Boş teatr zalı, arxiv şəkli

On il geridə: Proqram başa çatdı, narazılıqlar isə yox

120
(Yenilənib 18:15 03.11.2019)
Prezidentin imzaladığı dövlət proqramı başa çatsa da, teatrşünaslar onun icrasında nöqsanlar olduğunu bildirilər

Kamal Almuradlı, Sputnik Azərbaycan

BAKI, 3 noyabr — Sputnik. Mədəniyyət naziri Əbülfəs Qarayev Azərbaycan teatrının 10 illik inkişaf perspektivlərini müəyyənləşdirən "Azərbaycan teatrı 2009-2019-cu illərdə" Dövlət Proqramının bu il yekunlaşdığını diqqətə çatdırıb. Lakin o, bununla işlərin bitmədiyini, teatr xadimləri ilə birgə növbəti illərin proqramını hazırladıqlarını bildirib.

Biz də geridə qalan Dövlət proqramında nə həyata keçdi və nələr icra olunmadı sualı ilə AMEA Memarlıq və İncəsənət İnstitutunun "Teatr, kino və televiziya" şöbəsinin müdiri Vidadi Qafarov və teatrşünas Xəyalə Rəisə müraciət etdik.

Vidadi Qafarov öncə onu qeyd etdi ki, haqqında bəhs edilən "Dövlət Proqramı"na müstəqillik qazandıqdan sonra ölkəmizdə bütövlükdə mədəniyyətlə bağlı qəbul edilmiş ən əhəmiyyətli sənədlərdən biri kimi baxır: “Həqiqətən də bu sənədin qəbul edilməsi və onun icrası milli teatr prosesinin intensivləşməsində böyük rol oynadı. Müxtəlif beynəlxalq konfranslar, teatr festivalları, xarici qastrollar və s. dünya teatrının Azərbaycan teatr məkanına inteqrasiyasına, Azərbaycan tamaşaçısının dünya teatrı ilə müəyyən qədər tanış olmasına şərait yaratdı, eyni zamanda milli teatrımızda mövcud olan bir sıra boşluqları və problemləri də üzə çıxardı. Amma "Dövlət Proqramı"nın müddəti bu il  bitsə də bu sənəddə nəzərdə tutulan bir çox maddələr təəssüf ki, yerinə yetirilməmiş qaldı. Məsələn, “Dövlət Proqramı”nın Tədbirlər planının 2.1.-ci maddəsində nəzərdə tutulan "Teatr sahəsində idarəetmənin və maliyyə-iqtisadi mexanizmlərin təkmilləşdirilməsini nəzərdə tutan islahatların aparılması" istiqamətində demək olar ki, heç bir iş görülmədi. Halbuki, bu sahədə çoxlu həllini gözləyən problemlər var. Bu, icrası 2009-2013-cü illə üçün nəzərdə tutulmuş 2.2. maddəsinə - "Teatr fəaliyyətinin normativ hüquqi bazasının möhkəmləndirilməsi ilə bağlı tədbirlərin həyata keçirilməsi"nə də aiddir. Xatırladım ki, bu sahədə ana sənəd olan "Teatr və teatr fəaliyyəti haqqında Azərbaycan Respublikasının Qanunu" 29 dekabr 2006-cı il tarixində qəbul olunub və yalnız, 2016 və 2018-ci illərdə "Reklam haqqında" və "Tütün məmulatlarının istifadəsinin məhdudlaşdırılması haqqında" qanunlara uyğun olaraq kiçik dəyişikliklərə məruz qalıb. Düşünürəm ki, Teatr haqqında Qanuna da yenidən baxılmasının vaxtı çoxdan çatıb. Çünki bu Qanun Azərbaycan teatrının gələcək inkişafı üçün təməl prinsipləri rolunu oynayır. Sonda onu qeyd edim ki, cənab Əbülfəs Qarayev Azərbaycan Teatr Xadimləri İttifaqının 14-cü konfransında teatr ictimaiyyətinin iştirakı ilə növbəti 10 il üçün yeni Dövlət proqramının işlənildiyini bildirdi, amma təəssüf ki, AMEA Memarlıq və İncəsənət İnstitutunun "Teatr, kino və televiziya" şöbəsinin müdiri olaraq mənim bu prosesdən xəbərim yoxdur."

