Rejissor Tahir Tahiroviç

Jurnalistləri öyrədirlər ki, onları tərifləsinlər

354
(Yenilənib 17:26 28.11.2015)
Vladimir Putinin mükafatlandırdığı azərbaycanlı rejissor danışdı: Dövlət büdcəsindən ayrılan vəsaitləri yaxşı ssenarilərə yönəltmirlər.

BAKI, 28 noy —Sputnik. Azərbaycanın kino sahəsində baş verən proseslər ürək açan deyil. Kino sənayesinin bəzi nümayəndələri o fikirdədirlər ki, kino sahəsi monopoliyadadır, dövlət büdcəsindən kinoya ayrılan pulların paylanmasında dostluq, tanışlıq məsələləri əsas rol oynayır və yaxşı ssenarilər maliyyələşmədən kənarda qalır. Bu dəfə kino ilə bağlı Sputnik-in suallarını kinorejissor Tahir Əliyev cavablandırıb. O, müsahibədə öz yaradıcılığı və kinonun inkişaf etdirilməsi barədə fikirlərini bölüşüb.

- Yaradıcılığınızda sənədli filmlərə daha çox üstünlük vermisiniz. Səbəb?

— Sənədli film kinonun janrlarından biridir. Demək olmaz ki, bədii filmdən savayı o biri janrlar kino deyil. Bir vaxtlar "Telefilm" və "Salnamə" kinostudiyalarında çalışmışam. Təbii ki, bu qurumlar sənədli film üzrə ixtisaslaşmışdılar. Bu baxımdan, sənədli filmlər çəkmək bir növ vəzifə borcum idi. Bir məsələni də vurğulamaq istəyirəm ki, sənədli film çəkmək bədii film çəkməkdən heç də asan deyil, əksinə dəyərdim sənədli film daha çətindir. Amma indi şərait və maliyyə imkanlarımızdan çıxış edərək qısametrajlı bədii filmlər çəkirik. İndi orta nəsil rejissorların uğurlarında sənədli kinonun böyük rolu olub.

Rejissor

- Qazandığınız mükafatlar arasında sizə daha doğma olan hansıdır?

— İyirmiyə yaxın festivallardan müxtəlif priz və diplomlarım var. Bunların hamısı mənim sevincimdir. Amma hər halda S.Bandarçuk adına film festivalında qazandığım mükafatı daha çox sevirəm. Həmin gün mənim üçün ayrı bir aləm idi. Beş əsas mükafatçılardan Qriqori Natanson, Aleksey Uçitel, İrina Skobçeva, Vladimir Maşkov kimi kinematoqrafçılarla bir arada olmaq mənim üçün bayram idi. Təsəvvür edin, o cür sənətkarlarla birgə səhnəyə Tahir Əliyev də dəvət olunur. Həmin günkü, sevincimi sözlə ifadə edə bilmirəm.

- Bu il də kommersiya filmlərinin özəyini komediya janrlı filmlər təşkil edir. Səbəb?

— Bu cür hallar normaldı. Kommersiya filmlərini çəkənlər özləri maliyyə tapır və istehsala başlayr. Onlara demək olmaz niyə komediya çəkirsən?! Kinoda komediya janrı ciddi bir işdir. Onlar öz tamaşaçılarını tapıb. Hal-hazırda efirlərdə neqativ verlişlərdən, seriallardan yorulan tamaşaçı hansısa komediya filminə baxıb istirahət etmək istəyir. Bu tələbatı da rejissorlar bilir və buna uyğun filmlər çəkirlər. Əsasən komediya janrlı kommersiya filmlərinin tamaşaçıları təxminən 16 — 25 yaş həddindədir. Dövlət vəsaiti ilə çəkilən filmlərin dərdi başqadır. Yəni onlar tamaşaçı tapmaqda çətinlik çəkirlər. Hətta bildiyim qədər kommersiya filmlərini qısqanırlar da. Sadə şəkildə çəkdikləri filmləri belə təbliğ edə bilmirlər. Heç olmasa, gedib Müşfiq Şahverdiyevdən, Fərda Xudaverdiyevdən dərs alsınlar.

