Bakıda avtobus, arxiv şəkli

"Çoxdayəli" sistem: sizin evinizə gedib çıxmağınız heç kimə maraqlı deyil

88
(Yenilənib 01:32 21.05.2021)
Sahibkar yazılmayan qaydaları yaxşı bilir, yəni gündüz vaxtı avtobus hərəkət etməlidir, həm insanları daşımaq lazımdır, həm də planı dolmalıdır. Axşam isə sürücü özünə işləyir, özü də vəziyyətə uyğun...

Bakının nəqliyyat sistemindən razı olan kimsə tapmaq qəliz məsələdir. Kimi dindirsən, deyir, nə işə gedib çıxa bilirik, nə də evimizə qayıda. 8 saat işləyirik, 4-5 saat da yollarda ilişib qalırıq. 15-20 dəqiqəlik yolu başa vurmaq üçün bəzən iki dəfə artıq zaman sərf edirik. İşə və evə vaxtında çatmaq üçün hər yola əl atırıq, avtobusdan taksiyə, taksidən elektrik qatarına keçirik, piyada da gəzirik, amma işə də gecikib töhmət alırıq, evdə də bizi gözləyən uşaqların üzünü görə bilmirik. Geri dönəndə artıq yatmış olurlar.

Hər bir yol iştirakçısı tıxacdan gileylənəcək

Sərnişindaşıma ilə məşğul olan və bu sahədə çalışan kimi dindirsən, o da mütləq narazılıq edəcək. Marşrut sürücüsü sərnişinlərin kobudluğundan, maaşın azlığından, avtobusun köhnəliyindən, iş şəraitinin ağırlığından, taksi sürücüsü isə benzinin bahalığından, müştəri qıtlığından, avtomobil hissələrinin bahalığından, Bakı Nəqliyyat Agentliyinin əlində planşetlə gəzən “reket” əməkdaşlarından şikayətlənəcək. Təbii, hər bir yol iştirakçısı tıxacdan gileylənəcək.

Hər gün eyni mənzərəni izləyirik: səhər saatlarında hər bir neçə dəqiqədən bir gələn, deyək, M3 marşrutuna sıxlıq səbəbindən minə bilmirik, axşam da 1 saylı avtobusu hücuma almağa məcburuq. Özü də adı hallanan marşrutlar ölkənin ən yaxşı nəqliyyat xətlərinə aid edilir. Evinə geri dönən sərnişinlərin pik saatda 1 saylı avtobusa minməsi çox qəliz məsələdir. Birincisi, yer yoxdur. 70 nəfərlik tutumu olan avtobusa 80 nəfər necə yerləşdirəsən axı? Daha sonra sürücü-sərnişin qarşıdurması hər dayanacaqda zaman itkisinə səbəb olur. Qabaq qapıdan minənlər ortaya keçə bilmir, tənbəl sürücü də mikrofonu əlinə alıb bir söz belə demir. Baxırsan, avtobus sürücüsü nəyisə gözləyir, deyirsən, sür gedək də, deyir, qoy keçsinlər o tərəfə, mən bağlayım. Deyirsən, ay qardaş, axı dalı da gəlir. Qapını birtəhər bağla, mikrofonla bir elan ver, sür gedək də. Nə qədər gözləmək olar?

Nəqliyyat sistemi bizə o qədər də bəlli olmayan bir nizamla tənzimlənir

Sürücüyə deyilən sözlərin siyahısında “tupoy” ifadəsi ən hörmətlidir, bəlkə də. Basabasda söyüşün biri bir qəpik olur desəm, yanılmaram. Əsəb, gərginlik, dava normaya çevrilib. Avtobus sürücüsü BNA sistemində ən yazıq bir məxluqdur bir tərəfdən, çünki söyüş yiyəsi, aqressiya obyektinə çevrilir. Digər tərəfdən də ağlı-başı yerində olmayan insanları da sükan arxasına otuzdurmaq ənənəsi hələ də davam edir. Prosesi idarə edən yoxdur sanki, öz axarı ilə gedir. Yeni sürücü nəsli yetişdirən tapılmır, köhnədən qalanların da əsəbi yerində deyil, sərnişin də havasız avtobusda, sıxlıq və əsəbi bir şəraitdə ömrünü çürütməyə məhkumdur.

