Kəbab

Otuz xəngəl, lülə, tikə, zavod çörəyi, 1 litr "ağ", əlli yaşında infarkt...

267
(Yenilənib 21:10 19.02.2021)
Adətən, iki azərbaycanlı harada görüşər? Əlbəttə, kafedə, restoranda, ya da çayxanada. Özünə yaxın bildiyin kimsəni muzeyə, teatra, kinoya və ya parka dəvət edə bilməzsən. Mütləq bir qismət çörək kəsəsən gərək.

Nəyimiz olmasa da, yeməkxanadan boluq. Hər kəs də puluna uyğun bir məkan seçə bilər. Bahalı restorana getmək hər kəsə əlçatan olmasa da, kiçik kafelərin, məhəllə yeməkxanalarının alveri heç vaxt kəsilmir. Müştəri əlindən tərpənmək olmur.

Yeyib-içmək proseduru toxunulmaz tabudur

Ən azı, hər cümə, həftəsonu öncə mütləq haradasa toplaşan kişiləri belə obyektlər səbirsizliklə gözləyir. İmkanı heç nəyə çatmayanlar isə ayda bir dəfə, maaş alan günü toplaşırlar. Yəni bu yeyib-içmək proseduru toxunulmaz tabudur, vaxtı-vaxtında da keçirilməlidir. Əgər bizim insanın əlindən yemək-içmək hüququnu alsaq, bu, onun üçün ən ciddi cəza olacaq, çünki başqa hüquq və azadlıqlar onu az maraqlandırır. Harasa getmək, evin problemindən uzaqlaşmaq, nəfəsi kəsilənəcən doyunca yemək bəzən zövq almağın sadə yollarından biridir.

Hərə bir cür başını qatır, kimisi balığa və ova gedir, kimisi də lazımsız əşyaları kolleksiya halında toplayır. Köhnə retro maşının təmirinə yeni avtomobil qədər pul xərcləyən də tapılır. İt, pişik, quş həvəskarları da az deyil. Bağ sevənlər sosial mediada bir qrupda birləşirlər, kitabsevərlər isə başqa qrupda. Amma nə edirsən-et, sonda yenə də bütün məsələlər fırlanıb yeyib-içməyin üstünə dönür. “Gəlin toplaşaq, yeyib-içək” deyə bir-birimizi görüşə dəvət edirik.

“Birdəfəyə 15 gürcü xəngəli yedim”

Söhbətimiz də çox zaman yeməkdən olur. Uzun yol gedirik, elə yadımıza hansısa zaman keçirilən yeyib-içmək məclisləri düşür.

Haşiyə: Nəqliyyatda təsadüfən bir-birini uzun müddət görməyən iki tanışın söhbətindən:

- O gün toplaşmışdıq, birdəfəyə 15 gürcü xəngəli yedim.

- Mən 25-ni rahat yeyirəm.

- Bir dostumuz var, 30-nu yeyir. Özü də xəmiri ilə birgə.

- Uşaqlar gəlmişdilər o gün. Evdə tək idim, gedib dükandan 4 pors xəngəl aldım.

- Yarpaq?

- Hə, bişirdim, verdim. Bəs eləmədi, yenə dükana getdim. Hazır gürcü xəngəli aldım, adama 15 dənə. Onu da yedik. "Ağ"dan da vurduq, adama 1 litr. Bəlkə, toplaşaq? Çoxdan görüşmürük.

- Canına sağlıq, bir az nasazam. Düzəlim, gedərik xəngələ.

Xəngələ qədər yeyilən yarım zavod çörəyi və bir qab duzlu xiyar yemək deyil ki

Yemək söhbəti 30 dəqiqə də davam edə bilər, 1 saat da. Özü də məlum məsələdir. Tək xəngəllə iş bitmir. Azərbaycanda yeməkxanada əvvəlcə balaca bir süfrə açılır. Şor-pendir, göyərti, acılı sous, qatıq, duzlu xiyar-pomidor, zeytun verilir 1-2 zavod çörəyi ilə. Bu elə-belə, aclığı öldürmək üçündür. Xəngəl, lülə, tikə, piti sonra gələcək. Xəngələ qədər yeyilən yarım zavod çörəyi və ya bir qab duzlu xiyar yemək deyil ki. Sadəcə, iştah üçündür.

