Füzuli Hüseynov xalq artisti

Füzuli Hüseynov: "İçki içən, siqaret çəkən bizə ayda 10 milyon xeyir verə bilər"

3346
(Yenilənib 16:26 26.09.2019)
"Dünyanın ən məşhur aktyoruna hər gün baxsan, bezərsən. Həm də yaşımın o vaxtıdır ki, seçim edirəm - hansı rejissorla hansı əsərdə işləyim"

Kamal Almuradlı, Sputnik Azərbaycan

BAKI, 26 sentyabr — Sputnik. Budəfəki həmsöhbətimiz Respublikanın Əməkdar artisti Füzuli Hüseynovdur. Tamaşaçılar onu "Təhminə" filmindəki Spartak obrazına görə tanıyıb sevirlər. Amma fikrimcə, Kamran Şahmərdanın "Teleskop" tamaşasındakı roluna görə aktyor daha çox sevgiyə layiqdir. Söhbətə yaradıcılığındakı yeniliklərdən başlamaq istədim. Kəskin şəkildə bildirdi ki, biz yaradıcı yox, yaxşı adam aldadırıq. Müsahibəyə də elə bu mövzu ilə başladıq.

- Bəlkə, inandırmaq?

- İnandırmaq elə aldatmaqdır da. Göyə baxıb deyirsən ki, ey durnalar. Orada durna var ki? Pribaltikada sovet dövründə eksperimental teatr var idi. Orada insanları həqiqətən döyürdülər. Bu sənət deyil, peşədir.

Füzuli Hüseynov xalq artisti
© Sputnik / Murad Orujov
Füzuli Hüseynov, Əməkdar artist

- Bəs hal-hazırda bizim teatrın durumu sizi qane edirmi?

- Mənim qiymətləndirməyimlə nəsə dəyişmir. Çünki səlahiyyət sahibi deyiləm. Hər zaman istəmişəm ki, teatr cəmiyyətə, hətta siyasətə təsir etsin. Tamaşalar var ki, həyatın gedişini dəyişir. İnsanlar yaranan suallara tamaşada cavab tapırlarsa, teatr bax, budur. 

Mənim anlamıma görə, teatr sərbəst və azad olmalıdır. Bu cür yanaşma bizdən hələ uzaqdır. Birinci növbədə bizə peşəkar rejissorlar lazımdır. Dramaturgiya barədə həmişə şikayət edirlər. Amma hesab etmirəm ki, dramaturq yoxdur. Bizdə, ola bilər, azdır, amma dünya ədəbiyyatında yetəri qədərdir. Məncə, rejissorlara münasibət dəyişilməlidir. Onlara şərait yaradılmalıdır. İmkan verilməlidir ki, sifarişlə yox, istədikləri əsəri səhnələşdirsinlər. Ümid edirəm, 80-ci illərdə mənim gördüyüm teatrın imici geri qayıdar. Ümumiləşdirib deyim ki, teatr tənəzzül dövrünü yaşayır.

- Rejissorlardan danışdınız. Fəaliyyət göstərdiyiniz teatrda rejissorlar işdən kənarlaşdırıldılar. Həqiqətənmi ölkənin Akademik Teatrında eksperiment aparılmalı idi?

