Cavid Məmmədov

Azərbaycanlı müğənni erməni qızla yarışmağa hazırdır

270
(Yenilənib 18:27 15.02.2017)
Hər bir ifaçı üçün Azərbaycanı beynəlxalq müsabiqələrdə layiqli təmsil etmək və qalib gəlmək vacibdir

BAKI, 15 fev — Sputnik. Azərbaycanlı ifaçılar dünyanın müxtəlif ölkələrində keçirilən məşhur musiqi layihələrində uğurla çıxış edirlər. Son üç gündə Azərbaycan mediası gənc müğənni Cavid Məmmədovun “Ukraynanın səsi-7” şousundakı möhtəşəm çıxışından yazır. Hazırda layihədə iştirakını davam etdirən Cavid Sputnik Azərbaycan-a verdiyi müsahibədə sözügedən yarışma və ukraynalıların onun çıxışına münasibəti barədə danışıb.  

- Cavid, sizi heç kəs tanımırdı, amma indi siz nəinki Azərbaycanda, xaricdə də populyar olmusunuz. Nə hiss edirsiniz? 

— Məni dəstəkləyən hər kəsə təşəkkür edirəm. Düşünmürəm ki, ulduz xəstəliyinə yoluxacam. Mən ulduz deyiləm, hamı kimi adi insanam. Gəncədə anadan olmuşam və həmişə də orada yaşamışam. Düzünü desəm, mən pianoçuyam və heç vaxt vokalla məşğul olmamışam. Təəssüf ki, maddi imkansızlıq ucbatından lokomotiv deposunda çilingər işləməyə məcbur olmuşam. Bu, çox çətin və ağır işdir. Mənim üçün çox çətindir. Əllərimdə çatlar əmələ gəlib, barmaqlarım travma alıb və başa düşürəm ki, belə davam etsə, heç vaxt piano çala bilməyəcəm. Musiqiçi üçünsə bunun nə demək olduğunu bilirsiz. Bu işdən getdim, mahnı qoşmağa və onları oxumağa başladım. Gəncədə restoranda oxumağa başladım. Elə həmin gündən də həyatım dəyişməyə başladı. Çünki mən artıq sevdiyim işlə məşğul olurdum və bundan pul qazanırdım, baxmayaraq ki, bu, elə də çox pul deyildi. 

Cavid Məmmədov
© Photo : Личный архив Дж.Мамедова

- Bəs “Ukraynanın səsi” yarışmasına necə düşdünüz? 

— Tamamilə təsadüfən. Restoranda işləyərkən mən çox yaxşı bir insanla tanış oldum. O, mənə çox kömək elədi. Bir dəfə zəng edib dedi ki, audioyazımı “Ukraynanın səsi” yarışmasına göndərib və onlar məni seçiblər, indi isə Kiyevə kastinqlərə dəvət ediblər. Düzü bunu heç gözləmirdim. Şokda idim. Uzun müddət özümə gələ bilmədim. Çünki kiminsə sənin ifanı qiymətləndirməsi gözəl hissdir. 

- Sizə bu şouya getməyə kim kömək etdi? 

— Mən özümə gələndən sonra başa düşdüm ki, ora gedə bilməyəcəm, çünki pulum yoxdur. Mən öz əmək haqqımı yığmağa başladım. Əmək haqqım azdır və mən dostlarımdan borc istədim. Sağ olsunlar, onlar etiraz eləmədilər və kömək əllərini uzatdılar. İkinci tura getmək üçünsə mənə artıq başqa insanlar kömək etdilər. Onlar birinci turdan keçdiyimi biləndən sonra mənə kömək etmək qərarına gəliblər və bütün xərclərimi öz üzərilərinə götürüblər. 

- Bəs siz niyə öz seçiminizdə məhz “Gözü dönmüş” filmindən, Antonio Banderasın repertuarından olan "Cancion del mariachi" mahnısı üzərində dayandınız? 

