Xənnas filmindən kadr

İnanclı insanları öz evinin zirzəmisində öldürür və...

377
(Yenilənib 10:01 04.05.2017)
Azərbaycanlı rejissor Hollivud səviyyəsində film çəkdiyini iddia edir

Leyla Abdullayeva, Sputnik Azərbaycan

BAKI, 4 may — Sputnik. Azərbaycanın kino sənətində ilkə imza atdığını iddia edən kinorejissor, Hollivud səviyyəsində film çəkdiyi qənaətindədir. Kinorejissor Elvin Abdullayev premyerasına hazırlaşdığı "Xənnas" filmi və öz yaradıcılığı barədə Sputnik Azərbaycan-a danışıb.

Kinorejissor Elvin Abdullayev
Kinorejissor Elvin Abdullayev

— "Xənnas" sözünün mənasını bir çoxları bilmədiyi halda, filmə bu adı verdiniz. Səbəbini bilmək olar?

— İlk olaraq filmin yaranma tarixçəsini qısa danışacam. Şəhərdə gəzintidə olan zaman fikirləşirdim ki, niyə bizdə mistik film yoxdur?! Niyə başqaları mistik filmlərində xristian dininin elementlərindən istifadə edirlər, amma biz islam dininin üstünlüklərindən istifadə etmirik?! Təbii ki, bunu Azərbaycanda etmək böyük risk, cəsarət tələb edirdi. Və ən əsası bu tipli filmlərə yüksək məbləğ lazım idi. Azərbaycan kino sahəsində ilkə imza atmaq, adımızı Azərbaycan film tarixinə qızıl hərflərlə yazdırmaq istəyirdimsə, bu riski etməli idim.

"Xənnas" sözü "Qurani-Kərim"in Nas surəsindəndir. Bir çox mənası var: cinin balası, insanı ələ keçirmək istəyən cin, istədiyinə nail olmayana qədər əl çəkməyən və sair. Bəli "Xənnas" adının nə məna kəsb etdiyini əksəriyyət bilmir. Bir çox tanınmış prodüserlər bu adın filmə verilməsinə qarşı idilər. Onlar da vurğuladılar ki, bu ad Azərbaycan tamaşaçısı üçün tanış deyil. Mən və filmin baş prodüseri Edqar Abdullayev məhz bu amili nəzərə alaraq "Xənnas" adını filmə verdik. Çünki tamaşaçı bu adın mənasını bilmək üçün maraqlanacaq və bu da filmə olan marağı daha da artıracaq.

 Filmin çəkiliş prosesi neçə müddət davam etdi? Çəkilişlər hansı regionlarda oldu?

— 3 aya yaxın çəkiliş prosesinə hazırlıq oldu. 48 gün demək olar, gecə-gündüz çəkiliş prosesi getdi. Ümumi "Xənnas" filminin hazır olmasına 1 il vaxt sərf etdim. Filmin əsas hissəsi Şəki rayonunda çəkildi. Qax rayonunda və Bakı şəhərində də çəkilişlər etmişik.

 Qısa olaraq "Xənnas"ın süjet xətti haqqında məlumat verərsiniz?

— "Xənnas" mistik trillerdir. Filmdə tamaşaçılara mənfi hisslər aşılaya biləcək epizodlara yer verməmişik. Sovet dövründə bir nəfər Stalinin əmri ilə dindar və islam dininə inanclı insanları öz evinin zirzəmisində öldürür və həmin ev lənətlənir. Həmin kişinin nəvəsi dəfələrlə babasını yuxusunda görür və babası yuxuda nəvəsindən kömək istəyir. Hadisələr də bundan sonra başlayır. Qəhrəmanımız dostları ilə o evə gedir və qorxu dolu anlar yaşayırlar.

 Sirr deyilsə, "Xənnas"ın büdcəsi nə qədərdir? Ayrılan maliyyə kifayət etdimi?

