Toy, arxiv şəkli

Etiraflar, raketlər, toylar gecə "mühəndis işləri"

2877
(Yenilənib 01:26 31.05.2021)
Qaramyan: "Mənim üçün ərazi itkisindən daha ağrılı məqam Ermənistan silahlı qüvvələrinin onurğa sütununun sındırılmasıdır".

7x7 həftənin ən yaddaqalan hadisələrini şərh edir

Gec-tez koronavirusun iynəsi tapılacaq, yaxşı olar ki, alimlər erməni xəstəliyi üzərində baş sındırsınlar. 44 gündə nəinki top-tüfənglərini, papaqlarını, qocalarını da atıb qaçan işğalçıya hardansa vəhy gəlib. Həftə ərzində törətdiyi təxribatlar qarşı tərəfin qaşındığını təsdiq edir. Yaz gələndə orqanizmdə hormonal dəyişikliklər baş verir. Amma axı hormonların da yaddaşı olmalıdır.

Siyasətçilər seçkiyə köklənib çox şeydən dəm vura bilər, amma əsas odur, generallar nə deyir. Məsələn, bu həftə daha bir erməni generalı Arşavir Qaramyan etiraf edib ki, Ermənistan ordusu deyilən bir təsisat mövcud deyil: "Mənim üçün ərazi itkisindən daha ağrılı məqam Ermənistan silahlı qüvvələrinin onurğa sütununun sındırılmasıdır".

Paşinyanı nüfuzdan salmağa çalışan siyasi rəqibləri də maraqlı etiraflar edirlər. Məsələn, Robert Koçaryandan deyir ki, "Biz danışıqların tam hüquqlu tərəfi deyilik".

Daha bir sabiq Ter-Petrosyan da acı həqiqəti qəbul edir: "Serj Saqrsyan deyir ki, bütün təklifləri Azərbaycan tərəfi rədd edib. Amma o, fikirləşməli idi ki, nəyə görə Azərbaycan tərəfi rədd edirdi. Deməli, Azərbaycan əmin idi ki, zaman onun xeyrinə işləyir".

Amma Paşinyan özü də etiraf edir: "Erməni zabit qızıla görə S-300 sisteminin platasını çıxarıb satır".

Belə. Çini hərbi baza yaratmağa dəvət etməklə Ermənistan Rusiyaya alternativ axtarır. Amma Azərbaycanla nəhəng tranzit layihəyə qoşulan Pekin üçün İrəvanın arzusu prioritet yaratmır.

Ermənistan üçün gələcək qaranlıq görünür. Amma bir amerikan məsəli də var: hara getdiyini bilmyən adam azmaz.

Qaranlıq və azmaq demişkən…

Gecə mühəndis işləri?

Hərbçilərimiz Kəlbəcər istiqamətində Azərbaycan ərazisinə daxil olaaraq minalama aparan 6 diversantı saxladı. İrəvanın açıqlaması absurd idi: Hərbçilər mühəndis işləri görürmüşlər. İki sual yaranır: Gecə saat 03.00-da mühəndis işləri?! Və Azərbaycan ərazisində?! Bəlkə azıb keçiblər?! Bu bəhanə gəlməyib ağıllarına?

Ermənistan nəhayət, sülhə doğru gedən yolu minalamaq əvəzinə Azərbaycanla konstruktiv əməkdaşlığa can atıb, bataqlıqdan çıxa bilər.

Dünya Marsa köçür, bunlar hələ də… yerdə də özlərinə yer tapa bilmirlər.

Bu arada Türkiyədə xəstəxanalara dərmanı PUA ilə daşıyacaqlar. Ermənistana da belə aparat lazımdır, - baxmyaraq ki, bu apartla bağlı xoş xatirələri yoxdur, - ancaq indi yaşlı və xəstələrə dərman daşımağa adam qalmayıb, cavanlar işləmək üçün Rusiyaya qaçır.

Kürə dığırlanır

Marsda həyat axtartışlarının məntiqi var, çünki Yer kürəsi indi deyəsən fırlanmır, dığırlanır. Hindistanda koronavirusun fəsadları nəticəsində mukormikoz ("qara kif") epidemiyası yayılıb. Epidemiya artıq qonşu Banqladeşə də sıçrayıb.

