Binanın damında kişi, arxiv şəkli

Panturalın həyasızlığının sirri

2818
(Yenilənib 20:25 13.07.2021)
Daxili İşlər Nazirliyi "Pantural" ləqəbli bloger Tural Səfərovla bağlı araşdırmaya başlayıb. Buna səbəb isə onun ötən gün "açıq geyinən qadınları zorlayın" çağırışını etmişdi.

BAKI, 13 iyul — Sputnik. Xatırlatmaq yerinə düşər ki, sosial şəbəkələr gəncliyimizi və gələcəyimizi təhdid edən çox ciddi təhlükədir. Bəli, tez-bazar və ucuz şöhrət elə bir bəladır ki, giriftar olmayan bilməz, bilsə də bu mərəzdən xilas olmaq istəməz. Sosial şəbəkələrdə məşhurlaşmaq, izləyici sayını artırmaq üçün kifayət qədər ciddi adamlar belə, min oyundan çıxırlar. Məşhurluq, izləyici toplamaq üçün atasını, anasını, övladını, hətta nənə-babasını lağ-lağı hədəfinə çevirənlər var. Bu baxımdan məşhurluq üçün soyunanları, döyüşənləri, söyüşənləri anlamaq mümkündür.

Bu şöhrət hərislərinin hədəfi izləyici sayını artırmaq və gündəmdə qalmaqdır. Hədəf məşhurluq olduqdan sonra bütün iyrənc yollar mübah görünür. Çünki bu məşhurluğun sonunda maddi qazanc və rahat həyat dayanır. Gülüb keçdiyimiz, istehza ilə yanaşdığımız sosial şəbəkə fenomenlərinin əksəriyyəti reklam və məhsul tanıtımı sayəsində bizim üçün inanılmaz görünən məbləğləri bir neçə saatda qazanır. Bu rahatlıq sayəsində onlar elmə, intellektə, oxumağa, özünü inkişaf etdirməyə ehtiyac duymurlar. Dünyadan bixəbər, ancaq məşhurluq üçün yaşayan bu cahillərin sonu da bu günlərdə müzakirə mövzusuna çevrilən Pantural kimi olur. Və ən qəribəsi budur ki, belələri hətta nifrətdən, təhqirdən, tənqiddən belə qazanc əldə edirlər. Yəni dolayısıyla nifrətlə bəslənirlər.

***

Sosial şəbəkələrdə məşhurluq ilk növbədə insanda özünəəminlik, müştəbehlik yaradır ki, bu da tədricən eqoizmə, başqalarına yuxarıdan-aşağı baxmağa, həyasızlığa çevrilir. Yəni izləyicilər sayəsində məşhurlaşmış, fenomenə çevrilmiş şəxslər özlərini hamıdan ağıllı hesab edir. Nəticədə artıq öyüd-nəsihət verməyə, öz zərərli düşüncələrini lazımlı və vacib ideyalar kimi izləyicilərinə təqdim etməyə başlayırlar.

Məşhurluq və izləyici kütləsinin yaratdığı özünəvurğunluq sayəsində bu cahillər özlərini ən ağıllı, ən ləyaqətli, ən bilikli və bacarıqlı insanlar hesab edirlər. Bütün pəstaha da bundan sonra başlayır. Özünü dahi və vacib şəxsiyyət sayan bu nadan sürüsü "heyranlarına", "izləyicilərinə" ağıl öyrətməyə, istiqamət verməyə başlayır. Xüsusilə qıcıq yaradan, kütlənin müzakirə etdiyi mövzulara toxunmaqla daha çox izləyicinin diqqətini cəlb edir.

Bu baxımdan qrafik dizayner kimi kifayət qədər ciddi işlər görmüş, öz sahəsində uğur qazanmış Pantural nifrət nitqləri ilə gündəmə gəlir. Halbuki, o, öz işləri ilə də gündəmdə qala bilərdi, əgər zamanında kino çəkmək adıyla "massovkaya" Ukraynadan qızlar gətirib, sponsoru müflis etməsəydi...

