Kitabxana, arxiv şəkli

Ölkəmizin, insanlarımızın gündəmində ədəbiyyat yoxdur

1977
(Yenilənib 23:36 24.04.2021)
Mədəniyyət sahəsində islahatsonrası baş verənləri nəzərə alsaq, məncə 34 ildir AYB-yə rəhbərlik edən xalq yazıçısının da vəzifədən getməsi, yerinə daha gənc, daha proqressiv şəxsin seçilməsi də nəyisə dəyişməyəcək.

Bu gün Azərbaycan ədəbiyyatı bəlkədə ən qarışıq dövrünü yaşayır. Bir yandan pandemiya, bir yandan da müharibə ədəbiyyatı, sənəti müvəqqəti də olsa arxa plana keçirib. Bunu bəlkə də anlayışla qarşılamaq, bu qarışıqlığa göz yummaq olardı, amma... Bəli, dünyada gedən prosesləri izləməsək, ədəbiyyatımızın düşdüyü bu vəziyyətlə razılaşa bilərdik. Dünya ədəbiyyatında gedən proseslərin fonunda ədəbiyyatımız demək olar ki, görünmür. Ya da kimlərsə məqsədli şəkildə ədəbiyyatımızın bu vəziyyətdə qalmasını, görünməməsini istəyir. Halbuki, son bir ildə ədəbiyyatımızın uğurları heç də az olmayıb.  “Azərbaycan Kitabının Dünyaya Tanıdılması” layihəsi çərçivəsində “Azərbaycan Ədəbiyyatı Gənclik Seriyası” üzrə gənc şair və yazıçılarımızın Türkiyədə kitablarının çap olunması, Fransada həmyerlilərimizin qurduğu “Kəpəz” nəşriyyatında Azərbaycan yazıçılarının əsərlərinin tərcüməsi və çapı, yazıçı-dramaturq Ülviyyə Heydərovanın Gürcüstanda və Rusiyada müsabiqələrdə iştirakı, əsərlərinin səhnələşdirilməsi Azərbaycan ədəbiyyatının ciddi uğurları hesab olunmalıdır. Təəssüf ki, bu uğurlar demək olar ki, diqqətdən kənarda qalıb. Xəbər saytlarında verilən xəbərləri, sosial şəbəkələrdə qələm adamlarının təbrikləşməsini nəzərə almasaq, bu gözəl xəbərlər, ədəbiyyatımız üçün uğur hesab olunacaq hadisələr ədəbi mühitdə sükutla qarşılandı.

***

34 ildir eyni adam tərəfində idarə edilən Azərbaycan Yazıçılar Birliyi “Azərbaycan Kitabının Dünyaya Tanıdılması” layihəsinin tərəfdaşlarından biri olsa da, adıçəkilən qurum baş verən ədəbi hadisələrə sakit, səssiz qalıb “öz işiylə” məşğuldur. Nə özlərinin tərəfdaşlıq etdiyi layihənin, nə də digər uğurların AYB-nin diqqətini çəkmədi, çəksə də bu hadisələrə reaksiya verməməyə üstünlük verdilər. Çünki bu qurumun “başbilənlər”inin ədəbiyyatdan daha “vacib” işləri var. Məsələn, hər il mart-aprel ayında bu qurumun katibliyi prezident təqaüdünə təqdim etmək üçün gənc yazıçı, şair axtarışına çıxır. Çünki, özləri də bilir ki, hər il 20 nəfər “istedadlı gənc yazar” tapmaq o qədər də asan deyil. Ona görə də, işlərini şansa buraxmadan “təqaüd mövsümü”ndə “gənc yazar ovuna” çıxırlar. Prosesin sonunda əksəriyyəti cəmiyyət tərəfindən tanınmayan, heç bir ədəbi uğuru olmayan şəxslərə bir illik prezident təqaüdü verilir və təqaüd alan şəxslərin kimliyi illərdir ictimaiyyətdən gizli saxlanılır. Bu məsələni uzun illər gündəmdə saxladıq, yazdıq, tənqid etdik, təkliflər irəli sürdük. Sonuncu dəfə məsələ ilə bağlı Milli Məclisin Mədəniyyət Komissiyasına və Mədəniyyət Nazirliyinə müraciət etdik, təkliflərimizi təqdim etdik, ancaq yenə də bir faydası olmadı. Yuxarıda sadaladığım uğurlara bu şəkildə münasibətin kökündə ədəbiyyata qarşı laqeyidlik, inamsızlıq dayanır. Əsrlər öncə yaşamış şairlərin şəninə silsilə tədbirlər planlayan nazirlik, yaşayan, çağdaş şairlərə, yazıçılara ögey münasibət bəsləyir. Əslində heç dünyadan köçmüş şairlərə də urvatlı münasibət göstərildiyini ürəklə deyə bilmərik. Ötən il “Nəsimi ili” idi, bu il “Nizami ili”dir. Ayrılan pullar da bəllidir, görülən işlər də. Halbuki, dövlət bütün bu işləri məhz ədəbiyyatı gündəmdə saxlamaq üçün edir. İcraçılar isə, kobud ifadə etsək “yola verir”. Ölkə prezidenti tərəfindən elan olunan “Nizami ili”nin ilk dörd ayı arxada qalıb, dünya miqyaslı heç bir tədbir keçirilməməi bir yana, ölkə səviyyəsində keçirilən tədbirlər də sadəcə öhdəçiliyin candərdi icrası kimi görünür. Tək-tük təşəbbüslər də kimlərinsə qazanc əldə etməsinə hesablanır və ciddi nəticə hələki görünmür. Zamanı qabaqlamaq istəməzdim, ancaq görünən odur ki, “Nizami ili” də “Nəsimi ili” kimi bitəcək, yenə də bu səriştəsizliyin günahkarlarını axtaracaqlar...

