Anastasiya Tostova

Bakının ilk qız diceyi: "Toylar gecə klublarından daha təhlükəlidir"

539
(Yenilənib 10:09 08.01.2018)
Azərbaycanın yeganə qız diceyi öz peşəsinin çətinliklərini anladıb və bu işlə məşğul olmaq istəyən azərbaycanlılara tövsiyələrini verib

Kəmalə Əliyeva, Sputnik Azərbaycan

BAKI, 7 yanvar — Sputnik. Yaxın zamanlarda Azərbaycanda diceylərin növbəti müsabiqəsi keçiriləcək. Orada respublikamızın ilk qız diceyi, səhnədə "Stasy" adı ilə məşhur olan Anastasiya Tostova da iştirak edəcək. O, Sputnik Azərbaycan-a müsahibəsində özü və fəaliyyəti barədə ətraflı danışıb.

— Anastasiya, siz Azərbaycanın ilk qız diceyisiniz. Bu peşəyə necə gəlmisiniz?

— Uşaqlıqdan musiqiyə böyük həvəsim vardı və həmişə səhnədə çıxış etməyi arzulayırdım. Ona görə də məktəbdə keçirilən bütün tədbirlərdə, konsertlərdə iştirak edirdim. Musiqi həyatımın ayrılmaz hissəsidir. O, mənim üçün həmişə — səhər, günorta, axşam səslənir.

Heç vaxt yeknəsəq və monoton işi sevməmişəm. Mənə elə gəlir ki, əgər işim bu qədər pozitiv, enerjili, insanlarla təmaslı şəkildə olmasaydı, dəli olardım. Diceylik çox maraqlı peşədir. Həmçinin həyat üçün böyük təcrübədir. Çünki hər gün yeni insanlar tanıyırsan, daim yeni musiqiləri bilirsən və hamı düşünür ki, sən "Shazam" musiqili proqramısan.

 Bəs ailəniz sizin seçiminizə necə yanaşdı?

— Ailəm həmişə mənim bütün ilk addımlarımı dəstəkləyib. Mən diceyliyə gələndə hamının gözləri dörd olmuşdu, amma bütün bunlar tezliklə arxa plana keçdi. Valideynlərim də başa düşdülər ki, bu, məndə alınır və ən əsası mən bu işdən böyük zövq alıram, yaxşı qazanıram. Bunlar isə istənilən peşə üçün vacibdir.

 Heç seçiminizdən şikayət etdiyiniz vaxt olmayıb?

— Artıq 6 ildir ki, diceyliklə məşğulam və bu illər ərzində bir dəqiqə belə olmayıb ki, seçimimdən şikayətlənim. Mənim üçün bu, həm hobbi, həm iş, həm də karyeradır.

 Başqa ölkələrdə qız diceylər çoxdur, Azərbaycanda isə yoxdur. Niyə?

— Sizə düzünü deyəcəm, mənə dəfələrlə valideynlər zəng edərək onların qızlarına da bu işi öyrətməyi xahiş ediblər, amma mən həmişə "başımdan eləmişəm". Çünki bu, çox çətin peşədir və hər adam onun çətinliklərinin öhdəsindən gələ bilmir. Eyni zamanda bu işin çox gərgin qrafiki olur. Çox müxtəlif qəbildən olan insanlarla rastlaşırsan. Etiraf edim ki, bu, mənəvi cəhətdən çox çətindir.

 Qızlar arasında rəqibiniz yoxdur, bəs kişiləri öz rəqibiniz hesab edirsiz?

— Əvvəllər oğlanları heç vaxt öz rəqibim hesab etmirdim. Amma yeni zirvələri fəth edərkən yolumda dicey oğlanları gördüm və başa düşdüm ki, karyerada cinsiyyət fərqi yoxdur.