Bəli, Pantural ucuz şöhrət arxasınca qaçan, görməmiş və cahil bir adam olsa da, həm də ölkənin çox ciddi iş adamlarından kino çəkmək adıyla böyük məbləğdə pullar qoparmaqda, bu pulları havaya sovurmaqda, dələduzluqda günahlandırılır. Faciə bundadır ki, Pantural kimi nadanı bəsləyən iş adamları nə elmə, nə kitaba, nə də ciddi sənətə böyük pullar verərlər.

O ki qaldı Panturala, bu cahil mütləq kütləsi üçün "oynamalıdır". Çünki kütlə onu izləməklə məşhurlaşdırıb və artıq o, öz borcundan çıxmaq üçün kütləni riqqətə gətirən nələrsə danışmalıdır. Bəli, kütlə hətta onu söysə də, bu nadan qazanacaq. Yeni trend budur, söyüldükcə, təhqir olunduqca məşhurlaşırsan, məşhurlaşdıqca daha çox qazanırsan, qazandıqca əlçatmaz və maraqlı görünürsən və iş adamlarının, xeyriyyəçilərin diqqətini çəkib, daha çox pul qopara bilirsən. Bu isə həmin məxluqata ağlına və ağzına gələni danışmağa şərait yaradır.

***

"Kitabi-Dədə Qorqud" dastanında, konkret olaraq "Basatın Təpəgözü öldürdüyü boy"da maraqlı bir detal var. Pəri qızıyla zina edən çoban vədə yetişəndə ondan Oğuz elinin başına bəla gətirən əmanəti qəbul edir. Pəri qızın atıb getdiyi ət topası daşlandıqca, döyüldükcə, vurduqca böyüyür. Çoban qaçsa da, Oğuz igidləri bu ət topasını tapıb vurmaqda, təpikləməkdə davam edirlər. Nəhayət Aruz atdan enib təpikləyəndə mahmızıyla ət topasını deşir və içindən Oğuzun başına bəla olan Təpəgöz çıxır. Gerisini bilənlər bilir, bilməyənlər də vaxtında kitab oxusaydılar, şübhəsiz ki, bilərdilər...

Sözümün canı odur ki, bu gün Oğuz elinin başına bəla olan sosial şəbəkələrdə meydangirlik edib at oynadan "təpəgözlər" biz "vurduqca" böyüyür, yekəlir və daha da həyasızlaşırlar.

***

Bu gün müəyyən bir kütlənin təqdirini almaq üçün nifrət çıxışları edən panturallar sabah sakitləşməyəcək, yenə bir mövzu tapıb gündəmi məşğul etməyi bacaracaq, biz "vurduqca" böyüyüb, nəhəng bir təhlükəyə çevriləcəklər. Bu adamlara qarşı yeganə mübarizə metodu laqeyidlikdir. Bu adamları görməzdən gəldikcə, izləmədən çıxardıqca öz həqiqi dəyərlərini anlayıb, başa düşəcəklər. Biz "vurduqca" onlar həyasızlaşır, təbiri caizsə, quduzlaşırlar. Və təəssüf ki, biz cəmiyyət olaraq onlara laqeyd yanaşa bilmirik. Çünki bütün əyləncəmiz, hobbimiz sosial şəbəkələrdir. Hamımız bir gün məşhurlaşmaq ümidi ilə nələrsə yazır, çəkir, danışır və paylaşırıq. Bu gün sosial şəbəkədə məşhurluq arzusuyla hətta anasını söyməyə hazır olan insanlar var...