- Tamaşaçılar yüksək səviyyəli Azərbaycan filmləri görə biləcəklərmi?

— Tamaşaçılar özlərini bayaq dediyiniz kommersiya filmlərində çox rahat hiss edirlər. O, tamaşaçılardan soruşsaz, təbii ki, deyəcəklər yaxşı filmlər var və komersiya xarakterli komediya filmlərinin adlarını çəkəcəklər. Amma dövlət hesabına da belə filmlər çəkib kinomuzun büdcəsini artırmaq olar. Buna isə istəkdən öncə təfəkkür lazımdır. Təəssüf ki, bəzilərinin təfəkkürü o qədər də inkişaf etməyib. İstənilən virus ona münbit şərait yarananda inkişaf edir. Bu, həmçinin yaxşı işlərə də şamil oluna bilər. Dövlət büdcəsinin hesabına gərək yaxşı ssenarilərə də şərait yaradıla. Bu axı baş vermir. Bir-iki nəfərin kefiylə qəbul olunan və ya paylanan ssenarilər əsasında çəkilən filmlərlə qabağa getmək mümkün deyil. Bu iş kütləviləşməlidir. Kino başbilənləri üçünsə bu hal münasib deyil. Çünki belədə onlar öz ambisiyalarını həyata keçirə bilməyəcəklər. Onlar şəxsi maraqlarına uyğun iş görürlər. Hətta jurnalistləri də öyrədirlər ki, onları tərifləsinlər.

- Rusiya prezidenti Vladimir Putinin sizə təqdim etdiyi mükafatla bağlı təəssüratlarınız?

— Son 7-8 ildə Böyük Vətən Müharibəsinə həsr olunmuş doqquz sənədli film çəkmişəm. Bununla bağlı, mənə Rusiya Federasiyasının ölkəmizdəki səfirliyinin təşəbbüsü ilə Putinin imzasıyla mükafat verildi. Bu o demək deyil ki, Putin məni şəxsən tanıyır və buna görə təltif edib. Əsas işimizə qiymət və dəyər verilməsidir. Əlbəttə, bu hal sevindiricidir. Bir məsələni xatırladım ki, bu illər ərzində ölkəmizdə bu filmlərimə görə heç bir diplom, fəxri-fərman və ya başqa mükafat qazanmamışam. Heç gözləmirəm də.

- Ssenari kursunda müəllim kimi fəaliyyət göstərmisiniz. İstənilən nəticəni əldə edə bilmisizmi?

— Bu, İntiqam Hacılının təşkil etdiyi kursi idi. Hazır uşaqlar da var idi. Onların içində Yasəmən Quliyeva və Əfsanə Əliyeva daha istedadlı idilər. Vaxtaşırı onlarla ssenari üzərində işləyirik. Əfsanə hətta "Milli Kitab" mükafatının qalibi oldu. Yasəmən isə artıq bədii filmin ssenarisi üzərində çalışır.

Söhbətləşdi: İbrahim Aydın

Tahir

354
Teqlər:
Azərbaycan, Tahir Əliyev, Kinorejissor, Vladimir Putin, Rejissor, Telefilm, Salnamə, kinostudiya, film, kino, Qriqori Natanson, Aleksey Uçitel, İrina Skobçeva, Vladimir Maşkov, kinofestival, kinematoqraf
Kinolent, arxiv şəkli

Bakıda 12-ci Beynəlxalq Qısa Filmlər Festivalı keçiriləcək

19
(Yenilənib 15:39 03.08.2021)
Yaşı 35-ə qədər olan rejissorlar 35 dəqiqədən çox olmayan qısa filmlərini festivala təqdim edə bilərlər.