İslamda musiqi, rəsm, heykəltaraşlıq, teatr və kino niyə haramdır?>>

Xəyalə Rəis 10 ilin böyük islahatların aparılması üçün kifayət qədər ciddi bir rəqəm olduğunu bildirdi. Onun sözlərinə görə, Prezidentin müvafiq Sərəncamı ilə təsdiq olunmuş  Dövlət Proqramında Azərbaycan teatrının dünya mədəniyyətinə inteqrasiyası, milli teatr sənətinin inkişafı, teatr sənətinin bütün janrları və peşə istiqamətləri üzrə gənclərin dəstəklənməsi, kadr hazırlığı, əlavə təhsil sisteminin təkmilləşdirilməsi və istedadlı gənclərin xarici dövlətlərdə məqsədli təhsilinə şərait yaradılması və sair kimi ciddi məqamlar var: “Bu proqramda teatrın inkişaf mühiti, alternativlər üçün hər şey nəzərə alınmışdı. 10 illik proqram teatrın idarəetməsində islahatları, teatrların təmir-bərpası, kadrların hazırlanması, teatr konfranslarının keçirilməsi, beynəlxalq teatr mühitinə inteqrasiyanı nəzərdə tuturdu. Bütün bunlar milli teatrın inkişafı, teatrda keyfiyyət qədər dəyişiklik üçün hesablansa da proqramda qeyd olunan bəzi məsələlər öz həllini tapmadı. Proqram başa çatdı. Hər şey ortadadır. Düzdür, paytaxtda eləcə də bir çox bölgələrimizdə teatrlarımız təmir olundu, müasir standartlara cavab verən, yaradıcı mühit üçün hər bir şərait yaradılan teatr binalarımız var. Ancaq teatrların içərisində gedən yaradıcı mühitdə o qədər də dəyişiklik hiss olunmadı”.

“Xüsusən də bölgə teatrlarında vəziyyət çox acınacaqlıdır. Teatrların direktorları hər dəfə çıxışlarında hər nə qədər "Teatrımızda yaradıcı mühit yüksək səviyyədədir" desələr də, vəziyyət elə deyil. Bölgə teatrlarımızda böyük bir kollektivin yalnız 5-6 nəfəri ali təhsillidir. Digərlərinin heç diplomu belə, yoxdur. Onlar teatrların studiyalarında yetişdirdikləri özfəaliyyət aktrisalarını teatrlara cəlb edirlər. Universiteti bitirən, ya da burada hər hansı teatrda çalışan aktyorlar isə bölgə teatrlarına gedib işləmək istəmirlər. Bu 10 il ərzində bir çox rejissorlarımız xaricdə təhsil aldı, onlar geri döndükdən sonra teatrlarımızda işə cəlb olundular. Ancaq nədənsə bu islahatların içərisində bir dənə də olsun biz teatrşünasların adını görə bilmirik. Hər il Teatrşünaslıq ixtisasını 15-16 tələbə bitirir. O gənclər Universiteti bitirdikdən sonra işsiz qalırlar və məcbur olub televiziyalarda, radiolarda, ya da başqa sahələrdə işləməyə məcbur olurlar. Məgər 27 teatrı olan ölkəyə teatrşünas lazım deyil?”  - deyə teatrşünas bildirib.

120
Amerikalı aktyor Tom Kruz, arxiv şəkli

Sənət qurban tələb edir - 111 illik körpünü partladacaqlar

13
"Çətin tapşırıq 7" filminin Polşadakı çəkilişləri aprel ayında başlayacaq. Ekran işinin premyerası 18 noyabr 2021-ci il tarixinə planlaşdırılır

BAKI, 13 avqust — Sputnik. Tom Kruzun baş rolda çəkildiyi "Çətin tapşırıq 7" ("Mission Impossible 7") filminin yaradıcı heyəti ekran işi üçün 111 il əvvəl Polşanın Pilxovice kəndində inşa edilmiş körpünü partlatmaq istəyir.

Hakimiyyət artıq buna razılıq versə də, yerli sakinlər qərarın əleyhinə çıxırlar.

Polşa mədəniyyət nazirinin müavini Pavel Levandovskinin sözlərinə görə, körpü artıq istismardan çıxıb və heç bir tarixi dəyər daşımır. Onun fikrincə, çəkilişlərdə körpüdən istifadə dünya ictimaiyyətinin diqqətini ölkəyə cəlb edə bilər.