Bizdə çox sayda dicey var və mən hesab edirəm ki, Bakı üçün bu, həddindən artıqdır. Təəssüf ki, onların çoxu musiqiləri təqdim etməyi, aparatlarla və kütlə ilə işləməyi bacarmır. Barmaqla sayılası qədər dicey var ki, öz üzərində işləyir, yeni musiqi parçaları yazır, dünya müsabiqələrində çıxış edir və Bakının klub mədəniyyətini yüksəldir.

 Belə bir qızın gecə klublarında çıxışı qorxulu deyil ki?

— Burada qorxulu heç nə yoxdur. Klublarda çıxış etmək mühafizənin olmadığı toylarda çıxış etməkdən daha təhlükəsizdir. Mən həmişə istənilən adamla, hətta sərxoş vəziyyətlə olan şəxslərlə belə ümumi dil tapmağı bacarıram. Hərdən xoşagəlməz məqamlar da olur, amma onlar həmişə həlli mümkün olan hallardır. Mən peşənin çətinliklərinə çox da fikir verməməyə və onların öhdəsindən gəlməyə çalışıram. Problem sadəcə bir məsələ ilə bağlıdır — qrafiklə. Mən özümü ofis işində təsəvvür edə bilmirəm. Hələ səhər yeddidə heç yuxudan dura bilmərəm…

— Hansı üslubda ifa etmək xoşunuza gəlir?

— Mənim sevimli üslubum — trap və moombahtoon-dır. Amma əlbəttə başqalarını da ifa edirəm. Məsələn, elə qapalı tədbirlər olur ki, orada hamını ayağa qaldırmalıyam və təkcə öz üslubumda mahnılar qoya bilməyəm.

 Siz Bakının klub həyatını necə xarakterizə edərdiniz?

— Çox çətin sualdır. Düzünü desəm, paytaxtın klub həyatı iri addımlarla ideala doğru gedir. Bakıda çoxlu klublar var və onları üç səviyyəyə ayırmaq olar: yüksək, orta və olmaması lazım gələn. İstərdim ki, bizə tez-tez xarici ulduzlar, diceylər, müğənnilər, aktyorlar gəlsin və biz görək ki, hansı istiqamətdə səy göstərməliyik.

 Sizi peşə seçiminizə görə tənqid edənlər çoxdur?

— Əlbəttə, tənqid mənə inkişaf etməyə və yuxarı qalxmağa kömək edir. Mən ünvanıma deyilənləri çox sakit qarşılayıram. Nə qədər insan və nə qədər fikir var. Amma heç kəsin peşə seçiminə görə tənqid etmək hüququ yoxdur. Əgər mən və digər diceylər olmasaydı, toyları və təntənəli tədbirləri kim şənləndirərdi? Biz insanların həyatının ən yaddaqalan anlarında — ad günlərində, toylarda, xınayaxdılarda, yubileylərdə və s. iştirak edirik.

 Gələcəyinizi də bu peşə ilə bağlamaq niyyətindəsiniz?

— İndidən təxmin etmək istəmirəm ki, nə və necə olacaq. Mənim hələ çatmadığım bir çox hədəflər və fəth etmədiyim zirvələr var. O hədəflərə çatmaq və o zirvələri fəth etmək istəyirəm. Hazırda yeni layihələr və batllar üzərində işləyirəm. Mən ixtisasca veterinaram və əgər birdən diceyliklə vidalaşmaq qərarına gəlsəm, işsiz qalmayacam.