- Eksperiment hər zaman aparılmalıdır. Teatr sahəsində xüsusilə. Bunun üçün teatrın kiçik səhnəsi var. Gənc aktyor və rejissor orada fəaliyyət göstərir. Peşəkar adamlardan ibarət komissiya tərtib olunur və qiymət verilir. Beləcə, istedadlı aktyorları yavaş-yavaş böyük səhnəyə atırlar. Eksperiment yönü və işi bəlli olan teatrın böyük səhnəsində aparılmır. Mənə görə, bu, doğru qərar deyildi. Ad çəkməyəcəm, bütün teatrlarda ömrünün 30-40 ilini ona həsr etmiş yarıtmaz aktyorlar var. Yeni gələn gənc aktyora müəyyən müddət verilməlidir. Əgər bu adam teatra yaramırsa, onu yola salmaq lazımdır. Uzun müddət burada fəaliyyət göstərən yarıtmaz adamları uzaqlaşdırmaq da çətindir. Teatrın sahibi rejissordur. Rəhmətlik Rövşən Almuradlı da bunu deyirdi ki, rejissorların statusu olmalıdır. Bunlar olmadı. Direktor teatrına üstünlük verildi. Bizim səhnədə eksperiment gülünc vəziyyətə gətirib çıxardı, teatrın sütununu qırdı. İrəli getməli olduğumuz halda geriyə addımladıq. Tənəzzül öz kökünü məhz buradan götürdü. Biz hələ də bunun ağrılarını çəkirik.

Füzuli Hüseynov xalq artisti
© Sputnik / Murad Orujov
Füzuli Hüseynov, Əməkdar artist

Baxın, bir nəsil aktyorlar gəldi - Ələsgər Ələkbərov, Rza Əfqanlı, Hökumə Qurbanova, Məmmədrza Şeyxzamanov, Məlik Dadaşov, bunlar yaşlaşanda onları Fuad Poladov, Amaliya Pənahova, Həsənağa Turabov əvəzlədi və bu zənciri qırılmağa qoymadılar. 90-cı illərdə teatr təmirə dayandı, siyasi hadisələr, prezident dəyişiklikləri - bütün bu hadisələr teatrdan yan keçmədi. İstedadlı adamlar hər gün doğulmur. İstedadı yetişdirən şəxs rejissordur. Ona görə də teatrdan rejissorların çıxarılması yanlış qərar idi.

Xaricdən rejissor dəvət olunması fikri ortaya atıldı. Mənim fikrimə görə, tamamilə səhv fikir idi. Bu bizə heç vaxt müvəffəqiyyət gətirməz. Ən azından, həmin rejissor burada 6 ay qalmalı, ölkənin ab-havasını duymalı, adət-ənənəsini görməli, tarixi yerləri gəzməli, insanların psixologiyasını bilməlidir. Mən 1983-cü ildə Tumanişvilinin "Don Juan" tamaşasına baxmışam. Tamaşaya baxan adam o saat hiss edirdi ki, bu, gürcü Don Juanıdır.

- Füzuli müəllim, teatrdan bir az aralı düşməyiniz, yəni az tamaşada rol almağınız problemləri dərindən bilməyinizdir?

- Mən heç vaxt teatr repertuarının tam şəkildə zəbt edilməsinin tərəfdarı deyiləm. Bizdə nə qədər aktyor işləyir. Bunların hamısı rol almalıdırlar. Dünyanın ən məşhur aktyoruna hər gün baxsan, bezərsən. Həm də yaşımın o vaxtıdır ki, seçim edirəm - hansı rejissorla hansı əsərdə işləyim. Bəli, hal-hazırda repertuarda olan tamaşalarım azdır. Məncə, tamaşada iş zərgər dəqiqliyi kimi olmalıdır.

Füzuli Hüseynov xalq artisti
© Sputnik / Murad Orujov
Füzuli Hüseynov, Əməkdar artist

- Bir neçə tamaşa var idi ki, həqiqətən, möhtəşəm idi, amma çox heyf ki, indi repertuarda yoxdur. Misal üçün, "Uçqun" tamaşası.

- Çox gözəl tamaşa idi. Eyni zamanda "Yaşlı xanımın gəlişi", "Qatarın altına atılan qadın", "21:15 qatarı", "Kaş araba aşmayaydı".

- "Teleskop" da maraqla qarşılanmışdı.

- Təxminən 4-5 il oynadıq. Amma adlarını çəkdiyim tamaşaların niyə repertuardan çıxarıldığını bilmədim. Bunun səbəbləri də bizə izah olunmadı. Teatr dediyimizin yönü bu cür əsərlərlə olmalı idi. Heyf ki, cılız əsərlər də səhnəyə yol tapır.

