Tüfəng

On səkkiz dəqiqəlik böyük faciə

925
(Yenilənib 18:10 31.01.2018)
Və ya bakirəlik pərdəsinə açılan "İkinci güllə"

BAKI, 31 yanvar — Sputnik. Bu yaxınlarda nümayiş olunan "İkinci güllə" filmini izlədim. Bu qısametrajlı film böyük mesajlar ehtiva edir. Filmə ötəri yanaşanda, düşünmədən izləyəndə bir kənd adət-ənənəsindən qeyri nəsə görmək mümkün deyil. Sosial şəbəkədə film haqqında yazılan rəylərdən də məlum olur ki, kütlə bu filmdə sadəcə tabulara toxunulmuş qısa məzmun görə bilib.

Filmin məzmunana görə, evlənən cütlük zifaf gecəsinə girir. Qapının önündə yengə nəticəni intizarla gözləməkdədir. Bəyin sağdışı əlində silahla yengənin müjdəli xəbərini gözləyir ki, iki atəş açıb gəlinin bakirə olduğunu bütün kəndə bildirsin. Yengə müjdəli xəbəri verincə sağdış birinci atəşi açır, lakin nə qədər əlləşirsə, ikinci güllə açılmır ki, açılmır.

Hadisə kənd camaatının dilində məsxərəyə çevrilir. Gəlini pozğun, bəyi qeyrətsiz adlandırırlar. Gəlinin atası da əlində balta ilə bakirə çıxmayan qızını öldürmək üçün bəy evinə gəlir. Qızının bakirə olduğunu öyrənincə rahatlayır və sağdışa yarım saat vaxt verir ki, ikinci atəşi də açsın. Xeyli axtarışdan sonra kəndin fahişəsi onlara güllə verir. İkinci atəş açılır, amma göyə yox, gəlinə. Adı əxlaqsıza çıxan, dəqiqələr içində bütün camaatın dilinə düşən, hətta doğma atası belə onu öldürməyə hazır olan qız intihar edir.

Bəy obrazında aktyor Elmin Bədəlovu görürük. Əvvəlcə yorğun olduğunu bildirib gərdəyə girmək istəməsə də, daha sonra sağdışın tənbehindən, cəmiyyətin qınağından qorxub öz kişiliyini göstərməyə məcbur və məhkum olur. O, azad olmağa, öz həyatı ilə bağlı qərarları özü verməyə cəhd edir, amma silahın gülləsi açılmayınca üzərinə qınaq və məsxərə güllələri yağır. Qürurunun alçaldığını görüncə bəy də güllənin açılmadığı üçün həyəcan keçirir və yeni güllə tapmaq üçün təşvişə düşür.

Göstərilən budur, amma ötürülən odur ki, sən nə qədər azad olursan ol, ictimai düşüncənin güllələri mənəviyyatını deşincə sən də axına qapılar və onların istədiyi kimi olmaq üçün vuruşarsan.

Yengə obrazını canlandıran aktrisa Nəsibə Eldarovanın ifasında toy şənliklərində gördüyümüz əli lampalı yengələrin həyəcanları sezilir. Üstünə böyük məsuliyyət düşən, iki gəncin namusuna, ismətinə, qeyrətinə cavabdehlik səlahiyyəti daşıyan yengələrin bütün təlatümləri aktrisa Nəsibə Eldarovanın qapı önündəki bir neçə saniyəlik təlaşlı var-gəllərindən bizə tərəf boylanır. Bu necə intizar, nə cür maraqdır? Güllə açılmayınca yengə də qorxuya düşür. Dəfələrlə təkrarlayır ki, "mən qızın atasına nə cavab verəcəyəm?", "kənd nə fikirləşəcək?". Bir yengə kimi uğursuz, düşərsiz görünməyin, öz nüfuzunu itirməyin qorxusunu yaşayan aktrisanın simasından onun bütün yengə taleyini oxuya bilirik.

Qızın atası rolunda aktyor Vidadi Həsənovu görürük. Güllə açılmayınca namus damarı tapdalanan atanın əlinə balta alıb qızını öldürməyə gedişi, üst-üstə yağdırdığı təhqirləri, qana susadığı gözləri cəmiyyətin bütün potenasial qatillərinə, canilərinə güzgü tutur.

Film boyunca baş verənləri səssizliklə izləyən, ərinə qulluq edən, ev işləri görən, fikirlərini bildirməyə, sevincini və kədərini bölüşməyə heç bir haqqı olmayan qız anası obrazını aktrisa Leyli Vəliyeva canlandırır. Atanın qəzəblə dediyi sözlərdən anlayırıq ki, əgər qızı bakirə çıxmayıbsa, onun pozğunluğunun günahı anasındadır.

Qəribə və təzadlı ittihamdır, amma həqiqətdir. Məgər bu tipdən olan kişilər ömür boyu heç bir haqq tanımadığı, heç bir azadlıq imkanı vermədiyi qadınları bütün ailə-məişət problemlərində müqəssir elan etmirlərmi?

Filmdə aktyor Manaf Dadaşov sağdış obrazını, aktyor Elgün Həmidov isə soldış obrazını canlandırır. Burda kiçik bir nüansa da diqqət edilib. Sağdış dəyərlər, adət-ənənələrə sadiq, mühafizəkar azərbaycanlıdır. O, kiminsə toy gecəsi bakirə çıxmasına iki atəş açmaqla bayram edən və bu işi ilə öyünən şəxsdir. Yəni Manaf Dadaşovun canlandırdığı sağdış xarakteri "palaza bürünüb, ellə sürünən", ona cəmiyyətin öyrətdiyi hər şeyi sorğu-sualsız dəyər kimi qəbul edən sağçıdır.

