BAKI, 12 may — Sputnik. 11-22 may 2016-cı il tarixlərində Fransada 69-cu Kann Beynəlxalq Film Festivalı keçirilir. Mədəniyyət və Turizm Nazirliyinin mətbuat xidmətindən Sputnik-ə verilən məlumata görə, 2011-ci ildən başlayaraq artıq altıncı ildir ki, sözügedən festivalda Mədəniyyət və Turizm Nazirliyinin dəstəyi ilə Azərbaycan kinosu pavilyonu təşkil olunur.
Bu il dünyanın ən nüfuzlu kino tədbirində Azərbaycan kinosunu Nazirliyin və Cəfər Cabbarlı adına "Azərbaycanfilm" kinostudiyasının nümayəndələri, eləcə də rejissor və prodüser İlqar Nəcəf, ssenarist və rejissor Asif Rüstəmov təmsil edir.
Xatırladaq ki, "Azərbaycanfilm" kinostudiyası cari ildə Kann kino bazarına "Qırmızı bağ", "İçəri şəhər", "Yarımçıq xatirələr", "4.1 Şəhər motivləri", "Keçmişdən məktublar", "Həddən artıq uyğunluq" və "Xeyirlə Şərin rəqsi" bədii filmlərini təqdim etmiş, filmlərimiz dünyanın yüzə qədər ölkəsindən gəlmiş distribyutor şirkətlərinin diqqətinə çatdırılmışdır.
Qeyd edək ki, festival çərçivəsində dünya kino sənayesinin tanınmış nümayəndələri ilə öncədən razılaşdırılmış cədvəl üzrə işgüzar görüşlər həyata keçirilir.