Özü də nəqliyyat sistemi təyin olunmuş qayda-qanunla yox, hansısa gizli, bizə o qədər də bəlli olmayan bir nizamla tənzimlənir. Məsələn, səhər Bakıda işləyən istənilən marşrut mütləq qrafiki gözləyir. Hətta ən çox narazılıq doğuran xətlərdə belə qrafiki gözləmək tələbinə əməl etmək var. Axşam vaxtı, pik saatlarında xəttə buraxılan avtobusların sayı artırılır. Bütün marşrutlarda belə olmasa da, hər halda bir çox istiqamətlərdə işləyən marşrutlarda bu, müşahidə olunur. Amma müəyyən dövrdən sonra hər hansı bir nəzarət olmur.

Şəhərin mərkəzində avtobuslar hərəkət edir, amma Bakı kəndlərinə işləyən marşrutlar başlı-başına qalırlar. Doğrudur, mərkəzdə də avtobus sayı azalır. Məsələn, Heydər Əliyev prospekti ilə hərəkət edən 2 saylı marşrut insanların işdən çıxdığı zaman, yəni axşam saat 6-7 arası 10 dəqiqə intervalla hərəkət edirsə, saat 21.00-dan sonra 1 saatdan bir qrafikinə keçir.

Bilgəhə nə elektrik qatarı var, nə də manatlıq taksi

Bakı ətrafına doğru hərəkət edən marşrutların bəzisində heç bir nizam duyulmur. Avtobus ya olur, ya olmur, dalbadal gələ bilər, bir saat da gözləməli olarsan. Marşrutların ən intensiv hərəkətini elə Zabrat dairəsində müşahidə etmək olar. 131 saylı avtobus orta hesabla 10 dəqiqə intervalı ilə hərəkət edir. 172 saylı marşrut isə 13-15 dəqiqə ilə hərəkət etməlidir, amma 40 dəqiqə də gözləyə bilərsən. 107 marşrutunun üçü keçə bilər, amma bircə 139 və ya 189 saylı avtobusu görməzsən. Bilgəh və Nardaran istiqamətində, demək olar, bir alternativ də yoxdur. Bilgəhə nə elektrik qatarı var, nə də manatlıq taksi. Amma Maştağaya, Pirşağıya, Kürdəxanıya taksi axınla gedir, 1 manatını ödə, get.

Sözsüz, bəzi avtobusların əməlli-başlı hərəkət etməməsi xəttin sahibkarının yanaşmasına, BNA-nın prosesi nəzarətdə saxlaya bilməməsinə bağlıdır. Sahibkar yazılmayan qaydaları yaxşı bilir, yəni gündüz vaxtı avtobus hərəkət etməlidir, həm insanları daşımaq lazımdır, həm də planı dolmalıdır. Axşam isə sürücü özünə işləyir, özü də vəziyyətə uyğun, yəni kifayət edəcək qədər sərnişin varsa, deməli, avtobusu sürəcək, olmasa, sürməyəcək. Sərnişin də yollarda qalacaq, amma bu heç kimi maraqlandırmır.

Sərnişinin yolda qalması nə sahibkara, nə də digər quruma maraqlıdır

Nəqliyyat sferasını tənzimləmək üçün Azərbaycanda Nəqliyyat, Rabitə və Yüksək Texnologiyalar Nazirliyi, Bakı Nəqliyyat Agentliyi, Nəqliyyatı İntellektual İdarəetmə Mərkəzi, Dövlət Avtomobil Nəqliyyatı Xidməti kimi qurumlar var. Bir az dərinə getsək, Bakı Taksi Xidməti, Nəqliyyat Təlim-Tədris Mərkəzi, Avtomobil Nəqliyyatı ilə Daşınmaların Təşkili kimi qurumların olduğunu da görərik. Nəqliyyata bağlı saysız-hesabsız təşkilat, qurum, ictimai birlik var, amma qaydasında xidmət göstərən nəqliyyat tapmaq müşkül məsələdir.

