Zərb ustası Rövşən Cabbar

Rövşən Cabbar: "Natiqə dedim ki, bunu şou alətinə çevirənlərə təpinməyə haqqın çatır"

3588
(Yenilənib 21:01 12.07.2019)
"İki-üç nəfər yığışıb ritm qrupu yaradır, amma baxırsan ki, ritmə xələl gətirirlər"

Kamal Almuradlı, Sputnik Azərbaycan

BAKI, 12 iyul — Sputnik. Həmsöhbətimiz "Dünya zərb alətləri" beynəlxalq festivalından yenicə qayıtmış zərb ustası Rövşən Cabbardır. Sayca 16-cı dəfə keçirilən bu festivalın əsasını mərhum zərb ustası, gənc yaşında avtoqəza nəticəsində dünyasını dəyişmiş həmyerlimiz Yusif Mayılov qoyub. Bu baxımdan festivalda iştirak mahir zərb ifaçımız üçün ikiqat məsuliyyətdir.

- Rövşən bəy, bu günlərdə Samarada keçirilən festivaldan qayıtmısınız. Təəssüratlarınız necə oldu?

- "Dünya zərb alətləri" beynəlxalq festivalı hər il Rusiyanın Samara vilayətində keçirilir. 16-cı dəfə baş tutan bu ilki festivalda 30 ölkədən 100-ə yaxın tanınmış musiqiçilər iştirak edirdi. Azərbaycanı bu festivalda artıq 5-ci dəfədir ki, mən təmsil edirəm. İlk dəfə qrup şəklində iştirak etsəm də, növbəti illərdə Samaraya ustad kimi tək yollanmışam. Festivala gələn tələbələrə həm də dərs deyirəm. Bu il mənimçün fərqli oldu. Belə ki, bu dəfə oğlumla birlikdə iştirak etdim. Çox maraqlı təşkil olunmuşdu. Qaydalara görə, həftə boyunca davam edən festivalın yekun konserti verilməlidir. Tələbələrlə, oğlumla, daha sonra isə ustadlarla birlikdə çıxışımız oldu. Eyni vaxtda Livandan, Tacikistandan, Türkiyədən, Cənubi Koreyadan, Rusiyadan, Seneqaldan olan sənətkarlarla səhnəni bölüşmək böyük zövq verir.

Zərb ustası Rövşən Cabbar
© Rövşən Cabbarın şəxsi arxivindən
Zərb ustası Rövşən Cabbar

- Azərbaycan ritmi necə qarşılandı?

- Mən orada şərq aləti ilə iştirak edirdim. Vaxtilə bu alət qədim çalğı alətlərimiz sırasında olsa da, sonradan unudulub. Türklər ona darbuka, Misirdə isə tabla deyirlər. Gildən olan bu alət indi bizdə dəmirlə əvəz olunub. Maraqla qarşılanan çıxışlarımız oldu. Qeyd edim ki, axşamdan səhər saatlarına qədər davam edən konsert Volqa çayının sahilində keçirilir.

- Digər ölkələrdən bizim ritmlərə oxşar olanı var idimi?

- Taciklərin ritmi çox oxşardır. Onların doyra aləti bizim qaval aləti ilə demək olar eynidir. Onlarla bizim duet çıxışımız oldu. Məncə çox gözəl də alındı. Eyni zamanda Rusiyadan Andrey Tanzu, Türkiyədən Berkan Sakıcı, Tacikistandan Xeyrulla Dadabayev, İrandan Həmid Rza ilə də birgə ifalarımız maraqla qarşılandı.

- Festivalda iştirak xərcləriniz kim tərəfindən ödənilir?

- Maliyyə dəvət olunan ölkə tərəfindən qarşılanır.

- Azərbaycanda bu cür festivalın keçirilməsi üçün təklifiniz olubmu?