Lakin Elgün Həmidovun canlandırdığı soldış obrazı isə etiraz edir. Əlbəttə, bu etiraz bir aksiya, bir inqilab səviyyəsində deyil, ola da bilməzdi. Hətta aktyorun ifasından hiss edirik ki, bəzən fikirlərini azad ifadə etməyə, bu sarsaq düşüncəyə qarşı çıxmağa qorxur. Bəzən pıçıldayır, bəzən nələrisə dilinin ucuna gətirib, qırtlağına qaytarır.

Soldış yaxşı bilir ki, etirazını daha yüksək, daha dərin bildirsə, potensial qatillər onun başını kəsər, dərisini soyar. Soldış gərəksiz, hətta zərərli olan adətlərə, ənənələrə, dəyər halına gətirilmiş bütün növ cəfəngiyyatlara qarşı olan solçudur. Sağ və sollar arasındakı uzun sürən savaşa işarə edilən bu xırda nüans əsl rejissor ustalığıdır.

Titrdə qırmızı paltarlı qadın adı ilə təqdim edilən seks işçisini, sadə dildə desək, kəndin fahişəsi obrazını aktrisa Hüsniyyə Mürvətova canlandırır. Kəndi qapı-qapı gəzib güllə tapmayan soldış axırda bu qadının qapısını döyüb ondan güllə istəyir. Qadın əvvəlcə güllə verməkdən imtina edir. Dərinə varanda görürük ki, bu imtina qərəzdən deyil, qəzəbdən doğulur. Bütün adi düşüncələrdə əxlaqsız, pozğun adlandırılan qadın indi onları əxlaqsız, pozğun adlandırılmaqdan xilas etmək istəmir. Nəhayətdə isə könlü rəva vermir və onlara güllə bağışlayır.

Bu, təkcə güllə bağışlamaq deyil, onların bütün qınaqlarını, təhqirlərini, alçaltma münasibətlərini bağışlamaqdır. Bu səhnədən anlaşılır ki, ali düşüncədə əxlaqsızlıq fahişəliklə ölçülmür. Bütün müsbət insani keyfiyyətləri özündə birləşdirən insanlar yaşam tərzindən asılı olmayaraq əxlaqlıdır. Əxlaq, öz prinsiplərinə və qərəzinə görə soldışa güllə verməkdən imtina edən kənd sakinlərində deyil, özünə qarşı bütün növ mənfi münasibətlərə rəğmən onları bağışlayıb xəcalətdən xilas etməyə çalışan qırmızı paltarlı qadındadır.

Film boyunca gəlini görmürük. Rejissor Natiq Rəsul sanki gəlinin üzünə pərdə çəkir. Pərdəsi ixtilaflara, dava-qırğınlara, qınaqlara, təhqirlərə, ölümlərə səbəb olan gəlini tamaşaçıdan gizlədir. Sonda ikinci güllə ilə özünü öldürən məchul qəhrəmanı əbədi bir pərdənin arxasına göndərib onun bir insan kimi varlığı ilə yoxluğu arasında heç bir fərq qoymur.

Bu məqam cəmiyyətin qadına münasibətinin ustalıqla təsviri deyilmi? Könül istərdi ki, ikinci güllənin səsi daha yüksək, daha dəhşətli eşidilsin. Bəlkə də rejissor bununla hindsayağı pafosdan qaçmağa çalışıb. Hər halda, böyük iş üçün kiçik iradların əhəmiyyəti yoxdur.

Son illər çəkilən "Pərdə" filmi başda olmaqla bir neçə dram filmləri var ki, saysız-hesabsız bayağı komediya filmlərinin fonunda xüsusi diqqət çəkir. "Pərdə" filminin ardınca "İkinci güllə" filmi bakirəlik pərdəsi mövzusunda çəkilmiş ikinci müasir Azərbaycan filmidir və elə məzmunu ilə də cəmiyyət üçün tabuya çevrilmiş bakirəlik pərdəsinə açılan ikinci güllədir.

İtalyan əsilli Amerika rejissoru Frank Kapra deyirdi ki, "mən aktyor ağladığında dram filmi yarandığını düşünürdüm, amma tamaşaçı ağladığında dram filmi yaranırmış". "İkinci güllə" filmi bir tamaşaçı kimi məni ağlada bildi. On səkkiz dəqiqə boyunca öz həyatına tikanlı məftillərdən sərhəd çəkən cəmiyyətin yaşayışına və aqibətinə göz yaşı tökdüm. Bu bir xalq kimi faciəmizdir, lakin bir yaradıcı kimi filmin rejissoru və ssenari müəllifi Natiq Rəsulun, ikinci rejissoru və prodüsseri Emin Quliyevin, aktyor və aktrisaların, eləcə də heyətin digər üzvlərinin uğurudur.

925
Teqlər:
Natiq Rəsul, soldış, sağdış, bakirə, "İkinci güllə" filmi, fahişə, tamaşaçı, bəy, güllə, gəlin, aktrisa, rejissor, toy, aktyor, Azərbaycan, silah
Əlaqədar
Bakıda gəlin bir günlük Hürrəm Sultan oldu
Gəlin və baldız eyni gündə yoxa çıxıb
Bu məsələdə kim haqlıdır, gəlin, yoxsa qaynana?
Toy günü gəlin suda boğuldu
17 yaşlı gəlin toy gecəsi öldürüldü
Əməkdar artist Nailə İslamzadə

Nailə İslamzadə: "Televiziyaya baxmıram, heç bir aparıcını bəyənmirəm" fikri dəyişməlidir

150
(Yenilənib 14:53 26.09.2020)
Nailə İslamzadə:  "O qədər açıqlamalara baxmayaraq, hələ də məni Akif İslamzadənin həyat yoldaşı bilirlər"

Şahpəri Abbasova, Sputnik Azərbaycan

BAKI, 26 sentyabr — Sputnik. O, düz 37 əvvəl "Saat 10-da Moskvadan "Zəngli saat", saat 11:30-da isə "Sovet İttifaqına xidmət edirəm" proqramı translyasiya ediləcək" sözləri ilə ilk dəfə efirə çıxdı. Diktoru olduğu "Xəbərlər" informasiya proqramı, apaıcısı olduğu "Ailələr, talelər" verilişi  və bir çox tədbirlərlə tamaşaçıların doğma insanına çevrilib. Söhbət, nümunəvi diksiyası və zahiri gözəlliyi ilə insanların qəlbini fəht edən əməkdar artist Nailə İslamzadədən gedir.