***

Azərbaycan Respublikası Mədəniyyət Nazirliyində islahatlar başlayanda əksər mədəniyyət adamları ümidlənmişdi. Cənab Anar Kərimov Mədəniyyət Nazirinin müavini, sonra nazir təyin olunanda, nazirliyin müxtəlif strukturlarında kadr islahatları başlayanda ümid edirdik ki, illərdir tənqid etdiyimiz qüsurlar yavaş-yavaş aradan qalxacaq, mədəniyyət sahəsində gözlə görünən islahatlar başlayacaq. Təssüf ki, bu dəfə də ümidlərimiz, xəyalarımız suya düşdü. Məsələn, Nazirlik ədəbiyyat adamlarının diqqətini çəkən, əvvəlki müsabiqələrdən fərqli formatda “Vətənvərpərlik mövzusunda ədəbiyyat müsabiqəsi” təşkil etdi, qaliblər 3 ay əvvəl müəyyənləşdi, qaliblərin pul mükafatları da hesablarına köçürüldü, ancaq bu 3 ay ərzində nazirlik vaxt tapıb qaliblərə vəd etdiyi xüsusi diplomları təqdim edə, bu müsabiqə ilə bağlı hər hansı bir tədbir təşkil edə bilmədi. Mənə görə bunun adı, ədəbiyyata, qələm adamlarına ögey münasibətdir. Bizim dərdimiz veriləcək diplom, keçiriləcək hansısa tədbir deyil. Axtarsanız mükafat alanların əksəriyyəti bu vəziyyətdən soyuqqanlı şəkildə razıdır. Qaliblərdən biri kimi, şəxsən mənə görə bu Azərbaycan ədəbiyyatına, ədəbiyyat adamlarına qarşı laqeyidlikdir.

***

Bəli, ədəbiyyatımız qarışıq, xaotik bir dönəmdən keçir. Yaxın qonşularımızın ədəbiyyata, mədəniyyətə qayğısını görəndə bunu daha dərindən anlamaq mümkündür. Bizdə inkişaf yox, intiriqa, yarıtmazlıq ön plandadır. Bu sahəyə nəzarət etməli olan qurumlardakı kadr dəyişikliyi də öz nəticəsini vermir. Mədəniyyət sahəsində islahatsonrası baş verənləri nəzərə alsaq, məncə 34 ildir AYB-yə rəhbərlik edən xalq yazıçısının da vəzifədən getməsi, yerinə daha gənc, daha proqressiv şəxsin seçilməsi də nəyisə dəyişməyəcək. Çünki, Mədəniyyət Nazirliyində təyinat alan gənc və perispektvli şəxslərin yeniliyə meyilli olmamasını, köhnə qaydaları fərqli üsüllarla tətbiq etdiklərini də gördük, anladıq. Yəni, ədəbiyyata, mədəniyyətə nəzarət edən qurumların daxili islahatları ədəbiyyat və mədəniyyətə gözlə görünən, sevindirici töhfələr verə bilmədi, bu gedişlə verə bilməyəcəyi də barizdir.