- Belə anladım ki, repertuar siyasətində axsamalar var.

- Hesab edirəm ki, bəli, var. Bir məsələni hələ də başa düşə bilmirəm. Sovet dövrü bitib, amma plan hələ də qalıb. Olmasın 3-4 tamaşa, olsun 2 tamaşa. Anlamadığım digər məsələ tamaşaçıların təşkili məsələsidir. Ümumiyyətlə, bu nə üçündür - bilmirəm. Mənim Gürcüstanda, Türkiyədə, Rusiyada teatr rəhbərləri olan dostlarım çoxdur. Onlardan soruşanda ki, zalı necə doldurursunuz, cavabında deyirlər ki, bileti kassadan alıb gəlirlər. Gürcüstanda bir teatrın qarşısında kafedə oturdum və müşahidə eləməyə başladım. Tamaşa elə də maraqlı deyildi. İnandırım sizi, insanlar pulunu verib bilet alırdılar. Vəziyyətləri elə də yaxşı olmadığı vaxtda 5-10 lari verib gəlirdilər. Halbuki, həmin pulla iki gün dolana bilərdilər. Gürcülərdən soruşdum ki, nə üçün belə edirsiniz? Dedilər ki, bu, bir adətdir. Fikirləşirəm, heç olmasa, dramaturqlardan ibarət repertuar siyasətini quran bir qurum yaradılmalıdır.

Füzuli Hüseynov xalq artisti
© Sputnik / Murad Orujov
Füzuli Hüseynov, Əməkdar artist

- Hər teatrda bədii şura fəaliyyət göstərir. Onlar bu funksiyanı yerinə yetirirmi?

- Hələlik direktor teatrı siyasəti davam edir. Hesab edirəm ki, bunun səhv olduğunu əvvəl-axır anlayacaqlar. Düzdür, ömrümüzdən gedir. Ümid edək ki, olacaq.

- Bayaq zəncirvari nəsil dəyişikliyindən danışdınız. Sizi artıq yaşlı nəslin nümayəndəsi kimi qəbul edə bilərik. Bəs sizdən sonra bu zənciri davam etdirən varmı?

Xalq artisti Pərviz Məmmədrzayev
© Sputnik / Tarana Khudabakhshiyeva

- Dövlət Gənc Tamaşaçılar Teatrına, Dövlət Akademik Rus Dram Teatrına, Akademik Musiqili Teatra da dəvət etdikləri zaman gedib baxıram. Çox maraqlı, istedadlı gənclərimiz var. Bunu inkar etmək olmaz. Bayaq dediyim zəncir qırılmasından 30 ilə yaxın dövr keçib. Amma ortada heç nə yoxdur. Milli siması olan kino və teatr sistemi qurulmalı idi. Hələlik bu yöndə axsamalar var. Amma bu, o demək deyil ki, olmayacaq. Kim nə istəyir, desin, kim nə istəyir, eləsin - teatr canlı sənət olduğu üçün mütləq yaşayacaq. Televiziyanı internet sıxışdırıb sıradan çıxardı. Hətta kinoya belə şübhəm var. Amma teatra hər zaman ehtiyac olacaq.

- Kinodan söhbət düşmüşkən. Ötən ay Kino günündə iştirak etdim. Sözün açığı, məyus oldum. Kinostudiyada illərlə əziyyət çəkmiş adamlar qaldılar kənarda, Bakı Mədəniyyət İdarəsinin işçiləri təltif olundular. Sizi nə orada, nə də son dövrlər kinolarda görürük.

- Təltiflərlə bağlı deyim ki, buna görə yaşamağa dəyməz. Məncə, həmin peşəkar adamların təltif olunmamaları deyil, kinomuzun olmaması məyus edir. Faciə ondadır ki, peşəkar iş yoxdur. Kinostudiyanın vəziyyətini hamımız bilirik. Prezidentlə görüşdə bu məsələlər qaldırıldı. Hesab edirəm ki, mütləq hərəkətlənmə olacaq. O ki qaldı kinoda görünməməyimə, adam kinoya dəvət edir, soruşuram ki, senarini kim yazıb, deyir, özüm. Operator kimdir - bilinmir. Gedib görürsən ki, kameranı düz qurmayıb, mətnin cümlələri düzgün deyil.