Bir nəfərin xəmiri ilə birgə 30 gürcü xəngəli yeməsi heç kəsdə təəccüb doğurmamalıdır. Azərbaycanda 20 yumurtanı birdən yeyən insan da az deyil. Elə “Koroğlu” dastanına müraciət etsək, Alı kişinin oğlu Rövşənin bir oturuma 7 batman düyü, 7 qoyun şaqqası, 7 tuluq şərab içdiyini müşahidə edərik. 7 batman təxminən 6 kilo düyü edir. Bu günün kişisi niyə 1 litr araq və 3-4 qab xəngəl yeməsin?

İki qab yarpaq xəngəlini qiymə və qatıqla yeyən birisi...

Bu gün bizim yediyimiz qida o dövrün qidasından fərqlənir. Qoyun ot otlayardı, düyüyə heç bir kimyəvi gübrə vurulmazdı. Bugünkü qədər də qida yox idi. İnsan bir gün yeyərdi, bir həftə at üstündə ac gəzərdi. Artıq yemək nə gəzirdi? Orta əsr insanı, at belində həyat sürən köçəri üçün aclıq normal hal idi. Nə vaxt nə tapsa yeyərdi, sonra da aclığa dözərdi. Növbəti qidanı əldə edənəcən.

Bu gün qida bolluğu dövründə yaşayırıq, gündə 3 dəfə yeyirik, arada bir az tortdan, şokoladdan, meyvədən, qazlı şirin içkilərdən yararlanırıq. Arabir çay, qəhvə, şirələr, biskvit, peçenye, popkorn, çips də yeyirik. Bədənə yemək axını bir saat belə dayanmır. Mədə-bağırsaq sistemi, qaraciyər, öd kisəsi, mədəaltı vəzi fasiləsiz işləyir. Ürəyə və böyrəklərə də ağır bir yük düşür. Yemək bolluğu şəraitində reklam da öz işini görür. Baxırsan, iki qab yarpaq xəngəlini qiymə və qatıqla yeyən birisi, araqla birgə 1-2 litr "Pepsi"dən də ötürür bədənə . Yəni bir oturuma insana tələb olunan şəkərin 3-4 qat artığını qəbul edir.

Nə Koroğlunun, nə digər o dövrün insanının haradansa şəkər əldə etmək imkanı vardı. Bədənə tələb olunun şəkəri ya lavaşdan, ya düyüdən alardılar. O da olsa. Uzaqbaşı mövsümdə yetişən meyvələrdən, ya da meyvə qurusundan. Meyvə qurusu da ələ düşməzdi. Bakı camaatı yay boyu əncirdən qurudardı, üzümdən də bəkməz hazırlardı. Bu yolla şəkərə olan tələbatı ödəyərdilər. İndi bəkməzə də ehtiyac qalmayıb. Hər tərəfimiz şəkərdir.

Altı növ yeməyi qəbul etmək artıq zəhərlənmək deməkdir

Bu dozada yeyib-içmək, karbohidratlarla bol olan qida rasionu artıq çəkiyə həmişə yol açır. 30 yaşı ötən hər azərbaycanlıda, axtarsan, artıq şəkərli diabet üçün münbit mühitin yarandığını görə bilərik. Öz normal çəkisindən 10-15 kq artıq olmaq Azərbaycanda normaya çevrilir. Nə yemək-içmək bitir, nə də söhbətləri. Toy və yas məclisləri dayanıb deyə bir qədər düşünmək üçün zaman almışıq, amma sabah həyat qaydasına düşəndə toylarda, bəlkə də daha artıq israfçılığa yol verəcəyik. 7-8 növ salat, 5-10 növ isti xörəyi yeməkmi olar? Məşhur kulinar Tahir Əmiraslanov demişkən, 6 növ yeməyi qəbul etmək artıq zəhərlənmək deməkdir. Hər toyda zəhərlənirik, hər qonaqlıqdan sonra 2 gün stress keçiririk. Şəkər xəstəsi də dərmanını atıb, yeyib-içir.

