Quru meyvə satışı, arxiv şəkli

İrəvanda qərənfil, Bakıda qoz-fındıq

145
(Yenilənib 18:16 15.03.2021)
Azərbaycan hərbi təlimlərə başlayıb. Ermənistan da eyni qərarı qəbul edib. Ancaq məlum deyil, təlimlərdə kimlər, nələr iştirak edəcək?! Təxminən 4 milyard dollar dəyərində texnika, 4-6 min arası əsgər itirən ölkədə başıpapaqlı adam, lüləsi yerində texnika qalıbmı ki?!

7x7 həftənin ən yaddaqalan hadisələrini şərh edir.

Pandemiya bir yaşında

Ötən həftə pandemiya üçün “Happy birthday” oxuduq, çünki onun elan olunmasından düz bir il ötdü. Zəngin ölkələrin vaksin görməmişliyinin davam etdiyi bu günlərdə italyanlar öz karantinlərini yenidən sərtləşdirdilər, almanlar isə üçüncü dalğa ilə bağlı xəbərdarlıq aldılar. ÜST isə dünya ölkələrinə müraciət etdi: Koronavirusla mübarizə üçün 2,1 milyard dollar məbləğində maliyyə xərclərinə ehtiyac var. Necə düşünürsünüz, ÜST-ün rəhbəri Gebreyesus Ağdamda maşın bazarı biznesinə koordinasiya edə bilərmi?
Bu arada məlum olub ki, ABŞ-da koronavirusa qarşı milyonlarla “AstraZeneca” peyvəndi toplanıb, lakin preparat nə istifadə olunur, nə də istifadəsinə icazə verilən ölkələrə göndərilir. DTX Ata Abdullayevi saxlamasaydı, qlobal bəlanın bütün dünyanı silkələdiyi bu günlərdə Vaşinqtonun hərəkətini təftiş etmək üçün onu ezam etmək olardı. Yadınızda deyilmi, Paşinyanı nə günə qoymuşdu?!

Gül kimi gün

Bakının mərkəzi küçələrindən biri, arxiv şəkli
© Sputnik / Murad Orujov

8 Mart Qadınlar Günündə bakılı feministlər etiraz aksiyası keçirdilər. Onlar qadın hüquqlarının tam təmin olunmadığından narazı idilər. Məhz həmcinsləri olan polislər onların icazəsiz aksiyasının qarşısını aldılar. Bölməyə aparılan bir neçə etirazçıya rəisin bayram münasibətilə təqdim etdiyi gülü xanımlar geri çeviriblər. Axı bu, dialoqun, xoş impulsun göstəricisi sayıla bilər. Xanımlar gülü nə üçün götürməyiblər, aydın deyil.

Hər halda, etiraf etməliyik ki, qadınların özünü realizə imkanları tarixən həmişə məhdud olub. Çünki şərtlər, rəqabət imkanları bərabər olmayıb. ABŞ-da 1920-ci, Böyük Britaniyada 1928-ci ilə qədər qadınlar seçkilərdə iştirak edə bilməyiblər. Səudiyyə Ərəbistanı isə bu baxımdan ümumiyyətlə, biabırçı göstəriciyə sahibdir - burada bu yaxınlarda, 2015-ci ildə qadınlar səsvermə hüququ əldə ediblər. Əslində, qadın-kişi bərabərliyi biz kişilərin də maraqlarına cavab verir - kişilərin yükü azalar bu halda. 2016-cı ildə 91 ölkədə aparılan araşdırma şirkətlərin idarə edilməsində qadınların iştirakının biznesi daha sərfəli etdiyini göstərir.
Bu arada 8 Martda Kiyevdəki Dövlət Telekommunikasiya Universitetində qadın tualetinin təntənəli açılışı olub. Gör, gözəl qadınların başını necə aldatmaq istəyirlər?!

İrəvanda qərənfil bahalaşıb

Azərbaycan hərbi təlimlərə başlayıb. “Qonşudan qalma dala” deyən Ermənistan da eyni qərarı qəbul edib. Ancaq məlum deyil ki, təlimlərdə kimlər, nələr iştirak edəcək?! Təxminən 4 milyard dollar dəyərində texnika, 4-6 min arası əsgərini itirən ölkədə başıpapaqlı adam, lüləsi yerində texnika qalıbmı ki?! Baş Qərargah rəisi də yoxdur, birini Paşinyan istefaya göndərdi, onun xələfini isə prezident təsdiqləmir. Ölkə qalıb ortalıqda, götürən yoxdur.
“İrəvanın hər küncündə gül-çiçək satılır. Qırmızı qızıl gül, qərənfil çox bahalaşıb” - Rusiyanın “Arqumentı i Faktı” qəzetinin əməkdaşının İrəvandan hazırladığı reportaj bu sözlərlə bitir.
Bakıda da bahalaşma var: qoz-fındığın qiyməti kəllə-çarxa çıxıb. Bayram gəlir axı...

