Albert Eynşteyn, arxiv şəkli

Qorbaçov, Xankəndidəki masaj salonları, Eynşteyn bizim aeroportlar

167
(Yenilənib 10:14 23.08.2021)
İsti havanın beynin işləməsinə təsiri elmi faktdır: Deyilənə görə, Eynşteyn tez-tez başına soyuq su tökürmüş.

Sputnik Azərbaycan-ın "7x7" rubrikasında həftənin ən maraqlı yeddi hadisəsi şərh edilir.

Əfqanların əfqanı

Xalid Hüseynin “Çərpələng uçuran” romanı əfqanların əfqan etdiyi bu günlərdə yenidən aktuallıq qazandı. İllərdir Əfqanıstanda “uşaq var, uşaqlıq yoxdur”, “Uşaqların qorxularına qalib gəlmə üsulu budur: yatmaq” deyən yazıçını eşidən olmadı, belə görünür.

Əfqanıstana faciəni Talibanmı gətirdi? Xeyr. Sabitləşməkdə olan ölkə əl dəyişdirə-dəyişdirə, imperialistlərin giriş-çıxışları ilə bataqlığa çevrildi.

“Kopolunun” sovet hökuməti Əfqanıstanda səliqə-səhman yaratmışdı, Qorbaçov SSRİ-ni yıxan kimi, əfqanları da təkbaşına qoyub ordunu çıxartdı, taliblər hakimiyyətə gəldilər və sonrasını da bilirsiniz...

Ölkənin adındakı əfqan sözü, görünür, onun taleyinə biçilib.

İran ustaları

Onlardan bir az şimalda özünü islam dünyasının bayraqdarı kimi aparan İran isə əfqanlara yardım əlini uzatmadığı halda, Qarabağda islam düşmənlərinə dəstək verir. Xankəndiyə yük daşıyan İran avtomobillərinə görə Tehran hələ də heç bir izah verməyib.

Bu günlərdə isə sosial şəbəkələrdə İranın “jooiakar.com” saytında yerləşdirilmiş “Qarabağda tikinti işlərinə ustalar tələb olunur” elanı yayıldı. Elanda Qarabağın sülhməramlıların nəzarətində olan hissəsini Ermənistan kimi təqdim edən sayt və işçi axtaran şirkət, görünür, reallıqları öz arzusuna uyğun qavrayır.

İranlı qardaşlarımız ermənilərin viran qoyduğu, donuz saxladığı məscidlərin bərpasında da çalışa bilərdilər.

Xankəndidəki masaj salonları

Bir gün bölgədə əməkdaşlıq bərpa olunacaq, hətta bəlkə, azərbaycanlılarla ermənilər yenidən kirvə də olacaqlar - əbədi düşmənçilik mümkün deyil, – ancaq ədalətin tərəfində yer almayan dost dediyimiz ölkələrin mövqeyi yaddaşlarda həmişəlik qalacaq.

İrəvan artıq Bakı ilə konfrontasiyanın perspektivsizliyini dərk edir. Paşinyan son olaraq, hökumətin 2025-ci ilədək proqramını müzakirə edərkən 2 mesaj verib. Birincisi, sərhədlərin dəqiqləşdirilməsinin vacibliyi – baş nazir deyib ki, ordunun sərhəddən geri çağırılması, sərhədçilərin oraya yerləşdirilməsi nəzərdən keçirilir. İkincisi, Türkiyə ilə əməkdaşlıq mümkündür.

Məcburdurlar. Aclıq, səfalət milli ideologiyanı dalana gətirib çıxarıb.

Bu arada Xankəndidə masaj salonlarının sayı artıb, onlar əsasən rus sülhməramlılara xidmət göstərirlər. Və məlumata görə, bu günlərdə Ermənistanın müxtəlif yerlərindən əxlaqsız qadınların Xankəndiyə axını qeydə alınır.

Biz indi Laçın, Füzuli və Kəlbəcərdə beynəlxalq aeroportlar tikirik. İstəsələr, çox yaxın gələcəkdə həmin hava limanlarından istifadə edib, rus sülhməramlılarının dalınca şimala uça da bilərlər. Yeri gəlmişkən, Dövlət Turizm Agentliyinin rəhbəri ötən həftə verdiyi müsahibədə bildirdi ki, ölkəyə loukost şirkətlərin gəlməsinə çalışılır və bu, biletlərin qiymətinə təsir edəcək.