Artıq yeməyi dayandırmaq lazımdır, həm də artıq çörək istehlakını da. Üç-dörd kiçik çörək dilimi gündəlik şəkər tələbatını təmin edir. Qalan digər qida növləri artıq çəki halında orqanizmdə toplaşır. Göy-göyərti, meyvə-tərəvəz, qoz-fındıq Azərbaycan insanına tam mənalı qida kimi görünmür. Xəngələ əlavə kimi qəbul edirik. Halbuki xəmir xörəyi olmadan belə bu məhsullarla tam normal yaşamaq olar.

Fransada heç bir fastfud tipli qida məktəb daxilində satılmaz

Ürək-damar xəstəlikləri, infarkt üzrə statistikanı araşdırmağın da adı yoxdur. Yaxında, qohumda, qonşuda ölənlərin nədən bu dünyadan getdiyini araşdırsaq, ürək xəstəliklərinin liderlik etdiyini görərik. Artıq qidalar damarları kirəcləyir deyə ürəyin normal fəaliyyəti mümkünsüz olur. Ölkədə, şübhəsiz, sağlam həyat tərzi konsepsiyası yaradılmalı, uşaq yaşından düzgün qidalanma sistemi qurulmalıdır. Fransa nümunəsi göz önündədir. Bu ölkədə məhz məktəb yaşlı uşaqların düzgün qidalanması üçün addımlar atılır. "McDonald's" qidalarını heç məktəbə yaxın buraxmırlar. Heç bir fastfud tipli qida məktəb daxilində satılmaz. Nəticədə Fransa uzunömürlü həyat tərzinə görə lider ölkələrdəndir.

Sağlamlıq və sağlam həyat tərzi birbaşa qidalanmaya, qəbul etdiyimiz qidanın həcminə və keyfiyyətinə bağlıdır. Artıq yeməklə bir böyük paket xəstəliyin daşıyıcısına çevrilməkdəyik. 

267
Teqlər:
sağlamlıq, xəstəlik, kulinariya, mədəniyyət, yemək
Qadın iti ilə sahildə, arxiv şəkli

Zəhmətkeş qadınların bayramı, yoxsa...

372
(Yenilənib 00:31 08.03.2021)
Tarixçəsi nə qədər qarışıq və mübahisəli olsa da, 8 mart Beynəlxalq Qadınlar Günü əslində zəhmətkeş, qadın hüquqları və insan haqları uğrunda mübarizə aparmış inqilabçı qadınların xatirəsinin yada düşdüyü gündür.

8 mart 1857-ci il. Amerika Birləşmiş Ştatlarının Nyu-York şəhərində tekstil sektorunda çalışan 40 000 qadın aşağı məvacibə, 12 saatlıq iş rejiminə və pis iş şəraitinə etiraz olaraq tətilə başladı. Lakin ABŞ polisi aksiyaya amansızcasına müdaxilə etdi. Qadınlar fabriklərdə və fabriklərin qarşısında qurulan barrikadalarda çarəsiz və köməksiz qaldı. Polisin qəddar və amansız müdaxiləsinin ardınca başlayan yanğınlarda 129 qadın həlak oldu. Həlak olan qadınların dəfni olduqca izdihamlı keçdi...

8 mart 1908-ci il. Amerika sosial-demokratlarının çağırışı ilə Nyu-Yorkda etiraz aksiyaları başladı. Aksiyalarda 15 000-dən artıq qadın iştirak etdi. İllər öncə polis zorakılığı və yanğın nəticəsində öldürülən qadınların xatirəsi anıldı, onların tələbləri ilə oxşar tələblər irəli sürüldü. Aksiya qansız bitdi. Baş tutan aksiyanın devizi "Çörək və Gül" idi...

8 mart 1909-cu il. Amerika Sosialist Partiyası 1908-ci ildə Nyu Yorkda keçirilən etiraz aksiyalarını xatırlamaq üçün ilk "Beynəlxalq Qadınlar Günü" tədbirini keçirdi.

26-27 avqust 1910-cu il. Danimarkanın Kopenhagen şəhərində II Sosialist İnternasiyonalına bağlı Beynəlxalq Sosialist Qadınlar Konfransı keçirildi. Konfransda Almaniya Sosial-Demokrat Partiyasının nümayəndə heyətində təmsil olunan Klara Setkin və yoldaşları hər il "Qadınlar günü" keçirilməsi təklifi ilə çıxış etdi və təklif qəbul edildi.

