Kompüter arxasında kişi, arxiv şəkli

Yuxunu işinə qurban verdinsə, sabah yorğunluqla birgə addımlayacaqsan

295
(Yenilənib 23:28 24.03.2021)
Bəzi alimlərin fikrincə, istirahət günləri artıq yatmaq elə də xeyirli deyil, orqanizmin bərpasına xidmət etmir, çünki yenə də bioritmlərlə üst-üstə düşmür.

Rusiyalı həkim-nevroloq Mixail Tardov gün boyu yol verilən qısamüddətli yuxunun insana ziyan verə biləcəyini açıqlayıb. 15-20 dəqiqəlik yuxu insanın daxili ritminə uyğun deyil, məhz bu səbəbdən gündüz yatmaq xeyirdən çox ziyan gətirə bilər. Normal fizioloji yuxu yalnız gecə mümkündür, gündüzün qısamüddətli mürgüləməyi yalnız olduqca yorğun orqanizm üçün məqbuldur. Bir sözlə, nevroloqun fikrincə, hərdənbir yol verilsə də, gecə yuxusuna haram qatıb onu gündüzlə əvəzləmək lazım deyil.

Nahardan sonra hamı yatır

Yalnız bəzi xəstəliklərdə gündüz yatmaq məsləhət bilinir. O da uzaqbaşı 20-30 dəqiqə. İnsan yaşa dolduqca onun 90 dəqiqəlik yuxu fazası azalır, 30 dəqiqə olur. Yaşı 60-65 olan insanlar elə gündüz mürgüləməklə yorulmuş orqanizmi bərpa etməyə çalışırlar.

Bəzi alimlərin fikrincə, istirahət günləri artıq yatmaq elə də xeyirli deyil, orqanizmin bərpasına xidmət etmir, çünki yenə də bioritmlərlə üst-üstə düşmür. Bütün somnoloqlar yatağa saat 22.30-da girməyi məsləhət bilirlər, çünki artıq saat 23.00-dan başlayaraq orqanizmdə melatonin hormonunun istehsalı işə düşür. Streslə mübarizədə olduqca xeyirli olan melatoninin əmələ gəlməsi üçün yatağa vaxtında girmək, həm də işıqda yox, tam qaranlıqda yatmaq məsləhət bilinir.

Bəzi həkimlər yatmaq üçün ən münasib vaxtın saat 15.00-17.00 arasında olduğunu bildirirlər. İspaniyada siyesta adlanan bir adət var, yəni burada yaşayan insanların rəsmi olaraq günorta naharından sonra 2 saatlıq yuxuya getmək icazəsi var. Nahardan sonra demək olar, hamı yatır. Yaxşıdır, ya pisdir, bunu demək çətindir, amma bir növ yuxunun bir fazasına bəs edir. Əslində, İspaniyanın isti iqlimində bəlkə də insanların gündüz yatmaqdan başqa çarəsi qalmırmış. Ərəb ölkələrində bundan da sərt yerdəyişmələr olur. 40-50 dərəcə istidə harasa çıxmaq, nəsə etmək mümkün olmadığından ərəblər gündüzlər yatır, gecələr isə yaşayırlar. Səhər 5-dən sübh namazına durur, sonra saat 12.00-a kimi nəsə fəaliyyət göstərir, sonra saat 18.00-a kimi yatırlar. Axşam 6-dan isə həyat yenə davam edir.

Bir neçə işdə çalışmağın da yalnız bir yolu var: gərək yuxudan kəsəsən

Nahardan sonra bir qədər yatmağı Böyük Britaniyanın baş naziri Vinston Çörçill, ABŞ prezidenti Ronald Reyqan, hətta milyardların sahibi Con Rokfeller sevərmiş. Müasir dövrdə həyat ritmi olduqca sürətləndiyindən kiminsə gündüz vaxtı yatması elə də yaxşı qəbul olunmur. Amma hər bir ofis işçisi nahardan sonra mütləq haradasa 30 dəqiqə mürgüləyir. Yəni nahardan qayıdan işçinin özünə gəlməsi üçün ən azı bir saat vaxt tələb olunur. Qidanı həzm etməyə çalışan orqanizm digər bütün funksiyaları bir növ söndürür, həzm bitəndən sonra insan yenidən öz işinə qayıda bilir.