İntiharlar

Təəssüf ki, son həftələrin mənfi saldosu  - intiharı çıxış yolu kimi seçənlərin sayı artmaqda davam edir. Koronavirusun yaratdığı sosial qapanma, sosial sıxıntılar psixoloji gərginliyi artıra bilər, ancaq istənilən halda, intihar həll deyil.

İntiharlar niyə artır sualının çox sayda cavabı ola bilər. Ancaq onlardan biri biz jurnalistlərin məsuliyyətinə aiddir – mütəxəssislər də təsdiq edirlər ki, intihar xəbərlərinin çoxluğu yeni intihar cəhdlərini təşviq edir. Deməli, bu xəbərləri tirajlayarkən bir az xəsislik etsək, daha yaxşı olar. Belə getsə, koronavirusu kənara qoyub, intihar üçün vaksin axtarmaq lazım gələcək.

Müharibə və şahmat

Şahmatıçımız Şəhriyar şahmat üzrə Çempionlar Turunda Ermənistanı tərk etsə də, hələ də bu ölkənin şərəfini qoruyan Levon Aronyanı məğlub edib. Bir müddət öncə, Teymur Rəcəbov da “yəhudidən çox erməniyəm” deyən Aronyanın xoruzunu qoltuğuna vermişdi.

“Mənim şəxsi fikrimə görə, müstəqilliyə yenidən qovuşan Ermənistanın Artsaxın (Azərbaycanın gorbagor etdiyi qondarma "respublika"nı nəzərdə tutur – V.M.) azadlığı naminə 1992-1994-cü illərdə apardığı müharibənin qələbə ilə başa çatmasından sonra Ermənistanın öyünəcəyi ikinci uğur bizim şahmatda əldə etdiyimiz qələbələrdir” – bunu müsahibələrinin birində erməni şahmatçı qürurla söyləmişdi.
Ədalətsizlik əbədi yaşaya bilməz. 44 günlük müharibə ilə Azərbaycan əsgəri kimin kim olduğunu sübut etdi, şahmatçılarımız da Aronyanın gününü göy əskiyə büküblər, harada tutdular, məğlub edirlər.

Vicdan olsaydı...

ABŞ Konqresinin Nümayəndələr Palatasında ermənipərəst konqresmenlər guya Azərbaycanın 200-ə yaxın hərbi əsiri qaytarmadığını müzakirəyə çıxarıblar. Vicdan olsaydı, əlini üzərinə qoyub konqresmenlər özlərinə sual verməliydilər: Birinci Qarabağ müharibəsində itkin düşmüş 4 minə yaxın azərbaycanlının aqibəti barədə səsimizi niyə çıxarmamışdıq? Minalanmış ərazilərdə müharibədən sonra 10 mülki şəxs həlak olub, 10-dan çox adam yaralanıb, Ermənistan minalanmış ərazilərin xəritəsini vermir. Bu barədə niyə çağırış etmirik? Və 30 ildir, kağız üzərində qalan BMT qətnamələrinin icrasını niyə tələb etmirdik?

Konqresmenlərdən daha yaxşı

Robotlar ABŞ konqresmenlərindən yaxşıdır. Onların qərəzli olmayacağına ümid daha çoxdur. Bu günlərdə süni zəka bir neçə dəqiqə ərzində kurs işi yazıb. Robot 4 fəndən yalnız 1-nin öhdəsindən gələ bilməyib, ancaq hər halda, tarix fənnindən 4 və koronavirus mövzusu əsasında hazırlanmış kurs işinə görə 3 qiyməti alıb.

Əsrin ikinci yarısında süni zəkanın əksər sahələrdə dominantlıq edəcəyi ehtimal olunur. Ümid edək ki, insan onları siyasiləşdirməyi, məkr və yalanlarına alət etməyi bacarmayacaq və ABŞ konqresindəki ermənipərəst konqresmenləri də robotlar əvəz edəcək.