Bu arada xüsusi təlim keçən itlərin 94 faizi COVID-19 infeksiyasını aşkar edə bilirlər. Bu, İngiltərənin paytaxtı Londonda yerlən Gigiyena və Tropik Tibb Məktəbində aparılan araşdırma zamanı məlum olub.

Bu həftə Yerə tərəf uçan təhlükəli asteroid isə xoşbəxtlikdən bir az aralıdan keçdi. Ancaq ÜST öz amluasındadır: Təşkilatın müdiri dünyada yeni ölümcül virusun ortaya çıxacağı barədə proqnoz verib.

Pandemiyadan sonra özünə qapanan ölkələrin gediş-gəlişinə boğazlar da əngəl yaratmağa başlayıb. Təxminən 2 ay öncə bir neçə günlük bağlanan Suveyş kanalı dünya iqtisadiyyatına milyardlarla dollar ziyan vurmuşdu. Bu həftə isə İstanbulun Bosfor boğazı buna səbəb uzunluğu Xorvatiya bayrağı altında üzən "Rava" neft tankerinin idarəetməni itirməsi ilə gəmilərin hərəkəti üçün müvəqqəti olaraq bağlanıb.

Toylar

Boğazların bağlanması 3-5 günlükdür, restoranlar isə toylar üçün 1 ildən çoxdur ki, qapalıdır. Ancaq bu, o demək deyil ki, heç kim evlənmir.

Məsələn, Britaniyanın Baş naziri Boris Conson sevgilisi Kerri Saymondsla gizli şəkildə ailə həyatı qurub. Yığıncaqda B.Consonun və xanımının ən yaxın dostları və ailə üzvləri iştirak ediblər.

India.com portalının xəbərinə görə isə Hindistanda bir toyda gəlin qəfil dünyasını dəyişib və toy sahibləri gəlini onu doğma bacısı ilə əvəzləməyə qərar veriblər. Hindlilər elə bu həftə daha bir hoqqa qaynadıblar. Toylara icazə verilmədiyindən gənclər təyyarədə evləniblər, ancaq indi hökumət onları cəzalandıracaq.

Bir yapon cütlük də havada evlənib, ancaq onlar tabu qoyulmuş sayı keçmədiklərindən, xoşbəxt-xoşbəxt bal ayına gedə bilərlər.

Bu arada toylara icazə verilsə, ehtimal olunur ki, ölkəmizdə 1 il ərzində 200 minədək toy olacaq. Toyların olmaması iqtisadiyyat üçün də dövriyyənin azalmasıdır. İnanın, xeyir-şərlərin məhdudlaşdırılması bizim qədər olmasa da, dünya üçün də itkidir.

Vaksinlər atılacaq

Dünyanın bu qədər ziyana düşdüyü azmış kimi Çinin Honkonq bölgəsində istifadə olunmayan bir çox yeni koronavirus peyvəndi atılmalı olacaq. Əhali vaksin vurdurmaq istəmir, peyvəndin isə son istifadə tarixi var.

Dünyanın onlarla ölkəsi hələ də vaksinin necə olduğunu bilmir, Çində isə onu vaxtı keçdiyi üçün zibil qutusuna atacaqlar. Necə ki, dünyanın bir küncündə aclıq çəkən milyonlarla insan, digər tərəfində isə ərzağı israf edənlər yaşayır – bir kürənin içərisində. Yeri gəlmişkən, hər il dünyada 1,3 mlrd. ton qida itirilir və ya israf edilir. Qida itkisi və tullantılarının dəyəri 680 mlrd. ABŞ dolları təşkil edir. İnkişaf etməkdə olan ölkələrdə isə bu rəqəm 310 mlrd. dollardır.

Bu arada bu həftə Rusiyada istehsalçılar toyuq yumurtasının çatışmazlığı riski barədə xəbərdarlıq ediblər.

Əsas raket olsun

Şimaldakı dünya nəhənglərini şübhəsiz, xüsusilə cənub qütbündə yaşayan ac insanlar maraqlandırmır. Onların proriteti ilk növbədə yaxşı raketlərə malik olmaq, onları satmaq, daha çox satmaqdır.

Bu həftə ABŞ Dövlət Katibinin müavini Uendi Şerman deyib ki, ABŞ Türkiyənin əldə etdiyi Rusiya istehsalı S-400 zenit-raket kompleksinə dair rəsmi Ankaraya alternativ təqdim edib.