Müasir insanın istəklər siyahısında nəzərdə tutduğu ən möhtəşəm iş bəlkə də yatmaqdır. Baxdığımız hər iki Hollivud filmindən birində iki, hətta 3 işdə çalışan insanları görürük. Hətta istirahət filan olmadan həftədə 60 və daha artıq saat işləyən film qəhrəmanları bu barədə fəxrlə danışırlar. ABŞ düşüncə tərzində bu qədər çalışmaq, çoxlu pul qazanmaq normal bir haldır. Bir neçə işdə çalışmağın da yalnız bir yolu var: gərək mütləq yuxudan kəsəsən. Yeməyi də elə ayaqüstü yeyəsən, nə istirahətin var, nə də azad zamanın. Hər yerə tələm-tələsik qaçmalı olursan.

Yuxu üzünə həsrət qalan insanlar bəzən harada gəldi yatırlar

Heç gecə də yata bilmirsən, bir az gec yeyirsən, bir az çay-qəhvə içirsən, bir az filmə baxırsan, bir də gördün səhər açıldı, işə qaçmalısan. Daha sonra bir işi bitirib o biri işin növbəsinə çatmalısan. Yuxu üzünə həsrət qalan insanlar bəzən harada gəldi, nəqliyyatda, metroda, dayanacaqda, iş yerində yatırlar, daha doğrusu, mürgüləyirlər. Xroniki yorğunluq səbəbindən heç bir iş insana sevinc gətirmir.

Günümüzdə heç sutkada 6 saat davamlı yatmaq belə hər adama qismət olmur. Çünki gərgin iş rejimindən əlavə hər bir insan həm də gündəlik olaraq onlarla problemi həll etməli olur. Texnologiya həyatımızı nə qədər asanlaşdısa da, digər tərəfdən nəyinsə qırılması, təmiri, dəyişdirilməsi də xeyli güc tələb edir. Problemlərin həlli bizi olduqca gərgin prosesdə olmağa sövq edir. Birini düzəldirsən, yerinə digəri yaranır.

Beyin daim gərginlikdə olduğundan bəzən yuxusuzluq xroniki bir hala çevrilir. Necə yatasan axı, gör nə qədər fikir var? Bəzən yatmaq istəyirsən, amma yata da bilmirsən. Əgər yuxuya getmək heç cür mümkün olmursa, insan əziyyət çəkirsə, deməli, bunun bir yolu var: məsələni tam araşdırmaq gərəkdir. Gecə vaxtı həddindən artıq yeməyi sevən insanların yuxu ilə problemi olur, çünki qidanı həzm etmək üçün müəyyən zaman tələb olunur. Gecə içilən hər fincan çay və qəhvə də beyni qıcıqlandırır, üstəlik çayla şokolad yeyənlərin işi lap çətinə düşür, əsəb sistemi heç cür sakitləşə bilmir.

Yuxu bir qədər gözləyər deyə düşünürlər

Yuxuya getmək üçün sakitləşdirici çaylardan istifadə etmək daha məsləhətdir. Nanə, kəklikotu, yemişan, pişikotu kimi bitkilərdən hazırlanan çay yuxuya getməyə dəstək ola bilər. Ağır yeməyi isə kənara qoymaq yaxşıdır. Fizioloji faktoru ortadan yığışdırdan sonra effektli yuxulamaq üçün bəzi qaydalara da əməl etməyinə dəyər. Əgər insan yaxın yarım saatda yatmaq istəyirsə, hər hansı bir maraqlı filmə baxması doğru deyil, əsəb sisteminin emosional qıcıqlanması baş verəcək, yatmaq mümkün olmayacaq. Yuxulamaq üçün nəsə sakit, monoton səslə verilən verilişə və ya sənədli filmə baxmaq da bir növ beyni söndürür. Hətta filmi xarici dildə də dinləmək olar, nəticədə heç nə anlamayan əsəb sistemi “yuxulayacaq”. Elə uşaqlara yataqda oxunan nağılın da kökündə eyni prinsip durur. Nağıl oxunduqca, uşaq sakitləşir, tədricən yuxuya gedir, çünki ona nağıl oxuyan valideyninin yaxında olduğunu, onun üçün heç bir təhlükənin olmadığını düşünür.

