İnsanlar

Siz hansı səlahiyyətin sahibisiniz ki, milyonları təhqir edirsiniz?

5601
(Yenilənib 16:57 07.11.2018)
Əvvəlcə, bir aydınlaşdırın ki, borclu olan kimdir: xalq sizə borcludur, yoxsa siz həm sənətə, həm də xalqa

BAKI, 7 noyabr — Sputnik. Yerli yazıçıların oxucularla səngimək bilməyən davasında hansı tərəf haqlıdır? Bütün Azərbaycan xalqı həqiqətənmi kitabdan, ədəbiyyatdan uzaqdır? Yeni nəsil yazıçıların problemi nədir?

Düzü, bu sualların cavabını özüm də dəqiq bilmirəm. Ona görə yox ki, mənim ədəbiyyat anlayışım yoxdur və ya Azərbaycan xalqına bələd deyiləm. Ona görə ki, yazıçıların bu iddia və ittihamları o qədər absurddur ki, bunu anlamaq çətindir.

İddialardan biri və birincisi budur ki, xalq kitab oxumur. Bu, ağ yalandır. Məgər bu xalq deyildimi Salam Qədirzadənin, Əlibala Hacızadənin kitablarını gündüz vaxtı çıraqla gəzən? Məgər bu xalq deyildimi bütün Şərqdə ilk dəfə Qərb əsərlərini tərcümə edib səhnələşdirən? Bugünün özündə bu xalq deyilmi bir sıra yerli və xarici müəlliflərin minlərlə tirajlanmış kitablarını alıb oxuyan?

Digər bir iddia da budur ki, xalq bu yazıçıları anlamır. Yüngül ədəbiyyata qaçır. Buna görə də sovet dövrünün yüngül ədəbiyyatı kimi Salam Qədirzadə, Əlibala Hacızadə, bu günün yüngül ədəbiyyatı kimi Elxan Elatlı, Rövşən Abdullaoğlunu oxuyur. Yaxşı, bəs siz hansı ciddi ədəbiyyatı yaradıb xalqa sundunuz və onlar istəmədilər?

Bu xalq sizi oxumağa da, anlamağa da məcbur deyil. Ümumiyyətlə, insanlar sizə borclu olduqları üçün kitab oxumalı deyillər. Sizin kitablarınızı oxusalar da, sizə borclu olmayacaqlar! Uğursuzluğa bəhanə qazandırmaq üçün kütlənin boynuna bu yersiz minnətləri qoymağa lüzum yoxdur.

Əlbəttə, bir müəllif dövründən çox üstün əsərlər yaza bilər. Elə əsərlər ki, onlar əsrlər sonra da aktual olacaq və dəyəri bilinəcək. Əlbəttə, bugünün sıravi insanı öz dövründən üstün əsərləri anlamaz, müəllifinin dəyərini bilməz, yüngül ədəbiyyata qaçar, asudə vaxtını hər hansı bir kitabla keçirər.

Bu və ya digər səbəbdən çox istedadlı yazıçıların əsərləri az tirajla da satıla bilər. Lakin bunların heç biri haqq vermir ki, siz xalqı ittiham edib özünüzü zirvələrə qoyasınız.

Əgər bir insan ədəbiyyatı, yaradıcılığı seçibsə, yazmaq, yaratmaq, gələcəyə mühüm əsərlər qoymaq onun vəzifə borcudur. Xalq oxuyarmı, oxumazmı, sevərmi, lənətləyərmi, yaşadarmı, undarmı - bunu xalq bilər. Siz özünüzü hansı səlahiyyətin sahibi bilirsiz ki, milyonları təhqir edir, alçaldır və özünüzə borclu çıxarırsınız?

Siz, ümumiyyətlə, sənət üçün nə etdiniz? Nələrdən keçdiniz? Nələri qurban verdiniz? Əgər bir şeylər etdinizsə, bu etdikləriniz sizə və mənsubu olduğunuz – indi ittiham etdiyiniz bu xalqa nələr verdi? Hansı uğurları gətirdi?

Keçmişin adamları demişkən, papağınızı qoyun qabağınıza düşünün, bu sualları cavablandırın. Əvvəlcə, bir aydınlaşdırın ki, borclu olan kimdir: xalq sizə borcludur, yoxsa siz həm sənətə, həm də xalqa borclusunuz?