***

Şübhəsiz ki, Panturalın nifrət nitqi hüquq mühafizə orqanları tərəfindən araşdırılıb, ölçü götürülməlidir. Çünki o üzr istəsə də, məlum çağırışı, videonu silsə də heç nə dəyişmir. Təəssüf ki, bu əxlaqsız çağırışı, videonu izləyən minlərlə insan bu çağırışdan artıq təsirlənib. Bilirik ki, bu cür insanların cəzalandırılması belə, bəzən bu tip nifrət çağırışlarının qarşısını ala bilmir. Panturalı müdafiə edən məşhur simaların varlığı bir daha sübut edir ki, cəhalət, savadsızlıq, kitabsızlıq və dünyadan bixəbərlik bizim əsas düşmənimizdir. Və təəssüf ki, biz bu cahil sürüsünün qarşısında əliyalınıq. Çünki cəhalətə qarşı ən güclü və təsirli silahdan – kitabdan uzaq düşmüşük. İndi, bəlkə də kimsə, "ə, yenə də kitab?!" – deyib istehza edib, üz-gözünü turşudacaq. Ancaq biləsiniz ki, bu, məni qəti narahat etmir. Bəli, yenə kitab və həmişə kitab! Çünki xilasımızı yalnız elmdə, bilikdə, dünyanı anlamaqda və dərk etməkdə görürəm...

Səs-küyə səbəb olan çağırış

Ötən gün "Pantural" ləqəbli bloger Tural Səfərov "açıq geyinən qadınları zorlayın" çağırışını etmişdi. Bundan sonra sosial şəbəkədə bəziləri onu dəstəkləmiş, bəziləri isə bu çağırışı sərt tənqid etmişdilər. Hətta müğənni Nadir Qafarzadə sözügedən paylaşımlardan birinə "Başıaçıqları, şalvar geyinənləri, feministləri zorlayıb iradımızı bildirəcəyik. Qarşı çıxan kişicikləri də... Hamımız bir olsaq, qeyrətlilərin qabağında heç kim dura bilməz" sözlərini yazmışdı.

Qeyd edək ki, Daxili İşlər Nazirliyi (DİN) Tural Səfərovla bağlı araşdırmaya başlanıldığını açıqlayıb.

Eləcə də oxuyun:

2818
Teqlər:
cəmiyyət, sosial şəbəkələr, çağırış, əxlaq, kitab, müzakirə
Kişi Tokio-2020 Olimpiya Oyunlarının installyasiyasının qarşısından keçir

Koreya ilə Belarus liderlərini birləşdirən dəyər ermənilərin təbiətin məhvinə sevinməsi

12
(Yenilənib 20:39 01.08.2021)
Təəəcüblü deyil, Laçını, Kəlbəcəri tərk edərkən, evlərə od vuran, meşələri qırıb-dağıdan, 30 ildə abad kəndləri, şəhərləri Xirosimaya çevirən vandal toplumdan başqa reaksiya gözləmək əbəs olardı.

Təbiətə qarşı

Türkiyədə səmaya yüksələn alovlar ürəyimizi dağladı. Düzdür, bir millət-iki dövlət olduğumuzdan belə hadisələr bizdə xüsusi emosiyalar yaradır. Ancaq bu, həm də insani hissdir. Bütün dünya bu vəziyyətlə bağlı dərin təəssüf hissini ifadə edir, kədərlənir. Yalnız ermənilər istisnadır, sosial şəbəkələrin Ermənistan seqmentində toy-bayramdır... Təəəcüblü deyil, Laçını, Kəlbəcəri tərk edərkən, evlərə od vuran, meşələri qırıb-dağıdan, 30 ildə abad kəndləri, şəhərləri Xirosimaya çevirən vandal toplumdan başqa reaksiya gözləmək əbəs olardı.

Qardaş ölkə nə sınaqlar gördü, bunu da geridə qoyacaq. “Ağacsız torpaq vətən deyildir” – deyirdi böyük Atatürk.  Bu cür düşünən xalq nə baş versə də, cənnəti bərpa edəcək.