***

Bəzi dostlarımız bu susqunluğu süni yaradılmış polemikalarla pozmağa, ədəbiyyatı, yazıçını ön plana çıxarmağa çalışsa da, faydasız olduğunu görürük. Ölkəmizin, insanlarımızın gündəmində ədəbiyyat yoxdur. Havasızlıqdan boğulan, ölümcül xəstəni süni tənəffüslə həyatda saxlamaq çox çətindir, bəzən mümkünsüzdür. Bu gün ədəbiyyatımız havasızlıqdan boğulan, sağa-sola əl-qol atıb imdad diləyən çarəsiz xəstə kimidir. Ədəbiyyatı süni tənəffüs cihazına qoşsaq da, həyatda qalmasına ümid azdır. Onun həyatda qalması üçün süni tənəffüsə yox, oksigeni bol, havası təmiz əngin və ucsuz-bucaqsız mühitə ehtiyac var. Ədəbiyyatın, kitabın, mədəniyyətin gündəmdə olması, inkişafı, dünya ilə ayaqlaşması xalqın, ölkənin gələcəyi üçün çox vacibdir. Süni şəkildə yaradılan gündəm, plan doldurmaq üçün keçirilən tədbirlər, büdcəni talamaq üçün həyata keçirilən layihələr heç bir real nəticə verməyəcək. Çünki əvvəlki illərdə bu cür işlərin heç bir nəticə vermədiyini hamımız görmüşük. Real işlər görülməli, ciddi addımlar atılmalıdır. Müzakirələr, polemikalar ədəbiyyatımızın və mədəniyyətimizin gələcəyi üçün aparılmalı, ciddi nəticələri görməliyik. Və bunun üçün ədəbiyyat adamlarının fikirləri nəzərə alınmalıdır.

1977
 Reanimasiyada COVİD-19 xəstəsi, arxiv şəkli

Həyatı mənasızlaşdıran, dünyanı qara rəngdə göstərən xəstəlik

31
(Yenilənib 23:12 04.05.2021)
Koronavirus xəstəsi olmaq nə deməkdir? Virusa tutulan insan nə kimi hisslər keçirir, harası ağrıyır, nəyi arzulayır?

Nə bədənin, nə də ruhun hər hansı bir qidanı arzulayır

İlkin mərhələdə xəstəliyin başlanması adi soyuqdəyməyə bənzədi. Bir az nasazlıq vardı, bir az sümüklər ağrıdı. Uzun müddət özümü müayinə etmək istəyirdim, tibb müəssissələrinin birinda “check-up” elan etdilər. Getdim müayinəyə, amma elan edilən qiymətdən xeyli artıq xərcim çıxdı. Əlavə analizlər götürdülər, nəsə ciddi patologiya tapılmadı. Ona da şükür. Amma xəstəxananın aşağı mərtəbəsi çox soyuq idi, lap sümüyə işləyirdi. Ola bilər, koronanı də həmin mərkəzdə tutmuşam, tibb ocaqlarında virusa yoluxma şansı daha çoxdur, belə ki, virus, bakteriya və müxtəlif mikroorqanizmlərin yaşadığı yer elə tibb ocaqlarıdır. Patoloji orqanizmlər burada olduqca rahat yaşayırlar. Heç bir vasitə ilə onları təmizləmək mümkün deyil.

Nasaz vəziyyətdə neçə gün elə ayaqüstü gəzdim, düşünürdüm tezliklə ötüb keçəcək. Nə ağırlaşırdı, nə də düzəlirdi. Belə anlaşılmaz, qəribə bir trans vəziyyətində idim. Görünür, inkubasiya dövründə elə belə də olmalıdır. Amma günlərin bir günü səhər özümdə dəhşətli zəiflik duydum. Qripin ağır formalarında belə olur. Həyatımda bir neçə dəfə həmin formada qrip olmuşam, elə bil, həyat qüvvəsi səni tərk edir, yaşamaq istəmirsən, hər şeyə maraq itir, nə yemək, nə içmək sənə ləzzət vermir. Nə bədənin, nə də ruhun hər hansı bir qidanı arzulayır. Elə yerində uzanıb bir nöqtəyə baxırsan. 2000-ci illərin əvvəllərində belə bir vəziyyətdə olmuşdum. Bəlkə də 2 həftə xəstəliklə çarpışmışdım. Bir xeyli də bərpa dövrü oldu.