145
Teqlər:
hərbi təlimlər, Yerevan, Konqres, ABŞ, pandemiya, Koronavirus, ÜST, dünya, Azərbaycan, həftənin xülasəsi
Qız, arxiv şəkli

Zorakılığın adiləşməsi: kimdir günahkar?

45
(Yenilənib 20:06 11.04.2021)
İnsan övladı öz vəhşi, heyvani tərəfini tərbiyə etmədikcə, bu hadisələr qaçılmazdır. Bu məqamda media, ədəbiyyat, incəsənət məhz bu tərbiyə üçün vasitəçi olmalıdır.

BAKI, 11 aprel — Sputnik. Sosial şəbəkələrdə, xəbər saytlarında cinsi istismarla, zorlanma ilə bağlı xəbərlər gündəmə gələndə utancımdan özümə yer tapa bilmirəm. Bu cür xəbərləri oxuyanda özümü gücsüz, çarəsiz, təhqir olunmuş hiss edirəm. Hər dəfə qarşıma bu məzmunlu paylaşım, xəbər çıxanda o qədər sarsılıram ki, günlərlə keyiyirəm, ruhdan düşürəm, bəzən nəfəs almaqda da çətinlik çəkirəm. İnsan övladının qəddarlığı, xüsusilə ölkəmdə yaşayan, eyni havanı udduğum, eyni səma altında yaşadığım insanların heyvani hisslərlə, vəhşi instinktlərlə yaşaması, qəddarlaşması, hissizləşməsi məni qorxudur. Əminəm ki, neçə-neçə həssas insan mən yaşayan bu ağrılı hissləri yaşayır, həmin hadisədə zərər çəkənləri, zorakılıq qurbanlarını düşünür, düşündükcə gündə min yol yanındakı övladı, əzizləri, tanıdıqları, doğmaları üçün narahat olur. Təəssüf ki, bu cür xəbərləri tükünü tərpətmədən, zərrə qədər narahatlıq keçirmədən oxuyan, tirajlayan, reytinq xatirinə bu xəbərləri gündəmdə saxlayanlar var. Manyakların, qürursuzların və ləyaqətsiz ehtiras düşkünlərinin iyrənc əməllərini, bu qorxulu cinayətləri qeyri-peşəkar şəkildə təqdim etmək, paylaşmaq bəzi hallarda zorakılığı cəmiyyət üçün adiləşdirir. Bəzilərinin baş verənlərə reaksiyasız qalmasının bir səbəbi də bu xəbərlərin adiləşməsidir. Olduqca qorxulu, təhlükəli tendensiyadır. Zorakılığın, cinsi istismarın özü qədər, cəmiyyətin bu tip hadisələrə reaksiyasız qalması təhlükəlidir.

***

Qəbul edirəm ki, bütün cəmiyyətlərdə, hətta inkişafda bizdən çox-çox öndə olan ölkələrdə də bu cür iyrənc hadisələr baş verir. Bəli, razıyam ki, dünyanın bütün inkişaf etmiş cəmiyyətlərində bu hadisələr mediada işıqlandırılır. Ancaq hansı formada? Təbii ki, bu məsələlərdə peşəkar kodekslər gödən keçirilir, cəmiyyətin psixaloji aurası nəzərə alınır. Əlbəttə, media bu cür halları işıqlandırmalıdır. Sadəcə müharibədən yenicə çıxmış, pandemiyanın hər gün can aldığı, psixaloji gərginlikdə olan bir cəmiyyətdə bu xəbərlərin tirajlanmasında bir qayda, bir üslub tapılmalıdır. Narahatlığım medianın bu xəbərləri acgözcəsinə, bəh-bəhlə, manşetə çıxarması ilə bağlıdır. Bəzən media bu xəbərləri işıqlandırmadan hüquq mühafizə orqanlarına dəstək verməklə, onları təşviq etməklə hadisələrin açılmasına, günahkarın cəzalandırılmasına nail ola bilər. Təəssüf ki, əksəriyyət qısa müddətlik populyarlığın, məşhurlaşmağın, reytinq toplamağın arxasınca qaçır. İllərdir bu media xaosu davam edir və cəmiyyət hələ də bu faciələrdən dərs çıxarmayıb.

Məncə, insan övladı öz vəhşi, heyvani tərəfini tərbiyə etmədikcə, bu hadisələr qaçılmazdır. Bu məqamda media, ədəbiyyat, incəsənət məhz bu tərbiyə üçün vasitəçi olmalıdır.