— Maliyyə filmin çəkilişi üçün ən başlıca amildir. "Xənnas"ın çəkilişinə 200 min manatdan artıq maliyyə sərf olundu. Maliyyəni qardaşım ayırdı. Təbii ki, baş sponsorlar da oldu, onlar da maliyyənin altıda bir hissəsini qarşıladılar. Əslində "Xənnas" üçün 500-600 min manat büdcə lazım idi. Ona görə də filmi tam istədiyim kimi çəkə bilmədim. Amma düşünürəm ki, tamaşaçının görmək istədiyi filmi çəkə bilmişəm.

— Aktyor heyətinin seçimini hansı prinsipə əsasən aparmısınız?

— Aktyor heyətini onların əvvəllər yaratdıqları obrazlara görə seçdim. Bir nəfər — Nərgiz Əliyeva debüt etdi. İlk debütü çox uğurlu alındı. Düşünürəm ki, seçimimdə də yanılmamışam. Çünki, filmdə rol alan hər bir aktyor və aktrisa öz işinin peşəkarıdır.

 Kinoteatrlarda komediya janrında olan filmlərin "ağalıq" etdiyi dövrdə "Xənnas" rəqabətə hazırdırmı?

— Artıq bizim tamaşaçılar yetişib. Bu tip filmlərə baxılma vaxtı gəlib.

 Müxtəlif janrlı filmlərlə işləmisiniz. Sizə daha çox yaxın olan janr hansıdır?

— Müxtəlif janrlı filmlərdə 2-ci rejissor olmuşam. Həmin filmlərdə böyük əməyim olub. Ruhən mənə yaxın detektiv, psixoloji, drama və mistik janrlı filmlərdir. "Xənnas" uğur gətirsə, sadaladığım janrlarda da filmlər çəkmək istəyirəm.

— "Santa Mariya gəmisi" adlı qısametrajlı erotik filmlə ilkə imza atmışdınız. Növbəti ilkə imza atmağa yaxınsınız. Bu, həmkarlarınızdan fərqlənmək üçündürmü?

— "Santa Mariya gəmisi" ilə ilkə imza atdım, böyük səs-küyə səbəb olmuşdu. "Xənnas" ilə də ilkə imza atmışam. Bəli, bu, həmkarlarımdan fərqlənmək və Azərbaycan film tarixində ilklərin rejissoru kimi tarixə düşmək üçündür. Tarixdə ilklər qalır. İlkə imza atmaqdan böyük zövq alıram.

 Çəkilişlər bitdikdən sonra aktyor heyəti ilə aranızda narazılıqlar olduğu yazıldı. Bu, həqiqətdirmi? Həqiqət deyilsə, kimə və nəyə görə lazım idi?

— Bəli, bu, həqiqətdir. Aktyorlarla aramızda inciklik oldu. Bunu yaradıcı inciklik hesab etmək olar. Çünki əsas inciklik poster üstündə oldu. Aktyorların əksəriyyəti posteri bəyənmədilər, çünki posterdə onların üzünə qaranlıq, duman effektləri vermişik. Onlar özlərini posterdə daha gözəl, effektli görmək istəyirdilər. Mən də izah etdim ki, filmin janrına görə poster belə olmalıdır. Bu, açıqlamamdan sonra razılaşanlar da, razılaşmayanlar da oldu.

Həqiqət olmayan o idi ki, guya aktrisa Pərvin Abiyeva filmə pul ayırıb, film həmin pulla çəkilib. Bu, kökündən yalan olan məlumat idi. Bununla bağlı Pərvin xanım özü də açıqlamalar verib. Amma bilmirəm, bu, kimə və nəyə görə lazım idi.

— Təqdimata sayılı günlər qalıb. "Şər deməsən, xeyir gəlməz" deyimi var. Əgər "Xənnas" gözləntiləri doğrultmasa, bu, sənət yolunuza necə təsir edəcək?

— Düzü, bu haqda düşünməmişəm. Heç düşünmək də istəmirəm. Belə bir şey olarsa, psixoloji olaraq çox sarsıntı keçirəcəyim dəqiqdir. Allaha sığınıb yeni filmlə özümü sübut etməyə çalışacağam. Amma bu filmi nə vaxta çəkərəm, onu bilmirəm. Çünki, depressiyada nə qədər olacağımı bilmirəm. O, dəqiqdir ki, nə olsa da, mən bu sənətdə olacağam. Arzularım, gələcəyim bu sənətə bağlıdır.