Zərb ustası Rövşən Cabbar
© Rövşən Cabbarın şəxsi arxivindən
Zərb ustası Rövşən Cabbar

- Təəssüf ki, ölkəmizdə ritm festivalı keçirilmir. Amma bunun üçün münbit şərait var. Misal üçün, Rusiyada Volqa çayının ətrafında baş tutan belə bir festivalı biz də Xəzərin sahilində təşkil edə bilərik. Bakıda və ya Sumqayıtda keçirilməsi üçün müvafiq infrastruktur mövcuddur. Məncə vətəndaşlar da maraqla qarşılayar. Bununla bağlı festivalda iştirak edən zərb ifaçıları ilə də söhbətlərimiz olub. Onlar da Azərbaycanda keçirilərsə, bu festivalda məmnuniyyətlə iştirak edəcəklərini bildirirlər. Ümid edirəm ki, Mədəniyyət Nazirliyi bu təklifə müsbət yanaşacaq. Azərbaycanda festival olmasa da, müsabiqələr olub. Bizim çox hörmət bəslədiyimiz xalq artisti Natiq Şirinov iki dəfə müsabiqə keçirib. Bu yaxınlarda biz də Sumqayıtın Nərimanov mədəniyyət mərkəzində "Ritm bir dünyadır" adlı müsabiqə etdik.

- Natiq Şirinovun adını çəkdiniz. Aranızda problem var idi. İndi münasibətləriniz necədir?

- O, bizim fəxrimizdir. Amma mən çox istərdim ki, birlikdə səhnəni paylaşaq. Natiq bəy özü də bunu təklif etmişdi. Hətta söz vermişdi ki, Şəkidə konsertdə birlikdə çıxış edəcəyik. Lakin sonra tədbirlərin birində qarşılaşanda, dedi ki, vaxt yoxdur. Mən ona bir neçə dəfə şikayətlənərək demişəm ki, sənin zərb alətini şou, sirk alətinə çevirənlərə möhkəm təpinməyə haqqın çatır.

- Həqiqi sənət adamları dolanışıq üçün məcburiyyətdən toylara gedir. Bəs siz?

Zərb ustası Rövşən Cabbar
© Rövşən Cabbarın şəxsi arxivindən
Zərb ustası Rövşən Cabbar

- Mən də toylara gedirəm. Amma nə etməli?! Başqa yolumuz yoxdur. Belə olan təqdirdə də sənətə 50 faiz ayırmalı oluruq. Bilirsiniz toy sənət deyil. Sırf sənətlə məşğul olmaq üçün çətinliyimiz var.

- Son vaxtlar ritmlə qeyri-peşəkarlar da məşğul olur.

- İki-üç nəfər yığışıb ritm qrupu yaradır, amma baxırsan ki, ritmə xələl gətirirlər. Ümumiyyətlə, bu sənətdə canlı ifanı bacarmırsansa, demək naşısan. Bir dəfə Natiq Şirinovla məni toya qonaq çağırmışdılar, foyedə söhbət edirdik. Elə mövzumuz da bizim sahəyə yad olan adamlar barədə idi. Yanımızda qeyri-peşəkar bir nəfər də var idi. Təkif etdim ki, bir konsert olsun, gəlib canlı ifa etsinlər. Əlimi həmin adamın çiyninə qoyaraq dedim ki, bu qardaşımız da gələr. O da cavab verdi ki, mən yox. Sizin yanınızda mən canlı ifa edə bilmərəm, bizimki toylara gəlib yola verməkdir. Ümumiyyətlə, bütün insanlar öz nöqsanlarını yaxşı bilirlər. Azərbaycanda ilk dəfə "Natiq ritm qrupu", ondan 5 il sonra biz, 10 il sonra da bu qruplar meydana gəlib. Heç olmasa, arada gəlib bizdən nəsə öyrənsinlər.

3588
Netflix

"Netflix" İstanbulda ofis açır

24
"Netflix" platformasının qurucusu Reed Hastings Türkiyənin zəngin mədəni irsi və köklü hekayə anlatma qabiliyyəti baxımından çox dəyərli bir ölkə olduğunu bildirib

BAKI, 3 dekabr — Sputnik. Dünya üzrə təxminən 195 milyon üzvü olan "Netflix" platformasının İstanbulda ofisi açılacaq. Bu addım Türkiyədə istehsal olunan uğurlu ekran əsərlərinin dünya tamaşaçısına tanıdılmasında da əhəmiyyətli rol oynayacaq.