***

Bu günlərdə Neftçalanın kəndlərinin birində azyaşlıya qarşı törədilən cinsi istismar olayı sadəcə dəhşətdir. Xüsusilə, zərərçəkənin bəzi yaxınlarının istismarda iştirakı, bəzilərinin isə hadisəni bilərək mane olmaması, göz yumması insanı dəhşətə gətirir. Mənəviyyatını və əxlaqını itirmiş bu cür qəddar insanlarla eyni cəmiyyətdə yaşamaq sözsüz ki, qorxulu, təhlükəlidir. İnanıram ki, tezliklə bu manyaklar, mənəviyyatını itirmiş şəhvət düşkünləri tezliklə öz layiq olduqları cəzanı alacaq. Düşünürəm ki, bu cəzalar da o qədər ədalətli, qanunlara və mənəviyyata əsaslanan şəkildə verilməlidir ki, bu cür əməlləri ağlından belə keçirənlər, çəkinməlidir.

Bir məqamı da xüsusi olaraq və ağrıyla qeyd etmək yerinə düşər: Azərbaycanda zorlanma, cinsi istismar, seksual xarakterli cinayətlərin bəzi qurbanları, ya da onların valideynləri, yaxınları bəzən el içində rüsvay olacaqlarından çəkinərək belə hadisələri açıb-ağartmaqdan, hüquq-mühafizə orqanlarına şikayət etməkdən ehtiyat edir. Nəticədə günahkarlar cəzasız qalır, zərərçəkənlərin həyatı isə məşəqqətə çevrilir.

***

Birinci növbədə media, ictimai fəallar bu məsələləri ictimailəşdirərkən müəyyən qədər diqqətli olmalı, mənfi nümunə yaranmaması üçün, bu cür hadisələrin adiləşməməsi üçün çalışmalıdırlar. Eyni zamanda hüquq-mühafizə orqanları bu hadisələrin açılmasında, günahkarın cəzalandırılmasında fəal olmalı, insanlarda özlərinə qarşı güvən yaratmalıdır. Hər birimiz əlimizdən gəldiyi qədər ətrafımızdakı hadisələrə çevik və vicdanlı reaksiya verməli, bu cür dəhşətli hadisələrin azalması, aradan qalxması üçün çalışmalıyıq. Yaxınlarımızın, doğmalarımızın qurbana çevrilməməsi üçün, bu cür hadisələrin zərərçəkmiş qurbanalarına qarşı həssas olmalıyıq…

45
Dağlıq Qarabağda Rusiya sülhməramlı qüvvələrinin komandiri genetral-leytenant Rüstəm Muradov, arxiv şəkli

Rezervlər, dualar Muradov erməniləri niyə muradına çatdırmadı?

40
(Yenilənib 18:38 11.04.2021)
Görünən odur ki, dronların səsini tez unudanlar var. Belə olmasaydı, Arayik Arutyunyan adlı quldur Xocalı rayonunun Naxçıvanlı kəndində ağacəkmə aksiyası şousu düzəltməzdi.

BAKI, 11 aprel - Sputnik. 7x7 həftənin ən yaddaqalan hadisələrini şərh edir

Sivilizasiyalararası toqquşma?

Ötən həftə Pentaqon “hərbi sıçrayış” üçün yeni texnolgiyalar axtardığını elan edib. Şimali Koreyanın lideri Kim Çen isə In təhsil naziri barəsində edam qərarı verib. Vaksin müharibəsi davam edir. Varlılar rezervlərini artırır, kasıb ölkələr isə dualarını. Dualar hələlik nəticə vermir, bəlkə lazım olan anda lazım olan yerdə səsləndirilimir. Mollanın lətifəsini bilirsiniz yəqin ki – qızılı itir, axtarır, soruşurlar ki, burda itib, deyir ki, yox, sadəcə, bura işıqlıdır deyə, burda axtarıram. Bəlkə də duaları konkret işlə əvəz etmək lazımdır.

ABŞ isə koronavirusa laboratoriyada hazırlanmış “Çin virusu” deyib dayanıb. Kim bilir, bəlkə də... Pandemiya Avropa və ABŞ iqtisadiyyatlarını silkələdiyi halda, Çin 2020-ci ili 2,3% artım ilə başa vurub. “Business Insider” jurnalının məlumatı maraq doğurur: “Təxminən 22 milyon amerikalı ərzağa ehtiyac duyur. Uşaqları olan hər altıncı ailə yemək üçün pul çətinliyi ilə qarşılaşıb”. Görünür, Cozef Baydenin ABŞ-ın hərbi büdcəsini 7 milyard dollar azaltmağı təklif etməyə hazırlaşması da təsadüfi deyil.