Bilmirsən, koronavirusa tutulmusan, yoxsa bərk qripsən?

Bu dəfə də eyni cür oldu, halsızlıq, yüksək qızdırma davamlı oldu. Elə bil hansısa bir bataqlığa düşmüsən, əlindən heç nə gəlmir. Birtəhər hava axınını təmin edirsən, amma özünü çıxarda bilmirsən. Nə baş verdiyini anlamaq da çətindir. Bilmirsən, koronavirusa tutulmusan, yoxsa bərk qripsən? Hara müraciət edəsən? O da aydın deyil. Əgər gündüz təcili tibbi yardımı çağırsan, qızdırman aşağıdırsa, test götürülməyəcək. Tibbi yardım yalnız qızdırma 39 dərəcə olduqda koronavirus testi götürür. Gündüz qızdırman 37,7 dərəcədirsə, elə belə oturmalısan. Test olunmaq üçün bir xeyli telefonda ora-bura zəng etməlisən, şəhərdə yaşayırsansa, daha tez gələcəklər. Əgər Məmmədli və ya Mehdiabad sakinisənsə, test üçün gələn tapılmaz, amma gedib Xırdalan xəstəxanasında test oluna bilərsən.

Nə bilim, bir qədər ora-bura edilən zənglərin hər halda nəticəsi oldu. Gəlib test götürdülər, cavabı da tez gəldi, artıq səhər bilirdim: pozitiv çıxıb. Müxtəlif yerlərdən, yerli xəstəxanadan zəng edildi, axşamçağı hətta vitamin və mikroelementlərdən ibarət bir paket də yolladılar. Sink, selen, vitamin C, D kimi bir qədər həb və yağ formasında dərman vardı. Telefonuma da xəbərdarlıq gəldi: 15 gün evi tərk etmək olmaz, əks halda məsuliyyətə cəlb oluna bilərəm.

Yatmağa belə nifrət yaranır

Nəyləsə müalicə olundunmu? İlk növbədə orucumu pozmadım, yemək qəbulu mümkünsüz idi deyə, elə axşamlar iftar süfrəsində cüzi qida qəbul etdim. Həm də istəsən belə nəsə yeyə bilmirsən. Amma suyu həm axşam, həm də obaşdan qəbul edirdim. Bunun xeyri var. Qızdırma və ilkin zəiflik təqribən 1 həftə davam etdi. 5 gün davamlı olaraq "sistem" vurdurdum, bax bu, bəlkə də ən effektiv müalicə növüdür, çünki elə ilk iki-üç qəbuldan sonra xeyli yaxşılaşdım. "Sistem"i də orucu pozmadan axşam çağı vurdurdum. Tədricən bədən ağrıları azaldı, qızdırma çəkilib getdi.

Həm xəstə olduğumdan, həm də oruc tutduğumdan çəkidə haradasa 5-6 kilo itirdim, amma ümumən pis deyildim. Sadəcə bu xəstəliyin bir depressiv etapı da var, sevinc hissini itirirsən, dünya sənə qara rəngdə görünür. Başqa bir zaman doyunca yatmağı arzu edirsən, amma indi yatmağa belə nifrət yaranır, nə sevimli filmlər, nə komediya, nə triller səni cəlb etmir, kitab oxumaq istəmirsən, xəbər maraqlandırmır, nəyə əl atsan, elə qıcıq doğurur. Bircə balkona çıxıb gün şüalarından bəhrələnə bilərsən.

Koronavirusun böhran dövrü 6-9 gün davam edir

COVID-19-a tutuldunsa, deməli nə sən, nə də ailə üzvləri evi tərk edə bilməz. Eləcə 15 gün oturmalısan ac-yalavac, özü də zibil-filan da ata bilməzsən, yığmalısan evin çıxacağına. Nə meyvə ala bilməzsən, nə də çörək. Qanun bunu deyir. Pulun yoxdursa, lap pis, yəni günəmuzd işləyən bir adam koronavirusa tutulubsa, deməli elə 3-4 gün zorla davam gətirər, sonra mütləq qanunu pozmalıdır. Ən azı çörək pulunu haradan əldə etmək barədə düşünməlidir. Yenə evdə beş-üç manat ehtiyat pulun varsa, yaxınından, qonşudan dükana getmək barədə xahiş edə bilərsən, amma gərək yaxın duran ola.

