Naibə Allahverdiyeva

Səhhəti ağırlaşan Xalq artisti: "Ölümdən qorxmuram, sadəcə əlil olmaq istəmirəm"

13591
(Yenilənib 16:13 27.02.2019)
Naibə Allahverdiyeva: "Görənlər deyirlər ki, sən yaxşı qurtarmısan"

Nigar Məhərrəm, Sputnik Azərbaycan

BAKI, 27 fevral — Sputnik. Bir müddətdir ki, Xalq artisti Naibə Allahverdiyevanın səhhətində problemlər yaranıb. O, Sputnik Azərbaycan-a müsahibəsində başına gələnlərdən danışıb.

- Başımda səs olduğu üçün özümü yaxşı hiss etmirdim. Həm də immunitetimi qaldırmağa ehtiyac vardı. Bunun üçün Bioloji Təbabət Klinikasına getdim, həkim sistem yazdı. Mən də evimizə yaxın olan "Funda" klinikasına müraciət etdim. Onlar "prob" qoymadan sistemlərimi vurdular. Maşına oturanda hiss elədim ki, çox pisəm. Artıq güclü ağrılar, qıcolmalar başlamışdı, sanki nəsə məni çalxalayırdı. Evə getdim, tək idim, qonşu harayıma çataraq təcili yardım çağırdı. Məni toksikoloji mərkəzə apardılar.

- Sizə müalicə yazan həkim kim idi?

- Hələ ki, bu haqda danışmaq istəmirəm. Həm də həkimin adını dəqiq bilmirəm. Nevropotoloq idi, mənə bir apteklik dərman yazdı. Biri deyir, mənim bu vəziyyətimə səbəb guya dərmanın köhnə olmasıdır. Dərmanların yarısını "Funda" klinikasından, yarısını isə başqa bir aptekdən almışdım. Preparatların yarısı Almaniya istehsalı idi. Nə bilim, nə deyim? Həkim deyiləm, tibdən də başım çıxmır. Amma bundan öncəki sistemlərin heç bir əks təsiri olmamışdı.

- Həkimlər nə dedi, o hala düşməyinizə səbəb nə idi?

- Özümdə deyildim, xəbərim olmadı. Epikrizdə dərmanların reaksiya verməsi barədə yazıblar.

- Bu hadisədən sonra sizə müalicə yazan həkimlə əlaqə saxladınız?

- Bəli, dedi ki, ola bilsin, dərman reaksiya verib. "Belə hallar o qədər olub" deyəndən sonra hələ mənə bir dərman almağı da tövsiyə etdi. Yaxşı ki, o dərmanı almamışdım.

- Səhhətinizdə başqa nə kimi fəsadlar oldu?

- O qorxunu yaşadığım üçün təzədən stresə düşdüm. Bədənimdə, böyrəklərimdə ağrılar yarandı. Ürəyimdə, belimdə ağrılar oldu. Bütün beynim, bədənim əsməyə başladı. Başgicəllənmə yarandı. Səhərədək böyrəklərimin ağrısından yata bilmirəm. Amma əvvəllər böyrəyimdə heç bir ağrı yox idi. Bunadək elə bir ciddi xəstəliyim olmayıb, sadəcə bir az təzyiqim vardı. Bu hadisədən sonra isə təzyiqim daha da qalxdı. Çünki çox həssas, tez depressiyaya düşən biriyəm. İndi hər axşam durduğum yerdə təzyiqim qalxır və bu, məni qorxudur. Bir də görürsən ki, təzyiqim 150-170 arasında olur. Deyirəm, yataram, gecə insult keçirərəm. Ona görə də, demək olar ki, hər axşam təcili yardımda oluram.

- Müalicə xərclərini qarşılaya bilirsiniz?