Füzuli Hüseynov xalq artisti
© Sputnik / Murad Orujov
Füzuli Hüseynov, Əməkdar artist

Götürək bizim serialları. Adam nə qədər eyni mövzuya baxar? Filan oliqarxın evində tərbiyəsizlik, bu onu vurdu, o bunu öldürdü - real heç nə yoxdur. Yazıçılarımız, başbilənlərimiz deyirlər ki, bizim qədər tarixi, mədəniyyəti olan ikinci bir dövlət yoxdur. Şərait yaradılmalıdır bu haqda yazılsın. Kimin ağlına nə gəldi, qələmə alır. Anormal, köpük operalarıdır. Deyirlər ki, pulumuz azdır. Qardaşım, pul yoxdur, çəkmə də! Səni kim məcbur edir? Düzdür, bəzi filmlərimiz festivallarda iştirak edir. Digər tərəfdən, sizə bildirim ki, hər gün haradasa festival keçirilir. Kiməsə diplom verilir. Diplom almaqla kinonun, teatrın siması olmur. Artıq neçə ildir, "MAP" teatr festivalı keçirilir. Çox gözəldir. Maraqlı tamaşalar olur. Bakının teatral şəhər adını qazanması hamımıza xeyir gətirər.

- Bu qədər problemlərin içində pozitiv nə var, neqativ nə var?

- Teatrda pozitiv olan onun ölməməsidir. Teatra diqqətin ayrılmasıdır. Maaşların artmasıdır. Düzdür, bu da yetərli deyil. Amma ruslar demişkən, "balıq olmayan yerdə xərçəng də balıqdır". Düzgün teatr siyasəti aparılmalıdır. Bu yaxınlarda Tabakov teatrının direktor müavini ilə söhbət etdim. Dedi ki, biz Yaponiyadan rejissor dəvət edirik. Amma bir şərtlə: həmin tamaşanın Yaponiyada oynanılması üçün şərait yaratsın. Bir türk rejissorunu dəvət etsək, təsəvvür edin, Türkiyənin 10-15 şəhərində həmin tamaşanın oynanılması nə qədər gəlir gətirər. Türkiyə, İran böyük bazardır. Bu işlə məşğul olan insanlar olmalıdır.

Bu sahənin düzəlməsi üçün, dövlətə yük olmamaq üçün bir fond yaradılsın. Hər satılan spirtli içkilərə 50 qəpik, siqaretə 5 qəpik əlavə olunsa, teatrın maliyyə məsələsini kökündən həll etmək olar. İçki içən, siqaret çəkən adam başqa yolla mədəniyyətə xidmət etməlidir. Bu yolla ayda 10 milyon yığmaq olar. Həmin məbləğlə nə qədər gənc film çəkə bilər, tamaşa hazırlaya bilər. Şükürlər olsun, Ramiz Fətəliyev, Ramiz Həsənoğlu, Oqtay Mirqasım, Ramiz Rövşən sağdırlar. Bunlar qərar versinlər o gənclərlə bağlı. Bir gənci Hollivuda, o birini Moskvaya, başqasını Avropaya göndərsinlər. Təhsil alsınlar. İnanın, bu, kimin üçünsə deyil, dövlətimiz üçün lazımdır. Həmin məbləğlə nə qədər festival keçirmək, hətta kinostudiyanı da təmir etmək olar.

Öz doğma teatrımla bağlı nikbin gözləntilərim var. Bilirsiniz ki, Azərbaycan Dövlət Akademik Milli Dram Teatrının 100 illik yubileyinin qeyd edilməsi haqqında Azərbaycan Respublikası Prezidenti Sərəncam verib. Çox ümidliyik ki, müəyyən imtiyazlar olacaq.