O əjdaha

“Delta” deyəsən özündən öncəkinə rəhmət oxudacaq. ABŞ, İsrail, Türkiyə, Rusiya... kimi ölkələrin gözü açılmır. Texasda reanimasiya şöbələrinin 94 faizi dolub, rus arağı dezinfeksiya üçün yetərli deyil, yəhudi təfəkkürü, türk əzmkarlığı da kara gəlmir.
İsveçdə “Delta”nın yeni mutasiyası yayılıb – ona peyvəndin hətta hər iki dozasını vurduranlar da yoluxurlar.

Bir çox ölkələrdə tüğyan edən o əjdaha indi bizi də əldən salır. Gündəlik yoluxmamız 4 mindən artıqdır, ölənlərin sayı da artıq hər gün 20-ni ötür. Öz vaksinimizin özümüzə daha çox təsir edəcəyinə ümid edirik, amma onun hazır olmasını gözləmədən peyvənd zəruridir...  

Qətiyyən ağdamlı olmayan ÜST-ün direktoru Gebreyesus “Delta” ştammı ilə mübarizə üçün 7.7 milyard dollar lazım olduğunu deyib.

Bu arada rus immunoloqlar açıqlayıblar ki, koronavirus daha çox kişiləri öldürür.

Yazıq kişilər

Ukraynada isə Verbayev kəndində 60 yaşlı qadın şəxsi təsərrüfatında üç kişini kölə kimi işlədirmiş. Quldar qadın kişilərin sənədlərini əllərindən alaraq, onları öldürəcəyi ilə hədələyib və tövlədə yaşayan kişilərə gördükləri iş müqabilində yalnız yemək verib.

Ancaq yazıq qadınlar da var: Sabirabadda arvadını və qaynatasını qətlə yetirən kişi intihar edib. Bərdədə isə qardaş bacısının başını kəsib. Bakıda qadın qaynı tərəfindən, Masallıda əmisi arvadı ilə mübahisə edən şəxs əmisi nəvəsi tərəfindən bıçaqlanıb, Hacıqabulda isə kürəkən qaynanasını döyüb.  

İlahiyyat üzrə elmlər doktoru, Qafqaz Müsəlmanları idarəsinin nümayəndəsi Hacı Surxay müəllim bu həftə Məhərrəmlikdə toy edənlərin 99 faizinin xoşbəxt olmayacağını bəyan etdi. Görəsən, xoşbəxt 1 faiz hansı kriteriya ilə seçiləcək?!

İsti havanın beynin işləməsinə təsiri elmi faktdır: Deyilənə görə, Eynşteyn tez-tez başına soyuq su tökürmüş.

İmicimizi korlayan ot örtüyü

Necə deyərlər, sonda idman haqqında. İki klubumuz Avroliqada mübarizəsini davam etdirir. İnsafən, hələlik pis təsir bağışlamırlar da.

Pis təsir bağışlayan yeganə təmsilçimiz Tofiq Bəhramov adına Respublika stadionudur. Avropanın artıq iki ölkəsi  - Kipr və Şotlandiya komandaları bu stadionda "Qarabağ"ın qonağı olub və hər iki klubun təmsilçiləri meydançaya görə narazılıqlarını ifadə ediblər.

Stadion təxminən pis bellənmiş əkin sahəsini xatırladır. Görəsən, stadion rəhbərliyi nəzərə alırmı ki, bu oyun ən azı həmin Avropa ölkələrində də izlənilir, belə meydança ölkəmiz haqqında da yaxşı təəssürat yaratmır?!

Eləcə də oxuyun:

167
Teqlər:
həftənin xülasəsi, Azərbaycan, dünya, Əfqanıstan, Ermənistan, 'Delta' ştammı, Xankəndi, masaj, sülhməramlı
Avtomobildən tüstü, arxiv şəkli

Avtoxuliqan: O, həyatı ilə risk edir, ölümə hazırdır

545
(Yenilənib 20:15 15.09.2021)
Əgər bu şəxs avtomobili ilə gəlir əldə etməklə məşğuldursa, ya da onun biznes fəaliyyətində avtomobilin olması vacibdirsə, bir il maşınsız qalmaq ümumilikdə xeyli maddi ziyan çəkməyə bərabər sayıla bilər.