Beynəlxaq Qadınlar Günü ilə bağlı müxtəlif tarixi hadisələr var və bu xranologiyanı uzatmaq mümkündür.

***

8 mart Beynəlxaq Qadınlar Gününün yaranması elə də uzaq tarix olmasa da, bu günlə bağlı müxtəlif tarixçələr, müxtəlif əhvalatlar danışılır və yazılır. Bəzi şaiyələrə görə 1910-cu ildə "Qadınlar Günü"nün qeyd olunması təklifini irəli sürən yəhudi əsilli Klara Setkin bu günlə bağlı ideyanı yəhudilərin "Purim bayramı" ilə üst-üstə düşməsini nəzərə alaraq irəli sürüb. Hər halda yəhudi təqviminə görə müxtəlif günlərə təsadüf edən "Purim bayramı" məhz 1910-cu ildə 8 mart tarixinə təsadüf edirmiş.

Eyni zamanda bu tarixi günü Rusiyada 1917-ci ildə baş tutan Sosialist inqilabi ilə əlaqələndirənlər də var. Çar Rusiyasında qadınların ağır həyat tərzinə qarşı etiraz nümayişi 1917-ci ilin 8 martında baş tutub. "Çörək və Sülh" devizi ilə xatırlanan bu nümayişdən sonra 8 mart "Qadınlar günü" kimi bütün Avropada qeyd edilməyə başlanıb. Sosialist inqilabının rəhbəri Leninin bu günün qeyd edilməsindəki rolu da danılmazıdır. Keçmiş SSRİ-də 1965-ci ildən etibarən 8 mart qeyri-iş günü idi.

BMT-də isə 1975-ci ilin 8 martı ilk dəfə Beynəlxalq Qadınlar Günü olaraq qeyd edildi. İki il sonra, 1977-ci ildə isə Birləşmiş Millətlər Təşkilatının Ümumi Qurultayında 8 mart, "qadın hüquqları və beynəlxalq sülh günü" olaraq qəbul edildi...

***

Tarixçəsi nə qədər qarışıq və mübahisəli olsa da, 8 mart Beynəlxalq Qadınlar Günü əslində zəhmətkeş, qadın hüquqları və insan haqları uğrunda mübarizə aparmış inqilabçı qadınların xatirəsinin yada düşdüyü gündür. Dolayısıyla bu bayram öz hüquqları uğrunda mübarizə aparan, həyatın bütün sahələrində kişilərlə çiyin-çiyinə çalışan zəhmetkeş qadınların bayramıdır. Bu günün yaranmasının kökündə mübarizə, bərabərlik ideyası və inqilabi dəyərlər var. Qərb dünyası bu bayramı BMT-nin 1977-ci il Qurultayından sonra daha geniş şəkildə qəbul etməyə başlayıb. Günümüzdə kapitalist dünyası bu bayramı da geniş şəkildə və rahatlıqla istismar edə bilir. Artıq "Beynəlxalq Zəhmətkeş Qadınlar Günü" sadəcə "Beynəlxalq Qadınlar Günü" kimi qeyd edilir və kapitalist çılğınlığın bir parçasıdır. Bu günü bayram edən böyük əksəriyyət qeyd etdiyi günün tarixçəsindən, yaranma səbəbindən ümumiyyətlə xəbərsizdir. Təsəvvür edin ki, zəhmətkeş və inqilabçı qadınların mübarizəsinin xatirəsinə elan olunan, dünyada sosialist qadınların həmrəyliyi sayəsində formalaşan bu bayram indi kapitalizm üçün geniş bazar imkanları yaradıb. Hər il hədiyyələrə, dəbdəbəli bayram tədbirlərinə və bayram istirahətlərinə milyonlar xərclənir. Bu arada qeyd edim ki, kapitalizm, hətta ona düşmən olan ideologiyanın mübarizə tarixini də istismar etməyi bacaran əcaib bir sistemdir.