— Düzü, mən tamam başqa mahnı ifa etmək istəyirdim. Amma bu mahnı da mənim şounun təşkilatçılarına təqdim etdiyim kompozisiyaların siyahısında idi. Bu layihənin prodüserləri Ukraynada mənə dedilər ki, məhz bu mahnını oxuyum. Çünki mən qafqazlıyam və qafqazlılar da çox temperamentlidirlər və yaxşısı budur, bu mahnını oxuyum, çünki məndə ən yaxşı bu alınır. Mən də razılaşmalı oldum. 

 — Sizin ifanıza yalnız ukraynalı müğənni Camala döndü. Bəs siz onun komandasına düşmək istəyirdiniz? 

— İstərdim ki, bütün münsiflər mənim ifama dönsünlər, amma Camalanın komandasına düşməyimdən şikayətçi deyiləm. O, çox güclü ifaçıdır. Mən bunu Camala mənimlə məşğul olmağa başlayandan sonra başa düşdüm. Bundan əlavə, o, türkəsilli olduğu üçün mənə hamıdan yaxındır. Onun mənimlə birlikdə səhnəyə çıxıb bizim xalq mahnımız olan "Küçələrə su səpmişəm"i oxuması gözlənilməz oldu. Onun Azərbaycan dilini bildiyini və bu mahnını eşitdiyini bilmirdim. 

- Camalanın komandasında sizinlə yanaşı Ermənistandan olan ifaçı da iştirak edəcək. Siz bunu bilirdiniz? 

— Bəli, əlbəttə. 

- Bəs bu barədə nə düşünürsünüz? Əgər sizə onunla duet oxumaq təklif olunsa, oxuyarsınız? 

— Bu, dünya səviyyəli layihədir və ona görə də, orada müxtəlif ölkələrdən müğənnilər iştirak edir. O, Ermənistanı təmsil edir, mən də Azərbaycanı. Bizim hər birimiz öz missiyamızı yerinə yetirəcəyik. Mənim məqsədim bu layihədə iştirakı davam etdirmək üçün lazım olan hər şeyi etməkdir. Duetə gəlincə, mənə hələ bu barədə heç nə məlum deyil. Bunların hamısını prodüserlər və mənim müəllimim Camala həll edir. Mən xalqımın etimadını doğrultmağa və vətənimi layiqincə təmsil etməyə çalışıram. 

- Ukraynalılar sizin ifanızı necə qəbul etdilər? Onların mesajlarında, reaksiyalarında mənfi nə isə hiss elədiniz? 

— Ukraynalıların hər şey çox xoşlarına gəldi. Ukraynada çıxım zamanı zalda olan tamaşaçılar məni çox yaxşı qəbul etdilər və hətta mənimlə birlikdə oxudular. Mənə böyük həcmdə mesajlar gəlir və təəssüf ki, onların hamısını oxuyub çatdıra bilmirəm. Hətta başa düşmürəm ki, onlar nömrəmi haradan əldə edirlər. Çox xoşdur ki, çıxışım onların xoşuna gəlib. Hələlik mənfi heç nə deməyiblər və yazmayıblar. Mən bütün məıktublara cavab verə bilmirəm, çünki vaxt yoxdur. Çoxları inciyir. Hətta mənə yazırlar: “Sizə “sağ ol” sözünü yazmaq belə çətindir? İstəyirəm bütün insanlar bilsinlər ki, mən bu müsabiqəyə ulduz olmaq, yaxud da pul qazanmaq üçün getməmişəm. Sadəcə sevdiyim işlə məşğul olmaq və Azərbaycanı, eləcə də öz şəhərim Gəncəni layiqincə təmsil etmək istəyirəm. 

- Qələbənizə inanırsınız? 