Koronavirusun böhran dövrü 6-9 gün davam edir, sonra tədricən yaxşılaşma başlayır. Bir az öskürək və zəiflik olur. Bir də yuxunun bir az pozulması baş verir, çünki gündüz zəif olursan, başını atıb yatsan, sonra gecə yata bilmirsən. “Sirab” və ya “Badamlı” kimi mineral su içmək də faydalıdır, bədəndə mineral duz balansını bərpa edir.

Koronavirusla birgə gələn qorxular, ağır fikirlər tədricən sıradan çıxır

Məncə, koronavirusu Ramazan ayında keçirtmək özü bir xoşbəxtlikdir. Ramazan gəlir, bizim həm ruhumuzu təmizləyir, həm bədənimizi. Beyində olun bir çox lazımsız fikirlər harasa yox olur. Bəzi köhnə xəstəliklərimiz də elə bil, itir. Bu günlərdə sol ayağımda olan ağrılar birdən-birə itdi. Köhnə travma heç ayağı tam qatlamağa imkan vermirdi, indi elə bil dizə yığılmış su yoxa çıxıb, ayaq rahatca qatlanır, ağrı da yoxdur.

Ruhumuz da dincəlir, sağalır tədricən, koronavirusla birgə gələn qorxular, ağır fikirlər tədricən sıradan çıxır. Bilirsən, az qalıb, sabah-birigün ayağa durub gəzəcəksən. Başqa bir dövrdə xəstəliyə də, ruhun problemlərinə də qalib gəlmək çətindir, amma Ramazanda elə bil bir başqa aura olur.

Koronavirus tədricən çəkilib gedəcək, yenidən həyat eşqi qaynayacaq, Günəş, dəniz, hava özü ilə sevinc gətirəcək. Təmizlənmiş ruhla yaşamaq da rahat olacaq.

31
Qadın dişlərini müalicə etdirir, arxiv şəkli

Diş həkimləri, Alimpaşanın maralları, qapqara nikbinlik strategiyası

81
(Yenilənib 18:55 03.05.2021)
Marsa ezam olunmuş tədqiqat qrupunun yerə göndərəcəyi torpaq kapsullarının "Mars taunu"na səbəb ola bilmə təhlükəsi var.

- Həyatda ən çox nədən qorxursan?

- Qaranlıq otaqdan və diş həkimindən.

- Diş həkimini başa düşdüm, bəs qaranlıq otaqdan niyə qorxursan?

- Allah bilir, orda nə qədər diş həkimi var.

Bu, hansısa filmdən bir dialoqdur. Koronavirusla dünyanı silkələyən Çinin alimləri bu həftə müəyyən ediblər ki, son onilliklər ərzində Yerdə müşahidə olunan iqlim dəyişiklikləri onun oxunun əyilmə bucağını dəyişib. Başqa bir alim qrupu isə açıqlayıb ki, Marsa ezam olunmuş tədqiqat qrupunun yerə göndərəcəyi torpaq kapsullarının "Mars taunu"na səbəb ola bilmə təhlükəsi var. Səbəb kimi isə Marsda, məsələn, torpaqda mikroorqanizmlərin ola bilmə ehtimalı göstərilir.

Yaponiyadakı Sakurajima dağında isə vulkan püskürüb.

Bunlar hamısı qaranlıqdakı diş həkimləridir.

Orta Asiyada burulğan

Hələ Marsdan gətirilən torpaq yerə çatmasa da Orta Asiyada burulğan başlayıb. Amma bunda təbiətin günahı yoxdur. Qırğızlarla taciklər öz aralarında nəyisə bölüşdürə bilmirlər. Türk birliyinə nail olmaq arzusunun cuşa gəldiyi bu günlərdə iki türk ölkəsi bir-birinin qanını töküb: ölənlərin sayı 30-u ötüb, yaralıların sayı yüzlərlədir. Bölgədə münaqişə ocağını kimin yaratmağa çalışmasını müzakirə etmədən, qeyd edək ki, ekspertlər dünyada su hövzələri uğrunda savaşların yeni fazaya keçdiyi qənaətindədirlər və bunu da o qəbildən hesab edirlər.