Təbii fəlakətlərə sevinən toplum isə görünür, anlamır ki, dünyanın bir küncündə məhv olan bir ağac digər küncündə də oksigeni azaldır.

Hadisənin təbii fəlakət olması ehtimalları isə getdikcə öləziyir.

Ermənilər və koreyalılar

Revaş ümidləri öləzimiş Paşinyan isə müttəfiqləri arasında tərəddüdlərini davam etdirir. Bəlkə də manipulyasiyalarını.

Gah Qərbə, gah da Moskvaya yönələn Paşiki daxildə daha çox Qərbin adamı kimi xarakterizə edir, yerli media onun rus kadrlarını təmizlədiyini vurğulayır. Paşikin ritorikası da Rusiyanın tezisi ilə ziddiyyət təşkil edir: şimal nəhəngi bölgədə kommunikasiyaların açılmasının vacibliyini, bunun 10 noyabr bəyanatının tələbi olduğunu deyir, Nikol isə hökumətin son iclasında bu məsələnin müzakirə edilmədiyini söyləyir.

Şimali Koreya kimi arxaik ruhlu dövlət Cənubi Koreya ilə sərhədini açdı, bizim qonşumuz isə...

Şimali Koreyanı xatırlamışkən, Kim Çen İn ordusuna döyüş hazırlığını artırmağı tapşırıb. Kim Cənubi Koreya və ABŞ-ın avqustun ortalarında keçirilməsi palanlaşdırılan illik hərbi təlimləri şimaldakı koreyalılar üçün təhdid kimi qiymətləndirib.

Ümumiyyətlə, Koreya dünyanın ən unikal ölkəsi olaraq qalır (Ermənistan da faşizm ənənələrini yaşadan ölkə kimi bu unikallığa aiddir). Şimali Koreya ilə Ermənistanın fərqi ondadır ki, birincilər bədbəxtliklərindən xəbərdar deyil, ermənilər isə artıq bunu anlayırlar. Təsadüfi deyil ki, hələ rəsmi statistikaya görə, bu ilin əvvəlindən Ermənistanı tərk edənlərlə ölkəyə qayıdanlar arasında nə az, nə çox, 30 min nəfər fərq var. 

Müqayisə üçün deyək ki, son 60 ildə Şimali Koreyadan Cənubi Koreyaya 23000 insan mühacirətə gedib, Cənubi Koreyadan Şimali Koreyaya isə 2 nəfər. Bu yazını Şimali Koreyalılar heç google translate-lə də oxuya bilməyəcəklər, çünki orda internet açıq deyil, ölkədə internet istifadəçilərinin sayı 605 nəfərdir.

Bu arada BMT dünyanın 23 ölkəsində, xüsusən də Afrika qitəsində aclıq fəlakəti gözlənildiyi barədə xəbərdarlıq edib. Məsələn, Əfqanıstanda ilin sonunadək 3,5 milyon insanın aclıq və yoluxucu xəstəliklərdən həyatını itirəcəyi proqnozlaşdırılır.

Bugünkü avantura erməniləri də aclıq çəkən ölkələrin siyahısına doğru aparır.

Belarus idmançılar hara getsin?

Həftənin ən maraqlı açıqlamalarından biri Belarus prezidenti Lukaşenkoya aiddir. Belarus prezident Tokio-2020-yə gedən idmançılara Şimali Koreya liderinin ritorikasında müraciət edib: “Əgər oraya turist kimi gedirsinizsə və əliboş qayıdacaqsınızsa, yaxşı olar ki, qayıtmayasınız. Bunu sizə hansısa ictimai təşkilat rəhbəri kimi yox, ölkə prezidenti kimi deyirəm. Məni necə istəyirsiniz, elə də başa düşün”.

Hələlik, Belarusun 1 qızılı var.

Bu arada Belarus dövlət başçısının nəvəsinin toyu olub. Məclis karantin qaydalarına uyğun olaraq, 70 nəfərlə keçib.