Sputnik Azərbaycan Türkiyə mətbuatına istinadən xəbər verir ki, bununla bağlı "Netflix" platformasından bildirilib.

Türkiyədəki sərmayələrini artıran şirkətin yeni ofisinin 2021-ci ilin ikinci yarısında istifadəyə verilməsi planlaşdırılır.

Bununla bağlı açıqlama verən Türkiyənin mədəniyyət və turizm naziri Mehmet Nuri Ersoy xüsusilə son on beş il ərzində əhəmiyyətli inkişaf yolu keçən ölkəsinin kino və teleserial sektorunun iqtisadi artımla yanaşı, həm də mədəni diplomatiya sahəsinə böyük töhfələr verdiyini bildirib: ""Netflix" kimi qlobal bir şirkətin ölkəmizdə ofis açması qərarını məmnuniyyətlə qarşıladıq. Türkiyə istehsalı olan film və serialların 190 ölkədə izlənə bilməsi bu sektorun daha geniş beynəlxalq cəmiyyətə tanıdılması və film turizminin inkişafına böyük töhfələr verəcəyini düşünürük".

"Netflix" platformasının qurucusu Reed Hastings Türkiyənin zəngin mədəni irsi və köklü hekayə anlatma qabiliyyəti baxımından çox dəyərli bir ölkə olduğunu bildirib.

24
Teqlər:
ofis, Türkiyә, Netflix şirkəti
İlqar Muradov, arxiv şəkli

İlqar Muradov: "Düşünürəm ki, zahirən Dronqoya oxşarlığım var"

2286
(Yenilənib 18:06 03.12.2020)
"Mənim əksər mahnılarım mənə aiddir. Amma mən nə oxuyuramsa o elə mənim qəlbimin musiqisidir. Onları sevərək, seçərək oxumuşam. Bütün mahnılarım mənə doğmadır"

Şahpəri Abbasova, Sputnik Azərbaycan

BAKI, 3 dekabr — Sputnik. Onun həzin, məlahətli səsini dinlədikcə ötən günlərə qayıdırsan. Kiminin uşaqlığı, kiminin gəcliyi, kiminin ilk məhəbbəti düşür yada… Bir sözlə, onu dinlədikcə xatirələr düşür yada.. "Bir ömrün nəğməsi", "Mənim 17 yaşım var", "Mənimlə qal", "İstərsənmi", "Bu dünyanı nağıl bilək", "Peşiman olarsan" mahnıları insanın ruhunu oxşayır. Söhbət alicənablığı, sakit, ciddi, ağır təbiəti, qalmaqallardan uzaq olması ilə seçilən Xalq artisti İlqar Muradovdan gedir. Sənətkar özü və sənəti ilə bağlı Sputnik Azərbaycan-a danışıb:

"Mən əslində, 5 yaşında pianoda çalıb-oxuyurdum. Məndən böyük bacım, qardaşım musiqi məktəbinə gedirdilər. Valideynlərimin dediyinə görə, mən onların ikisindən də istedadlı olmuşam. Sonra mən Naxçıvanda 7 illik Orta İxtisas Musiqi Məktəbinin piano şöbəsini bitirdim. Demək olar ki, ömrüm boyu musiqi ilə məşğul olmuşam. 1981-ci ildə bizim dahi sənətkarımız, mərhum Rafiq Babayev məni Bakıya dəvət etdi. Həmin vaxtdan bu günə qədər də oxuyuram".

"İlqar Muradovun ruhunu ifadə edən mahnı hansıdır?" sualına Xalq artistinin cavabı belə oldu: "Mənim əksər mahnılarım mənə aiddir. Amma mən nə oxuyuramsa o elə mənim qəlbimin musiqisidir. Onları sevərək, seçərək oxumuşam. Bütün mahnılarım mənə doğmadır. Mənim üçün fərqi yoxdur. Onlar mənim daxili aləmimdən xəbər verir. Onlar mənim övladlarımdır. Necə ki, övladlarımızın arasında fərq qoymuruq. Oxuduğum mahnılarım da mənim övladlarımdır. Onlar mənə yaxın olmasaydılar, mən onları ifa etməzdim".