— Dəqiq deyə bilmərəm. Əgər müsabiqənin prodüserləri mənə öz repertuarımı seçmək imkanı versələr, onda qalib gələ bilərəm. Təəssüf ki, bütün bunlar mənim əlimdə deyil. Elə mahnılar var ki, mənim səsimə görə deyil, onları ifa etmək mənə çətindir, amma oxumalıyam. Əgər uduzsam belə, əsas iştirak etməkdir. Bunun özü artıq mənim üçün qələbədir. 

- Bu müsabiqədən sonra nə işlə məşğul olmaq fikrindəsiniz? 

— Vokalla məşğul olmağı çox istəyirəm. Bununla əlaqədar olaraq, mən heç olmasa 1 il Bakıda yaşamalıyam. Çünki burada yaxşı vokal müəllimləri var. Peşəkar ifaçı olmaq istəyirəm. 

270
Teqlər:
Gözü dönmüş, Küçələrə su səpmişəm, "Cancion del mariachi", Ukraynanın səsi-7” şousu, Antonio Banderas, Camala, Cavid Məmmədov, Kiyev, Gəncə, Ukrayna, Ermənistan, Azərbaycan
Əlaqədar
Azərbaycanlı çilingər Ukraynanı ayağa qaldırdı
Məşhur şoumenə 3 aylıq həbs cəzası verildi
Netflix

"Netflix" İstanbulda ofis açır

24
"Netflix" platformasının qurucusu Reed Hastings Türkiyənin zəngin mədəni irsi və köklü hekayə anlatma qabiliyyəti baxımından çox dəyərli bir ölkə olduğunu bildirib

BAKI, 3 dekabr — Sputnik. Dünya üzrə təxminən 195 milyon üzvü olan "Netflix" platformasının İstanbulda ofisi açılacaq. Bu addım Türkiyədə istehsal olunan uğurlu ekran əsərlərinin dünya tamaşaçısına tanıdılmasında da əhəmiyyətli rol oynayacaq.

Sputnik Azərbaycan Türkiyə mətbuatına istinadən xəbər verir ki, bununla bağlı "Netflix" platformasından bildirilib.

Türkiyədəki sərmayələrini artıran şirkətin yeni ofisinin 2021-ci ilin ikinci yarısında istifadəyə verilməsi planlaşdırılır.

Bununla bağlı açıqlama verən Türkiyənin mədəniyyət və turizm naziri Mehmet Nuri Ersoy xüsusilə son on beş il ərzində əhəmiyyətli inkişaf yolu keçən ölkəsinin kino və teleserial sektorunun iqtisadi artımla yanaşı, həm də mədəni diplomatiya sahəsinə böyük töhfələr verdiyini bildirib: ""Netflix" kimi qlobal bir şirkətin ölkəmizdə ofis açması qərarını məmnuniyyətlə qarşıladıq. Türkiyə istehsalı olan film və serialların 190 ölkədə izlənə bilməsi bu sektorun daha geniş beynəlxalq cəmiyyətə tanıdılması və film turizminin inkişafına böyük töhfələr verəcəyini düşünürük".

"Netflix" platformasının qurucusu Reed Hastings Türkiyənin zəngin mədəni irsi və köklü hekayə anlatma qabiliyyəti baxımından çox dəyərli bir ölkə olduğunu bildirib.

24
Teqlər:
ofis, Türkiyә, Netflix şirkəti
İlqar Muradov, arxiv şəkli

İlqar Muradov: "Düşünürəm ki, zahirən Dronqoya oxşarlığım var"

2285
(Yenilənib 18:06 03.12.2020)
"Mənim əksər mahnılarım mənə aiddir. Amma mən nə oxuyuramsa o elə mənim qəlbimin musiqisidir. Onları sevərək, seçərək oxumuşam. Bütün mahnılarım mənə doğmadır"