İllərin sevimli aparıcısı özü və sənət fəaliyyəti ilə bağlı bir sıra məqamları Sputnik Azərbaycan-la bölüşüb: "37 il əvvəl müsabiqə bitdi. Mənə dedilər ki, efirə çıxmalısan. 1982-ci ildə müsabiqə oldu, 1983-cü ilin fevralın 19-da efirə çıxdım. Biz o dövrdə həm rus, həm də öz dilimizdə danışırdıq. İlk dediyim sözlər indiyə qədər yadımdadır: "Saat 10-da Moskvadan "Zəngli saat", saat 11:30-da isə "Sovet İttifaqına xidmət edirəm" proqramı translyasiya ediləcək". Çünki, Moskvadan onu translyasiya edirdik. Bakı televiziyası Moskvaya qoşulurdu. Və eyni sözləri rusca da dedim. Bu 4 cümlə mənim ilk dəfə efirdə səsləndirdiyim söz idi. Hamı "pult"da dayanmışdı. Sözləri deyəndən sonra rəhmətlik Rafiq Hüseynov dedi ki, "Nailə, artıq səni bütün Azərbaycan tanıdı".

Nailə xanım Rus dili və Ədəbiyyatı İnstitutunda (indiki Bakı Slavyan Universiteti) təhsil alıb. Onun arzusu univeristeti bitirib, doğulduğu Balakən rayonuna qayıtmaq, orada müəllim kimi fəaliyyət göstərmək olub. Amma necə deyərlər, sən saydığını say, gör fələk nə sayır: "Özümü qətiyyən bu sənətdə təsəvvür etmirdim. Əksinə, mən müəllim olmağı daha çox arzulayırdım. Rus dili və ədəbiyyatı üzrə təhsil almışdım. Uşaqlıqda qonşu uşaqlarını başıma toplayıb onlara dərs keçirdim. Qətiyyən aparıcı olmaq ağlımdan keçməyib".

Qəhramanımız 37 illik televiziya fəaliyyəti dövründə ən həyəcanlı gününü belə xatırlayır: "O dövrdə Aztv dövlət tədbirlərindən canlı yayım edirdi. Yaddaşım güclüdür, heç vaxt sözləri unutmamışam. Unudanda o sözün alternativini tapıb deyirdim. Amma bir dəfə səhnədə səndələmişdim. Onda bir anlıq sözləri unutmuşdum. 1984-cü il idi, Televiziyanın bayramı idi. O vaxt may ayında keçirilirdi, Moskva ilə birlikdə Televiziya və radio günü mayın 7-i keçirilirdi. Tədbir Milli dram teatrında (Akademik Milli Dram Teatrı) idi. Təsəvvür edin, tədbirdə Mərkəzi Komitənin kuratorları, tanınmış insanlar əyləşib. Səhnədə də Xalq çalğı alətlərinin orksetrı Radio marşını çalırdı. Rəhmətlik Davud Əhmədovla mən səhnəyə çıxmalıyıq. Ağ paltar da geyinmişdim. Səhnəyə çıxanda ayağım naqillərə ilişdi, səndələdim. Davud müəllim arxadan "Nailə" deyib tutdu, sanki səhnə göstərirmişik kimi çıxdıq səhnəyə. Xeyli də sözüm var idi. Bütün sözlər yadımdan çıxdı. Dedim "Ay Allah, mən nə deyim camaata?" Hər kəs də mənə baxır. Hamı da gülür. Əlimdə də heç bir kağız yox. Həmin vaxt Davud müəllim pafoslu səsi ilə "Axşamınız xeyir" dedi və öz sözlərini səsləndirdi. Bir də gördüm, öz-özümə deyirəm bütün sözləri. Cəsarətlə deyə bilərəm ki, məndən əvvəl kağızsız çıxan aparıcı olmayıb. Bəlkə də sonralar olub, bilmirəm".

Ziyalı ailəsində doğulan İslamzadə hər dəfə efirə çıxanda ekranın o başında oturan tamaşçısını düşünüb:

"Hər dəfə kamera qarşısına çıxanda düşünürəm ki, mənə milyonlarla insan baxır. Mənə yaşlı insanlar, savadlı insanlar baxır. Tutaq ki, hansısa ucqar kənddə yaşlı bir insan öz nəvəsi ilə baxır. Uyğunsuz hərəkət etsəm, uyğunsuz danışsam, o, nəvəsinin yanında özünü necə hiss edəcək? Mən hər cümləmə diqqət etməliyəm. Yaxud, bir professor baxır, deməz ki, "bu savadsız kimdir?" Bunu düşünüb kamera önünə gəlirsən".