Normal işləyən bir metro vardı, hazırda bağlıdır. Nə vaxt açılacağı da məlum deyil. Sumqayıta 2 istiqamətdə hərəkət edən elektrik qatarları çox gözəl və doğru qrafiklə işləyir, amma bu sərnişin daşınmasının həcmi kifayət qədər deyil. Gözəl xidmət var, təmiz və səliqəlidir, di gəl, olduqca məhduddur, bu sistem genişlənsəydi, şəhər bir az nəfəs alardı. 10-15 qəsəbəni əhatə edir, evi yaxın olana əl verir, uzaq olana isə yox.

Bu qədər tənzimləyici qurumu olan nəqliyyatı tənzimləyən tapılmır. Sərnişinin yolda qalması nə sahibkara, nə sürücüyə, nə də digər quruma maraqlıdır. “Bu günəcən bir yolla evinə gedib çıxırsa, elə bundan sonra da nəyisə dəyişməyə ehtiyac yoxdur” düşüncəsi ilə yaşayırıq.

Vətəndaş nə yollasa evinə gedib çıxmalıdır axı

Nədənsə Estoniya və ya Koreya saatda 24 saat fəaliyyət göstərən nəqliyyatı qura bilir, biz bacarmırıq. Çin və yaxud Yaponiya nəzakətli sürücü yetişdirir, biz isə onları çıraqla gəzirik. Əgər gecə vaxtı avtobusu xəttə buraxmaq iqtisadi cəhətdən əl vermirsə, heç olmasa kiçik tutumlu avtobusu olan şəxslərə işləmək icazəsi verilməlidir. Bilgəh istiqamətində elektrik qatarı yoxdursa, taksi tapılmırsa, avtobus gəlmirsə, heç olmasa hər 30 dəqiqədən bir hərəkət edər kiçik marşrutun təşkili üçün şərait yaratmaq lazımdır. Vətəndaş nə yollasa evinə gedib çıxmalıdır axı.

Nəqliyyatın nə nazirliyi, nə intellektual sistemi, nə də agentliyi fərli-başlı işləmir. Bu qurumlarda çalışan insanların çoxu nəzarət etdikləri nəqliyyatdan, yəqin, yararlanmır çünki. Yararlanan olsaydı, heç olmasa özü üçün bir şərait yaradardı. Bir növ öz doğma kəndi üçün su və ya yol çəkən məmurlar kimi, gəlib-gedəndə bir rahatlıq duysun deyə.

Sərnişinin gözü yoldadır, bir qərar, bir hərəkət gözləyir müvafiq qurumlardan. Bəzən sadə qərarla çətin görünən problemi asan həll etmək olar. Bir iradə ifadə etməklə.

Eləcə də oxuyun:

* Bakıda piyada zonaları yaradılacaq

* Bakı-Xırdalan-Sumqayıt qatarında sıxlığın səbəbi açıqlandı

* Marşrut xətlərindən birində gediş haqqı azaldılıb

* Sərnişinlərin diqqətinə: Bakıda sabahdan bir neçə marşrut xəttində ödəmə qaydası dəyişir

* Səlahiyyətsiz sürücülər və qanunçul BNA - Sonda əzab çəkən yenə sərnişin olur

88
Teqlər:
problem, nəqliyyat, taksi, marşrut, qatar, avtobus, sürücü
İnsan kölgəsi, arxiv şəkli

Neqativi başqasına ötürənlər: onlardan adi halda ağır söz, təhqir eşidə bilərsən

1827
(Yenilənib 19:28 14.06.2021)
Sputnik Azərbaycan-ın köşə yazarı hesab edir ki, zibilini qonşunun qapısına tökən insanla, nəqliyyatda daxildə yığılan neqativi başqalarına ötürən insan arasında heç bir fərq yoxdur.