Tarixin heç bir dönəmində üstün yaradıcılıq öz müəllifinə dərhal qızıl mecməyidə nemətlər sunmayıb. Bütün dövrlərdə şahid olmuşuq ki, sizin nəzərdə tutduğunuz ciddi sənət nümunələrinin müəllifləri vuruşublar, mübarizə aparıblar, iztirablar, əzablar çəkiblər, qalmaqallar, mübahisələr, davalardan keçiblər. Nələrsə əldə etmək üçün öz sənətləri uğruna saysız-hesabsız qurbanlar veriblər.

Siz isə isti yuvanızda bir-iki kitab yazmaqla özünüzü dahi hesab edirsiz?

Zəhmət olmasa, xalqla sənətin arasına girməyin. Nə bacarırsınızsa yazın, yaradın, xalqa təqdim edin. Sevsələr də, lənətləsələr də, bu onların biləcəyi işdir. Əgər siz öz dahi olduğunuzdan əminsinizsə, bu, sizə bəsdir. Uğurlar!

5601
Teqlər:
kitab, sənət, əsər, yazıçı, xalq
Əlaqədar
Almaniyada Qarabağ "müharibəsi" və halı pisləşən erməni yazıçı
Azərbaycanlı yazıçının romanı Türkiyədə nəşr olunub
Xalq yazıçısı əsəbləşdi: "Ağıldankəmlər..."
Amerikalı müəllif Tərtərdən və erməni işğalından yazıb
Anar Kərimov, arxiv şəkli

Mədəniyyət naziri BMT-nin Sivilizasiyalar Alyansı üzrə ali nümayəndəsi ilə görüşüb

13
(Yenilənib 19:20 22.06.2021)
Bu kampaniya çərçivəsində təşkilatın işğaldan azad olunmuş ərazilərdə tarixi-dini abidələrin bərpası və oradakı gerçəklərin dünyaya çatdırılması istiqamətində mühüm işlər görəcəyinə əminliyini ifadə edib.

BAKI, 22 iyun — Sputnik. Mədəniyyət naziri Anar Kərimov ölkəmizdə səfərdə olan BMT-nin Sivilizasiyalar Alyansı (BMTSA) üzrə ali nümayəndəsi Migel Angel Moratinos ilə görüş keçirib. Sputnik Azərbaycan xəbər verir ki, nazir 44 günlük Vətən müharibəsindən sonra Azərbaycana ilk BMT nümayəndəsinin səfərindən məmnunluğunu ifadə edib.

A.Kərimov 30 illik işğaldan sonra öz ərazi bütövlüyünü bərpa edən Azərbaycanın regionda yeni imkanlara yol açdığını vurğulayıb, bu kontekstdə həm regionda, həm də ölkələr arasında sülhün bərqərar olmasına töhfə vermək üçün BMT-nin Sivilizasiyalar Alyansının əlverişli imkanlarının olduğunu diqqətə çatdırıb: "Biz inanırıq ki, təşkilat postkonflikt dövrünü yaşayan Azərbaycanla Ermənistan arasında da davamlı sülhün və güvənliyin təmin edilməsi üçün əlindən gələni əsirgəməyəcək."

Təşkilatla Mədəniyyət Nazirliyi arasında birgə əməkdaşlığın hər zaman yüksək səviyyədə inkişaf etdiyini bildirən nazir "Mədəniyyət naminə sülh" (Peace for Culture) qlobal çağırış haqqında məlumat verib. Qeyd etdi ki, mədəniyyətin qorunması üçün regionda sülhün bərqərar olması vacibdir və bu məqsədlə Azərbaycan "Mədəniyyət naminə sülh" kampaniyası ilə dünyaya çağırış edir. Bu kampaniya çərçivəsində təşkilatın işğaldan azad olunmuş ərazilərdə tarixi-dini abidələrin bərpası və oradakı gerçəklərin dünyaya çatdırılması istiqamətində mühüm işlər görəcəyinə əminliyini ifadə edib.