Xatırladaq ki, "Paramount Pictures" kino şirkəti fevral ayında çəkilişləri dayandırmışdı. Bu addımı Appenin yarımadasında yayılan koronavirus səbəbindən atmışdı. "Çətin Tapşırıq 7" ("Mission Impossible 7") filminin İtaliyanın Venesiya şəhərindəki çəkilişləri zamanı baş rolun ifaçısı ilə yanaşı, digər aktyorlar da koronavirus şübhəsi ilə karantinə götürülmüşdü. Hollivud ulduzu Tom Kruzun baş rolda yer aldığı filmin bəzi səhnələri Venesiyada lentə alınmalı idi. Plana uyğun olaraq çəkiliş qrupu Venesiyada üç həftə keçirməli idi.

Qeyd edək ki, "Çətin tapşırıq 7" filminin Polşadakı çəkilişləri aprel ayında başlayacaq. Ekran işinin premyerası 18 noyabr 2021-ci il tarixinə planlaşdırılır

13
Televizora baxan adam, arxiv şəkli

Tərcüməçilər üçün şad xəbər - Pul olacaq

20
(Yenilənib 13:40 13.08.2020)
Yayımçıları yerli serial istehsalına təşviq etmək məqsədilə həftə ərzində həmin vaxt aralığında (07.00-22.00) yayımlanan hər 5 (beş) saat yerli serialdan əlavə 1 (bir) saat əcnəbi serial yayımlanması mümkün olacaq.

BAKI, 13 avqust — Sputnik. Milli Televiziya və Radio Şurasının (MTRŞ) növbəti iclası keçirilib. MTRŞ-dan Sputnik Azərbaycan-a verilən məlumata görə, iclasda Azərbaycan Respublikası ərazisində fəaliyyət göstərən bütün yerüstü yayımçıların televiziya proqramlarında əcnəbi teleserialların yayımının bərpa olunması məsələsi də müzakirə olunub.

Yerli serial bazarında rəqabət mühitinin formalaşdırılması və daha keyfiyyətli milli telefilmlərin və serialların istehsalının stimullaşdırılması məqsədilə 1 sentyabr 2020-ci il tarixdən etibarən təşkilati-hüquqi formasından asılı olmayaraq Azərbaycan Respublikası ərazisində yerüstü yayımla yayımlanan bütün televiziya proqramlarında əcnəbi teleserialların yayımının bəzi şərtlərlə bərpa olunması haqqında qərar qəbul olunub.

Qərara əsasən, əcnəbi seriallar yalnız 23.00–07.00 vaxt aralığında tam dublyaj olunmuş formada nümayiş oluna biləcək. Bundan əlavə, həftə ərzində hər bir yayımçı 07.00–22.00 arası vaxt aralığında 2 (iki) saat əcnəbi serial yayımlaya biləcək. Yayımçıları yerli serial istehsalına təşviq etmək məqsədilə həftə ərzində həmin vaxt aralığında (07.00-22.00) yayımlanan hər 5 (beş) saat yerli serialdan əlavə 1 (bir) saat əcnəbi serial yayımlanması mümkün olacaq.

20
Muse rok qrupu, arxiv şəkli

Dünyaca məşhur rok qrupu bu dəfə özünü kino sahəsində sınadı

0
(Yenilənib 00:00 14.08.2020)
Sözügedən film premyerası 17 avqustda kinoteatrlarda baş tutacaq. Filmin premyerası IMAX formatında olacaq.

BAKI, 13 avqust — Sputnik. Böyük Britaniyanın ən populyar rok qrupu "Muse" sirli virus haqqında film çəkib. Məşhur qrup yeni filmi rokla elmi fantastikanın sintezi şəklində çəkməyi qərara alıb.

Filmin rejissoru Lens Dreykdir. Süjet xətti isə paranormal hadisələrin mənbəyini öyrənən bir qrup alimin hekayəsinə əsaslanır.

Sözügedən film premyerası 17 avqustda kinoteatrlarda baş tutacaq. Filmin premyerası IMAX formatında olacaq. Daha sonra filmə 21 avqust tarixindən etibarən media platformalarında baxıla bilər.

"Bu layihəni çox uzun müddət hazırladığımız üçün inanılmaz dərəcədə həyəcan keçiririk" - deyə qrup öz instaqram səhifəsində qeyd edib.

Qeyd edək ki, qrup 1994-ci ildən fəaliyyət göstərir. Ötən il baş tutan musiqi turu çərçivəsində qrup dünyanın 28 şəhərində konsert verib. Bu, qrupun ən uzun davam edən musiqi turu olub.

0