Şahpəri Abbasova, Sputnik Azərbaycan

BAKI, 3 dekabr — Sputnik. Onun həzin, məlahətli səsini dinlədikcə ötən günlərə qayıdırsan. Kiminin uşaqlığı, kiminin gəcliyi, kiminin ilk məhəbbəti düşür yada… Bir sözlə, onu dinlədikcə xatirələr düşür yada.. "Bir ömrün nəğməsi", "Mənim 17 yaşım var", "Mənimlə qal", "İstərsənmi", "Bu dünyanı nağıl bilək", "Peşiman olarsan" mahnıları insanın ruhunu oxşayır. Söhbət alicənablığı, sakit, ciddi, ağır təbiəti, qalmaqallardan uzaq olması ilə seçilən Xalq artisti İlqar Muradovdan gedir. Sənətkar özü və sənəti ilə bağlı Sputnik Azərbaycan-a danışıb:

"Mən əslində, 5 yaşında pianoda çalıb-oxuyurdum. Məndən böyük bacım, qardaşım musiqi məktəbinə gedirdilər. Valideynlərimin dediyinə görə, mən onların ikisindən də istedadlı olmuşam. Sonra mən Naxçıvanda 7 illik Orta İxtisas Musiqi Məktəbinin piano şöbəsini bitirdim. Demək olar ki, ömrüm boyu musiqi ilə məşğul olmuşam. 1981-ci ildə bizim dahi sənətkarımız, mərhum Rafiq Babayev məni Bakıya dəvət etdi. Həmin vaxtdan bu günə qədər də oxuyuram".

"İlqar Muradovun ruhunu ifadə edən mahnı hansıdır?" sualına Xalq artistinin cavabı belə oldu: "Mənim əksər mahnılarım mənə aiddir. Amma mən nə oxuyuramsa o elə mənim qəlbimin musiqisidir. Onları sevərək, seçərək oxumuşam. Bütün mahnılarım mənə doğmadır. Mənim üçün fərqi yoxdur. Onlar mənim daxili aləmimdən xəbər verir. Onlar mənim övladlarımdır. Necə ki, övladlarımızın arasında fərq qoymuruq. Oxuduğum mahnılarım da mənim övladlarımdır. Onlar mənə yaxın olmasaydılar, mən onları ifa etməzdim".

Dünyanı cənginə alan COVİD-19 pandemiyası həmsöhbətimizin də yaradıcılığına təsirsiz ötüşməyib: "Karantindən qabaq 3 konsert nəzərdə tutulmuşdu. Onun 2-ni edə bildik, 1 konsert qaldı. Həmin konsertin tarixi dəyişilə-dəyişilə dekabrın 20-ə salınıb. Həmin vaxta bitsə, konsert baş tutacaq, ancaq çətin ki, o vaxta bitər. Ümidimiz 2021-ci ilədir".

Pandemiyadan söz düşmüşkən, müğənni insanlarımızı diqqətli olmağa, özlərini qorumağa çağırdı: "İnsanlar son dərcə diqqətli olsunlar. Qarabağ uğrunda döyüşlərdə qələbə qazandıq. Qripə də qalib gələsi olsaq çox yaxşı olar. Bu, özümüzün əlindədir".

"Pandemiya dövrü hər kəsə təsir etdiyi kim mənə də təsir etdi. Xüsusən maddi tərəfdən. Mən də öz doğmalarımı qorumaq üçün məcburiyyətdən evdə qaldım. Əslində mənə mənəvi olaraq elə də böyük təsir etmədi. Həmin dönəmlərdə yaradıcılığımın üzərində işlədir. Həmin dövrü səmərəli keçirdim".

Müsahibimizin fərqli imici, üzünün fakturası rejissor Yavər Rzayevin diqqətiini çəkib. Rejissor İlqar Muradovu quruluş verdiyi "Xeyirlə şərin rəqsi" filminə dəvət edib: "Filmin süjet xətti dünyaca məşhur xəfiyyə Dronqonun Azərbaycanın dağlıq rayonundakı bir qəsəbədə baş verən müəmmalı hadisəni araşdırması üzərində qurulub. Quruluşçu rejissor Yavər Rzayev məni baş rola - Dronqo obrazına dəvət etdi. Film Çingiz Abdullayevin "Quba kapriççiosu" əsəri əsasında lentə alınıb. Filmə ona görə çəkildim ki, o obraza simpatiyam var idi. Ümumiyyətlə, Çingiz müəllimin özünə də çox böyük hörmətim var. Yenə bu tipli obraza dəvət etsələr gedəcəyəm, amma başqa filmə yox".