Bu arada İran yaxın zamanlarda yerli istehsal olan bir neçə peykini orbitə çıxaracaq.

Yeni kitablar

Azərbaycanın da 3 peyki orbitdədir, amma kitablarımıza hər halda, yenidən baxmalıyıq. Yeni-yeni peyklərlə yüksəkliklərə qalxmaq üçün. Amma keçmişi, tarixi də unutmaq olmaz. Bu həftə altıncı sinif tarix dərsliyində müvafiq kommisiya tərəfindən 50-dən çox səhv tapıldı.

Bu səhvlər olsa da, olmasa da, bütün tarix dərsliklərimiz yenilənməlidir. Çünki Azərbaycan əsgəri tarixi yenidən yazıb. Kitablara vurulacaq çoxlu topçu Vüsallar var.

2877
NATO hərbçiləri, arxiv şəkli

NATO-nun yeni anti-Rusiya "manifesti" bütün MDB ölkələrini təhdid edir

42
(Yenilənib 18:40 16.06.2021)
20-ci əsrin son bir rübü ərzində İranı, Əfqanıstanı, Liviyanı, keçmiş Yuqoslaviya və Suriyanı aktiv şəkildə bombalayan Şimali Atlantika Alyansının çətin ki, bu tip bəyanatlara haqqı çatsın.

BAKI, 16 iyun — Sputnik. Şimali Atlantika Alyansının iyun sammiti digər bütün prioritet və uydurma təhlükəsizlik təhdidlərindən xüsusi şəkildə tənzimlənməsi ilə fərqlənir. NATO-nun son bildirişindəki təhrif olunmuş koordinat sistemində Rusiya əvvəlcədən də proqnozlaşdırıldığı kimi "sülhə əsas təhlükə" olaraq təqdim edildi. İkinci yerə – böyük bir fərqlə – Şimali Koreya və İran, üçüncü yerə isə sülhsevər Belarus Respublikası "qoyuldu". Maraqlıdır ki, Çinin adı yalnız dördüncü yerdə qeyd olunur.

NATO-ya heç kim bərabərhüquqlu, müstəqil dövlətləri bu şəkildə "növlərə" bölmək haqqı verməyib. Üstəlik, alyansın planetin cəmi on faiz əhalisinin maraqlarına xidmət edən "ittihamedici" arqumentləri qeyri-adekvat təsir bağışlayır.

14 iyun Brüssel sammitinin kommünikesi mahiyyət etibarilə uzunçu, ağlasığmaz, MDB ölkələri və bütövlükdə bəşəriyyət üçün təhlükəli anti-Rusiya "manifestidir". Sənəddə "Rusiya təhdidinə" ondan artıq "ittihamedici mahiyyətdə" (9–15, 25, 46, 50, 54) maddə həsr olunub. Müqayisə üçün bildirək ki, "Çin təhdidi" cəmi iki (55–56) müddəada öz əksini tapıb. Sənəd paradoksal xarakter daşıyır.

20-ci əsrin son bir rübü ərzində İranı, Əfqanıstanı, Liviyanı, keçmiş Yuqoslaviya və Suriyanı aktiv şəkildə bombalayan alyansın çətin ki, bu tip bəyanatlara haqqı çatsın: "Rusiyanın təcavüzkar hərəkətləri Avro-Atlantik təhlükəsizlik üçün təhdiddir". Bununla belə, kommünikedə qeyd olunur ki, blok 25 ildən artıqdır Rusiya ilə əməkdaşlıq qurur, özünün beynəlxalq öhdəliklərini yerinə yetrir, Rusiya isə dəyərləri, prinsipləri, ona olan etibarı və öhdəlikləri pozmaqla məşğuldur".