Əlbəttə, Yer kürəsinin resursları 8 milyard əhali üçün yetərli deyil. Bu arada əhalisinin sayı ilə başı ağrıyan Çində kafe və restoranların müştəriləri qida qalıqlarına görə cərimə olunacaq. Qeyd edək ki, hər il bu ölkədə 18 milyard ton qida qalıqları toplanır. Bir neçə aylıq tullantı ilə bütün Çini doyurmaq olar.

Alimpaşa müəllimin maralları

Həmin qida qalıqlarını israf etməmək üçün heç olmasa Şəmkirdə - Alimpaşa müəllimin maral fermasında istifadə etmək olardı, amma gəl ki, bu həftə DTX kişini tutub Bakıya gətirdi. Maralları saxladığı dəmir barmaqlılqlar arasına, ola bilsin ki, indi onun özünü göndərəcəklər. Xeyli yeyintiyə yol veribmiş, yenidən sadalayıb, başınızı ağrıtmaq istəmirik.

Hüseynbala müəllimin öz işçilərinə "maral" münasibəti isə 2 həftə öncənin "tema"sı olsa da, o, bu həftə də manşet olmağı bacardı – müəllim dedi ki, "o qız mənim qızım yerindədir, ayıbdır, belə söhbətlər etməyin". Orucluq ayında "üzürü ayıbından betər" olan bu ayıb söhbəti çox uzatmadan, deyək ki, həftənin ən üzücü hadisələrindən biri dini bayramda qeydə alındı: İsraildə Laq ba-Omer bayramının keçirilməsi zamanı tribunanın uçması və izdiham nəticəsində 44 nəfər öldü.

İrəvanın göz yaşları

Həftənin əvvəlində öz "qırğının" bayramını (Baydenin açıqlamasını bayram kimi qavradılar) qeyd edən ermənilər üçün həftənin sonu bir az nəsh gəldi. ABŞ Dövlət Departamenti onların kefinə soğan doğradı. Baydenin qondarma soyqırımla bağlı açıqlamasına Departamentin şərhi belə oldu: "ABŞ Prezidentinin son açıqlaması ABŞ məhkəmələrinin mülki yurisdiksiyası qarşısında Türkiyənin suveren toxunulmazlığına təsir etmək məqsədi daşımayıb".

Hansı ki, İrəvanda "tarixi torpaqların" geri alınması ilə bağlı ümidlər cücərmişdi, Departament cücərtiləri çiçəkləməmiş dəfn etdi.

Eh, nə Moskva, nə də Vaşinqton göz yaşlarına inanmırmış. İllah da ki, o göz yaşları saxta ola.

Minasız gələcək

İki rus zabitinin anasının göz yaşları isə saxta deyil: Ötən həftə iki rus sülhməramlı avtomobilin minaya düşməsi nəticəsində yaralandı. Tank əleyhinə minadan yaxşı qurtulublar – yəqin anaları kilsədə şam yandırırmış.

Ermənistan minalanmış ərazilərin xəritəsini verməməklə faktiki olaraq müharibəni davam etdirir. Artıq 100-dən çox azərbaycanlı bu "gizli qatillər"in qurbanı olub – ya yaralanıb, ya da həyatını itirib.

Avropa İttifaqı bu həftə bəyanat yaydı, üçtərəfli bəyanatdan məmnunluğunu ifadə etdi, eyni zamanda İrəvanı xəritələri verməyə çağırdı. Amma çi fayda. BMT qətnamələrinə 30 ildir məhəl qoymayan Avropa İttifaqının bir bəyanatını vecinə alacaq?!

Bu arada Türkiyə istehsalı olan pilotsuz uçuş aparatlarının "Google"da axtarışı ilə bağlı maraqlı məlumat açıqlandı. Sizcə, bu aparat barədə ən çox axtarış aparan kimlərdir? Bəli, ermənilər. Müasir insanın da bir bəlası var: xəstəliklərinin müalicəsini internetdə axtarır.

Bu arada qırğızlar da "Bayraktar" almaq üçün Türkiyəyə müraciət edib.

Qandinin heykəli

İrəvanda Hindistan Azadlıq Hərəkatının lideri M.Qandinin heykəlini yandırıblar. Əslində, Qarabağda islam və Azərbaycana aid abidələri yerlə bir edən toplumun hansısa liderin heykəlini yandırması təəccüb yaratmasa da, hərəkətin hind xalqına qarşı təhqir olduğu faktdır. Baxmayaraq ki, Dehli-İrəvan əlaqələri yaxşıdır, ancaq bud a yeni reallıqdır, ermənilər üçünmənəvi dəyərlər yoxdur.