 Dicey olmaq istəyən, amma bu istiqamətdə addım atmağa qorxan azərbaycanlı qızlara tövsiyəniz…

— Bakıda dicey olmaq istəyən qızlar ilk növbədə güclü xarakterə malik olmalıdırlar. Əhalinin istənilən təbəqəsi ilə əlaqə qurmağı bacarmalıdırlar və elə etməlidirlər ki, onlar razı qalsınlar. Həmçinin istənilən qrafiki idarə etməyi bacarmalı, qonaqların istənilən musiqi seçiminə təbəssümlə yanaşmalı, daim pozitivə köklənməli, ən əsası isə elə musiqi zövqün olmalıdır ki, sizin tədbirdə heç kəs yerində oturmasın. Əgər bunlar varsa, onda cəsarətli olun. Altı il ərzində işimdə çox şeyə nail olmuşam. İki battlda ikinci yeri tutmuşam və bununla fəxr edirəm. Növbəti müsabiqədə birinci yer mənim olacaq. Əgər özünə əmin olsan və pozitivə köklənsən, onda hər şey alınacaq.

539
Əlaqədar
Cəmi 12 yaşı var, 44 musiqi alətində ifa edir
Əfsanəvi musiqi qrupu geri qayıdır
Azərbaycanın simli musiqi alətləri
Üzeyir Hacıbəyli IX Beynəlxalq Musiqi Festivalı başa çatıb
Bakıda Beynəlxalq Musiqi Festivalı keçiriləcək
Qəbələ festivalında möhtəşəm simfonik musiqi axşamı
Aida Mahmudovanın PASTPRESENTFUTURE sərgisi

Azərbaycanlı rəssamın ABŞ-da ikinci fərdi sərgisi açılıb

7
(Yenilənib 21:11 15.01.2021)
Fevralın 16-dək davam edəcək "Aida Mahmudova: PASTPRESENTFUTURE" sərgisi "Sapar Contemporary" inkubatorunun təşkilatçılığı ilə reallaşır.

BAKI, 15 yanvar — Sputnik. Tanınmış azərbaycanlı rəssam Aida Mahmudovanın Amerika Birləşmiş Ştatlarında ikinci fərdi sərgisi açılıb.

Sputnik Azərbaycan xəbər verir ki, fevralın 16-dək davam edəcək "Aida Mahmudova: PASTPRESENTFUTURE" sərgisi "Sapar Contemporary" inkubatorunun təşkilatçılığı ilə reallaşır.

"Sapar Contemporary" inkubatoru varlığın fraqmentar təbiətini zamanla və landşaftda təhrif olunmuş xatirələr vasitəsilə tədqiq edən yeni "Aida Mahmudova: PASTPRESENTFUTURE" seriyasını təqdim edib. Qalereyanın Mərkəzi Asiya və Qafqazda fəaliyyət göstərən nüfuzlu qadın rəssamlara dəstək istiqamətində fasiləsiz səyləri çərçivəsində təşkil edilən "PASTPRESENTFUTURE" rəssamın Amerika Birləşmiş Ştatlarında ikinci fərdi sərgisidir.

Rəssam yeni əsərində yaradıcılıq prosesinin sırf emosional və instinktiv tərəfini önə çəkmək üçün xarici məhdudiyyətlərdən (ideoloji, siyasi və ya dini) kənarda mövcud olan əsərlər yaratmaq məqsədilə keçmişi, bu günü və gələcəyi vəhdət halında birləşdirir. Nəticədə birbaşa olaraq rəssamla rəsm texnikası arasındakı əlaqədən ilhamlanan və məfhumları çılpaq şəkildə göstərən güclü əsərlər yaradılır.

Ot və quru bitkilərdən istifadə edilərək və rəssamın impressionist toxunuşları nəticəsində ərsəyə gələn "Roots" (2020) kimi əsərlər rəssamın vətəni Azərbaycanda rast gəlinən landşaftın canlandırıcı detallarını üzə çıxarır. Yer kürəsinin səthi ilə bağlı reallıqlara baş vuran Aida Mahmudovanın təsvir etdiyi bu proses təbiəti xatirələri oyadan nostalji hissi ilə doldurur. Təbəqələrin yaradılması və ya onların bir-birindən ayrılması, habelə quru bitkilər, keramika, mis də daxil olmaqla müxtəlif materialların qarışdırılması prosesi rəssam üçün fiziki olaraq böyümə və emosional şəfa tapma məqsədilə edilən məşğələyə çevrilir.