O dövrün insanları üçün televiziyaya baxmaq ən sevimli məşğuliyyət idi. Televiziya ekranlarında gördükləri insanlara qarşı xüsusi rəğbət, maraq var idi. Son illər isə bunun əksi ilə qarşılaşırıq. Bunun səbəbi nədir? Nailə xanım səbəbi belə izah edir: "Ola bilsin ki, kanalların azlığından irəli gəlirdi. Bilirsiz, o dövrdə akademiklik var idi. Daha böyük sənət var idi. Bayağılıq yox idi. Deyirlər senzura lazım deyil. Fikrimcə, lazımdır. O dövrdə bədii şuralar var idi. Nəyi gəldi efirə buraxmırdılar. Məsələn, bir gün Eldar Mansurov haqqında veriliş hazırlayırdıq. O verilişə hazırlaşanda söhbət arası qeyd olundu ki, tutalım, bir musiqini Flora Kərimova, Yalçın Rzazadə oxumalıdır. Onlar gedirdilər bədii şuranın qarşısında canlı olaraq oxuyurdular. Bəstəkar çalırdı, müğənni oxuyurdu. Ondan sonra mahnı efirə verilirdi. Bayağılıq yox idi deyə insanlar zövq alırdılar. İndi o bayağılığa necə baxsınlar? Özünə hörmət edən insanlar çoxdur. İnanın ki, o, televiziyaya çıxan bayağı insanlardan daha savadlı və zövqlüdür. İndi tamaşaçılar daha zövqlü, daha səviyyəlidirlər. Ona görə də baxmırlar. Biz jurnalistlərin də borcudur ki, tamaşaçını daha yüksək səviyyəyə qaldıraq".

""Youtube"da milyonlarla baxış yığan mahnılar var. Qoy orada olsun. Amma tamaşaçı bilsin ki, bu, oradarır. Efirə çıxmır. Niyə çıxmır? Çünki, səviyyə o səviyyə deyil. Tamaşaçı onda fərqi tutacaq. Qulaq asmaq istəyirsə, getsin orada qulaq assın. Amma bu, o demək deyil ki, "Youtube"da olanların səviyyəsi aşağıdır. Sizə deyim, indi özünə hörmət edən, savadlı blogerlər də var" - deyə N. İslamzadə əlavə edib.

"O illərin xiffətini çəkirsinizmi?" sualına aparıcının cavabı belə olub:

"Bəli, o illərin xiffətini çəkirəm. Yaxşı ki, "Ötən illər" verilişi var. Ondan o qədər mənəvi olaraq zövq alıram ki. Çünki onların danışdığı hadisələrin əksəriyyətinin içində mən də olmuşam. O akademiklik, əsillik, zadəganlıq indi yoxdur. Onlar üçün darıxıram. Amma indi də yaxşılar var. Venesiya film festivalında həmyerlimiz Hilal Baydarovun filmi iştirak etdi. Çox istedadlı insanlar meydana çıxır. Artıq bayağıları yığışdırmaq prosesi gedir. Bir az ləng getsə də, gedir. İnşallah, bir müddət sonra tamamilə yığışar".

Məlumdur ki, Azərbaycan televiziyasında ilk dəfə sosial yönümlü verilişin yaradıcısı Nailə İslamzadə olub. Görəsən, Nailə xanım öz xələflərindən nə dərəcədə razıdır?

"Özüm sosial yönümlü verilişlərdə qonaq kimi iştirak etsəm də, çox az-az o verilişlərə baxıram. Vaxtımın azlığından artıq bir ildən artıqdır ki, o verilişlərə qonaq qismində də qatıla bilmirəm. Bu verilişlər əsasən evdə oturanlar üçündür. Orada qoyulan mövzular, qaldırlan problemlər cəmiyyətin bütün üzvləri üçün maraqlı gəlmir. O, daha çox evdar xanımları maraqlandırır. Bu, dünyada da belədir. Həmin verilişlər gündüz saatlarında getməlidir. O ki qaldı mənfi və müsbət tərəflərinə, həm müsbəti, həm də mənfisi var. Bəzən verilişdə tamaşaçıya və verilişin iştirakçısına hörmət qoyulmayanda, mənim xoşuma gəlmir. Müsbət tərəfi də budur ki, məsələn, Atv kanalında yayımlanan Zaur Baxşəliyevin proqramında çox insana dəstək olunur. Orada bir imkansız ailənin uşağına edilən kömək hər şeyə dəyər".

Nailə xanım əlavə edib ki, artıq "mən televiziyaya baxmıram, heç bir aparıcını bəyənmirəm" fikri dəyişməlidir: "Təbii ki, tamaşaçı daha akademik veriliş istəyir. Çox sadəliyə, adiliyə getməyi xoşlamır. Müasir televiziyaların çox peşəkar aparıcıları var. Sadəcə olaraq elə verilişlər var ki, tamaşaçılarda onlara qarşı qıcıq yaranır. Onlar da zamanla yerinə oturacaq. Məsələn, çalışdığım İctimai Televiziyada nə bayağı veriliş, nə də bayağı danışan aparıcı görə bilərsiniz. Aztv-də də belədir. Digər tv-lərdə də yaxşılar var. İctimai televiziya tamaşaçıları yenidən sevdirdi. Özüm orada çalışıram deyə demirəm. Balakişi Qasımov gələndən sonra sözügedən kanal köklü sürətdə dəyişdi, tamaşaçı və efir münasibətləri yeni müstəviyə qalxdı. Oradan tamaşaçıya hörmət yağır. Yoldaşım bəzən televiziyaya baxanda, "mən niyə buna baxmalıyam ki?" deyib kanalı dəyişir. Deyir, mənim intellektual səviyyəm ondan artıqdır, o niyə özünü ağıllı hesab edir ki?"

İllərdir tamaşaçı sevgisini itirməyən aparıcı deyir ki, heç vaxt gündəmdə qalmaq barədə düşünməyib: "Gündəm sözü nədir, bilmirəm. Düşünmürəm də. Siz öz redaksiyanıza necə gedirsinizsə, mən də televiziyaya elə getmişəm. Oranı bir iş yeri olaraq görmüşəm. Yəni, populyar olmaq, tanınmaq barədə düşünməmişəm. O, öz-özünə yaranır. Başımı aşağı salıb işimlə məşğul olmuşam. Unudulmaq barədə düşünməmişəm. 2006-cı ildə televiziyadan getdim, 2019-cu ildə qayıtdım. 13 ildə yada düşmək üçün heç nə etmədim, amma tamaşaçı unutmadı. Heç verilişlərə də çıxmırdım. Bilirsiniz ki, müsahibə verməklə də aram yoxdur. Unudulmadım, çox sağ olsunlar. İndi də "Ailələr, talelər" verilişi barədə danışırlar".