İrəvandan söz düşmüşkən, bu həftə irəvanlılar şəhrdə torpaq sahəsinin azərbaycanlıya satılmasına etiraz ediblər, ancaq polis onları dəyənəklə qarşılayıb və bildirib ki, torpağı alan İran vətəndaşıdır.

Bilirsiniz də, Cənubi Azərbaycan hüquqi cəhətdən tanınan ifadə deyil, bütün cənubi azərbaycanlılar da İran vətəndaşıdır.

Qapqara və ağappaq

Yevlax rayonunda azyaşlı atalığı tərəfindən döyülərək ağır fiziki işgəncələrə məruz qaldı.

Başqa bir zorakılıq faktı isə Lənkəran rayonu Yuxarı Nüvədi kəndində qaynananın gəlinini döyməsi ilə bağlı idi – social şəbəkələrdə yayılan görüntülərə qaynananın reaksiyası birmənalı olub: "Zarafat edirdik". Gəlin də zarafatlaşmanı təsdiq edib.

Avtobus sürücüsünə yumruq atan növbəti "qəhrəman"ı da yəqin ki, görmüsünüz. O oğlan avtobus sürücüsünə ona görə yumruq atır ki, muskulu üçün sərf olunan vaxt və investisiya beyni və tərbiyəsi üçün də sərf olunmayıb.

Yazının əvvəlindəki qaranlıqdakı diş həkimləri barədə dialoq bədbinliyə əsas verməməlidir. Hər şeyin yaxı olacağına inanmaq lazımdır. "Nikbinlik strategiyadır. Əgər siz gələcəyin yaxşı olacağına inanmırsınızsa, gələcəyin yaxşı olması üçün heç vaxt addım atmayacaqsınız. Əgər ümidiniz yoxdur deyirsinizsə, onda ümidiniz olmayacaq. Seçim sizindir". Naum Çomski adında məşhur alimin belə bir tezisi var.

Dünyanın gələcəyi ilə bağlı xeyli pozitiv əsaslar da var axı. Bu həftəyə düşən bir neçə fakt bu qəbildəndir: Çində pilotsuz dron taksinin ilk sınağı keçirilib (Çinin təkcə dünya iqtisadiyyatında yox, yazılarımızdakı payı da artıb), Niderlandlı cütlük tamamilə 3D printerdə çap olunmuş evə köçüb, Avstraliyanın Monaş Universiteti alimləri alma yığımı üçün robot hazırlayıblar, rus alimlər süni dəri yaradıblar və s.

81
Min bir gecə baleti, arxiv şəkli

"Min bir gecə" baleti beynəlxalq festivalda

0
(Yenilənib 23:11 07.05.2021)
Balet mayın 13 və 14-də göstəriləcək. Tamaşanı Azərbaycan Dövlət Akademik Opera və Balet Teatrının baş dirijoru, Əməkdar artist Əyyub Quliyev idarə edəcək.

BAKI, 7 may — Sputnik. Görkəmli Azərbaycan bəstəkarı Fikrət Əmirovun "Min bir gecə" baleti mayın 13-dən iyunun 2-dək Tatarıstanın paytaxtı Kazanda keçiriləcək Rudolf Nureyev adına 36-cı Beynəlxalq klassik balet festivalında nümayiş olunacaq. Sputnik Azərbaycan xəbər verir ki, Tatarıstan Dövlət Akademik Opera və Balet Teatrının səhnəsində reallaşacaq festival Rusiyanın Əməkdar incəsənət xadimi, həmvətənimiz Eldar Əliyevin xoreoqrafik quruluşunda Mariinski Teatrının Primorsk səhnəsinin (Vladivostok) "Min bir gecə" tamaşası ilə açılacaq. Balet mayın 13 və 14-də göstəriləcək. Tamaşanı Azərbaycan Dövlət Akademik Opera və Balet Teatrının baş dirijoru, Əməkdar artist Əyyub Quliyev idarə edəcək.

Eldar Əliyevin quruluşunda "Min bir gecə" baletinin premyerası 2020-ci ilin avqustunda olub.

Dünyaca məşhur balet artistləri, xoreoqraf və dirijorları bir araya gətirən Rudolf Nureyev adına festival 1987-ci ildən keçirilir.

0