***

Ölkəmizdə bu bayram sovet dönəmindən bu yana qeyd edilir. 8 mart təqvimdə qeyri-iş gündür, ölkə başçısı hər il 8 mart Beynəlxaq Qadınlar Gününündə Azərbaycan qadınlarını təbrik edir. Azərbaycan qadını mental, dini basqılara baxmayaraq həyatın bütün sahələrində kişilərlə çiyin-çiyinədir.

"Vətən müharibəsi" ərəfəsində, Azərbaycan qadının vətənpərvərliyi və mübarizliyi gözəl nümunələrdən biri idi.

Ancaq təəssüf ki, hələ də xoşagəlməz hadisələrə şahid oluruq. Cəmiyyətin qadına münasibəti ürəkaçan olmasa da, zamanla bunun düzələcəyinə, namus cinayətlərinin, erkən nikahların, qadın qətllərinin aradan qalxacağına, sivil cəmiyyətə çevriləcəyimizə ümid edirik, bunun üçün çalışırıq. İnanırıq ki, Azərbaycan qadını cəmiyyətimizin formalaşmasında, irəli getməsində, inkişafında öz mübarizəsindən geri dönməyəcəkdir.

Son illərdə ölkəmizdə formalaşan feminst hərəkatın fəaliyyəti geniş kütlələr tərəfindən düzgün qəbul edilməsə də, feministlərin qadın hüquqları ilə bağlı keçirdiyi müxtəlif tədbirləri və aksiyaları da gözardı etmək olmaz. 1995-ci ildə isə Azərbaycan rəsmi şəkildə qadınlara qarşı münasibətdə ayrı-seçkiliyin bütün formalarının aradan qaldırılması haqqında beynəlxalq konvensiyaya qoşulub. Bu konvensiyanın tələblərinin yerinə yetirilməsində, ölkəmizin modern dünya ilə yanaşı addımlamasında hamımız maraqlı olmalıyıq.

***

Sonda sevimli şairlərimdən Orxan Vəlinin "Quantitatif" şeiri ilə 8 mart Beynəlxaq Qadınlar Gününü münasibəti ilə bütün Azərbaycan qadınlarını səmimi qəlbdən təbrik edirəm:

"Gözəl qadınları sevirəm

Zəhmətkeş qadınları da sevirəm

Gözəl zəhmetkeş qadınları

Daha çox sevirəm..."

372
Teqlər:
8 Mart Beynəlxalq Qadınlar Günü, 8 Mart bayramı, 8 mart günü, 8 mart
Roma Papası Fransis İraqda

İlk Papa bizim üçün sadəcə, Klara xala

106
(Yenilənib 00:34 08.03.2021)
Biz həyat tərzimizə ad axtarmamışıq, bir qədər şablon səslənsə də, Azərbaycanda müxtəlif dinlərin nümayəndələri həmişə mehriban şəkildə yaşayıblar.

Qayıtmaq istəyənlər və istəməyənlər

Məcburi köçkünlər doğma torpaqlarına qayıtmaq istəyirmi? "Qaçqınkom" bu sualın cavabını tapmaq üçün sorğuya başlayıb. Minalanmış ərazilərə postlardan yayınaraq keçmək istəyənlərin, ərazilərin təmizlənməsini səbirsizliklə gözləyənlərin, kəndindən gələn videonu göz yaşları ilə izləyənlərin çoxluğu deməyə əsas verir ki, əksəriyyət "hə" deyəcək. Şübhəsiz, bu qərarda bölgədəki infrastruktur və iş imkanları da əhəmiyyətli rol oynayacaq.

Bu arada BMT araşdırıb ki, İkinci Qarabağ müharibəsindən sonra ermənilər Azərbaycan torpaqlarına qayıtmaq arzusunda deyillər: "qaçqın vəziyyəti"nə düşən erməni ailələrinin 85%-dən çoxu hazırda yaşadıqları yerlərdən köçmək istəmirlər.

"Azərenerji" isə açıqlayıb ki, bu ilin sonunadək Qarabağın 90%-i elektrik enerjisi ilə təmin olunacaq.

Koronavirus kəşfləri

Böhranlar həm də fürsətlər yaradır. Götürək, koronavirusu. Elektronlaşma, onlayn xidmətlər adi halda bu qədər sıçrayışa nail ola bilərdilərmi? İnnovativ axtarışlar bütün sahələrdə, bütün beyinlərdədir.