Bu gün karyera qurmaq, həyatda özünə yer qazanmaq istəyən gənclərin bir çoxu yuxunun hesabına lazım olduğundan xeyli artıq çalışmağa, sağlamlığı qurban verməyə hazırdır. Yuxu bir qədər gözləyər deyə düşünürlər. Amma illər sonrası bir paket sağalması mümkün olmayan və ya həyatın keyfiyyətini azaldan xəstəlik qazanan insanın keçirdiyi hissləri də sözlə ifadə etmək çətindir. Budur, artıq peşə də var, karyera da qurulub, ailə üzvləri ilə birlikdə xoşbəxt yaşamağın əsil vaxtıdır, amma mümkün deyil, çünki sağlamlığın bir hissəsi qurban verilib. Depressiya, xroniki yuxusuzluq və yorğunluq, yaş böhranı səninlə birgə addımlayır. Bir sözlə, həyat uğrunda mübarizədə nə gecə yuxusunu, nə sağlamlığı qurban verməyəsən gərək.

Bu itirdiyini sonradan heç cür qaytara bilməzsən çünki.

295
Ofisdə iş, arxiv şəkli

Mühitdən kənar düşən jurnalist: yarım əsr işləsə belə, onu xatırlayan yoxdur

1796
(Yenilənib 00:14 19.04.2021)
Texnoloji baxımdan daha savadlı olan yeni nəsil özünə daha tez yer qazanmağa çalışır. On illərlə karyera qurmaq bir qədər darıxdırıcı görünür, çünki on il sonra daha bir nəsil gələcək, bu bilik bazarı köhnələcək.

Müstəqillik dövrünün Azərbaycan jurnalistikasında qəribə proseslər baş verib. Əgər sovet dönəmində “Azərbaycan gəncləri” qəzetində kiçik bir məqalə dərc eləmək Aya uçmaq qədər çətin bir iş idisə, bu gün ən yararsız məqaləni, səs faylını, videonu onlarla platformada paylaşmaq su içmək qədər asan məsələdir.

Yeni qəbul qaydaları hər kəsə jurnalist olmağa imkan verirdi

Azərbaycanın sovet dövrünün jurnalistikası nə qədər ciddi olsa da, təbliğ edilən dəyərlər insanlara bir o qədər maraqsız görünürdü. İstər-istəməz təklif edilən mövzunu, heç bir maraq doğurmayan məqalələri oxumağa məhkum idik. Əlbəttə, jurnalistikada yüzlərlə istedadlı şəxs çalışırdı, redaktorlar düzəldirdi, korrektorlar səhvləri tuturdu.

İstedadlı publisist Nurəddin Babayevin “Qızlar sözüm sizədir” kitabı ayrı-ayrı yazıların toplumudur. O dövrdə maraqla da oxunub.

Azərbaycan jurnalistikası Sovet imperiyasının dağıldığı dövrdə kəskin dəyişdi, köhnə qaydalar sıradan çıxdı, yeni növ, fərqli bir jurnalistika yarandı. Sovet dövrünün bütün ştampları mənasızlaşdı. İndi qəzetdə tənqid etmək də olardı, yeri gəlsə, lap kimisə yıxıb sürümək də. Əgər əvvəllər jurnalist olmaq üçün hansısa qəzetdə məqalən dərc olunmalı, qabiliyyət imtahanı vermək lazım gəlirdisə, sonra bir anda bu qaydalar dəyişdi. Daha bu peşədə təhsil almaq üçün “Bakinski raboçi” qəzetində kiçik bir essenin dərc olunması əhəmiyyətli deyildi. Yeni qəbul qaydaları hər kəsə jurnalist olmağa imkan verirdi. Qeyri-ixtisasdan da jurnalistikaya bir axın oldu, sözün kəsəri gücləndi, tədricən senzura da ortadan götürüldü.