Avtoxuliqanlıq edən şəxslər barədə mətbuatda ən azı bir iki xəbərin demək olar hər gün paylaşılmasına bir növ adət etmişik. Elə “Google” axtarış sistemində də bu sözü yazası olsaq, bir xəbər axını ilə rastlaşarıq. Özü də xarici yox, məhz Azərbaycanın öz avtoxuliqanlarından bəhs edən məlumat bolluğundan şoka düşmək olar. Avtoxuliqan sözünü rusca yazsaq belə, yenə bizim xəbərlərə rast gələcəyik. Yəni bu məsələdə axtarış sisteminin ilk bir neçə səhifəsini zəbt etmişik, lider mövqedəyik.

Avtoxuliqan kimdirsə, maşını ilə oyun çıxardır

Hətta avtoxuliqan sözünün yanına ABŞ sözü yazsaq, xeyri yoxdur, bəlkə xarici mediaya bağlı bir iki xəbər çıxar. Qalan avtoxuliqanlar elə özümüzə məxsusdur. Özü də avtoxuliqanlıq tək Bakıda yox, Azərbaycanın hər bir yerində rast gəlinən bir haldır. Bu siyahıda Beyləqan, Cəlilabad, Gədəbəy, Masallı, Zaqatala, Şəki kimi rayonların adı hallanır. 

Lənkəranda isə rayon sakini E.Mirzəyev isə lap “qəhrəmanlıq” edib. İçkili halda olan Mirzəyev idarə etdiyi “Belarus” markalı traktorla təhlükəli manevrlər edərək yol hərəkəti qaydalarını kobud surətdə pozub. Nə polisin xəbərdarlığına məhəl qoyub, nə də ətrafdakı insanların həyatına təhlükə törətdiyini anlayıb.

Bu sözə yaman öyrəşmişik, bəzən mahiyyətində nə olduğunu belə dərk etmirik. Düşünürük, maşını ilə oyun çıxardan, yolda min cür hərəkət edən elə avtoxuliqandır. Qanunvericiliyə görə, avtoxuliqanlıq dedikdə, nəqliyyat vasitəsinin sürücüsünün ictimai qaydaları və əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının müxtəlif üsullarla davamlı olaraq pozulması ilə müşayiət olunan qərəzli hərəkətləri nəzərdə tutulur. 

“Qonka”, “iki təkər”, “zmeyka”...

Cəzası da kifayət qədər ağırdır. Avtoxuliqanlığa yol vermiş şəxs bir il müddətinə nəqliyyat vasitəsini idarə etmək hüququndan məhrum edilməklə 500 manatdan 750 manatadək cərimə edilir. Bəzi hallarda 15 gündən bir ayadək inzibati həbs də tətbiq edilə bilər. Əgər bu şəxs avtomobili ilə gəlir əldə etməklə məşğuldursa, ya da onun biznes fəaliyyətində avtomobilin olması vacibdirsə, bir il maşınsız qalmaq ümumilikdə xeyli maddi ziyan çəkməyə bərabər sayıla bilər. Di gəl, nə avtoxuliqanlığın sonu görünür, nə də onların sayı azalır.

Özü də bu hərəkətlərə təkrar yol verilərsə, ağırlaşdırıcı hallarda daha ağır cəza tətbiq edilə bilər. Yəni cərimənin məbləği 2000 manata, idarə etmək hüququnun müddəti 2 ilə, həbs müddəti 2 aya qədər arta bilər. Özü də qanuna yeni qəbul edilmiş dəyişiklikdə avtoxuliqanlığın dəqiq parametrləri də göstərilib.

Sürücülər arasında “qonka”, “iki təkər”, “zmeyka” kimi tanınan əməllərin açılışı verilib. Avtoxuliqanlıq deyəndə, aşkar surətdə iki və ya daha artıq mexaniki nəqliyyat vasitəsinin iştirakı ilə sürət yarışının həyata keçirilməsi, avtomobil və ya motosikletin bir və ya daha çox təkərini yolun səthindən qaldırmaqla idarə edilməsi, avtomobili qəflətən sürətləndirməklə davamlı olaraq təkərlərin yolun səthi ilə sürtünməsi səslərini çıxardıqda və ya yolun səthində çoxsaylı təkər izlərini buraxması nəzərdə tutulur.