- Aktrisayam, milyarder deyiləm. Əlimdə nə pulum vardı, hamısını klinikalara, dərmanlara verdim. O klinikanın özündə müalicə üçün 700-800 manatadək pulum getdi. Dedilər ki, guya qanımı təmizləyirlər. Bütün pulumu dərmanlara verdim. Yenidən aparatlara girmək üçün pulum yoxdur. İnanın, stresin, depressiyanın içində qovuruluram, bütün günü küçələrdəyəm. Sakitləşmək istəyirəm. Ona görə çalışıram ki çox vaxt telefona da cavab verməyim. Bəzən evə də girə bilmirəm, o dəhşətli an gözümün qarşısından çəkilmir, qorxuram. Ətrafdakılardan eşidirəm ki, filan şəxs bu cür dünyasını dəyişib. Görənlər deyir ki, sən yaxşı qurtarmısan. Ölümdən qorxmuram, sadəcə olaraq heç nədən ölmək, əlil qalmaq istəmirəm. Əlil qalsam, heç kim mənə baxmayacaq...

- Xaricdə müalicə almağı düşünürsünüz?

- Pul bir yana, canım da əldən gedir. Ona görə düşünürəm ki, burda bu qədər pul töküb birtəhər olanadək, bir müddət sonra İran, ya Türkiyəyə getsəm, daha yaxşı olar.

- Tanışlarınızdan, sənət yoldaşlarınızdan diqqət, qayğı varmı?

- Heç kimdən nəsə gözləmirəm. Çünki hər kəsin öz problemi, dərdi var. Zəng edib mənimlə maraqlanırlar. Hətta Türkiyədən, İsraildən də tanımadığım adamlar da mənə zəng edir, səhhətimlə maraqlanırlar.

- Niyə xəstəxanada yatmağı düşünmürsünüz?

- Xəstəxanada yatmaq istədim. Lakin özəl klinikalar od qiymətinədir. Dövlət xəstəxanalarında isə milçək əlindən tərpənmək olmur, antisanitar vəziyyət baş alıb gedir. 5, 3 və 1 saylı Şəhər Klinik xəstəxanalarında olmuşam. Düzdür, o xəstəxanalarda mənə qarşı xoş münasibət göstəriblər. Lakin oradakı vəziyyət heç də ürəkaçan olmayıb.

- Deyəsən, həkimlərə inamınız ölüb?

- Elə deməzdim, yaxşı həkimlərimiz də var. Toksikoloji Mərkəzdə məni öz həkimlərimiz ayıltdı, 3 saat qulluğumda dayandılar. Onların səyi ilə özümə gəldim.

- Belə çətin günlərdə ən çox kim yanınızda oldu?

- Yoldaşım hər zaman yanımda idi. İndi də yanımdadır.

- Əsas istəyiniz nədir?

- Sadəcə istəyirəm, bir adam mənə desin ki, "bu həkimin yanına, bu klinikaya get, müayinə olun". Yaxşı həkim tapmaq və normal analizlər verərək böyrəyimdəki ağrıların, ayaqlarımdakı əsmələrin səbəbini öyrənmək istəyirəm. Bilmirəm nə edim.

13591
Əlaqədar
Həkimlər Xalq artisti ilə bağlı son qərarı verdi
Xalq artistindən yeni xəbər var: Həkimlər arasında fikir ayrılığı yaranıb
Xalq artistinin ayağı amputasiya olundu
Ayağının bir hissəsi amputasiya olunmuş Xalq artistindən məyusedici xəbər
Xalq artisti: “Səhnəni şöhrətin zirvəsində olanda tərk etmək lazımdır”
Leonardo Di Kaprio, arxiv şəkli

"Apple" Di Kaprio: Hollivudda birgə filmlər çəkiləcək

847
(Yenilənib 23:28 05.08.2020)
Di Kaprio və "Apple"-in ilk layihəsi Martin Skorsezenin rejissoru olduğu "Çiçəkli ayın qatilləri" (Killers of the Flower Moon) filmi olacaq.