BAKI, 3 avqust — Sputnik. Bakıda keçiriləcək 12-ci Beynəlxalq Qısa Filmlər Festivalına yerli və əcnəbi rejissorlardan film qəbulu elan edilib.

Festivalın Təşkilat Komitəsindən Sputnik Azərbaycan-a verilən məlumata görə, 12-16 noyabr tarixlərində Bakıda baş tutacaq festivala filmlərin qəbulu avqustun 25-nə kimi davam edəcək.

Yaşı 35-ə qədər olan rejissorlar 35 dəqiqədən çox olmayan qısa filmlərini festivalın beynəlxalq, yerli və "Cinemobil" bölmələrinə təqdim edə bilərlər.

Yerli müsabiqədə "Ən yaxşı bədii film", "Ən yaxşı sənədli film", "Ən yaxşı animasiya filmi", "Ən yaxşı sosial çarx" nominasiyaları üzrə qaliblərə festivalın əsas mükafatı "Qızıl Nar" və pul mükafatı təqdim ediləcək.

Festivalın yerli müsabiqəsinin ümumi mükafat fondu 5 000 AZN təşkil edir.

Göndərilən filmlər Seçim Komissiyası tərəfindən seçilərək müsabiqəyə buraxılacaqlar. Kinoforumun rəsmi proqramı 1 noyabrda açıqlanacaq.

Xatırladaq ki, Bakı Beynəlxalq Qısa Filmlər Festivalına hər il dünyanın müxtəlif ölkələrindən 2000-dən çox film göndərilir. Onların arasında Kann, Venesiya, Berlin Film Festivallarında, "OSKAR"da mükafat və uğur qazanmış filmlər də yer alır. Festivalın müsabiqə bölümündə isə fərqli yanaşma tərzi ilə seçilən filmlər yarışır.

Eləcə də oxuyun:

19
Teqlər:
film, festival, Bakı, beynəlxalq, qisas, Rejissor
Vətən müharibəsinin iştirakçısı Ruslan Kərimov

Müharibəni canlı görmək onu filmdə yaratmaq: Gənc rejissorun xəyalı gerçək olub

3953
(Yenilənib 22:03 02.08.2021)
Azərbaycanlı gənc rejissor hesab edir ki, heç bir dünya şöhrətli film oradakı hadisələri tam təsvir edə bilməz, tamaşaçıya müharibəni çatdıra bilməz.

BAKI, 2 avqust — Sputnik. Uşaq vaxtlarımdan müharibə filmlərinə, müharibə ilə bağlı əsərlərə böyük marağım olub. Müharibəni hərtərəfli araşdırırdım. Necə olur müharibə? Hansı proseslər baş verir müharibədə? Düşünməzdim ki, özüm də bir gün müharibənin canlı şahidi olacam...

Bu sözləri gənc rejissor, İkinci Qarabağ müharibəsi iştirakçısı Ruslan Kərimov deyib. Azərbaycan tarixinin ən şanlı səhifələrindən olan 44 günlük müharibənin canlı şahidi Ruslan Kərimov müharibə haqqında xatirələrini Sputnik Azərbaycan-la bölüşüb:

"O filmlərin, əsərlərin təsirindən mən rejissor oldum. Həmin həvəs məni bu istiqamətə yönəldib. Tale elə gətirdi ki, hərbi xidmətimi də düşmənlə sərhəd olan bölgədə keçirdim. 2017-ci ildə Azərbaycan Dövlət Mədəniyyət və Universitetini bitirdim, hərbi xidmətə getdim. Getdim düşdüm ön xətt briqadasına, Tərtər rayonunun Taqpqaraqoyunlu istiqamətinə. Düşmənlə məsafəmiz 60 metr idi. Artıq anlayırsan ki, cəbhə bu imiş. Onda anladım ki, müharibə heç də kinoda gördüyümüz deyilmiş. Heç bir dünya şöhrətli film oradakı hadisələri tam təsvir edə bilməz, tamaşaçıya müharibəni çatdıra bilməz. Əvvəllər müharibə filmi çəkmək istəyirdim. O vaxt müharibəni təsvir etmək istəyim başqa idi, indi isə müharibə barədə fikirlərim tam dəyişib".