Əsassız ittihamlar

Rusiyanın müxtəlif sahələrdə hərbi gücünü artırması Şimali Atlantika Alyansını narahat edir: yeni hərbi potensial, "NATO sərhədlərinin yaxınlığındakı ərazilər də daxil olmaqla, təxribat xarakterli fəaliyyətlər", xəbərdarlıq edilmədən aparılan geniş miqyaslı təlimlər, Kalininqrad vilayətində müasir ikili istifadə raketlərinin yerləşdirilməsi, Belarusla hərbi inteqrasiya. Buradaca xatırlatmağa ehtiyac var: Rusiya alyansın sərhədlərinə yaxınlaşmayıb, əksinə, NATO Rusiyanın sərhədlərinə doğru genişlənib. Və artıq çoxdan MDB məkanında "rəngli inqilablar" formatında hibrid müharibələri təcrübədən keçirir. NATO – humanitar təşkilat deyil və Rusiya Federasiyasına potensial təhlükəsizlik təhdidi hesab olunur. Odur ki Moskva və Minskin reaksiyası tamamilə qanunauyğundur. Çünki Rusiya və Belarus alyansın Avropada (keçmiş Yuqoslaviya), Yaxın Şərqdə (İraq, Əfqanıstan, Suriya), Afrikada (Liviya) və digər başqa yerlərdə geosiyasi "korreksiyalarını" unutmayıb.

Ortada real dəlillər olmadığından, NATO "müttəfiq ölkələrdə seçkilərə və demokratik proseslərə müdaxilə cəhdləri", "geniş miqyaslı dezinformasiya kampaniyaları", "Rusiya xüsusi xidmət orqanlarının qanunsuz və dağıdıcı hərəkətləri"ni vurğulayaraq Rusiyanı Çex Respublikası və ABŞ-ı "dost olmayan ölkələr"in siyahısından çıxarmağa çağırır.

Guya Rusiya "NATO-nu vadar etmək" üçün bir sıra orta və qısamənzilli raket kompleksləri yerləşdirməklə nüvə arsenalını şaxələndirir. Nəyə vadar etmək üçün? Əgər NATO ölkələri Beynəlxaql Məsələlər üzrə Rusiya Şurasının Avropada raketlərin yerləşdirilməsinə moratorium qoyulması ilə bağlı Moskvanın konkret təklifini dəstəkləmirsə, "strateji hədə-qorxunun təcavüzkar siyasəti" kimi boş ifadələr nə deməkdir?

"Rusiya silahlı qüvvələrin hərbi təlimlərinə daha çox diqqət ayırmağa və məsuliyyətsiz nüvə ritorikasından istifadəyə davam edir" – əfv edin, amma dünyanın bütün ölkələri öz ərazilərində hərbi manevrlər edirlər və yalnız NATO üzvü olan dövlətlər belə təlimlərin əksəriyyətini xarici ərazilərdə məsuliyyətsiz və aqressiv şəkildə həyata keçirirlər. Məgər Rusiya kimisə birbaşa nüvə silahından istifadə ilə təhdid edib və ya açıq şəkildə Meksikanın şimalında, Kanadanın cənubunda hərbi manevrlər aparmaq üçün qoşunlarını okeanın o tayına ötürüb? Eynilə Pentaqonun Avropada etdiyi kimi. Rusiyanın həyata keçirdiyi təlimlər "həddən artıq" genişmiqyaslıdır? Axı Rusiya Federasiyasının ərazisinin də (ABŞ-dan iki dəfə böyükdür) dünyada analoqu yoxdur və belə böyük ölkənin müdafiəsini təmin etmək üçün müəyyən alətlər tələb olunur. Aydın məsələdir ki, Rusiyanın ünvanına səsləndirilən bütün bu uzun-uzadı ittihamlar ABŞ və NATO-nun Rusiya və onun müttəfiqlərinə qarşı hərbi hərəkətlərə real hazırlığını ört-basdır etmək və haqq qazandırmaq üçündür.

Rumıniya və Baltikyanı ölkələrdə hərbi infrastrukturun və alyansın xarici birliklərinin artan "mövcudluğu" dinc bölgələrin və dənizlərin tədricən silahlı qarşıdurma bölgəsinə çevrilməsinə parlaq nümunədir. Postsovet məkanının şərqini demontaj və talan etmək üçün. Biz burada amerikalılar tərəfindən İran, İraq və ya Suriya neftinin hasilatı (oğurlanması) məsələsinə toxunmuruq, ancaq Orta Asiyadakı Sibir karbohidrogenləri və faydalı qazıntı yataqları da kiçik "qənimət" deyil.