Xəbərlər anbaan internetə yüklənirdi

İnternet erasının ölkəyə gəlişi mətbuatı bir daha dəyişdirdi. Əgər 2000-ci ilin əvvəllərində informasiyanı hətta disketdə çatdıran kuryerə rast gəlinirdisə, artıq bir neçə il sonra artıq xəbərlər elektron poçtuna axınla gəlirdi. 2003-2005-ci illərdə ölkədə yaranan ilk saytlar digər ənənəvi media ilə müqayisədə zəif görünsələr də, zaman ötdükcə, internet mediasının gücü dayanmadan artdı. Əlbəttə, heç bir qəzet və ya televiziya informasiya saytı və ya agentliyi ilə rəqabətə davam gətirə bilməzdi. Xəbər varsa, anındaca hazırlanıb dərc olunurdu. Özü də qəzetdən fərqli olaraq saytda çalışmaq üçün 3-5 adam kifayət edirdi. Xəbərlər anbaan internetə yüklənirdi.

Ənənəvi media internet mediası ilə rəqabət aparmağın mümkünsüz olduğunu anlayıb özü də internetdə resurs yaratmağa başladı. Yəni televiziyaların və qəzetlərin saytları yarandı, bir çox radiostansiya internetdən yayımlanmağa üstünlük verdi. Ənənəvi mətbuat elə bil tədricən yox oldu. Bu gün hətta klassik televiziya da itib, yəni İPTV xidmətinin köməyi ilə istədiyin kanala baxa bilərsən, yeri gəlsə, kadrı dayandırıb başqa işinə zaman da ayırmaq olar. Sonra yenidən eyni verilişə dönmək olar. Televiziya yayımının internetlə ötürülməsi görüntünün keyfiyyətini də artırıb, daha külək əsəndə, dama çıxıb antenanı ora-bura çevirməyin adı yoxdur.

Hər 5-10 ildən bir informasiya sferasına gələn gənclər bir növ “qoca”ları sıxışdırır

İnternet mediası güc topladıqca, qəzetlər tədricən sıradan çıxdı. Kiminsə bu yeni medianın əbədi olacağını düşünməsi də yanlış oldu. Çünki 2010-cu illərdən başlayaraq artıq sosial şəbəkələr informasiya mühitini zəbt etməyə başladılar. Sayt və agentliklər informasiya monopoliyasını itirdilər. Nəyə lazım hansısa saytın səhifəsini izləmək? Hər bir xəbər sosial media platformalarında paylaşılır, hətta informasiyanın kimdən gəldiyi də vacib deyil, sanballı agentliyin səhifəsindən götürüb öz profilində paylaşa bilərsən. Bu gün "Facebook", "Twitter" kimi nəhəng sosial şəbəkələri günbəgün "Instagram", "Telegram", "WhatsApp", "TikTok" kimi yeni platformalar sıxışdırır.

Müasir jurnalistika kökündən dəyişib və jurnalistlər hətta yaxın 5-10 ilə bir plan qurmaqda çətinlik çəkirlər. Bu gün sənə ehtiyac var, sabah səni xəbər yazan robot əvəzləyə bilər. Bu gün hansısa mövqedə uzun müddət qalacağına da ümid yoxdur, rəqəmsallaşma bir çox işləri sıradan çıxardaraq yeni peşələri gündəmə gətirir. Hətta sosial media meneceri işləmək jurnalist olmaqdan daha perspektivli sayılır, çünki əsas izləyici kütləsi məhz sosial şəbəkədə cəmlənib. İnformasiya saytının məhsul istehsal etməsi elə də vacib deyil, bunun münasib formada istifadəçiyə çatdırılmasıdır. Hər 5-10 ildən bir informasiya sferasına gələn gənclər bir növ “qoca”ları sıxışdırır, çünki biliyin köhnəlməsi çox sürətlə reallaşır. On il öncə sosial şəbəkədə keçirilən zamana bir çox redaktor itirilmiş imkan kimi baxırdı. Hazırda isə hamıya deyilir, mümkün olan hər yerdə paylaşım edin.

İnsan 55 ildir mətbuatda çalışır, amma onu tanıya bilmədim

Texnoloji baxımdan daha savadlı olan yeni nəsil özünə daha tez yer qazanmağa çalışır. On illərlə karyera qurmaq bir qədər darıxdırıcı görünür, çünki on il sonra daha bir nəsil gələcək, bu bilik bazarı köhnələcək. Bu gün nəyisə edə bildinsə, qazanırsan. Bu gün hansısa media orqanına işləməyə gələn gənc jurnalistin bir iki ilə uğur qazanaraq imzasını tanıtması normal haldır.