Azərbaycanın paytaxtı Bakıda yaşayıb fəaliyyət göstərən Aida Mahmudovanın rəsm əsərləri onun seçdiyi materialların fiziki təbiəti və üstünlük verdiyi dünyəvi palitrası ilə ahəngdar şəkildə uzlaşır. Onun olduqca intuitiv xarakter daşıyan axtarışları xarici sədlərdən yan keçən sevgi, itki, yaddaş və istək kimi universal insan hisslərinin bütün spektri üzrə inkişaf etməyə davam edir. Rəssamın sözlərinə görə, "cəmiyyətin bir hissəsi olaraq, biz varlığın təbiətini, başqaları ilə qarşılıqlı münasibətlərimizi müəyyən dərəcədə məhdudlaşdırırıq və bununla da ibtidai ünsiyyət kanallarını itiririk. Mənim üçün incəsənətin heç bir sərhədi yoxdur - o, ünsiyyətin istənilən forması üçün açıqdır, yaradıcılıq prosesi isə insan tərəfindən yaradılmış və buna görə də olduqca kövrək olan fundamental prinsipləri bu və ya digər dərəcədə məhv edir".

7
Leyla Məcnun serialı

"Netflix" ilk dəfə Azərbaycanda film çəkdi - VİDEO

31
(Yenilənib 14:17 15.01.2021)
"Netflix Indonesia" tərəfindən lentə alınan layihədə Leyla və Samirin sevgi həyatından bəhs edilir. Çəkilişlər İndoneziya və Bakıda baş tutub. Filmin baş qəhrəmanlarını aktrisa Aça Septriasa və aktyor Reza Rahadian canlandırıblar.

BAKI, 15 yanvar — Sputnik. Dünyaca məşhur "Netflix" platforması ilk dəfə Azərbaycanla bağlı film çəkib.

Sputnik Azərbaycan xəbər verir ki, ekran işi məşhur yazıçımız Nizami Gəncəvinin "Leyli və Məcnun" poeması əsasında ərsəyə gətirilib.

"Netflix Indonesia" tərəfindən lentə alınan layihədə Leyla və Samirin sevgi həyatından bəhs edilir. Çəkilişlər İndoneziya və Bakıda baş tutub. Filmin baş qəhrəmanlarını aktrisa Aça Septriasa və aktyor Reza Rahadian canlandırıblar.

"Layla və Majnun"un premyerası fevralın 11-də baş tutacaq.

 

31
Teqlər:
Netflix şirkəti
Türkiyə Prezidenti Rəcəb Tayyib Ərdoğan koronavirusdan peyvənd vurdurur

Ərdoğan koronavirus peyvəndindən sonra: "Sapsağlamam"

0
(Yenilənib 00:05 16.01.2021)
Türkiyə Prezidentinə yanvarın 14-də Çinin "Sinovac" şirkətinin istehsalı olan "CoronaVac" vaksini vurulub.

BAKI, 16 yanvar — Sputnik. Bu ana qədər hər hansı bir yan təsiri olmayıb. Sputnik Azərbaycan "Hurriyet" nəşrinə istinadən xəbər verir ki, bunu Türkiyə Prezidenti Rəcəb Tayyib Ərdoğan jurnalistlərə açıqlamasında bildirib.

"Bu ana qədər hər hansı bir yan təsiri olmayıb. Sapsağlamam. 28 gün sonra ikinci iynəmizi vurduracağıq", - deyə Ərdoğan qeyd edib.

Qeyd edək ki, Türkiyə Prezidenti Rəcəb Tayyib Ərdoğan canlı yayımda koronavirusa qarşı peyvənd edilib.

Türkiyə Prezidentinə Çinin "Sinovac" şirkətinin istehsalı olan "CoronaVac" vaksini vurulub.

0