Dünyanı cənginə alan COVİD-19 pandemiyası həmsöhbətimizin də yaradıcılığına təsirsiz ötüşməyib: "Karantindən qabaq 3 konsert nəzərdə tutulmuşdu. Onun 2-ni edə bildik, 1 konsert qaldı. Həmin konsertin tarixi dəyişilə-dəyişilə dekabrın 20-ə salınıb. Həmin vaxta bitsə, konsert baş tutacaq, ancaq çətin ki, o vaxta bitər. Ümidimiz 2021-ci ilədir".

Pandemiyadan söz düşmüşkən, müğənni insanlarımızı diqqətli olmağa, özlərini qorumağa çağırdı: "İnsanlar son dərcə diqqətli olsunlar. Qarabağ uğrunda döyüşlərdə qələbə qazandıq. Qripə də qalib gələsi olsaq çox yaxşı olar. Bu, özümüzün əlindədir".

"Pandemiya dövrü hər kəsə təsir etdiyi kim mənə də təsir etdi. Xüsusən maddi tərəfdən. Mən də öz doğmalarımı qorumaq üçün məcburiyyətdən evdə qaldım. Əslində mənə mənəvi olaraq elə də böyük təsir etmədi. Həmin dönəmlərdə yaradıcılığımın üzərində işlədir. Həmin dövrü səmərəli keçirdim".

Müsahibimizin fərqli imici, üzünün fakturası rejissor Yavər Rzayevin diqqətiini çəkib. Rejissor İlqar Muradovu quruluş verdiyi "Xeyirlə şərin rəqsi" filminə dəvət edib: "Filmin süjet xətti dünyaca məşhur xəfiyyə Dronqonun Azərbaycanın dağlıq rayonundakı bir qəsəbədə baş verən müəmmalı hadisəni araşdırması üzərində qurulub. Quruluşçu rejissor Yavər Rzayev məni baş rola - Dronqo obrazına dəvət etdi. Film Çingiz Abdullayevin "Quba kapriççiosu" əsəri əsasında lentə alınıb. Filmə ona görə çəkildim ki, o obraza simpatiyam var idi. Ümumiyyətlə, Çingiz müəllimin özünə də çox böyük hörmətim var. Yenə bu tipli obraza dəvət etsələr gedəcəyəm, amma başqa filmə yox".

"Əvvəlcə çəkilişə razılıq vermədim, çünki mən aktyor deyildim. Amma əsərlə tanış olduqdan sonra obrazda xarakterimə uyğun nələrisə tapdım. Düşünürəm ki, zahirən də Dronqoya oxşarlığım var. Çingiz Abdullayev mənim obrazımdan çox razı qalıb. Hətta premyerada da qeyd etdi ki, bu günə qədər çox film olub, lakin onların arasında ən uğurlu alınan və ən çox bəyəndiyi məhz bu filmdir. Bundan başqa, peşəkar kino mütəxəssisləri də film haqqında müsbət rəylər bildirirlər. Ümid edirəm ki, bunun ardı və yaxud başqa obrazlar olacaq".

Xalq artisti ölkəmizi xarici ölkələrdə də layiqincə təmsil edib: "Bir neçə layihələrdə də iştirak etmişəm. Misal kimi Norveç xoru ilə olan layihəni göstərə bilərəm. 1995-ci ildə mərhum səyyah Tur Heyerdal Azərbaycana gəldi. Onun ideyası ilə layihə yazıldı. Bu proyekt ən yaxşı proyektlər sırasına düşdü. Orda həm bəstəkar, həm də xalq mahnılarından istifadə etdik. Mərhum bəstəkar-pianoçu Rafiq müəllimin davamçısı olaraq dostum Siyavuş Kərimi ilə əl-ələ verib başqa-başqa ölkələrdə Azərbaycan musiqisini təbliğ etmişik. Qismət olarsa, yenə də edəcəyik".