25 il dövlət televiziyasında çalışan həmsöhbətimiz ona doğma olan məkandan ayrılma səbəbindən də danışıb: "AzTV-dən ayrılmaq qərarına gəlmədim, bu qərarı qəbul etmək məcburiyyətində qaldım. 25 il çalışdığım, bütün gücümü, bacarığımı sərf etdiyim işdən, təbii ki, digər həmkarlarım kimi, mən də istəməzdim. Amma, düşünürəm ki, insana işi ilə yanaşı, çalışdığı mühit də vacibdir. 13 il idi televiziyanın həyətinə ayaq basmırdım Azərbaycan Televiziya və Radio Verilişləri Qapalı Səhmdar Cəmiyyətinin sədri Rövşən Məmmədova təşəkkür edirəm ki, bizi dəvət elədi. Çünki, bizim nəsil və bizdən əvvəlki nəsil, illərdir televiziyanın həyətinə ayaq basmırdılar. Çox həyəcanlı idik. Sanki illər əvvəl görmədiyimiz doğmamızı görürdük. Təkliflər oldu, amma qismət İctimai televiziya imiş".

Посмотреть эту публикацию в Instagram

Публикация от Naile (@naileislamzade)

nailə xanım hesab edir ki, son vaxtlar Aztv-də müasir verilişlər hazırlanır, yaxşı verilişlər də var. Amma Aztv öz akademikliyini qoruyub saxlamalıdır. Digər özəl kanallara oxşamamalıdır.

"On üç il ərzində multimedia mərkəzinin rəhbəri idim. Orada da özümü rahat hiss edirdim. Rahat olmadığım ortamdan, insanlardan qaçıram. Elə yerdən heç nə demədən gedirəm", - deyə həmsöhbətimiz bildirib. 

Nailə xanım film təklifləri də alıb:

"Televiziyaya təzə gələndə, bizə çox böyük maraq var idi. Bizi filmlərə çəkmək istəyirdilər. Senarilər göndərirdilər. Hətta sınaq çəkilişlərinə də çağırmışdılar. Rafiq Hüseynov dedi ki, "ya diktor olacaqsız, ya da aktrisa, seçin". Təbii ki, biz diktor kimi işə başlamışdıq, elə də davam etdik. Ondan sonra uzun müddət belə təkliflər olmadı. Bir dəfə Fərman Kərimzadə və Əbdül müəllimlə söhbət düşmüşdü. "Natəvan" filmini çəkmək istəyirdilər. Çox sevindim, çox xoşum gəlmişdi, amma filmin çəkilişi alınmadı. 2013-cü ildə Vaqif Mustafayev "Tək olanda qorxma" serialına dəvət elədi. Orada milli qəhramanın həyat yoldaşını oynayırdım. Tərəf müqabilim Türkiyədən dəvət olunmuş aktyor Levent Taşçı idi. Birinci seriada milli qəhrəman və həyat yoldaşı qəzaya düşür və ölür. Baxdım ki, ciddi bir ssenaridir, qəbul etdim. Ondan sonra bir dəfə təklif olundu, diqqətimi cəlb eləmədi".

Nailə xanım uzun ömürlü ailə sirrini fədakarlıqda görür: "Yoldaşım məni televiziyadan görüb bəyənib. Xalq artisti Ağakişi Kazımovla gəlmişdi. Məni Rafiq Hüseynov otağa çağırdı. Otağa girəndə gördüm 2 nəfər oturub. Ordan-burdan söhbət elədilər. Heç bilmədim məni niyə çağırıblar. Sən demə, qız görməyə gəliblərmiş. Ondan sonra Rafiq müəllim dedi ki, sənə görə gəlmişdilər. Müəyyən kriteriyalarımız uyğun gəldi, ailə qurduq. Ailəni qoruyub saxlamaq üçün fədakar olmaq lazımdır. Necə ki, bacı-qardaşınla sözün tərs gəlir, müəyyən müddət küsürsən və sonra barışırsansa, həyat yoldaşınla da elə olmalıdır. Güzəştə getmək lazmdır. Əgər güzəşt edə bilmirsənsə, onda ayrılın. Bəzən deyirlər "filankəs necə xoşbəxtdir, ailəsi var, uşağı var". Amma anlamırlar ki, onlar müəyyən çətinliklərlə gəlib ailə ola bilirlər. Həmişə ailədə hər iki tərəf fədakar olmur, yalnız bir təfər fədakar olur. Bizim ailəmizdə də fədakar mən olmuşam. Fədakarlıq edəndə də başına qaxınc etmək olmaz. Eləmisən eləmisən də".

Посмотреть эту публикацию в Instagram

Публикация от Naile (@naileislamzade)

Dəfələrlə açıqlama verdiyinə baxmayaraq, hələ də Nailə xanımı müğənni Akif İslamzadənin həyat yoldaşı sanırlar. Özü bu anlaşılmazlığın səbəbinə belə aydınlıq gətirib: "Akif müəllimin də yoldaşının adı Nailə idi, onların da bir oğlu vardı deyə, qarışdırırdılar. Amma indi səngiyib. Sosial şəbəkələrdə kimsə bu barədə soruşanda, istifadəçilər özləri dəqiqləşmə aparırlar".