Amma ömrünü jurnalistikaya sərf etmiş yüzlərlə minlərlə insan çalışdığı mediadan savayı heç yerdə tanınmır. Yeni texnoloji tərəqqi, yeni trendlər bu jurnalistləri bir növ jurnalistikadan uzaq salıb. Hələ də dədə-baba qaydası ilə kağızda yazı yazan, onu redaksiyaya təhvil verən, buna görə qonorar alan nə qədər jurnalist var. Amma onların istehsal etdiyi məhsul heç kimə maraqlı deyil, nə dinamika var, nə də gündəmi anlamaq duyumu. Jurnalistikada olsalar da, olmamış kimidirlər.

Soruşursan, deyir 1970-ci illərdə mətbuata gəlmişəm, sovetin dağılmağını, Birinci və İkinci Qarabağ savaşını, kompüterlərin ilk modellərini, internetin tədricən həyatımıza daxil olmasını görmüşəm, amma hələ də kompüterdə yazı yazmağı öyrənməmişəm.

Haşiyə: elektrik qatarında yan-yana oturmuşduq, nəsə söhbət jurnalistikadan düşdü. Haradasa yaşı 70-dən yuxarı olardı. Atdı əlini cibinə, bir nimdaş vəsiqə çıxartdı. 1964-cü ildə Jurnalistlər Birliyindən verilmişdi. O vəsiqənin daha müasir forması məndə də vardı, çıxarıb göstərdim. Elə hey danışdıq, işlədiyi mətbuat orqanlarını sadaladı. Uzun müddət hətta elmi jurnalda çalışdığını dedi. İnsan 55 ildir mətbuatda çalışır, amma onu tanıya bilmədim. Nə adını öyrənə bildim, nə də çalışdığı orqanın adını yadda saxlaya. Eləcə bildim jurnalistdir, amma informasiya sferasından kənarda qalıb.

Mətbuatda hər texnoloji yeniliklə nəsil dəyişməsi baş verir

Son dövrlərdə orta hesabla on ildən bir mətbuatda yenilənmə baş verir, yəni hər texnoloji yeniliklə nəsil dəyişməsi baş verir. Gənclər informasiya mühitində olan imkanlardan yararlanaraq yeni platformaların köməyi ilə məlumatın ötürülmə formasını da yeniləyirlər. Bu prosesdə nə qədər qəribə də olsa, bir xeyli jurnalist, yazar, bir sözlə qələm əhli yeni şəraitə uyğunlaşa bilmədiyindən informasiya prosesindən kənarlaşır elə bil. Gənclər SMM, infoqrafik, videodizayner, fotoredaktor, xarici xəbərləri nəhəng informasiya kanallarından izləyən müxbir, qrafik dizayner kimi vakansiyaları birmənalı olaraq internet dövründə anadan olmuş, həyatını onsuz təsəvvür edə bilməyən gənc kadrlar tutur.

“Qoca”lar yeni vəziyyətə uyğunlaşa bilirsə, deməli mətbuatda çalışacaqlar. Əks halda, daha sakit iş axtarmaq məcburiyyətində qalırlar. Məsələn, hansısa dövlət qurumunun mətbuat xidməti, şirkətin PR departamenti təcrübəli jurnalistləri mətbuatdan çəkib aparır. Özünə daha rahat yer tapan jurnalist elə informasiya mühitini kənardan müşahidə edir. Tam başqa sahəyə də keçənlər tapılır. Köhnə qayda ilə çalışan saytlar yeni yaranan rəqabət mühitində bir növ aciz olurlar.

Zamanın öz tələbi var: əgər hər hansı bir statistikanı xəbərdə istifadə edirsənsə, deməli anlaşıqlı qrafikə yer ayırmalısan. Ramazan ayında hansı ölkələrdə oruc zamanın neçə saat davam etdiyini bir sıra ilə vermək yetərli deyil, həm də müqayisəli bir infoqrafika olmalıdır. Hətta ölkənin sanballı media qurumları belə dəyişən şəraitə uyğunlaşa bilmir, ayrı-ayrı fərdlərin isə ortadan çıxması bəzən kütləvi hal alır. Bu gün jurnalistin istehsal etdiyi məhsulun daha münasib formada təqdim edilməsi uğurun yarısı deməkdir. Köhnə jurnalistlər bunu etməkdə bəzən acizlik duyur, yeni gələn kadrların isə tələb olunan təcrübəsi olmur, amma yenilənmə davam edir.