Azərbaycan insanı hər yerdə narazılıq etməyə bir bəhanə axtarır. Razılıq edən, işlərinin qaydasında olduğunu bildirən kimisə tapmaq qəliz məsələdir. Təsadüfən küçədə birinə toxundunsa, gözləmədyin halda ağır söz, təhqir eşidə bilərsən. Hərənin bir dərdi var, özündə nə qədər çox gəzdirirsə, təsadüfi münaqişə zamanı mütləq üzə çıxa bilər. Həll edə bilmədiyi problemin acığını gərək başqasından çıxa.

Dözə-dözə səbir kasamız dolur, bir bəhanə axtarırıq kimisə acılamağa

Bir tərəfdən bir xalq olaraq çox dözümlüyük, işdə danışmırıq, çünki ayıbdır, sabah-birigün bu adamla üz-üzə gələcəksən. Müdir haqqına girir, artıq iş tapşırır, istirahət günü ofisə çağırır, deyirsən, əşi bir təhər yola verək, yoxsa əlinə bəhanə düşən kimi işdən qovar. İsti plov sifariş verirsən, 1 saat sonra soyumuş dolma gətirirlər, deyirsən, acam, birtəhər yeyim, görüm nə olar. Ustaya iş deyirsən, evin təmirini tapşırırsan, 3-4 gündən sonra rayonda rəhmətə gedən var adı ilə aradan çıxır, günlərlə toz udmalı olursan, deyirsən, eybi yox, yaxşı ustadır, bir az dözüm, gəlib düzəldər.

Dözə-dözə səbir kasamız dolur, bir bəhanə axtarırıq kimisə acılamağa. Amma problemin həlli başqa yerdədir, işə girəndə müqavilə imzalamaq, bütün şərtləri əvvəlcədən danışmaq lazımdır, əgər müdir səni anlayırsa, isti münasibət göstərirsə, bu halda həm kompromisə getmək olar, yeri gəlsə, artıq işləmək də. Yox, əgər müdir kollektivdə birini qaralayıb işlədirsə, öz qohumlarına isə komfort şərait yaradırsa, belə halda problemi məhz yerində çözmək lazımdır, kənarda yox. Sifarişi vaxtında çatdırmayan şirkəti sadəcə “qara siyahıya” salaraq həyatdan silmək gərəkdir. Hələ sosial şəbəkədə teqləyib ətrafınızı məlumatlandırmaq da olar. İşləyə bilmirsənsə, bu yeri tərk elə, qoy başqası işləsin. Pis ustanı isə sosial mediada hər gün qaralamaq lazımdır, gərək adı qara siyahıdan çıxmasın. Bir əldə neçə qarpız tutmaq olar axı? 5-6 obyekt götürüb bir az orada, bir az burada işləməklə nə qədər insanı aldadan usta var. Bu gün bir qohumunu öldürür rayonda, sabah başqa birisini. Obyektlərin də hamısı yarımçıq.

Mahiyyətcə xırda alverçidir, özünə ev tikib zibilini də sənin qapına atacaq

Dükana girirsən, sahibi başlayır ağlamağa: alver filan yoxdur, batıram, nisyə dəftərində salamat yer qalmayıb, vergi imkan vermir işləyək. Di gəl, sadə bir məsələ üçün müraciət edirsən, deyək pul xırdalamaq üçün. O dəqiqə sifətinin ifadəsi də dəyişir, 5 dəqiqə öncə olan yazıq sifət çönür. And-aman edərək xırdanın olmadığını deyir. Uşağı yollayırsan təndir dalınca, zavod çörəyindən verib yola salır, tofita konfeti istəyirsən, karamel verir. Beynində bir fikri var, nə yollasa aldatsın, qabağa düşsün. Sən də ürəyində düşünürsən, yaxşı deyil, dava salmayım, qonşudur, ayıbdır. Sən ayıb bilirsən, o bilmir.