Prezident mandatı olan adamdır, istəsə 7000 adamla da keçirə bilərdi, etməyib.

Deputat adamdır...

Mandat demişkən, bu həftənin ən yaddaqalan hadisələrindən biri deputat mandatlı Elbrus Səlimovun polisi döyməsi idi. Belə ki, Xaçmazda restoranda yeyib-içmək məclisində olan E.Səlimov polisin gecə saat 12 olduğundan restoranın qapadılmalı olduğu tələbinə şillə-təpiklə cavab verib. İndi parlament onun mandatına baxacaq.

E.Səlimov Dağıstan Dövlət Universitetində təhsil alıb. Necə?! Yox, ağlınıza başqa şey gəlməsin, sadəcə, xatırlatdım.

…və təsadüfi deyil ki, bu günlərdə parlamentin payızda buraxılacağı, yeni tərkibin formalaşdırılacağı barədə söz-söhbətlər dolaşır.

Şəhid puluna göz dikənlər

Bu yaxınlarda şəhid ailəsinin evindən oğurluq edən dələduzları polis saxlamışdı. Canını vətən üçün qurban verənlərin malına göz dikməyə dələduzluq demək, yəqin, çox yumşaq səslənir… Ötən həftə isə Göyçay rayon sakini Ş.Qafarova oğlu, şəhid Kənan Qafarovun bank kartından 3960 manat pulun oğurlandığını bildirib. Polis bu şərəfsiz əməlin sahibini də saxlayıb. Göyçay rayon sakini M.Qafarov müəyyən edilərək saxlanılıb.

Bu hərəkətə də, bu cür addımı atanlara da içəridə nəsə ad tapıb qoyacaqlar, biz başımızı çox yormayaq.

 “Delta” və “Patı”

Koronavirusun “Delta” ştammı sürətlə yayılmağa davam edir. Payızda onun 4-cü dalğa şəklində ciddi qapanmalara səbəb olacağı da istisna deyil.

Yaponiya kimi intizamlı insanların yaşadığı ölkədə ştamm tüğyan edir: Yay Olimpiya Oyunlarının keçirildiyi gündoğar ölkədə bazar günü 12 342 yoluxma hadisəsi təsdiqlənib.

Ştammın görmə, eşitmə zəifliyinə səbəb olduğu deyilir.

Ən azı “Delta” qədər bizim üçün təhlükəyə çevrilmiş daha bir bəla var: Patı. Hər gün onun dəstə-dəstə istifadəçi və satıcıları polis bölmələrinə gətirilir.

Ötən həftə bu bəlanın yayılması ilə bağlı tükürpədici məlumat yayıldı. Belə ki, onun Xankəndidə istehsal olunduğu, məqsədli şəkildə İran vasitəsilə Azərbaycana ötürüldüyü bildirildi. Həm də Almaniya kəşfiyyatına istinadən. Mediada yayılan məlumatlarda qeyd edilir ki, Dünya Azərbaycanlıları Assambleyasının rəhbəri Rəşad Quliyevin Almaniya hökumətindəki mənbələrdən əldə etdiyi məlumata görə, ermənilər əvvəllər “patı” istehsalını Zəngilanda həyata keçirirmişlər. Zəngilan işğaldan azad edildikdən sonra isə, bu işi Xankəndidə davam etdirirlər.

İslahatlara qarşı

Narkotikin bu qədər tüğyan etməsinə görə təhsil ocaqları da məsuliyyət daşıyır. Amma görünür, əvvəlcə bu ocaqların özünü təmizləmək lazımdır.

Ötən həftə Bakı Dövlət Universitetində universitet rektorunun maliyyə məsələləri üzrə müşaviri Mirzə Mirzəyev və komendant Şahlar Bəgalıyevə bıçaqla xəsarət yetirildi. Hadisəni universitetin təsərrüfat şöbəsinin işçisi İsmixan Mirzəyevin törətdiyi bildirilir. Ki, onun müqaviləsini uzatmayıblar və İsmixan müəllim də bu cür haqq-hesab çürütməyə qərar verib.