"Əvvəlcə çəkilişə razılıq vermədim, çünki mən aktyor deyildim. Amma əsərlə tanış olduqdan sonra obrazda xarakterimə uyğun nələrisə tapdım. Düşünürəm ki, zahirən də Dronqoya oxşarlığım var. Çingiz Abdullayev mənim obrazımdan çox razı qalıb. Hətta premyerada da qeyd etdi ki, bu günə qədər çox film olub, lakin onların arasında ən uğurlu alınan və ən çox bəyəndiyi məhz bu filmdir. Bundan başqa, peşəkar kino mütəxəssisləri də film haqqında müsbət rəylər bildirirlər. Ümid edirəm ki, bunun ardı və yaxud başqa obrazlar olacaq".

Xalq artisti ölkəmizi xarici ölkələrdə də layiqincə təmsil edib: "Bir neçə layihələrdə də iştirak etmişəm. Misal kimi Norveç xoru ilə olan layihəni göstərə bilərəm. 1995-ci ildə mərhum səyyah Tur Heyerdal Azərbaycana gəldi. Onun ideyası ilə layihə yazıldı. Bu proyekt ən yaxşı proyektlər sırasına düşdü. Orda həm bəstəkar, həm də xalq mahnılarından istifadə etdik. Mərhum bəstəkar-pianoçu Rafiq müəllimin davamçısı olaraq dostum Siyavuş Kərimi ilə əl-ələ verib başqa-başqa ölkələrdə Azərbaycan musiqisini təbliğ etmişik. Qismət olarsa, yenə də edəcəyik".

2285
Kassir dollarları sayır, arxiv şəkli

Əhalinin dollar ajiotajının səbəbi nədir proses necə nəticələnəcək?

8
(Yenilənib 06:34 05.12.2020)
Ekspert: "Əhalinin nağd dollar alışında ən böyük artım mart-aprel aylarında qeydə alınıb. Yəqin yanvar ayında əhalinin nağd dollar alışında azalma qeydə alınacaq"

Xalid Məmmədov, Sputnik Azərbaycan

BAKI, 5 dekabr — Sputnik. Bu ilin oktyabr ayında Azərbaycanda banklar tərəfindən əhaliyə 204 milyon 196 min nağd dollar satılıb. Sputnik Azərbaycan Mərkəzi Bankın statistikasına istinadla xəbər verir ki, bu ilin sentyabr ayı ilə müqayisədə oktyabrda əhali nağd dollar alışını 31 milyon 543 min dollar və ya 18,3% artırıb. Bu ilin 10 ayında isə əhalinin nağd dollar alışı ötən ilin müvafiq dövrü ilə müqayisədə 43,7% artıb.

Bəs, nağd dollar alışının artımının səbəbləri nədir və bu proses davam edə bilərmi?

İqtisadçı, "Respublikaçı Alternativ" Partiyasının icra katibi Natiq Cəfərli Sputnik Azərbaycan-a deyib ki, əhalinin nağd dollar alışında ən böyük artım mart-aprel aylarında qeydə alınıb: "Həmin vaxt neftin qiymətinin kəskin düşməsi ilə bağlı qonşu ölkələrdə milli valyutalar ucuzlaşmağa başlayıb və bu, Azərbaycanda da gözlənti effekti yaradıb. Həmin dövrdə ölkədə ən böyük valyuta satışı həyata keçirilib və 10 aylıq göstəricilərə ən çox təsir edən mart-aprel aylarında satılan valyutanın həcmi olub. Ona görə də ümumi trend müəyyən gözləntilərlə bağlı olub".