— Sizcə, tamaşaçılar "Xənnas"a niyə baxmalıdırlar?

— İlk olaraq onu deyim ki, Hollivud filmlərini sevənlər, bu filmdə də o həyəcanı yaşaya biləcəklər. "Xənnas" Azərbaycan film sahəsində ilkdir. "Xənnas"a böyük əmək sərf olunub. Tamaşaçılar bu qorxunu, həyəcanı yaşamaq üçün ona baxmalıdırlar. Bir sözlə, indiyə qədər Azərbaycan istehsalı olan filmlərdən tam fərqli film izləmək istəyənlər "Xənnas"ı seçməlidir. Gələn tamaşaçılar, əminliklə deyirəm ki, qorxaraq, həyəcanlanaraq zövq alacaqlar.

377
Teqlər:
Elvin Abdullayev, "Xənnas", mistik film, kinorejissor, ilk, kino, film, Hollivud, Azərbaycan
Əlaqədar
“Xüsusi təyinatlı İbad-2” filminin rejissoru çəkilişlərdən danışdı
"Bəxt üzüyü"nü səhnələşdirən ilk rejissor
Azərbaycanlı rejissor vəfat edib
Rejissor: “Mənim tamaşalarımda tamaşaçı darıxmır”
Bu filmlər insanları potensial qatilə çevirir
Bu film xoşagəlməz halların azalmasına yardım edəcək
Azərbaycanda ilk qorxu filmi nümayiş olunacaq
Əsərinə Hollivudda film çəkilmiş azərbaycanlı yazıçı
Aida Mahmudovanın PASTPRESENTFUTURE sərgisi

Azərbaycanlı rəssamın ABŞ-da ikinci fərdi sərgisi açılıb

8
(Yenilənib 21:11 15.01.2021)
Fevralın 16-dək davam edəcək "Aida Mahmudova: PASTPRESENTFUTURE" sərgisi "Sapar Contemporary" inkubatorunun təşkilatçılığı ilə reallaşır.

BAKI, 15 yanvar — Sputnik. Tanınmış azərbaycanlı rəssam Aida Mahmudovanın Amerika Birləşmiş Ştatlarında ikinci fərdi sərgisi açılıb.

Sputnik Azərbaycan xəbər verir ki, fevralın 16-dək davam edəcək "Aida Mahmudova: PASTPRESENTFUTURE" sərgisi "Sapar Contemporary" inkubatorunun təşkilatçılığı ilə reallaşır.

"Sapar Contemporary" inkubatoru varlığın fraqmentar təbiətini zamanla və landşaftda təhrif olunmuş xatirələr vasitəsilə tədqiq edən yeni "Aida Mahmudova: PASTPRESENTFUTURE" seriyasını təqdim edib. Qalereyanın Mərkəzi Asiya və Qafqazda fəaliyyət göstərən nüfuzlu qadın rəssamlara dəstək istiqamətində fasiləsiz səyləri çərçivəsində təşkil edilən "PASTPRESENTFUTURE" rəssamın Amerika Birləşmiş Ştatlarında ikinci fərdi sərgisidir.

Rəssam yeni əsərində yaradıcılıq prosesinin sırf emosional və instinktiv tərəfini önə çəkmək üçün xarici məhdudiyyətlərdən (ideoloji, siyasi və ya dini) kənarda mövcud olan əsərlər yaratmaq məqsədilə keçmişi, bu günü və gələcəyi vəhdət halında birləşdirir. Nəticədə birbaşa olaraq rəssamla rəsm texnikası arasındakı əlaqədən ilhamlanan və məfhumları çılpaq şəkildə göstərən güclü əsərlər yaradılır.

Ot və quru bitkilərdən istifadə edilərək və rəssamın impressionist toxunuşları nəticəsində ərsəyə gələn "Roots" (2020) kimi əsərlər rəssamın vətəni Azərbaycanda rast gəlinən landşaftın canlandırıcı detallarını üzə çıxarır. Yer kürəsinin səthi ilə bağlı reallıqlara baş vuran Aida Mahmudovanın təsvir etdiyi bu proses təbiəti xatirələri oyadan nostalji hissi ilə doldurur. Təbəqələrin yaradılması və ya onların bir-birindən ayrılması, habelə quru bitkilər, keramika, mis də daxil olmaqla müxtəlif materialların qarışdırılması prosesi rəssam üçün fiziki olaraq böyümə və emosional şəfa tapma məqsədilə edilən məşğələyə çevrilir.