- Bəs indi planda nə var?

- Mən bu günlə yaşayıram. Təklif olarsa, normal rejissor, əsər olarsa, məmnuniyyətlə işləməyə hazıram.

3346
Teqlər:
rejissor, Azdrama, müsahibə, teatr, aktyor
Əlaqədar
Sentyabrda nəyə baxaq? - Yeni teatr mövsümünə "ekskursiya"
Azərbaycanlı aktyor rusiyalı rejissorun filmində əsas rolu oynayacaq
"ŞAH MAT" teatrında növbəti tamaşa - "Naməlum qadının məktubu"
Azərbaycanlı aktrisa deportasiyadan qaçmaq üçün türkə ərə gedib
Mövsümü nazirin sifarişi ilə açdılar: "Solğun çiçəklər" fərqli yozumda - FOTO
Teatr səhnəsi, arxiv şəkli

Şuşa Teatrı haqqında film çəkilib

5
(Yenilənib 16:48 22.01.2021)
Teatrdan bəhs edən "Dönüş" filminin ssenari müəllifi Yaqub Əlioğlu, rejissoru isə Murad Quliyevdir. Film Şuşa teatrının yenidən öz doğma torpağına - Şuşaya dönəcəyi haqdadır.

BAKI, 22 yanvar — Sputnik. Şuşa Teatrı haqqında sənədli film çəkilib. Sputnik Azərbaycan xəbər verir ki, teatrdan bəhs edən "Dönüş" filminin ssenari müəllifi Yaqub Əlioğlu, rejissoru isə Murad Quliyevdir. Film Şuşa Teatrının kollektivi və teatrın yenidən öz doğma torpağına - Şuşaya dönəcəkləri haqqındadır.

 

5
Xaç, arxiv şəkli

"Xristian irsimizi tanıyaq" - Müqəddəs Məryəm ana katolik kilsəsi - VİDEO

20
(Yenilənib 11:43 22.01.2021)
Bolşeviklər tərəfindən uçurulan Müqəddəs Məryəm ana kilsəsinin xatirəsinə həsr edilən kilsənin tikintisi 2007-ci ilin fevralında yekunlaşıb.

BAKI, 22 yanvar — Sputnik. Müqəddəs Məryəm ana katolik kilsəsi Bakıda 1912-ci ildə neft maqnatları – Rılskilər ailəsi tərəfindən ("Müqəddəs Bakirə Məryəmin Məsum Hamiləliyi" kostyolu - polyak katolik kilsəsi, memarı İ.K.Ploşko) inşa edilib. Bolşeviklər tərəfindən uçurulan Müqəddəs Məryəm ana kilsəsinin xatirəsinə həsr edilən kilsənin tikintisi 2007-ci ilin fevralında yekunlaşıb. 7 mart 2008-ci ildə Azərbaycan Respublikasının Prezidenti İlham Əliyev, Birinci xanım, Heydər Əliyev Fondunun prezidenti Mehriban xanım Əliyeva və Vatikanın dövlət katibi kardinal Tarçizio Bertone kilsənin rəsmi açılış mərasimində iştirak ediblər.

Sputnik Azərbaycan Mədəniyyət Nazirliyinə istinadən "Xristian irsimizi tanıyaq" layihəsi çərçivəsində Müqəddəs Məryəm ana katolik kilsəsi haqqında qısa videoçarxı təqdim edir.

20
Vüqar Səfərli, arxiv şəkli

Vüqar Səfərli apelyasiya şikayəti verdi - Ev dustaqlığına çıxmaq üçün

0
(Yenilənib 13:14 23.01.2021)
Qeyd edək ki, Səfərli bir müddət əvvəl də barəsində seçilmiş həbs qətimkan tədbirinin ev dustaqlığına dəyişdirilməsi ilə bağlı məhkəməyə müraciət edib. Binəqədi rayon Məhkəməsi onun müraciətini təmin etməyib.