27 sentyabr 2020-ci ildə İkinci Qarabağ müharibəsi başladı. Ruslan da könüllü olaraq cəbhəyə yola düşüb:

"Mən Murovdağda postda idim. Düşmən bizdən 150 metr yüksəklikdə idi. Bilirdik ki, hücum etsək, çox böyük itki verəcəyik. Çox çətin mövqelər idi. Sıldırım qayalar və dəhşətli şaxta var idi. Mən ora gedəndə yay geyimində getmişdim. Çünki burada havalar hələ də isti idi. Getdim gördüm ki, orada hava həddindən artıq şaxtalıdır. Mənim üçün fərqli bir keçid oldu. Dəhşət içində idim ki, 30 ildir ki, əsgərlərlərimiz, hərbiçilərimiz burada vuruşublar".

Müharibə başladı və o bütün arzularının, sənətinin, doğmalarının üstündən xətt çəkib diqqətini ancaq müharibəyə yönəldib: "Çünki, sağ qalmaq şansı çox az idi. Ora elə idi ki, ora nə top, nə də minamyot qalxa bilirdi. 3200 metr yüksəklikdə düşmən postu idi. Biz də təxmini 3000 metr yüksəklikdə idik. Ora yalnız piyada qalxa bilirdik. Silahla bərabər bütün əşyalarımız 32-33 kq idi. Hər gün də qar yağırdı. Mən qayıdanda artıq dizdən yuxarı idi qar. Artıq Bakıya gələcəyimə inamım qalmamışdı. Orada ölüm ən adi bir şey idi. Mənə atılmış, məndən yan keçmiş snaryad güllələrini sonradan bir neçə dəfə saymışam. İstədim o güllələri özümlə götürüm, xatirə kimi saxlayım. Amma komandirlərim icazə vermədilər ki, yolda problem ola bilər. Bu, hərbi sursatdır, mülki həyata keçməməlidir".

© Sputnik / Shahperi Abbasova
Vətən müharibəsinin iştirakçısı Ruslan Kərimov

Ruslan deyir ki, komandirləri bir neçə dəfə onun həyatını xilas ediblər: "Güllələr atılırdı, güllə yanımdan keçəndə komadir mənim sinəmdən tutub qayanın arxasına atdı. Orada bizim mövqeyimiz qayaların arxası və qazılmış xəndəklər idi. Müharibə başlayanın 3-cü ya da 4-cü günü idi. Çoxdan qurulmuş mövqe var idi, üzərində dəmir var idi. Düşmən öncə oranı vurdu. Biz oradan bir neçə dəqiqə ərzində çıxdıq. Tez səpələndik qayaların arxasına. Qarın üstündə oturmalı olduq. Həmin yerdə ocaq da yandıra bilməzdik. Çünki, yandırsaydıq, həmin yeri artilleriya ilə bombalayardılar. Qida bizim üçün fantastik bir şey idi. Çünki biz qayaların başında idik. Yeməkləri qayaların arxasında gizlədirdilər. Təkcə gedib həmin qidanı alıb-qayıtdıqda 4-5 saat keçirdi. Mən həmin postda 65 gün oldum. Müharibə bitdi. Biz düşdük briqadaya. Dekabrın 31-i evə qayıtdıq". 

Nə qədər həyatımız üçün riskli də olsa hər bir azərbaycanlı kimi qəhrəmanımızın da ən böyük arzusu idi ki, 30 il həsrətini çəkdiyimiz o torpaqlara ayaq bassın: "O həvəs, o həyəcan artıq bizdə düşmən qorxusunu da, güllə qorxusunu da, ölüm qorxusunu da məhv etmişdi. Çox mistik bir hisdir, sənin torpağındır və sən ora ayaq basa bilmirsən. Orada Ömər aşırımı postu var. Çox dəhşətli post idi. Oradan Kəlbəcərə keçdik. Oradan bizi, yəni könüllüləri Prezidentin sərəncamına əsasən tərxis etməyə başladılar".