"Ailədəki Nailə İslamzadə ilə ekranlarda gördüyünüz Nailə İslamzadə arasında fərq varmı?" deyə soruşduq. Cavabında dedi ki, heç bir fərq yoxdur: "Mən hansı situasiyaya düşsəm də, dəyişmirəm. Bayaqdan sizinlə necə danışıb-gülürəmsə, oturuşum-duruşum necədirsə, evdə də, işdə də beləyəm. Heç nə dəyişmir. Məndə kütləyə qarşı da heç bir kompleks yoxdur. Hər gün bulvarda yeriyirəm. Niyə də kompleks keçirim? Oturmuşuq, sizinlə söhbət edirik, sizinlə mənim aramda hansı fərq var? Hamımız eyni adamlarıq".

Müsahibimiz düşünür ki, gənc nəsillə hesablaşmaq lazımdır: "Yeniliklərə açığam. Amma ənənələrə üstünlük vermək şərti ilə. Yeni nəsillə söhbətim alınır, bu gələcəyə açılan pəncərədir. Onlarla hesablaşmaq lazımdır. Mən həmişə oğlumla hesablaşıram. Bilmədiyim şeyləri ondan öyrənirəm. Amma onun da bilmədiyi şeylər var ki, mənim bilgimə ehtiyacı var. Biz yeni nəsillə alış-veriş etməyi bacarmalıyıq. Mən çalışıram yeni gələn nəsilə kömək edim. Heç kimin paxıllığını çəkmirəm. Bəzən gözəl bir qadın, uğurlu bir insan görəndə üzlərini çevirir, saymazlıq edirlər. Amma əksinə etmək lazımdı. Baxmaq lazımdır ki, görəsən bu qadın niyə bu qədər uğurludur? Niyə buna baxdılar, niyə təriflədilər? O müsbət cəhətləri götürmək lazımdır".

Посмотреть эту публикацию в Instagram

Публикация от Naile (@naileislamzade)

Aparıcı illərə meydan oxuyan gözəlliyinin sirrini açıqladı: "Özüm özümün dietoloquyam. Biz nə yeyiriksə, ondan ibarətik. Yediyimiz qidaların dərimizin gözəlliyinə, insanın formasına çox böyük təsiri var. İdmanın və yeməyin vücudumuza təsiri böyükdür. Bunlar şərtdir. Amma sizi əmin edim ki, dərinin gözəlliyi, insanın vücudunun gözəlliyi ilə iş bitmir. Əgər insanın daxilində nur, işıq yoxdursa, əgər qadında xanımlıq yoxdursa, özünü təqdim etməyi bacarmırsa, inanın o gözəllik görünməyəcək. İnsanın gözündəki məna onun xasiyyətindən irəli gəlir. İnsanın içində saflıq yoxdursa, o gözəl olmayacaq. Daxilən gözəl olmasa, onun xarici gözəlliyinin heç bir əhəmiyyəti olmayacaq. Gözəllik faktorunun da rolu var təbii ki. Mənim boy-buxunum ana-atamdan keçib. Anam bəy qızı olub. Ola bilsin ki, əsillik oradan keçib. Xanım-xatın olmayan qadın gözəl ola bilməz. Yüksəkdən danışan, hər şeyə əsəbləşən, yeriyəndə addımlarına diqqət etməyən qadın gözəl ola bilməz, kosmetikanın bütün yeniliklərindən istifadə etsə belə. Xanımlıq həyat tərzi olmalıdır. Qadın cavanlığından özünə baxmalıdır ki, sonra da radikal dəyişikliyə ehtiyac olmasın".

"Mənim heç vaxt stilistim olmayıb. Həmişə geyimlərimi özüm seçmişəm, makiyajı özüm etmişəm. Hansısa stilistlə, vizajistlə işləməmişəm. İndinin özündə də makiyajımı özüm edirəm, geyimlərimi özüm seçirəm. Efirə də öz geyimlərimlə çıxıram", - deyə aparıcı əlavə edib.

Nailə İslamzadə son günlər  ictimaiyyət arasında geniş müzakirələrə səbəb olan fotosessiyası barədə də danışıb: "Bir müddət öncə fotosessiya etdirdim. Orada fotoqraf müxtəlif rakurslardan fotolarımı çəkdi. Tamaşaçılar elə bildilər ki, mən dəyişmişəm. Amma dəyişməmişəm, həmin Nailəyəm. Mən onu öz səhifəmiz üçün etmişdim. Müsbət də yazanlar oldu. Amma yeni tərzdə Nailə İslamzadəni qəbul etmirlər".

 

150
Hüseyn Həsənov, arxiv şəkli

Bloger Hüseyn Həsənov yeni şousunu gizli saxlayır - deyirlər, qız axtaracaq

226
(Yenilənib 00:26 26.09.2020)
Məşhur şounun tamaşaçıları əmindirlər ki, verilişin növbəti “Subay”ı populyar bloger Hüseyn Həsənov olacaq.

BAKI, 26 sentyabr — Sputnik, Kəmalə Əliyeva. Rusiyanın məşhur Azərbaycan əsilli blogeri Hüseyn Həsənov “Subay” ("Холостяк") realiti-şousunun növbəti qəhrəmanı ola biləcəyinə eyham vurub.

Sputnik Azərbaycan bildirir ki, sosial şəbəkədəki heasabında bloger televiziya şousunda iştirak edəcəyi barədə videoçarx paylaşıb. O, proqramın adını çəkməsə də “Subay” şousunun diqqətli izləyiciləri bu çarxın məhz həmin verilişin reklamını xatırlatdığını deyiblər.   

Qeyd edək ki, sentyabrın əvvəlində ТНТ telekanalı “Subay” şousunun səkkizinci mövsümü üçün kastinq elan etmişdi.