Baxırsan, təzə bağ qonşun gəlib, özünə çox bahalı ev tikdirir. Ürəyində düşünürsən, nə yaxşı, ziyalı bir adamdır. Sosial şəbəkədə istifadəçisi, Strasburq universitetinin məzunu, möhtərəm bir bankın əməkdaşıdır. Amma nə olsun? Mahiyyətcə xırda alverçidir, özünə ev tikib zibilini də sənin qapına atacaq. 5-10 manat qabağa düşmək üçün. Özü də o tək deyil, küçədən ötən digər qonşuların da çəkdiyi siqaretin qutusunu, içdiyi pivənin bankasını sənin qapına atacaq, çünki xətri belə istəyir. Onlardan gərək birini tutub nə ki var əzişdirəsən, onda düzələr bəlkə. Amma yerində tuta bilmədinsə, acığını ya evdəkilərin, ya da tanımadığın bilmədiyin birisinin üzərinə tökəcəksən.

Adətən dava-qırğının çox hissəsi yolda olur. Ya ictimai nəqliyyatda deyişirik, ya da sükan arxasında oturduğun maşının pəncərəsindən Kainatın efirinə pis sözlər buraxırıq. İctimai nəqliyyatda baş verən davaları gərək mətbuat hər gün çəkə, bir hissəsi komediyadır, bir hissəsi drama. Hər cür faciəvi və gülməli halla rastlaşırıq. Biri səsini çıxardısa, digərinin də əsəbi gərilir. Kiçik bir məsələ şişib böyüyür.

Fikir vermişəm, hər gün sürücünü bax belə təhqir edirlər

46 saylı avtobusun sürücüsü:

- Dayanacaqda düşən olacaq?

- Hə, hə.

Avtobus dayanır, düşən düşür, qapı bağlanır. Uşaqla olan bir gənc xanım çox pis bir tonla:

- Saxla daaa, düşək də. Elə gedir aaaa.

Sürücü:

- Düşəydin də.

Davamını yazmağa utanıram. Qadın ağzından çıxanı sürücüyə deyib avtobusu tərk edir. Mexanizm işə düşdü, salon çalxalanır.

Qadınlardan biri:

- Belə danışıq tərzi olar? Niyə bu qadın belə tonda danışır? Sürücünün nə günahı var? Fikir vermişəm, hər gün sürücünü bax belə təhqir edirlər.

Sürücü artıq danışmır, susur.

Kişilərdən biri:

- Özü ləng tərpəndi.

Qadın:

- Lap başım ağrıdı

Digər qadını:

- Bu sürücü elə tələsir, bizi minəndə də, düşəndə də tələsdirir. O neyləsin? Düşə bilmir də.

Salonda artıq başqa söhbət qızışır. Kimsə öz qızından danışır. Ailə qurub, iki uşağı var, əri atıb gedib. İndi o məcburdur nəvələrinə baxmağa. Başqa qadın söhbətə qoşulur. Qonşuluqda qızı evsiz birinə veriblər, sonra həyətdə yeni qurulan ailə üçün ev tikiblər, uşaq da olub, sonda kürəkən nədənsə dözməyib qoyub çıxıb aradan.

Sürücü:

- Dayanacaqda düşən olacaq?

Salonda söhbət davam edir. Bir qadının halı dəyişir, ürəyi bulanır deyəsən. Sürücü avtobusu dayandırıb onu çölə buraxır. Avtobus çalxalanır yenə də. Sürücü, deyəsən, tələsir. “28 May” metro stansiyasında, nəhayət, dayanırıq, amma sonda birdən əyləci basır. Hərə bir tərəfə dəyir. Salondan kimsə deyir:

-  Elə bil kartof-soğan daşıyır.

Biri maddi zibil tökür, digəri mənəvi

Bax, beləcə psixoloqsuz filan öz dərdimizi başqalarının üzərinə tökməklə yaşayırıq. Zibilini qonşunun qapısına tökən insanla, nəqliyyatda daxildə yığılan neqativi başqalarına ötürən insan arasında heç bir fərq yoxdur. Biri maddi zibil tökür, digəri mənəvi. Zibili aparıb zibil qutusuna tökmək lazımdır, problemi isə yiyəsi ilə həll etmək, çünki kökü oradadır. İşi birdəfəlik həll edəndə əziyyəti də az olur sonradan. Həyətdə əmələ gələn alağı biçmək də olar, kökündən qopartmaq da. Biçmək asan yoldur, kökündən qopartmaq çətin. Amma nəticədə daha düzgünü alağı tam təmizləməkdir, sonradan az çıxacaq.