Kərimov "Kəlbəcərin azad olunmasına görə" medalı ilə təltif olunub: "Açığı, gözləmirdim. Mən ora nəyəsə görə getməmişdim. Xəbəri komandirim çatdırdı mənə. Görəndə çox sevindim. Müəyyən müddət keçməsinə baxmayaraq hələ də o ab-havadan çıxmamışam. Tez-tez yuxularıma girir müharibə, şəhid olmuş döyüş yoldaşlarım. Müharibənin 3-cü günü mayor Rahib Babayev bizə dedi ki, hərə boynundan bir patron assın. Güllənin içini boşaltsın, ad-soyadınızı və əlaqə nömrəsi yazıb ondan boyunbağı hazırlasın. Boynunuzdan asırsınız, müharibə bitənə qədər boynunuzdan çıxarmayın onu. Birdən şəhid olsanız, tanınmaz halda olsanız, həmin boyunbağı vasitəsi ilə sizin ailənizlə əlaqə saxlaya bilərik. Orada anladım ki, bizim yaşadığım adi həyatdan tam fərqlənir müharibə.

Orada mütləq özünü hazırlamalısan. Soyuqqanlı olmaq lazımdır mütləq. Orada məndən də yaşca balaca əsgərlər var idi. Onlara görə, həm də özümə görə maksimum soyuqqanlı olmağı öyrəndim. Orada soyuqqanlı idim. Amma müharibədən sonra mənə hər şey təsir etməyə başlayıb. Oradakı hadisələr sanki indi-indi mənə təsir edir".

"Müharibədən əvvəlki Ruslanla, müharibədən sonrakı Ruslan arasında fərq böyükdür. Müharibə insanı tamamilə dəyişir" deyir həmsöhbətimiz:

"Müharibə ölümlə yaşam arasında çox incə bir xəttdir. Hansı ki, sən o xəttin üstündə yerimək məcburiyyətindəsən. Adi həyatda biz bu xəttə çox uzağıq. Amma müharibədə belə deyil. Bu hisləri sözlə əvəz edə bilmərəm. Orada gördüyüm dəhşətləri heç vaxt unutmayacağam, yəqin ki. Tək məndə yox, müharibədə bir gün belə olan insan o anları unuda bilməz. Əvvəl cəmiyyətə, təbiətə və ümumi bəşəriyyətə başqa cür baxırdımsa, indi o baxışların daha da dərinləşdi. Müharibədən qayıdandan sonra 1 ay yuxusuz qaldım. İndiyə qədər də yuxuda müharibəni görürəm. Döyüş dostları da fərqli olur. Onların yeri ayrı olur. Oradakı dostluqlar da adi həyatdakından fərqlənir. Çünki, onlar da səninlə birlikdə eyni həyatı yaşayır. Elələri var mənimlə birlikdə qayıdıb. Elələri də var ki, onlar hələ də oradadır. Hərbi xidmətləri hələ bitməyib".

© Photo : Courtesy of Ruslan Kerimov
Vətən müharibəsinin iştirakçısı Ruslan Kərimov

Gənc rejissor bildirir ki, Qarabağ müharibəsini əks etdirən çox az sayda film var. Onun fikrincə, həmin filmlər orada baş verənlərin heç 1 faizini belə, tamaşaçıya çatdıra bilmir: "Düşünürəm ki, bundan sonra olacaq. Müharibədən sonra da dəqiq, real hadisələrə söykənərək filmlər çəkiləcək. İstəyirəm müharibə filmləri çəkim. Bilirəm ki, çox çətindir. Qısametrajlı da olsa, film çəkmək istəyirəm. Başıma gələn hadisələrdən, müharibənin görünən və görünməyən tərəflərini vermək istəyirəm. Öz başıma gələn hadisələri toplayıb film kimi təqdim etmək istəyirəm. Oradakı qaranlıq məqamları göstərmək istəyirəm. Hansı ki, onu ancaq müharibəni görən insan bilir. Çox güman ki, adi müharibə filmlərindən fərqlənəcək".