Посмотреть эту публикацию в Instagram

🤫🌹 лайкну всех, кто НЕ угадает, что за шоу 👇🏾

Публикация от ГУСЕЙН ГАСАНОВ (@gusein.gasanov)

“Subay” – romantik realiti-şoudur. 25 iştirakçı qızla yaxından tanış olmaq üçün əsas qəhrəman onlara görüş təyin edir. Layihənin qaydalarına görə, hər epizoddan sonra qızların sayı azalır – Qızılgül mərasimində Subay məhz tanışlığı davam etdirmək istədiyi qızlara gül verir. Finalda bir neçə qız qalır, əvvəlcə Subay onların valideynləri ilə, onlar isə Subayın valideynləri ilə görüşürlər. Son epizodda Subay yalnız bir qızı seçərək fikrinin ciddi olduğunu bildirmək üçün üzük hədiyyə edə bilər.

Hüseyn Həsənov Sankt-Peterburqda doğulub, böyüyüb. Onun 25 yaşı var. O, öz çarxlarında əsasən ağrılı mövzulara toxunur və onlara bir qədər yumor əlavə edir. Onun qısa videoçarxlarının qəhrəmanları əsasən rusiyalı və xarici modellər olur. O, həmçinin rusiyalı müğənnilərin kliplərində çəkilir, film və seriallara çəkilməkdən də imtina etmir. Aktyorluq fəaliyyəti ilə yanaşı, Həsənov geyimlərin dizaynı ilə də məşğul olur və onun hətta öz şəxsi kostyum kolleksiyası mövcuddur. Hazırda sosial şəbəkələrdə onun 14.4 milyon izləyicisi var.

226
Teqlər:
Instagram, televiziya, Холостяк realiti-şousu, Rusiya, Hüseyn Həsənov, bloger
Əlaqədar
Məşhur rusiyalı bloger azərbaycanlı vəkili niyə məhkəməyə verib?
Vətənimin seyrinə çağırıram elləri - Onun sayəsində dünya ölkəmizin gözəlliklərini tanıyır
Azərbaycanlı bloger rus müğənni Yeqor Kridlə sevgili olmasına aydınlıq gətirib
Bir dəfə görmək daha yaxşıdır: qırğız bloger Azərbaycanı ziyarət etmək istəyir
Hüseyn Həsənov yeni avtomobilinə külli miqdarda pul xərcləyib
Toyuq əti, arxiv şəkli

Quş əti sağlamlıq üçün çox yararlıdır - Mütəxəssis rəyi

0
(Yenilənib 14:48 26.09.2020)
Quş əti insan orqanizmi üçün vitamin kompleksi mənbəyidir. Tərkibi A, D, E və B qrupu vitaminləri (B1,  B2,  B3, B4, B5, B6,  B9), həmçinin biotinlə (vitamin H) zəngindir.

BAKI, 26 sentyabr — Sputnik. Azərbaycan Qida Təhlükəsizliyi İnstitutunun  Elmi-tədqiqat və risklərin qiymətləndirilməsi departamentinin Heyvan sağlamlığı şöbəsinin mütəxəssisləri Q. Cəlladov, R. Səfərova, K. Əliyeva, R. Kəngərli, F. Əlizadə tərəfindən quş ətinin faydaları haqda məqalə hazırlanıb. Sputnik Azərbaycan mütəxəssislər tərəfindən hazırlanan məqaləni təqdim edir:

Zülalların (proteinlər) miqdarı qaz ətində 15 %, ördək ətində 17 %, toyuq ətində  20-22 %, hinduşka ətində 24 %, ov quşlarının ətində 22-25 % olduqda tam dəyərli sayılır. Belə ki, sadə proteinlərin (miogen, mioalbumin, mioqlobin və b.) tərkibində əksər aminturşularına, o cümlədən orqanizm üçün əvəzolunmaz aminturşularına (92 %-ə qədər) rast gəlinir. Tərkibində triptofanın çox olması səbəbindən quş ətinin istehlakı zamanı orqanizmdə serotonin hormonunun (“sevinc hormonu”) miqdarı artır. Beyin hüceyrələrində sintez olunan serotonin əhval-ruhiyyəni yüksəldir, stressi aradan qaldırır və orqanizmdə rahatlıq hissi yaradır. Qlutamin turşusunun çox olması isə quş ətinə spesifik dad və qoxu verir. Həmçinin quş ətinin bioloji dəyərliliyi triptofan/oksiprolin və zülal/yağ nisbəti ilə qiymətləndirilir ki, keyfiyyətli quş əti üçün bu rəqəmlər müvafiq olaraq 5-7 və 2-3 arasında dəyişir. Mal ətinə nisbətən quş ətində lizinin miqdarı 3 dəfəyə qədər üstünlük təşkil edir. Quş ətinin tərkibində azdəyərli hesab olunan birləşdirici toxuma zülallarının (elastin, kollagen və s.) miqdarı 1,5 %-ə çatır.

Yağların (lipidlərin) miqdarı broyler toyuğunun ətində 12 %, qaz ətində 38 %, ördək ətində 39 %-ə qədər təşkil edir. Onların da çox hissəsi dəri və dərialtı toxumada, həmçinin daxili orqanların ətrafında toplanır. Ov quşlarının ətində isə yağların miqdarı az (1-3 %) olur. Əzələ toxumasında yağların əzələ lifləri arasında bərabər şəkildə paylanması quş ətinin yumşaq konsistensiyalı, dadlı və aromatlı olmasını təmin edir. Bu səbəbdən də mal ətindən fərqli olaraq quş əti “mərmər” görünüşə malik deyil. Quş ətində olan yağlar 41 %-ə qədər triqliserollar (neytral yağlar) və 38 %-ə qədər lipoidlərdən (fosfolipidlər, sterollar və s.) ibarətdir. Tərkibində 69-73 %-ə qədər doymamış ali yağ turşuları vardır. 18-22 növ ali yağ turşusuna malik quş ətinin yağları əvəzolunmaz polidoymamış turşularla (olein, linol, linolen, araxidon və b.) zəngin olduğundan aşağı temperaturda (23-35o  C ) əriyir. Odur ki, həmin yağların 80-98 %-i insan orqanizmi tərəfindən mənimsənilir. Bu yağların tərkibində doymuş turşulardan palmitin və stearin turşuları isə üstünlük təşkil edir.