2286
Ermənistanın sabiq prezidenti Robert Köçəryan

Ermənistanın sabiq prezidenti Türkiyəyə qarşı tələ qurduqlarını etiraf etdi

0
(Yenilənib 12:32 05.12.2020)
Ermənistanın ikinci prezidenti olmuş Köçəryan rəsmi İrəvan hökumətinin Dağlıq Qarabağ müharibəsini başlamaq üçün bütün imkanlarından yararlandığını deyib

BAKI, 5 dekabr — Sputnik. Ermənistanın sabiq prezidenti Robert Köçəryan: "Türkiyəni birbaşa müharibəyə cəlb etmək üçün çalışdıq, amma bacarmadıq", - deyə etiraf edib.

Sputnik Azərbaycan-ın Türkiyə mediasına istinadən xəbərinə görə, Ermənistanın ikinci prezidenti olmuş Köçəryan rəsmi İrəvan hökumətinin Dağlıq Qarabağ müharibəsini başlamaq üçün bütün imkanlarından yararlandığını deyərək Türkiyəni də bu müharibəyə cəlb etmək istədiklərini, lakin buna müvəffəq ola bilmədiklərini bildirib. "Fəaliyyətləri ilə Azərbaycana beynəlxalq legitimlik qazandırdılar", - deyə Koçaryan əlavə edib.

Qeyd edək ki, sentyabrın 27-də saat 06 radələrində Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutub. Nəticədə cəbhə bölgəsində genişmiqyaslı hərbi əməliyyatlar başlayıb, kəndlərin intensiv atəşə tutulması nəticəsində mülki şəxslər həlak olublar. Mülki infrastruktur obyektlərinə ciddi ziyan dəyib. Azərbaycan Ordusunun ön xətt bölmələri düşmənin bu təxribatının qarşısını almaq və qoşunların qarşıdurma xəttinə yaxın zonalarda yaşayan mülki əhalinin təhlükəsizliyini təmin etmək məqsədilə cavab tədbirləri görüb.

2020-ci il noyabrın 10-da Azərbaycan, Rusiya və Ermənistan liderlərinin Qarabağ üzrə üçtərəfli bəyanatı imzalanıb. Bəyanata əsasən, Dağlıq Qarabağ münaqişə zonasında 2020-ci il noyabrın 10-u saat 00:00-dan etibarən bütün hərbi əməliyyatların dayandırılması və tam atəşkəs barədə bəyanat veriblər.
Bəyanata görə, Ağdam rayonu 2020-ci il noyabrın 20-də, noyabrın 25-də (ilkin olaraq noyabrın 15-i nəzərdə tutulurdu) isə Kəlbəcər rayonu Azərbaycana qaytarılıb. Dekabrın 1-də Laçın rayonu Azərbaycana qaytarılıb. Bununla yanaşı, təmas xətti və Laçın dəhlizi boyunca Rusiya Federasiyasının sülhməramlı kontingenti yerləşdirilir. Paralel olaraq Ermənistan silahlı qüvvələri işğal olunmuş ərazilərdən çıxarılır.
Tərəflərin razılığına əsasən, yaxın üç ildə Laçın dəhlizi üzrə Xankəndi ilə Ermənistanın əlaqəsini təmin edəcək yeni hərəkət marşrutunun tikintisinin planı müəyyən olunacaq. Daxili məcburi köçkünlər və qaçqınlar BMT-nin Qaçqınların işləri üzrə Ali Komissarının nəzarəti altında Dağlıq Qarabağın və ətraf rayonların ərazisinə qayıdacaqlar. İqtisadi və nəqliyyat əlaqələrinin bərpa olunacağı gözlənilir. Ermənistan Respublikası vətəndaşların, nəqliyyat vasitələrinin və yüklərin hər iki tərəfə maneəsiz hərəkətinin təşkil olunması məqsədi ilə Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqəsini təmin edəcək.

0
Teqlər:
müharibə, Türkiyə, etiraf, Robert Koçaryan, Ermənistan, Azərbaycan, Qarabağ
Mövzu:
Azərbaycan və Ermənistan arasında müharibə