Niderlandda Peter van Veys adlı ixtiraçı koronavirus infeksiyasını standart testlərdən daha sürətli və daha asan müəyyən etməyə imkan verən bir cihaz yaradıb. İxtiraçının hazırladığı cihazda hava daxil olmayan kabinə girən şəxslər ya qışqırır ya da mahnı oxuyurlar. Bu zaman havanın təmizlənməsi işini icra edən cihaz həmin şəxsin ağzından çıxan bütün hissəcikləri toplayır və analiz edir, koronavirus infeksiyasının olub-olmadığını aşkar edir.

2011-ci ildə baş verən dəhşətli zəlzələ və sunami qurbanlarının anıldığı bu günlərdə Yaponiya sakini insanların ölən doğmaları ilə "danışmaları" üçün telefon köşkü hazırlayıb. İntiharların artıdığı, hətta "Tənhalıq Nazirliyinin yaradıldığı yaponları başa düşmək olar. İndi eyni "ixtira"nı ingilislər və polyaklar öz ölkələrində koronavirusdan həyatlarını itirmiş yaxınları ilə "danışmaq" üçün təkrarlamaq istəyirlər.

İlk Papa və Klara xala

Tarixdə ilk dəfə olaraq Roma Papası yolunu İraqdan salıb. 2000-ci illərin əvvəlləri ilə müqayisədə İraqdakı xristian əhalinin sayı 80% azalıb. Papanın səfərinin əsas səbəblərindən biri bölgədəki xristianlara dəstək nümayiş etdirməkdir. Hər halda, ümid edək ki, bundan da ali məqsəd var: dinlərarası dialoq.

Fikir verirsinizmi, multikulturalizm, dinlərarası dialoq bizim üçün yeni terminlərdir. Biz həyat tərzimizə ad axtarmamışıq, bir qədər şablon səslənsə də, Azərbaycanda müxtəlif dinlərin nümayəndələri həmişə mehriban şəkildə yaşayıblar. Məsələn, bizim 90-cı illərdə Sumqayıtda erməniəsilli qonşumuz var idi, ancaq ona nəinki kimsə "gözün üstə qaşın var, demirdi", digər qonşulardan o, heç nə ilə fərqləndirilmirdi. Hətta torpaqlarımızı işğal etmiş xalqın nümayəndəsi olan qadın bizim üçün sadəcə, Klara xala idi… Çünki o, Ermənistan dövlətinə görə məsuliyyət daşıya bilməzdi.

Vaksinləşdirdiklərimizdənsinizmi?

Dünyanın bir çox ölkələrinin vaksin ala bilmədiyi bu günlərdə zəngin ölkələrin sifarişləri dayanmaq bilmir. Bayden amerikalıların növbəti yazda normal həyata qayıda biləcəklərini açıqlayıb. İtaliya isə "Britaniya ştammı" gənclərə daha çox təsir etdiyinə dair xəbərdarlıq edib. İtalyanlar COVID-19 və onun daha yoluxucu növləri ilə mübarizə aparmaq üçün mövcud sərt tədbirləri əlavə tədbirlərlə yeniləyib və karantin müddətini 6 aprelə qədər uzadıblar. Norveçlilər isə peyvəndin əks təsirindən şübhələnirlər. Belə ki, vaksinasiyadan sonra bu ölkədə yüzdən çox insan ölüb. Buna görə də hökümət işçi qrup yaradıb.

Venesuela Prezidenti Nikolas Maduro isə COVID-19 əleyhinə Rusiya istehsalı olan peyvəndi vurdurduqdan sonra Tvitterdəki canlı yayımda rus dilində "spasibo" ifadəsini işlədib. Bu arada 6 mart tarixinədək Azərbaycanda 17,495 nəfər vaksinasiya olunub. Amma hələ ki, Çin dilində danışan yoxdur.

Tərəzi Allahı?

ABŞ-ın Ticarət Nazirliyi Aleksey Navalnı işinə görə Rusiyanın 14 təşkilatın adını "qara siyahı"ya salıb. ABŞ sanksiyaları bu vaxtadək İrana münasibətdə çox funksional və populyar idi. Bu yaxınlarda Rusiyadan S-300 raketlərini aldığı üçün Ağ Ev rəsmi Ankaranın da bəzi təmsilçilərini "qara siyahı"sına salmışdı.