Azərbaycanın paytaxtı Bakıda yaşayıb fəaliyyət göstərən Aida Mahmudovanın rəsm əsərləri onun seçdiyi materialların fiziki təbiəti və üstünlük verdiyi dünyəvi palitrası ilə ahəngdar şəkildə uzlaşır. Onun olduqca intuitiv xarakter daşıyan axtarışları xarici sədlərdən yan keçən sevgi, itki, yaddaş və istək kimi universal insan hisslərinin bütün spektri üzrə inkişaf etməyə davam edir. Rəssamın sözlərinə görə, "cəmiyyətin bir hissəsi olaraq, biz varlığın təbiətini, başqaları ilə qarşılıqlı münasibətlərimizi müəyyən dərəcədə məhdudlaşdırırıq və bununla da ibtidai ünsiyyət kanallarını itiririk. Mənim üçün incəsənətin heç bir sərhədi yoxdur - o, ünsiyyətin istənilən forması üçün açıqdır, yaradıcılıq prosesi isə insan tərəfindən yaradılmış və buna görə də olduqca kövrək olan fundamental prinsipləri bu və ya digər dərəcədə məhv edir".

8
Leyla Məcnun serialı

"Netflix" ilk dəfə Azərbaycanda film çəkdi - VİDEO

34
(Yenilənib 14:17 15.01.2021)
"Netflix Indonesia" tərəfindən lentə alınan layihədə Leyla və Samirin sevgi həyatından bəhs edilir. Çəkilişlər İndoneziya və Bakıda baş tutub. Filmin baş qəhrəmanlarını aktrisa Aça Septriasa və aktyor Reza Rahadian canlandırıblar.

BAKI, 15 yanvar — Sputnik. Dünyaca məşhur "Netflix" platforması ilk dəfə Azərbaycanla bağlı film çəkib.

Sputnik Azərbaycan xəbər verir ki, ekran işi məşhur yazıçımız Nizami Gəncəvinin "Leyli və Məcnun" poeması əsasında ərsəyə gətirilib.

"Netflix Indonesia" tərəfindən lentə alınan layihədə Leyla və Samirin sevgi həyatından bəhs edilir. Çəkilişlər İndoneziya və Bakıda baş tutub. Filmin baş qəhrəmanlarını aktrisa Aça Septriasa və aktyor Reza Rahadian canlandırıblar.

"Layla və Majnun"un premyerası fevralın 11-də baş tutacaq.

 

34
Teqlər:
Netflix şirkəti
Türkiyə Prezidenti Rəcəb Tayyib Ərdoğan koronavirusdan peyvənd vurdurur

Ərdoğan koronavirus peyvəndindən sonra: "Sapsağlamam"

0
(Yenilənib 00:05 16.01.2021)
Türkiyə Prezidentinə yanvarın 14-də Çinin "Sinovac" şirkətinin istehsalı olan "CoronaVac" vaksini vurulub.

BAKI, 16 yanvar — Sputnik. Bu ana qədər hər hansı bir yan təsiri olmayıb. Sputnik Azərbaycan "Hurriyet" nəşrinə istinadən xəbər verir ki, bunu Türkiyə Prezidenti Rəcəb Tayyib Ərdoğan jurnalistlərə açıqlamasında bildirib.

"Bu ana qədər hər hansı bir yan təsiri olmayıb. Sapsağlamam. 28 gün sonra ikinci iynəmizi vurduracağıq", - deyə Ərdoğan qeyd edib.

Qeyd edək ki, Türkiyə Prezidenti Rəcəb Tayyib Ərdoğan canlı yayımda koronavirusa qarşı peyvənd edilib.

Türkiyə Prezidentinə Çinin "Sinovac" şirkətinin istehsalı olan "CoronaVac" vaksini vurulub.

0