Quş ətində mineral maddələrin miqdarı 0,5-1,2 % təşkil edir. Tərkibi Na, K, Ca, Mg, P, Fe, Cu, Zn, Se, J, S, Mn, o cümlədən digər makro və  mikroelementlərdən ibarətdir.

Azotlu və azotsuz ekstraktiv maddələrin (karnitin, karnozin, kreatin, kreatinin, qlikogen, süd turşusu, sərbəst aminturşuları, adenozinfosfatlar və b.) miqdarına görə quş əti mal ətini üstələyir. Onların da çox hissəsi döş ətində toplanır. Bildiyimiz kimi, bu maddələr fermentlərin təsiri ilə ətin “yetişməsi” prosesini (avtoliz) tənzimləyir. Quş ətində digər heyvan ətlərindən fərqli olaraq purin əsaslarının miqdarı az olur. Tərkibindəki qida maddələrinin, xüsusilə yağ və zülalların miqdarından asılı olaraq quş ətinin enerji dəyəri dəyişkən olur (100 qr-da 120-350 kkal).

Quş əti insan orqanizmi üçün vitamin kompleksi mənbəyidir. Tərkibi A, D, E və B qrupu vitaminləri (B1,  B2,  B3, B4, B5, B6,  B9), həmçinin biotinlə (vitamin H) zəngindir.

Broyler toyuqlarının  inkişafının 8-10 həftəlik dövründə əzələ toxumasında zülalların, daha sonra isə digər maddələrin, xüsusilə də yağların toplanması prosesi gedir. Odur ki, quşçuluq təsərrüfatlarında broyler toyuqlarının optimal yetişdirilmə dövrü 35-45 gün ərzində başa çatdırılmaqla, istehsal olunan quş əti məhsulu biokimyəvi xüsusiyyətlərinə görə keyfiyyətli və diyetik hesab olunur. Quş ətinin tərkibində karbohidratlar əsasən “əzələ şəkəri” adlanan qlikogen şəklində təmsil olunur ki, bu da onun diabet xəstələri tərəfindən təhlükəsiz istehlakı üçün zəmin yaradır.

Quş ətinin rəngi tərkibindəki zülal-yağ nisbətindən asılı olaraq ağ-çəhrayı, sarımtıl və ya tünd qırmızı çalarlı ola bilər. Müxtəlif nahiyələrdə ətin rəngi fərqli olur. Məsələn, toyuq və hinduşkalarda döş əti ağ-çəhrayı rəngdə, qanad və bud əti isə nisbətən tünd çəhrayı və ya tünd qırmızı çalarlı olur. Quş ətinin açıq rəngdə olması onun tərkibində zülal və ekstraktiv maddələrin çox, yağların isə az olmasının göstəricisidir.

Ov quşlarının əti qırmızı-qəhvəyi çalarlı, həmçinin balıq və ya qətran qoxulu olur. Yağların miqdarı ov quşlarının ətində az olsa da, zülalların miqdarı çoxluq təşkil edir (22-25 %).

Quş ətinin tərkibindəki birləşdirici toxuma zərif əzələ liflərindən təşkil olunduğuna görə insan orqanizmi tərəfindən asan (80 % -ə qədər) həzm olunur. Qeyd edək ki, yaşlı quşların əzələ toxuması cavanlara, ov quşlarının əzələ toxuması isə ev quşlarına nisbətən sərt olur.

Quş əti qida maddələri ilə zəngin olduğundan mikroorqanizmlərin inkişafı üçün əlverişli mühit hesab edilir. Xüsusilə də sanitar-gigiyenik tələblərə uyğun olmayan şəraitdə saxlandıqda patogen mikroorqanizmlər, o cümlədən bakteriya və viruslar intensiv inkişaf edir. Bu da insan sağlamlığı üçün təhlükəli infeksiya və toksikozların baş verməsinə səbəb olur. Qeyd edək ki, təzə kəsilmiş quş cəmdəyinin dərisinin rəngi ağ-sarımtıl, səthi quru, konsistensiyası elastiki, qoxusu növündən asılı olaraq spesifik olur. Təzə kəsilmiş quş cəmdəyi soyuducuda 0-4o C temperaturda 72 saat, -18o C temperaturda isə 8-10 ay müddətində saxlanıla bilər.

Quş ətinin orqanizm üçün faydası kifayət qədərdir:

•       diyetikdir (ördək və qaz əti istisna olmaqla);

•       tərkibi asan mənimsənilən qida maddələri və bioloji aktiv maddələrlə (əvəzolunmaz aminturşuları, essensial yağ turşuları və s.) zəngindir;

•       tərkibində triptofan çox olduğundan istehlakı zamanı orqanizmə rahatlıq verir;

•       doymamış yağ turşuları ilə (olein, linol, araxidon və s.) zəngin olduğundan orqanizmdən zərərli xolesterolu kənarlaşdırmaqla, atereskleroz və hipertoniyanın qarşısını alır;

•       mədə-bağırsaq xəstəliklərinin müalicəsində dərman vasitələri qədər faydalıdır;

•       tərkibində asan mənimsənilən dəmirin çox olması qanazlığı və qan dövranı pozğunluqlarının bərpası proseslərini sürətləndirir;

•       diabet xəstələrində maddələr mübadiləsinə tənzimləyici təsir göstərir;

•       immun sistemini möhkəmləndirir;

•       soyuqdəymə və respirator xəstəliklərin müalicəsində istifadə olunur.

0