Səfərinin məqsədinin Azərbaycana dəstəklərini nümayiş etdirmək olduğunu deyən M.Moratinos dini abidələrin qorunmasının təşkilatın prioritet fəaliyyət istiqamətlərindən olduğunu, bu sahədə Azərbaycanla əməkdaşlığı yüksək qiymətləndirdiyini qeyd edərək konkret layihələrin reallaşdırılmasının vacibliyini, bu sahədə birgə layihələrin həyata keçirilməsində maraqlı olduqlarını diqqətə çatdırıb.

Görüş əməkdaşlığın gələcək perspektivlərinin və tərəfləri maraqlandıran digər məsələlərin müzakirəsi ilə davam edib.

13
Musiqi alətləri, arxiv şəkli

Azərbaycanlı musiqiçidən beynəlxalq səviyyəli layihə: "Kamança Şuşanın səsidir"

41
(Yenilənib 23:33 21.06.2021)
Solo ifa zamanı Toğrul Əsədullayevi "Buta" instrumental ansamblı – bədii rəhbər, tarzən Rövşən Qurbanov, pianoda Əməkdar artist Nərgiz Əliyeva müşayiət ediblər.

BAKI, 21 iyun — Sputnik. Beynəlxalq Muğam Mərkəzinin solisti, Əməkdar artist, Prezident mükafatçısı, sənətşünaslıq üzrə fəlsəfə doktoru, dosent Toğrul Əsədullayev "Kamança Şuşanın səsidir" musiqi layihəsini təqdim edib. Sputnik Azərbaycan xəbər verir ki, musiqiçi şuşalı bəstəkarların əsərlərindən ibarət silsilə ifalar lentə aldırıb.

Qeyd edək ki, alboma səkkiz əsər daxil edilib. Əfrasiyab Bədəlbəyli, Niyazi, Fikrət Əmirov, Süleyman Ələsgərov və Vasif Adıgözəlovun yaradıcılığından nümunələr ilk dəfə olaraq solo kamançada dinləyicilərin ixtiyarına verilib. Solo ifa zamanı Toğrul Əsədullayevi "Buta" instrumental ansamblı – bədii rəhbər, tarzən Rövşən Qurbanov, pianoda Əməkdar artist Nərgiz Əliyeva müşayiət ediblər. Yaxın gələcəkdə ifaçı layihəni daha geniş formatda beynəlxalq səviyyədə təqdim etməyi planlaşdırır.

Məlumat üçün bildirək ki, musiqiçi Heydər Əliyev Fondunun dəstəyi ilə Azərbaycan Mədəniyyətinin Dostları Fondunun layihəsi əsasında keçirilən "Muğam 2007", "Muğam 2011", "Muğam 2013", "Muğam 2015" Televiziya müsabiqəsində kamança ifaçısı kimi iştirak edib. 2009, 2011, 2013 və 2015 -ci illərdə Qəbələ Musiqi Festivalının iştirakçısı olub. Toğrul Əsədullayevin ifa etdiyi "Nəva", "Bayatı-Şiraz", "Çahargah", "Şur", "Hümayun", "Rahab" kimi muğamlar Azərbaycan Dövlət Telaradio Şirkətinin Qızıl Fondunda saxlanılır.

2012-ci ildə Azərbaycanda keçirilən "Eurovision 2012" mahnı müsabiqəsinin finalında çıxış edən məşhur müğənni Emin Ağalarovu müşayiət edən Əməkdar artist, 1997-ci ildən etibarən ABŞ, Meksika, Kanada, Çin, BƏƏ, İngiltərə, Almaniya, Norveç, İtaliya, Avstriya, İspaniya, Fransa, İsveç, İsveçrə, Yunanistan, Litva, Latviya, Rumıniya, Slovakiya, Polşa, Türkiyə, İran, Ukrayna, Gürcüstan, Özbəkistan, Qazaxıstan, Qırğızıstan, Türkmənistan həmçinin Rusiyanın bir sıra şəhərlərində dəfələrlə Azərbaycanın milli musiqisini təmsil edib.

41
Azərbaycan Respublikası İqtisadi İslahatların Təhlili və Kommunikasiya Mərkəzinin (İİTKM) icraçı direktoru Vüsal Qasımlı

Vüsal Qasımlı: “Rusiya hər üç Cənubi Qafqaz ölkəsi üçün əsas ticarət partnyorudur”