BAKI, 23 yanvar — Sputnik. Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun rəhbəri olmuş Vüqar Səfərli barəsində seçilmiş həbs qətimkan tədbirinin dəyişdirilməsi ilə bağlı apelyasiya şikayəti verib.

Sputnik Azərbaycan-ın məlumatına görə, şikayət araşdırılması üçün Bakı Apelyasiya Məhkəməsinə göndərilib.

İş araşdırılması üçün hakim Ramin Qaraqurbanlının icraatına verilib.

Məhkəmənin baxış iclası yanvarın 25-nə təyin olunub.

Qeyd edək ki, V. Səfərli bir müddət əvvəl barəsində seçilmiş həbs qətimkan tədbirinin ev dustaqlığına dəyişdirilməsi ilə bağlı məhkəməyə müraciət edib. Binəqədi rayon Məhkəməsi onun müraciətini təmin etməyib.

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna (KİVDF) dövlət büdcəsindən ayrılan vəsaitlərin xərclənməsi zamanı aşkar edilmiş qanun pozuntuları ilə əlaqədar Hesablama Palatasından daxil olmuş materiallar üzrə Baş prokuror yanında Korrupsiyaya qarşı Mübarizə Baş İdarəsində Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.

Aparılmış istintaqla Kütləvi İnformasiya Vasitələrinin İnkişafına Dövlət Dəstəyi Fondunun sərəncamında olan əmlakın həmin qurumun İcraçı direktoru və əməkdaşlarının digər şəxslərlə əlbir olmaqla şəxsi maraqlarına uyğun istifadə etmələrinə, fəaliyyətin ayrı-ayrı istiqamətləri üzrə proqramların və vəzifələrin icra edilməsi adı ilə rəsmi sənədlərə yalan məlumatlar daxil edilərək xüsusilə külli miqdarda ziyan vurulmaqla mənimsəmələrinə, cinayət yolu ilə əldə edilmiş pul vəsaitlərinin leqallaşdırılmasına və digər qanunsuz əməllər törətmələrinə əsaslı şübhələr müəyyən edilib.

Belə ki, aparılmış istintaqla müəyyən edilmişdir ki, Fondun icraçı direktoru Səfərli Vüqar Müzəffər oğlu, "Portos" MMC-nin direktoru Məmmədov Nadir Məhərrəm oğlu və qeyriləri ilə qabaqcadan əlbir olaraq mətbuat işçilərinin mənzil-məişət şəraitinin yaxşılaşdırılması və yaşayış evlərinin tikintisi ilə bağlı 2013-2019-cu illər ərzində dövlət tərəfindən KİVDF-yə ayrılmış vəsaiti layihə və smeta sənədlərində iş həcmini əsassız şişirdib, işlərin və materialların dəyərini müəyyən edilmiş qiymətlərdən artıq göstərilməklə "Portos" MMC-nin bank hesablarına köçürüb, bununla da, mətbuat işçiləri üçün Bakı şəhəri, Səbail rayonu, 20-ci sahə, Bibiheybət qəsəbəsi ərazisində yaşayış binalarının tikintisi üzrə ayrılmış xüsusilə külli miqdarda pul vəsaitini mənimsəmiş, qeyd edilən cinayət əməllərinin aşkar olunmasının qarşısını almaq məqsədilə əlbir olduğu şəxslərlə birlikdə yerinə yetirilmiş işlərin qəbulu haqqında "Forma 2" aktlarında ayrılmış vəsaitlərin tam həcmdə binanın tikintisinə sərf edilməsinə dair yalan məlumatlar daxil edib şəxsən təsdiq etməklə vəzifə saxtakarlığı da törədib.