Deyəsən Fransada da aclıqdır. Parisdə ağxalatlı oğrular COVID xəstəsini qarət ediblər.

Münaqişə ocaqları

Yəhudi, rus və ukraynalı birlikdə qızıl balıq tuturlar. Balıq onların hərəsinin bir arzusunu yerinə yetirə biləcəyini bildirir.
Rus: “İstəyirəm ki, Krımda bircə dənə də ukraynalı qalmasın”.
Ukraynalı: “İstəyirəm ki, Krımda bircə dənə də rus qalmasın”.
Yəhudi: “Onların ikisinin də arzusunu yerinə yetirəndən sonra mənə də bir fincan çay zəhmət olmasa”.

Münaqişə ocaqlarında alovlanmalar hiss olunur. 16 ildir Rusiya-Ukrayna arasında donub-açılan Donbas münaqişəsi indi aktiv fazaya keçmiş kimi görünür. Yaxın günlərdə Hindistan və Pakistan arasında da toqqşuşmalar qeydə alınmışdı. Venesuelanın hərbi təlim təyyarələri isə bu günlərdə arabir Kolumbiya sərhədçilərini narahat edib.

Biz isə Ermənistana yerini göstərdik, ancaq görünən odur ki, dronların səsini tez unudanlar var. Belə olmasaydı, Arayik Arutyunyan adlı quldur Xocalı rayonunun Naxçıvanlı kəndində ağacəkmə aksiyası şousu düzəltməzdi. Meşələrimizi qıranlar, daşı-daşı üstündə qoymayanlar, abad şəhər və kəndləri “Qafqazın Xirosiması”na çevirənlər, Gəncənin vurulması ilə fəxr edən uşaq qatili indi ağac əkir.

Paşinyanın şparqalkası

Müharibə boyu müsahibələri ilə özünü daxili və bizim auditoriyanın əyləncəli kloununa çevirmiş Paşinyan öz ampluasındadır. Moskvada Putinlə görüşdə şparqalkadan oxuyub, pencəyinin bir qanadı kreslonun qolundan asılı qalıb...  Bundan öncəki Moskva səfərində yanında gəzdirdiyi, içini eşələdiyi, ancaq heç nə çıxarmadığı çantası isə deyəsən, bu dəfə İrəvanda qalmışdı.

İrəvan demişkən, burada Ermənistanın prezident olmaq arzusu ilə alovlanan Köçəryan adlı ikinci prezidenti Paşinyanı məhkəəməyə verib. Ölkəni bugünkü səfalətə sürükləyən Robert Köçəryan hesab edir ki, onun əleyhinə başlamış və sonradan ləğv edilmiş cinayəti işi ilə bağlı ona dəyən mənəvi ziyan ödənilməlidir: 4 min dollar.

Müharibənin gedişi zamanı erməni analardan biri BBC-yə müsahibəsində belə demişdi: "Onları zirzəmilərdə böyüdüb döyüşə göndəririk". Müharibəni alovlandırdığı üçün Paşinyan məsuliyyət daşıyırdısa, zirzəmilərdə yaşayan insanlara görə Köçəryan müqəssirdir.

Yataqxanalar

Köçəryanın silahdaşlarının viran qoyduğu Qarabağda əsgərlərimizin yerləşməsi üçün modul tipli yataqxanalar tikilir. Məcburuq. Çünki bu yerlərdə nəinki məskunlaşmağa, heç bayraq asmağa da bina qalmamışdı.  

Yataqxana sözü həm də 90-cı illərin ağır-acısı ilə assosiasiya olunur biz  məcburi köçkün uşaqları üçün. Bir zamanlar Qarabağdan köçkün düşmüş soydaşlarımız üçün belə yataqxanalar da qurmaq imkanı yox idi, insanlar müxtəlif müəssisələrin yataqxanalarında yerləşirdi. Mən indi də Sumqayıtda, Tibb Texnikumun yataqxanasının yanından keçəndə həmin günləri xatırlayıram. Oyuncaqlarımız, velosipedimiz, kitablarımız, şəkillərimiz – heç nəyimiz yox idi, hamısı kəndlərimizdə qalmışdı.