Gələcəyin mediasında nə baş verəcəyini bu gün proqnozlaşdırmaq çətin məsələdir. Sadəcə istiqamət tendensiyasını kim tutsa, uğurla işini davam edə biləcək. Kim bacarmadısa, peşəsindən uzaq düşüb unudulacaq.

1796
Lionel Messi

Fransa səfiri, Hitler, Messi sevgi

968
(Yenilənib 00:11 19.04.2021)
Taclı bəla"nın uşaqlar üçün təhlükəli olmadığı barədə indiyə qədər qəbul edilən streotip deyəsən, keçmişdə qalır.

"7x7" həftənin ən yaddaqalan 7 hadisəsini şərh edir

Gizli qatillər, laqeyd dünya

BMT Rusiyanın Qarabağdakı minatəmizləmə işlərinə qatılmaq təklifinə cavab verməyib. Şoyqu təşkilatdan gileylənib: "BMT-nin minaəleyhinə mərkəzinə dedik ki, gəlin. Axı insanlar oraya qayıda bilmir. Kimsə gəldi?"

Ermənistanın minalanmış ərazilərin xəritəsini verməməsinə dünya soyuqqanlıdır. 30 illik işğala göz yumanlar minalara səsini çıxartsalar, təəccüblü olardı, zatən. 100-dən artıq azərbaycanlının bu gizli qatillərin hədəfinə çevrildiyi halda, kimlərinsə dini abidələrin narahatlıq ifadə etməsi isə absurd tamaşasını xatırladır.

Bu arada bu həftə erməni hərbçilərinə məxsus cəsədlərin qalıqlarının axtarışı zamanı erməni FHN dəstə komandiri minaya düşdü. Hansı ki, ermənilər azərbaycanlıları məhv etmək üçün basdırmışdılar. Ona ilk tibbi yardımı Azərbaycan hərbçiləri göstərdilər.

...Qalib barışıq üçün əl uzadır, İrəvanda isə revanş pafosu hökm sürür. Amma hansı güclə bilinmir? Bu həftə Azərbaycan Prezidenti ADA Universitetində keçirilən konfransda regionun gələcək inkişafı ilə bağlı Rəsmi Bakının mövqeyini şərh edərkən, daha çox sülh mesajları verdi, indi seçim Ermənistanın siyasi elitasınındır – nəzərə alsınlar ki, diplomatlar susanda toplar danışır. Biz topları PUA-larla əvəz etmişik, onlar iti daha yaxşı qovur.

"Günah keçisi" axtarışında

Bədbəxt cəmiyyətlərin psixoloji sarsıntısını azaltmaq üçün sınaqdan çıxarılmış üsullardan biri kənarda düşmən obrazını yaratmaq və bütün məsuliyyəti onun üzərinə atmaqdır. Ermənistan indi həmin illuziyanın canlandırılması ilə məşğuldur: bütün fiaskoların günahkarı Türkiyə və Azərbaycandır. Amma arabir xırda günahkarlar da lazım gəlir. Məsələn, erməni mediasında diversantları (ermənilərin təbirincə 62 hərbi əsiri) geri ala bilməməyin "günah keçisi" axtarışında Rusiya sülhməramlıların komandanı Rüstəm Muradov da hədəflər sırasındadır.

Fransanın Ermənistandakı səfiri isə Ermənistanın məğlubiyyətini "Ləyaqətli məğlubiyyət" adlandırıb. Kiçik bacını ovsunlamaq lazımdır axı. Səfiri anlamaq olar, İkinci Dünya Müharibəsində Fransa bir ay tamam olmamış təslim olmuşdu, müqavimət göstərə bilmədiyi üçün həzz almaq qərarını vermişdi Paris... Odur ki, Fransa səfiri üçün 44 günə uduzmaq "ləyaqətli məğlubiyyət" kimi görünür, yoxsa ləyaqətin Ermənistana nə dəxli?!