Maraqlıdır, kim ABŞ-ı dünyadakı ədalət tərəzisinin sahibi təyin edib?! Nəyin yanlış, nəyin doğru olduğunu Vaşinqton təkbaşına necə müəyyən edir?!

Narkotikin PR-ı

Bütün fəaliyyət növlərində onlayn xidmətlərə keçid, görünür, Əlini də həvəsləndirib. O da məhsullarını onlayn rejimdə hərraca çıxarmaq üçün əvvəlcə təbliğat işlərinə start verib. Gəl ki, polis uşağın siftəsini korlayıb.

Sosial şəbəkələrdə narkotik vasitələrin qəbulunu təbliğ edən videolar yayan Əli İsmayılzadəni asayiş keçikçiləri klavyatura arxasında tutublar. Yada salaq ki, Ə.İsmayılazadə bu işdə pioner deyil, ondan öncə də eyni motivdə saxlanılanlar olmuşdu. Ancaq görünür, Əli "gözü çıxmış qardaşları"ndan heç nə öyrənməyib.

İsti və soyuq yer

Ermənistan Prezidenti Armen Sarkisyan Baş nazir Nikol Paşinyanın Baş Qərargah rəisi Onik Qasparyanın vəzifəsindən kənarlaşdırılması ilə bağlı vəsatətini ikinci dəfə imzalamadı. Xaos, anarxiya, toqquşmalar fonunda dərinləşdikcə, dərinləşir... Bu ölkə üçün SSRİ sanki yenicə dağılıb.

Köçəryanın bu həftə Rusiyalı jurnlistlərə müsahibəsində "əgər müharibənin nəticələri tərəflərdən birini qane etmirsə, bu, o deməkdir ki, yeni müharibə başalaya bilər" tezisini irəli sürdü. İndi gəlin, müharibənin içində çıxan hərbçinin dediklərinə baxaq. 19 yaşlı Hayk: "Bu müqavilə imzalanmasaydı, hətta indiki vəziyyətdə də olmazdıq. Bütün ordumuz orada ölmüş olardı. Və burada olan bir çox insanın orada nə baş verdiyindən xəbəri yoxdur".

Müsahibəsində Versal Sülh müqaviləsini xatırladan və Ermənistanı Almaniya ilə müqayisə edən Köçəryanın deyəsən, harasısa isti yerdədir, erməni xalqından və ordusundan xəbəri yoxdur.

106
Roma Papası Fransisk, 10 sentyabr 2017-ci il

Roma Papası şiələrin lideri ilə görüşdü, İran sevindi

0
(Yenilənib 15:38 08.03.2021)
Diplomatın sözlərinə görə, "xalqın qəhrəmanlığı, hakimiyyətin müdrikliyi və ekstremizm və xarici təsirlərlə mübarizədə tökülən qan sayəsində" bu gün İraqda bu cür görüşlər keçirmək mümkün olub

BAKI, 8 mart - Sputnik. Martın 6-da İraqa başlanan ilk səfəri çərçivəsində Roma Papası Fransisk oradakı şiələrin başçısı ayətulla Əli əs-Sistani ilə görüşüb. 

Sputnik Azərbaycan-ın məlumatına görə, bu barədə bu gün İran Xarici İşlər Nazirliyinin rəsmi sözçüsü Səid Xətibzadə bildirib və öz ölkəsinin XİN rəhbərinin bu hadisəni dinlər arasında dialoq və onların yaxınlaşması adlandırdığını əlavə edib. 

O, Papanın İraqa səfərini vacib hesab edib. 

Diplomatın sözlərinə görə, "xalqın qəhrəmanlığı, hakimiyyətin müdrikliyi və ekstremizm və xarici təsirlərlə mübarizədə tökülən qan sayəsində" bu gün İraqda bu cür görüşlər keçirmək mümkün olub.

Fransisk İraqa səfər edən ilk Roma Papasıdır.

0
Teqlər:
İran XİN, görüş, lider, şiə, səfər, İraq, Roma papası Fransisk