Roma Papası Fransis İraqda
© Vatican Media /­ Handout via REUTERS

Minalar və diversantlar

Həftənin ən çox müzakirə olunan məsələlərindən biri də Ermənistanın minalanmış ərazilərin xəritəsini verməməsi ilə bağlı idi. Bəli, minalar “gizli qatil”lər olaraq qalır. İrəvan toxum kimi səpdiyi minaların xəritələrini verməməklə “hərbi əsirlər” adlandırdığı 62 diversantı geri almaq üçün təzyiq göstərməyə çalışır. Bunun mümkün olmadığını görən Ermənistan rəsmiləri ənənəvi silahlarına – dezinformasiyya müraciət edirlər: açıqlama verildi ki, guya Qarabağdakı Rusiya sülhməramlılarının komandanı, general-leytenant Rüstəm Muradov Bakıdan İrəvana erməni hərbi əsirlərin növbəti qrupunu gətirir. Təyyarə İrəvana enəndə isə məlum oldu ki, R.Muradov erməniləri muradına çatdırmayıb, əliboş gəlib.

Hadrut azad edildikdən sonra qəsəbənin adı yazılmış saxta plakatın yanından video və fotolar paylaşmaqla xalqı aldadanlar üçün bu, nə böyük yalandır ki?!

Jurnalistin “Nə üçün dünən Ermənistan rəsmiləri Azərbaycanla əsirlərin dəyişdiriləcəyi barədə açıqlama vermişdi” sualına generalın cavabı belə olub: “Bu, yalan və təxribatdır. Onlardan soruşun. Onlar xalqı aldadırlar. Bu, planlaşdırılmış, adi səfər idi”.

7 il öz ata-babalarının qəbirlərini ziyarət edən Dilqəm Əsgərov və Şahbaz Quliyevi əsir saxlayanlar indi terrorçularını geri tələb edir.

“Polis”in paqonlarını sökdülər

Lənkəranda Göyşaban kənd sakini Elsevər Cəfərzadənin “polis oyunu”nu polislər yarımçıq saxlayıb.

Onun əynində arxa hissəsinə iri şriftlərlə “Polis” sözü yazılmış gödəkçə, sifətində üzərində “polis” sözü yazılmış qoruyucu maska, kəmərində antenalı olmaqla xüsusi vasitə olan əl radiostansiyasını xatırladan mobil telefon aşkarlanıb. İdarə etdiyi avtomobildən isə polis əməkdaşının fərqlənmə nişanı olan şevronlar, polis baş serjantı paqonları, bir ədəd qara kaburun içində oyuncaq tapança və 1 ədəd qara rəngli maska aşkar edilib.
Allah şəfa versin!

Atom mühasirəsində

Elektrik şəbəkəsində baş verən qısa qapanma nəticəsində İranın Nətanz Atom Elektrik Stansiyasında qəza baş verib. Ötən il bu stansiyada terror aksiyasına cəhd də olmuşdu. Lakin İranın xüsusi xidmət orqanları aksiyanın qarşısını almışdılar.

Ermənistandakı AES-in qəzalı vəziyyəti də məlumdur. Bir sözlə, təhlükəli atom stansiyaları ilə mühasirə olunmuş vəziyyətdəyik.

40
PPX avtomobili

Daha iki koronavirus xəstəsinə cinayət işi açılıb

0
Cinayət Məcəlləsinin 139-1.1 (epidemiya əleyhinə və karantin rejimlərinin pozulması) maddəsi ilə 2 nəfər barəsində cinayət işi başlanılıb.

BAKI, 12 aprel — Sputnik. Daxili işlər orqanlarının əməkdaşları tərəfindən şənbə və bazar günlərində respublika ərazisində 17 nəfər aktiv koronavirus xəstəsi ictimai yerlərdə aşkar edilərək saxlanılıb.

Bu barədə Daxili İşlər Nazirliyinin (DİN) Mətbuat xidmətindən məlumat verilib.

Polis əməkdaşları onlarla izahedici söhbətlər aparıb, tibbi prosedurları gözləməklə yaşadıqları evə qaytarıb, bu barədə müvafiq səhiyyə qurumları məlumatlandırılıb.

Cinayət Məcəlləsinin 139-1.1 (epidemiya əleyhinə və karantin rejimlərinin pozulması) maddəsi ilə 2 nəfər barəsində cinayət işi başlanılıb.

Hazırda istintaq araşdırmaları davam etdirilir.

"Bir daha vətəndaşlarımızdan koronavirusla əlaqədar tətbiq edilmiş xüsusi karantin rejimindən irəli gələn bütün tələb və qadağalara ciddi riayət etmələrini xahiş edirik", - Mətbuat xidmətindən bildirilib.

0