Dinc MDB-nin demontajı

NATO-nun kommünikesində bəyan edilir: "Hazırkı şəraitdə Ukrayna və onun ətrafındakı münaqişə bizim gündəmimizdə birinci mövzudur". Daha sonra Rusiyanın "günahları" sadalanır. Ancaq Rusiya Ukraynadakı vətəndaş müharibəsində özünü tərəf kimi görmür. Faktlar inkar edilə bilər və ya başqa formada şərh oluna bilər, amma onları dəyişdirmək mümkün deyil.

Alyans "beynəlxalq səviyyədə tanınmış sərhədlər daxilində" Ukrayna, Gürcüstan və Moldova respublikalarının ərazi bütövlüyü və suverenliyini dəstəklədiyini dəfələrlə təkrarlayır və Rusiyanı "hər üç ölkədə onların razılığı olmadan yerləşdirdiyi qoşunları geri çəkməyə" çağırır. Amma dünya dəyişib. Artıq xəritədə nə SSRİ var, nə də ADR. Yuqoslaviya da NATO-nun aktiv şəkildə iştirakı ilə xəritədən silinib. 

Kommünikenin daha bir diqqət çəkən maqamı: NATO-ya üzv dövlətlər 2020-ci ilin avqust ayından etibarən Belarusda baş verən hadisələrə görə əvvəlki kimi dərin narahatlıq hissi keçirir". Bu, qeyri-adi siyasi ikiüzlülük nümunəsidir. Nədənsə Fransada "sarı jiletlilər"in daha geniş miqyaslı etiraz aksiyaları və Kapitoli basqını zamanı ABŞ vətəndaşlarının etirazları (400 nəfərin həbsi ilə nəticələnən) alyansı narahat etmir. Bu başqa bir şeydir?

NATO-nun 14 iyun tarixli kommünikesinin tam və geniş mətni qurumun rəsmi internet saytına üç dildə yerləşdirilib və arzu edənlər orada reallığa uyğun gəlməyən bir çox məqamları tuta bilərlər.

Sonda bir məsələni də qeyd etmək istərdim: 20 illik müharibədən, ABŞ və NATO-nun Taliban terrorçuları ilə utancverici barışıq sazişi imzalamasından sonra Əfqanıstandan xarici qoşunların faktiki qaçışı şəraitində "tərəfdaşlar"ın Avropada və Arktikada dəyənəklərini bu qədər fəal şəkildə oynatmalarına ehtiyac yoxdur.

Yüksək texnologiyalı və ən böyük nüvə gücü ilə hipotetik qarşıdurmaya məhkum olduqları üçün bəlkə də vaz keçdilər. Bərabərhüquqlu tərəflər arasındakı danışıqlar prosesində ağlabatan kompromislər və bundan sonra dinc yanaşı yaşamağın yolları tapıla bilər.

42
İnsan kölgəsi, arxiv şəkli

Neqativi başqasına ötürənlər: onlardan adi halda ağır söz, təhqir eşidə bilərsən

1850
(Yenilənib 19:28 14.06.2021)
Sputnik Azərbaycan-ın köşə yazarı hesab edir ki, zibilini qonşunun qapısına tökən insanla, nəqliyyatda daxildə yığılan neqativi başqalarına ötürən insan arasında heç bir fərq yoxdur.

Azərbaycan insanı hər yerdə narazılıq etməyə bir bəhanə axtarır. Razılıq edən, işlərinin qaydasında olduğunu bildirən kimisə tapmaq qəliz məsələdir. Təsadüfən küçədə birinə toxundunsa, gözləmədyin halda ağır söz, təhqir eşidə bilərsən. Hərənin bir dərdi var, özündə nə qədər çox gəzdirirsə, təsadüfi münaqişə zamanı mütləq üzə çıxa bilər. Həll edə bilmədiyi problemin acığını gərək başqasından çıxa.

Dözə-dözə səbir kasamız dolur, bir bəhanə axtarırıq kimisə acılamağa

Bir tərəfdən bir xalq olaraq çox dözümlüyük, işdə danışmırıq, çünki ayıbdır, sabah-birigün bu adamla üz-üzə gələcəksən. Müdir haqqına girir, artıq iş tapşırır, istirahət günü ofisə çağırır, deyirsən, əşi bir təhər yola verək, yoxsa əlinə bəhanə düşən kimi işdən qovar. İsti plov sifariş verirsən, 1 saat sonra soyumuş dolma gətirirlər, deyirsən, acam, birtəhər yeyim, görüm nə olar. Ustaya iş deyirsən, evin təmirini tapşırırsan, 3-4 gündən sonra rayonda rəhmətə gedən var adı ilə aradan çıxır, günlərlə toz udmalı olursan, deyirsən, eybi yox, yaxşı ustadır, bir az dözüm, gəlib düzəldər.