Türkiyə Türkiyə Prezidenti Rəcəb Tayyib Ərdoğan Qarabağ Zəfəri və Xocalı qətliamı haqqında serial çəkilməsi barədə tapşırıq verib. Bununla bağlı Azərbaycanın Mədəniyyət naziri Anar Kərimov türkiyəli həmkarı Mehmet Nuri Ərsoyla görüşüb. Nazir Anar Kərimov bildirib ki, Qarabağ Zəfəri, Qafqaz İslam Ordusu və Xocalı qətliamı kimi tarixi hadisələr haqqında film və serialların çəkilməsi Azərbaycan və Türkiyə dostluq və qardaşlığın simvolu olacaq. Ruslan hesab edir ki, rejissor və ssenari müəllifi mütləq azərbaycanlı olmalıdır. Çünki o hisləri bizdən yaxşı heç kəs çatdıra bilməz: "Türkiyə qardaşımızdır, bu, öz yerində. Amma onları biz yaşamışıq, onu ancaq azərbaycanlı rejissor ssenarist və aktyor çatdıra bilər. Texniki baxımdan razılaş bilərəm. Texniki baxımdan kömək edə bilərlər".

Qeyd edək ki, Ruslan Kərimov müharibədən qayıtdıqdan sonra "İnilti" adlı ikihissəli qısa 3D animasiya film çəkib. Rejissorun verdiyi məlumata görə, film Xocalı soyqırımı haqqındadır: "Film Xocalı faciəsi zamanı ailəsi və bütün kənd əhalisi ermənilər tərəfindən vəhşicəsinə öldürülmüş bir uşaqdan bəhs edir. Bütün bu dəhşətləri o görür. Filmdəki hadisələr real faktlara əsaslanır. Bu, heç də mənim təxəyyülümün məhsulu olmasa da, hər kəsə məlumdur ki, Xocalıda baş verənlər filmdəki hadisələrdən daha dəhşətli olub".

Ruslanın dediyinə görə, film 2 aya, müxtəlif fasilələrlə çəkilib: "Zəif texnologiya ilə, adi bir noutbukda çəkmişəm. Əgər yüksək keyfiyyətli kompüter olsa idi, daha yaxşı görüntü, daha yaxşı keyfiyyətə render almaq imkanım olardı. Bu, ikihissəli olacaq. Bu, birinci hissəsidir. Əgər bəyənilərsə, 2-ci hissəsini davam edəcəm. Filmin heç bir büdcəsi yoxdur. Filmin çəkilişinə ayırdığım vaxt isə sadəcə işdən evə gəldikdən sonra bir neçə saatlıq məşğul olmağa imkanım olurdu. Mən də bu qısa vaxtlardan istifadə edərək təxəyyülümdəki hadisəni canlandırdım".

P.s. Azərbaycan Respublikası Kinematoqrafçılar İttifaqı bu gün Milli Kino mükafatını təqdim edib. Bu mükafatı 2 avqust Milli kino günü münasibətilə təşkil edilən tədbirdə Əməkdar incəsənət xadimi Rafael Qənbərova təqdim edilib. Mükafatın məbləği 2 min manatdır.

Qeyd edək ki, Milli Kino Mükafatı 2012-ci ildən Azərbaycan Respublikası Kinematoqrafçılar İttifaqının İdarə Heyətinin qərarı ilə təsis edilib və Azərbaycanda ən yüksək kino mükafatıdır.