Toy karvanı bir təhlükə mənbəyidir

Avtoxuliqanlığın əlavə gizli formaları da var. Bu əməllərə bəzən göz yumulsa da, bunu qeyd etməyinə dəyər. Azərbaycanın toy ənənəsində gəlin gətirmə proseduru zamanı avtomobil sahibləri elə bir növ avtoxuliqanlıq edirlər. Səs-küy, yol hərəkəti qaydalarının aşkar pozulması, digər nəqliyyat vasitələri üçün yaranan təhlükə, “qonka”ya çıxma, “zmeyka” eləmə tez-tez baş verir, amma nə edəsən, polis özü də bunun qarşısını almaqda acizdir. Axı hamını belə bir gün gözləyir, hər bir şəxs evlənəndə belə səsli-küylü bir toyun olmasını arzulayır, amma nə qədər qəza baş verdiyini bir yol polisi bilir, bir də internet.

“Bəy-gəlin maşını aşdı”, “Toy karvanında qəza, gəlin xəsarət aldı”, “Qəza oldu, bəy öldü, gəlin ağır yaralandı”, “Toyuna gedən bəy və gəlin yol qəzasında öldü” başlıqlı xəbərlərin sayı-hesabı bilinmir. Toy karvanı bir təhlükə mənbəyidir.

Avtoxuliqanlıqla avtobus sürücüləri intensiv məşğul olur. Müştəri dalınca qaçan, bir-birini yolda “obqon” edən sürücüləri hər gün görürük, amma nə edəsən? Mətbuat da yazır, polis də cərimələyir, amma bu əməllərin sonu yoxdur. Həm də avtobus sürücüsünə çox zaman avtoxuliqanlıq maddəsi ilə cərimə yazılmır. Adi cərimə ilə buraxırlar. Bir neçə şəxsi idarəetmə hüququndan məhrum etməyə bəlkə də dəyərdi, başqalarına dərs olsun deyə.

Taksi fəaliyyəti ilə məşğul olanlar də avtoxuliqanlıq edirlər. Xüsusilə də yollarda işə və evinə tələsən insanları 1 manatdan daşıyan maşın sahibləri həmin bu müştəri uğrunda əsil savaşa çıxırlar. Bu tip sürücü mütləq özünü dayanacağa digər maşından tez çatdırmağa, müştərini götürməyə çalışır. Özü də bu yolu mümkün qədər tez-tez gəlib getməklə daha çox gəlir əldə etmək vacib məsələdir. Amma yolda nə qədər təhlükə yarandığını görürük.

Belə sürücü heç bir zaman tıxacda gözləmək niyyətində deyil. “Obqon”a da çıxacaq, digər zolağa da. Sürücü var, digər zolağı çıxması bir yana qalsın, avtomobili arxaya döndərərək maşını sürür. Bir növ yolun o biri hissəsindəki tıxacı arxada qoymaqla hərəkət edir, imkan tapan kimi də bir yerdən növbəyə soxulur. Eləsi var, hətta 1 manat artıq qazanmaq üçün öz yerinə də birini oturdub maşını təhlükəli formada idarə edir.

“Jiquli”də “iki təkər” əməliyyatını etmək asandır

Amma əsl avtoxuliqlar bunu ehtiyacdan etmirlər. İnsan var, passionarlığı yüksək, amma bunu idarə etmək üçün imkanı aşağıdır. Belə tip insana daim adrenalin tələb olunur, çatmadıqda xəstə kimi olur. Adam var dağa çıxır, adam var hündürmərtəbəli binanı “fəth” edir. Kimsə ekstremal idman növünü seçir. Hərə bir yolla özünü göstərməyə, hansısa tələbatını ödəməyə cəhd edir. Kimisi bir müddət sonra müalicə olunur, normal həyata dönür. Eləsi də var, son gününəcən həyatı ilə risk edir, ya şikəst olur, ya də ölüb gedir.

Avtoxuliqanlar da bu tip insan qrupuna aid edilə bilərlər. Motosikletlə avtoxuliqanlıq edənlər həyatla vidalaşmağa daha yaxın olanlardır. Bu nəqliyyat vasitəsinin özü yolda min cür oyun çıxartmaq üçün olduqca əlverişlidir, amma çox risklidir. Avtomobildən sağ çıxmaq şansı daha yüksəkdir. Özü də hər maşınla avtoxuliqanlıq etmək də olmur.