O bildirib ki, noyabr ayında da əhalinin dollar alışında artım qeydə alınacağı gözlənilir: "Bu da yeni il qabağı ticarətin və sifarişlərin canlanması ilə əlaqədardır. Çünki son illərin rəqəmlərinə baxsaq, görəcəyik ki, oktyabr-noyabr aylarında valyuta alışlarında həmişə artım müşahidə olunur. Əvvəllər nağd dollar alışında artım həm də xarici səfərlər ilə əlaqəli idi, lakin indi sərhədlər bağlıdır. Çox güman ki, bu, sifarişlərin artması ilə bağlı olacaq".

Ekspert bildirib ki, yeni il qabağı tələbatın artımına uyğun olaraq ölkəyə gətirilən məhsulların çeşidi və həcmi artır: "İlin sonuna yaxın fiziki və hüquqi şəxslərin valyuta ehtiyacı artır. Son illərin göstəriciləri bunu deməyə əsas verir ki, yəqin yanvar ayında əhalinin nağd dollar alışında azalma qeydə alınacaq. Amma əsas məsələ ondan ibarətdir ki, hələ də manatın gələcək məzənnəsi ilə bağlı gözlənti var. Bu gözləntilər qaldıqca, yəni məzənnənin dəyişmə ehtimalı qaldıqca valyutaya tələbat artacaq və insanların əlində olan valyutanın satışında da azalma müşahidə olunacaq".

"Gələn ilin büdcəsinin xərc hissəsində ciddi artım müşahidə olunacaq. İşğaldan azad edilmiş torpaqların təhlükəsizlik təminatı, minaların təmizlənməsi, infrastrukturun qurulması ilə bağlı əlavə vəsaitə ehtiyac yaranacaq. Əlavə vəsaitin mənbəyi Neft Fondudur. Pandemiya ilə əlaqədar kəskin şəkildə vergi və yaxud gömrük daxilolmalarının artması gözlənilmir. Ona görə də büdcəyə əsas vəsaitin transferti üçün yenə Neft Fondunun vəsaitlərindən istifadə olunacaq" - deyə o əlavə edib.

Azərbaycan Dövlət İqtisad Universitetinin dosenti Emin Qəribli isə Sputnik Azərbaycan-a deyib ki, nağd dollar alışının artmasının ilk səbəbi psixoloji amildir: "Türkiyədə və digər ölkələrdə devalvasiya gedir və ona görə də likvidlik kimi dollara müraciət edirlər. Nağd dollar alışının artmasının digər səbəbi idxalın artmasıdır. Son dövrlər məsələn, avtomobil idxalı artıb. İdxal artırsa, deməli sosial durumda dirçəlmə var. İnsanların sosial vəziyyəti düzəldikcə idxal olunan məhsullara daha çox müraciət edirlər. Çünki bəzi məhsullar ölkədə istehsal edilmir. Digər tərəfdən neftin qiyməti azalıb. Bundan başqa, yeni il qabağı alış-veriş artır və bu da nağd dollar alışına təsir edir. Bu hal isə sosial vəziyyətin yaxşı olduğunu göstərir".

"Azərbaycanda devalvasiya təhlükəsi yoxdur. Biz artıq ağır dövrü keçdik. Bu gün neftin qiyməti stabildir və hazırda bizim iqtisadiyyatımız daha yaxşıdır" - deyə ekspert bildirib.

Onu da qeyd edək ki, əhalinin banklara satdığı nağd dolların həcmi isə azalıb. Belə ki, bu ilin oktyabr ayında əhalinin banklara satdığı nağd dolların həcmi 86 milyon 252 min dollar olub. Bu da bu ilin sentyabr ayı ilə müqayisədə 32 milyon 761 min dollar və ya 27,5% azdır.

8