İslahatlara qarşı gedənlər, hətta əli bıçaqlı gedənlər həmişə olur.

İslahalar demişkən, biz BDU-da oxuyanda  (2003-2007) həm də bizim ixtisas - Nəşriyyat işi və redaktəetmə ixtisasının tələbələri üçün nəzərdə tutulmuş komputer otağından istifadəyə icazə verilmirdi, 4 ildə o otağı 2-3 dəfə gördük. Görəsən, islahatlar o otağın qapısındakı qıfılı da qıra bilibmi?!

12
Bakı sakinləri

Məşhur olmaq üçün etməli?

1171
(Yenilənib 00:14 31.07.2021)
Dünyanın dərdini çəkmək olduqca çətin, ağır və əzablıdır. Belə ağır, kədərli hadisələri izləməkdənsə, dünyanın gələcəyi ilə bağlı əndişələnməkdənsə, ekzistensial sancılar çəkməkdənsə oturub ölkə gündəmini izləmək daha əyləncəli, daha maraqlıdır.

Dünyada çox qəribə proseslər gedir. Elə bizim yaşadığımız regionda da vəziyyət stabil deyil. Dünyadakı və regiondakı vəziyyəti şərh etmək, qanınızı daha da qaraltmaq istəməzdim. Onsuz da beynəlxalq şərhçilər, politoloqlar, regionşünaslar lazımı şərhləri, açıqlamaları verir. Başa düşürəm ki, cəmiyyət olaraq dünyadan bixəbər yaşamaq, baş verən prosesləri müzakirə etmədən, dərk etmədən, düşünmədən yaşamaq çətindir. Ancaq arada insan özünə, öz ölkəsinə, öz balaca dünyasına vaxt ayırmalıdır. Çünki dünyanın dərdini çəkmək olduqca çətin, ağır və əzablıdır. Belə ağır, kədərli hadisələri izləməkdənsə, dünyanın gələcəyi ilə bağlı əndişələnməkdənsə, ekzistensial sancılar çəkməkdənsə oturub ölkə gündəmini izləmək daha əyləncəli, daha maraqlıdır.

***

Dünyadan yorulunda boş vaxtımdan istifadə edib, çağdaş ədəbiyyatımızın ən tanınan siması ilə, çağdaş siyasətimizin bir o qədər populyar olan gənc ulduzunun (adlarını özüm çəkmirəm, çünki hamınız tanıyırsınız) debatına baxdım. Və həmin boş vaxt ərzində anladım ki, dünyada gedən proseslərdən xəbərsiz, reallıqdan qopub, sosial şəbəkələrdə yaradılmış gündəmə uyğun yaşamaq olduqca asan və rahatmış. Təəssüf ki, bizim cəmiyyət sosial şəbəkələrə qarşı çox laqeyiddir. Hara baxırsan insanlar kitab oxuyur: avtobusda, metroda, parkda, bulvarda, çimərlikdə... Gənclər dünyada yeni yaranan sənət cərəyanlarını, müasir texnalogiyanı, elmi yenilikləri, siyasi prosesləri, iqtisadi sıçrayışları və çöküşləri izləyir, kütləvi şəkildə elmə-irfana yuvarlanır. İnsanların bu vəziyyəti məni olduqca narahat edir. Məncə müasir insan oxumaqdan, araşdırmaqdan, özünü inkişaf etdirməkdən macal tapıb, sosial şəbəkələrə də vaxt ayırmalıdır.