BAKI, 5 avqust — Sputnik. Amerikalı aktyor Leonardo Di Kaprio və onun "Appian Way" kino şirkəti "Apple" şirkəti ilə film və serialların çəkilişinə dair müqavilə imzalayıb. Sputnik Azərbaycan xəbər verir ki, bu barədə məlumatı "Hollywood Reporter" yayıb.

Di Kaprio və "Apple"-in ilk layihəsi Martin Skorsezenin rejissoru olduğu "Çiçəkli ayın qatilləri" (Killers of the Flower Moon) filmi olacaq. Film Devid Qrannanın eyni adlı romanı əsasında çəkiləcək. Filmə 200 milyon dollar maliyyə ayrılıb. Baş rolları Di Kaprio və Robert De Niro oynayacaq. Korporasiya Elizabet Mossun baş rolu oynadığı və "Appian Way Productions"ın prodüserlik etdiyi "Parlayan qızlar" (The Shining Girls) serialını da birlikdə ərsəyə gətirəcək", - deyə məlumatda bildirilir.

Di Kaprio, "Appian Way" və "Apple"-in əməkdaşlığı bununla yekunlaşmayacaq.

"Appian Way Productions" üçün bu müqavilə serial çəkilişi sahəsində ilk addım olacaq. Şirkət daha əvvəl "Paramount Pictures" və "Warner Bros" kinostudiyaları ilə filmlərin istehsalına dair sazişlər imzalamışdı.

Xatırladaq ki, bundan əvvəl Di Kaprionun şirkəti Oldos Haqslinin "Ada" adlı sonuncu romanının serial ekranlaşdırılmasına prodüserlik etməyi nəzərdə tutub.

847
Kinolent, arxiv şəkli

Məşhur film festivalının keçirilmə tarixi bəlli oldu

22
(Yenilənib 17:00 05.08.2020)
Sentyabrın 14-20 tarixlərində keçiriləcək festivalda Beynəlxalq Tammetrajlı və Beynəlxalq Tələbə Filmləri yarışlarının da keçiriləcəyi açıqlanıb.

BAKI, 5 avqust — Sputnik. Türkiyənin nüfuzlu festivallarından olan 27-ci Beynəlxalq Adana "Altun Koza" film festivalının keçirilmə tarixi bəlli oldu.

Sputnik Azərbaycan Türkiyə mediasına istinadən xəbər verir ki, Böyükşəhər Bələdiyyə Sədri Zeydan Karalar verdiyi yazılı açıqlamada bildirib ki, festival COVID-19 epidemiyasının şərtlərinə əməl edilərək həyata keçiriləcək.

Sentyabrın 14-20 tarixlərində keçiriləcək festivalda Beynəlxalq Tammetrajlı və Beynəlxalq Tələbə Filmləri yarışlarının da keçiriləcəyi açıqlanıb.

22
Bakıda tibbi maskada olan gənc, arxiv şəkli

Bakıda ən çox yoluxmanın qeydə alındığı ərazilər - SIRALAMA

0
(Yenilənib 17:49 06.08.2020)
Ən az yoluxma isə Səbail rayonu ərazisində qeydə alınıb ki, burada yoluxma Bakı şəhəri üzrə ümumi statistikanın 4.5 faizini təşkil edib

BAKI, 6 avqust — Sputnik. Bakıda COVID-19-a yoluxma ən çox Binəqədi rayonu ərazisində qeydə alınıb. Sputnik Azərbaycan-ın koronavirusinfo.az-a istinadən xəbərinə görə, qeyd olunan rayonda yoluxma 14.2 faiz təşkil edib.

Daha sonrakı yerdə qərarlaşan Xətai rayonunda yoluxma 12.2 faiz, Sabunçu rayonunda 11.9 faiz, Yasamal rayonunda isə 11.8 faiz təşkil edib. Ən az yoluxma isə Səbail rayonu ərazisində qeydə alınıb ki, burada yoluxma Bakı şəhəri üzrə ümumi statistikanın 4.5 faizini təşkil edib.

0