Hər bir işi vaxtında görməklə həyatımıza bir sakitlik bəxş etmək, mənəvi zibili isə vaxtı-vaxtında təmizləməklə daxili harmoniyanı nizamlamaq olar. Aqressiyasını başqa insana yönləndirmək çıxış yolu deyil, müvəqqəti haldır. Həllini tapmayan problem sabah daha ağır prosesə təkan verə bilər. Həm də bu, bir mədəniyyətdir. İctimai yerdə özünü aparmaq mədəniyyətini də gərək uşaq dövründən aşılayasan, yoxsa yeni nəsil gözü ilə hər gün gördüyü davranış metodunu əldə əsas tutacaq. Elə belə də yaşayacaq. Kiminsə ortaya atdığı neqativdən yayınmaq özü bir qəhrəmanlıqdır. Dedi, çıxdı getdi, bir avtobus insan yarım saat danışdı. Hər öz dərdindən, amma başqasının neqativindən nə qədər uzaq dursaq, bir o qədər sağlam yaşayarıq.

Necə deyərlər, dəyirman öz işini görər, çak-çak baş ağrıdar.

1827
ABŞ-da epidemioloji vəziyyət

Üç şəhər, səkkiz lider 24 yeni koronavirus növü

1160
(Yenilənib 08:31 14.06.2021)
Ənənəvi olaraq, Sputnik Azərbaycan-ın "7x7" rubrikasında həftənin ən maraqlı 7 hadisəsi şərh edilir.

“Yeddilər”

Dissident Bukovski dünyanın hələ düz vaxtında deyirdi ki, Qərbdə insanları öz soyuducularının içi daha çox maraqlandırır, nəinki Sovetlərdə insan haqları. Ötən həftə G-7 ölkələri Londonda bir araya gələrək, dünyanın gələcəyi ilə bağlı müzakirələr apardılar. Bukovskinin fikri indi də aktualdır, dünya nəhənglərini öz maraqları qayğılandırır, nəinki susuzluqdan, peyvəndsizlikdən əziyyət çəkən Afrika, uyğurlar, koronavirusun Hindistanı canbəsər etməsi və s.

Hər halda, sağ olsunlar, əllərini ciblərinə atıblar – “yeddilər” iqlim dəyişikliyi ilə mübariz üçün 100 milyard dollar ayıracaq, vaksinlərin isə gələn ilin sonuna qədər bir milyard dozasını varlı olmayan ölkələrə verəcəklər, Avropa İttifaqı isə həmin ölkələrə bir milyard avro ayıracaq. Amma gələn ilin sonuna qədər! O vaxta qədər sağ qalsalar, vaksin qablarını dünyanın humanizm rəmzi kimi saxlayarlar kasıblar. Bu arada “Wall Street Journal”nın məlumatına görə ABŞ vaxtı keçməkdə olan vaksinləri nə edəcəyi ilə bağlı qərar verməkdə çətinlik çəkir.

Ədalətin bumu dünya?

ABŞ-ın vitse-prezidenti Kamala Harris ölkəyə qanunsuz yollarla gələn qaçqınların geri qaytarılacaqlarını deyib. Kanadada isə Hayd Park ərazisində gənc sürücü avtomobilini qəsdən müsəlman ailənin üzərinə sürüb. Nəticədə bir nəfər yerindəcə, üç nəfər isə xəstəxanaya çatdırıldıqdan sonra həlak olub.