Bu arada Fransa parlamenti 15 yaşınadək uşaqla cinsi əlaqənin birbaşa təcavüz kimi qəbul ediləcəyi haqda qanun qəbul edib. İndiyədək belə deyilmiş yəni. Və bir də: yeni qanunda "Romeo və Cülyetta" maddəsi əlavə olunub. Bu maddə yaşıdlar arasında cinsi əlaqəni mümkün edir. Bunun cinayət sayılması üçün cinsi əlaqə iştirakçılarından biri digərindən beş yaş böyük olmalıdır.

"Əgər dünya bir dövlətdən ibarət olsaydı, sənayeni almanlar, ordunu türklər, fahişəliyi isə fransızlar idarə etməliydi". Səfir inciməsin, bunu biz demirik, Adolf Hitler deyib.

İngilislər isə

Qərbi Avropaya keçmişkən, koronavirus dünyadan əl çəkəcək, Britaniya yeni mutasiyalardan əl çəkməyəcək kimi görünür. Gözünüz aydın, infeksiyanın daha bir mutasiyası aşkarlanıb. Yeni Britaniya mutasiyası Cənubi Afrika və Braziliya variantlarından daha yoluxucu ola bilər. Bu həftə Hindistanda da koronavirusla bağlı vəziyyət ağırlaşdı, yoluxma və ölüm sayında antirekord qeydə alındı. ABŞ əczaçılıq şirkəti "Pfizer" isə koronavirus peyvəndinin üçüncü dozasına ehtiyac ola biləcəyini açıqlayıb. Təəccüblənmərik, pis biznes deyil. Görünür, ÜST-ün bu həftə verdiyi bu açıqlama da təsadüfi deyil: "Yer kürəsinin əhalisi tezliklə bütün pandemiya dövründən bəri yoluxmanın pik dövrünə yaxınlaşacaq".

"Taclı bəla"nın uşaqlar üçün təhlükəli olmadığı barədə indiyə qədər qəbul edilən streotip isə deyəsən, keçmişdə qalır: ABŞ və Böyük Britaniyadan olan alimlər o qənaətə gəliblər ki, koronavirus uşaqlarda insult riskini artırır. Bu arada Putin növbəti dəfə vaksinasiya olunub. Hə bir də maraqlıdır, görəsən, ABŞ-ın anbarlarında bərk-bərk saxladığı vaksinlərin axırı nə oldu?! Qurd düşüb xarab olar, demək lazımdır arasına naftalin filan qoysunlar...

832 milyon peyvəndləmənin 82 faizdən çoxu yüksək və orta gəlirli ölkələrdə, yalnız 0.2 faizi isə az gəlirli ölkələrdə həyata keçirilib.

Messi isə Cənubi Amerika futbolçuları üçün koronavirus peyvəndinin alınmasında köməklik göstərib – o, bir formasının əvəzinə 50 min doza "Sinovac" alıb.

Bəs Ronaldo?

Digər ulduz Ronaldodan da xəbər var. O, İtaliya çempionatının növbəti oyununda formasını yerə çırpıb. Bundan öncə Portuqaliya millisinin heyətində Serbiya ilə oyunda kapitan sarğısını yerə tullamışdı. Sonra həmin sarğı hərraca çıxarıldı. İndi formanın da eyni cür satışa buraxıldığını eşidə bilərik.

Məlumdur ki, azarkeşsiz oyunlar futbol sənayesində pul dövriyyəsini əməlli-başlı aşağı salıb. Ronaldo marketoloqların sifarişləri ilə komandasına pul qazandırmış ola bilər.

İran televiziyası isə şortikli qadın hakimə görə "Tottenhem" – "Mançester Yunayted" matçının yayımını 100 dəfədən çox kəsib.

Nüvə təhlükəsi

Meksikada ölümcül təhlükəli radioaktiv qurğu oğurlanıb. Xatırlayırsınızsa, bu günlərdə İranda AES-i partlatmağa cəhd olmuşdu. Ardınca bu ölkə uranın 60 faizə qədər zənginləşdirilməsinə başlayacağı barədə Atom Enerjisi üzrə Beynəlxalq Agentliyi məlumatlandırdı. Bayden isə dedi ki, bu qərar nüvə razılaşmasıyla bağlı danışıqlara ziddir.

Bağışlayın, bəlkə də bir az sadəlövh suala görə, görəsən, olmazmı ki, dünya nüvədən ümumiyyətlə imtina etsin?!