Dözə-dözə səbir kasamız dolur, bir bəhanə axtarırıq kimisə acılamağa. Amma problemin həlli başqa yerdədir, işə girəndə müqavilə imzalamaq, bütün şərtləri əvvəlcədən danışmaq lazımdır, əgər müdir səni anlayırsa, isti münasibət göstərirsə, bu halda həm kompromisə getmək olar, yeri gəlsə, artıq işləmək də. Yox, əgər müdir kollektivdə birini qaralayıb işlədirsə, öz qohumlarına isə komfort şərait yaradırsa, belə halda problemi məhz yerində çözmək lazımdır, kənarda yox. Sifarişi vaxtında çatdırmayan şirkəti sadəcə “qara siyahıya” salaraq həyatdan silmək gərəkdir. Hələ sosial şəbəkədə teqləyib ətrafınızı məlumatlandırmaq da olar. İşləyə bilmirsənsə, bu yeri tərk elə, qoy başqası işləsin. Pis ustanı isə sosial mediada hər gün qaralamaq lazımdır, gərək adı qara siyahıdan çıxmasın. Bir əldə neçə qarpız tutmaq olar axı? 5-6 obyekt götürüb bir az orada, bir az burada işləməklə nə qədər insanı aldadan usta var. Bu gün bir qohumunu öldürür rayonda, sabah başqa birisini. Obyektlərin də hamısı yarımçıq.

Mahiyyətcə xırda alverçidir, özünə ev tikib zibilini də sənin qapına atacaq

Dükana girirsən, sahibi başlayır ağlamağa: alver filan yoxdur, batıram, nisyə dəftərində salamat yer qalmayıb, vergi imkan vermir işləyək. Di gəl, sadə bir məsələ üçün müraciət edirsən, deyək pul xırdalamaq üçün. O dəqiqə sifətinin ifadəsi də dəyişir, 5 dəqiqə öncə olan yazıq sifət çönür. And-aman edərək xırdanın olmadığını deyir. Uşağı yollayırsan təndir dalınca, zavod çörəyindən verib yola salır, tofita konfeti istəyirsən, karamel verir. Beynində bir fikri var, nə yollasa aldatsın, qabağa düşsün. Sən də ürəyində düşünürsən, yaxşı deyil, dava salmayım, qonşudur, ayıbdır. Sən ayıb bilirsən, o bilmir.

Baxırsan, təzə bağ qonşun gəlib, özünə çox bahalı ev tikdirir. Ürəyində düşünürsən, nə yaxşı, ziyalı bir adamdır. Sosial şəbəkədə istifadəçisi, Strasburq universitetinin məzunu, möhtərəm bir bankın əməkdaşıdır. Amma nə olsun? Mahiyyətcə xırda alverçidir, özünə ev tikib zibilini də sənin qapına atacaq. 5-10 manat qabağa düşmək üçün. Özü də o tək deyil, küçədən ötən digər qonşuların da çəkdiyi siqaretin qutusunu, içdiyi pivənin bankasını sənin qapına atacaq, çünki xətri belə istəyir. Onlardan gərək birini tutub nə ki var əzişdirəsən, onda düzələr bəlkə. Amma yerində tuta bilmədinsə, acığını ya evdəkilərin, ya da tanımadığın bilmədiyin birisinin üzərinə tökəcəksən.

Adətən dava-qırğının çox hissəsi yolda olur. Ya ictimai nəqliyyatda deyişirik, ya da sükan arxasında oturduğun maşının pəncərəsindən Kainatın efirinə pis sözlər buraxırıq. İctimai nəqliyyatda baş verən davaları gərək mətbuat hər gün çəkə, bir hissəsi komediyadır, bir hissəsi drama. Hər cür faciəvi və gülməli halla rastlaşırıq. Biri səsini çıxardısa, digərinin də əsəbi gərilir. Kiçik bir məsələ şişib böyüyür.