Bundan başqa, Vüqar Səfərli digər şəxslərlə qabaqcadan əlbir olaraq qurumun fəaliyyətinin təşkili üçün inzibati bina üzrə münasib yerin ayrılması və ya qeyri-yaşayış sahəsinin aşağı qiymətlərlə icarəyə verilməsi üçün Nazirlər Kabinetinin qərarları ilə müəyyən edilən qanuni prosedurlara qəsdən əməl etmədən, həmin Fondun maliyyələşməsinin həyata keçirildiyi dövlət büdcəsindən ayrılmış vəsait üzrə icarə xərclərinin özünün əvvəllər sədri olduğu, sonradan isə özünə yaxın şəxslərin fəaliyyətlərinə faktiki nəzarəti həyata keçirməkdə davam etdiyi şirkətlərə, habelə yaxın münasibətdə olduğu digər şəxslərə gəlir qismində verilməsinə nail olmaqdan ötrü həmin şəxslərin xüsusi mülkiyyətində olan Bakı şəhəri, Yasamal rayonu, Mətbuat prospekti, 23L ünvanında yerləşən müəssisə binasının 3-cü mərtəbəsinin Fondun inzibati istifadəsinə verilməsi məqsədilə maddi baxımdan Fond üçün daha ağır şərtlərlə icarəyə götürülməsinə dair müqavilələr bağlamış, 2011-2019-cu illər ərzində cəmi 812 min manat məbləğində pul vəsaitini icarə haqqı adı ilə köçürməklə dövlət büdcəsinə külli miqdarda ziyan vurub.

Həmçinin, Vüqar Səfərli digər şəxslərlə qabaqcadan əlbir olaraq nəşr olunan qəzetlərə maliyyə yardımının göstərilməsi məqsədi ilə dövlət tərəfindən ayrılmış vəsaitin 2015-2019-cu illər ərzində 300 min manat məbləğində olan hissəsini ailə üzvünün adına təsis etdiyi "Futbol+Qol" qəzetinə qanunsuz olaraq köçürməklə həmin pulu, eləcə də qurumun məqsədlərinin həyata keçirilməsi üçün alınmış 103 min manat dəyərində dəftərxana ləvazimatlarını da mənimsəmiş, eyni zamanda 2017-2019-cu illər ərzində ziyafətlərin keçirilməsi ilə bağlı satınalma müqavilələrinin bağlanması zamanı qanunsuzluqlara yol verməklə KİVDF-yə məxsus olmaqla ona etibar edilmiş cəmi 105 min manat məbləğində pul vəsaitini israf edib.

Bundan əlavə, Vüqar Səfərli qeyriləri ilə qabaqcadan əlbir olaraq qeyd edilən mənimsəmə və vəzifə saxtakarlığı cinayətləri üzrə əldə etdiyi xüsusilə külli miqdarda pul vəsaitini kommersiya bankında olan milli və xarici valyutadakı depozit hesablarına 2015-2018-ci illər ərzində cəmi 5 milyon 796 min manatı yerləşdirməklə cinayət yolu ilə əldə edilmiş həmin pul vəsaitlərini külli miqdarda leqallaşdırmışdır.

İş üzrə toplanmış ilkin sübutlar əsasında Səfərli Vüqar Müzəffər oğlu Azərbaycan Respublikası Cinayət Məcəlləsinin müvafiq olaraq 179.4 (xüsusilə külli miqdarda ziyan vurmaqla mənimsəmə və israf etmə), 193-1.3.2 (cinayət yolu ilə əldə edilmiş külli miqdarda pul vəsaitlərini leqallaşdırma), 308.2 (ağır nəticələrə səbəb olan mühüm zərər vurulmaqla vəzifə səlahiyyətlərindən sui-istifadə etmə), 308-2.4 (satınalma prosedurları keçirilmədən külli miqdarda ziyan vurmaqla dövlət vəsaitlərini xərcləmə) və 313 (vəzifə saxtakarlığı), Məmmədov Nadir Məhərrəm oğlu isə Cinayət Məcəlləsinin 179.4, 308.2 və 313-cü maddələrinə əsasən təqsirləndirilən şəxs qismində cəlb edilərək barələrində məhkəmənin qərarı ilə həbs qətimkan tədbiri seçilib.

0