Sülh üçün

ABŞ qoşunları Əfqanıstanı tərk edir. "Əfqanıstana birlikdə getdik, çıxma məsələsində də birlikdəyik" NATO-nun Pentaqonun qərarına reaksiyası belə olub. ABŞ hərbi gəmilərini Qara dənizə göndərmək planını da təxirə salıb. Görünür, Baydenin hərbi xərcləri azaltmaq qərarı öz nəticələrini göstərir. Britaniya qoşunları da Əfqanıstanı tərk edir, eyni zamanda ingilislər Qara dənizə eskadriya gəmisi və sualtı freqat gəmisi göndərmək qərarı veriblər. Bu, Rusiya ilə gərginlik fonunda Ukraynaya dəstək məqsədi ilə edilir.

Dünya sülh axtarışındadırmı? Fikir vermisinizmi, müasir siyasi ritorikada "sülh və təhlükəsizlik" frazasından çox istifadə olunur? Görünür, ritorika əsl mahiyyətə pərdə tutmaq üçündür.

Dünyanı sevgisiz böyüyən insanların savaşları məhv edir, kimsə deyib.

Sevgi demişkən...

Sevgi demişkən, Rusiyanın Həştərxan vilayətində yenidoğulmuşu onu öldürmək istəyən anasının əlindən xilas ediblər. Qadın xəstəxananın vanna otağında uşaq dünyaya gətirdikdən sonra onu boğmaq istəyib. İspaniya polisi isə Rumıniya vətəndaşı olan valideynlərin satdığı 12 yaşlı qızı xilas ediblər. Qızın valideynləri tərəfindən təxminən 4 000 avroya satıldığı deyilir.

50 min nəfərdən çox yapon hazırda 100 yaşını keçib, gözlənilir ki, 15 ildən sonr artıq bu göstərici 1 milyona yaxınlaşacaq. Bəli, dəniz məhsulları sağlamlıq və uzun ömür üçün şərtdir, ancaq yaponların rekordu daha ciddi amilə söykənir: bir-birini başa düşmək. Bizim cəmiyyətin ən ciddi problemlərindən biri məhz bir-birini dinləmək, başa düşməkdən ibarətdir. Bu məzmunda möhür sayıla biləcək bir dialoq var: "Bilirsən, problem nədədir, dostum? Biz bir-birimizi anlamaq üçün yox, cavab vermək üçün dinləyirik".

968
Sürücü sükan arxasında, arxiv şəkli

Cəlilabadda avtoxuliqanlıq edən sürücülər saxlanılıb

0
(Yenilənib 11:31 20.04.2021)
Rayon Məhkəməsinin qərarı ilə hər iki şəxs sürücülük hüququ 1 il müddətində məhdudlaşdırılmaqla 500 manat məbləğində cərimə olunublar.

BAKI, 20 aprel — Sputnik. Cəlilabad Rayon Polis Şöbəsinin Dövlət Yol Polisi Bölməsinin əməkdaşları tərəfindən keçirilən tədbirlərlə yol hərəkəti qaydalarını kobud şəkildə pozaraq piyadalara və digər yol hərəkəti iştirakçılarına ciddi təhlükə yaradan sürücülər saxlanılıb.

Daxili İşlər Nazirliyinin Mətbuat Xidmətinin Lənkəran regional qrupundan Sputnik Azərbaycan-a verilən məlumata görə, ayrı-ayrı vaxtlarda Cəlilabad rayon sakinləri T.Fətullayev sürücülük hüququ olmadan idarə etdiyi "VAZ 21011" markalı avtomobillə, İ.Abbasov isə "VAZ 2106" markalı avtomobillə rayon ərazisində digər nəqliyyat vasitələri və piyadalar üçün təhlükəli olan manevrlər və avtoxuliqanlıq hərəkətləri ediblər. İntizamsızlıq edən, yol hərəkəti qaydalarını kobud şəkildə pozan həmin sürücülər saxlanılaraq Rayon Polis Şöbəsinə gətirilib və barələrində tərtib olunmuş inzibati protokollar aidiyyəti üzrə baxılması üçün Cəlilabad Rayon Məhkəməsinə göndərilib.

Rayon Məhkəməsinin qərarı ilə hər iki şəxs sürücülük hüququ 1 il müddətində məhdudlaşdırılmaqla 500 manat məbləğində cərimə olunublar.

0