Bu gün sözügedən tədbirdə “Qarabağ Azərbaycandır” ssenari müsabiqəsinin qalibləri də mükafatlandırılıb. Mükafatlar qaliblərə təqdim olunub:

Ən yaxşı tammetrajlı film ssenarisi – “Xəzər dalğası”: Rzayev Elnur Vahid oğlu. (Mükafatı – 5000 manat)

Ən yaxşı qısametrajlı film ssenarisi – “Xarı bülbül”: Nəsibli Leyla Eyvaz qızı. (Mükafatı – 3000 manat)

Qeyd edək ki, müsabiqəsnin qalibləri Nəsibli Leyla Eyvaz qızı ixtisasca həkim-pediatr, Rzayev Elnur Vahid oğlu isə iqtisadçıdır.

3953
Здание Администрации президента Азербайджанской Республики

Azad edilmiş ərazilərdə görülən işlərin icra vəziyyəti müzakirə olunub

0
(Yenilənib 19:30 04.08.2021)
Bərpa və yenidənqurma proseslərinin maksimum səmərəli, keyfiyyətli, sürətli, planlı və əlaqələndirilmiş şəkildə icrasının əsas məqsəd olduğunu qeyd edən Qərargahın rəhbəri görülən işlərin dinamik olaraq dəyişən vəziyyətə uyğun icrasının vacibliyini bildirib.

BAKI, 4 avqust - Sputnik. İşğaldan azad edilmiş ərazilərdə məsələlərin mərkəzləşdirilmiş qaydada həlli ilə bağlı Azərbaycan Respublikası Prezidentinin 2020-ci ilin 24 noyabr tarixli Sərəncamı ilə yaradılmış Əlaqələndirmə Qərargahının avqustun 4-də növbəti iclası keçirilib.

İclası açan Qərargahın rəhbəri, Prezident Administrasiyasının rəhbəri Samir Nuriyev Azərbaycan Respublikasının Prezidenti İlham Əliyevin daim diqqət mərkəzində saxladığı işğaldan azad edilmiş ərazilərin bərpa və yenidənqurma prosesləri ilə əlaqədar verdiyi tapşırıq və göstərişlərin, aparılan işlərin istiqamət və prioritetlərinin müəyyən edilməsi baxımından xüsusi əhəmiyyətini vurğulayıb.

Ümummilli prioritetlərdən biri olan bərpa və yenidənqurma proseslərinin maksimum səmərəli, keyfiyyətli, sürətli, planlı və əlaqələndirilmiş şəkildə icrasının əsas məqsəd olduğunu qeyd edən Qərargahın rəhbəri görülən işlərin dinamik olaraq dəyişən vəziyyətə uyğun icrasının vacibliyini bildirib.

İclasda əhalinin qayıdışı, şəhid ailələri və müharibə iştirakçılarının sosial təminatı, işğaldan azad olunmuş ərazilərdə iqtisadiyyatın inkişafı, şəhərsalma, nəqliyyat-infrastruktur layihələrinin müfəssəl planlaşdırılması və ahəngdar icrası ilə bağlı məsələlər ətraflı şəkildə müzakirə edilib. Qaldırılmış məsələlərlə əlaqədar növbəti addımlar müəyyən edilib və müvafiq tapşırıqlar verilib.

İşğaldan azad edilmiş ərazilərin yeni iqtisadi rayonlar bölgüsü nəzərə alınmaqla, Prezident İlham Əliyevin tapşırıqlarına uyğun olaraq bərpası və yenidən qurulması işlərinin sürətlə və yüksək peşəkarlıqla aparılması üçün bütün imkanların səfərbər edilməsinin vacibliyi vurğulanıb.

Həmçinin oxuyun:

İşğaldan azad edilmiş ərazilərdəki ekoloji durum müzakirə olunub

İşğaldan azad edilmiş ərazilərin bərpası ilə bağlı yekun layihə hökumətə təqdim olunub

İşğaldan azad olunmuş ərazilərdə enerji təhlükəsizliyi müzakirə olunub

0