Avtoxuliqanların ən sevdiyi maşın “Jiquli” modelidir. Bu avtomobillə hər cür avtoxiliqanlıq etmək mümkündür. Xüsusilə də “iki təkər” əməliyyatını etmək asandır. Almanın maşınında xuliqanlıq etmək çətindir, hər bir təhlükəsizlik məqamı nəzərdə tutulub. “Jiquli” isə bu işə çox yarayır. Elə avtomobil satıcıları da məsələnin bu tərəfini gözəl bilirlər, bəlkə də su qiymətinə satılmalı olan maşını baha satırlar. Bəzən lap ağır vəziyyətdə olan bu növ avtomobili maşın ustası alır, üstünü-başını düzəldir, ikiqat bahasına potensial avtoxuliqana satır.

Bahalı maşını, əməlli-başlı işi, biliyi, savadı olmayan, amma təbiətən aktiv fəaliyyətə meyilli olan bir çox insanın özünü realizə etmək şansı məhz avtoxuliqanlıq vasitəsilə reallaşır. Nəticəsi də heç yaxşı olmur, yol qəzalarında elə daha çox bu tip avtomobildə xeyli insan ölür, şikəst olur.

“Avtoxuliqanlıq” etmək üçün xüsusi məkanlar ayrılmalıdır?

Problemdən çıxış yolu var. Dünya təcrübəsində bu bəladan yaxa qurtarmaq üçün təkcə ciddi cəza sistemi tətbiq edilmir. “Avtoxuliqanlıq” etmək üçün xüsusi məkan ayrılır, yerlər inşa edilir. İnkişaf etmiş ölkələrdə yolda qəzanın sayını azaltmaq üçün həyatı ilə risk edənlərə mütləq yer ayrılır, meydançalar inşa edilir. Ən azı zədə alanda belə yerindəcə yardım etmək mümkün olur, həm də başqalarının həyatı üçün təhlükə olmur.

Sakit həyat passionar insan üçün olduqca darıxdırıcıdır, beləsi adrenalinin səviyyəsini artırmaq üçün hər oyundan çıxmağa hazırdır. Deməli, bu prosesi yönləndirmək, idarə etmək üçün müəyyən tədbirlərin görülməsinə ehtiyac var. Necə ki, velosipedçilərə xüsusi yerlər ayrılır, baykerlərə də belə yerlər ayrılmalıdır. Avtoxuliqanların da meydançaları inşa edilməlidir. Bu yolla məsələnin həllinə nail ola, bu bəlanın kökünü kəsə bilərik.  

545
Nizami Gəncəvi

"Nizami Gəncəvi İli"nin nizamı

269
(Yenilənib 22:25 14.09.2021)
Sevindirici haldır ki, "Nizami Gəncəvi İli"nin sonuna doğru, böyük söz ustadının şəninə layiq bir neçə mötəbər və möhtəşəm tədbir planlaşdırılır. Könül istərdi ki, bu tədbirlərə elə ilin əvvəlindən start verilsin.

BAKI, 14 sentyabr — Sputnik. Yavaş-yavaş yola salmaqda olduğumuz il, "Nizami Gəncəvi İli"dir. Bu il dahi şair və mütəfəkkir Nizami Gəncəvinin anadan olmasının 880 illiyi tamam olur. Heç şübhəsiz ki, dahi Nizami bu xalqın övladıdır və ona sahib çıxmaq hər bir Vətən övladının borcudur.

Qüdrətli söz və fikir ustadının yaradıcılığının müstəsna əhəmiyyətini nəzərə alaraq 2021-ci il Azərbaycan Respublikasında "Nizami Gəncəvi İli" elan edilib. Dövlət başçısının Sərəncamına əsasən, il ərizində Azərbaycan Respublikasının Nazirlər Kabineti "Nizami Gəncəvi İli" ilə bağlı tədbirlər planı hazırlayıb. Pandemiya və postmüharibə dönəmində müəyyən tədbirlər keçirilsə də, əsas tədbirlər ilin sonuna planlaşdırılıb.

Sevindirici haldır ki, "Nizami Gəncəvi İli"nin sonuna doğru, böyük söz ustadının şəninə layiq bir neçə mötəbər və möhtəşəm tədbir planlaşdırılır. Könül istərdi ki, bu tədbirlərə elə ilin əvvəlindən start verilsin, ancaq ölkənin və dünyanın vəziyyəti məlumdur. Ancaq biz yenə də gözəl işlərə ümidimizi itirməyək.