***

Bir də görürsən ki, hansısa ağzıgöyçək deyir ki, sənət adamının, ədəbiyyatçının, jurnalistin, siyasətçinin, ictimai xadimin bəşəri düşüncələri, dərin mütaliəsi, dünyagörüşü, özünəməxsus yanaşması, erudisiyası olmalıdır. Boş söhbətdir! Müasir dünyada bütün bunlar bicadır! Gül kimi sosial şəbəkələr var ki, bu irfani yeni kəşflər yazmağa, araşdırmağa, bilgi sahibi olmağa hər cür şərait yaradır. Siyasətçisən? Çıx ürəyin istəyəni yaz, sözünü de. Bəyənən "like" edəcək, "share" edəcək, bəyənməyən də gəlib söyüşünü-təhqirini yazıb, etirazını bildirəcək.

Sənə böyük kütlələrə xitab etmək lazımdırsa, bundan gözəl şərait ola bilməz. Üstəlik yazdıqlarını şərh edənlərlə çəkişə-çəkişə bilgilərin, məlumatın da artacaq, istənilən yutub verlişində, feysbuk debatında çıxıb sözünü deyə biləcəksən. Bu baxımdan çağdaş siyasətimizin populyar gənc ulduzunun – hansı ki, ümummilli lideri Məhəmməd peyğəmbərdir – siyasi karyerası hər bir gənc siyasətçi üçün örnək ola bilər.

Şairin, yazıçının işi daha asandır. Ağlına gələni bəzəkli-düzəkli cümlələrlə ifadə edib, ağlına gəlməyənləri kiminsə ağzından qapıb, kitablardan seçmə cümlələr tapıb çıxışlarında gözünü süzdürüb, səsinə bəlağət qatıb kütləyə sevinc bəxş edə bilərsən. Lap sənin şəxsi keyfiyyətlərin aşağı, dünyagörüşün qıt olsun, əsas "like" sayı, mesaj qutuna gələn heyranlıq mesajlarıdır. Dünyanın qəmini bu qədər asan şəkildə çiynindən atıb, ədəbiyyat yaratmaq mümkündür, nümunələri vardır, təcrübəylə də isbat edilmişdir.

***

Kim nə deyir desin, əsas hay-küy salıb, həyasızlıq edib, çığırıb-bağırıb gündəmdə qalmaq, daha çox adama xitab etməkdir. Dünya kiçikləşib, cılızlaşıb, sıxılıb-sıxlaşıb bir ağıllı telefonun ekranına sığışıb. Dünyada telefonla kitab yazanlar, kino çəkənlər, musiqi bəstələyənlər, ali təhsil alanlar, ölkə gündəmini dəyişənlər, biznes quranlar, ev-eşik sahibi olanlar, ov ovlayıb, quş quşlayanlar var. Bizdə isə bütün bunların hamısını ümumiləşdirib, sadəcə "quşlayanlar" var.

Ümid edirəm ki, bizim gənclərimiz də dünyanın oxumaqdan, araşdırmaqdan, müşahidə etməkdən, təhsildən, elmdən ibarət olmadığını anlayacaq. Çünki, sosial şəbəkələrdə çox sayda örnəklər var ki, onların həyat və fəaliyyəti sizlərə örnək ola bilər. Əziyyət çəkmədən, mübarizə aparmadan da qəhrəman olmağın, layiq olmadan şöhrət qazanmağın asan yolları vardır. Ümumiyyətlə sadəlövh kütlənin qəhrəmanı olmaq, sevgisini qazanmaq, məşhurlaşmaq çox asandır. Və bir gün o kütlənin qurbanı olmaq ehtimalı olsa belə, Varholun dediyi 15 dəqiqəlik məşhurluğa dəyər. Beyninizi çox yükləməyin, çünki beyninizi nə qədər çox yorsanız bir o qədər yaradıcı imkanları artacaq. Qanlı-qadalı dünyada bu zülmə nə gərək var?

1171
Azərbaycan hərbçiləri, arxiv şəkli

Ermənistan yenə Naxçıvanı atəşə tutub, cavab atəşi ilə susdurulub