Fikir vermişəm, hər gün sürücünü bax belə təhqir edirlər

46 saylı avtobusun sürücüsü:

- Dayanacaqda düşən olacaq?

- Hə, hə.

Avtobus dayanır, düşən düşür, qapı bağlanır. Uşaqla olan bir gənc xanım çox pis bir tonla:

- Saxla daaa, düşək də. Elə gedir aaaa.

Sürücü:

- Düşəydin də.

Davamını yazmağa utanıram. Qadın ağzından çıxanı sürücüyə deyib avtobusu tərk edir. Mexanizm işə düşdü, salon çalxalanır.

Qadınlardan biri:

- Belə danışıq tərzi olar? Niyə bu qadın belə tonda danışır? Sürücünün nə günahı var? Fikir vermişəm, hər gün sürücünü bax belə təhqir edirlər.

Sürücü artıq danışmır, susur.

Kişilərdən biri:

- Özü ləng tərpəndi.

Qadın:

- Lap başım ağrıdı

Digər qadını:

- Bu sürücü elə tələsir, bizi minəndə də, düşəndə də tələsdirir. O neyləsin? Düşə bilmir də.

Salonda artıq başqa söhbət qızışır. Kimsə öz qızından danışır. Ailə qurub, iki uşağı var, əri atıb gedib. İndi o məcburdur nəvələrinə baxmağa. Başqa qadın söhbətə qoşulur. Qonşuluqda qızı evsiz birinə veriblər, sonra həyətdə yeni qurulan ailə üçün ev tikiblər, uşaq da olub, sonda kürəkən nədənsə dözməyib qoyub çıxıb aradan.

Sürücü:

- Dayanacaqda düşən olacaq?

Salonda söhbət davam edir. Bir qadının halı dəyişir, ürəyi bulanır deyəsən. Sürücü avtobusu dayandırıb onu çölə buraxır. Avtobus çalxalanır yenə də. Sürücü, deyəsən, tələsir. “28 May” metro stansiyasında, nəhayət, dayanırıq, amma sonda birdən əyləci basır. Hərə bir tərəfə dəyir. Salondan kimsə deyir:

-  Elə bil kartof-soğan daşıyır.

Biri maddi zibil tökür, digəri mənəvi

Bax, beləcə psixoloqsuz filan öz dərdimizi başqalarının üzərinə tökməklə yaşayırıq. Zibilini qonşunun qapısına tökən insanla, nəqliyyatda daxildə yığılan neqativi başqalarına ötürən insan arasında heç bir fərq yoxdur. Biri maddi zibil tökür, digəri mənəvi. Zibili aparıb zibil qutusuna tökmək lazımdır, problemi isə yiyəsi ilə həll etmək, çünki kökü oradadır. İşi birdəfəlik həll edəndə əziyyəti də az olur sonradan. Həyətdə əmələ gələn alağı biçmək də olar, kökündən qopartmaq da. Biçmək asan yoldur, kökündən qopartmaq çətin. Amma nəticədə daha düzgünü alağı tam təmizləməkdir, sonradan az çıxacaq.

Hər bir işi vaxtında görməklə həyatımıza bir sakitlik bəxş etmək, mənəvi zibili isə vaxtı-vaxtında təmizləməklə daxili harmoniyanı nizamlamaq olar. Aqressiyasını başqa insana yönləndirmək çıxış yolu deyil, müvəqqəti haldır. Həllini tapmayan problem sabah daha ağır prosesə təkan verə bilər. Həm də bu, bir mədəniyyətdir. İctimai yerdə özünü aparmaq mədəniyyətini də gərək uşaq dövründən aşılayasan, yoxsa yeni nəsil gözü ilə hər gün gördüyü davranış metodunu əldə əsas tutacaq. Elə belə də yaşayacaq. Kiminsə ortaya atdığı neqativdən yayınmaq özü bir qəhrəmanlıqdır. Dedi, çıxdı getdi, bir avtobus insan yarım saat danışdı. Hər öz dərdindən, amma başqasının neqativindən nə qədər uzaq dursaq, bir o qədər sağlam yaşayarıq.

Necə deyərlər, dəyirman öz işini görər, çak-çak baş ağrıdar.

1850
 S7 Airlines aviaşirkətinin sərnişin təyyarəsi, arxiv şəkli

Mahaçqaladan Bakıya birbaşa aviareys olacaq