Məsələn, çox sevindirici haldır ki, kitabsevərlərin həsrətlə gözlədiyi VII Bakı Beynəlxalq Kitab Sərgi-Yarmarkası "Baku International Book Fair 2021" Nizami Gəncəvinin 880 illik yubileyinə həsr olunacaq.

Şəxsən bu mənim üçün olduqca xoş xəbərdir. Çünki "Baku International Book Fair 2021" Nizami Gəncəvinin yüksək səviyyəli təqdimatı və təbliği üçün ən münasib tədbirlərdən biridir.

***

Təəssüf ki, bu günə qədər keçirilən tədbirlərin böyük qismi ürəkaçan deyil. Bu günə qədər ölkəmizdə böyük mütəfəkkirin şanına layiq olmasa da, xırda işbazların güzəranına normal təsir edən böyüklü-kiçikli tədbirlər keçirilib. Bütün bunların Nizami Gəncəvinin mahiyyəti üzrə tanıdılmasına, yenidən və daha düzgün şəkildə mənimsənilməsinə heç bir faydası olmadı. Çox təəssüf ki, Nizami ilə bağlı tədbirləri də fürsətə çevirmək istəyən, onun adından istifadə edib qazanc əldə etmək istəyənlər var.

Növcavan kəmfürsətlər, bir-birini təkrarlamaqdan usanmayan qocaman alimi-biəməllər monoqrafiyalar yazdı, qəzetləri, jurnalları, saytları Nizami haqqında yazılan yazılar bəzədi. Amma nə illah elədilərsə, Nizami sözünü, Nizami dühasını mahiyyətinə uyğun şəkildə düzgün təqdim etmədilər. Yəni, ulu Şeyxin yazdıqlarını sosrealizm işığında tərcümə edənlər sayəsində, ustadın fikir dünyasına sovet təfəkkürü ilə boylanmağa məhkum olan xalq, Nizamini "babat aforizmlər" müəllifi kimi tanımağa davam edir.

Ümid edirəm ki, Nizaminin doğru təbliği və bundan sonra görüləcək işlər onun adına da layiq olacaq.

Nizaminin təkrar tərcüməsi, yaradıcılığının, irsinin orijinallığını qorumaqla tanıdılması təklifimizlə bağlı müjdəli xəbərlər gəlir. Bu təkliflə çıxış edən qələm adamlarına nə qədər istehza edilsə də, təklifə qarşı çıxan qocaman söz adamları, alimlər tapıb çıxarsalar da, dövlət Nizaminin yenidən tərcüməsində maraqlıdır və artıq prosesin başladığını demək olar. İlin sonuna doğru Nizami ilə bağlı planlanan tədbirləri arzulanan və layiqli şəkildə baş tutmasına ümidimiz sonsuzdur.

Və ümid edirəm ki, VII Bakı Beynəlxalq Kitab Sərgi-Yarmarkasında Azərbaycan nəşriyyatlarının hər bir Nizami Gəncəvi yaradıcılığına işıq tutan heç olmasa bir kitabla təmsil olunacaq.

Oxunmalı kitab: İmmanuel Kant , "Təhsil haqqında"

Nəşriyyat: "Mücrü" Nəşriyyatı

Janr: Esse

Dili: Azərbaycan dili

Səhifə: 75

Kitabda təhsil, fiziki tərbiyə, mədəniyyət, ruhun tərbiyəsi, əxlaqi tərbiyə və praktik tərbiyə haqqında Alman fəlsəfəsinin qurucularından İmmanuel Kantın elmi-fəlsəfi esseləri yer alıb. Bu esselərin yazılmasından təxminən iki əsr keçsə də, Kantın düşüncələri, təklifləri və fikirləri faydalı və aktualdır.

Həmçinin oxuyun:

Mədəniyyətimizin intibahı, ədəbiyyatımızın triumfu

Hazırlıqlı oxucuya kitab tövsiyəsi: “Qumru əlifbası”

269
Teqlər:
Nizami
Kimsəsiz insanlar, arxiv şəkli

Səyavuş Aslanın küçədə gecələyən oğlu sosial müəssisəyə yerləşdiriləcək