Təbiətin ədaləti isə daha mütləqdir. ABŞ-ın Yuta ştatında görünməmiş quraqlıq yaşanır, ştatın qubernatoru vətəndaşlara müraciət edərək yağış üçün dua etmələrini istəyib. İbtidai inanclar belə yaranıb, insanlar yağış üçün dua edib, yağanda ilahi qüvvələrin qüdrətinə inanıblar, yağmayanda isə qəzəbə gəldiklərini düşünüblər. Amma insanlar bu ibtidai inanclardan uzaqlaşdıqca, daha az yağış yağmağa başlayıb.

Koliforniyalılar isə tovuzquşuların hücumuna məruz qalıblar.

Bu arada Çin alimləri yarasalarda 24 yeni koronavirus növü aşkar ediblər.

Kosmosa doğru

Deyəsən, kosmosa və digər planetlərə uçuş aktuallığını artıracaq. Bu arada “Amazon” şirkətinin yaradıcısı Ceff Bezosla bir kosmik aparatda kosmosa uçuş üçün sonuncu yer hərracda 28 milyon dollara satılıb.  Uçuş iyul ayının 20-də həyata keçiriləcək.

Gələcəyin xəritəsi

Qayıdaq Yerə. Bu günlərdə kürənin nəbzi 3 koordinatdan asılıdır – Brüssel, Cenevrə, London. NATO sammiti, ABŞ-Rusiya liderlərinin görüşü və G7-nin toplantısı.

Dünyanı elm və dialoq xilas edəcək. İki insan arasında məsafə bir təbəssüm qədərdir. Ümid edək ki, Putin- Bayden görüşü səmimi təbəssüm və anlaşma ilə bitəcək, görüş dünyanın gələcəyinə müsbət impuls verəcək. 

Ermənistan isə…

Cəngəllik  qanunları ilə yaşayanları xilas etmək üçün isə xeyli vaxt lazım olacaq. Məsələn, Ermənistanı. Bu həftə İrəvan təzyiqlər qarşısında, nəhayət, Ağdamın xəritələrini təqdim etdi – 15 erməni qarşılığında. Xəritəyə əsasən düşmən bu rayonda 97 mina basdırıb. Təxminən elə Ağdamın əhalisi qədər. Xəritələrin alınması, bir çox aspektdən mühüm hadisədir: xeyli insan həyatı bu təhlükədən xilas olur, vaxt və xərclər azalır, bərpa prosesini sürətləndirmək üçün imkan yaranır və s.

Və Paşinyan…

Seçkiöncəsi Ermənistanda hamı hamını ittiham edir, ara qarışıb məzhəb itib. XİN-in müavinləri istefa verib, mətbuat katibi də həmçinin. Həftənin ən maraqlı açıqlamalarından birini isə Paşinyan verib. O deyib ki, “ATƏT-in Minsk Qrupunun Qarabağ üzrə həmsədrləri Azərbaycana tərəfdar mövqe tutublar”.

Sabiq president Ter-Petrosyan isə deyib ki, “Qarabağ məsələsində Ermənistanın müttəfiqi yoxdur və bunu nəzərə almaq lazımdır”.

Görünür, unudurlar ki, 30 ildir işğala görə ermənilərə “gözün üstündə qaşın var” deyən olmayıb, torpaqları güc hesabına geri almışıq.

Futbol paytaxtı

Qarabağ zəfəri ölkəmizi dünyada gündəm etdi. Hazırda isə ölkəmiz bir neçə gün öncə başlanmış futbol bayramı – AVRO-2020-nin bir parçasıdır. Qitənin əsas turnirinin 4 oyunu Bakıda keçiriləcək. Bir oyun artıq geridə qalıb. Türkiyənin iki görüşü Bakıda olacaq. Türkiyənin ev sahibi İtaliyaya məğlubiyyəti mütəəssir etsə də, “ay ulduzluların” hazırkı heyəti onların qrupun ən şanslı komandalarından biri olduğunu deməyə əsas verir. Hazırda komandanın bel sütununu Avropanın aparıcı klublarında çıxış edən top ustaları təşkil edir. Bizi maraqlı oyunlar gözləyir!

1160
 Pandemiya zamanı imtahan

DİM imtahanların vaxtını dəyişdi