylisi koronavirusa yoluxub, vəziyyəti ağırdır
(Yenilənib 14:59 12.07.2020)
"Nəzakət Teymurovanın vəziyyəti çox ağırdır. Hazırda xəstəxanaya yerləşdirilib. Amma necə olursa-olsun, onun virusa qalib gələcəyinə əminəm"BAKI, 12 iyul — Sputnik. Azərbaycan Dövlət Akademik Opera və Balet Teatrının solisti, Azərbaycan Respublikasının Xalq artisti, Prezident mükafatçısı Nəzakət Teymurova koronavirusa yoluxub.
Sputnik Azərbaycan bildirir ki, bu barədə Hacı Nuran sosial şəbəkədə yazıb.
"Onun koronavirusa yoluxduğunu eşidəndə qulaqlarıma inanmadım. Axı Nəzakət Teymurova çox ehtiyatlı idi. Amma nə edəsən ki, reallıq öz sözünü deyir və bizim medianın da gözündən heç nə yayınmır. Nəzakət Teymurovanın vəziyyəti çox ağırdır. Hazırda xəstəxanaya yerləşdirilib. Amma necə olursa-olsun, onun virusa qalib gələcəyinə əminəm. Çünki bir qarabağlı qızı koronaya elə-belə təslim ola bilməz. Azərbaycan muğam sənətinin bənzərsiz səsi olan, səhnəmizin Leylisinin bu gün tamaşaçılarının, doğmalarının, dostlarının dualarına ehtiyacı var. Allah səni sevdiklərin üçün qorusun, gözəl insan", - deyə Hacı Nuran qeyd edib.
Lavrovdan Azərbaycan və Ermənistana atəşkəs çağırışı
(Yenilənib 19:17 13.07.2020)
Lavrovun Məmmədyarov və Mnatsakanyanla baş tutan telefon danışıqları zamanı Ermənistan-Azərbaycan sərhədində vəziyyətin gərginləşməsi müzakirə olunubBAKI, 13 iyul – Sputnik. Rusiya Xarici İşlər naziri Sergey Lavrov Azərbaycan və Ermənistanı atəşi dərhal dayandırmağa çağırıb.
Sputnik Azərbaycan-ın verdiyi məlumata görə, bu barədə Rusiya Xarici İşlər Nazirliyinin nazir Sergey Lavrovun azərbaycanlı və erməni həmkarları Elmar Məmmədyarov və Zöhrab Mnatsakanyanla ayrı-ayrılıqda telefon danışıqlarına dair məlumatında bildirilir.
Qeyd olunub ki, iyulun 13-də Lavrovun Məmmədyarov və Mnatsakanyanla baş tutan telefon danışıqları zamanı Ermənistan-Azərbaycan sərhədində vəziyyətin gərginləşməsi müzakirə olunub. Lavrov tərəfləri dərhal atəşkəsə, üzərlərinə götürdükləri öhdəlikləri yerinə yetirməyə, habelə ATƏT-in Minsk Qrupunun Rusiya, ABŞ və Fransadan olan həmsədrləri və ATƏT-in fəaliyyətdə olan sədrinin şəxsi nümayəndəsinin təkliflərini nəzərə almaqla təmkinli olmağa çağırıb.
Rusiyanın istər milli, istərsə də ATƏT-in Minsk Qrupunun həmsədrliyi çərçivəsində həm Bakı, həm də İrəvanla təmaslarda vasitəçilik missiyasını yerinə yetirməyi davam edəcəyi vurğulanıb. Minsk Qrupunun bütün üzvlərinin mövcud vəziyyəti qiymətləndirərkən gərginliyin daha da artmasına səbəb ola biləcək bəyanat və hərəkətlərdən çəkinməklə məsuliyyətli yanaşma sərgiləməsinin vacibliyi də qeyd olunub.